Пайвандҳои дастрасӣ

Хабари нав

Дар чанд ҷумла

Омӯзгорони Хоразмро ба харидани парда маҷбур кардаанд

Дар шаҳри Урганҷи вилояти Хоразми Узбекистон омӯзгорони мактаби русии №30 шикоят доранд, ки 30 дарсади маоши моҳи августашон барои харидории парда ва ҷевон ба синфхонаҳо ситонида хоҳад шуд.

Омӯзгорон сабтеро фиристодаанд, ки дар он масъалаи харидории пардаву ҷевон барои синфхонаҳо баррасӣ шудааст. Дар он мудири мактаб Пулод Орозов ба омӯзгорон мегӯяд, ки барои харидории пардаву ҷевон 20 миллион сӯм (2105 доллар) лозим аст ва он аз маоши моҳи августи онҳо гирифта мешавад.

Омӯзгорон мегӯянд, баъди эътироз ба ин тасмими раҳбарияти мактаб таҳдид шуданд, ки ҷои кори худро аз даст хоҳанд дод. Яке аз омӯзгорони мактаби №30 ба шарти ифшо нашудани номаш гуфт, ҳамеша як қисми маоши онҳоро намедиҳанд.

"Пулҳо дар ихтиёри мудир ҳастанд. Ба ҷуз ин, аз мо талаб мекунанд, то хаттӣ баёнот диҳем, ки ин пулҳоро бо хоҳиши худ медиҳем. Вале дар асл он фасодкории маҳз аст. Мо барои мактаб пулро дареғ намедорем, вале кӣ кафолат медиҳад, ки пулҳо ба ҷайби мудир ё каси дигар намераванд?", - изҳор дошт ҳамсуҳбати мо.

Мудири мактаби рақами 30 Пулод Орозов хабарҳо дар ин заминаро қотеона рад кард. "Ҳамааш сафсата аст. Ман кафолат медиҳам, ки аз маоши омӯзгорон маблағе ситонида намешавад. Рӯзи душанбе онҳоро ҷамъ карда, огаҳ хоҳам кард, ки маоши моҳи августро пурра дарёфт хоҳанд кард",-изҳор дошт ӯ. Мудир аз шарҳи навор худдорӣ кард.

Ҳамаи хабарҳои имрӯзро дар инҷо бихонед

Ҷавоне дар Покистон ду хоҳарашро куштааст

Акс аз бойгонист.

Бино бар иттилои пулиси Покистон марде ду хоҳар ва зани бародарашро барои “бадахлоқӣ” ба қатл расонидааст. Ҳодиса баъд аз зӯҳри панҷшанбе дар минтақаи Даузаи Пешовар рух додааст. Ёсин, падари хоҳарони кушташуда ба пулис гуфтааст, духтарони ӯ бо келинаш ба деҳаи дигар мерафтанд ва писараш Амҷад бо чаҳор ҳамроҳаш онҳоро паронда, ба қатл расонидаанд.

Ба гуфтаи ин падар, писараш ба рафтори духтарҳо шубҳа карда, онҳоро ба қатл расонидааст. Дар робита ба ин ҳодиса тафтишот оғоз шудааст.

Бино бар гузориши Комиссияи ҳуқуқи башари Покистон, соли 2021 дар ин кишвар 478 зан қурбони куштори номусӣ шудаанд. Танҳо дар ноҳияи Свот, шимолу ғарби Покистон 70 нафар, аз ҷумла 38 зан кушта шудаанд.

Қатли зан барои гӯиё ҳифзи обрӯи хонавода дар Покистон ҳодисаи нав нест. Ин ҷиноят маъмулан аз сӯйи мардони хонавода, падар писар ва ё бародару амакбачаҳо содир мешавад. Дар аксар маврид айбдоршаандаҳо аз сӯйи хонаводаҳояшон бахшида мешаанд ва ин ҳолат сабаби беҷазо мондани онҳо мегардад.

Бо ин вуҷуд баъд аз қатли Қандил Балуч ситораи шабакаҳои иҷтимоӣ, аз сӯйи бародараш, порлумони Покистон дар мавриди куштори номусӣ дар қонун ислоҳот ворид кард. Тибқи қонуни нав, фарде, ки ба куштори номусӣ даст мезанад, ҳатто агар аз ҷониби хонавода бахшида шавад ҳам дар сурати исботи гуноҳаш дар додгоҳ, ба ҳабси абад мҳкум мешаад.

“Куштори номусӣ” ин таъбири ҷиноятест, ки аз ҷониби хешовандон барои гӯё “бадном кардани хонавода” ё “ҳифзи номус” анҷом мешавад. Ин амал бештар хоси кишварҳои падарсолор ва ҷомеаҳои муҳофизакор аст.

Кушторҳо “барои ҳифзи номус” дар Тоҷикистон ҳам гоҳе рӯй медиҳанд. Чанд сол пеш дар ноҳияи Ҳамадонӣ як мард дӯстписари духтарашро бо зарби табар кушт. Ҳамин тавр дар шаҳри Кӯлоб як бародар хоҳарашро барои “резонидани обрӯи хонавода” ба қатл расонида буд.

Гузоришгари СММ аз таъқиби фаъолони мадании Бадахшон нигарон шудааст

Мери Лавлор бо нашри баёнияи кутоҳе дар Твиттер нигарониашро баён кардааст.

Яке аз гузоришгарони баландпояи Созмони Милал аз боз кардани парванда ба зидди фаъолони маданӣ ва ҳомиёни ҳуқуқи бадахшонӣ дар Тоҷикистон изҳори нигаронӣ кардааст.

Мери Лавлор, гузоришгари хоси Созмони Милал барои ҳомиёни ҳуқуқи инсон рӯзи 19-уми август дар саҳифааш дар Твиттер навиштааст: “Ман аз таҳқиқи амалҳои ҳомиёни ҳуқуқи инсон, хонум Мамадшоева, ҷаноби Холиқназаров, Иргашов ва ҷаноби Мамадшоев, ки бино ба гузоришҳо бинобар ҳимояташон аз ақаллиятҳои помирӣ ба солҳои тӯлонии зиндон рӯ ба рӯ шудаанд, нигарон ҳастам.” Хонум Лавлор дар ин навиштаи худ, саҳифаи вазорати умури хориҷии Тоҷикистонро пайванд додааст.

