Пайвандҳои дастрасӣ

Хабари нав

Хабарҳо

Амрико: "Бомбҳои атомии Покистон дар ҷойи амн аст"

Давлати Амрико гуфт, ба эътиқоди он, силоҳҳои атомии Покистон дар дастони амн аст ва ҳам гузоришҳо доир ба эҳтимоли дуздии он силоҳҳоро рад кард. Марк Тонер, сухангӯи вазорати умури хориҷии Амрико, дар Вашингтон ба хабарнигорон гуфт, Иёлоти Муттаҳида бовар дорад, ки силоҳҳои атомии Покистон дуруст муҳофизат мешаванд. Ду маҷаллаи мӯътабари амрикоӣ” The Atlantic" ва "National Journal” чанде пеш бо такя ба манобеъи худ навиштанд, ки Покистон бомбҳои атомии худро ба хотири пинҳон доштан, аз чашми ҷосусони Амрико ба маҳалли ноамне интиқол додааст.

Ҳамаи хабарҳои имрӯзро дар инҷо бихонед

Мақоми панҷуми Темур Раҳимов дар мусобиқаи ҷудо дар Тошканд 

Темур Раҳимов, варзишгари тоҷик. Акс аз соли 2018

Мусобиқаи байналмилалии ҷудоTashkent Grand Slam 2021”, ки рӯзҳои 5-7-уми март дар маҷмааи варзишии “Ҳумо Арена”-и пойтахти Узбекистон бо ҳузури тамошобинон баргузор шуд, шоми якшанбе ба поён расид.

Дар рӯзи охирини рақобатҳо шаш нафар варзишгарони тоҷик дар вазнҳои сангин қувваозмоӣ карданд. Аз байни онҳо Темур Раҳимов натиҷаи хубтар ба даст овард. Ӯдар вазни беш аз 100 кило мақоми панҷумро касб кард.

Темур ба сабқат аз даври дувум шуруъ намуд ва нахуст бар Ричард Сипотс (Маҷористон) ғолиб омад. Дар даври баъдӣ бар Адам Окруашвили (Гурҷистон) дастболо шуд. Аммо дар чорякфинал аз Кокоро Кагеура (Гурҷистон) шикаст хӯрд. Паҳлавони тоҷик дар даври тасаллобахш Мартти Пуумалаиненро аз Финляндия мағлуб кард. Темури 23-сола барои ҷойи севум ва дарёфти медали биринҷӣ бо Эрик Абрамови 21-сола аз Олмон вориди рақобат шуд. Паҳлавони ҷавони олмонӣ дар ҷараёни 3 дақиқаю 02 сония ду “ваза-ари” ба даст овард ва бо баҳогузории “иппон” ғолиб гашт.

Комроншоҳи Устопириён, ки дар вазни то 90 кило дар даври аввал озод буд, дар даври дувум бар Лорензо Ригано (Италия) ғалаба кард. Вале ӯ дар даври баъдӣ аз Донгҳан Гвак аз Кореяи Ҷанубӣ мағлуб шуд ва аз ҳаққи идомаи мубориза маҳрум гашт.

Дар рӯзи охирини мусобиқа дар сабқати мардон боз чор варзишгари тоҷик рақобат карда, дар даври муқаддамотӣ ноком шуданд. Амирҷони Насимҷон дар вазни то 90 кило аз Теодорос Тселидис (Юнон), Саидҷалол Саидов дар вазни то 100 кило аз Матиас Мадсен (Дания), Мансур Раҳмон низ дар вазни то 100 кило аз Рамазон Дарвеш (Миср) ва Шакармамад Мирмамадов дар вазни беш аз 100 кило аз Еней Маринич (Словения) шикаст хӯрданд.

Ёдовар мешавем, дар рӯзи аввали мусобиқаи ҷудо Tashkent Grand Slam 2021”, ки 5-уми март доир шуд, аз байни чаҳор варзишгари тоҷик Шаҳбоз Саидаброров натиҷаи хубтар нишон дод ва дар вазни то 60 кило мақоми панҷумро касб кард.

Ӯ ба сабқат аз даври дувум шуруъ намуд ва нахуст бар Янислав Герчев (Булғористон) пирӯз шуд. Дар даври баъдӣ Артём Колосовро аз Беларус шикаст дод. Сипас аз Каромат Ҳусейнов (Озарбойҷон) мағлуб гашт. Паҳлавони ҷавони тоҷик дар даври тасаллобахш бар Ҷаба Папинашвили (Гурҷистон) дастболо шуд.

Шаҳбоз барои ҷойи севум ва дарёфти медали биринҷӣ бо Комрон Нуриллоев аз Узбекистон рақобат кард. Довар дар ҷараёни 7 дақиқаю 35 сония ба паҳлавони тоҷик се “шидо” дод ва рақибаш ғолиб дониста шуд.

Рӯзи 5-уми март се паҳлавони дигари тоҷик дар даврҳои муқаддамотӣ ноком шуд. Абумуслим Қаюмзода қувваозмоиро дар вазни то 60 кило ба Солиҳ Йилдиз (Туркия) бохт. Алиҷон Сафаралиев дар вазни то 66 кило аз Дмитрий Минков (Беларус) мағлуб шуд. Дар ин вазн намояндаи дигари Тоҷикистон Баҳром Сӯфиев аз Натон Бурнс (Ирландия) шикаст хӯрд.

Дар рӯзи дувуми мусобиқа низ чаҳор намояндаи Тоҷикистон вориди рақобат шуданд. Сомон Маҳмадбеков дар вазни то 73 кило, ки дар даври аввал озод буд, дар даври дувум аз Евгений Прокопчук (Русия) шикаст хӯрд.

Ҳақназар Назаров дар вазни то 81 кило дар даври аввал бар Георгий Шерзадашвили (Гурҷистон) ғолиб омад. Ӯ дар даври баъдӣ Марсел Серсеаро аз Руминия мағлуб кард. Вале паҳлавони ҷавони тоҷик дар даври севум қувваозмоиро ба рақиби пуртаҷрибаву номдораш, қаҳрамони ҷаҳон дар соли 2015 Таканори Нагасе аз Ҷопон бохт.

