Пайвандҳои дастрасӣ

Хабари нав

Дар чанд ҷумла

Парвандаи таҷовуз ба номуси духтари 15-сола дар Узбекистон

Як марди 57-солаи сокини шаҳри Ширини Узбекистон дар таҷовузи духтари ҳамсояаш гумонбар мешавад. Бародари духтари таҷовузшуда, мегӯяд, марди гумонбар бо наздиконаш "талоши бастани парвандаро доранд".

Мақомоти милиса гуфтанд, баъди ҳодиса духтар дар бемористон бистарӣ ва тафтишот шуруъ шудааст.

Шоҳидон мегӯянд, марди 57-сола ба маҳзи огаҳӣ ёфтан дар бораи ин ки духтар дар хона танҳо аст, аз болои девор вориди манзили ҳамсоя шудааст.

Вакили мудофеи ҷабрдида мегӯяд, сарфи назар аз шоҳидии ҳамсояҳо, мақомот мехоҳанд, ин парвандаро ҳамчун "авбошӣ" унвон кунанд.

Ҳамаи хабарҳои имрӯзро дар инҷо бихонед

Қароқалпоқистониҳои муқими Алматоро ба бозпурсӣ даъват мекунанд

Нооромиҳо дар Қароқалпоқистони Узбекистон.

Сокинони Қароқалпоқистон, ки дар шаҳри Алматои Қазоқистон кору зиндагӣ мекунанд, барои бозпурсӣ ба мақомоти ҳифзи ҳуқуқ даъват шудаанд.

Корманди Бюрои ҳомии ҳуқуқи Алмато Андрей Гришин 4 июл гуфт, фаъолони қароқалпоқистонӣ нишасти хабариеро, ки бояд дар шаҳр баргузор мекарданд, ба таъхир гузоштанд. Ба гуфтаи Гришин, 4 созмондиҳандаи ин нишастро ба бозпурсӣ даъват карданд.

"Имрӯз ба ман аз Департаменти пулиси Алмато занг зада, ба бозпурсӣ даъват карданд. Ман аз онҳо пурсидам, ки чӣ мехоҳанд, ман ягон қонунро поймол накардаам ва ҳоло намедонам, ки меравам ё не. Онҳо гуфтанд, ки тавони иҷборан ҳозир кардан ба бозпурсиро доранд. Ин даъват баъди изҳоротҳои ман дар робита ба Қароқалпоқистон сурат гирифт", - изҳор дошт як зодаи Қароқалпоқистон, ки дар Алмато аст.

Ба гуфтаи ҳамсуҳбати бахши қазоқии Радиои Озодӣ, кормандони пулиси Алмато гуфтаанд, ки ӯро дар робита ба банди панҷи Конститутсияи Узбекистон даъват мекунад.

Сарони Осиёи Миёна дар Қирғизистон ҷамъ мешаванд

Акс аз бойгонӣ.

Мулоқоти навбатии машваратии сарони кишварҳои Осиёи Миёна 21 июл дар Қирғизистон баргузор хоҳад шуд.

Ба иттилои дафтари матбуотии президенти Қирғизистон, раисҷумҳур Содир Ҷабборов 4 июл дар як суҳбати телефонӣ бо ҳамтои узбекаш Шавкат Мирзиёев масъалаҳои марбут ба омодагиҳо ба нишаст ва рӯзномаи онро баррасӣ кардааст.

Манбаъ афзудааст, ки "тамоми раҳбарони кишварҳои Осиёи Марказӣ аллакай даъватро пазируфтаанд".

Мусобиқаи ғайриодии Дилрабо ва ҳамтақдиронаш дар Душанбе

Сабқати шахсони маълул дар Душанбе

Дар як мусобиқаи ғайриодӣ дар Душанбе рӯзи 4-уми июл шахсони маъюб ё имконияташон маҳдуд байни ҳам қувва озмуданд.

Дилрабо Эрматова, маъюби гуруҳи дуюм, дар дастхобонӣ миёни духтарон пирӯз шуд. Ӯ мегӯяд, баргузории чунин маъракаҳо барояшон нерӯ мебахшад.

Тақрибан сад ҳамтақдири Дилрабо дар баробари дастхобонӣ дар мусобиқаи баскетбол бо аробача ва бадминтон низ нерӯи худро санҷиданд.

Ғайрат Тухтасунов, мураббии баскетбол бо аробаи маъюбӣ, аз он изҳори ташвиш кард, ки бо вуҷуди талошҳои зиёд шахсони маълул мушкилҳои ҳалношудаи зиёде доранд.

Ӯ мегӯяд, шаш сол пеш гурӯҳеро таъсис дод, ки бо ароба баскетбол мебозанд, вале ба сабаби набудани ёрии кофӣ дар ҳоли аз байн рафтан аст.

"Ҳоло ба ароба ниёз дорем. Варзишгарон барои тамрин ва мусобиқаҳо аз он истифода мекунанд. Агар онҳо хоҳанд, ки оянда ин навъи варзиш рушд кунад, ба мо кумак кунанд, вагарна аз байн меравад," -- афзуд ҳамсуҳбати мо.

Ҳар сол ҳаштуми июл рӯзи шахсони маълул таҷлил карда мешавад. Ин қишри ҷомеа умед доранд, ки бо баҳонаи ҷашн масъулон ба мушкили онҳо расидагӣ ва ё ҳадди ақал таваҷҷуҳ хоҳанд кард.

Дар Тоҷикистон беш аз 150 ҳазор нафар ҳамчун маъюб ё шахсони дорои имкониятҳои маҳдуд сабт шудаанд. Зиёда аз 27 ҳазори онҳо то 18-сола ҳастанд.

Баъзе аз маъюбон мегӯянд, бо шароиту нафақае, ки ҳоло доранд, зиндагӣ кардан душвор аст. Мақомот мегӯянд, онҳо аз имтиёзҳое чун ҳаракати ройгон дар нақлиёти иҷтимоӣ, пардохти нисфи пули телефони хонагӣ баҳравар буда, андози заминро ҳам намедиҳанд, вале маъюбон онро нокофӣ медонанд.

