Дар шаҳри Ишқобод – пойтахти Туркманистон – маросими ифтитоҳи Бозиҳои панҷуми осиёӣ дар иншооти сарпӯшида ва ҳунарҳои размӣ баргузор шуд. Дар ин маросим шоми 17-уми сентябр раҳбарони Тоҷикистону Узбакистон, Афғонистону Покистон, Арманистон, Қазоқистон, Молдова, Тотористон ва, инчунин, раиси Шӯрои Федеросиюни Русия Валентина Матвиенко иштирок карданд.
Ифтитоҳи расмии Бозиҳои панҷуми осиёӣ дар Olympic Stadium ҷараён гирифт, ки барои 45 ҳазор нафар пешбинӣ шудааст.
Бозиҳои панҷуми осиёӣ 11 рӯз идома мекунад ва зоҳиран раҳбари худкомаи Туркманистон Қурбонгулӣ Бердимуҳаммадов аз ин имкон ҳамчун намунаи пешрафти кишвараш истифода хоҳад кард. Туркманистон то ин дам чунин маъракаи боҳашамати байналмилалиро мизбонӣ накардааст.
Омодагӣ барои баргузории Бозиҳои панҷуми осиёӣ яке аз вазифаҳои муҳими ҳукумати Туркманистон дар вақтҳои охир буд ва барои ин кор миллионҳо доллар сарф шудааст.
Дари Туркманистон маъмулан ба рӯи ҷаҳонгардон баста аст, аммо зоҳиран Ишқбод ин дафъа дарашро ба рӯи ҳазорон сайёҳ боз хоҳад кард.
Бино ба иттилои расмӣ, дар ин бозӣ панҷуним ҳазор нафар аз 62 кишвари дунё иштирок ва аз рӯйи 21 намуди варзиш сабқат хоҳанд кард.