Гуштигири дигари тоҷик Акмал Муродов дар вазни то 81 кило дар даври аввал аз Дидор Ҳамза (Қазоқистон) шикаст хӯрд.

Дар сабқати занон ягона намояндаи Тоҷикистон – Шоҳида Қаландарова- дар вазни то 63 кило, ки рақобатро аз даври дувум шуруъ кард, аз Ҳи Ҷу Ҳан (Кореяи Ҷанубӣ) мағлуб шуд.

Ба ҳайати дастаи мунтахаби Тоҷикистон 14 варзишгар (13 мард ва як зан) шомил буд. Ҳамин тариқ, беҳтарин натиҷаи варзишгарони тоҷик дар ин мусобиқа ду ҷойи панҷум аст.

Ба иттилои сомонаи расмии Федератсияи байналмилалии ҷудо (IJF), дар мусобиқаи “Tashkent Grand Slam 2021” 497 варзишгар (296 мард ва 201 зан) аз 71 кишвари панҷ қораи ҷаҳон ширкат дошт.

Варзишгарон дар мусобиқаи байналмилалии ҷудо аз силсилаи Grand Slam, ки бори аввал дар Тошканд доир гардид, барои ширкат ва пирӯзиҳои ба даст овардаашон соҳиби имтиёзҳои олимпӣ гардиданд. Барои ҷойи аввал 1000 имтиёз, барои ҷойи дувум 700 имтиёз ва барои ҷойи севум 500 имтиёз дода шуд. Инчунин ба беҳтаринҳо ба ҷуз аз медал, ҷоизаи молӣ тақдим гардид. Дар ҳар як вазн ба ғолиб 5000 доллари ИМА, барои ҷойи дувум 3000 доллар ва барои ҷойҳои севум 1500-долларӣ супурда шуд.

Дар ҳисоби умумидастаӣ мунтахаби Ҷопон бо касби 9 медали тилло, 1 нуқра ва 1 биринҷӣ мақоми аввалро азони худ кард. Мунтахаби Муғулистон бо касби 2 медали тилло, 2 нуқра ва 1 биринҷӣ мақоми дувум ва мунтахаби Кореяи Ҷанубӣ бо касби 1 медали тилло, 1 нуқра ва 4 биринҷӣ мақоми севумро соҳиб шуданд.

Мунтахаби Узбекистон – мизбони мусобиқа - бо касби 2 медали нуқра ва 4 биринҷӣ соҳиби мақоми шашум шуд. Мунтахаби Тоҷикистон бо ду ҷойи панҷум дар байни 71 кишвар дар ҷойи 25-ум қарор гирифт.

Президенти Эрон шарт барои бозгашт ба созиши ҳастаиро эълон кард

Ҳасани Рӯҳонӣ, президенти Эрон

Президенти Эрон гуфт, дар сурате, ки ИМА таҳримҳояшро алайҳи ин кишвар бекор кунад, ба созиши ҳастаӣ бармегарданд.

Ҷо Байден, президенти ИМА гуфта буд, ки дар сурати риояи созиши ҳастаӣ аз ҷониби Эрон Амрико дубора ба ин созиш бархоҳад гашт.

Раҳбарони ду кишвар дар изҳоротҳояшон барои гузоштани қадами аввал ҳамдигарро масъул медонанд, вале ҳеҷ ҷониб ҳанӯз ба амал нагузаштааст.

Рӯҳонӣ ҳам ин ҳарфҳоро дар ҳоле гуфт, ки вазири корҳои хориҷии Ирландия Саймон Ковен барои эҳёи дубораи созиши ҳастаӣ аз ҷониби Созмони милла масъул дониста шудааст.

Ирландия узви ин созиш нест, вале нақши мусоидаткунанда дар иҷрои созишномаи ҳастаиро дорад.

Президенти Эрон аз Бритониё, Фаронса ва Олмон, ки ҷониби созишномаи ҳастаӣ ҳастанд, барои иҷро накардани ӯҳдадориҳояшон танқид кард.

Президенти собиқи ИМА Доналд Трамп кишварашро якҷониба аз созишномае, ки ҳадафи маҳдуд кардани барномаи ҳастаии Эрон дар ивази сабукӣ аз таҳримҳоро дошт, берун кард.

Созишномаи ҳастаӣ миёни ИМА, Фаронса, Олмон ва Бритониё соли 2015 баста шуд, вале Амрико соли 2018 аз он берун шуд.

Попи Рум дар Мосули Ироқ дуо кард

Попи Рум дар Ироқ

Франсиск, попи Рум дар назди калисои қадимае дар Мосули Ироқ барои қурбониёне, ки дар ҷанги бо ДОИШ кушта шудаанд, дуо кард.

Мосул се сол пеш аз дасти ҷангиёни ДОИШ озод шуда буд. Дар ин шаҳр масеҳиёни зиёде зиндагӣ мекарданд, вале гуруҳи тундрави ДОИШ ибодатгоҳи онҳоро хароб ва даҳҳо нафарашонро қатл кард. Ҳазорон масеҳии дигар аз Ироқ ба дигар кишварҳо фирор карданд.

Попи Рум, ки ба Ироқ сафар кард, субҳи 7-уми март бо масеҳиён дар саҳни як ибодатгоҳи харобшуда дар вилояти Найнаво мулоқот кард.

Ӯ аз масеҳиён хост, ки дар ватни худ бимонанд, чунки берун шудани онҳо аз ватан бар зиёнашон аст.

“Барои Ватикан ҳузури доимии масеҳиён дар Ироқ муҳим аст”,-гуфт ӯ.

Поп Франсиск, раҳбари рӯҳонии католикҳо, як шохаи масеҳиёни ҷаҳон аст, ки дар Ватикан қароргоҳ дорад.

Ӯ барои чор рӯз ба Ироқ сафар кардааст.

Дар Тоҷикистон беш аз 7 ҳазор пиёдагардро ҷарима кардаанд

Роҳгузарон дар яке аз хиёбонҳои Душанбе. Акс аз соли 2017

Нозирони роҳ дар Тоҷикистон дар ду моҳи ахир беш аз 7 ҳазор пиёдагардро барои риоя накардани қоидаи ҳаракат дар роҳ ҷарима кардаанд.