Суҳбати Раҳмон ва Мирзиёев дар бораи Қарақалпоқистон. ВИДЕО

Эмомалӣ Раҳмон ва Шавкат Мирзиёев. Акс аз бойгонӣ

Раиси ҷумҳури Тоҷикистон дар пайванд ба ҳодисаи Қарақалпоқистон, ки даҳҳо куштаву захмӣ барҷой гузошт, ибрози назар кардааст.

Эмомалӣ Раҳмон рӯзи 4-уми июл дар суҳбати телефонӣ бо президенти Узбекистон, Шавкат Мирзиёев, гуфтааст, "аз талошҳои роҳбарияти Узбекистон барои ба эътидол овардани вазъ дар Қарақалпоқистон" ҷонибдорӣ мекунад.

Дафтари матбуоти президенти Тоҷикистон мегӯяд, тарафҳо "амнияти минтақаӣ ва ҳамкории ду кишварро дар чаҳорчӯби созмонҳои байнулмилалӣ" низ баррасӣ карданд. Тафсилоти суҳбат маълум нест.

Мақомоти Узбекистон мегӯянд, дар ҷараёни нооромиҳои 1 ва 2-юми июл дар Ҷумҳурии мухтори Қарақалпоқистон 18 кас кушта, беш аз 243 нафар захмӣ ва зиёда аз 500 тан дастгир шуданд.

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд. Тарҳи нави Конститутсияи Узбекистон 26-уми июн ба баррасии умум гузошта шуд.

Иттиҳоди Аврупо дар изҳороте рӯзи 4-уми июл хост, тазоҳуроти олуда ба хушунат дар Қарақалпоқистон мустақилона таҳқиқ шавад. Дар изҳорот аз "ҳамаи ҷонибҳо" хостаанд, ки хештандорӣ нишон дода, аз хушунатҳо дар оянда пешгирӣ кунанд.

Иттиҳоди Аврупо аз мақомоти Узбекистон даъват кардааст, тибқи масъулиятҳои байнулмилалии худ риояи ҳуқуқи одамон ва бахусус ҳуқуқи бунёдӣ ба озодии баёну гирдиҳамоиро замонат бидиҳанд.

Дар Қарақалпоқистон чӣ гузашт? Инҷо бинед:

18 кушта ва 243 захмӣ дар Қароқалпоқистон
лутфан мунтазир бошед

Феълан кор намекунад

0:00 0:01:37 0:00

Ҷумҳурии мухтори Қарақалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Ҷанги Русия дар Украина ба Донетск "кӯчид"

Словянск

Баъд аз як рӯзи ишғоли шаҳри Лисичанск ва тамоми вилояти Луганск дар Украина, нерӯҳои Русия ҳамла ба Словянск – шаҳри муҳим дар вилояти Донетскро идома доданд.

Вадия Лях, шаҳрдори Словянск, дар Фейсбук навишт, ки шаҳр зери мушакборон қарор гирифтааст ва дар натиҷа камаш 6 нафар кушта ва 15 тани дигар маҷруҳ шудаанд.

Дар байни кушташудагон як кӯдак низ будааст.

Русия ишғоли шаҳри Словянскро, ки қабл аз ҷанг 107 ҳазор нафар аҳолӣ дошт, бисёр муҳим мешуморад, чун онро ҷудоиталабони таҳти ҳимояти Русия соли 2014 ишғол карданд, вале се моҳ пас украиниҳо онро дигарбора гирифтанд.

Русия баъди нокомӣ дар ишғоли Киев ба тассаруфи минтақаи саноатии Донетск дар шарқи Украина тамаркуз кардааст.

Иттиҳоди Аврупо хост, ҳодисаи Қароқалпоқистон таҳқиқ шавад

Шаҳри Нуқус, Қароқалпоқистон

Иттиҳоди Аврупо дар изҳороте рӯзи 4-уми июл хост, тазоҳуроти олуда ба хушунат дар Қароқалпоқистон, Ҷумҳурии мухтор дар Узбекистон, мустақилона таҳқиқу арзёбӣ шавад.

Мақомоти Узбекистон мегӯянд, дар ҷараёни нооромиҳои 1 ва 2-юми июл дар ин ҷумҳурии мухтор 18 кас кушта, беш аз 243 нафар захмӣ ва зиёда аз 500 тан дастгир шуданд.

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд.

Дар изҳороти Иттиҳоди Аврупо аз талафоти ҷонӣ дар ҳодисаи Қароқалпоқистон ибрози таассуф шудааст. “Мо таҳаввулотро бодиққат пайгирӣ мекунем," – гуфтаанд дар изҳорот.

Иттиҳоди Аврупо аз “ҳамаи ҷонибҳо” хостааст, хештандорӣ нишон диҳанд ва аз хушунатҳо дар оянда пешгирӣ кунанд.

“Иттиҳоди Аврупо аз мақомот даъват мекунад, ҳуқуқи инсон, аз ҷумла ҳуқуқи бунёдӣ ба озодии баён ва озодии гирдиҳамоиро тибқи масъулиятҳои байнулмилалии Узбекистон кафолат бидиҳанд,” – омадааст дар изҳорот.

Тазоҳурот дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҷумҳурии мухтори Қароқалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Қазоқистон иҷозат намедиҳад, қароқалпоқистониҳо ба ватан баргарданд

Сарҳади Қазоқистону Узбекистон

Шаҳрвандони Қароқалпоқистон, ки 3-юми июл хостаанд, аз вилояти Мангистауи Қазоқистон ба ватани худ раванд, гуфтанд, пулис аз онҳо дар назди марз талаб кардааст, дубора ба маҳалли зисташон баргарданд.

Пештар хабар дода шуд, ки беш аз 100 шаҳрванди Қароқалпоқистон натавонистанд аз ноҳияи Бейнеуи Мангистау ба ватан баргарданд.

"Шаби якшанбе кормандони пулиси Бейнеу моро дар роҳ боз дошта, гуфтанд, ки ба маҳалли зисти худ баргардед, марз ҳоло боз намешавад", - изҳор дошт як сокини Қароқалпоқистон ба шарти ифшо нашудани номаш.

