Пайвандҳои дастрасӣ

Хабари нав

Хабарҳо

Як додраси додгоҳи Ҳисор 7 сол зиндонӣ шуд

Додгоҳи олии Тоҷикистон як додраси шаҳри Ҳисорро барои фасодкорӣ ба 7 соли зиндон маҳкум кард. Додрас Дилшод Искандарзода, моҳи январи соли равон барои "риоя накардани қонун ҳангоми баррасии парвандаҳо", аз мақомаш озод ва ахиран равонаи зиндон шуд.

Як мақом дар Додгоҳи олӣ рӯзи 9-уми август дар сӯҳбат ба Радиои Озодӣ гуфт, ҳукми додгоҳ дар нисбати Дилшод Искандарзода аллакай ҳукми иҷро гирифтааст. Ба қавли манбаъ, алайҳи Дилшод Искандарзода баъди барканор бо моддаи 319 қисми 4 ё гирифтани пора "аз ҷониби гурўҳи шахсон бо маслиҳати пешакӣ ё гурўҳи муташаккил", парвандаи ҷиноятӣ боз шуда буд. Аммо манбаъ мегӯяд, додгоҳ дар нисбати Искандарзода камтарин мӯҳлати ҷазои пешбинишударо таин кард.

Дилшод Искандарзода ягон додрасе нест, ки барои нақзи қонун ва содир кардани ҷиноят аз мақом барканормешавад. Ахиран Икром Ҷумазода, раиси додгоҳи ноҳияи Айнӣ низ барои фасодкорӣ аз мақом озод ва боздошт гардид.

Тайи як соли ахир тақрибан даҳ додраси додгоҳҳои кишвар бо айни чунин иттиҳом аз кор ронда ва ба баъзеи онҳо ба ҷавобгарӣ кашида шудаанд. Бархе аз таҳлилгарони тоҷик мегӯянд, барканории баъзе аз додрасҳо бо сабаби нақзи қонун эътимоди бе ин ҳам то ҳадде костаи мардум ба адолати додгоҳӣ дар кишварро камтар хоҳад кард.

Ҳоло дар Тоҷикистон наздик ба 500 додрас фаъолият доранд.

Ҳамаи хабарҳои имрӯзро дар инҷо бихонед

Марги шубҳабарангези сарбози 20-сола дар Роғун. ВИДЕО

Илҳомҷон Худойбердиев чанд акс бо либоси низомӣ дар саҳифааш дар Одноклассники гузоштааст.

Дар ноҳияи Деваштич Илҳомҷон Худойбердиев, як сарбози вазорати мудофиаи Тоҷикистонро дафн карданд, ки дар воҳиди низомиаш дар ноҳияи Роғун ба ҳалокат расидааст.

Ҷасади сарбози 20-соларо рӯзи 16-уми феврал дар зодгоҳаш деҳаи Работи ноҳияи Деваштич (Ғончии собиқ) ба хок супурданд. Бародараш Муродҷон Худойбердиев ба Радиои Озодӣ гуфт, сабабҳои марги Илҳомҷон ҳоло маълум нест.

Дар видеое, ки як сокини деҳа ба Радиои Озодӣ фиристод, бурдани тобуте дида мешавад, ки ба гуфтаи ҳамин сокин тобути сарбози ҷавонмарг аст.

Марги шубҳабарангези сарбози 20-сола дар Роғун
лутфан мунтазир бошед
### Эмбед ###

### Феълан кор намекунад ###

0:00 0:00:16 0:00

Бародари сарбоз гуфт, онҳо азм доранд, маълум кунанд, бо Илҳомҷон чӣ рух додааст. “Мо то ҳол намедонем, ки чӣ ҳодиса шудаст, аммо то ба умқи он мерасем” афзуд ӯ.

Дар Вазорати мудофиаи Тоҷикистон дар суҳбат бо Радиои Озодӣ марги ин ҷавонро тасдиқ карда гуфтанд, айни замон қазияи марги сарбоз тафтиш мешавад ва то ду рӯзи дигар шарҳи расмӣ дар бораи марги Илҳомҷон Худойбердиев омода хоҳад шуд.

Ҳамдеҳагони Худойбердиев, ки дар маросими дафни сарбоз ҳузур доштанд, ба Радиои Озодӣ гуфтанд, ки дар бадани ӯ осори захми як тир мушоҳида мешуд.

Илмҳоҷон Худойбердиев, якуним сол қабл ба сафи артиши Тоҷикистон ҷалб шудааст. Ӯ дар яке аз қисмҳои ҳарбии ноҳияи Роғун хизмат мекард ва то анҷоми хизматаш ҳамагӣ 6 моҳи дигар боқӣ монда буд. Дар саҳифаи ӯ дар шабакаи Одноклассники чанд акс бо ҳамхидматонаш низ вуҷуд дорад. Дар маросими дафни ин ҷавон раиси ноҳияи Деваштич ширкат кардааст.

Дар Тоҷикистон худкушии сарбозон ва ё дар натиҷаи тасодуфу муноқиша ба ҳалокат расидани онҳо дар гузашта мушоҳида шудааст. Бадрафторӣ бо сарбозонро яке аз сабабҳои аслии чунин ҳодисаҳо медонанд.

Додситон хост, шарики собиқи Трамп ҷазои сахт бигирад

Пол Манафорт

Роберт Мюллер, додситони вижаи Амрико гуфтааст, ки Пол Манафорт, раиси собиқи ситоди интихоботии раиси ҷумҳур Доналд Трамп сазовори ҳукми тулонии зиндон аст.

Роберт Мюллер, ки парвандаи эҳтимоли дахолати Русия ба интихоботи президентии соли 2016-ро тафтиш мекунад дар ин бора рӯзи 15-уми феврал суҳбат кард.

Ба гуфтаи Роберт Мюллер, Пол Манафорт, ки як замон мушовири Виктор Янукович, раиси ҷумҳури собиқи Украина буд, барои ҷиноятҳои иқтисодӣ аз ҷумла тақаллуби молӣ, пинҳон кардани даромад ва сарпечӣ аз пардохти молиёт сазовор аст, ки аз 19 то ба 24 сол аз озодӣ маҳрум карда шавад.

