Пайвандҳои дастрасӣ

Хабари нав

Хабарҳо

Мудири FBI: Русия дар остонаи интихобот "ҷанги иттилоотӣ" пеш мебарад

Кристофер Рей, мудири Идораи Таҳқиқоти Федеролии Амрико.

Мудири Идораи Таҳқиқоти Федеролии Амрико гуфт, дар остонаи интихоботи раёсати ҷумҳурии имсола Русия ба зидди кишвараш “ҷанги иттилоотӣ“ пеш мебарад. Айни замон ӯ гуфт, ҳеҷ аломати талоши Русия барои рахнаи зербунёдҳои интихоботӣ дар Амрикоро надидааст.

Кристофер Рей рӯзи 5-уми феврал дар ҳузури вакилони Кумитаи адлияи Маҷлиси Намояндагон гуфт, Русия бо истифода аз маъракаҳои пинҳонӣ мехоҳад ба афкори умумӣ дар ҷомеаи Амрико таъсири гузошта, бо истифода аз ихтилофот дар байни мардум тафриқа андозад.

Хадамоти иттилоотии Амрико дар гузашта ҳам гуфтаанд, ки Русия айни усулро дар остонаи интихоботи президентии соли 2016 ба кор бурдааст. Бо вуҷуди далелҳои возеҳ, ҳукумати Маскав тамоми ин иддаоҳоро рад мекунад.

Кристофер Рей гуфт, дурӯғпароканӣ, шарҳнависӣ аз саҳифаҳои сохта дар шабакаҳои иҷтимоӣ, аз усулҳои таъсиргузории Русия ба афкори умум дар Амрико аст. Ба қавли мудири Идораи Таҳқиқоти Федеролии Амрико, муқобила бо рахнагарӣ дар системаҳои компютерӣ, осонтар аз мубориза бо дурӯғпароканӣ аст.

Ҳамаи хабарҳои имрӯзро дар инҷо бихонед

Дар Чехия теъдоди гирифторони КОВИД-19 ба 5033 нафар расид

Дар Чехия пӯшидани ниқоби тиббӣ дар кӯчаву нақлиёт ҳатмист.

Вазорати тандурустии Чехия мегӯяд, теъдоди мубталоёни бемории КОВИД-19 ба 5033 нафар расидааст ва аз ин миён 91 нафари онҳо фавтидаанд. Беморие, коронавируси нав бармеангезад, то кунун гиребони 181 нафарро сар додааст.

Порлумони Чехия рӯзи 7 - уми апрел бо қабули як қарор вазъи фавқуллодаро, ки рӯзи 11 - уми апрел ба поён мерасид, 19- рӯзи дигар ва то 30 - уми апрел тамдид кард. Ҳукумати ҷумҳурӣ пешниҳод кард, ки қарздорон, аз ҷумла онҳое, ки барои харидани хона қарз гирифтаанд, то 6 моҳ пардохти қарзи моҳонаро ба таъхир андозанд ва бонкҳо ҷаримае ҳам барои таъхир наситонанд.

Ҳукумати Чехия ҳамчунин дар андешаи сабуктар кардани муқаррароти карантин аст ва мехоҳад, баъзе аз мағозаҳо ва муассисаҳое, ки мардуми зиёд онҷо ҷамъ намеоянд, боз карда шавад. Суръати густариши коронавирус дар ин кишвар сусттар шудааст ва талош барои он идома дорад, ки таъсири бӯҳрон ба иқтисод камтар шавад.

ИМА ба Туркманистон барои мубориза бо вирус наздики $1 млн медиҳад

Ишқобод, Туркманистон, моҳи марти 2020.

Амрико бо ҳадафи мубориза бо коронавирус ба Туркманистон 920 ҳазор доллар медиҳад. Дар ин бора сафорати ИМА дар Туркманистон хабар дод.

Маблағи ҷудошуда барои таҳияи озмоишгоҳҳо, ташхиси гирифторӣ ба бемориҳои гузаранда, хабар додан аз хатарҳо ва ғайра сарф мешавад.

Дар хабари вазорат омадааст, ки айни ҳол ҳукумати Туркманистон расман ҳолатҳои гирифторӣ ба COVID-19 -ро дар кишвар тасдиқ намекунад ва эҳтимол дорад, дар сурати ошкор шудани гирифторӣ низ тасдиқ накунад.

Ҳукумати он кишвар ахиран тадбирҳоеро барои пешгирӣ аз паҳншавии вирус роҳандозӣ кард, аммо ҳамзамон дар Туркманистон чорабиниҳое бо ширкати шумораи зиёди одамон баргузор мешавад, пӯшидани ниқоби тиббӣ манъ аст ва хонандагонро баъди анҷоми таътили баҳорӣ дубора ба мактаб даъват карданд.

Ҳукумати он кишвар ҳам пӯшидани ниқобро дар кӯчаҳо ва ҳам фурӯши онро дар дорухонаҳо манъ кардааст. Ба ин тартиб, ба забон овардани вируси корона дар Туркманистон ғайрирасмӣ мамнуъ шуд. Аммо расонаҳои маҳаллӣ хабар медиҳанд, ки бемориҳое монанд ба нишонаҳои коронавирус дар чанде аз минтақаҳои Туркманистон ба қайд гирифта шудааст.

Ҳушдори Назарбоев аз паёмадҳои коронавирус

Нурсултон Назарбоев.

Президенти пешини Қазоқистон Нурсултон Назарбоев гуфт, таъсири коронавирус ё худ COVID-19 ба иқтисоди ин кишвар аз буҳрони ҷаҳонии молии соли 2008 сахттар хоҳад буд.

"Аз ҳоло мо бояд фикр кунем, ки баъди ин чи кор хоҳем кард. Иқтисод поин меравад. Шояд аз буҳрони молии соли 2008 дида сахттар шавад", - гуфт Назарбоев 7 апрел дар суҳбат бо сарвазири Қазоқистон Аскар Мамин.