Ба гуфтаи вай, маъмурони пулис ҳамчунин аз онҳое, ки дар назди марз барои баргаштан ба Қароқалпоқистон ҷамъ шуда буданд, хостанд, пароканда шаванд.

"Барои кор ба Қазоқистон омадаам. Падару модарам дар Нуқус зиндагӣ мекунанд. Ҳоло марз бастааст ва майли кор кардан ҳам дигар нест. Намедонем, чӣ кор кунем. Дар бораи он чи ки дар Қароқалпоқистон мегузарад, ба ҷаҳониён хабар диҳед", - изҳор дошт як ҳамсуҳбати Радиои Озодӣ. ​

Тазоҳуроти бемуҳлат бо талаби пайвастан ба Иттиҳоди Аврупо дар Гурҷистон

Гурҷистон

Даҳҳо ҳазор сокини минтақаҳои гуногуни Гурҷистон баъди ба поён расидани муҳлати иҷрои шартҳои гузошташуда ба мақомот дубора дар назди бинои порлумони он кишвар дар шаҳри Тифлис (Тбилиси) ҷамъ шуданд.

Бар асоси шартҳои гузошташуда, бояд сарвазири Гурҷистон Ираклий Гарибашвилӣ то рӯзи якшанбе аз мақомаш истеъфо медод. Ҳамчунин ӯ ва ҳизби ҳокими "Орзуи гурҷӣ" ризояти худро ба таъсиси "ҳукумати фаннӣ"-и эътимоди мардумӣ барои иҷрои дувоздаҳ шарти Иттиҳоди Аврупо баён мекарданд.

Тазоҳургарон гуфтанд, то истеъфои ҳукумати Гарибашвилӣ дар хиёбонҳо мемонанд. Тазоҳурот ба таври осоишта ҷараён дошта, дар он сурудҳои гурҷӣ ва украинӣ садо медиҳанд.

Қаблан дар Брюссел гуфта буданд, Гурҷистон чанд шартро иҷро накардааст ва бинобар ин, ба монанди Украина ва Молдова мақоми номзади узвият дар Иттиҳоди Аврупоро дарёфт нахоҳад кард.

Дар Қирғизистон сарбозе аз захми тир ҷон додааст

Вазорати дифои Қирғизистон хабар додааст, ки 4-уми июл як сарбози қисми низомии №73809-и ин ниҳод ба ҳалокат расидааст.

Бино ба фарзияи вазорат, сарбози қаторӣ, соли таваллудаш 2000-ум, "ҳангоми адои вазифаи посбонӣ дар натиҷаи беэҳтиётӣ бо силоҳ аз тири тасодуфӣ захмӣ шуда, дар маҳалли ҳодиса ҷон бохтааст".

Барои муайян кардани сабабҳои ҳодиса комиссия ташкил шуда, парвандаро Додситонии низомии Қирғизистон тафтиш мекунад.

Наздикони сарбоз дар суҳбат бо расонаи "Kaktus.media" гуфтаанд, мақомот ҳалокати фарзанди онҳоро то ҳол шарҳ надодаанд.

"Сарбоз шаби 3 ба 4-уми июл бо модараш суҳбати телефонӣ карда ва баъди ду соат ин ҳодиса рух додааст. Ҳангоми шиносии ҷасад дар бадани ӯ захми ду тирро дидаанд. Касе бовар надорад, ки ӯ аз тири тасодуфӣ кушта шудааст", - изҳор доштааст холаи сарбоз Индира Рисалиева дар суҳбат ба бахши қирғизии Радиои Озодӣ.

Боздошти муҳоҷирони ҳамраъй бо тазоҳургарони Қароқалпоқистон

Қазоқистон

Даҳҳо нафар дар шаҳри Атирауи Қазоқистон рӯзи 1-уми июл ва дар пайи як тазоҳуроти худҷӯш боздошт шудаанд. Пулиси Атирау хабар дод, ки бештари боздоштшудаҳо пас аз бозпурсӣ раҳо шуданд.

Бино ба иттилои расонаҳои маҳаллӣ, муҳоҷирон аз Ҷумҳурии худмухтори Қароқалпоқистони Узбекистон ба нишони ҳамраъйӣ бо ҳамватанони норозии худ дар Атирау тазоҳурот баргузор кардаанд.

"Дар майдони шаҳр ҳудуди 75 кас ҷамъ шуд. Онҳо гирдиҳамоии ғайриқонунӣ ташкил карданд. Бештари онҳоро раҳо кардем ва бархеи дигар мунтазири ҳукми додгоҳ ҳастанд", - иттилоъ додааст пулиси Атирау.

Манбаъ афзудааст, ки дар миёни боздоштшудаҳо шаҳрвандони кишварҳои хориҷии дигар низ ҳаст.

Сокинони Қароқалпоқистон ба зидди тағйиру иловаҳо ба Конститутсияи Узбекистон эътироз карданд, ки рӯзи 26-уми июн барои баррасӣ ба муҳокимаи умум пешниҳод шуд.

Дар тағйиру ислоҳот дар тарҳи нави Қонуни асосии Узбекистон дар банди мақоми Қароқалпоқистон калимаи "мустақил"- ро бардоштаанд ва дар он ишорае ба ҳаққи ҷудо шудани ин ҷумҳурии мухтор аз қаламрави Узбекистон нест. Дертар порлумони Узбекистон гуфт, мухторияти Қароқалпоқистон дар Қонуни асосӣ ҳифз хоҳад шуд.

40 кишвар нақшаи бозсозии Украинаро баррасӣ мекунанд

Ҳайатҳои дастикам 40 кишвар, созмонҳои байнулмилалӣ ва соҳибкорон дар конфронсе, ки рӯзи душанбе дар Луганои Швейтсария оғоз шуд, роҳҳои асосии бозсозии баъдиҷангии Украинаро баррасӣ хоҳанд кард.