Пол Манафорт ба додситони вижа ваъда дода буд, ки дар ивази сабуктар кардани ҳукм тамоми ҳақиқатро ошкор мекунад, вале ба гуфтаи додситон баъди ин ваъда ҳам ба муфаттишон иттилои дурӯғ додааст. Роберт Мюллер дар санади пешниҳодиаш гуфтааст, “Пол Манафорт дар муддати бештар аз 10 сол тавре амал кард, ки худро болотар аз қонун медонист ва мақомоти федеролӣ ва дигар ниҳодҳои молиро аз миллионҳо доллар маҳрум кард.”

Пол Манафорт, ки ба зудӣ ҳукмаш содир мешавад, ҳамчунин бояд ба мақомоти Амрико 55 миллион доллар ҷарима бисупорад. Иттиҳомот ба зидди раиси собиқи ситоди интихоботии Доналд Трамп ба дахолати эҳтимолии Русия ба интихоботи Амрико иртиботи мустақим надоштааст.

Ҷозеф Вотел гуфт, 1000 сарбоз Афғонистонро тарк мекунанд

Ҷозеф Вотел

Фармондеҳи қувваҳои Марказии Амрико дар Ховари Миёна мегӯяд, ки кишвараш шояд беш аз ҳазор сарбози худро аз Афғонистон хориҷ кунад. Генерал Ҷозеф Вотел - фармондеҳи баландрутбаи амрикоӣ рӯзи 15-уми феврал дар сӯҳбат бо хабаргузории “Ройтерз” гуфтааст, ки хуруҷи ин сарбозон ба талошҳои ҷорӣ барои сулҳ дар Афғонистон рабт надорад.

Ба гуфтаи ӯ, ин тасмим бар асоси пешниҳоди Скот Миллер, фармондеҳи НАТО ва Амрико дар Афғонистон гирифта шудааст. Скот Миллер моҳи сентябри соли 2018 фармондеҳии нерӯҳои НАТО ва Амрикоро дар Афғонистон ба уҳда гирифт.

Ба гуфтаи генерал Вотел, нақшаи коҳиши теъдоди сарбозон дар Афғонистонро Скот Миллер пас аз таъйин шуданаш ба ин мақом омӯхт ва пешниҳод кард. Генерали амрикоӣ дар бораи замони хуруҷи ҳазор сарбоз чизе нагуфт.

Амрико дар Афғонистон дар ҳоли ҳозир 14 ҳазор сарбоз дорад, ки дар амалиётҳо ба сарбозони Афғонистон кӯмак мекунанд ва низомиёни афғонро омӯзиш медиҳанд.

Дар Афғонистон бештар аз 30 сол аст ҷанг давом дорад. Гуруҳи Толибон аз мухолифони аслии ҳукумат аст. Феълан, аз ҷониби Амрико, Русия ва худи ҳукумати Афғонистон талош барои сулҳ бо ин гурӯҳ дар ҷараён аст.

Вазири Эрон партоби бенатиҷаи мушакро тасдиқ кард

Партоби нокоми моҳвора дар моҳи январ дар Эрон

Вазири умури хориҷии Эрон гуфт, дар воқеъ партоби як моҳвораи кишвар ба мадори Замин дар аввали моҳи феврал бо нокомӣ анҷомидааст. Дар муддати ду моҳи гузашта, ду талоши Эрон барои партоби моҳвора натиҷа надод.

Муҳаммадҷаводи Зариф дар мусоҳиба бо телевизиони “NBC News” рӯзи 15 феврал гуфт, сабабҳои ба мадор нарасидани моҳвораҳо рӯшан нест, вале афзуд, ки мумкин аст, “харобкории эҳтимолии Амрико”-ро ҳам таҳқиқ кунанд.

Аз ин пештар нашрияи Ню Йорк Таймс дар рӯзи 13-уми феврал гузориш дод, ки ҳукумати Амрико барномаи махфии харобкорӣ дар мушакҳои Эронро суръат бахшидааст. Муҳаммадҷавод Зариф гуфт, мақомот сабабҳои нокомӣ дар партоби мушакҳоро таҳқиқ мекунанд, вале баъди гузориши “Ню Йорк Таймс” ба таҳқиқи “мушаххасоти дигар” шуруъ кардаанд. “Эҳтимоли харобкорӣ вуҷуд дорад, вале мо бояд онро боэҳтиёт таҳқиқ кунем” – гуфт, ӯ.

Намояндаи Шӯрои Амнияти Миллии Амрико ба дархостҳо дар ин замина ҳануз шарҳе надодааст. Муҳаммадҷавод Озари Ҷаҳромӣ, вазири мухобироти Эрон моҳи январ гуфт, мушаке, ки дар ин моҳ партоб карданд, дар марҳилаи саввуми ҳаракат, “суръати зарурӣ”- ро нагирифт. Амрико Эронро барои партоби мушакҳо интиқод карда ва гуфтааст, ки “Беэътиноии ошкори Эрон ба меъёрҳои байналмилалиро таҳаммул намекунад.”

Ба руҳониёни тоҷик дарси сиёсати давлатӣ медиҳанд

Акс аз бойгонӣ

Маркази исломии Тоҷикистон мегуяд, давраҳои омузишӣ барои муллоҳо ва руҳониёнро шуруъ кард ва ба онҳо доир ба мавзуҳои сиёсати давлатӣ, пешгирии зӯроварӣ дар хонавода, ҳуқуқу озодиҳои динии шаҳрвандон дарс мегӯянд.

Кумитаи дин ва танзими анъана ва ҷашну маросим рӯзи 14-уми феврал бо нашри як баёнияи расмӣ гуфт, дар марҳилаи аввал 72 рӯҳонӣ дар давраи омӯзишӣ ширкат карданд.

Дар ҷараёни ин давраҳо, “доир ба мавзӯҳои сиёсати давлатӣ дар соҳаи дин, ҳуқуқҳу озодиҳои динии шаҳрвандон, аҳамияти китоби “Фиқҳи акбар” ва “Васиятнома”-и Имоми Аъзам, таҳаммулпазирии ва ҳамзистии осоиштаи адён, дастовардҳои Тоҷикистон дар соҳаи дин, пешгирӣ аз зӯроварию хушунат дар оила ва дигар масоили ҳаёти рӯзмарраи ҷомеа“ табодули назар сурат гирифтааст.

Кумитаи дин мегӯяд, ки барои рӯҳониён аз ҷумла имомхатибони масҷидҳо аз дигар манотиқи кишвар чунин давраҳои омӯзишӣ баргузор мекунад.