Ба гуфтаи Назарбоев, ба ҳукумат дастур дод, ки сокинонро бо маводи ғизоӣ ва тиббӣ таъмин кунад. Ӯ ҳамчунин гуфт, ки 8 апрел матлаб ва паёмеро ба мардуми кишвараш нашр хоҳад кард. "Ҳоло барои тамоми ҷаҳон мушкил аст. Бинобар ин, мо бояд сабр ва якдигарро эҳтиром кунем", - афзуд Назарбоев.

Ин изҳороти Назарбоев баъди он нашр шуд, ки навбатпоии сокинони Қазоқистон дар назди бонкҳо барои дарёфти кумакпулӣ ба ҷанҷол печид. Ҳукумати ин кишвар ба онҳое, ки ба иллати коронавирус тиҷорат ва ҷои кори худро аз даст додаанд, кумакпулӣ дар ҳаҷми $95 ваъда кард.

Бино ба иттилои расмӣ, дар Қазоқистон то 7 апрел 697 ҳолати мубталошавӣ ба коронавирус сабт шудааст.

Дар Узбекистон шумораи гирифторон ба коронавирус ба 520 тан расид

Узбекистон барои муқобила бо вирус муқаррароти сахт ҷорӣ кардааст.

Вазорати тандурустии Узбекистон гуфт, то 7-уми апрел дар ин кишвар 520 ҳолати мубталошавӣ ба вируси корона ба қайд гирифта шудааст. Ба огаҳии Вазорати умури хориҷии Узбекистон, 23 шаҳрванди ин кишвар низ, ки дар хориҷ қарор доранд, ба вируси корона мубтало шудаанд.

Ин узбекистониҳо дар ИМА (10), Покистон (5), Қазоқистон (2), Австрия (1), Арманистон (1), АМА (1), Куриёи Ҷанубӣ (1), Русия (1) ва Тайланд (1) ба коронавирус мубтало шудаанд. Пештар дар бораи ҳалокати се узбекистонӣ аз коронавирус дар Ню-Йорк хабар дода шуд.

Вазорати умури хориҷии Узбекистон аз ҳамаи шаҳрвандони ин кишвар дар хориҷ даъват кардааст, ки талаботи мақомоти маҳаллиро дар мубориза зидди коронавирус иҷро карда, аз рафтан ба ҷойҳои серодам худдорӣ кунанд.

Дар Самарқанд 52 хона зери об монд

Обхезӣ дар Самарқанд. 7 апрел, 2020.

Дар шаҳри Самарқанди Узбекистон рӯзи 6-уми апрел дар натиҷаи борони сахт 52 хона зери об монд. Мақомоти ҳолатҳои фавқулоддаи Узбекистон 7-уми апрел хабар доданд, ки хонаҳоро аз обу лой тоза кардаанд.

"Дар натиҷаи борони сахт оби рӯдхонаи "Чашма", ки аз миёни маҳаллаи "Кулолон"-и Самарқанд мегузарад, баланд шудааст. Оби рӯдхонаи "Сиёбча" низ баланд шуда, ҳаракати воситаҳои нақлиётро мушкил сохт", - омадааст дар иттилоияи Вазорати ҳолатҳои фавқулодаи Узбекистон.

Ба огаҳии вазорат, дар бартараф кардани оқибатҳои офати табиӣ 84 корманд, 11 техникаи махсуси мақомоти ҳолатҳои фавқулодда, 83 корманди мақомоти маҳаллӣ ва 12 воситаи нақлиёт иштирок доштанд.

Дар бораи ҳаҷми хисороте, ки сокинон дар пайи омадани сел дидаанд, чизе гуфта намешавад.

Даъвати ҳомиёни ҳуқуқи Қазоқистон ба озодии зиндониён дар шароити коронавирус

Зиндоне дар шаҳри Нурсултон

Ҳомиёни ҳуқуқи қазоқистонӣ аз ҷомеаи ҷаҳонӣ хостанд, ки дар пайи густариши вируси корона аз мақомоти Қазоқистон озодии зиндониён ва қатъи таъқибҳои сиёсиро талаб кунанд.

Дар изҳороте, ки рӯзи 6 апрел нашр шуд, ҳомиёни ҳуқуқи Қазоқистон гуфтанд, аз 16 март ба ин тараф - аз замони эъломи ҳолати фавқулода дар он кишвар - ҳадди ақал 32 ҳолати боздошти фаъолон сурат гирифтааст.

Ба бовари ҳомиёни ҳуқуқ, "мақомоти Қазоқистон дар ивази мубориза бо вируси корона ба таъқиби мухолифони сиёсӣ машғуланд".

Ҳомиёни ҳуқуқ ҳамзамон гуфтаанд, ки дар шароити паҳншавии вируси корона маҳбусон қишри осебпазир ҳастанд ва бояд шартан озод шаванд.

Дар Қазоқистон то имрӯз 670 ҳолати гирифторӣ ба вируси корона сабт шудааст. Чанде аз шаҳрҳо, аз ҷумла Алмато ва Нурсултон ба карантин гирифта шудаанд. Дар ин шаҳрҳо равуои сокинон маҳдуд ва фаъолияти бисёре аз корхонаҳо манъ шудааст.

Узбекистон наметавонад шаҳрвандони дармондаашро баргардонад

Акс аз бойгонӣ

Комиссияи махсуси ҷумҳурявии Узбекистон оид ба таҳияи барномаҳои пешгирӣ аз паҳн шудани коронавирус тасмим гирифт, ки аз 30 март то 20 апрел фаъолияти тамоми фурудгоҳҳо ва парвози ҳавопаймоҳо ба ин кишвар манъ карда шавад.