Улфатхоним Мамадшоева, рӯзноманигор ва фаъоли мадании бадахшонӣ, Манучеҳр Холиқназаров, мудири Анҷумани ҳуқуқшиносони Помир, Фаромуз Иргашов, Хурсанд Мамадшоева аъзои "Комиссияи 44" баъди нооромиҳои моҳи май дар Вилояти Мухтори Куҳистони Бадахшон дастгир шуданд. Мақомот онҳоро ба барангехтани тазоҳуроту нооромиҳо дар Рушон муттаҳам мекунанд, ки дар натиҷаи он ба гуфтаи мақомот 16 нафар кушта шуд.

Ҳомиёни ҳуқуқ ва худи ин афрод гуфтаанд, ки ҳеч гуноҳе надоранд ва барои ҳимоят аз ҳуқуқи мардуми вилоят садо баланд кардаанд. Вазъият дар Вилояти Мухтори Кӯҳистони Бадахшон моҳи майи имсол печида шуд. Дар ҷараёни амалиёти мақомот дар Хоруғу Рӯшон даҳҳо нафар кушта, беш аз 200 нафар дастгир ва чанде аз онҳо аз 11 то 18-солӣ зиндонӣ шуданд.

навшуда

Эмомалӣ Раҳмон 15 додрасро ба мақоми нав таъйин кардааст

Раиси ҷумҳури Тоҷикистон ҳамчунин муовинони фармондеҳи неруҳои сарҳадии Кумитаи давлатии амнияти миллиро иваз кардааст.

Эмомалӣ Раҳмон, раиси ҷумҳури Тоҷикистон бо як фармон 15 додрасро аз як вазифа ба вазифаи дигар гузаронидааст. Дар фармони раиси ҷумҳур аз рӯзи 19-уми август, ки дар сомонаи расмии президент нашр шуд, номи 15 додрас ва ё судяе ҳаст, ки аксарият ба мақомҳои баландтар таъйин шудаанд.

Бисёр аз таъйинот дар сатҳи ноҳияву шаҳрҳо аст, ба истиснои он ки муовини раиси Додгоҳи ҳарбии Душанбе Мустафо Искандарзода раиси Суди иқтисодии вилояти Хатлон шуд. Эмомалӣ Раҳмон ба ҷойи Ҳомидҷон Муҳаммадзода, раиси пешини додгоҳи шаҳри Хуҷанд, ки ба ришвахорӣ гумонбар мешавад, Мирзошариф Ҳоҷизодаро таъйин кардааст, ки то ҳол раиси додгоҳи ноҳияи Зафаробод буд.

Раиси ҷумҳури Тоҷикистон ҳамчунин бо имзои ду фармони дигар муовинони фармондеҳи неруҳои сарҳадии Кумитаи давлатии амнияти миллиро иваз кардааст. Сафаралӣ Назирзода, муовин дар умури таъминоти молию фаннӣ, Турабек Назарзода, муовин дар корҳои сиёсӣ-тарбиявӣ таъйин шудаанд.

Дафтари матбуоти раёсати ҷумҳурии Тоҷикистон мегӯяд, ки фармонҳои дигаре дар бораи таъйиноти нав дар Додгоҳи Олӣ, Додситонии кулл, Сарраёсати иҷрои ҷазои ҷиноятии вазорати адлия, вазорати мудофиа, ва дигар сохторҳои қудратӣ таъйин шудаанд ва ҳамаи онҳо “кормандони ҷавону ботаҷриба ва корозмуда” мебошанд. Фармону қарорҳои дигар ва аз ҷумла барканориҳо то кунун нашр нашудаанд.

Мунтақидони ҳукумат аксаран раиси ҷумҳури Тоҷикистонро танқид мекунанд, ки асосан бар асоси вафодорӣ, на шоистагӣ афродро ба мақомҳои баланди давлатӣ таъйин мекунад ва бо вуҷуди тағйиротҳо пешрафти зиёде дар сохторҳои марбута дида намешавад.

Таҳсил дар мактабҳои Қазоқистон панҷрӯза мешавад?

Яке аз мактабҳои Қазоқистон.

Вазири маорифи Қазоқистон гуфтааст, эҳтимолан аз соли оянда таҳсил дар мактабҳои миёна панҷрӯза мешаванд.

Ба навиштаи бахши қазоқии Радиои Озодӣ, Асхат Аймагамбетов гуфтааст, ки таҳсили шашрӯза, ки ҳоло ҳаст омӯзгоронро хаста мекунад ва онҳо низ бояд ҳафтае ду рӯзи истироҳат дошта бошанду ба фарзанду оилаҳои худ бирасанд.

Бар ассои баъзе тағйироти дигар дар барномаи таълим дар мактабҳои миёнаи Қазоқистон, мӯҳлати таҳсил дар мактабҳо ду ҳафта зиёд шуда то 31-уми май давом мекунад ва таътили тобистона расо се моҳро дар бар мегирад. Таҳсили шашрӯза дар мактабҳои миёна, аз ҷумла дар Тоҷикистон аз замони шӯравӣ идома дорад.

ФСБ мегӯяд, ҳашт "ифротгаро" аз Осиёи Марказиро дастгир кардааст

ФСБ ё Хадамоти Федеролии Амнияти Русия иддао кард, ки дар се минтақаи ин кишвар – Маскав, Красноярск ва Новосибирск “ҳашт сокини Осиёи Марказиро боздошт кардаааст”, ки гӯё “узви созмони мамнӯи “Катиба тавҳид в-ал ҷиҳод” будаанд.

Нашрияи “Коммерсант” бо такя ба хабари расмии рӯзи 18-уми августи ФСБ мегӯяд, ин нафарон, ки зоҳиран дар миёни онҳо шаҳрвандони Тоҷикистон ҳам ҳастанд, гӯё ба ҳамлаи террористӣ дар метрои шаҳри Санкт-Петербург дар соли 2017 даст доранд.