Як марде дар Амрико 5 ҳамкорашро кушт

Акс аз бойгонист.

Як марди 45-сола дар Амрико бо тирандозӣ дар ҷойи кораш 5 ҳамкорашро кушта ва 5 афсари пулисро маҷруҳ кардааст. Ҳодиса рӯзи 15-уми январ дар аёлати Иллинойс ба вуқуъ пайваст ва фарди тирандозро маъмурони пулис куштаанд.

Ба гуфтаи мақомот, фарди муттаҳам ба тирандозӣ Гари Мартини 45-сола корманди ширкати Ҳенрӣ Прат дар шаҳри Аврораро бояд то чанд рӯзи дигар ихтисор мекардаанд. Расонаҳои шаҳр аз қавли аъзои хонаводаи Гари Мартин навиштаанд, ки ӯ аз хабари ихтисор афсурдаву асабонӣ будааст.

Як коргари ширкат ва як афсари дигари пулис ҷароҳатҳои сабук бардоштаанд. Кристен Зиман, сардори пулиси шаҳри Аврора гуфт, онҳо тафтиш доранд, ки оё Гари Мартин силоҳро қонунӣ харидааст ва ё не. Доналд Трамп, раиси ҷумҳури Амрико маъмурони пулисро барои вокунишашон дар ин ҳодиса ситоиш кард.

Тирандозӣ дар шаҳри Аврора як рӯз қабл аз солгарди аввали тирандозӣ дар як мактаби шаҳри Флорида сурат гирифт, ки дар натиҷаи он 17 нафар кушта шуданд. Ин ҳодиса баҳси истифода аз силоҳ ва мусоидати он ба қатлу кушторро дар саросари Амрико барангехт.

Доналд Трамп гуфт, вазъи фавқуллода эълон мекунад

Доналд Трамп ҳангоми суханронӣ дар рӯзи 15-уми феврал

Доналд Трамп, раиси ҷумҳури Амрико гуфт, ки барои бунёди девор дар марз бо Мексика қарореро дар бораи эълони вазъи фавқуллода дар минтақаҳои марзӣ бо ин кишвар имзо мекунад.

Ӯ зимни суханронӣ дар Кохи Сафед дар рӯзи 15-уми феврал гуфт, харҷ барои бунёди деворе, ки марзро тақсим мекунад, назар ба харҷ барои сарбозон, ки монеи вуруди муҳоҷирони ғайриқонунӣ мешаванд, камтар хоҳад буд.

Бо эълони вазъи фавқуллода, Доналд Трамп метавонад, бе иҷозаи Конгресс дар марз девор бисозад, чунки эълони чунин вазъ ба раиси ҷумҳури Амрико салоҳиятҳои васеътар медиҳад. Ба қавли Доналд Трамп, бо эълони вазъи фавқуллода метавонад, барои бунёди девор 8 миллиард доллар ба даст биёрад.

Талаби ӯ барои ихтисоси бештар аз 5 миллиард доллар барои деворро вакилони Маҷлиси намояндагон рад карданд, чун бунёди деворро харҷи беасос ва нолозим мешуморанд. Доналд Трамп гуфт, қарори ӯ бидуни шак ба мухолифати вакилони мардумӣ дучор мешавад, аммо ӯ умедвор аст, ки Додгоҳи Олии Амрико дар ин баҳсро ба нафъи раиси ҷумҳур ҳал мекунад.

Корманди полиси Истиқлолро барои шантаж ба ҷавобгарӣ кашиданд

Сардори шуъбачаи кофтукови ҷиноии пулиси шаҳри Истиқлол ҳангоми гирифтани пул аз як сокин, бо таҳдиди ҳабс ва ифшои маълумоти беобрӯкунанда дар бораи ӯ дастгир шудааст. Дар ин бора мақомоти зиддифасод рӯзи 14 феврал дар як нишасти хабарии худ дар Хуҷанд хабар доданд.

Биноба иттилои Оҷонси зиддифасоди вилояти Суғд, Шодибой Шамсибойзода, корманди пулиси шаҳри Истиқлол дар шимоли Тоҷикистон А. Атақулов, сокини маҳаллиро ба ҳайси гумонбар дар дуздӣ даъват намуда, аз дохили телефони ҳамроҳи ӯ навори видеоии саҳнаи алоқаи шаҳвониро пайдо кардааст. Сипас бо таҳдиди ин ки ӯро ба ҷавобгарии ҷиноӣ мекашаду дар бораи ӯ маълумотҳои беобрӯкунанда паҳн менамояд, аз Атақулов 1 ҳазор доллар барои пинҳон доштани асрори шаҳвонии телефони ӯ талаб кардааст. Шамсибойзода бо ин роҳ дар ду маврид 6 ҳазор сомонии шахси гумонбар ба дуздиро гирифтааст.

Ҳодиса моҳи июли 2018 иттифоқ афтод. Кормандони оҷонсии зиддифасод бо роҳандозии амалиёти фавриву тафтишотӣ Шамсибойзодаро вақти гирифтани 3 ҳазор сомонии боқимонда аз Атақулов дастгир намуданд. Алайҳи ӯ бо иттиҳоми “қаллобӣ ба миқдори калон” парвандаи ҷиноятӣ боз ва баъд аз анҷоми тафтиш ба додгоҳ ирсол гардид.

Ҳинд баъди ҳамлаи маргбор Покистонро интиқод кард

Ҳинд аз Покистон талаб кард, гурӯҳҳои террористиеро, ки аз хоки ин кишвар фаъолият мекунанд, нобуд кунад. Изҳороти вазорати хориҷаи Ҳинд чанд соат баъди як ҳамлаи пурқурбонӣ дар Кашмир пахш шуд, ки рӯзи 14 феврал рух дод ва ҷони 44 полиси ниманизомиро гирифт.

Масъулияти ин ҳамларо гурӯҳи тундрави “Ҷаиши Муҳаммад” ба ӯҳда гирифт. Вазорати хориҷаи Ҳинд хост, ки Покистон “пуштибонии террористон ва гурӯҳҳои террористиро” хотима диҳад.

