Пайвандҳои дастрасӣ

Хабари нав

Хабарҳо

Дар як сол аз Хатлон 445 тонна шираи камол содирот шудааст

Пули "Дӯстӣ" миёни Тоҷикистон Афғонистон дар Панҷи Поён.

Мақомот дар Хатлон мегӯянд, ки соли гузашта танҳо аз ин вилоят ба хориҷ аз кишвар 544 тонна ва 700 килограм шираи камол содирот шудааст. Зафар Маҳмадалиев, сардори Идораи гумруки вилояти Хатлон рӯзи 6-уми феврал зимни нишасти хабарӣ гуфт, ин миқдор шираи камол тариқи гузоргоҳи" Панҷи поён" ба Афғонистон ва аз онҷо ба Ҳиндустон интиқол ёфтааст. Ӯ афзуд, ки содироти шираи камол аз Душанбе тариқи ҳавопаймо сурат мегирад, вале танҳо омори содироти ин гиёҳи нодир аз Хатлонро дар ихтиёр дорад.

Аз чанд сол ба ин тараф ҷамъоварии шираи камол -- ин гиёҳи нодир, ки дар доманакӯҳҳои Хатлон мерӯяд, идома дорад ва ба хориҷ содирот мешавад. Ҷамъоварӣ ва тиҷорати шираи камол дар ихтиёри ширкати "Фароз" қарор дорад. Ин ширкат ба наздикони раиси ҷумҳури Тоҷикистон марбут аст, ки арсаҳои дигари сердаромади иқтисоди кишварро дар ихтиёр дорад. "Фароз" чанде пеш эълон кард, ки фаъолияти худро қатъ мекунад. Вале пажӯҳишҳо нишон додаанд, ки ин ширкат ҳамоно ба фаъолияти худ идома медиҳад.

Дар Идораи гумруки вилояти Хатлон ҳам ба суоли Радиои Озодӣ, ки баъди ширкати "Фароз" киҳо масъулияти ҷамъоварии шираи камолро ба даст хоҳанд гирифт, гуфтанд, ки ҳоло квота ё саҳмияаш аз сӯи ҳукумат маълум мешавад ва онҳо феълан дар ин робита чизе гуфта наметавонанд.

Ҳамаи хабарҳои имрӯзро дар инҷо бихонед

Ҳалокати як нафар дар таркиши гази табиӣ дар Русия. ВИДЕО

Бар асари таркиши газ дар бинои истиқоматии панҷошёна дар шаҳри Орехово-Зуево, 85-километрии шарқи Маскав, як нафар ба ҳалокат расида, шаш тани дигар маҷруҳ шудаанд. Мақомот мегӯянд, захмиҳоро дар бемористон бистарӣ карданд. Ҳодиса рӯзи 4-уми апрел рух дод. Мақомоти Вазорати ҳолатҳои фавқулодаи Русия гуфтанд, таркиш дар ошёнаи севуми бино ба вуқуъ пайваста, манзилҳои яке аз даромадгоҳи биноро вайрон кардааст. Ин бино аз 80 хона иборат аст. Андрей Гантсев, иҷрокунандаи вазифаи додситони вилояти Маскав гуфтааст, дар ин замина парвандаи ҷиноӣ боз шуда, таҳқиқи ҳодиса идома дорад.

Таркиши маргбори гази табиӣ дар манзили зисти Орехово-Зуевои Русия
лутфан мунтазир бошед

Феълан кор намекунад

0:00 0:01:53 0:00

Коршиносони амрикоӣ дар бораи вирус ва кумак ба Тоҷикистон гуфтанд

Масъулони ду созмони бонуфузи амрикоӣ гуфтанд, бо вуҷуди вазъи нигаронкунанда ва паҳншавии босуръати КОВИД-19 дар ИМА, ин кишвар омодааст ба шариконаш дар Осиёи Марказӣ, аз ҷумла Тоҷикистон, ёрӣ кунад.

Даниел Сингер – раҳбари минтақавии марказҳои амрикоӣ оид ба назорат ва ҷилавгирии бемориҳо ва Ҷошуа Карнес – намояндаи Барномаи рушди байналмилалии Амрико дар ин бора рӯзи 3-юми апрел дар нишасти онлайнӣ ба хабарнигорони минтақа ибрози назар карданд.

Онҳо гуфтанд, аз замони пайдо шудани вируси корона аз масъулон дар кишварҳои минтақа суолҳои зиёде мегиранд ва пайваста бо онҳо гуфтугӯ доранд.

Даниел Сингер, раҳбари минтақавии марказҳои амрикоӣ оид ба назорат ва ҷилавгирии бемориҳо гуфт: “Ҳоло сармоягузории иловагиро интизорем, ки барои таҳкими кор дар гузаргоҳҳои марзии кишварҳо пешбинӣ шудааст. Дар ду даҳсолаи ахир мо 160 эпидемиологҳоро омӯзиш додем. Барои мисол, ҳоло дар Қирғизистон беҳтарин эпедимиологҳо фаъолият доранд.”

Мутахассисони амрикоӣ дар бораи то ба ҳол ошкор нашудани ҳолати гирифтории сокинон ба коронавирус дар Тоҷикистон изҳори назар карданд. Ҷошуа Карнес, намояндаи барномаи рушди байналмилалии Амрико гуфт, фикр мекунад, ягон далеле барои пинҳон кардани мавриди гирифторӣ дар Тоҷикистон вуҷуд надорад: “Таҷрибаи ҳамкорӣ бо мақомоти Тоҷикистонро дорам ва то ҷое медонам, дар робита ба омор ошкоранд ва дар ин масъала шубҳа намекунам.”