Ҳафтномаи “Қонун ва ҷомеа”-и Вазорати корҳои дохилии Тоҷикистон навиштааст, ки “пиёдагардоне, ки роҳҳоро аз ҷойҳои номуайяншуда убур намуда, аз гузаргоҳҳои зеризаминӣ, рўизаминӣ ва чароғакҳои роҳнамо истифода накардаанд, 7 сомонию 50 дирам ҷарима шудаанд”.

Дар ин матлаб гуфта мешавад, ки 60 дар сади садамаҳои нақлиётӣ бо айби пиёдагардон рӯх додааст.

Бархе аз пиёдагардон мегӯянд, дар аксари роҳҳо чароғакҳо дуруст кор намекунанд ва роҳҳо барои пиёдагардон дар фосилаи дур ҷойгиранд, аз ин рӯ, роҳгузарон маҷбур ба убури роҳе мешаванд, ки ҳеҷ аломат надорад.

Аммо мақомот мегӯянд, дар Душанбе 18 гузаргоҳи зеризаминӣ сохта шудааст, вале пиёдагардон камтар аз онҳо истифода мекунанд.

Дар Тоҷикистон соле бештар аз ҳазор нафар бар асари садамҳои нақлиётӣ маҷрӯҳ ва ҳалок мешаванд.

Мухолифон дар Арманистон истеъфои сарвазирро талаб карданд

Эътироз дар Арманистон

Намояндагони иттиҳоди мухолифин дар Арманистон талаб доранд, ки Никол Пашиниян, сарвазири ин кишвар истеъфо диҳад ва дар кишвар интихоботи нави порлумонӣ баргузор гардад.

Онҳо барои баррасии ин талабҳояшон хостори мулоқот бо Армен Саргисиян, президенти Арманистон шуданд.

Даҳҳо гуруҳи мухолиф пас аз созиши Арманистон бо Озарбойҷон бар ивази додани қисматҳое аз Қарабоғи Кӯҳи муттаҳид шуданд ва Пашиниянро ба хиёнат муттаҳам мекунанд.

Мухолифон дар ҳоле ба талабҳояшон пойфишорӣ мекунанд, ки чанде пеш Никол Пашиниян сардори ситоди Вазорати мудофиаи кишварро аз мақомаш барканор кард. Ӯ Оника Гаспариянро дар талоши табаддулоти давлатӣ муттаҳам медонад.

Мухолифон аз президент талаб доранд, ба суди конститутсионӣ муроҷиат кунад ва маълум кунад, ки то куҷо барканории ин низомии баландпоя қонунӣ буд.

Дар Арманистон президент салоҳияти зиёд надорад ва кишварро сарвазир идора мекунад, вале дар ин ҳол президент ҳақ дорад, аз болои фармони сарвазир ба додгоҳи конститутсионӣ муроҷиат кунад.

Никол Пашиниён баъд аз ҷанги 44-рӯзаи Арманистону Озарбойҷон барои вилояти ҷудоиталаби Қаробоғи Кӯҳӣ зери фишори афзоянда қарор гирифтааст. Дар ин ҷанг, ки бо миёнҷигарии Русия хотима ёфт, Арманистон баъзе аз қисматҳои Қаробоғи куҳӣ ва ноҳияҳои атрофи онро ба Озарбойҷон супурд.

Муроҷиати муҳоҷирони тоҷик барои кӯмак ба ҳомиёни ҳуқуқ зиёд шудааст

Русия яке аз кишварҳои аслии муҳоҷирпазири Тоҷикистон аст.

Ҳомиёни ҳуқуқи муҳоҷирони тоҷик дар Русия мегӯянд, ки муроҷиати муҳоҷирони дармонда дар ин кишвар ва дар аҳди пандемия ба онҳо зиёд шудааст. Шуҳрат Қудратов, вакили дифо ва ҳомии ҳуқуқ, ки дар “Маркази тоҷикон” дар Маскав кор мекунад, рӯзи 6-уми март ба Радиои Озодӣ гуфт, рӯзу шаб даҳҳо нафар ба онҳо барои машварату гирифтани кумаки ҳуқуқӣ занг мезананд.

Ӯ гуфт: “Ҳамин шанбе 10 муҳоҷир бо телефон ба марказ тамос гирифтанд, ки бархеи онҳо патент надоштаанд, бархеи дигарро боздошт карда, будаанд. Мо бо ёрдами ихтиёриёни хайрхоҳ ба ҷои ҳодиса меравем ва ба масъалаи корафтодаҳо расидагӣ мекунем.”

Бинобар маҳдудиятҳои пандемияи коронавируси нав дар Русия ҳазорон муҳоҷири тоҷик ба мушкилот гирифтор шуда ва ё бекор мондаанд. Масъулони “Маркази тоҷикон” мегӯянд, бинобар зиёд шудани муроҷиатҳо ба кори шабонарӯзӣ ва 24 соата гузаштанд, то ба муроҷиати муҳоҷирони тоҷик саривақт посух диҳанд.

Дар Русия ҳудуди як миллион муҳоҷири тоҷик кору зиндагӣ мекунанд ва азбаски ҳазорон нафари онҳо бе санади расмӣ ва иҷоза кор мекунанд, ба мушкилот дучор мешаванд ва садҳо нафарашон дар боздоштгоҳҳои муваққатӣ меафтанду, муддатҳои тулонӣ дар онҷо мемонанд.

Попи Рум бо Оятуллоҳ Сиистонӣ дар Наҷаф мулоқот кард

Попи Рум ҳангоми мулоқот бо Оятуллоҳ Сиистонӣ дар Наҷаф

Попи Рум Франсис дар нахустин сафараш ба Ироқ, бо яке аз бонуфузтарин рӯҳониёни ин кишвар Оятуллоҳ Алӣ ал Сиистонӣ дидору гуфтугу кард. Дар ин вохӯрӣ дар шаҳри Наҷаф, Попи Рум дар бораи ҳамзистии осоиштани намояндагони мазҳабҳои гуногун ва ҳимоят аз ҳаққи масеҳиёни ироқӣ суҳбат кард.