Дар иттилоияи ситоди фаврии мубориза бо коронавирус дар Узбекистон гуфта нашудааст, ки рӯзҳои наздик барои баргардонидани шаҳрвандони дармондаи ин кишвар дар хориҷ парвозҳои махсус анҷом мешавад.

​Дар ҳамин ҳол гуруҳи шаҳрвандони Узбекистон, ки дар Русия, Туркия, Бритониё ва АМА дармондаанд, дархости кумак доранд. Беш аз 20 ӯзбекистонӣ аз ҳукумати кишвари худ дархост доранд, ки тавассути парвози махсус онҳоро ба ватан баргардонад.

Як гуруҳи узбекистониҳои дигар низ бо нашри як муроҷиатномаи видеоӣ аз Дубай гуфтанд, аз 10 март ба ин сӯ дар он шаҳр дармонда, наметавонанд ба ватан баргарданд. "Зеро кормандони сафорати Узбекистон тавассути парвозҳои махсус шиносҳои худро фиристоданд", - изҳор доштанд баъзе аз онҳо.

"Шумори узбекистониҳои дармонда дар хориҷ чанд ҳазор аст. Инҷо сухан на танҳо дар бораи баргардонидани онҳо, балки дар бораи ташкили макони карантин низ меравад. Барои ин ҳама иншоот ва сармоя лозим аст. Ҳоло ҳукумат аз ҳисоби худ баргаштаҳоро дар каратин нигаҳ медорад. Вале ҳама чиз ҳадду ҳудуд дорад. Давлат барои ҳамаи онҳо маблағ аз куҷо меёбад? Бинобар ин, ҳоло дар ин масъала "танаффус" эълом шудааст", - изҳор дошт як мансабдори узбек дар шарҳи барнагардонидани узбекистониҳои дармонда.

Вазорати умури хориҷии Узбекистон низ ба шаҳрвандони дармондаи ин кишвар дар хориҷ иттилоъ дод, ки ҳама гуна парвозҳо то 20 апрели соли равон қатъ карда шудааст.

Амрико ба Тоҷикистон барои пешгирӣ аз коронавирус $866 000 дод. ВИДЕО

Ҷон Марк Поммершайм, сафири Амрико дар Тоҷикистон

Ҳукумати Амрико барои мусоидат ба омодагии Тоҷикистон ҷиҳати муқобила бо коронавирус 866 ҳазор доллар ​ҷудо кард.

Ҷон Марк Поммершайм, сафири Амрико дар Душанбе, рӯзи 7-уми апрел дар ин бора иттилоъ дод.

Ӯ гуфт, ин маблағ тавассути Оҷонси Амрико оид ба рушди байналмиллалӣ (USAID) ва ҳамкоронаш дар Тоҷикистон -- Abt Associates, Салиби Сурх ва Созмони Ҷаҳонии Тандурустӣ -- дастрас хоҳад шуд.

"Маблағ барои омӯзиш додани пизишкону парасторон ва хариди дастгоҳҳои зарурӣ дар бемористонҳо пешбинӣ шудааст", - илова кард ӯ.

Сафири Амрико дар идома гуфт, ки Иёлоти Муттаҳида ҳамкорӣ ва дӯстӣ бо мардуми Тоҷикистонро арҷ мегузорад ва ба ироаи кумакҳояш дар шароити коронавирус ҳам идома хоҳад дод.

То ин дам Бонки Ҷаҳонӣ барои омодагии Тоҷикистон ҷиҳати муқобила бо коронавирус беш аз 11 миллион доллар ва Олмон як миллион евро кумак кардаанд. Бонки Осиёии Рушд 100 ҳазор доллар ва Русия беш аз 20 ҳазор тест ё маводи ташхиси коронавирус ва ЮНИСЕФ либосу ашёи муҳофизатӣ доданд.

Як ҳамсуҳбати Радиои Озодӣ, ки аз ҷузъиёти музокироти Тоҷикистон бо созмонҳои байнулмилалии молӣ огоҳ аст, рӯзи 2-юми апрел гуфт, айни замон ҳукумат барои дарёфти кумак бо Сандуқи Байналмилалии Пул ва Бонки Исломии Рушд низ вориди гуфтугӯ шудааст.

Дар Минск ду муовини додситон барои қочоқи маводи мухаддир ба ҷавобгарӣ ҷалб шуданд

Бинои додгоҳе дар Беларус

Ду муовини додситони шаҳри Минск, пойтахти Беларус дар робита бо иттиҳоми даст доштан дар маводи мухаддир боздошт шуданд. Дар изҳороти рӯзи 6 апрел Додситонии кулли Беларус гуфт, ки муовинони додситонҳои ноҳияҳои Ленин ва Советскии шаҳри Минск бар асоси моддаи “истеҳсоли ғайриқонунӣ, ҳифзу интиқол ва қочоқи маводи нашъадор” гумонбар дониста мешаванд. Ин парванда то панҷ соли зиндонро пешбинӣ мекунад.

Исми ин ду мақом нашр намешавад, вале дар хабари расмӣ гуфта шудааст, ки онҳо аз мақом сабукдӯш ва ба ҳабс гирифта шуданд. Моҳи август дар як суханронии интиқодиаш президент Аляксандр Лукашенка сохторҳои ҳифзи қонунро барои нокомӣ дар мубориза бо таҳқиқи қазияҳои марбут ба қочоқи маводи мухаддир интиқод карда буд. Декабри соли 2016 дар миёни 17 маҳкумшуда барои ташкили як шабакаи муташаккили қочоқбарони маводи мухаддир ду афсари собиқи КГБ ва як афсари пешини полис ҳам муҷозот шуданд.

