Бритониё идеяи табодули киштии эронӣ бо нафткашеро рад кард, ки дар Халиҷи Форс бо парчами ин кишвар аз сӯи Теҳрон боздошт шудааст.
"Ин хидмат бар ивази хидмат ё ҳеч гуна савдое нест. Сухан аз риояи ҳуқуқ ва меъёрҳои байналмилалӣ меравад ва мо ҳам ба он исор хоҳем кард", - гуфт вазири умури хориҷии Бритониё Доминик Рааб 29 июл дар суҳбат бо Би-би-сӣ. Ӯ ҳамчунин афзуд, ки "агар Эрон мехоҳад аз ин торикӣ берун ояд ва ҳамчун узви масъули ҷомеаи байналмилалӣ шинохта шавад", бояд усули байналхалқиро риоя кунад.
Мақомоти Бритониё 4 июли соли равон дар Гибралтар киштии эронии "Grace 1"-ро бо гумони нақзи таҳримҳои Иттиҳоди Аврупо зидди Теҳрон боздошт карданд. Сипоҳи посдорони инқилоби исломии Эрон дар посух киштии нафткаши Stena Impero-ро бо парчами Бритониё боздошт намуд. Президенти Эрон Ҳасан Руҳонӣ гуфт, агар Бритониё "Grace 1"-ро озод кунад, онҳо низ нафткашро раҳо хоҳанд кард.
Теҳрон гуфт, Stena Impero "қоидаҳои обии байналмилалиро нақз мекунад". Вазири вақти умури хориҷии Бритониё Ҷеремӣ Ҳант амали Эронро "роҳзании давлатӣ" номид.