Сафари раҳбари католикҳои ҷаҳон ба Ироқро мустақим дар телевизион намоиш доданд ва мардум бо дидани мулоқоти ду руҳонии муътабар изҳори хурсандӣ мекарданд. Ал- Сиистонӣ яке аз руҳониёни бонуфузи Ироқ аст ва шиамазҳабони тамоми ҷаҳон низ ба ӯ эҳтиром доранд. Баъди мулоқоти паси дарҳои баста, Оятуллоҳ Сиистонӣ бо нашри як баёнияе гуфт, масеҳиёни Ироқ бояд дар сулҳу оромиш зиндагӣ кунанд ва аз айни ҳуқуқе баҳраманд бошанд, ки дигар ироқиҳо доранд.

Ватикан гуфт, ки Попи Рум ба Ал-Сиистонӣ ва мардуми шиамазҳаб барои ба ҳимояти “заифтарину таъқибшудатарин гуруҳ” изҳори сипос кардааст. Дар гузашта дар Ироқ тақрибан 1 миллиону 400 ҳазор масеҳӣ ва аз ҷумла католикҳо зиндагӣ мекарданд, вале баъди ҳамлаи Амрико дар соли 2003 ва нооромиҳои баъди он бисёре аз онҳо гурехтанд. Ҳоло дар Ироқ 300 ҳазор масеҳӣ мондааст ва бисёре аз он ҳам беҷо шудаанд.

Сарватманди украиниро аз ҳаққи рафтан ба Амрико маҳрум карданд

Игор Коломойский дар порлумони Украина даҳҳо тарафдор дорад.

Иёлоти Муттаҳидаи Амрико гуфт, Игор Коломойский, яке аз соҳибкорони сарватмандтарини Украинаро аз ҳаққи вуруд ба он кишвар маҳрум карданд. Қарори мазкурро аломате аз мавқеъгирии сахтгиронаи раиси ҷумҳур Ҷо Байден медонанд, ки мехоҳад, ҳукумати Украина ба зидди фасодкории густурда мубориза барад.

Энтони Блинкен, вазири умури хориҷии Амрико рӯзи 5-уми март қарори аз ҳаққи вуруд ба Амрико маҳрум кардани Игор Коломойскийро эълон кард ва гуфт, ки “талошҳои феълӣ ва идомадори Коломойский барои халалдор кардани ҷараёнҳо ва аркони демократия дар Украина барои ояндаи ин кишвар хатари ҷиддӣ эҷод мекунад.”

Мунтақидони Коломойский мегӯянд, ки ӯ саъй дорад, ислоҳоти лозимии сиёсӣ ва иқтисодӣ, аз ҷумла дар низоми додгоҳӣ ва бонкдории Украина сурат нагирад. Амрикову Иттиҳодияи Аврупо тарафдори ин ислоҳот ҳастанд ва ба гуфтаи мунтақидон барои ҷилавгирӣ аз ислоҳот даҳҳои вакили тарафдори Коломойский ба ӯ кумак мекунанд.

Вазорати умури хориҷии Амрико ҳамчунин зану фарзандони Коломойскийро аз ҳаққи вуруд ба Иёлоти Муттаҳида маҳрум сохтааст.

WHO аз кишварҳои ҷаҳон хост, эҳтиёткор бошанд

Инҷо Рум аст...

Созмони Ҷаҳонии Тандурустӣ ҳушдор додааст, ки бо раҳандозии маъракаи васкинзанӣ ба зидди COVID-19 маҳдудиятҳои гаштугузор набояд камтар карда шавад, зеро мумкин аст, вирус дигарбора дар кишварҳои ҷаҳон васеъ паҳн шавад. Айни замон коронавируси нав дар Бразилия ва чанде аз кишварҳои Аврупо бедодгарӣ мекунад ва маргу мир аз он ҳам афзудааст.

Майк Райан, яке аз мудирони Созмони Ҷаҳонии Тандурустӣ рӯзи 5-уми март гуфт, ки пандемия ҳануз аз марҳилаи нобудӣ дур аст ва “Агар кишварҳои ҷаҳон эҳтиёт накунанд, мо шоҳиди авҷи саввум ва чаҳорумбораи беморӣ мешавем.” Ҳушдори созмон дар замонест, ки дар Амрико суръати сироят сусттар шудааст ва баръакс ваксинзанӣ суръат мегирад.

Айни замон баъзе иёлатҳо маҳдудиятҳоро барои беҳтар кардани фаъолиятҳои иқтисодӣ камтар кардаанд. Дар Бразилия, ки навъи нави вирус босуръат доман паҳн мекунад, ин ҳафта теъдодии рекордии беморон ва маргумир аз СОVID-19 сабт шуд. Мудири Созмони Ҷаҳонии Тандурустӣ авзоъ дар Бразилияро “бисёр нигаронкунанда” хонда ва аз сирояти вирус аз онҷо ба кишварҳои дигари Амрикои Лотинӣ ҳушдор додааст.

Тарма дар Бадахшони Афғонистон 14 нафарро куштааст

Инҷо як обанбори Вилояти Бадахшони Афғонистон аст, ки бо Бадахшони Тоҷикистон ҳаммарз мебошад.

Дар натиҷаи тарма ва ё баҳман дар як кони тило дар шимоли Афғонистон камаш 14 нафар кушта шудаанд. Мақомоти Афғонистон гуфтанд, ки тарма рӯзи 4-уми март дар як гӯшаи дурдасти вилояти Бадахшон сурат гирифтааст, ки зери назорати Толибон аст.

Фарид Некфар, сардори Раёсати кумитаи ҳолатҳои фавқуллода дар Бадахшон гуфтааст, ки ҷасади 12 нафарро аз зери барф берун кашидаанд ва ҷустуҷуи ҷасади ду нафари дигар идома дорад.

