Амрико бинои консулгарии Русияро тафтиш мекунад?

Вазорати умури хориҷии Русия аз қасди мақомоти ҳифзи ҳуқуқи Амрико барои тафтиши бинои консулгарии Русия дар Сан-Франсиско ва маҳалли зисти кормандонаш дар ин макони дипломатӣ изҳори нигаронӣ кард. Мақомоти ин ниҳод гуфтанд, ки амалкарди Амрико “таҳдиди рӯйирост ба шаҳрвандонаш аст”.

​Мария Захарова, сухангӯи Вазорати умури хориҷии Русия, дар изҳороти рӯзи ҷумъа гуфт, қарор аст, ин бозрасӣ 2-юми сентябр анҷом шавад. Иёлоти Муттаҳида дар ҳафтаи ҷорӣ аз Русия хоста буд, ки консулгариаш дар Сан-Франсиско ва ду намояндагии тиҷоратиаш дар Вашингтону Ню-Йоркро бибандад ва барои ин то рӯзи шанбе мӯҳлат дод.

То ҳол мақомоти Вазорати умури хориҷии Амрико хабари қасди тафтиш дар бинои консулгарии Русиярро шарҳ надодаанд. Маълум нест, ки оё мақомоти ҳифзи ҳуқуқ, воқеан, нияти бозрасиро доранд, ё хайр.

Аммо як мақоми амрикоӣ дар ҷавоби хаттӣ ба Радиои Озодӣ гуфт, бинои консулгарӣ рӯзи шанбе баста шуда, Русия дигар ҳаққи истифодаи онро барои корҳои дипломатӣ ва зист надорад. “Бино баста мешавад ва фақат Вазорати умури хориҷии Амрико ба он дастрасӣ хоҳад дошт”, - гуфт ин мақоми амрикоӣ, ки нахост номаш бурда шавад.

Дар ҳамин ҳол, гузоришҳо баёнгари он аст, ки хуруҷи дуд аз дудбароҳои консулгарии Русия дар Сан-Франсиско боиси ҳузури оташнишонҳо дар наздикии ин бино шудааст. Ба гузориши расонаҳои Амрико, оташнишонҳо дар ин шаҳр тасдиқ кардаанд, ки кормандони консулгарӣ дар ҳоли сӯзондани бархе аз ашё ҳастанд.

Ба гузориш телевизиони CNN, як мақоми рус дар бораи берун шудани дуд аз дудбароҳои консулгарии Русия дар Сан-Франсиско гуфтааст, "ҷои нигаронӣ нест. Қарор нест, ки Поп интихоб бишавад."

Сергей Лавров, вазири умури хориҷии Русия, рӯзи гузашта эълон кард, ки ба муқобили иқдомоти ахири Амрико гомҳои ҷиддӣ ва муносиб бардошта хоҳад шуд.

Лавров ҳангоми сӯҳбат бо як гуруҳи муҳасслиин дар Маскав гуфт, “раиси ҷумҳур Владимир Путин чандин бор гуфтааст, ки мо намехоҳем, дар пархош бо Амрико даргир шавем. Мо дар баробари мардуми Амрико ҳамеша роҳи дӯстиро пеш гирифтаем ва ҳоло ҳам барои манфиатҳои худ ба ҳамкории босамар ҳозир ҳастем. Мо аз самими қалб мехоҳем, ки фазои сиёсии байни ду кишвар ба ҳолати одӣ баргардад. Вале медонем, ин монанди рақси “Танго” аст, ки ду тараф бояд дар он саҳм гирад. Вале барои ман чунин менамояд, ки тарафи Амрико якҷониба рақси “Брейк данс”-ро анҷом медиҳад.”

Талаби Амрико барои бастани консулгарии Русия дар Сан-Франсиско ва ду намояндагии тиҷоратиаш дар Вашингтону Ню-Йорк баъди он эълон шуд, ки рӯзи 28-уми маскав аз ИМА талаб кард, шумори ходимони дипломатиаш дар Русия бояд то 455 нафар коҳиш ёбад. Ин тасмим бояд то 1-уми сентябр иҷро мешуд.