Аммо, ба гуфтаи ин коршинос, ҳоло бояд таваҷҷӯҳи асосӣ ба масъалаи афзоиши тестҳои озмоишӣ ва сифати онҳо равона карда шавад. Даниел Сингер, раҳбари минтақавии марказҳои амрикоӣ оид ба назорат ва ҷилавгирии бемориҳо мегӯяд, «ба кишварҳо, махсусан ба Тоҷикистон, дар таъмиини тестҳои босифат кумак мекунем. Барои чунин ташхисҳо, озмоишҳои босифат хеле заруранд”.

Мутахассисони амрикоӣ аз мақомоти Қирғизистон барои пешниҳоди ошкор ва саривақтии иттилоъ дар робита ба коронавирус ба ҷомеа ситоиш карданд. Ба таъкиди онҳо, барои сари вақт ҷилавгирӣ шудан аз паҳншавии вирус ин нукта бисёр муҳим аст.

ИМА дар як шабонарӯз тақрибан якуним ҳазор қурбонӣ додааст

Амрико. 1-уми апрели соли 2020

Иёлоти Муттаҳида аз ҷон бохтани наздик ба якуним ҳазор нафар дар 24 соати гузашта бар асари олудагӣ ба коронавирус дар ин кишвар хабар дод.

Бино ба омори Донишгоҳи Ҷон Ҳопкинс, Амрико рӯзи 3-юми апрел марги 1480 танро дар шабонарӯз сабт кард, ки баландтарин мизони ҷонбохтагон дар муддати шабонарӯзи гузаштаро нишон медиҳад.

Бо ин рақамҳо, шумори фавтидагон аз коронавирус дар Амрико ба 7406 тан расид. 273 ҳазор тани дигар ба ин вирус дар Амрико мубталоянд. Ин рақамҳо ҳар лаҳза дар ҳоли тағйиранд.

Аёлати Ню-Йорк баландтарин омори қурбониёни коронавирусро дорад.

Бисёре аз аёлатҳои Амрико дар карантин ҳастанд ва аз сокинон хоста шудааст, дар хонаҳояшон монда, танҳо дар сурати зарурат ба берун бароянд.

Мақомҳо ба мардум гуфтаанд, дар берун даҳону биниашонро бипӯшонанд.

Танқиди Amnesty International аз бархӯрди мақомоти Русия бо Анастасия Василева

Анастасия Василева

Афви Байналмилал (Amnesty International) аз боздошти Анастасия Василева, раиси иттиҳодияи коргарӣ ё “профсоюз”-и пизишкони Русия норозигӣ кард.

Созмон рӯзи 3-юми апрел дар эъломияе иқдоми ҳукумати Русияро нодуруст номид.

Василева аз чигунагии вокуниши ҳукумати Русия ба паҳншавии коронавирус интиқод карда, гуфта буд, ки ҳукумат шумори мубталоёнро ба ин вирус кам нишон додааст.

Анастасия Василеваро рӯзи ҷумъа ҳангоми сафар барои арзёбии омодагиҳои шифохонаҳои Русия дастгир ва 1600 рубл ҷарима карданд. Гуфта мешавад, ӯ ба рафтори хашин ва итоат накардан ба амри пулис муттаҳам шудааст.

Иттиҳодияи коргарӣ ё “профсоюз”-и табибони Русия аз тарафи Алексей Навалний, раҳбари мухолифон, пуштибонӣ мешавад.

Бино ба омори Донишгоҳи Ҷон Ҳопкинс, дар Русия то 4-уми апрел беш аз 4100 тан ба коронавирус гирифтор шуда, 34 нафар бар асари олудагӣ ба он ҷон бохтаанд.

Атмар номзад ба мансаби вазири умури хориҷии Афғонистон шуд

Ҳаниф Атмар

Ашраф Ғанӣ, раиси ҷумҳурии Афғонистон, номзадии Ҳаниф Атмар, яке аз рақибони интихоботияшро ба мансаби вазири корҳои хориҷии ин кишвар пешниҳод кардааст.

Атмар дар гузашта ба ҳайси вазири инкишофи деҳот, вазири маориф ва вазири корҳои дохилӣ кор кардааст. Дар замони ҳукумати ваҳдати миллӣ як муддат мушовири амнияти миллии раиси ҷумҳурии Афғонистон буд.

Ӯ яке аз номзадҳо ба мақоми раёсати ҷумҳурии Афғонистон дар интихоботи соли гузашта буд ва раҳбарии тими сулҳу эътидолро ба уҳда дошт.

Вазири собиқи умури хориҷии Афғонистон, Салоҳиддин Раббонӣ, моҳи октябри соли 2019 аз мансабаш истеъфо дод.

Вай писари Бурҳониддин Раббонӣ, раиси ҷумҳурии собиқи Афғонистон аст ва аз оғози соли 2015 дар ин вазифа кор кардааст.

Раббонӣ аз муттаҳидони наздики Абдуллоҳ Абдулоҳ, раиси пешини ҳукумати иҷроияи Афғонистон ва рақиби умдаи президент Ашраф Ғанӣ дар интихоботи раёсати ҷумҳури он кишвар мебошад.

Хаткашонҳо ба беш аз 20 000 хонанда дарси мактабиро мерасонанд

Акс аз бойгонӣ

Вазорати маориф ва илми Қазоқистон гуфт, хаткашонҳо ба хонандагоне, ки дар ноҳияҳо зиндагӣ мекунанд ва ба Интернет дастрасӣ надоранд, дарсҳои мактабиро мерасонанд.

Вазорати маориф ва илми Қазоқистон рӯзи 3-юми апрел бо ширкати “Қазпочта” шартнома баст, ки дар асоси ин шартнома, хаткашонҳои ширкат ба хонандагони навоҳии дурдаст дарсҳо ва вазифаҳои мактабиро мерасонанд.