Некмуҳаммад Назарӣ, сухангӯи ҳукумати Вилояти Бадахшон гуфтааст, ки тарма дар рустои Зарандоб, дар ноҳияи Роғистон ҷони 15 нафарро гирифта, панҷ каси дигарро маҷруҳ кардааст. Бо расидани баҳор, тармаву сел дар Афғонистон зиёд мешавад.

Асомуддинзода барканор шуд. Раиси Донишкадаи исломии Тоҷикистонро иваз карданд

Тоҷиддин Асомуддинзода

Тоҷиддин Асомуддинзода, раиси ягона Донишкадаи исломӣ дар Тоҷикистон, аз мансабаш барканор шуд. Дар ин бора рӯзи 5-уми март қарори ҳукумати Тоҷикистон нашр шуд, вале дар он сабаби барканориро нагуфтаанд.

Асомуддинзода 49-сола аст ва аз соли 2015 дар ин мансаб кор мекард. Вай дар гузашта дар Кумитаи дини Тоҷикистон сардори бахш ва як муддат муовини раис буд.

Бо қарори дигари ҳукумат, ки рӯзи ҷумъа тасвиб шуд, Нусратулло Зокирзода раиси нави Донишкадаи исломӣ таъйин гардидааст.

Солҳои пеш дар Тоҷикистон тақрибан 20 мадраса сабтином шуда буд. Бо гузашти замон онҳо баста шуда, танҳо як Донишкадаи исломӣ дар Душанбе монд, ки он ҳам қисман ба таълими динӣ машғул аст. Ҳоло дар Донишкадаи исломӣ 879 кас мехонанд.

Дар чанд соли охир дар Тоҷикистон даҳҳо рӯҳониро барои таълими динии, ба гуфтаи мақомот, ғайриқонунӣ дастгиру муҷозот кардаанд. Созмонҳои байнулмилалӣ ва кишварҳои ғарбӣ борҳо Тоҷикистонро барои маҳдуд кардани озодиҳои динӣ танқид мекунанд, вале мақомоти тоҷик ҳамеша интиқодҳоро беасос ва рафтори худро барои таъмини амният дар кишвар дурусту қонунӣ мешуморанд.

Cафорати ИМА бо 110 ҳазор доллар барои Горди миллии Тоҷикистон чоҳи об сохт

Бо пуштибонии молии Сафорати ИМА дар Душанбе барои таъмини оби нушокӣ ба Горди миллии Тоҷикистон бо арзиши 110 ҳазор доллар як чоҳ сохта шуд.

Ба иттилои Сафорати Амрико, дар маросими мавриди истифода қарор додани ин чоҳ, муовини Фармондеҳи Горди миллии Тоҷикистон генерал-майор Ҷонибек Ализода ва Атташеи низомӣ дар Сафорати Амрико подполковник Ҷошуа Мадлингер ширкат доштанд.

Бунёди ин тарҳ дар чаҳорчӯбаи Барномаи мубориза бар зидди маводи нашъаовар аз тарафи Сафорати ИМА дар Тоҷикистон сурат гирифтааст.

Дар соли 2011 ҳам Сафорати Амрико ба миқдори 3,1 миллион долллар барои бунёди Маркази таълимии Горди миллӣ кӯмак карда буд.

Амрико дар 29 соли ҳамкорӣ дар бахши хусусӣ, кишоварзӣ, тандурустӣ, маориф, муассисаҳои демократӣ ва амният дар Тоҷикистон садҳо миллион доллар кумак кардааст.

Давлати Амрико дар бунёду бозсозии дидбонгоҳҳои марзӣ дар Тоҷикистон саҳм гирифта ва ба нерӯҳои низомӣ таҷҳизоти фаннӣ, техника ва воситаҳои нақлиёт додааст.

Попи Рум бо як сафар таърихӣ вориди Ироқ шуд

Поп Франсисро дар фурудгоҳ нахуствазири Ироқ Мустафо ал-Козимӣ пешвоз гирифт

Ҳавопаймои попи Рум Франсис дар чаҳорчӯби нахустин сафари таърихии раҳбари калони католикҳои ҷаҳон дар фурудгоҳи Бағдод поин шуд. Ироқ нахустин маконе шуд, ки Попи Рум дар паи пандемияи коронавирус ба он ҷо сафар мекунад. Франсис дар фурудгоҳи Бағдод 5-уми март ба хабарнигорон гуфт, “хушбахтам, ки сафарам барқарор шуд ва ин сафари рамзӣ ба сарзаминест, ки давоми солиёни зиёд азият шудааст”. Дар ҷараёни сафари чоррӯзааш ба Ироқ ӯ ба мулоқоти ҷомеаи масеҳиёни ин кишвар рафта, ҳамчунин аз муколамаи байни динҳо сӯҳбат мекунад, бо раҳбари шиаёни ин кишвар Оятуллоҳ Алии Сиистонӣ ҳам дидору гуфтугӯ хоҳад кард. Рӯҳонии 84-сола қарор аст дар варзишгоҳи марказии шимоли Ирбил ҳам як намози дастаҷамъӣ барпо кунад. Барои таъмини амнияти раҳбари католикҳои ҷаҳон дар Ироқ ҳазорҳо кормандони амниятӣ ҷалб шудаанд.

Гурҷистон ҳам ба рӯи тоҷикистониҳо дарҳояшро боз кард

Роҳ ба сӯи фурудгоҳи Тифлис

Нахуствазири Гурҷистон Ираклий Гарибашвилӣ қароре имзо кард, ки бар асоси он, шаҳрвандони Тоҷикистон, Қирғизистон, Туркманистон ва Узбекистон ҳақ доранд бар асоси тести манфии коронавирус ба ин кишвар ворид шаванд. Мақомоти Гурҷистон дар як изҳорот таъкид карданд, ки тести мусофирон бояд на дертар аз 72 соат то замони ворид шудан ба Гурҷистон супурда шавад. Гурҷистон гуфт, ки бо сабаби мусоид шудани вазъи беҳдоштию эпидемиологӣ дар ин кишвар аз 1 феврал ҳама монеаҳо барои парвозҳои ҳавоиро бекор мекунад.