Бомбгузории Кашмирро яке аз пурқурбонитарин ҳамлаҳо ба низомиён дар даҳсолаҳои охир меноманд. Ҳинд ҳукумати Покистонро дар он муттаҳам кард, ки ба гурӯҳи “Ҷаиши Муҳаммад” паноҳгоҳ дода ба раҳбараш Масъуд Азҳар иҷоза медиҳад, ки дар хоки Покистон ба сар бурда, дар ҳар нуқтаи дилхоҳи Ҳинд беҷазо ҳамлаҳо анҷом диҳад.

Ба иттилои мақомот, таркиш баъди он рух дод, ки мошини пур аз васоили тарканда ба издиҳоми низомиён бархӯрд.

Рӯзи 15 феврал президенти Тоҷикистон Эмомалӣ Раҳмон дар робита бо ҳамлаи маргбор ба ниманизомиён дар Кашмир ба президенти Ҳинд Рам Натх Ковинд изҳори тасаллият кард. Дар барқия омадааст, ки "ин ҳодисаи даҳшатангез боз ҳам зарурати идомаи муборизаи беамони аҳли башарро алайҳи терроризм қотеъона таъкид мекунад".

Дар Маскав бунёдгузори амрикоии як ширкати сармоягузор боздошт шуд

Майкл Калви аз чап

Бунёдгузори амрикоии ширкати сармоягузори “Заход Востока” дар шаҳри Маскав боздошт шуда ба ӯ иттиҳоми даст доштан дар тақаллуб дар ҳаҷми бисёр калон таҳдид мекунад. Майкл Калви қарор аст дар додгоҳи ноҳияи Басманний рӯзи 15 феврал барои шунидани ҳукми додгоҳ дар заминаи боздошт шуданаш ҳозир шавад. Калви рӯзе аз ин пеш ҳамроҳ бо панҷ нафари дигар, аз ҷумла, ду мақоми ширкат боздошт шуд ва ба онҳо ҳам иттиҳомоти монанд ба ин таҳдид мекунад. Ба иттилои Интерфакс, парвандаи Калви ба баҳси ширкат бо “Восточный банк” бармегардад. Ширкати “Заход Востока” 52,5 дар сади саҳмияҳои бонкро дар ихииёр дорад.

Дар Ишқобод "бозорҳо"-и мардикорон зиёд шуд

Дар наздикии боғча, мактаб ва корхонаву муассисаҳои шаҳри Ишқобод то рафт теъдоди афроди дар ҷустуҷӯи кори бештар мешавад. Ҳамчунин шумори эъломҳои ҷустуҷӯи ҷойи кор низ дар назди манзилҳои зист афзудааст. Дар ин бора рӯзи 15 феврал бахши Туркмании Радиои Озодӣ хабар медиҳад.

Ин вазъ дар пасманзари дастури раҳбарияти Туркманистон барои 15 дарсад кам кардани шумори ҷойҳои корӣ дар бахшҳои фарҳанг ва маориф мушоҳида мешавад. Президенти Туркманистон Қурбонгулӣ Бердимуҳаммадов ахиран фармони якҷоя кардани чанд вазорат ва аз нав таъсис додани як қатор корхонаву муассисаҳои давлатиро имзо кард.

"Тақрибан дар назди ҳамаи боғчаҳои пойтахт, аз ҷумла дар назди боғчаи 112-и маҳаллаи "Парахат-2" ва боғчаи 108-и маҳаллаи "Сулҳ-1" субҳ, аз соатҳои 7 то 9 занон ҷамъ мешаванд. Онҳо ба волидон пешниҳод мекунанд, ки бар ивази маблағ субҳ фарзандонашонро ба боғча мебаранд ва бегоҳ бармегардонанд", - гуфт хабарнигори Бахши туркмании Радиои Озодӣ 13 феврал.

Ба гуфтаи хабарнигор, дар миёни онҳое, ки кор меҷӯянд, вақтҳои охир номзадҳои илм низ мушоҳида мешавад. "Онҳо ба мактабҳо рафта мегӯянд, ки омодаанд дарс диҳанд", - иттилоъ дод хабарнигор бо истинод ба мудирони як қатор мактабҳои пойтахти Туркманистон.

Духтари президент мегӯяд, "ғавғо набардоред"

Дариға Назарбоева, вакили сенат ва духтари калонии президенти Қазоқистон Нурсултон Назарбоев нақшаҳои ҳукуматро дар робита ба сахттар кардани қоидаҳои бозтоби чорабиниҳо дар матбуот шарҳ дод.

Назарбоева гуфт, "ҳоло бо тарҳи қонун шинос нашудааст" аммо ваъда кард, ки онро меомӯзад.

"Набояд аз ҳоло ғавғо бардошт", - муроҷиат кард ӯ ба намояндагони расонаҳо. Рӯзноманигорон мегӯянд, барои нигарон будан далел доранд, зеро ҳукумат соли гузашта бо тағйир додани қонунҳо вазъи матбуотро бадтар кард.

"Агар лоиҳаи қонун ё санаде дар бахши рӯзноманигорӣ таҳия шавад, пеш аз қабул дар ҷомеа баррасӣ хоҳад шуд. Мутаассифона, ҷомеаи рӯзноманигорӣ дар ин масъалаҳо бадбин аст", - гуфт Дариға Назарбоева.

Тарҳи иловаҳои фармони ҳукуматӣ дар сабти номи рӯзноманигорон 13 феврал дар сомонаи санадҳои ҳуқуқӣ нашр шуд. Дар он омадааст, ки рӯзноманигорон мумкин аст, ба толори баргузории чорабиниҳо, ҷаласаҳо ва дигар маъракаҳо роҳ дода нашаванд.

Путин хост, роҳбарони пушаймоншудаи гуруҳҳои ҷиноӣ ҷазо нагиранд

Владимир Путин, президенти Русия пешниҳод кард, ки роҳбарони пушаймоншудаи гуруҳҳои ҷиноӣ аз ҷавобгарӣ озод карда шаванд.

Бо чунин ташаббуси Путин ба Думаи давлатӣ муроҷиат кард. Пешниҳоди иловаҳо ба Кодекси ҷиноӣ дар сомонаи Думаи давлатии Русия нашр шудааст.

Ҳамзамон бо ин тарҳ Путин пешниҳод кардааст, ки муҷозот барои ширкат дар гуруҳҳои ҷиноӣ сахттар шавад. Ба вижа, пешниҳод шудааст, ки ҷазо барои роҳбарони гуруҳҳои ҷиноӣ то 15 сол ва роҳбарони амалиёти харобиовар то 20 соли зиндон муқаррар шавад.