HRW гуфт, Аслам Форуқӣ бояд дар додгоҳи одилона муҳокима шавад

Абдулло Оракзай, маъруф бо лақаби Аслам Форуқӣ рӯзи 4 апрел ҳамроҳ бо ду фармондеҳ ва 19 шӯришии дигар боздошт шуд

Созмони Дидбони ҳуқуқи башар (Human Rights Watch) аз мақомоти Афғонистон тақозо кард, ки раҳбари гурӯҳи “Давлати исломии вилояти Хуросон”-ро, ки як ташаккули вобаста ба гурӯҳи “Давлати исломӣ” мебошад, бар асоси иттиҳоми ҷинояти ҷангӣ ба ҷавобгарӣ кашанд.

HRW рӯзи 6 апрел бо пахши изҳороте гуфт, ки Афғонистон бояд Аслам Форуқиро, ки ду рӯз пеш дар вилояти Қандаҳор боздошт шуд, бар асоси муқаррароти байналмилалии ҳуқуқи башар бо мурофиаи одилона таъмин кунад.


Исми воқеии Форуқӣ Абдуллоҳ Оракзай буда, июли соли 2019 раҳбарии созмони ба ном “Давлати исломии вилояти Хуросон”-ро ба ӯҳда гирифтааст. Ин гурӯҳ масъулияти чандин ҳамла дар саросари Афғонистонро ба ӯҳда гирифта даҳҳо мардуми мулкиро ба қатл расонидааст.

Патрисиа Госсман, яке аз мудирони бахши Осиёи HRW гуфт, боздошти Форуқӣ “барои ҳукумати Афғонистон имконият медиҳад, ки тавонмандии худро дар таъмини адолат нисбати қурбониҳои ҷиноятҳои ҷангӣ ва дигар беқонуниҳо ба намоиш гузорад”. Госсман гуфт, ки имкони дар додгоҳ баёнот додани осебдидаҳои ҷиноятҳои Форуқӣ хеле муҳим мебошад.

Ҷоизаи Радиои Азаттик ва ҳамкоронаш барои таҳқиқоти журналистӣ 

Нашри қисми аввали таҳқиқот журналистӣ рӯзи 25 ноябри соли 2019 мардумро бо талаби мубориза бо фасод ба майдони Алатоои шаҳри Бишкек баровард

Тими муштараки журналистони бахши Қирғизии Радиои Озодӣ - Аззаттик, Маркази таҳқиқоти фасодкорӣ ва ҷиноятҳои созмонёфта (OCCRP) ва сомонаи қирғизии Kloop.kg бо ҷоизаи ба номи Том Реннер мукофотонида шуданд, ки аз ҷониби созмони амрикоии Гузоришгарону сардабирони таҳқиқгар (Investigative Reporters and Editors - IRE) таъсис шудааст.

Ин ҷоиза барои як силсила гузоришҳои таҳқиқотии журналистон дар бораи фош шудани шабакаи аз кишвари нодори Қирғизистон хориҷкунандаи миллионҳо доллар пулҳои нақд тақдим шуд.

IRE рӯзи 6 апрел дар изҳороте гуфт, ки силсилатаҳқиқоте зери унвони “Ғоратгарӣ ва сарпарастӣ дар қалби Осиёи Марказӣ” фошкории воқеии амалҳоест, ки мардум “аз тарси куштор намехоҳанд, ки гуфта шавад ва бешубҳа барои журналистон ҳам хатар эҷод мекунад”.

Дар ин таҳқиқи журналистӣ соҳибкори уйғуртабори 37-сола аз Шинҷони Чин Айкере Сайматӣ, ки бо пулшӯӣ машғул будааст, нақл мекунад, ки чигуна миллионҳо доллар маблағро аз Қирғизистон берун бурдааст”. Дар ин шабака исми чандин нафари бонуфуз, аз ҷумла мақомдорон ҳам фош мешавад.

Сайматӣ ноябри соли 2019 дар Истамбул кушта шуд, вале пеш аз он як баста санадҳоеро ба дасти журналистон дод, ки дар он нақшаи берун бурдани пулҳо аз Қирғизистон фош мешавад.

Макрон аз Эрон хост, эҳтироми уҳдадориҳои ҳастаиашро ба ҷо орад

Маркази табдили ураниуми Фарду дар Қуми Эрон

Эммануэл Макрон, президенти Фаронса, аз Эрон хост, дар фурсате ки тамаркузи ҷаҳон ба буҳрони коронавирус равона шудааст, эҳтироми уҳдадориҳои ҳастаиашро ба ҷо орад.

Дар як суҳбати телефонии 6-уми апрел бо президенти Эрон, Макрон ба раиси ҷумҳурӣ Ҳасани Рӯҳонӣ гуфт, ки ҷомеаи байналмилалӣ бояд дар мубориза бо тавсеаи вирус ҳамкорӣ кунад.

Дар изҳороти ҳукумати Фаронса гуфта шудааст, Макрон изҳори умед кард, ки Эрон "мутобиқ ба уҳдадориҳои ҳастаии соли 2015 амал карда, аз ҳама гуна иқдоми нав худдорӣ мекунад" ва ҷомеаи ҷаҳонӣ "барои коҳиши таниши минтақавӣ" саҳмгузор хоҳад шуд.

Дафтари президенти Эрон хабар дод, ки дар ин гуфтугӯ Рӯҳонӣ ба муборизаи ҳамоҳангшудаи ҷаҳонӣ ба зидди коронавирус даъват ва дархости кумак кардааст. Рӯҳонӣ гуфтааст, "бе ҳамкории ҷаҳонӣ ва табодули таҷрибаи ҳамдигарӣ мо дар ин марҳилаи буҳронӣ дастболо нахоҳем шуд".

Рӯзи 6-уми апрел созмони Дидбони Ҳуқуқи Башар (Human Rights Watch) аз Амрико тақозо кард, ки Вашингтон таҳримҳои ҷоришуда боло Эронро сабуктар кунад.