Дар паи манъи маҳдудиятҳои парвоз, ҳамакнун, шаҳрвандони Тоҷикистон метавонанд ба Алмаато (Қазоқистон), Кобул (Афғонистон), Истамбул (Туркия), Дубай (Имороти Муттаҳидаи Арабӣ) ва Тошканд (Узбекистон) сафар кунанд. Русия ҳанӯз марз ва роҳҳои ҳавоиву нақлиётиаашро баста нигоҳ медорад. Барои бисёр шаҳрвандони Тоҷикистон, ки аз бозори кори Русия вобаста ҳастанд, интизорӣ аз боз шудани хатсайрҳои маъмулӣ бо ин кишвар масъалаи рақами як шудааст.

Дар Мянмар як эътирозгари дигар кушта шуд

Шаҳри Янгон, 1 март. Эътирозгарон барои ҳимояти худ ба даст сипар гирифтаанд

Нирӯҳои амниятӣ дар Мянмар рӯзи 5 март ҳам ба сӯи эътирозгарони ғасби қудрат дар моҳи феврал оташ кушода як нафарро кушта бар ҷой гузоштанд. Вазъи Мянмар дар маркази баррасиҳои Шӯрои амнияти СММ қарор мегирад. Бо ин вуҷуд, ки дар паи саркӯбҳои эътирозҳо дар чанд рӯзи гузашта беш аз 50 нафар кушта шуданд, мардум аз эътироз даст намекашанд. Ба иттилои дарёфтӣ, 1700 нафари дигар боздошт шудааст. Хушунат алайҳи эътирозгарон дар Мянмар боиси маҳкумияти байналмилалӣ шуд. Муҳаққиқи ҳуқуқи башари СММ Томас Эндрюс аз Шӯрои амнияти СММ хост, ки нисбати ҳукумати феълии Мянмар таҳримсилоҳ ва таҳримҳои иқтисодӣ ҷорӣ шавад. Инчунин ӯ хост, ки кори низомиёни даст ба ғасби қудратзада ба Додгоҳи ҷиноятҳои ҷиноии байналмилалӣ ирсол шавад. Ҷаласаи Шӯрои амнияти СММ 5 март баргузор мешавад.

HRW гуфт, тарҳи конститутсияи Қирғизистон набояд қабул шавад

Содир Ҷабборов дар мақоми президенти Қирғизистон ба Қазоқистони ҳамсоя сафар кард

Human Rights Watch (HRW) аз Қирғизистон тақозо кард, тарҳи конститутсияи нави ин кишварро, ки моҳи феврал ба парлумон ироа шуд, бо сабаби нақз кардани ҳуқуқи инсон ва роҳ доданаш ба имкони сӯиистифода аз қудрат қабул накунад. Сайнат Султоналиева, муҳаққиқи масоили Осиёи Марказӣ дар HRW гуфт, “тарҳи конститутсия ба меъёрҳои ҳуқуқи башар, ки Қирғизистон ба риояи он тааҳҳуд кардааст, посухгӯ нест”. Аз октябри соли 2020, вақте дар Қирғизистон интихоботи парлумонӣ баргузор шуду бо сабаби эътирозҳо аз тақаллуб натиҷаҳояш бекор гардид ва президент Сооронбой Ҷеенбеков ба истеъфо рафт, ин кишвар дар як бӯҳрони сиёсӣ қарор дорад. Он замон Содир Ҷабборов дар қатори чанд сиёсатмадори дигари зиндонӣ ба озодӣ баромад. Ҷабборов, ки барои гаравгонгирии октябри соли 2013 ба 10 соли зиндон маҳкум шуда буд, дар авҷи эътирозҳо озод шуду тавонист дар интихоботи президентии моҳи январ пирӯз шавад. Баъди ин ӯ ба тағйироти конститутсионӣ даст зад. Барои ба референдум ё ҳамапурсии мардумӣ гузоштани тарҳи нави конститутсия 80 овози тарафдори вакилон кофӣ мебошад. HRW мегӯяд, тарҳи нави конститутсия набояд ҳоло қабул шавад ва танҳо баъди интихоботи парлумонӣ дар баҳсу баррасиҳои ҳамаҷониба бояд аъзои нави парлумон онро таҳияву баррасӣ кунад.

Ҷоизаи амрикоии "Зани шуҷоъ" ба Колесникова ва 13 зани дигари фаъол тақдим мешавад

Мария Колесникова, як узви раҳбарияти мухолифони Беларус соли гузашта ба зиндон андохта шуд

Имсол ИМА 14 зани “фавқулодда”-ро аз Эрону Беларус ва дигар кишварҳо қадрдонӣ мекунад, ки раҳбарӣ, ҷасорат, тавонмандӣ ва иродаашонро барои дигарҳо қурбон карданд. Энтони Блинкен, котиби давлатии ИМА дар маросими вижае 8 март, ки ба муносибати Рӯзи байналмилалии занон барпо мешавад, корнамоиҳои Мария Колесникова, як узви мухолифони Беларус ва Шӯҳра Баят, як довари шоҳмот ва мухолифи пӯшидани либоси маҷбурии исломӣ дар Эронро қадрдорӣ мекунад. Дар миёни дигар барандаҳо ҳафт хонум аз Афғонистон ҳам ҳастанд, ки барои хидмат ба ҷомеаҳои худ кушта шуданд.

Ҷоизае, ки бо номи “Зани шуҷоъ” маъруф аст, имсол бори 15-ум тақдим мешавад ва ин мукофот ба заноне дода мешавад, ки дар ҷомеаҳои кишварҳои худ тавонистанд барои сулҳу субот, адолат, ҳимоят аз ҳуқуқи башар ва баробарии ҷинсиятӣ мубориза баранд.

Соли 2014 ҳуқуқшиноси тоҷик Ойниҳол Бобоназарова ҳам ҳамчун нахустин намояндаи Тоҷикистон ба бурдани ин ҷоиза мушарраф шуд. Ҳафт сол пеш ҷоизаи “Зани шуҷоъ”-и департаменти давлатии ИМА-ро ба Бобоназарова ҳамсари президенти ИМА Мишел Обама тақдим кард.

Ин ҷоиза соли 2007 аз ҷониби котиби давлатии ИМА Кандализа Райс таъсис шудааст. Ойниҳол Бобоназарова, ки ба вазъи ҳуқуқи башари Тоҷикистон нигоҳи интиқодӣ дорад, соли 2013 нахустин зан дар таърихи Тоҷикистон буд, ки хост дар интихоботи президентӣ ширкат кунад.

Чин аз паи тағйири қонуни интихоботи Ҳонгконг шуд

Эътирозҳои Ҳонгконг

Чин, дар иқдоми навбатиаш барои маҳдуд кардани садои мухолифон дар Ҳонгконг, эълон кард, ки системаи интихоботии ин қаламравро бекор мекунад. Парлумони Чин дар ҷаласаи рӯзи 5-уми март тағйирот ба қонуни интихоботи Ҳонгконгро қабул мекунад. Ван Чен, раиси як кумитаи парлумонии Чин гуфт, ки низоми интихоби раҳбари Ҳонгконг дигар шавад, чунки, ба гуфааш, тавассути бархе имкониятҳои қонуни интихоботи Ҳонгконг фаъолияти ҷонибдорони истиқлолияти Ҳонгконг имконпазир мешавад. Ван гуфт, ки Чин ҳаҷм, шакл ва шеваи кори кумитаи интихоботиро иваз мекунад, то ки раҳбарияти ин минтақа тавони интихоб кардани қонунгузоронро дошта бошанд. Ин тағйирот ба конститутсияи кишвар ҳам ворид хоҳад шуд. Ҳонгконг як бахше аз Чин аст, вале аз рӯи принсипи “як кишвар ва ду система” амал мекунад, ки ин шаҳр имкон ва ҳуқуқи озодии баён ва озодии матбуотро дар ин ҷо фароҳам мекунад. Вале гурӯҳҳои ҳомии ҳуқуқ ва ҳам демократияҳои ғарбӣ Пекинро барои саркӯби ин озодиҳо интиқод мекунанд. Намоишҳои эътирозии Ҳонгконг дар солҳои охир, ба вижа соли 2019 аз ҷониби Пекин саркӯб шудаанд.

Дар суқути чархболе дар Туркия 11 низомӣ ҷон бохтанд

Ҷойи ҳодиса

Дар натиҷаи суқути як чархбол (вертолет) дар вилояти Битлис, дар шарқи Туркия, 11 низомӣ ҷон бохта, се каси дигар захмӣ шуданд. Ҳодиса рӯзи чаҳоруми март иттифоқ уфтодааст.

Дар миёни ҷонбохтагон генерал Усмон Эрбаш низ будааст. Вай бахши ҳаштуми нерӯҳои хушкигарди Туркияро фармондеҳӣ мекард.

Бино ба маълумоти муқаддамотӣ (пешакӣ, ибтидоӣ), сабаби суқути чархбол ҳавои номусоид ё нуқс (камбуд)-и техникии чархбол аст.

Дабири кулли НАТО, Йенс Столтенберг, дар мавриди ҳалокати низомиёни турк ҳамдардӣ баён кардааст.

Попи Рум гуфт, ба ҷустуҷӯйи "оштӣ" ба Ироқ меравад

Поп Франсис дар роҳ ба сӯйи Ироқ. 5-уми марти 2021

Раҳбари католикҳои ҷаҳон рӯзи 5-уми март сафари чаҳоррӯзаи худро ба Ироқ оғоз кард. Поп Франсис дар остонаи сафараш гуфт, ҳамчун "зоири сулҳ" ба ин кишвари ҷангзадаи аксаран мусулмоннишин дар Ховари Миёна меравад.

Попи 84-сола дар муроҷиати видеоӣ рӯзи 4-уми март гуфт, "ба баҳои сангине, ки масеҳиёни Ироқ дар даҳсолаҳои охир пардохтаанд", арзиши воло қоил аст ва дар айни замон афзуд, "ба хоҳарону бародарони мазҳабҳои дигар низ даст хоҳад дод".

Ӯ хитоб ба мардуми Ироқ гуфт: "Орзу мекунам, ки чеҳраҳои Шуморо бибинам, мулоқот кунам, аз сарзамини Шумо, гаҳвораи тамаддуни бостонӣ, дидан кунам."

"Ҳамчун зоир, як зоири тавбахоҳ меоям, то пас аз солҳо ҷангу терроризм аз Худованд дархости омурзиш ва оштӣ кунам", -- афзуд Поп Франсис.

Ин сафари нахустини хориҷии Попи Рум аз оғози паҳншавии бемории коронавирус аст. Ба истиқболи ӯ дар Бағдоду Наҷаф аксҳояшро насб кардаанд. Қарор аст, раҳбари католикҳои ҷаҳон то 8-уми март дар баъзе аз чорабиниҳо дар Ироқ иштирок кунад.

Дар Қирғизистон Хадамоти мубориза бо ҷиноятҳои иқтисодиро барҳам медиҳанд

Ҳукумати Қирғизистон қарор кардааст, ки Хадамоти давлатии мубориза бо ҷиноятҳои иқтисодии ин кишвар барҳам дода шавад.

Ба иттилои хадамоти матбуотии ҳукумати Қирғизистон, ин қарорро сарвазири он кишвар Улукбек Марипов имзо кардааст.

Дар ҳукумати Қирғизистон гуфтанд, ҳаҷми иқтисоди соягӣ дар оморҳои расмӣ 130 млрд сом ё 23,6 % ММД нишон дода мешавад. Дар ҳоле ки коршиносони мустақил мегӯянд, он 24-43% ММД аст. Ин бозгӯи он аст, ки Хадамоти мубориза бо ҷиноятҳои иқтисодии Қирғизистон вазифаҳои худро ба таври зарурӣ анҷом дода наметавонад.

Президенти Қирғизистон Содир Ҷабборов чанде пеш дар Фейсбук навишт, ки шарт нест, вазорат ё ниҳоди дигаре барои шахсони алоҳида ҳифз карда шавад.