Ба иттилои хабаргузории "Франс пресс", конфронс танҳо ба ҷамъоварии ёриҳо бахшида нахоҳад шуд. Иштирокдорон роҳҳои асосии бозсозии Украинаро, ки бояд пеш аз хатми ҷанг оғоз шавад, ҷустуҷӯ мекунанд. Сухан аз "нақшаи Маршал"-барномаи ҳамсони барқарорсозии Аврупо баъд аз Ҷанги ҷаҳонии дувум меравад.

Украинаро дар конфронс раиси ҳукумат ва вазири умури хориҷии он кишвар -- Денис Шмихал ва Дмитрий Кулеба намояндагӣ мекунанд.

Президенти Украина Владимир Зеленский дар ҳамоиш онлайнӣ иштирок хоҳад кард. Раиси Комиссияи Аврупо Урсула фон дер Лайен ҳам дар конфронс иштирок мекунад.

Ба гуфтаи манобеи "Франс Пресс", Бонки аврупоии таҷдид ва рушд ният дорад, барои сармоягузории бозсозии Украина як фонди нав таъсис диҳад. Он метавонад аз аъзои Иттиҳоди Аврупо ва кишварҳои дигари ҷаҳон тақрибан 100 миллиард евро ҷамъ намояд.

"Мустақилӣ"-и Қароқалпоқистон дар Конститутсияи Узбекистон мемонад

Тазоҳурот дар Қароқалпоқистон

Порлумони Узбекистон тасмим гирифтааст, ки мақоми "мухтор"-и Ҷумҳурии Қароқалпоқистон дар тарҳи Конститутсияи ин кишвар ҳифз карда шавад. Ин тасмим рӯзи 4-уми июл ва дар пайи эътирози сокинони Қароқалпоқистон гирифта шуд.

"Президенти Узбекистон Шавкат Мирзиёев дар вохӯрӣ бо вакилони порлумон ва намояндагони ҷомеаи шаҳрвандӣ зикр кард, ки ҳамаи пешниҳодҳо бояд ба инобат гирифта шаванд", - омадааст дар иттилоияи порлумони Узбекистон.

Сокинони Қароқалпоқистон ба зидди тағйиру иловаҳо ба Конститутсияи Узбекистон эътироз карданд. Матни ислоҳҳо рӯзи 26-уми июн барои баррасӣ ба муҳокимаи умум гузошта шуд. Дар банди вобаста ба мақоми Қароқалпоқистон калимаи "мустақил"-ро бардоштаанд ва дар он ишорае ба ҳаққи ҷудо шудани ин ҷумҳурии мухтор аз қаламрави Узбекистон нест.

Раисиҷумҳури Узбекистон рӯзи 2-юми июл гуфт, ислоҳи панҷ моддаи Конститутсияи Узбекистон, ки ба истиқлоли Қароқалпоқистон пайванд дорад ва боиси норозигии мардум шудааст, "бетағйир гузошта шавад".

Ҷумҳурии Қароқалпоқистон 40 дар сади қаламрави Узбекистонро ташкил медиҳад ва аҳолиаш тақрибан 2 миллион нафар аст. Забони расмии он қароқалпоқӣ ва узбекӣ аст. Дар солҳои аввали Шӯравии собиқ Вилояти Мухтори Қароқалпоқистон вуҷуд дошт, ки соли 1936 ба қаламрави Узбекистон ҳамроҳ карда шуд.

Дар оғози солҳои 90-ум, баъди пошхӯрии Шӯравӣ, Шӯрои Олии Қароқалпоқистон Эъломияи истиқлол қабул кард ва соли 1993 аҳдномаи байнидавлатӣ дар бораи ба қаламрави Узбекистон ворид шудани Қароқалпоқистон имзо шуд. Маҳз дар ҳамин аҳднома ҳаққи берун шудани Қароқалпоқистон аз ҳайати Узбекистон зикр шудааст ва айни чиз дар Конститутсияи Узбекистон низ ҳаст.

Фоиза Ҳошимӣ ба “таблиғот алайҳи низом” муттаҳам шуд

Фоиза Ҳошимӣ

Дар Эрон духтари раиси ҷумҳури собиқ Акбар Ҳошими Рафсанҷониро ба “фаъолияти таблиғотӣ алайҳи низом” ва “тавҳин ба муқаддасот” муттаҳам карданд.

Додситонии Теҳрон рӯзи 3-юми июл гуфт, амри боздошти Фоиза Ҳошимӣ, вакили собиқи 59-сола ва ҳомии ҳуқуқро содир кардаанд, вале ҳоло маълум нест, ки ӯ дастгир шудааст ё не.

Иттиҳомот ба зидди ӯ зоҳиран аз баёнияаш зимни гуфтугӯ дар шабакаҳои иҷтимоӣ бармехезад, ки гуфтааст, “ҳазфи номи Сипоҳи Посдорони Инқилоби Исломии Эрон аз феҳрасти таҳримоти Амрико бар манофеи миллӣ ва ҷомеаи Эрон нест.”

Ин талаби Эрон яке аз монеаҳои аслӣ дар эҳёи созиши атомии соли 2015 бо Эрон аст.

Бино ба гузоришҳо, Фоиза Ҳошимӣ ҳамчунин гуфтааст, Ҳазрати Муҳаммад пайғамбари ислом худаш фаъолияти иқтисодӣ надошт ва дар иваз сарвати ҳамсараш Хадичаро сарф кардааст. Ӯ баъдан гуфтааст, бо ин гапаш қасди тавҳин ба касе надошт ва фақат як шӯхӣ кардааст.

Фоиза Ҳошимӣ соли 2012 бо иттиҳоми “таблиғот ба зидди низом” ба ним соли зиндон маҳкум шудааст. Падари ӯ Акбар Ҳошими Рафсанҷонӣ аз соли 1989 то соли 1997 раиси ҷумҳури Эрон буд ва соли 2017 даргузашт.

навшуда

18 кушта ва 243 захмӣ дар Қароқалпоқистон. ИА хост, мустақилона таҳқиқ кунанд. ВИДЕО

Додситонии кулли Узбекистон рӯзи 4-уми июл гуфт, дар нооромиҳо дар шаҳри Нуқуси Ҷумҳурии мухтори Қароқалпоқистон 243 нафар, аз ҷумла 38 корманди мақомоти ҳифзи ҳуқуқ захмӣ шуда, 18 кас ба ҳалокат расидааст.