Ба иттилои вазорат, “бештар аз 20 ҳазор” хонанда дар минтақаҳое зиндагӣ доранд, ки мактаб ва Интернет онҷо мавҷуд нест.

Дар пайи густариши вируси корона хонандагони Қазоқистон аз 16-уми март ба таътил фиристода шуданд. Эҳтимол дорад, дарсҳо дубора аз 6-уми апрел шуруъ шаванд.

Дар Қазоқистон ба далели густариши коронавирус ҳолати фавқулода эълом шуда, донишҷӯёни мактабҳои олӣ ва коллеҷҳо низ ба таҳсили фосилавӣ гузаронида шудаанд.

Истиқболи НАТО аз Мақдунияи Шимолӣ ба ҳайси узви нав

Мақдунияи Шимолӣ

Вазирони корҳои хориҷии НАТО рӯзи 2-юми апрел аз Мақдунияи Шимолӣ ба ҳайси узви нави ин иттиҳод истиқбол карданд. Ин кишвар 30-юмин узви НАТО шуд.

Пештар аз ин парчами Мақдунияи Шимолӣ дар қароргоҳи НАТО дар Белгия барафрохта гардид.

Мақдунияи Шимолӣ баъди табдили ном аз Мақдуния ба Мақдунияи Шимолӣ шомили НАТО шуд. Инро давлати Юнон талаб карда буд. Афина аз он нигарон буд, ки Мақдуния метавонад, даъвои ҳудудҳои Юнонро кунад. Мақдуния бо баргузории раъйпурсии умумӣ тағйири ном кард.

Қирғизистон пеш аз марзбандӣ ба гузаштани 30 муҳоҷири тоҷик иҷоза додааст

Посгоҳи марзии Қарамиқ. Акс аз соли 2017

Мақомоти Қирғизистон гуфтанд, рӯзи 21-уми марти имсол, пеш аз баста шудани марзҳо, ба 30 шаҳрванди Тоҷикистон иҷоза дода буданд, ки аз сарҳад гузаранд. Ин афрод аз муҳоҷирати корӣ аз Русия меомаданд. Қирғизистон ба далели паҳншавии коронавирус марзҳояшро баста, вазъи фавқулода ҷорӣ намудааст.

Ҷениш Ашӯрбоев, намояндаи маркази иттилоотии комендатураи Ӯш, рӯзи 3-юми апрел ба бахши қирғизии Радиои Озодӣ гуфт: "Гурӯҳи муҳоҷирон дар пайи музокираҳои вазоратҳои умури хориҷии ду кишвар тавассути гузаргоҳи "Қарамиқ” ба Тоҷикистон ворид шуданд".

Ба қавли ӯ, "баъди ҷорӣ шудани ҳолати фавқулода ба шаҳрвандони хориҷӣ иҷозаи берун шудан аз хоки Қирғизистон дода нашуд", - афзуд ӯ.

Айни замон маълум нест, чӣ шуморе аз шаҳрвандони Тоҷикистон бо сабаби ҷорӣ шудани ҳолати изтирориву баста шудани марзҳо дар хоки Қирғизистон мондаанд.

Рӯзи 3-юми апрел шумори олудашудаҳо ба коронавирус дар Қирғизистон 130 нафарро ташкил дод ва дар ин рӯз хабари марги як нафар бар асари олудагӣ ба бемории ҳамагири КОВИД-19 тасдиқ шуд.

Мақомоти Тоҷикистон мегӯянд, то ин дам ягон мавриди олудашавии сокинон ба коронавирус сабт нашудааст, вале чораҳои пешгирӣ аз эҳтимоли паҳншавии ин бемориро рӯйи даст гирифтаанд. Кишвар марзҳоро баста, парвози ҳавопаймоҳоро қатъ намудааст.

Беш аз шаш ҳазор нафаре, ки аз моҳи феврал ба ин тараф аз хориҷа ба Тоҷикистон баргаштанд, ба "карантин" фаро гирифта шудаанд. Дар аввал сокинон аз шароити, ба гуфтаи онҳо, бади маҳалли карантин шикоят доштанд, вале дертар гуфтанд, дар осоишгоҳҳои нисбатан беҳтар ҷойгир карда шудаанд.

Будапешт, Варшава ва Прага ба нақзи квотаи муҳоҷирон айбдор шуданд

6 феврали соли 2020. Паноҳҷӯён дар марзи Сербияву Венгрия

Додгоҳи аврупоии адлия рӯзи 2-юми апрел гуфт, Лаҳистон (Полша), Маҷористон (Венгрия) ва Ҷумҳурии Чех қонунҳои Иттиҳоди Аврупоро поймол карда, соли 2015 монеи вуруди паноҳҷӯён ба кишварашон шуданд.

Ба иттилои додгоҳ, ин се кишвар муқаррароти тақсими баробари 160 паноҳҷӯ аз Юнон ва Итолиёро риоя накарданд.

Нақшаи тақсими муҳоҷирон дар кишварҳои Иттиҳоди Аврупо моҳи сентябри соли 2017 ба анҷом расид ва танҳо каме беш аз 40 ҳазор паноҳҷӯ ҷо ба ҷо шуданд.

Президенти Кумисюни Аврупо Урсула ван дер Лейен рӯзи 2-юми апрел гуфт, қарори додгоҳ муҳим аст ва афзуд: "Бо ин ки қарор ба гузашта рабт дорад, ба мо барои раҳбурдҳои оянда замина фароҳам меорад".

Варшава, Будапешт ва Прага аз оғоз бо низоми квотаи қабули паноҳҷӯён аз Сурияву Ироқ мухолифат карда ва гуфта буданд, ки муҳоҷирон хатари амниятӣ эҷод мекунанд. Додгоҳи аврупоӣ ин далелҳоро рад кард.

