Доналд Трамп, президенти Амрико рӯзи ҷумъаи 29-уми сентябр бо нахуствазири Олмон гуфтугӯи телефонӣ намуда, масоили мухталиф, аз ҷумла вазъ дар Ховари Миён ва барномаи мушакии Эронро низ баррасӣ кардааст. Оқои Трамп дар ин тамоси телефонӣ пирӯзии ҳизби Ангела Меркел дар интихоботи ахири Олмонро ба ӯ табрик гуфт ва ба ӯ дар ташкили чаҳорумин кобина орзуи муваффақият кард.
Дар баёнияе, ки дар бораи ин гуфтугӯи телефонӣ дар торнамои расмии Кохи Сафед нашр шуд, омадааст, ки ҷонибҳо дар мавриди роҳҳои мубориза бо "фаъолиятҳои бадхоҳонаи Эрон дар Ховари Миёна" табодули назар кардаанд. Ин баёния мегӯяд, ки раҳбарони Амрико ва Олмон "масъалаи барномаи ҳастаиро баҳс намуда, ба пайравӣ накардани Эрон аз қатъномаҳои содирашуда аз сӯи СММ, ишора карданд."
Ангела Меркел дар тамоси телефонӣ бо Доналд Трамп, аз созиши ҳастаии шаш қудрати ҷаҳонӣ бо Эрон, ҳимоят кард. Доналд Трамп аз мунтақидони сарсахти ин созиш аст.
Эрон ҳамеша таъкид кардааст, ки барномаи тақвияти тавонмандиҳои мушакиаш масъалаи ҷудо аз созиши ҳастаӣ ё БАРҶОМ аст, ки бо қудратҳои ғарбӣ имзо кардааст. Ҳукумати Доналд Трамп ба ин бовар аст, ки идомаи фаъолиятҳои мушакии Эрон бар хилофи ин тавофуқ аст. Эрон низ Амрикоро ба аҳдшиканӣ муттаҳам мекунад.
Вақте, ки Эрон чанде рӯз қабл мушакеро бо бурди 2 ҳазор километр озмоиш кард, Доналд Трамп дар вокуниш бо ишора ба тавофуқи ҳастаӣ дар "Твиттер"-и худ навишт, "Эрон ҳоло мушаки дурпарвоз озмоиш кардааст, ки метавонад ба Исроил бирасад. Онҳо бо Кореяи Шимолӣ ҳамкорӣ мекунанд. Аҷаб созише бо ҳам дорем!" Доналд Трамп ахиран гуфта буд, ки дар робита ба пойбанд будани кишвараш ба ин созиши ҳастаӣ, тасмими худро гирифтааст ва онро дертар эълон хоҳад кард.
Бо вуҷуди интиқодҳои раиси ҷумҳури Амрико аз созиши ҳастаӣ бо Эрон, ба гузориши хабаргузории "Франс-пресс", хонум Меркел дар тамоси телефонии рӯзи ҷумъа бо Трамп, "бори дигар ба ҳимояти худ аз созиши ҳастаӣ таъкид кард" ва гуфт, "тавофуқи ҳастаӣ абзори муҳиме дар роҳи пешгирӣ аз муҷаҳҳаз шудани Эрон ба ҷангафзорҳои ҳастаӣ аст."
Муҳаммадҷавод Зариф, вазири умури хориҷии Эрон чанд рӯз пеш ба шабакаи телевизионии "Ал-Ҷазира" дар Ню-Йорк гуфт, ки агар Амрико аз тавофуқи ҳастаӣ берун шавад, Эрон низ ин ихтиёр ва дигар гузинаҳоро дар даст дорад. Алии Хоманаӣ, раҳбари Эрон пеш аз ин гуфта буд, ки "мо БАРҶОМ-ро нақз намекунем, вале агар амрикоиҳо онро пора кунанд, мо онро оташ мезанем."
