Пайвандҳои дастрасӣ

Хабари нав

Хабарҳо

Бозхонди сафири Фаронса аз Маҷористон барои ҷонибдории сиёсатҳои Будапешт

Эммануэл Макрон

Президенти Фаронса Эммануэл Макрон сафири ин кишвар дар Маҷористон -Эрик Фурнеро бозхонд кард. Сафир баъд аз расонаӣ шудани мукотибаи пинҳониаш бо Макрон барканор шуд.

Номаи хидматие, ки сафир Фурне ба президент, Вазорати умури хориҷии Фаронса ва раҳбарияти сохторҳои Иттиҳоди Аврупо навишта буд, ба дасти расонаи маъруфи фаронсавӣ Mediapart расид ва 18 июн нашр шуд. Дипломат дар нома навиштааст, ки бархӯрди мақомоти Маҷористонро ба ҳалли мушкили муҳоҷират "намунавӣ" меҳисобад.

Фурне гуфтааст, маҷористониҳо мушкилеро, ки мавҷи муҳоҷирони ғайриқонунӣ дар пай доранд, пешакӣ тавонистанд дарк кунанд. Mediapart мегӯяд, сафири Фаронса дар бораи бунёди девор дар марзи Маҷористон ва қонунҳое, ки ба маъмурони ҳифзи ҳуқуқи ин кишвар иҷозат медиҳанд, муҳоҷиронро бо тирҳои резинӣ паронанд, чизе нанавиштааст.

Ҳамчунин Фурне аз тағйирот ба Конститутсияи Маҷористон ҷонибдорӣ кардааст, ки маскун кардани "миллатҳои хориҷӣ"-ро манъ карда, ниҳодҳои давлатиро вазифадор мекунад, ки "фарҳанги масеҳиёнро ҳифз кунанд".

Сафир дар номаи худ айбҳоеро, ки зидди Будапешт дар Аврупо бештар садо медиҳанд, натиҷаи "маҷорбадбинӣ" номида, ба худдорӣ аз чораҳои фишоровар зидди Маҷористон даъват кардааст.

Ҳамаи хабарҳои имрӯзро дар инҷо бихонед

Дар Минск ҳазорон нафар бо талаби истеъфои Лукашенко дигарбора ба хиёбонҳо рехтанд

Даҳҳо ҳазор нафар аз мардуми Белорус дигарбора ба хиёбонҳои шаҳри Минск рехтанд ва истеъфои Александр Лукашенкоро талаб карданд. Таҳдиди мақомот барои истифодаи аслиҳаи оташфишон ҳам монеи онҳо нашуд.

Рӯзи панҷшанбе сардори Раёсати мубориза бо ҷиноятҳои муташаккилона ва ришвахорӣ дар Белорус, тазоҳургаронро бандитҳо номид ва гуфт, ки "албатта мо ба зидди онҳо аз аслиҳа, аз ҷумла аслиҳаи оташфишон истифода мебарем ва ба шакли инсонӣ".

Хабаргузории "Интерфакс" навишт, ки дар тазоҳурот 30 ҳазор нафар ширкат кардаанд. Ба гуфтаи созмони ҳомии ҳуқуқи "Весна", бештар аз 100 нафар дастгир шудаанд.

Тазоҳуроти оммавӣ дар Белорус ҳафтаҳост, ки идома дорад, баъди аз интихоботи президентии рӯзи 9-уми август шуруъ шуд. Мақомот гуфтанд, Александр Лукашенко, ки аз соли 1994 Белорусро раҳбарӣ мекунад, 80 дарсади раъйи мардумро ба даст овардааст.

Мақомоти интизомӣ то кунун бештар аз 13 ҳазор нафар, аз ҷумла чанд фаъоли мухолифонро, ки дар кишвар монданд, дастгир кардаанд. Светлана Тихановская, пешвои мухолифон, ки ба Литва гурехт, аз Лукашенко хостааст, ки то 25-уми октябр истеъфо бидиҳад, дар акси ҳол мардум ба коршикании оммавӣ оғоз мекунанд.