Додгоҳи воқеъ дар Люксембург гуфт, Лаҳистон нахост 100 паноҳандаро қабул кунад. Ҷумҳурии Чех аз 50 паноҳҷӯ ба 12 нафар сарпаноҳ дод ва Маҷористон ҳеч касро напазируфт.

Нахуствазири Ҷумҳурии Чех Андрей Бабиш рӯзи 2-юми апрел ҳукми додгоҳро рад кард. Вай гуфт, "масъалаи муҳим" ин аст, ки Ҷумҳурии Чех "ҳеч як паноҳҷӯро қабул намекунад ва ба шарофати мо буд, ки низоми квота дигар вуҷуд надорад".

Вазири адлияи Маҷористон Ҷудит Варгас ҳукми додгоҳро "табъизомез" номид ва сухангӯи ҳукумати Лаҳистон Пйотр Мюллер гуфт, ҳукми додгоҳ "аҳамияти амалӣ надорад".

Нахустин қурбонии коронавирус дар Қирғизистон. Шумори мубталоён ба 130 расид

Пизишке дар Бодканд бо либоси зиддивирусӣ

Ситоди ҷумҳуриявии Қирғизистон хабар дод, ки як шаҳрванди ин кишвар бар асари мубталошавӣ ба вируси корона ҷон бохт.

Ин марди 61-сола аз ноҳияи Ноокат буда, дар беморхонаи вилояти Ӯш даргузаштааст.

Ба огаҳии ситод, дар давоми як рӯзи ахир дар Қирғизистон 14 ҳолати нави мубталошавӣ ба коронавирус ошкор шудааст. Ҳамин тариқ, аз 18-уми март то 3-юми апрел ҷамъан 130 кас дар ин кишвар ба коронавирус мубтало шудааст.

Дар Қирғизистон ба иллати коронавирус аз 25-уми март то 15-уми апрели имсол ҳолати фавқулода эълом шудааст.

Равуои рӯзонаи сокинон ва воситаҳои нақлиёт маҳдуд ва аз соати ҳашти шом то ҳафти субҳ соати комендантӣ эълом шудааст.

Фармондеҳи аршади НАТО барои муқобила бо коронавирус сафарбар шуд

Брюссел, қароргоҳи НАТО

Вазирони хориҷаи кишварҳои узви НАТО афсари баландпояи ин паймони низомиро вазифадор карданд, ки талошҳо дар амри муқобила бо коронавирусро вусъат бахшад.

Дар ин бора Йенс Столтенберг, дабири кулли НАТО рӯзи 2 апрел баъди ҷаласаи 30 вазири хориҷаи НАТО хабар дод. Бо сабаби маҳдудияти сафар дар пасманзари пандемияи коронавирус аввалин бор дар таърихи 70-солаи ин паймон нишасти вазирони хориҷӣ ба таври видеоӣ барпо шуд.

Столтенберг гуфт, вазирон аз Тод Волтерс, генерали нирӯҳои ҳавоии Амрико, ки ҳоло ба унвони фармондеҳи аршади нирӯҳои Аврупо (SACEUR) ҳам ифои вазифа мекунад, хостанд “кӯмакҳои зарурии низомиро ба хотири муқобила бо бӯҳрон ҳамоҳанг карда суръати ироаи кӯмакҳоро вусъат бахшад”.

Столтенберг ба унвони мисол гуфт, вазифаи фармондеҳ таъмини интиқоли захираҳои тиббӣ ба кишварҳои ҳампаймон бо назардошти эҳтиёҷоти онҳо мебошад.

Ба ҳавопаймоҳои интиқолдиҳандаи васоили ёрӣ дар муқобила бо коронавирус дар ҳарими ҳавоии Аврупо бартарӣ дода мешавад. Қарор аст дар миёнаҳои моҳи апрел конфронси видеоии дуюми вазирони хориҷаи НАТО баргузор шавад. То ҳол НАТО чунин ёриҳои изтирориро ба Итолиёву Испания – ду кишвари аз ҳама зиёд осебдида аз коронавирус дар Аврупо ироа кардааст.

 Ду узви дигари парлумони Булғористон ба Ковид-19  гирифтор шуданд

Даниэла Дариткова аз ҳизби ГЕРБ гирифтори корнавирус шудааст

Ду узви дигари парлумони Булғористон ба Ковид-19 гирифтор шуданд, ки ангезандаи он коронавирус мебошад. Раиси гурӯҳи парлумонии ҳизби ҳокими ГЕРБ Даниэла Дариткова ва узви дигари ҳамин ҳизб Даниэла Малешкова рӯзи 2 апрел дар санҷиши тиббии вуҷуди вирус посухи мусбат гирифтанд.

Натиҷаҳои мусбати озмоишҳои тиббӣ як рӯз баъди он маълум шуд, ки як узви парлумони Булғористон бо нишонаҳои коронавирус бистарӣ гардиданд.

Тсвета Караянчева, раиси маҷлис дар як ҷаласаи изтирории рӯзи 31 март гуфт, ки Ҳасан Адемов аз Ҷумбиши ҳуқуқ ва озодиҳо ба Ковид-19 гирифтор шудааст. Ӯ дар беморхона мебошад.

Рӯзи 3 апрел парлумони Булғористон дар баробари ин қазия, ҳамчунин масоили марбут ба буҷаи давлатиро баррасӣ хоҳад кард.