Вашингтон баъд аз он ки соли 2018 аз созиши ҳастаӣ бо Эрон берун шуд, таҳримҳо ба зидди ин кишварро боз ҳам сангинтар кард.

Дидбони ҳуқуқи башар аз Иёлоти Муттаҳида хост, номгӯи маҳсулоти озод аз таҳримҳоро бештар карда, дар замони пандемияи коронавирус дастрасии ин кишварро ба захираҳои зарурии башарӣ таъмин кунад.

Президенти ИМА Доналд Трамп ба Эрон ёрии башардӯстона пешниҳод кард, вале Эрон аз ин ёрӣ даст кашид.

Толибон гуфтанд, музокираи табодули зиндониҳоро қатъ мекунанд

Декабри соли 2019. Толибони маҳбуси зиндони Пули Чархии Кобул

Толибон гуфтанд, музокира бо ҳукумати Афғонистон, ки бо миёнҷигии ИМА ба хотири табодули зиндониҳо шурӯъ шуда буд, қатъ мешавад. Суҳайл Шоҳин, сухангӯи дафтари сиёсии Толибон дар Қатар рӯзи 7 апрел дар Твиттераш навишт, ки тими фаннии Толибон “дар музокираҳои бесамар” иштирок намекунад.

Шоҳин маъмурияти президент Ашраф Ғаниро дар он муттаҳам кард, ки бо баҳонаҳои гуногун ҷараёни озодкунии зиндониҳоро ба таъхир мегузоранд. Ҷовид Файсал, сухангӯи Шӯрои амнияти миллии Афғонистон аз Толибон тақозо кард, ки аз роҳи “баҳонаҷӯӣ” ҷараёни корро ба ҳам назананд.

Мақомоти Афғонистон гуфтанд, ки Толибон озод кардани фармондеҳони аршади ин гурӯҳи шӯриширо тақозо доранд, ки ба гуфтаи мақомот, дар солҳои гузашта дар анҷоми ҳамлаҳои пурхушунат даст доштанд.

Боздошта шудани музокираҳо ба тавсеаи хушунатҳо ва иҷро нашудани нақшаи аз Афғонистон берун рафтани нирӯҳои амрикоӣ сабаб мешавад. Ин шартҳои муҳими созиши сулҳи ИМА бо Толибон мебошад, ки 29 феврал дар Қатар имзо шуда буд. Як бахши дигари созиш ин аст, ки ба нишони эътимоди ҳамдигарӣ ҳукумат 5 ҳазор узви Толибон ва гурӯҳи шӯришӣ як ҳазор низомии ҳукумати Афғонистонро аз зиндонҳо озод мекунанд.

Афзоиши ҳодисаҳои марг бар асари Ковид-19 дар Аврупову ИМА

Корманди тиб ниқоби муҳофизатиро мепӯшад

Дар пасманзари идомаи пандемияи коронавирус ва афзоиши марги инсонҳо дар паи Ковид-19 дар саросари ҷаҳон, нахуствазири Бритониё, ки ба ин вирус гирифтор шудааст, ба бахши муроқибати шадиди бемористон интиқол дода шуд. Ҷонсон рӯзи 6 апрел баъди бадтар шудани вазъи саломатиаш ба беморхона бурда шуд. Вале дафтари нахуствазири Бритониё гуфт, ки Ҷонсон баҳуш буд ва зарурати ба таври сареъ дар зери дастгоҳи нафаскашӣ гузоштанаш набуд.

Ин хабар дар ҳолест, ки шумори ҳалокшудаҳо дар Бритониё бар асари олудагӣ ба Ковид-19 боз 400 нафар афзуда дар тамоми ин кишвар ба 5400 нафар баробар шуд. Дар дигар нуқоти Аврупо шумори марги инсонҳо бар асари олудагӣ ба Ковид-19 ҳамчунин афзуда, дар Фаронса 833 ҳодисаи нави марг ва дар Итолиё ҳам афзоиш ба қайд гирифта шуд.

Дар ИМА дар 24 соати гузашта 1150 ҳодисаи нави марги олудашудаҳо ба Ковид-19 ба қайд гирифта шуд. Дар Чин, ки сарчашмаи пайдоиши коронавирус мебошад, барои аввалин бор дар тамоми ин моҳҳо ҳеҷ ҳодисаи марг дар 24 давоми соати гузашта ба қайд гирифта нашудааст. Вале дар саросари ҷаҳон мақомот ҳушдор медиҳанд, ки агар мардум тадбирҳои эҳтиёткориву дурӣ аз ҳамдигар ва инзивои хонагиро риоя накунанд, бозгашти мавҷи хатарноки вирус аз эҳтимол дур нест.

Русия барои мубориза бо коронавирус ба СҶТ $1 млн дод

Бонки миллии Русия. Акс аз бойгонӣ.

Созмони ҷаҳонии тандурустӣ барои мубориза бо коронавирус ҳамчун кумаки якдафъаина, аз Русия 1 миллион доллар дарёфт кард. Русия ҳамчунин 61 миллион рубл ба кишварҳои Аврупои Шарқӣ, Амрикои Ҷанубӣ, Осиёи Марказӣ ва Ҷанубу Шарқӣ ва Африқо ҷудо хоҳад кард.

Созмони ҷаҳонии тандурустӣ буҷаи худро аз ҳисоби пардохтҳои ҳатмии кишварҳои узв ва хайрҳои довталабона пур мекунад. Ҳаҷми пардохтҳои ҳатмӣ бо назардошти вазъи некуаҳволии кишвар ва сокинон таъйин мегардад. Ба ин тартиб, Русия вазифадор аст, ки дар соли ҷорӣ 5,7 миллион доллар, Украина 136,4 ҳазор, Қазоқистон 425,8 ҳазор ва ИМА 57,8 миллион доллар бидиҳад.