Як рӯз пеш раисиҷумҳури Узбекистон дар бораи талафот дар миёни мардуму низомиён хабар дода, аммо рақамеро ба забон наовард. Сомонаи "Дарё" дар Узбекистон рӯзи якшанбе аз қавли як "мансабдори вазорат" навишт, ки "беш аз 1000 эътирозгар захмӣ шудааст."

Мардум мегӯянд, ба зидди ислоҳи Конститутсияи Узбекистон, ки мустақилии онҳоро аз байн мебурд, тазоҳурот карданд. Мақомот онро ғайриқонунӣ ва кӯшиши ғасби идораҳои давлатӣ номиданд.

Расонаҳои Узбекистон рӯзи душанбе бо такя ба сардори хадамоти иттилооти Горди миллии он кишвар, Даврон Ҷумъаназаров, хабар доданд, ки дар ҷараёни бетартибиҳои мазкур 516 кас дастгир шуд. Нисбат ба баъзе онҳо тафтишот идома дошта, иддае ба ҷавобгарии маъмурӣ кашида шудаанд.

Ҳамчунин 58 нафарро барои риоя накардани қуюди шабгардӣ дар шаҳри Нуқус боздошт кардаанд.

"Дар натиҷаи бертартибиҳои оммавии рӯзҳои 1 ва 2-юми июл 243 нафар бо захмҳои гуногун ба бемористон муроҷиат карданд. Дар ҳоли ҳозир 94 нафар дар беморхона бистарӣ буда, вазъи бархеашон, аз ҷумла кормандони ҳифзи ҳуқуқ, вазнин аст. Барои намуна, як фармондеҳи Горди миллии Қароқалпоқистон се захми тир бардоштааст ва пойи як фармондеҳи дигар шикастааст," - иттилоъ дод Ҷумъаназаров.

Иттиҳоди Аврупо рӯзи 4-уми июл хост, тазоҳуроти олуда ба хушунат дар Қароқалпоқистон мустақилона таҳқиқу арзёбӣ шавад. Дар изҳорот аз талафоти ҷонӣ ибрози таассуф шуда, аз “ҳамаи ҷонибҳо” хоста шудааст, хештандорӣ нишон диҳанд ва аз хушунатҳо дар оянда пешгирӣ кунанд.

"Иттиҳоди Аврупо аз мақомот даъват мекунад, ҳуқуқи инсон, аз ҷумла ҳуқуқи бунёдӣ ба озодии баён ва озодии гирдиҳамоиро тибқи масъулиятҳои байнулмилалии Узбекистон кафолат бидиҳанд," – омадааст дар изҳорот.

Наворро дар инҷо бинед:

18 кушта ва 243 захмӣ дар Қароқалпоқистон
лутфан мунтазир бошед

Феълан кор намекунад

0:00 0:01:37 0:00

Тазоҳурот дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

Ҷумҳурии мухтори Қароқалпоқистон дар ҳудуди Узбекистон тақрибан ду миллион аҳолӣ дорад ва чиҳил дарсади қаламрави ин кишвари Осиёи Марказиро ташкил медиҳад.

Феълан дар Қароқалпоқистон, як ҷумҳурии мухтор дар ҳудуди Узбекистон вазъи фавқулода ҷорӣ шудааст ва то 2-юми августи имсол идома хоҳад кард.

Эълони рӯзи Иди Қурбон дар Тоҷикистон

Намози Иди Қурбон дар Тоҷикистон. Акс аз соли 2021

Шӯрои уламои Маркази исломӣ, танҳо ниҳоди содиркунандаи фатво дар Тоҷикистон, рӯзи Иди Қурбон (Азҳо)-ро эълон кард. Бино ба қарори Шӯро, ид рӯзи шанбеи 9-уми июл таҷлил хоҳад шуд.

Саидмукаррам Абдуқодирзода, раиси Шӯрои уламо, дар баёнияе рӯзи 4-уми июл гуфт, ин санаро "мувофиқи далелҳои илмӣ ва бар асоси хулосаи Пажӯҳишгоҳи астрофизикаи Академияи миллии илмҳо" таъин карданд.

Ба қарори Шӯрои уламо, намози ид соати шаши субҳ хонда хоҳад шуд. Аз имомхатибон хоста шудааст, дар мавъизаҳояшон дар бораи оромӣ ва мадад ба ятимону пирон суҳбат кунанд.

Иди Қурбон, яке аз ду иди мусулмонӣ, солҳо боз дар Тоҷикистон истироҳати расмӣ эълон шудааст. Дар ин рӯз сокинон барои адои намоз ба масҷидҳо рафта, сипас, онҳое, ки тавон доранд, ба қурбонӣ ва дигарон барои зиёрати қабри гузаштагону аёдати хешутабор мераванд.

Дар ҳамла ба як маркази савдо дар Дания се кас кушта шуданд

Рӯзи якшанбеи 3-юми июл дар пайи тирандозӣ дар як маркази савдо дар шаҳри Копенгаген -- пойтахти Дания се тан кушта ва чандин тани дигар захмӣ шуданд. Як масъули пулиси ин шаҳр ба хабарнигорон гуфт, ки ҳамлавар як марди 22-солаи даниягӣ аст ва пас аз тирандозӣ боздошт шуд. Ӯ афзуд, нишонаҳое вуҷуд дорад, ки фарди дигаре ҳам дар ин ҳодиса даст дорад, аммо пулис дар ин бора ҳанӯз саргарми таҳқиқ аст. Дар бораи ангезаҳои ин ҳодиса ҳанӯз чизе гуфта нашудааст.

Оҷонси зидди фасоди Қазоқистон рӯзноманигор Махамбет Абжанро дастгир кардааст

Расонаҳои маҳаллии Қазоқистон 3-юми июл хабар доданд, ки рӯзноманигор Махамбет Абжан дастгир шудааст.