Ба иддаои мақомот, боздоштшудаҳо гурӯҳҳои террористӣ дар Сурияро маблағгузорӣ карда, ба амалҳои террористӣ дар Русия даъват мекарданд. Созмони “Катиба тавҳид в-ал ҷиҳод”-ро ташкилоти террористии вобаста ба гурӯҳи “Давлати исломӣ” меноманд.

Тасдиқи дурустии иддаои ФСБ ва Кумитаи тафтишоти Русия дар ин замина имкон надорад, дар ҳоле, ки худи таркишҳои пурқурбонӣ дар метрои Санкт-Петербург панҷ сол пеш суолбарангез аст.

Чандин сокини Осиёи Марказиро бо гумони тарҳрезии ин таркиш ба ҷавобгарӣ кашиданд. Дар матбуот ва додгоҳ ба сохтакорӣ шудани он аз ҷониби мақомоти амниятии Русия ва мавриди тӯҳмату бӯҳтон қарор гирифтани худ пойфишорӣ карданд. Бархе гумонбарон ба таври мармуз ба ҳалокат расиданд.

Дар Қрим чаҳор таркиш ба вуқуъ пайвастааст

Михаил Развозжаев дар маҳалли ҳодиса.

Шаби 18-уми август дар наздикиҳои фурудгоҳи низомии Белбеки воқеъ дар минтақаи аз ҷониби Русия ишғолшудаи Қрими Украина дастикам чаҳор таркиш рух додааст.

Михаил Развозжаев, волии аз ҷониби русҳо таъиншудаи Севастопол дар саҳифааш дар Телеграмнавишт, ки нирӯҳои зиддиҳавоӣ як ҳавопаймои бесарнишинро суқут доданд. Ӯ афзуд, ки ин таркиш ҳеҷ хисороте дар пай надоштааст.

Дар худи ҳамин рӯз як мақоми рус дар шаҳри Керчи Қрим гуфт, ки нирӯҳои дифоии ҳавоии дар минтақа фаъол шудаанд. Керч дар хати шарқии Қрим ҷойгир аст ва аз ин нуқта ба қаламравҳои ҷудоиталаби шарқии Украина Русия як пули маъруфи таблиғотиашро сохта аз рӯи он роҳи оҳан ҳам бунёд кард. Мақомот мегӯянд, ки ба шаҳру пул ҳеҷ хатаре таҳдид намекунад».

Моҳи август чандин макони низомии Русия дар Қрим шоҳиди таркиш шудаанд ва дар ҳоле, ки мақомоти рус инро «иғво» меноманд, Киев расман нагуфтааст, ки дар пушти ин таркишҳо қарор дорад. Вале ба таври ғайрирасмӣ мақомоти украинӣ ба матбуоти амрикоӣ гуфтаанд, ки ин таркишҳоро низомиёни украинӣ ташкил кардаанд.

Шавкат Мирзиёев, раиси ҷумҳури Узбекистон ҳаҷҷи умра анҷом дод

Шавкат Мирзиёев.

Президенти Узбекистон Шавкат Мирзиёев дар чаҳорчӯби сафари расмӣ ба Арабистони Саудӣ маросими Ҳаҷҷи умраро адо кардааст. Дар ин бора рӯзи 19-уми август дафтари матбуоти президент хабар додааст.

Дар изҳороти расмӣ гуфта шудааст, ки Мирзиёев «мутобиқи аркони ислом либоси махсусро ба бар карда, намоз хонд, дуои талбияро ба забон оварда вориди масҷиди Ал-Ҳарам шуд».

Дар баёния омадааст, ба Мирзиёев ифтихори ворид шудан ба Каъбаи муқаддас фароҳам оварда шуд ва ӯ дар дохили он намозашро хонд: "Баъди ин ҳафт маротиба мутобиқи расми тавоф гирди Каъба чарх зада, сипас аз Сафо ва Марва зиёрат кард".

Шаш сол пеш президенти Тоҷикистон Эмомалӣ Раҳмон ҳам зимни зиёрат аз Арабистони Саудӣ дар масҷиди Ал Ҳарам намоз хонда Ҳаҷҷи умраро ба ҷо оварда буд.

Русияву Тоҷикистон вазъи Украинаро баррасӣ кардаанд

Николай Патрушев рӯзи 18-уми август бо Насрулло Маҳмудзода гуфтугу кардааст.

Ба иттилои хабаргузориҳои расмии Русия дабирони Шӯрои амнияти Русия ва Тоҷикистон мавзӯи тақвияти ҳамкориҳои низомӣ дар пасманзари фаъолшавии гурӯҳҳои террористӣ дар Афғонистонро баррасӣ кардаанд. Мулоқоти Николай Патрушев ва Насрулло Маҳмудзода рӯзи 18-уми июл дар Тошканд сурат гирифтааст.

Ҷанги бедалели Русия дар Украина ва вазъи минтақаҳои ҷудоиталаби ин кишвар низ дар меҳвари гуфтугӯҳо будааст. Хабаргузории "Интерфакс" менависад, дар мулоқот «таваҷҷӯҳи вижа ба вазъи Афғонистон ва амиқтар шудани бӯҳрони башарию иқтисодӣ ва фаъолшавии гурӯҳҳои террористӣ дар ин кишвар равона шуд». Ҷузъиёти сӯҳбатҳо дар бораи ҷанг дар Украинаро нагуфтаанд. Танҳо гуфта шудааст, ки дар мулоқот вазъ дар Украина ва Донетску Луҳанск, ки минтақаҳои ҷудоиталаби мавриди ҳимояти Маскав ба ҳисоб мераванд, баррасӣ шудааст.

Русия шарики стратегии Тоҷикистон аст ва дар хоки ин кишвар пойгоҳи низомии 201-уми он мустақар аст. Дар хабари дигари расонаҳои Русия гуфта мешавад, ки дар машқҳои низомии ахир дар ҳудуди пойгоҳ нирӯҳои мудофеаи зиддиҳавоӣ ба ҳамлаи ҳавопаймоҳои бесарнишини душмани шартӣ муқовимат нишон доданд.