Трамп кӯмакҳои тиббии Русияро “иқдоми хуб” номид

Ҳавопаймо бо кӯмакҳои тиббии Русия рӯзи 1 апрел дар фурудгоҳи Ҷон Кеннедии шаҳри Ню-Йорк фуруд омад

Президент Доналд Трамп гуфт, ИМА маводи тиббии Русияро пазируфт ва нигарон нест, ки ин иқдом ҳамчун таблиғот истифода шудааст. Трамп рӯзи 2 апрел гуфт, ки дар сӯҳбати оғози ҳафтаи ҷорӣ бо президенти Русия, ки мавзӯи мубориза бо коронавирусро ба баррасӣ кашид, Владимир Путин пешниҳоди ирсоли кӯмак кард ва ӯ инро ҳамчун “иқдоми хуб” пазируфт. Ҳавопаймои русии ҳомили васоили тиббии назири дастгоҳҳои нафаскашиву либоси ҳифозати инфиродӣ рӯзи 1 апрел дар Ню-Йорк фуруд омад.

Морган Ортагус, сухангӯи Департаменти давлатии ИМА гуфт, ки ин кӯмакҳо ба онҳо дастрас шуд. Маскав ин кӯмакро ҳамчун талоши таблиғоти номуваффақи Путин муаррифӣ кард. Трамп гуфт, “Путин маводи зиёди баландсифати тиббӣ пешниҳод кард ва ман ҳам ба хотири ин ки ин мавод метавонад барои наҷоти ҷони одамҳо ба кор биравад, онро қабул кардам”.

Трамп гуфт, саудиҳову русҳоро дар масъалаи нафт ба созиш овард

Доналд Трамп, президенти ИМА

Президенти ИМА Доналд Трамп гуфт, ки ба хотири коҳиши истеҳсоли нафт ва хатми пастравии босуръати нархи нафт дар пасманзари пандемияи коронавирус, саудиҳову русҳоро ба созиш овард. Трамп гуфт, ки рӯзи 2 апрел бо президенти Русия Владимир Путин ва шоҳзодаи Саудӣ Муҳаммад Бин Салмон гуфтугӯ кард. Ҷузъиёт нашр намешавад.

Трамп дар Твиттераш навишт, “ман интизор дорам ва умедвор ҳастам, ки онҳо тақрибан 10 миллион бушка нафт ва шояд ҳаҷми аз ин бештарро коҳиш медиҳанд. Агар чунин шуд, ин барои саноати нафту газ ОЛӢ мешавад!”

Трамп гуфт, ки Русия ва Арабистони Саудӣ метавонанд истеҳсоли нафтро рӯзе аз 10 то 15 миллион бушка коҳиш диҳанд. Чунин коҳиш ширкати кишварҳои хориҷ аз ОПЕК ва муттафиқонашро ҳам тақозо мекунад. Трамп навишт, ки дар сӯҳбат бо ин ду раҳбар ба ҳеҷ гузаште дар заминаи коҳиши истеҳсоли дохилии ИМА ваъда надодааст.

Бо шурӯи бӯҳрони коронавирус ва тасмими Арабистони Саудӣ, кишвари муҳими узви ОПЕК барои коҳиши истеҳсоли нафт дар ҷаҳон, Русия ба ин мухолифат кард ва вазъи атрофи нафт ҳам бӯҳронӣ шуд. Бо бад шудани фаъолиятҳои иқтисодӣ дар саросари ҷаҳон арзиши нафт хеле поин рафт. Вазири энержии Русия Александр Новак рӯзи 3 апрел гуфт, ки Русия дар фикри афзоиши истеҳсол нест ва омода аст бо ОПЕК вориди гуфтугӯ шавад. Арабистони Саудӣ ба баргузории ҷаласаи изтирории ОПЕК ва дигар ҳамкоронаш даъват кард. Трамп ҳам имрӯз бо кишварҳои истеҳсолкунандаи нафти ИМА дар Кохи Сафед мулоқот мекунад.

Додгоҳи Исфара ҷангҷӯи пешини Толибонро 16 сол зиндонӣ кард

Бинои Додситонии кулли Тоҷикистон

Додгоҳи шаҳри Исфара як ҷангҷӯи пешини ҷунбиши Толибонро ба 16 соли зиндони низомаш сахт маҳкум кардааст.

Дар ин бора Додситонии кулли Тоҷикистон рӯзи 3-юми апрел хабар дод.

Бахтиёр Юсуфовро ба ташкили фаъолияти гуруҳҳои ифротгаро ва иштирок дар задухӯрди мусаллаҳона ё амалиёти ҷангӣ дар қаламрави кишвари бегона гунаҳкор донистаанд.

Назари вакили мудофеи ӯ феълан дастрас нест.

Ба иттилои Додситонии кулли Тоҷикистон, Юсуфов моҳи июли соли 2012 ҳангоми муҳоҷират дар Русия ба сафи гуруҳҳои ифротгаро пайваста, ҳамроҳи ҳамсару ду кӯдакаш ба воситаи Туркияву Эрон ва Афғонистон ба Вазиристони Покистон рафтааст.

"Дар онҷо ба сафи Ҳизби исломии Туркистон (фаъолияташ аз соли 2006 дар Тоҷикистон мамнуъст) шомил шуда, омодагии ҷангӣ дидаву дар амалиёт ба зидди ҳукумати қонунии Афғонистон иштирок кардааст", - гуфта мешавад дар иттилоияи Додситонии кулли Тоҷикистон.

Ба навиштаи манбаъ, мақомоти Афғонистон Бахтиёр Юсуфовро дастгиру маҳкум кардаанд ва ӯ соли 2018 озод шудааст. Дертар маъмурони амниятӣ ӯро дар вилояти Суғд дастгир намудаанд.

Сафир гуфт, қазияи аз ошёнаи дувум партофтани муҳоҷири тоҷикро пайгирӣ мекунанд

Акбарҷон Холиқов, як муҳоҷири тоҷик.