Оҷонси мубориза зидди фасоди Қазоқистон субҳи якшанбе дар шарҳи ин хабар гуфтааст, шаҳрванд М. Абжан ба "тамаъҷӯӣ дар ҳаҷми махсусан калон аз як соҳибкор бо таҳдиди нашри маълумоти бадномкунанда дар расонаҳо" айбдор мешавад.

Ба иттилои оҷонс, рӯзноманигор дар натиҷаи як амалиёти "махсус" дастгир шуда, дар ҳоли ҳозир дар боздоштгоҳи шаҳри Нурсултони Қазоқистон нигаҳдорӣ мешавад.

Абжан ахиран гуфта буд, ки дар расонаҳои маҳаллӣ зидди ӯ "матлабҳои фармоишӣ" нашр мешаванд.

Махамбет Абжан ҳодисаҳои моҳи январи Қазоқистонро бозтоб мекард ва дар доираи парвандаи "нашри маълумоти дуруғ" ҳамчун шоҳид бозпурсӣ мешуд.

Русия 47 ҳазор муҳоҷири қирғизро "афв" кардааст

Русия номи ҳудуди 47 ҳазор шаҳрванди Қирғизистонро аз "рӯйхати сиёҳ"-и хориҷиҳо, ки ҳаққи сафар ба он кишварро надоранд, берун кардааст.

Ба огаҳии Вазорати умури хориҷии Қирғизистон, сафари гуруҳи шаҳрвандони ин кишвар, ки ба далели қоидавайронкунии "ночиз"-и маъмурӣ ба Русия манъ шуда буд, дубора иҷозат дода шудааст.

Манбаъ афзудааст, ки 35 ҳазор қирғизистонии дигар аз ҳаққи сафар ба Русия ҳамоно маҳрум мебошанд.

Расонаҳо охирҳои моҳи майи имсол хабар дода буданд, ки номи 82 ҳазор шаҳрванди Қирғизистон дар "рӯйхати сиёҳ"-и мақомоти Русия қарор дорад.

Созмонҳо хомӯшанд, даъватҳои ҷудогона барои раҳоии Далери Имомалӣ ва Абдуллоҳ Ғурбатӣ

Далери Имомалӣ ва Абдуллоҳ Ғурбатӣ

Бо гузашти ду ҳафта аз қарори ҳабси хабарнигорону блогерон, Далери Имомалӣ ва Абдуллоҳ Ғурбатӣ, созмонҳои ҳомии ҳуқуқи рӯзноманигорон дар Тоҷикистон дар робита ба қазияи онҳо изҳороте надоданд. Айни замон баъзе аз рӯзноманигорон дар алоҳидагӣ хоҳони раҳоӣ ё баррасии одилонаи парвандаашон шудаанд.

Абдуқодири Рустам, рӯзноманигор ва нависандаи тоҷик, рӯзи 2-юми июл тавассути Фейсбук ба пуштибонӣ аз онҳо садо баланд кард. Ӯ навишт, "Далер ва Абдуллоҳро озод кунед! Бо истинод ба қонун қонуншиканӣ накунед, барои ҳимоят аз худ ҳуқуқи дигаронро поймол насозед! Суханро намешавад зиндонӣ кард!"

Дар ҳамин рӯз, Ҳуриннисо Ализода, рӯзноманигор ва раиси Шӯрои Васоити Ахбори Оммаи Тоҷикистон, низ дар паёме дар Фейсбук гуфт: "Зиндонӣ кардани забони журналистика роҳи ҳалли масоили иҷтимоӣ нест. Агар ҷурми дигаре ҳаст, бояд ҷомеа бидонад. Ҷомеа ба иттилои саҳеҳ ҳақ дорад, на ба тахминзанӣ, тарс ва дилхунукӣ!"

Аз он пеш, 29-уми июн, Абдуқодир Талбаков, рӯзноманигор ва мудири Китобхонаи ба номи Лоҳутии пойтахт, хоҳони расидагии "холисона"-и Додситонии кул ва Маҷлиси Миллӣ ба қазияи Далери Имомалӣ ва Абдуллоҳ Ғурбатӣ шуд, то ба гуфтааш, "эътиқоди мардум аз волоияти қонун, ҷомеаи демократӣ, нерӯи ҷомеаи шаҳрвандӣ коста нашавад."

Далери Имомалӣ ва Абдуллоҳ Ғурбатӣ рӯзи 15-уми июн дастгир ва 18-уми июн ба ду моҳ ҳабси пешакӣ гирифта шуданд. Мақомот Далери Имомалиро ба "соҳибкории ғайриқонунӣ", "дурӯғпароканӣ" ва "пайравӣ аз созмонҳои мамнуъ" ва Абдуллоҳ Ғурбатиро ба ҳамла ба маъмури милиса гумонбар донистанд. Онҳо бахши асосии иттиҳомҳоро напазируфтаанд.

Боздошти Далери Имомалӣ ва Абдуллоҳ Ғурбатӣ, ки ҳамроҳ барои Ютюб гузориш омода мекарданд, вокунишҳои зиёдро ба миён овард. Чанд созмони байнулмилалӣ, аз ҷумла Human Rights Watch аз мақомот хостанд, иттиҳоми зидди ду блогерро бекор карда, онҳоро озод намоянд.

Мақомот чизе намегӯянд. Ба парвандаи Далери Имомалӣ муҳри махфӣ задаанд ва вакили мудофеъ забонхат додааст, ки дар бораи парванда ҷузъиёт намедиҳад.

  • Дар тақрибан ду моҳи охир дар Тоҷикистон камаш панҷ рӯзноманигору блогер дастгир шудаанд
  • “Бунёди Бузургмеҳр”, созмони мустақар дар Аврупо, аз Абдуллоҳ Ғурбатӣ, Далери Имомалӣ, Мамадсултон Мавлоназаров (Муҳаммади Султон) ва Хушрӯз Ҷумъаев (Хушом Ғулом) ном бурдааст.
  • Улфатхоним Мамадшоева, фаъоли ҷомеаи мадании Бадахшон, ки 17-уми майи имсол дар Душанбе дастгир шуд, низ рӯзноманигор аст.
  • Дар ин давра ба чаҳор хабарнигору наворбардори Радиои Озодӣ ва телевизиони “Настояшее Время” дар пойтахт ҳамла шуда, телефону дастгоҳҳои забти онҳо рабуда шуд.