Дар пойгоҳи 201-ум ҳафт ҳазор низомӣ хидмат мекунад. Бар асоси бархе хабарҳо, низомиёни ин пойгоҳ ҳам барои ширкат дар ҷанги Русия дар Украина ҷалб шудаанд.

Гузориш:"Гумонбарони нооромиҳои Қазоқистонро азоб додаанд"

Нооромиҳо моҳи январ рух дод.

Бюрои байналмилалии ҳуқуқи башари Қазоқистон 18-уми август дар Алмато дар бораи ҳуқуқи боздоштшудаҳо дар ҷараёни ҳодисаҳои январ ва баъд аз он гузориши таҳлилиеро онлайнӣ муаррифӣ кард. Тибқи гузориши бюро, 71 дарсади афроде, ки дар робита ба ҳодисаҳои моҳи январ дар Қазоқистон боздошт шудаанд, мавриди шиканҷа қарор гирифтаанд.

Мудири бюро Евгений Жовтис, ки гузоришро муаррифӣ кард гуфт, 83 дарсади вакилони дифоъ аз шиканҷа шудани шахсони зери ҳимояашон шикоят кардаанд ва дар 77 дарсади ҳолатҳо гумонбаронро муайян кардан мумкин буд. Аммо танҳо дар 18 дарсад гумонбарони шиканҷа муайян шуданд", - афзуд Жовтис.

Ба гуфтаи ӯ, то имрӯз 15 маъмури амниятии қазоқ дар шиканҷа ва усулҳои ғайриқонунии тафтишот гумонбар дониста мешавад. Теъдоди парвандаҳои ҷиноӣ пас аз шикоятҳо аз шиканҷа ба беш аз дусад расидааст. Тибқи омори расмӣ, танҳо шаш гумонбар бар асари шиканҷа ҷон додааст.

Афсари рус ронандаи таксиро баъди баҳси ҷанги Украина парондааст

Додгоҳи низомии гарнизони Ростови лаби Дони Русия як афсар аз вилояти Москваро бо гумони куштори ронандаи таксӣ барои ду моҳ ба ҳабс гирифт.

Ба иттилои хабаргузориҳои "Астра" ва "Информбюро", гумонбар капитани қисми низомии 82717 Алексей Крилови 33-сола ва ронандаи таксии кушташуда Роман Говасари 51-сола аст.

Наздикони ронанда ба хабарнигори "Астра" марги ӯро тасдиқ карданд. Ба гузориши "161.ru", капитан дар сафи нирӯҳои мушакии Русия хидмат мекард ва ба чандин “минтақаи доғ” фиристода шудааст.

Бино ба маълумоти пешакӣ, афсар 15 август дар бораи ҷанги Украина бо як ронандаи таксӣ, ки ӯро мебурд, баҳс карда, сипас аз таппончаи "Макаров" ронандаро чаҳор бор мепаронад. Ронанда дар маҳалли ҳодиса ҷон додааст.

Саудӣ дар Узбекистон бузургтарин неругоҳи бодии ҷаҳонро сохтанист

Вазорати энержии Узбекистон бо Вазорати энержӣ ва ширкатҳои Арабистони Саудӣ се созишномаи бузургро ба маблағи 12 миллиард доллари амрикоӣ ба имзо расондаастд.

Ба огаҳии Вазорати энержии Узбекистон, созишномаи аввал ба сохтмони нерӯгоҳи бодии 1,5 ГВт дар Қароқалпоқистон аз ҷониби ACWA Power рабт дорад. Он бузургтарин нерӯгоҳи бодӣ дар тамоми ҷаҳон хоҳад шуд.

Қарор аст, ин неругоҳ 1 миллиону 650 ҳазор хонаводаро бо неруи барқ таъмин кунад ва аз ихроҷи 2,4 миллион тонна партови карбон дар як сол ҷилавгирӣ кунад.

Созишномаи дувум, ки бо ширкати "ACWA Power and Air Products" имзо гаштааст, ба рушди таҳқиқу коркарди ҳидрогени сабз ва оқибатҳои истеҳсолии он дар Узбекистон равона шудааст.

Вазорати энержии Узбекистон мегӯяд, имзои ин созишномаҳо нишон медиҳанд, ки Арабистони Саудӣ мехоҳад, дар давоми 5 соли оянда дар бахши энержии кишвар 10 миллиард доллар сармоягузорӣ кунад.

Дар Русия 33 ҳазор мавриди нави СОVID сабт шудааст

Омори зиёд сабаби тавсия барои пушидани ниқоб шуд.

Дар Русия рӯзи 17-уми август 33 ҳазор мавриди сирояти бемории COVID сабт шудааст, ки омори баландтарин дар панҷ моҳи ахир аст.

Афзоиши теъдоди беморон дар ҳафтаҳои гузашта, сабаб шуд, ки мақомот ба мардум пӯшидани ниқоби тиббӣ ва гирифтани ваксинаи такрориро тавсия бидиҳанд.

Теъдоди беморони бистарӣ дар рӯзи 17-уми август бештар аз 3100 нафар будааст. Ба гуфтаи мақомоти Русия, аз замони оғози пандемияи COVID, ки соли 2020 дар ҷаҳон шуруъ шуд, дар ин кишвар 383 000 нафар ҷон додаанд.

Ба қавли мутахассисони мустақил мумкин аст, теъдоди ҷонбохтагон аз ин бемории сироятӣ чаҳор маротиба бештар аз омори расмӣ бошад.

Дар ҳамлаи Русия ба Харков 7 нафар кушта шудаанд

Вилояти Херсон

Низомиёни Украина рӯзи 18-уми август гуфтанд, ҳамлаҳои сарбозони русро дар вилояти ҷанубии Херсон баргардондаанд ва дар натиҷаи ҳамлаҳои Русия ба шаҳри Харков 7 нафар кушта ва 16 тани дигар захмӣ шудаанд.

Олег Жданов таҳлилгари низомии украинӣ, гуфт, неруҳои кишвараш талоши неруҳои Русия барои пешравӣ дар наздикии шаҳраки Билоҳирка дар шимолушарқи Херсон рафъ кардаанд.