Гирифтории 120 табиби қазоқ ба коронавирус

Мутахассисони қазоқ. Алмато, Қазоқистон.

Айжан Есмагамбетова, сартабиби беҳдоштии Қазоқистон гуфт, 19 дарсади гирифторони коронавирус дар ин кишвар кормандони тиб ҳастанд. Есмагамбетова дар як нишасти хабарии рӯзи 6-уми апрел гуфт, 120 табиб мубталои коронавирус шудаанд.

Ба гуфтаи вай, яке аз табибон дар ҳолати вазнин қарор дорад ва нуҳ тани дигар вазъи миёнаи вазнин доранд. 57 табиби дигар дар айни ҳол ин бемориро ба осонӣ пушти сар мекунанд.

Ҳукумати Қазоқистон пештар аз ин гуфт, маоши табибонеро бештар мекунад, ки ба табобати гирифторони коронавирус ҷалб шудаанд. Дар Қазоқистон то рӯзи 6-уми апрел 662 ҳолати гирифторӣ ба вируси нав сабт шудааст.

Дар он кишвар аз 16-уми март то 15-уми апрел бо ҳадафи пешгирӣ аз паҳншавии ин вабо ҳолати фавқулода эълом шуда, чанде аз шаҳрҳо комилан баста шудаанд. Вазорати тандурустии он кишвар авҷи гирифториро дар миёнаҳои моҳи апрел пешбинӣ мекунад. Ба бовари ин вазорат, дар Қазоқистон мумкин аст, то 3,5 ҳазор кас ба ин беморӣ гирифтор шаванд.

Коронавирус: Вазъи сиҳатии сарвазири Бритониё бад шудааст

Борис Ҷонсон, нахуствазири Бритониё.

Расонаҳои Бритониё хабар доданд, шоми душанбе вазъи саломатии сарвазири ин кишвар Борис Ҷонсон, ки ба коронавирус мубтало аст, бад шудааст.

Ба гуфтаи манбаъҳои SkyNews, Ҷонсон дар ҳолати беҳушӣ қарор надорад ва танҳо ба хотири эҳтиёт ба шуъбаи дигари беморхона интиқол ёфта, дар наздикии дастгоҳи нафаси сунъӣ бистарӣ карда шудааст.

Бо дархости Ҷонсон вазифаи сарвазириро вазири умури хориҷии Бритониё Доминик Рааб иҷро хоҳад кард.

Борис Ҷонсони 55-сола рӯзи якшанбе бо нишонаҳои коронавирус дар беморхона бистарӣ шуд.

Президенти Қирғизистон рушди низоми порлумониро ваъда дод

Сооронбой Ҷеенбеков, президенти Қирғизистон.

Президенти Қирғизистон Сооронбой Ҷеенбеков ваъда дод, ки дар кишвараш низоми порлумониро рушд медиҳад.

"Ҳаводиси апрел дар низоми идории Қирғизистон тағйиротеро ба вуҷуд овард. Барои демократияи порлумонӣ гомҳои муҳим гузошта шуд. Мо барои рушди низоми порлумонӣ дар кишвар тамоми талоши худро хоҳем кард",-изҳор дошт Ҷеенбеков.

Ба гуфтаи ӯ, тадбиқи идеяи инқилоби апрелӣ вазифаи тағйирнопазири онҳо аст. "Мо бояд аз ин ҳаводис дарси ибрат бигирем ва имкон надиҳем, ки қароре зидди иродаи мардум қабул шавад",-гуфт вай.

Ин изҳороти Ҷеенбеков дар пасманзари пешниҳоди вакили порлумони Қирғизистон Курманкул Зулушев садо дод, ки гуфт, барои интихоби дубораи низоми идорӣ дар ин кишвар бояд раъйпурсӣ баргузор кард.

7-уми апрели соли 2010 дар инқилоби мухолифон дар назди "Кохи Сафед"-и Қирғизистон тирпаронӣ сурат гирифта, 86 кас кушта ва беш аз 100 нафар захм бардоштанд.

Дар натиҷаи ҳаводиси апрел президенти дувуми Қирғизистон Қурмонбек Боқиев, аъзои хонаводаи ӯ ва атрофиёнаш аз кишвар фирор карданд.

Навбатпоии қазоқистониҳо барои дарёфти кумакпулӣ

Алмато, Қазоқистон, 3 апрел, 2020.

Президенти Қазоқистон Қосимҷомарт Тоқаев ду ҳафта пеш ба қазоқистониҳое, ки ба иллати паҳн шудани коронавирус ҷои кор ё тиҷорати худро аз даст додаанд, кумаки иҷтимоӣ дар ҳаҷми 42500 танга муодили ($95) ваъда кард. Ба гуфтаи Тоқаев, ин кумакро дар умум на камтар аз 1,5 миллион аҳолии Қазоқистон дарёфт хоҳанд кард.

Мақомоти қазоқ дертар гуфтанд, кумакро онҳое дарёфт мекунанд, ки расман ҳамчун бекор ба қайд гирифта шудаанд ва метавонанд инро исбот кунанд. Баъдан қоидаҳо соддатар шуда, гуфтанд, ба онҳое низ кумак карда мешавад, ки боре андоз насупориданд. Дар пайи ин изҳорот навбатпоии қазоқистониҳо дар назди идораҳои давлатӣ, бахусус почта ва бонкҳо барои ба қайдгирӣ ва дарёфти кумакпулӣ ба миён омадааст.

"Барои дарёфти 42500 танга мо бояд дар идораи таъминоти иҷтимоӣ сабти ном кунем. Барои сабти ном ба он мошин бояд 2600 танга супорем. Вале ман ин пулро барои чӣ месупорам? Оё баъди супоридани ин маблағ воқеан ҳам кумакпулиро дарёфт карда метавонам?",-изҳор дошт Гулнур Кетебоева, яке аз сокинони маҳаллӣ.