Сафорати Тоҷикистон дар Русия хостори таҳқиқи ҳамаҷонибаи қазияи Акбарҷон Холиқов, муҳоҷири 22- солаи тоҷик шудааст. Дар ин бора Имомуддин Сатторов, сафири Тоҷикистон дар сӯҳбат бо хабаргузории "Азия -плюс" баён доштааст. Сафир гуфтааст, онҳо аз ин қазия огоҳ буда, фарди муттаҳам боздошт шудааст ва тафтишот идома дорад.

Ба қавли Имомиддин Сатторов, онҳо ба Раёсати корҳои дохилии ноҳияи Коптевои Маскав нома фиристода, дар он, талаб карданд, ки ҳодиса ҳаматарфа таҳқиқ карда шавад. "Сафорат ин қазияро зери назорат гирифтааст"-хулоса намудаст, сафири Тоҷикистон дар Русия.

Пайвандони Акбарҷон Холиқов, муҳоҷири 22-солаи тоҷик, шикоят доранд, ки муовини мудири корхонаи "Жилишник"-и ноҳияи Коптево дар Маскав, Андрей Третяков, фарзанди онҳоро аз ошёнаи дувуми хобгоҳ ба замин партофтааст. Ҳодиса рӯзи 1-уми апрел рӯй дода, муҳоҷири тоҷик дар ҳолати вазнин дар бемористон бистарист.

Акбарҷон Холиқов ба ҳайси роҳрӯб дар ҳамин идора кор мекард ва дар хобгоҳи он мезист. Третяков фарзияи дигареро пеш оварда, гуфтааст, гӯё роҳрӯби тоҷик худро аз ошёнаи дувум ба замин ҳаво дод.

Волидони Акбарҷон Холиқов гуфтанд, ӯ дар беморхонаи Боткини шаҳри Маскав ба ҳуш омадааст, вале вазъаш ҳамчунон нигаронкунанда аст.

Мақомоти пулиси ноҳияи Коптево гуфтаанд, ҳодиса мавриди санҷиш қарор дорад, вале то замоне ки Акбарҷон Холиқов қазияро нақл накунад, ҳақиқати ҳол пурра рӯшан нахоҳад шуд.

Алӣ Лориҷонӣ, раиси порлумони Эрон ба корона мубтало шуд

Алӣ Лориҷонӣ, раиси порлумони Эрон.

Дафтари матбуоти порлумони Эрон рӯзи панҷшанбеи 2-юми апрел хабар дод, ки Алӣ Лориҷонӣ, раиси Маҷлиси исломӣ ё порлумони он кишвар ба бемории КОВИД-19 гирифтор шуда, дар карантин ба сар мебарад. Манбаъ гуфтааст, ки дар пайи пайдо шудани бархе аломатҳои беморӣ, аз ӯ тести корона гирифта шуд ва натиҷаи он мусбат буд ва ҳоло дар карантин ва таҳти муолиҷа аст.

Алӣ Лориҷонӣ болотарин мақоми Эрон аст, ки хабари гирифтории ӯ ба корона ба таври расмӣ эълом мешавад. Пеш аз ин Исҳоқ Ҷаҳонгирӣ, муовини аввали раиси ҷумҳур, Алӣ Акбар Вилоятӣ, мушовири умури байналмилалии раҳбари Ҷумҳурии исломӣ, аз саршиностарин афроде буданд, ки хабари гирифтории онҳо ба коронавирус эълом шуда буд.

Гирифторӣ ба коронавирус дар миёни шахсиятҳои сиёсӣ ва сиёсатмадорони Ҷумҳурии исломӣ нисбатан зиёд буда ва шуморе аз аъзои кобина ва ду мақоми дафтари раҳбари Эрон низ ба ин беморӣ мубтало шудаанд. Дар ҳафтаҳои гузашта гузоришҳои расмӣ дар бораи ҷон бохтани чанд мақом ва чеҳраи сиёсии Эрон ба сабаби ҳамин беморӣ нашр шуда буд.

Аз ҷумлаи ин афрод метавон ба фавти Муҳаммад Мирмуҳаммадӣ, узви Маҷмаи ташхиси маслиҳати низом, Ҳусейн Шайхулислом, муовини пешини вазири хориҷӣ, Ҳодӣ Хусравшоҳӣ, сафири пешини Эрон дар Ватикан, ишора кард. Фотима Раҳбар, узви порлумон ва Муҳаммадалӣ Рамазонӣ, намояндаи дигари порлумон низ бар асари ин беморӣ ҷон бохтанд.

Бар асоси омори расмии вазорати тандурустии Эрон, то кунун беш аз 50 ҳазор нафар дар Эрон ба коронавирус гирифтор шудаанд. Шумораи қурбониёни вирус дар Эрон аз се ҳазор бештар мебошад.

Ин дар ҳоле аст, ки бар асоси омори ҷамъовардаи Радиои Фардо -- бахши эронии Радиои Озодӣ аз изҳороти парокандаи мақомҳои расмии маҳаллӣ ва манобеъ дар вазорати тандурустии он кишвар, то кунун беш аз 70 ҳазор нафар бинобар доштани аломатҳои корона дар 31 вилояти Эрон бистарӣ шуда ё таҳти назар қарор доранд. Ин омор ҳамчунин нишон медиҳад, ки то се рӯзи пеш ҳади ақал 4762 нафар дар 31 вилоят ҷони худро аз даст додаанд.

Дар Туркманистон дарёфти асъори хориҷӣ аз бонкҳо номумкин шуд

Яке аз нуқтаҳои мубодилаи пул. Шаҳри Ишқобод, Туркманистон. Акс аз бойгонӣ.