Фармондеҳии ҳавзаи ҷанубии неруҳои Украина гуфт, дар натиҷа 29 “таҷовузгар”, мошинҳои зиреҳпӯш ва як анбори аслиҳа маҳв карда шуд. Тасдиқи ин гуфтаҳо аз дигар манобеъ имконнопазир аст. Алексей Арестович, мушовири раиси ҷумҳури Украина гуфт, неруҳои Русия дар баъзе ҳолатҳо пешравии андаке кардаанд.

Шаҳрдори Харкови Украина Игор Терехов гуфт, дар натиҷаи бархӯрдани як мушак ба бинои истиқоматие дар ноҳияи Салтовский 7 нафар, аз ҷумла як кудаки 11-сола кушта ва 16 тани дигар захмӣ шудааст.

Президенти Украина Владимир Зеленский дар Телеграм навишт, ки бино хобгоҳ буд ва ҳамларо "зишт ва таҳқиромез алайҳи мардуми осоишта" номид.

EBRD дар "сабз" шудани иқтисоди Тоҷикистон кумак мекунад

Қароргоҳи Бонки Аврупоии Бозсозӣ ва Рушд

Бонки Аврупоии Бозсозӣ ва Рушд (EBRD) эълон кард, ки барои кумак ба соҳибкорони хурд дар Тоҷикистон 6 миллион доллар кумак мекунад.

Дар баёнияи бонк аз рӯзи 18-уми август омадааст, қарзи мазкур аз тариқи муассисаи молии Имон Интернешнл дода мешавад, ки бештар аз 130 ҳазор муштарӣ ва 27 шуъба дорад.

Қарзи 6 миллион долларӣ барои рушди технологияи безарар барои муҳити зист дар Тоҷикистон будааст ва ба гуфтаи Бонки Аврупоии Бозсозӣ ва Рушд дастрасии хонаводаҳо ва тоҷирони хурдро ба технологияҳои нав беҳтар мекунад.

Бонки мазкур аз замони оғози фаъолияташ дар Тоҷикистон, дар кишвар 153 тарҳро бо арзиши бештар аз 930 миллион доллар сармоягузорӣ кардааст.

Тоҷикистону Исроил ҳамкориҳои дуҷонибаро баррасӣ кардаанд

Хайриддин Усмонзода бо ҳайати ҳукумати Исроил мулоқот кардааст.

Хайриддин Усмонзода, раиси Маркази таҳқиқоти стратегии Тоҷикистон рӯзи 17-уми август бо як ҳайати дипломатҳои Исроил ҳамкориҳои байни ду кишварро баррасӣ кардааст.

Бино ба гузориши хабаргузории давлатии “Ховар” дар ҳайати Исроил Симона Халперин, сардори раёсати кишварҳои Авруосиё ва Балкани вазорати корҳои хориҷӣ ва Михал Хершковитс, мудири бахши Осиёи Марказӣ дар вазорат ва Зеавит Бен Хилел, сафири Исроил дар Тоҷикистон шомил будаанд.

Дар мулоқот ба навиштаи “Ховар” вазъи кунунӣ ва ояндаи муносибатҳо ва тақвияти ҳамкориҳои иқтисодӣ тамаркуз кардаанд. Тоҷикистону Исроил аз соли 1992 ҳамкориҳои дипломатиро ба роҳ мондаанд ва ба гуфтаи вазорати корҳои хориҷии Тоҷикистон ҳаҷми тиҷорат дар соли 2020 тақрибан 480 ҳазор долларро ташкил додааст.

Ҳафтае пештар аз ин Сироҷиддини Муҳриддин, вазири умури хориҷии Тоҷикистон бо як ҳайати фаластинӣ ҳамкориҳои дуҷониба ва иҷрои тарҳҳои иқтисодиро баррасӣ кард.

Вазорати корҳои хориҷӣ рӯзи 12-уми феврал бо нашри як баёнияи кутоҳи расмӣ гуфт, дар ҷараёни мулоқот бо ҳайати фаластинӣ, ки онро Имод Зуҳайрӣ мудири Оҷонси ҳамкориҳои байналмилалии Давлати Фаластин раҳбарӣ мекард, “вазъи кунунии Фаластин ва минтақа, ҳамкории дуҷониба ва бисёрҷонибаро баррасӣ карданд.“

Сафири Амрико аз риояти ҳуқуқи инсон дар Бадахшон гуфтааст

Ҷон Марк Поммершайм ба ҳифзи ҳуқуқи инсон ва эҳтиром ба озодиҳои бунёдӣ таъкид кардааст.

Сафорати Иёлоти Муттаҳидаи Амрико дар Тоҷикистон дар хабарномае гуфтааст, ки сафири ин кишвар бо даъвати мақомоти тоҷик ба Вилояти Мухтори Кӯҳистони Бадахшон сафар кардааст.

Ба гуфтаи сафорат, Ҷон Марк Поммершайм дар Форуми байналмилалии соҳибкорӣ ва сармоягузории “Помир-Инвест 2022” дар Хоруғ, ки рӯзҳои 16-17-уми август баргузор шуд, ширкат кардааст. Сафири Амрико дар Тоҷикистон аз камтарин дипломатҳои кишварҳои ғарбӣ аст, ки пас аз ҳодисаҳои хунини моҳи май дар Бадахшон ба ин вилоят сафар мекунад.

Баъди тазоҳуроти олуда ба хушунат дар моҳи май дар ноҳияи Рӯшон мақомоти тоҷик эълон карданд, ки 16 нафар “узви гурӯҳи ҷиноятиро дар Бадахшон безарар кардаанд ва даҳҳо нафари дигарро боздошт кардаанд. Сокинон ва созмонҳои ҳомии ҳуқуқ мақомотро дар саркуби бераҳмонаи тазоҳургарон ва қатлу шиканҷаи бегуноҳон муттаҳам мекунад.

Дар хабарномаи сафорат гуфта мешавад, ки сафир бо тарҳҳое, ки Иёлоти Муттаҳида маблағгузорӣ мекунад, шинос шудааст. Нерӯгоҳи барқи обии Себзор, ки беш аз 600 ҳазор нафарро бо барқ таъмин мекунад, Маркази амрикоӣ дар Хоруғ ва технопарки Помир, ки садҳо нафарро ба гуфтаи сафорат, ба шуғлу касбомӯзӣ фаро гирифтааст, аз ҷумлаи чунин тарҳҳо будааст.