Дар шарҳи лоиҳаи қонун гуфта шудааст, ки дар Русия гуруҳҳои муташаккили ҷиноӣ қонуншиканиҳои сахте анҷом медиҳанд ва роҳбарони чунин гуруҳҳо бо истифода аз вазъи худ аз ҷавобгарӣ фирор мекунанд.

Дар шабакаҳои иҷтимоӣ ин ташаббуси президент ба мазҳака кашида шуд.

Парвандаи вакили пешин бозбинӣ мешавад

Дархости бозбинии парвандаи раиси зиндонии ҳизби "Ота Макон"-и Қирғизистон Омурбек Текебоев ба Додгоҳи олии он кишвар фиристода шуд. Дар ин бора рӯзи 14 феврал роҳбари созмони ҳомии ҳуқуқи "Адилет" Чолпон Ҷакупова хабар дод.

Ба гуфтаи вай, дархост дар робита ба тағйироти нави Кодекси мурофиавӣ-ҷиноятӣ таҳия шудааст ва дар сурати фарқият байни кодекси пешину кодекси навин, парвандаи Текебоев бояд ҳатман бозбинӣ шавад.

Роҳбари ҳизби "Ота Макон", раиси пешини порлумон ва вакили пешин Омурбек Текебоев бо айби фасодкорӣ соли 2017 боздошт ва 7 сол зиндонӣ шудааст.

Пештар аз ин президенти собиқи Қирғизистон Роза Отунбоева аз президенти кунунӣ Сооронбой Ҷеенбеков хост, Омурбек Текебоевро авф кунад. 10 январ хабар расид, ки Комисияи масоили авфи назди президент ин дархостро рад кардааст.

Ҳомиёни ҳуқуқи хориҷиро аз Остона ба Киев ихроҷ карданд. ВИДЕО

Ду нозири созмони Федератсияи Итолиё дар умури ҳуқуқи инсон - шаҳрвандони Украина Людмила Волошина ва Валерий Явтушенкоро рӯзи 15 феврал аз шаҳри Остона ба Киев ихроҷ карданд.

Мақомоти Қазоқистон онҳоро дар вайрон кардани қонунгузории муҳоҷират айбдор намуданд.

Волошин ва Явтушенко нимаи дувуми рӯзи 14 феврал дар шаҳри Остона боздошт шуда буданд. Навори боздошти ҳомиёни ҳуқуқро вакили дифоъ Толеген Шаиков дар Фейсбук нашр кард.

Наздики соати яки шаб ду ҳомии ҳуқуқро аз идора пулис берун ва зоҳиран ба додгоҳ бурданд.

"Масъулони консулгариро иҷозаи вуруд ба назди ҳомиён надоданд. Ин поймолсозии возеҳи Конвенсияи Вена дар бораи равобити дипломатӣ аст. Мо дар робита ба ин ҳодиса нотаи махсус таҳия кардаем", - гуфт консули сафорати Украина Иван Алмашӣ.

Шаби панҷшанбе ба ҷумъа додгоҳи Остона қарори ихроҷи ду ҳомии ҳуқуқро содир кард. Дар қарори додгоҳ омадааст, ки ду шаҳрванди Украина "бо ҳадафи корӣ" вориди Қазоқистон шудаанд, дар ҳоле, ки дар ҳуҷҷатҳо ҳадафи онҳо "хусусӣ" нишон дода шудааст.

Созмони Федератсияи Итолиё дар умумри ҳуқуқи инсон мегӯяд, ду ҳомии ҳуқуқ барои мулоқот бо раиси пешини додгоҳи шаҳри Актау Малик Кенҷалиев вориди Қазоқистон шуда буданд. Кенҷалиев мегӯяд, баъди содир кардани ҳукми сафедкунанда дар робита ба парвандаи як сокини маҳаллӣ таъқиб мешавад. Раиси пешини додгоҳ сокини маҳаллӣ Ойгул Оқбердиеваро сафед кард, ки дар "даъват ба ғасби ҳукумат" айбдор мешуд.

Вазири молия: "Роҳҳои наҷоти бонкҳо вуҷуд дорад"

Файзиддин Қаҳҳорзода.

Мақомоти тоҷик мегӯянд, ки роҳҳои ба по рост кардани "Агроинвестбонк" вуҷуд дорад. Файзиддин Қаҳҳорзода, вазири молияи Тоҷикистон рӯзи 15-уми феврал зимни нишасти хабарӣ дар посух ба суоли хабарнигори Радиои Озодӣ гуфт, ки дар воқеъ 88 дарсади саҳмияҳои "Агроинвестбонк" дар дасти вазорат аст.

Вай гуфт, ки то 20-уми феврал барои ҳалли мушкили "Агроинвестбонк" ва "Тоҷиксодиротбонк" мӯҳлат доранд. Ӯ афзуд, ки сарнавишти "Агроинвестбонк" чӣ мешавад, чизи пинҳон аз назари ҷомеа нест ва "роҳи наҷоти он вуҷуд дорад". Аммо ҷаноби вазир роҳҳои бурунрафти бонкҳо аз ин мушкилро зикр накард.

Вазири молияи Тоҷикистон дар бораи дастури президент роҷеъ ба қарздории корхонаҳои бузург мисли "Барқи тоҷик", "Тоҷик эйр" ва "Талко" гуфт, ки воқеан вазъи молиявии ин корхонаҳо вазнин аст ва аллакай барои танзими фаъолияти онҳо Шӯрои нозирон таъсис ёфтааст.

Тоҷикистон қасд дорад фурӯшгоҳҳои электрониро андоз бандад

Нусратулло Давлатзода, раиси Кумитаи андози Тоҷикистон, гуфт, ният доранд, аз фурӯшгоҳҳои электронӣ низ молиёт ситонанд.

Давлатзода рӯзи 14-уми феврал дар нишасти матбуотӣ гуфт, “Русия аз соли 2014-ум 160 ширкати хориҷиеро, ки тавассути платформаҳои Гугл, Эйпл, Фейсбук, Майкрасофт, Ибей, Али Экспресс ва Яҳу ба фурӯши фиттаву китобҳо ва маҳсулот машғул буд, андоз бастааст. Танҳо дар 8 моҳи соли гузашта аз ин ҳисоб ба буҷаи Русия 7,9 миллиард рубл ворид гардидааст.”