Дар Туркманистон сар аз 1-уми апрел гирифтани асъори хориҷиро дар бонкҳо манъ карданд.

Намояндаи чанд бонк ба шарти ифшо нашудани номашон ба расонаҳо гуфтанд, Бонки марказии Туркманистон фармони шифоҳӣ додааст, ки соҳибони суратҳисобҳои бонкӣ метавонанд, танҳо асъори миллӣ дарёфт кунанд.

Ин муқаррарот ба кормандони ширкатҳои хориҷӣ ҳам дахл дорад.

Бонки марказии Туркманистон соли 2015 қурби расмии манатро дар баробари доллар муайян кард. Аз он замон то кунун расман 1 доллар 3,5 манат арзиш дорад. Аммо дар бозори сиёҳ табодули арз панҷ баробари қурби расмӣ аст. Аз моҳи январи соли 2016 табодули асъори нақд дар он кишвар манъ шудааст.

Моҳи гузашта мақомоти он кишвар назорати гардиши асъори хориҷиро дар пайи уфти қимати маводи сӯхт сахттар карданд.

Дар Узбекистон равуо байни минтақаҳоро манъ карданд

Шаҳри Тошканд, Узбекистон.

Дар Узбекистон равуои шаҳрвандон ба минтақаҳо, ҳатто ба ҷанозаи наздикон ва беморбинии пайвандон, манъ шуд. Дар ин бора Шоҳрух Ғиёсов, сухангӯи Вазорати умури дохилии Узбекистон хабар дод. Ба гуфтаи вай, маҳдудиятҳои карантин бо назардошти таҷрибаи ҷаҳонӣ ҷорӣ шудааст.

"Ин талабот барои ҳама яксон аст. Ҳатто дар сурати марги наздикон ҳам шаҳрвандон наметавонанд аз як минтақа ба минтақаи дигар раванд", - гуфт Шоҳрух Ғиёсов. Вай илова кард, ки афроди бистарии беморхонаҳо баъди табобат гирифтан метавонанд ба маҳалли зисти доимии худ раванд.

"Аммо касоне ки беморони рухсатшударо то маҳали зисташон ҳамроҳӣ мекунанд, то поёни давраи карантин ҳаққи баргаштанро надоранд. Барои мисол, агар касе аз Тошканд бемореро ба минтақае бурд, иҷозаи ба Тошканд баргаштанро надорад", - шарҳ дод Ғиёсов.

Карантин дар Узбекистон дар робита ба паҳншавии вируси корона аз 16 март шуруъ шуд. Сар аз 27 март сокинони Узбекистон аз ҳаққи кӯча баромадан бе зарурат маҳрум шуданд. Шаҳрвандон метавонанд, танҳо барои харидани ғизо ё дору ба берун бароянд.

То 2 апрел дар Узбекистон 205 мавриди гирифторӣ ба вируси корона ва ду ҳолати фавт сабт шудааст.

Чин ба Қирғизистон 21 ҳазор тести санҷиши коронавирус дод

Вазири тандурустии Қирғизистон Собирҷон Абдикаримов бо сафири Чин Ду Девен.

Ҳукумати Чин ба Қирғизистон 21 ҳазор тести санҷиши фаврии коронавирус ё худ COVID-19 дод. Дар ин бора ситоди ҷумҳуриявии пешгирӣ аз паҳн шудани коронавирус дар Қирғизистон иттилоъ дод.

Ба огаҳии ситод, ин тестҳо дар муддати 20 дақиқа муайян хоҳанд кард, ки шахс ба коронавирус мубтало шудааст, ё не. Дар Қирғизистон то 2-юми апрел 116 кас ба коронавирус мубтало шудааст.

Ҳамчунин хабар дода мешавад, ки президенти Қирғизистон Сооронбой Ҷеенбеков ба дабири кулли СММ Антониу Гутерриш паём фиристодааст.

Ҷеенбеков дар паёмаш аз даъвати Гутерриш барои роҳандозии нақшаи ҷаҳонии кӯмаки башардӯстона ба маблағи 2 млрд доллар барои сармоягузории мубориза бо коронавирус ҷонибдорӣ кардааст.

Президенти Қирғизистон ҳамчунин дар бораи мушкилиҳое гуфтааст, ки кишвараш дар мубориза бо коронавирус рӯбарӯ мешавад.

Дар Алмато як маҳалларо бо 20 ҳазор одам карантин карданд

Шаҳри Алмато.

Дар шаҳри Алматои Қазоқистон маҳаллаи "Асил Ормон"-ро баъди ошкор шудани ҳолати дувуми мубталошавӣ ба коронавирус дар он пурра карантин карданд. "Асил Ормон" аз 21 бинои зисти баландошёна иборат буда, тақрибан 20 ҳазор сокин дорад.

"Ниҳодҳои дахлдор бо мақсади таъмини амният ва пешгирӣ аз паҳни вирус "Асил Ормон"-ро бастанд. Сокинони он бо ғизо, маводи тиббӣ ва маҳсулоти ниёзи аввал таъмин карда мешаванд",-омадааст дар иттилоияи мақомоти Алмато.

Мақомоти маҳаллӣ ваъда доданд, ки дар ҷойҳои ҷамъиятии маҳалла корҳои зидди уфунӣ анҷом шуда, нуқтаи махсуси тиббӣ низ барои сокинони он ташкил карда мешавад.

Дар Қазоқистон то ҳол дар чандин бинои шаҳри Алмато, Нурсултон, Қарағанда ва ҷойҳои дигар каратин эълом шуда буд, вале ин бори аввал аст, ки як маҳаллаи серодамро пурра ба карантин мегиранд.

Дар Қазоқистон дар умум то ба имрӯз 435 ҳолати мубталошавӣ ба коронавирус сабт шудааст.