Раиси ҷумҳури Узбекистон аз талафот дар байни мардум ва низомиён хабар дод

Раиси ҷумҳури Узбекистон дар Нуқус

Шавкат Мирзиёев, президенти Узбекистон, гуфт, дар ҷараёни нооромиҳо дар Ҷумҳурии Мухтори Қароқалпоқистон маъмурони интизомӣ ва ғайринизомиён талафот доданд, вале рақами мушаххасеро ба забон наовард.

Дафтари матбуоти президенти Узбекистон рӯзи 3-юми июл аз қавли ӯ гуфт, "мутаассифона, дар миёни ғайринизомиён ва маъмурони интизомӣ талафот ҳаст."

Пӯлод Охунов, сиёсатмадори мухолиф дар хориҷи Узбекистон, ба хабаргузории "Рейтерс" гуфтааст, тамоси ӯ бо манобеи маҳаллӣ ва наворҳо ҳалокати камаш панҷ касро тасдиқ мекунанд. Ӯ афзудааст, эҳтимол шумораи қурбониён бештар аз ин аст.

Гирифтани иттилои дақиқ аз минтақа мушкил аст, чун дар онҷо дастрасиро ба Интернет ва телефон маҳдуд кардаанд.

Сокинони Қароқалпоқистон ба зидди тағйиру иловаҳо ба Конститутсияи Узбекистон эътироз карданд, ки рӯзи 26-уми июн барои баррасӣ ба муҳокимаи умум пешниҳод шуд. Дар тағйиру ислоҳот дар тарҳи нави Қонуни асосии Узбекистон дар банди мақоми Қароқалпоқистон калимаи "мустақил"- ро бардоштаанд ва дар он ишорае ба ҳаққи ҷудо шудани ин ҷумҳурии мухтор аз қаламрави Узбекистон нест.

Тазоҳурот дар шаҳри Нуқус, 1-уми июли 2022
Тазоҳурот дар шаҳри Нуқус, 1-уми июли 2022

Рӯзи 27-уми июн дар шабакаҳои иҷтимоӣ видеоҳое дида мешуд, ки на камтар аз 100 нафар бо парчами Ҷумҳурии Қароқалпоқистон дар кӯчаҳои Нуқус ҷамъ шудаанд. Тазоҳурот баъди он авҷ гирифт, ки мақомоти интизомӣ Давлатмурод Тоҷимуродов, хабарнигор ва фаъоли маданиро, ки мардумро ба тазоҳурот ба зидди тарҳи нави Конститутсия даъват мекард, дастгир шуд. Баъдан хабари раҳоии ӯ нашр шуд.

Шавкат Мирзиёев рӯзи 3-юми июл эътирозгаронро ба сангпартоиву оташкушоӣ ва ҳамла ба маъмурони ҳифзи ҳуқуқ дар шаҳри Нуқус, маркази Қароқалпоқистон, муттаҳам кардааст.

Ҷумҳурии Қароқалпоқистон 40 дар сади қаламрави Узбекистонро ташкил медиҳад ва аҳолиаш тақрибан 2 миллион нафар аст. Забони расмии он қароқалпоқӣ ва узбекӣ аст. Дар солҳои аввали Шӯравии собиқ Вилояти Мухтори Қароқалпоқистон вуҷуд дошт, ки соли 1936 ба қаламрави Узбекистон ҳамроҳ карда шуд.

Дар оғози солҳои 90-ум, баъди пошхӯрии Шӯравӣ, Шӯрои Олии Қароқалпоқистон Эъломияи истиқлол қабул кард ва соли 1993 аҳдномаи байнидавлатӣ дар бораи ба қаламрави Узбекистон ворид шудани Қароқалпоқистон имзо шуд.

Маҳз дар ҳамин аҳднома ҳаққи берун шудани Қароқалпоқистон аз ҳайати Узбекистон зикр шудааст ва айни чиз дар Конститутсияи Узбекистон низ ҳаст.

Даъвати рӯҳониёни тарафдори Толибон аз ҷаҳон

Нишасти улаои дин дар Кобул

Нишасти садҳо рӯҳонӣ ва раҳбарони қабилаҳо дар Кобул рӯзи 2-юми июл бо изҳори пуштибонӣ аз ҳукумати Толибон ба поён расид. Онҳо ҳамчунин аз ҷомеаи ҷаҳонӣ хостаанд, "имороти исломӣ"-ро дар Афғонистон бипазиранд.

Гуруҳи тундрави "Толибон", ки фаъолияташ ҳанӯз дар аксар кишварҳо мамнуъст, моҳи августи соли 2021 дигарбора қудратро дар Афғонистон ба даст гирифт.

Нишасти уламои дин дар Кобул аз 30-юми июн то 2-юми июл идома кард. Ин чорабинӣ таҳти назорати шадид гузашт ва дар он занон иштирок надоштанд.

Рӯҳониён нишастро бо байъат ба раҳбари ин гурӯҳи тундгаро, Мавлавӣ Ҳайбатулло Охундзода, ба поён расонданд.

Охундзода рӯзи 1-уми июл ба таври ногаҳонӣ дар нишаст суханронӣ кард. Вай баъди берун рафтани нерӯҳои байнулмилалӣ аз Афғонистон дар моҳи августи соли 2021 раҳбарии ҳукумати Толибонро ба дӯш гирифт.

Рӯҳонӣ Муҷибурраҳмон Ансорӣ гуфт, эъломияи иборат аз 11 банд, ки дар поёни нишаст қабул шуд, аз кишварҳои ҷаҳон, Созмони Милали Муттаҳид ва созмонҳои исломӣ даъват мекунад, Афғонистони зери раҳбарии Толибонро ба расмият шиносанд.

Дар эъломия хоста шудааст, таҳримҳоро бекор ва дороиҳои бандмондаи Афғонистонро дар хориҷа озод намоянд.