Ба ин далел, ба гуфтаи ӯ, Кумитаи молиёт ба ҳукумати Тоҷикистон пешниҳод кардааст, андоз бастани ширкатҳои хориҷие, ки машғули фурӯшҳои электронӣ ҳастанд, ба мақсад мувофиқ мебошад.

“Ин таҷрибае, ки дигар кишварҳо аллакай истифода мекунанд ва чаро мо аз он истифода накунем? Кишварҳои хориҷӣ аз имкониятҳои бештар барои ғанӣ карданӣ буҷаи худ бархурдоранд, вале боз ҳам аз ин роҳ низ истифода мекунанд”, - афзуд ӯ.

Рамазон Раҳимзода моҷарои пулис ва Истад Қурбоноваро шарҳ дод

Вазири умури дохилии Тоҷикистон дар нишасти хабарии худ ба қазияи сокини ноҳияи Айнӣ Истад Қурбоноваи 70-сола низ дахл кард ва гуфт, ки дар рафтори кормандони милиса дар пайванд ба ин қазия, ҳеҷ амали ҷиноятӣ дида намешавад. Рамазон Раҳимзода рӯзи 14-уми феврал дар нишасти хабариаш ба суоли Радиои Озодӣ дар ин робита посух дод.

Ӯ дар шарҳи ин қазия гуфт, ки Истад Қурбонова қаблан се маротиба, аз ҷумла, барои "авбошӣ" ба ҷавобгарии ҷиноятӣ кашида шуда буд ва ин маротиба аз сӯи додситонии ноҳияи Айни алайҳи вай барои "ғасби намудани қитъаи замин" ва "қасдан нест намудани молу мулк" парвандаи ҷиноятӣ боз шуда буд ва ӯро ба ҳабс гирифтанд.

Ба гуфтаи вазир, Истад Қурбонова замони дар ҳабс будан кӯшиши сӯзонидани худро кард. "Мо барои сари вақти пеши роҳи инро нагирифтан, се корманди корҳои дохилиро ҷазои интизомӣ додем",-афзуд вай.

Ба гуфтаи вазири умури дохилии Тоҷикистон, ин зан се маротиба ба ҷавобгарии ҷиноятӣ кашида шудааст ва ҳамчунин чор фарзанди ӯ ва се бародараш низ қаблан ба ҷавобгарии ҷиноятӣ кашонида шуда буданд. Оқои Раҳимзода аз хонаводаи Истад Қурбонова бо ин сабабҳо, "оилаи ноустувор" ном бурд.

Сокини ноҳияи Айнии вилояти Суғд Истад Қурбонова рӯзи 2-юми январи имсол бо иттиҳоми ғасби замин дастгир шуд ва баъди даҳ рӯз ӯро бо бадани сӯхта ба бемористон бурданд. Ӯ ва наздиконаш иддао карданд, ки Қурбонова дар боздоштгоҳи пулис шиканҷа шудааст.

Худи ӯ рӯзи 30-юми январ дар сӯҳбати видеоӣ бо Радиои Озодӣ нақл кард, ки "ҳафт-ҳашт кас даромаданд. Онҳо табибро низ даъват карда ва гуфтанд, як "укол" кун, то баданаш карахт шавад". Истад Қурбонова мегӯяд, баъди ин давоми ҳодисаро дар ёд надорад, аммо замоне ки ба худ омад, "куртааш месӯхт".

Мақомот мегӯянд, ӯ барои сарпечӣ аз ҳозир шудан ба бозпурсӣ моҳи октябри соли гузашта таҳти ҷустуҷӯ қарор гирифта ва аввали моҳи январ дастгир шудааст.

Дар ҳоли ҳозир се корманди ИВС ё боздоштгоҳи Шуъбаи корҳои дохилии ноҳияи Айнӣ "барои хунукназарӣ ҳангоми адои вазифа, ки боис ба қасди худсӯзии Истад Қурбонова шуд”, аз кор ронда шудаанд. Таҳқиқи парвандаи Истад Қурбонова аз тарафи додситонӣ ҷараён дорад.

Додситонии ноҳияи Айнӣ Истад Қурбоноваро моҳи октябри соли 2018 бо даъвои масъулони корхонаи "Сохтмон СТД" ба ҷавобгарӣ кашидааст. Ин ширкат иддао дорад, ки Қурбонова дар тақрибан 2-3 сотих замини ин корхона анбору ҳоҷатхона сохта ва онро худсарона аз худ намудааст ва бояд бозпас гирифта шавад.

Раиси пешини Додгоҳи ноҳияи Айнӣ 7 сол зиндонӣ шуд

Икром Ҷумъазода

Икром Ҷумъазода, раиси пешини Додгоҳи ноҳияи Айнии вилояти Суғд, бо ҷурми ришвагирӣ ба ҳафт соли зиндон маҳкум шудааст.

Дар ин бора Муҳаммад Мирзозода, иҷрокунандаи вазифаи раиси Додгоҳи вилояти Суғд, рӯзи 14-уми феврал дар нишасти матбуотӣ хабар дод. Ӯ гуфт, ҳукми Ҷумъазодаро Додгоҳи олии Тоҷикистон содир кард.

Раиси пешини Додгоҳи ноҳияи Айнӣ тобистони соли гузашта аз тарафи маъмурони Оҷонси зидди фасод дастгир шуда буд. Мақомот ӯро дар ду ҳолат ба гирифтани тақрибан ҳаштсад доллар айбдор карданд. Аммо баъзе аз манобеъ маблағи ришваро 16 ҳазор доллар шумурда буданд.

Қарори барканории Икром Ҷумъазода рӯзи 30-юми июл аз мақоми раиси Додгоҳи ноҳияи Айнӣ содир шуд. Сабаби барканории ӯро раиси ҷумҳур Эмомалӣ Раҳмон “содир намудани кирдоре” донист, ки “шаъну эътибори судяро паст мезанад”.

Масъалаи боздошти Икром Ҷумъазода баъди он доғ шуд, ки дар шабакаҳои иҷтимоӣ аз эҳтимоли озодӣ ваё бараъкс бад шудани вазъи саломатии ӯ дар СИЗО-и рақами дуи Хуҷанд хабарҳо паҳн шуд.

