Пайвандҳои дастрасӣ

Хабари нав

Баъди роҳбандӣ. Тасвиби созишнома бо Туркманистон


Cозишномаро соли гузашта дар Душанбе имзо карданд.

Маҷлиси намояндагони Тоҷикистон баъд аз як сол созишнома бо Туркманистонро тасвиб кард, ки зоҳиран сабаби мушкилот дар интиқоли молу колои Тоҷикистон буд.

Созишномаи дуҷониба дар бораи меъёрҳои ситонидани молиёти ғайримустақим ҳангоми содироту воридот ва иҷрои кору хадамотро моҳи гузашта вакилони мардумӣ баррасӣ карданд ва онро рӯзи 10-уми ноябр раиси маҷлис Шукурҷон Зуҳуров ба имзо расонидааст.

Вазорати молия, ки тарҳи санадро барои тасвиб пешниҳод кард, мегӯяд, ҳадаф аз иҷрои созишнома “бартараф кардани андозбандии дукарата аз фаъолияти соҳибкорони ду кишвар аст”, ки ин дар навбати худ ба афзоиши савдо миёни Тоҷикистону Туркманистон мусоидат мекунад.

Бино ба омори расмӣ, гардиши савдои хориҷӣ байни ду тараф бештар аз 50 миллион доллари амрикоиро ташкил додааст. Тоҷикистон дар он сол ба Туркманистон дар ҳаҷми 1 миллиону 500 ҳазор доллар молу маҳсулот содир карда ва дар ин муддат дар ҳаҷми тақрибан 49 миллион доллар мол ворид кардааст. Дар 8 моҳи гузашта ҳаҷми тиҷорати байни ду кишвар аз 37 миллион доллар гузаштааст.

Созишнома бо Туркманистон ду моҳ баъд аз он тасвиб шуд, ки Ашхобод аз моҳи август ба мошинҳои борбар ва қаторҳое, ки ба Тоҷикистон мол меоварданд, иҷоза надод, аз қаламраваш убур кунанд.

Садҳо мошину қатор, ки аз Туркияву Эрон ба Тоҷикистон мол меоварданд, дар марзи Эрон дармонданд ва соҳибкорони тоҷик зиёни бисёре диданд. Аз ҷумла қаторҳои ашёи хоми корхонаи “Талко”- ро низ ба Тоҷикистон роҳ надоданд ва дар натиҷа чанде аз дегҳои алюмингудозии корхона аз кор монд.

Баъди тақрибан як моҳ Туркманистон дигарбора роҳҳояшро барои мошинҳои борбар ва қаторҳои Тоҷикистон боз кард. Яке аз сабабҳои роҳ надоданро озурдагии раҳбарияти Туркманистон аз таъхир дар тасвиби созишнома медонанд, ки моҳи ноябри соли 2017 дар Душанбе имзо шуд ва дар Туркманистон онро баъди муддате тасвиб карданд.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG