Додгоҳи ноҳияи Советии шаҳри Самараи Русия ҳафтаи гузашта роҳбари маркази тоҷикон – "Пайванд" Саидасрор Мирзоевро ба риоя накардани қоидаҳои будубош дар Русия гунаҳкор ва ба ихроҷ аз қаламрави ин кишвар маҳкум кард. Пайвандон ва вакили мудофеи ӯ мегӯянд, парванда беасос буда, бо талоши "як гурӯҳи тоҷикони манфиатхоҳ" дуруст шудааст.
Дар қарори додгоҳ гуфта мешавад, Мирзоев эътироф кардааст, ки ба қонуншиканӣ роҳ додааст, яъне мебоист қаламрави Русияро тарк мекард, аммо аз он берун нарафт. Ҳам наздиконаш ва ҳам баъзе аз расонаҳои русӣ изҳори ҳайрат мекунанд, ки Саидасрор Мирзоев аз соли 1993 инҷониб шаҳрванди Русия аст ва ҳеч гуна муҳлати муайяни будубош нисбат ба ӯ татбиқ шуда наметавонист.
Дар додгоҳ гуфта шуд, ки Саидасрор Мирзоев гунаҳкор буданашро эътироф кард ва акнун ба ғайр аз ихроҷ ҳамчунин бояд 2000 рубл ҷарима супорад.
Ӯро ба поймол кардани қонуни будубош дар Русия айбдор карда, 2 ҳазор рубл ҷарима бастанд ва ба боздошгоҳи муваққатии Толятти фиристоданд. Аз он ҷо муҳоҷиронро ба Ватан мефиристанд.
Додгоҳ масъалаи шаҳрвандии Мирзоевро шарҳ надодааст, вале баъзе аз расонаҳои русӣ тахмин задаанд, ки ӯ шаҳрвандиро дар соли 1993 ғйриқонунӣ ба даст овардааст. Ин айбнома ахиран нисбат ба шуморе аз тоҷикони саршинос дар Русия ба кор бурда мешавад. Аз ҷумла, раиси ҷомеаи тоҷикони Русия Каромат Шарифов бо айни чунин айбнома аз Русия ихроҷ шуда буд.
Саидасрор Мирзоев ҳамчун раҳбари ҷомеаи тоҷикони Самара яке аз чеҳраҳои бонуфуз дар ин қисмати Русия шумурда мешавад.
ХАЛТА БА САРИ РАҲБАРИ МАРКАЗИ ТОҶИКОНИ САМАРА
Довудҷон Мирзоев, бародари Саидасрор Мирзоев, рӯзи 29-уми декабр ба Радиои Озодӣ гуфт, бародарашро кормандони ниқобпӯши ОМОН шаш рӯз пеш дар назди манзили зисташ боздошт ва латукӯб кардаанд.
"Ним соат пеш аз ҳодиса бародарам ба ман занг зад ва гуфт, "як таксӣ фирист, то аз хона ба база оям". Як таксирони шиносро фиристода, ба бародарам гуфтам, ӯ мунтазир аст. Пас аз чанд лаҳза ба база (манзур анбори мевафурӯшии рақами 3-и шаҳри Самара) як гурӯҳ кормандони ниқобпӯши ОМОН бо мошинҳои низомӣ сарозер шуданд. Хостам, ба бародарам дубора занг зада, гӯям, ки нирӯҳои ОМОН омаданд, аммо на ӯ ва на ронандаи таксӣ гӯширо нагирифтанд", -- нақл кард ӯ.
Мирзоев мегӯяд, пас аз чанде таксирон беҳолу бемадор пайдо шуда, хабар додааст, ки маъмурони ОМОН ӯ ва Саидасрор Мирзоевро боздошт ва сахт латукӯб карданд. Ӯро сар доданд, вале Саидасрорро ба боздоштгоҳ бурданд.
Довудҷон Мирзоев, бародари Саидасрор Мирзоев, гуфт, кормандони пулис аз ӯ танҳо хостаанд, Русияро тарк кунад ва дигар бознагардад.
Александр Паулов, вакили мудофеи Саидасрор Мирзоев, дар суҳбат бо Радиои Озодӣ гуфт, шахси зери ҳимояаш пас аз латукӯб ва таҳдиди мақомот, ки ба баданаш сӯзандору задаанд, маҷбур шудааст, зидди худ дар додгоҳ шаҳодати бардурӯғ диҳад ва худро “шаҳрванди хориҷӣ” эътироф кунад.
Паулов мегӯяд, дар ҳукми додгоҳ гуфта намешавад ки Мирзоев шаҳрванди кадом кишвар аст, танҳо навишта шудааст, шахси хориҷӣ аст ва ҳозир аст ба Тоҷикистон баргардад.
Ба гуфтаи вакили мудофеъ, нисбат ба Мирзоев мақомот ягон айб эълон накардаанд, ба ҷуз аз ҳуқуқвайронкунии маъмурӣ. "Ӯро ба поймол кардани қонуни будубош дар Русия айбдор карда, 2 ҳазор рубл ҷарима бастанд ва ба боздошгоҳи муваққатии Толятти фиристоданд. Аз он ҷо муҳоҷиронро ба Ватан мефиристанд. Лекин зерҳимояи ман шаҳрванди Русия аст ва ба ҷуз аз шаҳрвандии Русия шаҳрвандии ҳеч кишвареро надорад", -- изҳор дошт Паулов.
"КОРИ ТОҶИКОНИ ХУДАМОН, ҲОҶИҲОИ ПУЛДОР"
Боздошти бародарашро Довудҷон Мирзоев кори дасти "як гуруҳ аз тоҷикони манфиатхоҳ" медонад, ки аз истодагарии Саидасрор Мирзоев барои дар дифоъ аз ҳуқуқи аробакашҳо норозӣ будаанд.
Ба гуфтаи Мирзоев, "дар база ё анбори рақами 3-и шаҳри Самара, воқеъ дар кӯчаи Сахаров, ки калонтарин базаи тиҷоратии вилоят ба шумор меояд, наздики 500 тоҷик кор мекунанд ва аксарашон аробакаш ҳастанд."
Ба иддаои ӯ, аробакашҳо рӯзе ҳудуди 1000 рубл кор мекунанд ва як гурӯҳ аз тоҷикони бонуфузи муқими Самара се сол боз талош доранд, аз онҳо ҳақ ситонанд, аммо Саидасрор Мирзоев монеи ин кор мешудааст. Довудҷон Мирзоев гуфт: "Ҳоло як гурӯҳ аз тоҷиконе пайдо шудаанд, ки худро соҳибмулк эҳсос мекунанд ва мехоҳанд, аз аробакашҳо ҳар рӯз пул ситонанд. Як ҷамъияти ғуломдорӣ ташкил карданӣ ҳастанд. Аммо Саидасрор Давлатович ба ин мақсади онҳо халал расонда, мегӯяд, ки ақаллан аробакашҳоро ғам надиҳед."
Мирзоев гуфт, номи тоҷиконеро медонад, ки ба кормандони мақомоти қудратии Самара ришва дода, хостаанд, бародари ӯро аз ин ҷо ронанд, аммо аз бурдани номи ин ашхос худдорӣ варзид. Вай танҳо гуфт, "ҳоҷиҳои пулдоранд".
ДАСТИ ВКД-И ТОҶИКИСТОН?
Пулиси шаҳри Самара дар як тамоси телефонии Радиои Озодӣ аз шарҳи ин қазия сарпечӣ кард. Намояндагони додгоҳ низ барои шарҳи қазия дастрас нашуданд.
Аммо, ба камияш ду нашрияи Русия навиштанд, ҳукми додгоҳ на танҳо ба эътирофи худи Саидасрор Мирзоев, ки ба гуфтаи вакилаш, таҳти фишор ба даст омадааст, балки ба ҳуҷҷатҳое асос ёфтааст, ки аз Раёсати ВКД Тоҷикистон дар умури мубориза бо ҷиноятҳои созмонёфта ба мақомоти Русия расидаанд. Мавзуъ ва мундариҷаи ин санадҳо шарҳ дода нашудааст, вале гуфта мешавад, дар онҳо номи дигаре зикр гашта бошад ҳам, таҳқиқ нишон додааст, сухан дар бораи Саидасрор Мирзоев меравад.
Радиои Озодӣ талошҳояшро барои дарёфти шарҳи мақомоти тафтишотии Русия идома медиҳад ва ҳамзамон аз Вазорати корҳои дохилии Тоҷикистон дархост мекунад, ҳуҷҷатҳоеро, ки бар пояи онҳо раиси ҷомеаи тоҷикони Самара боздошт ва маҳкум шудааст, шарҳ диҳад. Ин ҳам рӯшан нест, дар ҳоле ки ихроҷи Саидасрор Мирзоев аз тарафи додгоҳ ба Тоҷикистон маънои истирдод ё супурда шудани ӯ ба дасти мақомоти ҳифзи ҳуқуқи ватанашро дорад ё на?
Александр Паулов, вакили мудофеи Саидасрор Мирзоев гуфт, аз болои ин қарори Додгоҳи ноҳияи Советии Самара ба додгоҳи вилоятӣ, Кумитаи тафтишот ва додситонӣ шикоят кард ва талош дорад, шаҳрвандии Мирзоев барқарор ва бегуноҳии ӯ исбот шавад.
Акс ва нишониҳои Саидасрор Мирзоев ҳамчун узви Шӯрои ҷамъиятии Сафорати Тоҷикистон дар Русия дар сомонаи ин ниҳод дида мешаванд, вале бо гузашти шаш рӯз сафорат қазияи боздошти Миирзоевро шарҳ надодааст.
Бунгоҳи хабарии “Тоҷинфо” менависад, "соли 2017 мақомоти Русия шаҳрвандии русии Каромат Шарипов, яке аз ҳомиёни шинохтаи ҳуқуқи муҳоҷирони тоҷик дар Русияро бекор ва худи ӯро бо ҳавопаймои Маскав – Кӯлоб ихроҷ карданд. Каромат Шарипов баъди беш аз ду соли талоши бенатиҷаи бозгашт ба Русия моҳи майи соли ҷорӣ дар синни 57 вафот кард. Соли 2013 Сайфиддин Одинаев, роҳбари ҷамъияти тоҷикони Перм 11 моҳро пушти панҷара ба сар бурд. Бино ба иттилои “Тоҷинфо”, дар ҳоли ҳозир раҳбари ҷамъияти тоҷикони вилояти Владимир низ дар боздошт қарор дорад.”