Мусоҳибони Радиои Озодӣ мегӯянд, ҳоли Ҷумъазода баъди боздошт ва вақти бурдан ба Душанбе дар роҳ бад шуда, ба ҳолати "беҳушӣ" афтода буд. Баъдан ӯро дар бемористон табобат кардаанд.

“Ҳукми Икром Ҷумъазода мавриди иҷро қарор гирифтааст ва ҳоло ӯ дар зиндон адои ҷазо мекунад”, - гуфт иҷрокунандаи вазифаи раиси Додгоҳи вилояти Суғд.

Толибон: мулоқоти навбатӣ бо амрикоиҳо дар Покистон мегузарад

Ҳайати Амрикоро дар музокирот намояндаи расмии ин кишвар Залмай Халилзод раҳбарӣ мекунад

Толибон гуфтанд, ки рӯзи 18 феврал дар чаҳорчӯби музокироти сулҳи Афғонистон дар Покистон бо намояндаи ИМА дидору гуфтугӯ мекунанд, вале мақомоти Департаменти давлатӣ гуфтанд, ки ҳанӯз даъватномаи ширкат дар нишастро дастрас накардаанд. Сухангӯи Толибон Забеҳулло Муҷоҳид рӯзи 13 феврал гуфт, ки мулоқоти онҳо дар Исломобод мегузарад ва дар ду ҳафтаи баъди ин, яъне 25 феврал, қарор аст дар Қатар, музокироти дуҷониба барпо шавад. “Дар ҳоле, ки мо эълони Толибонро шунидем, ҳанӯз барои ширкат дар ин нишаст даъватномаи расмӣ дарёфт накардем”, гуфт сухангӯи Департаменти давлатӣ.

Сухангӯи Толибон гуфт, ки ҷониби онҳо инчунин қарор аст бо нахуствазири Покистон Имрон Хон барои “баррасии фаротари равобити миёни Покистону Афғонистон” дидору гуфтугӯ кунанд. Музокироти сулҳи миёни ИМА ва Толибон дар моҳҳои охир бештар шудааст.

Нишасти Варшава: Фишор ба Эрон афзоиш ёбад

ИМА ва Исроил дар ҷараёни конфронси бахшида ба масоили Ховари Миёна дар Варшава талош доранд болои Эрон фишори бештар оваранд, вале дар Теҳрон ин нишастро як “сирк” унвон кардаанд. Котиби давлатии ИМА Майк Помпео, муовини раиси ҷумҳур Майк Пенс ва нахуствазири Исроил Бенямин Нетаняҳу қарор аст дар рӯзи дуюми ин конфронс 14 феврал суханронӣ кунанд. Дар ин нишасти намояндагони 60 кишвари ҷаҳон иштирок мекунанд.

Зимни суханронӣ дар остонаи шурӯи нишаст, Помпео гуфт, ки “бидуни муқовимат бо Эрон ҷаҳон наметавонад ба сулҳ дар Ховари Миёна даст ёбад”. Нетаняҳу шоми 13 феврал гуфт, ки намояндагони даҳҳо ҳукумат “дар як ҷо истода бо як қудрати бемисл, рӯшан ва муттаҳид зидди як таҳдиди умумии режими Эрон сӯҳбат мекунанд”.

Бо ин вуҷуд, бисёр кишварҳои аврупоӣ ба ин нишаст танҳо кормандони сатҳи поёни ҳукуматҳои худро фиристода, раиси сиёсати хориҷии Иттиҳодияи Аврупо Федерика Могеринӣ аз ин нишаст канорагирӣ кард. Вашингтон ва муттафиқони аврупоиаш дар заминаи аз созиши ҳастаӣ бо Эрон берун шудани президент Доналд Трамп ва бозгардони таҳримҳои иқтисодӣ ихтилофи назар доранд. Иттиҳодияи Аврупо хостори ҳифзи ин санад аст ва мехоҳад, ки шарту шурути ҳосилшуда нигоҳ дошта шавад. Дар нишасти Варшава Русия, Чин ва ҳам фаластиниҳо ширкат намекунанд.

ВКД-и Тоҷикистон: "Соли гузашта 11 амали террористӣ ошкор шуд"

Мақомоти тоҷик мегӯянд, ки соли гузашта аз ҷониби мақомоти интизомӣ 298 тан аз аъзои тарафдорони гурӯҳҳои экстремистӣ боздошт шудаанд. Рамазон Раҳимзода, вазири умури дохилии Тоҷикистон рӯзи 14-уми феврал зимни нишасти хабарии ин ниҳод ҳамчунин гуфт, ки соли гузашта аз сӯи сохторҳои ҳифзи ҳуқуқи кишвар 11 амали террористӣ ошкор ва тарроҳони онҳо дастгир карда шуданд. Ба гуфтаи генерал Раҳимзод 7-тои ин амалҳои террористиро кормандони ВКД ошкор карданд.

Рамазон Раҳимзода дар ин нишасти хабарӣ ҳамчунин хабар дод, ки дар натиҷаи корҳои таблиғотии мақомоти корҳои дохилӣ, соли гузашта 99 шаҳрвандони кишвар, ки дар муноқишаҳои кишварҳои хориҷӣ ширкат доштанд, ба Тоҷикистон оварда шуданд. Ба гуфтаи ҷаноби Раҳимзода, дар маҷмӯъ давоми солҳои гузашта 188 шаҳрванди Тоҷикистон, ки дар муноқишаҳои кишварҳои хориҷ иштирок доштанд, ба кишвар баргардонида шуданд.

Баъди шикасти ДИИШ ва озод шудани манотиқи зиёде аз дасти онҳо, занону кӯдакони зиндамондаи тоҷик дар Ироқ дар зиндон ва дар Сурия дар паноҳгоҳҳои Созмони Милали Муттаҳид қарор доранд. Ба ин ду кишвари ҷангзадаи Ховари Миёна наздики 1900 нафар шаҳрвандони Тоҷикистон сафар кардаанд. Сарнавишти бештари онҳо маълум нест.

