Пайвандҳои дастрасӣ

Чаҳор корманди IRS-ро наҷот доданд, аммо...


Кормандони ширкати IRS ҳангоми поксозии роҳ ва ҷустӯҷуи ҳамкоронашон, ки зери тарма мондаанд.

Мақомоти ширкати Инноветив Роуд Солюшнз (IRS) – масъули нигоҳубини роҳи Душанбе – Хуҷанд гуфтанд, ки аз 7 кормандашон, ки рӯзи 18-уми феврал зери тарма монданд, 4 нафарашонро наҷот додаанд, вале кунун сарнавишти чаҳор нафари онҳо рӯшан нест.

Мақомоти ширкат субҳи 19-уми феврал бо нашри баёнияе гуфтанд, "хушбахтона, аз ашхоси бедаракшуда чор корманд аз зери тарма наҷот дода шуда, як нафари онҳо барои табобат ба бемористони ноҳияи Айнӣ фиристода шуданд." Далери Абдулло, намояндаи IRS гуфт, ки ҳашт корманд ва ду техникаи пуриқтидори онҳо дар ду мавриди тармафароӣ дар километри аз 48 то 84-ум зери тӯдаҳои азими барф мондаанд. Рӯзи шанбе дар масири Душанбе - Чаноқ беш аз 60 тарма фаромада ва хатари фалокат ҳамчунон бартараф нашудааст.

Тайи як моҳи охир бар асари фаромадани тарма дар роҳҳои кишвар 13 нафар ҷон бохтанд.

Ширкат аз кормандаш ному насаб набурд, вале гуфт, ки онҳо аз фаъолон буданд ва то лаҳзаи охир "кӯшиш ба харҷ доданд, ки тариқи бартараф намудани тарма барои ба роҳ мондани ҳаракати муназзаму бехатари мошинҳо саҳмгузор бошанд, вале худ қурбонии офати табиӣ шуданд." Масъулони Инноветив Роуд Солюшнз барфбории ахир ва фаромадани тарма дар ин масирро "бесобиқа" дониста ва гуфтанд, "дар натиҷа, дар ин айёми сол ҳатто сатҳи оби дарё баланд шудааст". Онҳо нигаронӣ карданд, ки баъзе ронандагону сокинон "ҷиддӣ будани таҳдиди офати табиӣ ва аҳамияти муваққатан баста шудани роҳро дуруст дарк накарда, бо ҳар васила мехоҳанд, онро убур намоянд."

Хавфи фаромадани тарма дар Хоруғ 200 оиларо аз хонаҳо берун кард

Мақомоти ширкати IRS ҷиддан аз ҳамаи шаҳрвандон хост, ки як муддат аз сафар тариқи роҳи Душанбе - Чаноқ худдорӣ кунанд. Як рӯз пеш мақомоти Кумитаи ҳолатҳои фавқулодаи Тоҷикистон хабар доданд, ки ду сокини шаҳри Хуҷандро аз панҷаи тарма раҳо кардаанд. Ба қавли онҳо, Шӯҳрат Аёнов (1982) ва Эҳсон Тоҳиров (1983) аз тарафи Хуҷанд ба самти Душанбе ҳаракат дошта, баробари фаромадани тарма дар зери тӯдаҳои барф мондаанд. Дар Кумитаи ҳолатҳои фавқулода гуфтанд, ки ба ҳардуи ин сокини Хуҷанд ёрии аввалияи тиббӣ расонда шуда, вале онҳо аз бистарӣ гардидан дар шифохона худдорӣ намудаанд.

Видеои аз зери тарма зинда берун кашидани ҷавони тоҷик:

Мақомот мегӯянд, бо вуҷуди огоҳиҳои батакрор дар бораи хатари фаромадани тарма дар роҳҳои мошингард бахусус дар минтақаҳои кӯҳӣ ҳанӯз сокинону ронандагон таваҷҷӯҳ намекунанд ва ҷони худро зери хатар мегузоранд. Масъулони Кумитаи ҳолатҳои фавқулода гуфтанд, ҳанӯз хатари резиши санг ва фаромадани тарма дар роҳҳо боқӣ мондааст.

"Бахусус, ин хатар дар роҳҳои мошингарди Душанбе-Айнӣ, Душанбе-Лахш, Душанбе-Сангвор, Душанбе–Хоруғ ва Хоруғ-Ишкошим бештар аз пештар эҳсос мешавад. Чунончӣ, рӯзи 17 феврал дар қаламрави ноҳияҳои Дарвоз, Ванҷ, Рӯшон, Шуғнон, ва Ишкошими вилояти Бадахшон, Лахш ва Ҷиргатоли минтақаи Рашт ва аз километри 54 то 72-и роҳи мошингарди Душанбе-Хуҷанд резиши санг ва лағзиши тарма ба қайд гирифта шуд. Дар айни замон ҳаракати мошинҳо дар ин роҳҳо қатъ шудаанд", - таъкид шудааст дар огоҳии Кумитаи ҳолатҳои фавқулода.

Тамоси охирини Давлат аз зери тарма:

Тайи як моҳи охир бар асари фаромадани тарма дар роҳҳои кишвар 13 нафар ҷон бохта, чанд тани дигар аз зери тӯдаҳои барф наҷот дода шуданд. Мақомот мегӯянд, танҳо дар моҳи январи имсол беш аз 250 тарма фаромадааст ва онҳо барои рафъи паёмадҳои ин офати табиӣ аз кишвару созмонҳо ёрӣ хостаанд.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG