Вазорати корҳои хориҷии Тоҷикистон гуфт, ки давоми панҷ рӯзи гузашта дар шаҳри Душанбе ҷаласаи калони мақомдорони Тоҷикистону Узбекистон барпо шуд. Дар ин ҷаласа, ки рӯзҳои 20-25 декабр ҷараён гирифт, Комиссияи муштараки демаркатсионӣ ҷараёни кору гуфтугӯҳои муштаракро баррасӣ кардааст. Дар хабр омадааст, ки “тарафҳо натиҷаи корҳои геодезӣ-топографӣ, аэроаксгирӣ ва демаркатсионие, ки дар соли 2021 анҷом дода шуданд, ҷамъбаст карда”, барномаи кориву нақшаи соли 2022-ро мувофиқа намуданд. Ҷаласаи навбатӣ дар Ӯзбекистон барпо мегардад. Ҷузъиёти дигар нашр намешавад.
Тоҷикистон ва Узбекистон беш аз 1300 километр марзи муштарак доранд, ки ҳудуди 90 дарсади он таъйину аломатгузорӣ шудааст.