"Шаҳри бехатар" соли 2018 аз қонуншиканҳо беш аз 30 млн сомонӣ ҷамъ овард

Мақомоти маркази "Шаҳри бехатар" мегӯянд, ки дар соли 2018 аз ҳисоби ҷаримаҳои қонуншиканӣ дар роҳҳои Душанбе, беш аз 30 миллион сомонӣ ҷамъоварӣ шудааст. Полковники милиса Иброҳим Раҳмонзода, рӯзи 14-уми феврал дар нишасти хабарии вазорати умури дохилии Тоҷикистон ба хабарнигорон гуфт, фақат дар якуним моҳи соли ҷорӣ беш аз 2 миллион сомонӣ аз ин ҳисоб ҷамъ карда шудааст.

Ин масъули маркази "Шаҳри бехатар" афзуд, ки дар ҳудуди шаҳри Душанбе 200 чорроҳа вуҷуд дорад дар 74 чорроҳа 855 камераҳои назоратӣ ва дигар камераҳои гузошта шудааст. Иброҳим Раҳмонзода айни замон гуфт, агар пиёдагардон ҳам қоидаҳои ҳаракат дар роҳро нақз кунанд, ҷарима мешаванд. "Ин на бо воситаи камераҳо, балки аз тарафи нозирони роҳ боздошт ва ҷаримабандӣ мешаванд ва моддаи махсус оиди қоидаро вайрон кардан аз сӯи пиёдагардон вуҷуд дорад",-афзуд вай.

Раиси барканоршудаи Хадамоти амнияти Узбекистон боздошт шуд

Ихтиёр Абдуллоев

Раҳбари барканоршудаи Хадамоти амнияти давлатии Узбекистон Ихтиёр Абдуллоеви 53-сола 11 феврал ба муҳлати як моҳ ба ҳабс гирифта шудааст.

Ба гуфтаи кормандони Хадамоти давлатии Узбекистон, дар ҳоли ҳозир Абдуллоев дар боздоштгоҳи муваққатии хадамот ба сар бурда, дар ин ҷо бозпурсӣ мешавад.

Пештар расонаҳои Узбекистон хабар доданд, ки Абдуллоев 8 феврал аз мақоми худ канор рафт. Гуфта шуд, ки тайи як соли ахир ӯ худро хуб ҳис намекард ва ду ҷарроҳиро пушти сар кардааст.

Вале як манбаъ дар ҳукумати Узбекистон 11 феврал гуфт, зидди Ихтиёр Абдуллоев парвандаи ҷиноӣ боз шудааст. Ба гуфтаи як афсари Хадамоти амнияти давлатӣ, зидди Абдуллоев яке аз хешонаш Алишер Эшонхоҷаев баёнот додааст, ки ба ҳайси мушовири раҳбари хадамот кор мекард. Худи Эшонхоҷаев низ дар ҳоли ҳозир дар боздоштгоҳ аст.

Як мансабдори наздик ба раҳбарияти Хадамоти амнияти давлатии Узбекистон гуфт, Абдуллоев ва Эшонхоҷаев 11 феврал дар асоси баёноти собиқ муовини аввали раиси ХАД Ҷаҳонгир Эгамови 46-сола дастгир шуданд. Эгамов 11 январи соли равон боздошт шуда буд.

Афсари Хадамоти амнияти давлатӣ мегӯяд, фаъолияти Ихтиёр Абдуллоев тайи шаш моҳи ахир зери назорати сахт ҷараён мегирифт. Ба гуфтаи манбаъ, як бахши назоратро ронандаи худи ӯ анҷом медодааст. Раиси барканоршудаи ХАД Узбекистон дар ҳоли ҳозир ба "сӯистифода аз мақом" ва "гирифтану додани ришва" айбдор мешавад.

Манбаи наздик ба ҳукумати Узбекистон гуфт, аз 10 январ то 11 феврали соли равон ҳудуди 100 корманди ХАД боздошт шуда, зиддашон парвандаи ҷиноӣ боз гаштааст. Ба гуфтаи ӯ, Ихтиёр Абдуллоев баъди он ба "ғазаб"-и президенти Узбекистон Шавкат Мирзиёев гирифтор шуд, ки ошкор гашт, ХАД суҳбатҳои телефонии хонаводаи ӯро гӯш карда, аъзои ин хонадонро таҳти дидбонӣ қарор додааст.

Ҷузъиёти бозпурсии Муродалӣ Алимардон дар утоқи кориаш

Муродалӣ Алимардон

Мақомоти раёсати Оҷонсии зидди фасод дар вилояти Суғд ҷузъиёти бозпурсии Муродалӣ Алимардон, раиси “Агроинвестбонк”-ро ошкор карданд.

Карим Иброҳимзода, раиси намояндагии Оҷонсии зидди фасод, рӯзи 14-уми феврал гуфт, Алимардон дар робита ба парвандаи мудири корхонаи пахтатозакунӣ дар ноҳияи Ҷаббор Расулов мавриди пурсиш қарор гирифт. “Бозпурсӣ дар утоқи кории Муродалӣ Алимардон гузашт”, - афзуд ӯ.

Ба қавли мақомот, Иброҳим Бобоҷонов – мудири корхонаи пахтатозакунӣ – аз соли 2011 то 2013 аз “Агроинвестбонк” барои тиҷорат беш аз даҳ миллион сомонӣ ва севуним миллион доллар гирифта, вале онро бо ин ҳадаф истифода накардааст. Балки маблағҳоро барои рӯйпӯш намудани қарзҳои қаблиаш боз ба худи “Агроинвестбонк” додааст.

Карим Иброҳимзода гуфт, “дар доираи тафтиши пешакии парванда Муродалӣ Алимардон ба ҳайси шоҳид бозпурсӣ шуд. Дар натиҷаи таҳқиқи дурусти парванда ва ба роҳ мондани чорабиниҳои фаврӣ маблағи қарз барқарор карда шуд.”

Раёсати Оҷонсии зидди фасод дар вилояти Суғд хабар дод, ки Иброҳим Бобоҷонов баъди барқарор кардани маблағи қарз афв шудааст.

Муродалӣ Алимардон соли 2015, дар оғози бӯҳрони бонкӣ, раиси “Агроинвесбонк” таъйин шуд. Ӯ дар гузашта дар мақоми муовини нахуствазир ва раиси Бонки Миллии Тоҷикистон кор кардааст.

Ёфтҳои бештар

Гузоришҳои видеоӣ

Марги шубҳабарангези сарбози 20-сола дар Роғун
лутфан мунтазир бошед
### Эмбед ###

### Феълан кор намекунад ###

0:00 0:00:16 0:00
XS
SM
MD
LG