Владимир Путин "рӯзҳои ғайрикорӣ"-ро то 30 апрел дароз кард. ВИДЕО

Владимир Путин, раиси ҷумҳурии Русия

Президенти Русия Владимир Путин рӯзи панҷшанбе дар паёми худ ба мардуми кишвараш муҳлати низоми рӯзҳои ғайрикориро то 30-юми апрел дароз кард.

Вай гуфт, маоши кормандон бо вуҷуди нарафтан ба кор бояд пардохт карда шавад.

Путин ҳамчунин салоҳиятҳои раҳбарони минтақаҳои Русияро бештар кард, то дар сурати зарурӣ чораҳои пешгирикунандаро биандешанд.

Раиси ҷумҳури Русия ҳолати фавқулода эълом накард. "Медуза" ва "Откритые медиа" пештар бо истинод ба манбаъҳои худ дар маъмурияти президенти Русия навиштанд, ки Путин чораҳои карантинии марбут ба коронавирусро "ғайримаъруф" ва хатар ба рейтинги худ медонад. Бинобар ин, дар Русия вазъи фавқулода эълом намешавад.

Путин намехоҳад, мардумро "тарсонад". Маҳз барои ин, аз ибораҳои "гӯшанишинии дастаҷамъӣ" ва "ҳафтаи ғайрикорӣ" истифода мешавад.

Дар Русия 2-юми апрел 771 ҳолати нави мубталошавӣ ба коронавирус сабт шуда, шумори умумии беморон ба 3548 расид. Бештари ҳолатҳо - 2475 дар шаҳри Маскав ошкор шудааст.

Путин дастур дод, ки карантини Русия то охири моҳ тамдид ёбад
лутфан мунтазир бошед

Феълан кор намекунад

0:00 0:01:05 0:00

Теъдоди гирифторон ба коронавирус аз 1 миллион нафар гузашт

Киев, Украина. 1-уми апрели 2020

Бар асоси омори навтарини Донишгоҳи Ҷон Ҳопкинс (Амрико), шумори гирифторон ба коронавирус дар ҷаҳон рӯзи дувуми апрел аз 1 миллион нафар бештар шуд.

Зиёда аз 51 ҳазор кас бар асари олудагӣ ба бемории ҳамагир ҷони худро аз даст додаанд. Бовар меравад, теъдоди воқеии фавтидагон ва мубталоён аз омори эълоншуда бештар аст.

Донишгоҳи Ҷон Ҳопкинс мегӯяд, шумори зиёди гирифторон ба коронавирус дар Иёлоти Муттаҳидаи Амрико сабт шуда, ба беш аз 236 ҳазор нафар баробар аст.

Итолиё аз ҳама зиёдтар қурбонӣ додааст. То ин дам дар ин кишвари аврупоӣ беш аз 13 ҳазор нафар бар асари олудагӣ ба вируси нав ҷон бохтаанд.

Бемории КОВИД-19 бори аввал охири соли гузашта дар шаҳри Вуҳани Чин пайдо шуд. Созмони Ҷаҳонии Тандурустӣ онро рӯзи 11-уми март пандемия эътироф кард.

Путин дастур дод, ки карантини Русия то охири моҳ тамдид ёбад

Путин дастур дод, ки карантини Русия то охири моҳ тамдид ёбад
лутфан мунтазир бошед

Феълан кор намекунад

0:00 0:01:05 0:00

Ҳушдори нави Доналд Трамп ба Эрон ва ҳампаймононаш

Доналд Трамп

Доналд Трамп, президенти Амрико, ба Эрон ҳушдор дод ва гуфт, агар Эрон ё ҳампаймононаш ба нерӯҳои Иёлоти Муттаҳида ва дороиҳояш дар Ироқ ҳамла кунанд, бо баҳои гарон пардохт хоҳад кард.

Трамп рӯзи 1-уми апрел дар Твиттер навишт, "аз рӯи маълумот ва бовар, Эрону гуруҳҳои наздик ба он дар ҳоли тарҳрезии ҳамлаи ғофилгиронае ба нерӯҳои ИМА ва дороиҳояш дар Ироқ ҳастанд."

Вай афзудааст: "Агар чунин шавад, дар ҳақиқат Эрон бо баҳои гарон пардохт хоҳад кард!"

Аммо ҳамоно рӯшан набуд, ки оё Трамп гуфтанӣ аст, Иёлоти Муттаҳида воқеан дар бораи ин нақша маълумоти кофӣ дорад, ё не. Иёлоти Муттаҳида дар давоми соли гузашта шибҳанизомиёни таҳти ҳимояти Эронро дар ҳамла ба пойгоҳҳои низомии Ироқ айбдор кард, ки мизбони нерӯҳои эътилофӣ ва сафоратхонаҳои хориҷӣ, бахусус намояндагии Иёлоти Муттаҳида мебошад.

Чанд соат пеш аз навиштаҳои Трамп, ёрдамчии калони раҳбари олии Эрон Оятуллоҳ Алии Хоманаӣ Иёлоти Муттаҳидаро аз оқибатҳои "амалҳои иғвогаронааш" дар Ироқ ҳушдор дода буд.

11-уми март аз ҳамлаи мушакӣ ба пойгоҳи Ироқ ду сарбози ИМА ва як сарбози бритониёӣ кушта шуданд, ки шиддатро дар минтақа афзуд. Касе масъулияти ин ҳамларо ба дӯш нагирифт. Ин ҳамла пас аз ҳуҷуми ҳавоии ИМА ба гурӯҳи тарафдори Эрон “Катойиби Ҳизбуллоҳ" буд.

Ёфтҳои бештар

XS
SM
MD
LG