Дар хабарномаи сафорат ишора шудааст, ки барои расидан ба ҳадафҳо барои беҳбудӣ “рушди бемонеаи бахши тиҷорат, ҷомеаи фаъоли шаҳрвандӣ, эҳтиром ба ҳуқуқи инсон ва волоияти қонун, интернети боэътимод ва расонаҳои мустақил низ ҳаётан муҳиманд.”

Барои ин, ба гуфтаи сафорат, ҷавонон бояд “бидуни тарсу ҳарос, аз ҷумла тавассути шабакаҳои иҷтимоӣ” идеяҳои худро пешниҳод кунанд. Аз нимаи моҳи май то охири моҳи июн дар вилояти Мӯхтори Кӯҳистони Бадахшон Интернет дастнорас буд.

Дар Гурҷистон ҷорӣ кардани виза барои русҳоро талаб доранд

Беш аз 20 созмони ғайриҳукуматӣ дар Гурҷистон бо нашри як изҳороти муштарак хостори ҷорӣ кардани низоми раводид (виза) барои русҳо шуданд.

Муаллифони изҳорот гуфтаанд, вуруди густардаву беназорати сайёҳони рус ва соҳибкороне, ки барои фирор аз таҳримҳои Ғарб зидди Русия ба Гурҷистон мераванд, ба давлатдории он кишвар хатарҳоеро дар пай дорад.

Созмонҳо бо истинод ба омори расмӣ афзудаанд, ки давоми моҳҳои март ва июли имсол ҳудуди 350 ҳазор шаҳрванди Русия на танҳо ҳамчун саёҳ, балки бо мақсади кору зиндагӣ ба Гурҷистон рафтаанд. Онҳо наздики 4 ҳазор хонаро дар шаҳрҳои Тифлис ва Батумӣ соҳиб шуда, беш аз 6,5 ҳазор корхона боз кардаанд. Ҳудуди 14 ҳазор русиягӣ аллакай ҳаққи иқомат дар Гурҷистонро дарёфт кардааст.

Намояндагони созмонҳо бар инанд, ки вуруди зодагони Русия ба Гурҷистон истиқлоли ин кишварро зери хатар мегузорад. Зеро ба гуфтаи онҳо, Русия метавонад аз теъдоди зиёди русҳо, ки дар ин кишвар муқимӣ шудаанд, истифода карда, бо баҳонаи ҳифзи ҳамватанон нерӯ фиристад.

Кормандони консулгарии Туркманистон дар Истамбул фаъолонро латтукӯб карданд

Назди консулгарии Туркманистон дар Истанбул. Акс аз бойгонӣ.

Кормандони консулгарии Туркманистон дар шаҳри Истамбул фаъолони туркмани муқими Туркияро латтукӯб карданд.

Бино ба иттилои Бунёди Ҳелсинкии Туркманистон, як гуруҳ аз фаъолони туркман бо дастгирии вакилони дифоъ ва ду ҳомии ҳуқуқи турк ба консулгарии Туркманистон дар Истамбул рафта, кушиш кардаанд, ки номаи бозеро ба раисҷумҳури кишвари худ Сардор Бердимуҳаммадов расонанд.

"Вақте вакили дифоъ Гулден Сонмез ва фаъолон аз посбони консулгарӣ хоҳиш карданд, ки яке аз кормандонро барои гирифтани нома даъват кунад, онҳоро ба ҳавлии консулгарӣ роҳ доданд. Сипас 6 корманд аз бинои консулгарӣ берун шуда, фаъолонро таҳқир, дашном ва латукӯб карданд”, - навиштааст бунёд.

Ба гуфтаи масъулони бунёд, дипломатҳои туркман се зан ва ду мардро латтукӯб кардаанд.

Сӯзишвории дизелӣ дар Қирғизистон гаронтар мешавад

Қирғизистон. Акс аз бойгонӣ.

Тоҷирони нафт дар Қирғизистон гуфтанд, "маҷбур" ҳастанд, ки нархи сӯзишвории дизелиро дар он кишвар боло баранд.

Онҳо дар ҷаласае, ки Хадамоти зиддиинҳисории Қирғизистон 17 август ташкил карда буд, гуфтаанд, корхонаҳои коркарди нафти Русия содироти сӯзишвории дизелиро коҳиш дода, ҳамчунин нархи онро гаронтар кардаанд.

Ба гуфтаи тоҷирони қирғиз, корхонаҳои Русия дар як моҳи ахир нархи яклухтфурӯшии як тонна сӯзишвориро то ба 300 доллари амрикоӣ гаронтар кардаанд.

Нархи сӯзишворӣ ва равғани молиданӣ давоми 1,5 соли ахир дар Қирғизистон тақрибан ду баробар боло рафтааст. Агар дар моҳи январи соли 2021 нархи бензини навъи АИ-92 35 сом буд, ҳоло он ба ҳисоби миёна 62 сом шудааст. Як литр сӯзишвории дизелӣ дар нуқтаҳои фурӯши пойтахти Қирғизистон ба ҳисоби миёна 71,5-72 сом фурӯхта мешавад.

Дабири кулли Созмони Милал ба Украина меравад

Антонио Гутерреш

Дабири кулли Созмони Милали Муттаҳид Антонио Гутерреш ба Украина сафар мекунад ва рӯзи 18-уми август бояд бо президентони Украина ва Туркия дидору мулоқот кунад. Дар ин сафар ӯ инчунин аз соҳилҳои Баҳри Сиёҳ дидан мекунад, ки аз он ҷо содироти гандуму дигар ғалладонаи Украина аз сар гирифта шудааст.

Стефан Дуйаррич, сухангӯи СММ гуфт, ки президенти Украина Владимир Зеленский бо Гутерриш дар шаҳри Лвов, ғарби Украина мулоқот мекунад ва яке аз мавзӯъҳо баррасии вазъи амниятӣ дар неругоҳи атомии Запорожйе мешавад, ки ҳоло аз ҷониби нирӯҳои Русия ишғол шудааст. Мавзӯи эҳтимоли хатми ҷанг ҳам дар сӯҳбат бо Гутерришу Зеленский матраҳ мешавад.