Аксар кишварҳои ҷаҳон риояи ҳуқуқи одамон, бахусус занону духтарон, таъмини озодии баёну эътиқод ва ташкили ҳукумати фарогирро аз шартҳои асосии пазируфтани ҳукумати Толибон медонанд. Чизе, ки ба гуфтаи онҳо дар ёздаҳ моҳи ҳукумати Толибон дида нашудааст.

Тирпарронӣ миёни муҳоҷирон дар Сербистон

Белград, акс аз бойгонӣ

Бар асари тирпарронӣ миёни муҳоҷирон дар шаҳри Суботитсаи Сербистон, дар наздикии сарҳади ин кишвар бо Венгрия ё Маҷористон, камаш як нафар кушта ва шаш каси дигар захмӣ шудаанд. Дар ин бора RTS, телевизиони давлатии Сербистон, хабар дод.

Захмиёнро барои муолиҷа ба пойтахт, шаҳри Белград, бурдаанд.

Шаҳрдори Суботитса Стеван Бакич гуфтааст, муҳоҷирон аксаран 20-30-сола ҳастанд, аммо ҳуҷҷат надоранд.

Мақомот сабаби тирпаррониро шарҳ надоданд. Расонаҳои маҳаллӣ нигоштанд, ки ҳодиса миёни муҳоҷирони афғонистонӣ ва покистонӣ рӯй додааст.

Туркия аз ҳамла гуфт, вазири эронӣ ба Сурия рафт

Ҳусейн Амирабдуллоҳиён

Дар ҳоле ки Туркия таҳдид кардааст, ба ниманизомиёни курд дар шимоли Сурия ҳамла хоҳад кард, вазири корҳои хориҷии Эрон ба Димишқ рафт.

Ҳусейн Амирабдуллоҳиён рӯзи 2-юми июл гуфт, талошҳо барои барқарории сулҳу амният байни Туркия ва Сурия анҷом шуда, Теҳрон аз даргирии нав пешгирӣ хоҳад кард.

Амирабдуллоҳиён бо Башор Асад, раисиҷумҳури Сурия, мулоқот карда, ба хабари ИРНА, кишварҳои ғарбиро ба иддаои дурӯғин дар мавриди сулҳу субот дар Сурия муттаҳам намудааст.

Раҷаб Таййиб Эрдуғон, раисиҷумҳури Туркия, дар моҳи июни имсол таҳдид кард, ки амалиёти низомии навро дар ду минтақа дар шимоли Сурия, аз ҷумла алайҳи ниманизомиёни курд оғоз хоҳад кард. Туркия онҳоро "террорист" меномад.

Маскав мегӯяд, Луҳански Украинаро зери назорат гирифт

Акс аз бойгонӣ

Сергей Шойгу, вазири дифои Русия, рӯзи 3-юми июл ба президенти он кишвар Владимир Путин хабар додааст, ки артиши Русия вилояти Луҳански Украинаро "озод" кард.

Шойгу гуфт, артиши Русия ва нерӯҳои зери ҳимояти Маскав шаҳри Лисичанск, саҳнаи охирини даргириҳоро дар шарқи Украина, тасарруф кардаанд.

Ин шаҳр охирин маркази бузурги аҳолинишин дар вилояти Луҳанск аст, ки қисман зери назорати Украина қарор дорад.

Расонаҳои давлатии Русия аз қавли Игор Конашенков, сухангӯи Вазорати дифоъ, навиштанд, "сарбозони рус... дар дохили Лисичанск меҷанганд ва душмани иҳоташударо торумор мекунанд."

Серҳей Ҳайдай, волии ҷонибдори Киев дар Луҳанск, дар Телеграм навишт, нерӯҳои Русия "дар шаҳр ҷойи по меёбанд".

Мушовири раисиҷумҳури Украина Алексей Арестович шоми 2-юми июл гуфт, нерӯҳои Русия дар шаҳр "вазъияти хатарноке"-ро ба вуҷуд овардаанд.

Русия моҳи апрели имсол нерӯҳои худро аз атрофи Киев ва минтақаҳои дигари Украина берун бурд ва эълон кард, ки тамаркузашро барои пурра зери назорат гирифтани Донетску Луҳанск равона мекунад.

Маскав моҳи феврали имсол ба Украина ҳамла карда, онро амалиёти махсус барои ғайринизомӣ кардани ҳамсояаш номид. Киев ва кишварҳои ғарбӣ онро таҷовуз ба хоки Украина дониста, алайҳи Кремлин ва мансабдорону сарватмандонаш таҳримҳои сахт ҷорӣ карданд.

Дар ин ҷанг, ки ҳанӯз идома дорад, аз ду тараф ҳазорҳо кас кушта ва дар Украина миллионҳо нафар беҷо ва овора шудаанд.

Дар садамаи мусофирбар дар Покистон 19 кас ҷон бохт

Акс аз бойгонӣ

Бар асари чаппа шудани мусофирбаре дар вилояти Балуҷистони Покистон 19 кас ҷон бохта, чанд нафари дигар маҷруҳ шудаанд.

Ҳодиса рӯзи 3-юми июл ва дар пайи бориши зиёди борон рӯй дод. Маъмурони наҷот дар ҷойи ҳодиса ҳастанд.

Маҳтоб Шоҳ, як масъули маҳаллӣ, гуфтааст, дар мусофирбар 35 кас нишаста буданд. Ӯ афзуд, мусофирбар аз Исломобод ба тарафи Кветта мерафт ва мусофирон аксаран мардон буданд.

"Вазъи баъзе аз захмиён вазнин аст ва шумораи қурбониён метавонад афзоиш ёбад," – илова кард Шоҳ.

Дар Покистон ба далели бад будани роҳҳо ва беэҳтиётии ронандагон ҳар чанд вақт садамаҳои маргбор рӯй медиҳад. Моҳи гузашта бар асари чаппа шудани мусофирбар ба ҷарӣ дар як минтақаи дигари Балуҷистон 22 нафар ҷон бохтанд.

Ёфтҳои бештар

XS
SM
MD
LG