Мақомоти Қазоқистон ба сокинон пешниҳод карданд, ки барои дарёфти кумак тавассути сомонаи тозатаъсис ё барномаи телефонӣ дархост фиристанд. Вале корбарон мегӯянд, дар кори сомона ва барномаҳои мазкур нуқс вуҷуд дорад.

Бино ба маълумоти пешакӣ, эълони ҳолати фавқулодда дар Қазоқистон ва пурра баста шудани бузургтарин шаҳрҳои ин кишвар - Нурсултон ва Алмато аз 19 март ба вазъи молии ҳудуди 500 ҳазор қазоқистонӣ таъсири манфӣ расондааст. Дар Қазоқистон то рӯзи сешанбе 662 ҳолати мубталошавӣ ба коронавирус ба қайд гирифта шудааст.

Мақомоти қазоқ гуфтанд, киҳо метавонанд кумаки иҷтимоӣ дарёфт кунанд

Алмато, Қазоқистон, 3 март, 2020.

Вазири меҳнат ва ҳифзи иҷтимоии Қазоқистон Бирҷон Нуримбетов гуфт, киҳо кумаки иҷтимоии 42,5 ҳазортангаии давлатиро дарёфт хоҳанд кард. Ба гуфтаи вай, коргарони кирояи ширкатҳову муассисаҳои тиҷоратии хурду миёна, тиҷорати бузург дар шаҳрҳои карантиншуда ҳаққи дарёфти кумаки иҷтимоиро доранд.

"Касоне ки дар шароити фосилавӣ фаъолияташонро идома медиҳанд, ҳаққи дарёфти кумакро надоранд. Кумак ба онҳое дахл дорад, ки бидуни ҳифзи маош ба рухсатии меҳнатӣ фиристода шудаанд. Ба кормандони муассисаҳои давлатӣ, созмонҳои иҷтимоӣ ин кумак дахл надорад",-гуфт Биржан Нуримбетов.

Вай ҳамчунин афзуд, дар ду рӯзи охир 412 ҳазор аризаи дархости кумак ворид шудааст. Баъди санҷишҳо дақиқ шуд, ки 1873 шаҳрванди аризадода то кунун даромади ҳангуфт доштааст.

"Онҳо дар аризаҳояшон навиштаанд, ки аз даромад маҳрум шуда, маблағе ҳам надоранд. Аммо маълум шуд, ки моҳҳои январ, феврал ва март аз 500 то 1-миллион тангаӣ даромад доштаанд. Акнун навиштаанд, ки аз 16 март ба ин тараф бе маблағ мондаанд. Албатта, ин кори нодуруст аст", - гуфт вазир.

Фавти ду узбекистонӣ дар Ню-Йорк аз коронавирус

Яке аз хиёбонҳои шаҳри Ню-Йорки Амрико. 21 март, 2020.

Ҳафтаи гузашта дар шаҳри Ню-Йорки ИМА ду шаҳрванди Узбекистон - яке 51 ва дувумӣ 60-сола, аз коронавирус фавтиданд. Фавтидаҳо ҳамроҳ бо хонаводаҳояшон дар ИМА зиндагии доимӣ доштанд. Даҳҳо ҳазор узбекистоние, ки айни ҳол дар Ню-Йорк зиндагӣ доранд, аз мубталошавӣ ба коронавирус нигаронанд.

Зани 60-солаи узбекистонӣ, ки аз коронавирус фавтид, нуҳ соли охир дар ИМА зиндагӣ мекард. Вай ҳамзамон чандин сол аз диабети қанд ранҷ мебурд. Ду ҳафта пеш вай бо нишонаҳои гирифторӣ ба вируси корона бистарӣ шуд, аммо ӯро ба шарти хонанишинӣ рухсат доданд. Баъди як ҳафтаи бадтар шудани сиҳатиаш дубора дар бемористон бистарӣ карданд.

Як рӯз пеш аз марги зани 60-сола, марди 51-солаи узбекистонӣ аз коронавирус фавтид. Ин мард низ аз бемории қанд ранҷ мебурд. Нимаҳои моҳи март вай бо нишонаҳои гирифторӣ ба коронавирус бистарӣ шуда буд.

Гуфта мешавад, дар Ню-Йорк ва атрофи он наздики 50 ҳазор узбекистонӣ зиндагӣ мекунад.

69 ҳолати нави мубталошавӣ ба коронавирус дар Қирғизистон

Ӯш, Қирғизистон, 4 апрел, 2020.

Вазири тандурустии Қирғизистон Собирҷон Абдикаримов гуфт, 6-уми апрел дар ин кишвар 69 ҳолати нави мубталошавӣ ба коронавирус ё COVID-19 сабт шудааст. Ба гуфтаи вазир, ҳолатҳои нав дар афроде ошкор шудааст, ки бо беморон тамос доштанд.

Дар маҷмӯъ дар бемористонҳои Қирғизистон 202 нафар табобат мегиранд, ки вазъи 5 танашон вазнин гуфта мешавад.

Дар Қирғизистон то 6-уми апрел 216 кас ба коронавирс мубтало шуда, чаҳор кас ҷон бохтаанд. То ҳол 10 кас шифо ёфтаанд. Имрӯз низ қарор аст, 23 тани дигар аз беморхона рухсат шаванд.

СММ гуфт, дар ҳолати карантин хушунати хонаводагӣ афзоиш ёфтааст

Дабири кулли СММ Антониу Гутерриш.