Баъди нашри хабарҳо дар бораи гулӯлаборони атрофи неругоҳи атомии Запорожйе, ки азимтарин нирӯгоҳи ҳастаӣ дар Аврупо аст, Гутерриш ҳам аз хатари сар задани фоҷеа изҳори ташвиш карда буд. СММ пешниҳод кард, ки метавонад, мутахассисони Оҷонсии байналмилалии энержии ҳастаиро барои кӯмак фиристад, вале Русия нагузошт, ки коршиносони байналмилалӣ ба неругоҳ роҳ ёбанд. Зеленский рузи 16-уми август Русияро дар “терроризми ҳастаӣ” ва Маскав артиши Украинаро дар тирборони атрофи корхона айдор карданд.

Гутерриш рӯзи 20 август инчунин аз кори маркази муштараки ҳамоҳангсозӣ дар Истамбул дидан мекунад, ки масъулияти назорати ҳаракати киштиҳои гандумро аз Украина ба ӯҳда дорад. Президент Раҷаб Тайи Эрдуғон борҳо гуфтааст, ки ба унвони як кишвари узви НАТО метавонад, дар ин низои миёни ду кишвар миёнҷигӣ кунад.

Коршиноси СММ гуфт, рафтори Чин бо уйғурҳо чун "ҷиноят алайҳи башарият" аст

Як фаъоли уйғур дар назди Кохи Сафед. Акс аз 1-уми октябри соли 2020.

Як коршиноси мустақили Созмони Милали Муттаҳид мегӯяд, ҳукумати Чин уйғурҳои мусулмон ва дигар ақаллиятҳоро маҷбур мекунанд, ки дар бахши кишоварзӣ ва саноат кор кунанд ва ин амали онҳо метавонад, «ғуломдорӣ ҳамчун ҷиноят алайҳи башарият» арзёбӣ мешавад.

Муносибати табъизомези ҳукумати Чин бо мусулмонҳо, ба вижа уйғурҳо ва ба урдугоҳҳои бозтарбия ҷой кардани онҳоро Иёлоти Муттаҳидаи Амрико «наслкушӣ» номидааст ва Созмони Милал Чинро дар боздоштҳои ғайриқонунӣ ва истисмори уйғурҳо муттаҳам мекунад.

Ба иттилои вазорати корҳои хориҷии Амрико, то 2 миллион уйғуру қазоқҳо ва дигар сокинони вилояти Шинҷон, ки сокинони бумии инҷо ба шумор мераванд, дар боздошгоҳҳо ё урдугоҳҳо ҷой карда шудаанд. Чин иттиҳомҳоро рад мекунад ва мегӯяд, ки ин муассисаҳо барои пешгирӣ аз терроризму ифротгароии динӣ заруранд. Назари онҳое, ки аз ин урдугоҳҳо гузаштаанд, комилан баръакс аст ва онҳо аз фишору таҳдид ва зӯроварӣ бар асоси ангезаҳои сиёсӣ шикоят мекунанд.

Томойя Обоката, гузоришгари вижаи Созмони Милал умури ғуломдории замони муосир дар гузорише, ки 16-уми август нашр шуд, аз вуҷуди ду системаи кори маҷбурии аз ҷониби давлат роҳандозишуда дар Чин сӯҳбат мекунад. Ӯ гуфтааст, ки як низом аз дарсу коромӯзӣ дар марказҳои вижа барои ақаллиятҳои миллӣ иборат аст, ки баъдан таъмин шудан бо корро пешбинӣ мекунад ва системаи дигар барои коҳиши фақр аз роҳи ба кор сафабар кардан иборат аст ва одатан аз рӯи ин барнома кормандон аз деҳот ба минтақаҳои дигар бурда мешаванд.

Ӯ менависад: “Дар ҳоле, ки ин барномаҳо имконияти кору даромадро барои ақаллиятҳои миллӣ таъмин мекунад, гузоришгари вижа маълум кардааст, ки нишонаҳои кори маҷбурӣ дар шеваи иҷрои кор мушоҳида мешавад”. Ӯ ба муҳлати тӯлонии кор, назорати доимӣ, шароити кору зиндагии таҳқиромез ишора мекунад, ки ба навиштааш, мутобиқ ба истилоҳи “ғуломдорӣ чун ҷиноят алайҳи башарият” мебошад.

Обоката гуфтааст, ки айни низоми кор дар Тибет ҳам мавҷуд аст ва аксар вақт “кишоварзон, чӯпонҳо ва дигар коргарони саҳроиву бемаълумот ва бо маоши кам” ба ин гурӯҳ дохил мешаванд.

Моҳи май Мишел Бачелет, масъули ҳуқуқи башари Созмони Милал дар як сафари камназири шашрӯза ба Чин, аз ҷумла аз Шинҷон дидан кард. Ин сафарро Вашингтон ва дигар кишварҳо чун “сафед кардани ҷиноятҳои ҳукумати Чин” танқид карданд. Қарор аст, Бачелет пеш аз тарки мақомаш дар охири ҳамин моҳ гузоришаш аз ин сафар ба Чинро нашр кунад.

Роҳбари пешини Консули миллии исмоилиёни Тоҷикистонро бозпурсӣ кардаанд

Маркази исмоилиён дар Душанбе

Бино ба гузоришҳо, Шарофат Мамадамбарова роҳбари пешини Консули миллии исмоилиёни Тоҷикистон ба Кумитаи амнияти миллӣ барои бозпурсӣ даъват шудааст.

Дар ин бора се манбаъ рӯзи 17-уми август аз Хоруғ, маркази Вилояти Мухтори Куҳистони Бадахшон ва хориҷи кишвар ба Радиои Озодӣ хабар доданд. Мақомоти амниятӣ дар робита ба даъвати ӯ изҳори назар накардаанд. Як корманди Созмони Оғохон дар хориҷи Тоҷикистон ба Радиои Озодӣ гуфт, хонум Мамадамбарова рӯзҳои 13 ва 14-уми август ба Кумитаи амнияти миллӣ даъват шудааст, вале аз ҷузъиёти он хабар надод.