Дар Қирғизистон соли 2012 пулиси молӣ барҳам дода шуда, ба ҷои он Хадамоти мубориза бо ҷиноятҳои иқтисодӣ таъсис гашт.

Дар Алмато сокинон озодии маҳбусони сиёсиро талаб карданд

Эътироз дар Алмато. 4 март, 2021.

Рӯзи 4--уми март дар шаҳри Алматои Қазоқистон се сокини маҳаллӣ бо навбат дар назди ёдгории Истиқлол дар майдони Ҷумҳурӣ гирдиҳамоӣ ташкил карданд.

Онҳо озодии маҳбусони сиёсӣ, кам кардани маоши вакилони порлумонро талаб карданд. Яке аз эътирозгарон ба додгоҳ кашидани ҳокими пешини шаҳри Алмато Бауирҷон Байбекро талаб кард. Байбек дар фасодкорӣ гумонбар мешавад.

Дариға Раҳим, яке аз эътирозгарон номи 27 маҳбуси сиёсиро дар варақ навишта озодии онҳоро аз ҳасб талаб кард.

Дар ҳафтаҳои охир дар Қазоқистон эътирозҳои сокинон зидди сиёсатҳои давлат афзудааст. Сокинон бештар аз мақомот қатъи таъқиби фаъолон, озодии маҳбусони сиёсӣ, кӯмак ба модарони танҳо, бештар кардани маошу дигар пардохтҳои давлатиро талаб мекунанд.

Президенти Қирғизистон ба Узбекистон меравад

Раиси ҷумҳури Қирғизистон Содир Ҷабборов.

Вазири корҳои хориҷии Қирғизистон Руслан Казакбоев рӯзи 4-уми март хабар дод, ки президенти Қирғизистон Содир Ҷабборов дар рӯзҳои наздик ба чанд кишвар сафар мекунад.

Ба гуфтаи вай, рӯзҳои 11-12 март Ҷабборов ба Узбекистон ва баъди он ба Тоҷикистону Туркманистону Чин сафар мекунад.

Содир Ҷабборов рӯзҳои 2-3 март бо сафари давлатӣ ба Қазоқистон рафт. Вай бо ҳамтои қазоқаш Қосимҷомарт Тоқаев, президенти пешини Қазоқистон Нурсултон Назарбоев ва дигар шахсони расмии он кишвар мулоқот кард.

Пеш аз сафар ба Қазоқистон Ҷабборов ба Русия рафта буд.

Пулиси Мянмар дубора сӯи эътирозгарон оташ кушод

Пулиси Мянмар барои пароканда кардани эътирозҳои зидди ҳукумати низомиён аз аслиҳа ва гази ашковар истифода кард.

Сарфи назар аз он ки рӯзи 3 март дар натиҷаи пароканда кардани эътирозгарон 38 одам кушта шуд, рӯзи панҷшанбе дубора дар чанд шаҳри Мянмар сокинон ба кӯча баромаданд. Дар бораи қурбониёни рӯзи панҷшанбе ҳоло маълумот нарасидааст.

Дар шаҳри Янгон, пойтахти Мянмар ҳазорон эътирозгар ба кӯча баромада, озодии роҳбари мардумӣ Аун Сан Су Чжиро талаб карданд.

Ба навиштаи расонаҳо, аз ибтидои табаддулоти низомӣ - аз рӯзи 1 феврал то кунун - дар Мянмар на камтар аз 54 кас кушта шудааст. Бештар аз 1700 каси дигар, аз ҷумла 29 рӯзноманигор боздошт шудааст.

Иттиҳоди Аврупо истифодаи силоҳ зидди эътирозгарони осоиштаро дар Мянмар маҳкум кард.

Қарор аст, имрӯз, 5 март Шӯрои Амнияти СММ пӯшти дарҳои баста вазъ дар Мянмарро баррасӣ кунад.

Дар натиҷаи табаддулоти низомӣ дар Мянмар ҳукуматро низомиён ғасб карданд. Низомиён роҳбари ҳизби "Лигаи миллии тарафдори демократия" Аун Сан Су Чжиро боздошт карданд, ки ҳизби вай дар интихоботи порлумонии моҳи ноябри соли 2020 пирӯз шуда буд. Низомиён ҳизби ӯро дар тақаллубкорӣ айбдор мекунанд. Низомиён тасмим доранд, як сол баъд интихоботи нави порлумонӣ баргузор кунанд. Дар Мянмар сокинон зидди ҳукумати низомиён эътироз доранд.

Дар стратегияи амнияти миллии ИМА Чин рақиби асосӣ номида шуд

Энтону Блинкен, вазири умури хориҷии ИМА.

Дар стратегияи миллии муваққатии ИМА, ки ахиран аз номи президент Ҷо Байден ба нашр расид гуфта шудааст, Русия тавсеаи нуфузи худ дар ҷаҳонро ҳадаф гузошта, бо ноустувор сохтани меъёрҳои мавҷуда дар арсаи ҷаҳонӣ нақши харобкоронаро мебозад.

"Ҳамчунин ин кишвар дар баробари Чин талошҳои зиёдеро барои заиф сохтани ИМА анҷом додааст, то Вашингтон натавонад манфиатҳои худу ҳампаймонҳояшро дар саросари ҷаҳон ҳимоят кунад", - омадааст дар стратегия.

Вале рақиби асосии ИМА дар арсаи ҷаҳонӣ на Русия, балки Чин номид шудааст. Чин ягона рақиби Амрико дониста шудааст, ки бо истифода аз тавонмандии иқтисодӣ, низомӣ, технологӣ ва талошҳои дипломатӣ метавонад барои низоми бозу устуворӣ байналмилалӣ хатар эҷод кунад.

Номи Русия ва Чин дар қисмати назорати таслиҳотӣ низ зикр шудааст, вале ҳамзамон қайд гашта, ки ИМА барои гуфтугӯ дар ин масъала ва дар умум, роҷеъ ба суботи стратегӣ омодааст. Дар стратегияи мазкур эътироф шудааст, ки низоми худкомагӣ ба демократия, аз ҷумла Амрико ва ҳампаймонони он хатар дорад.

Ёфтҳои бештар

XS
SM
MD
LG