Дабири кулли СММ Антониу Гутерриш бо нашри як паёми видеоӣ дар "Твиттер" гуфт, дар шароити карантин, ки дар бештари кишварҳои ҷаҳон ба хотири пешгирӣ аз паҳн шудани коронавирус ҷорӣ аст, ҳолатҳои хушунати хонаводагӣ афзоиш ёфтааст.

"Ҳафтаҳои ахир мо дар пайи ташдиди фишорҳои иқтисодиву иҷтимоӣ шоҳиди ҳолатҳои даҳшатбори хушунати хонаводагӣ мешавем", - изҳор дошт дабири кулли СММ.

Ба гуфтаи ӯ, дар баъзе аз кишварҳо шикояти занон ба хадамоти кумакрасон зиёд шудааст. Гутерриш мегӯяд, кори кормандони мақомоти ҳифзи ҳуқуқ ва тиб бештар шуда, манбаъҳо барои кумак ба қурбониёни хушунати хонаводагӣ намерасанд.

Дабири кулли СММ ба мақомоти кишварҳо пешниҳод кардааст, то сармоягузории созмонҳои ғайритиҷориеро афзоиш диҳанд, ки бо дастгирии қурбониёни хушунати хонаводагӣ машғул ҳастанд.

Дар Русия аллакай 9 созмони ҷамъиятие, ки бо қурбониёни хушунати хонаводагӣ кор мекунанд, аз мақомот хостанд, то барои ҳимоят ва кумаки осебдидагони вазъи карантин чораҳои фаврӣ андешанд.

Бино ба баъзе аз хабарҳо, дар ҳоли ҳозир дар саросари олам 2,6 миллиард одам дар ҳолати карантин ба сар мебаранд.

Даъват аз матбуоти Косово барои ҷилавгирӣ аз “шиддат” дар пасманзари бӯҳрони коронавирус

16 марти соли 2020. Як бемори эҳтимолан олудашуда ба коронавирусро ба беморхонаи шаҳри Приштинаи Косово оварданд

Федератсияи журналистони Аврупо (ФЖА) аз матбуоти Косово даъват кард, ки дар замони бӯҳрони беҳдоштӣ дар пасманзари пандемияи коронавирус, аз “шиддат бахшидан ба танишҳо” худдорӣ кунанд. Созмони мустақар дар Брюссел бо пахши изҳороте рӯзи 4 апрел гуфт, ки вазъи карантин дар шаҳраке бо аксар сербҳои сокинаш дар минтақаи Митровитсаи Шимолӣ аз ҷониби телевизиони давлатии РТК ва сомонаи интернетии Sinjali пӯшиши “нодуруст ва ғайриахлоқии иттилоотӣ” дидааст. “Чунин ба назар мерасад, ки бархе сиёсатмадорон, бахусус президенти Сербистон Александр Вучич ва раиси ҷумҳурии Косово Ҳошим Тачӣ бӯҳрони коронавирусро ба манфиати худ барои афзоиши таниши сиёсиву иҷтимоӣ истифода мекунанд”, гуфт Рикардо Гутерреш, дабири кулли ФЖА. Ӯ аз журналистон хост, ки “ба бозиҳои онҳо бозӣ накунанд ва ба манфиати ҷомеа амал бикунанд”. САҲА ҳам гуфт, ки вазъ бо Ковид-19 “ҳамраъйиву ҳамкории тамоми ҷомеа ва ҳам мақомот дар минтақаро тақозо мекунад”.

Мақомот дар минтақаи аққалиятҳои сербнишини Косово ба хотири пешгирӣ аз паҳншавии коронавирус тадбирҳои монанд ба Сербистонро ҷорӣ карданд. Мақомоти Косово гуфтанд, ки дар ин кишвар 145 ҳодисаи олудагӣ ба коронавирус, аз ҷумла се ҳодисаи марг ба қайд гирифта шудааст. Вале ин омор 26 ҳодисаи олудагӣ, аз ҷумла як ҳодисаи марг ба вирусрро дар минтақаи шимолии аксаран сербнишин ба эътибор нагирифтааст. Мақомот дар ин минтақа ба сохторҳои беҳдоштии Сербистон гузориш медиҳанд. Косово, ки собиқ вилояти Сербистон мебошад, соли 2008 истиқлолияти худро эълон кард, вале Белград инро ба расмият намешиносад.

Баъди ҷустуҷӯҳои сартосарӣ дар Покистон 20 ҳазор намозгузор ба карантин гирифта шуд

Аъзои Таблиғи Ҷамоат маросими динии серӯзаро тарк мекунанд. 13 март соли 2020

Мақомот дар Покистон гуфтанд, ки 20 ҳазор намозгузор ба карантин гирифта шудаанд ва ҷустуҷӯи ҳазорҳо нафари дигар идома дорад, ки бо вуҷуди пандемияи коронавирус моҳи март дар як маросими динии Лоҳур иштирок карданд. Беш аз 100 ҳазор нафар даъвати мақомот барои бекор шудани мулоқот бо аъзои Таблиғи Ҷамоат – як ҷумбиши диниро нодида гирифта, дар ин маросим иштирок карданд. Мақомот гуфтанд, ки мехоҳанд тамоми ширкатдорони ин маросими рӯзҳои 10 то 12 март баргузоршударо аз санҷиши тиббӣ гузаронида ва ё карантин бикунанд. Лоҳур маркази маъмурии вилояти Панҷоб аст, ки 11 миллион аҳолӣ дорад. Дар ин вилоят танҳо 7 ҳазор нафар карантин шуда дар вилояти ҷанубии Синдҳ 8 ҳазор узви Таблиғ дар карантин ҳастанд. Дар вилояти шимолуғарби Хайбар Пахтунхва 5300 узви Таблиғи Ҷамоат, ки дар маросими динӣ иштирок карданд, бо каратин фаро гирифта шудаанд.

Ёфтҳои бештар

XS
SM
MD
LG