Ба қавли мусоҳиби Радиои Озодӣ, Шарофат Мамадамбарова пас аз бозпурсӣ раҳо шудааст. Хонум Мамадамбарова дар дастрас нест ва маълум нест, ки мақомот аз дар бораи чӣ пурсидаанд. Ба қавли мусоҳибони Радиои Озодӣ, Шарофат Мамадамбарова, ду бор ва се солӣ роҳбари Консули миллии исмоилиёни Тоҷикистон ва раиси пешини барномаи «Инсоншиносӣ»-и Бунёди Оғохон дар Донишгоҳи Осиёи Марказӣ будааст.

Сокинони Бадахшон мегӯянд, баъди нооромиҳои моҳи май дар Рӯшон ба пурсиш даъват шудани фаъолони мадании вилоят идома дорад. Рӯзи 29-уми июл ду фаъоли бадахшонӣ Ораз ва Рамзӣ Вазирбековҳо дар Маскав нопадид шуданд ва пас аз як рӯз дар наворе, ки шароити сабташ маълум нест, гуфтанд, бо ихтиёри худ ба Душанбе баргаштаанд, то ба суолҳои мақомот посух диҳанд. Аз овардани онҳо ду ҳафта мегузарад, вале пайвандонашон мегӯянд, аз онҳо дараке надоранд.

Раҳбари як шохаи "Барқи тоҷик" барканор шуд

Бинои ширкати "Барқи тоҷик"

Умедҷон Билолзода, директори “Шабакаҳои тақсимоти барқ”-и Тоҷикистон, аз мақомаш барканор шудааст.

Қарори барканории ӯро рӯзи 17-уми август Эмомалӣ Раҳмон, президенти Тоҷикистон, имзо кард.

Умедҷон Билолзода моҳи ноябри соли 2020 ба ин вазифа таъин шуда буд.

“Шабакаҳои тақсимоти барқ” як шохаи “Барқи тоҷик” аст, ки ду сол пеш дар пайи таҷдиди ин ниҳод таъсис ёфт.

“Барқи Тоҷик” азимтарин ширкати давлатии энергетикии кишвар аст, вале солҳои тулонист, ки аз чанги қарз раҳо намешавад.

Эмомалӣ Раҳмон муовинони нави вазири умури дохилиро таъйин кард

Эмомалӣ Раҳмон рӯзи 17-уми август бо гуруҳи кормандони нави вазорат суҳбат кардааст.

Эмомалӣ Раҳмон, раиси ҷумҳури Тоҷикистон бо судури ду қарор, Акбар Насимзода ва Абдураҳмон Муборакқадамзодаро муовинони нави вазири корҳои дохилӣ таъйин кардааст.

Қарорҳои раиси ҷумҳур дар бораи таъйиноти нав дар вебсайти расмии президент рӯзи 17-уми август нашр шуд. Акбар Насимзода то кунун дар мақомҳои гуногуни вазорат ва аз ҷумла сардори Раёсати бозрасии давлатии автомобилии Тоҷикистон як ниҳоди тобеи вазорат, кор кардааст.

Абдураҳмон Муборакқадамзода дар гузашта, сардори Раёсати корҳои дохилии вилояти Суғд будааст. Маълум нест, ин ду нафар ҷойгузини кадоме аз муовинони Рамазон Раҳимзода, вазири корҳои дохилии Тоҷикистон шудаанд. Худи Раҳимзода аз соли 2012, яъне даҳ сол ба ин сӯ сарвари Вазорати корҳои дохилии Тоҷикистон аст.

Вазорати корҳои дохилӣ дар як баёнияи расмӣ гуфт, ки Эмомалӣ Раҳмон зимни мулоқот бо ин ду муовин ва чанд нафари дигар, ки ба мақомҳои раҳбарии вазорат таъйин шудаанд, аз таъмини суботу амният, мубориза бо ҷинояткорӣ, бахусус терроризму экстремизм, қочоқи маводи мухаддир ва ғайра суҳбат кардааст.

Тазоҳургарон дар Шаҳрикурд "марг бар Раисӣ" шиор додаанд

Гирдиҳамоӣ дар назди идораи ҳукумат дар Шаҳрикурд

Садҳо нафар аз тазоҳургарон дар вилояти Чаҳормаҳол ва Бахтиёрӣ дар Эрон, ки ба зидди камобӣ дар вилоят эътироз доштанд, “марг ба Раисӣ” шиор додаанд, ки ишора ба номи раиси ҷумҳур Иброҳим Раисӣ аст.

Дар видеоҳое, ки рӯзи 16-уми август дар шабакаҳои иҷтимоӣ нашр шуд, садҳо нафар дар назди бинои ҳукумати вилоят дар маркази он Шаҳрикурд дида мешаванд. Об дар инҷо дар 10 рӯзи гузашта бисёр кам шудааст ва ба мардум фақат бо мошинҳои обкаш об тақсим мекунанд.

Неруҳои амниятӣ ҳам дар байни тазоҳургарон дида мешаванд, аммо ҳеч гузорише дар бораи зӯроварӣ нарасидааст. Агарчӣ камобӣ солҳост дар бисёре аз гӯшаҳои Эрон идома дорад, вале вилояти Чаҳормаҳол ва Бахтиёрӣ аз чанд вақт пеш аз норасоии об бештар ранҷ мекашад. Сабаб ҳам аз шабакаҳои обёрӣ ҷудо кардани чашмаи Куҳранг будааст, ки ба қавли раиси Идораи обу фозилоби вилоят дар натиҷаи сел гилолуд шудааст.

Эътизод Муқимӣ, як намояндаи вазорати энержӣ рӯзи 14-уми август гуфт, мушкилоти тасфияи об дар корхонаҳои поксозии об дар як рӯз ҳал мешавад ва хонаҳои мардум бо об таъмин мешавад. Сокинони вилоят мегӯянд, вазъ аз он рӯз тағйир наёфтааст.

Ёфтҳои бештар

XS
SM
MD
LG