Мирзиёев ба як рӯзноманигори мунтақид хона тӯҳфа кард

Бобомурод Абдуллоев, рӯзноманигори узбекистонӣ.

Бобомурод Абдуллоев, рӯзноманигори узбекистонӣ, ки чанде пеш аз шаҳри Бишкеки Қирғизистон ба Тошканд истирдод шуд, аз номи президенти Узбекистон Шавкат Мирзиёев хонаи сеҳуҷрагӣ тақдим карданд. Дар ин бора Абдуллоев дар саҳифаи Фейсбук рӯзи 18 октябр хабар дод.

"Рӯзи 8 сентябри соли ҷорӣ президенти Узбекистон Шавкат Мирзиёев ба ман хонаи нави сеҳуҷраӣ бо ҳамаи ҷиҳозаш дар маҷмаии истиқоматии "Green Park"-и шаҳри Тошканд тақдим кард. Мо рӯзи 5 октябр ба ин хона кӯчидем. Алҳамдулиллоҳ! Сипос ба президент Шавкат Мирзиёев! Худо аз вай розӣ бошад!", - навишт рӯзноманигор.

Бобомурод Абдуллоевро ибтидои моҳи августи соли ҷорӣ дар шаҳри Бишкеки Қирғизистон боздошт ва рӯзи 22 август ба Узбекистон истирдод карданд.

Вай рӯзи 22 август баъди бозпурсии ҳаштсоата аз сӯи мақомоти Узбекистон дар шаҳри Тошканд, озод шуд.

Мақомоти Узбекистон расман хабар надоданд, ки Абдуллоевро дар робита ба кадом парванда бозпурсӣ кардаанд.

Худи рӯзноманигор ҳанӯз дар шаҳри Бишкек гуфта буд, ки ӯро дар навиштани мақолаҳои зиддиҳукуматӣ бо имзои мустаори "Қора Мерган" айбдор мекунанд.

Абдуллоев ин айбро рад карда буд.

Ин рӯзноманигор дар соли 2017 бори аввал бо гумони сарнагун сохтани сохти конститутсионии Узбекистон боздошт ва моҳи майи соли 2018 озод шуда буд.

Пешниҳоди ҷамъоварии маблағ аз мардум дар Қирғизистон барои пардохти қарзи Чин

Акс аз бойгонӣ.

Дар Қирғизистон пешниҳод доранд, ки барои пардохти қарзи давлатӣ аз Чин маъракаи ҷамъоварии маблағ аз сокинон роҳандозӣ шавад. Дар ин бора рӯзи 18 октябр вакили порлумони Қирғизистон Айнура Олтибоева хабар дод.

"Мо шароит фароҳам меоварем, ки ин раванд шуруъ ва идома пайдо кунад. Ҳоло чорабиниҳои омодагӣ идома доранд, шароити таъсиси суратҳисоби бонкӣ ҳал шудааст. Баъди гуфтугӯ бо вазорати молия масъалаи кушодани суратҳисобро ҳал мекунем. Раванди ҷамъоварии маблағ шаффоф хоҳад буд", - гуфт Олтинбоева.

Моҳи сентябри соли ҷорӣ вазири корҳои хориҷии Чин Ван И ба Қирғизистон омада буд. Вай бо президенти пешини Қирғизистон Сооронбой Ҷеенбеков аз ҷумла дар мавзуи тамдиди муҳлати баргардонии қарзҳои Чин суҳбат кард.

Ба иттилои расмӣ, қарзи хориҷии Қирғизистон 4 миллиарду 169,6 миллион долларро ташкил медиҳад. Аз ин миқдор 1 млрд 776,29 млн доллар аз Чин аст.

Варзишкорони қазоқ бинобар КОВИД-19 аз сафарҳои хориҷӣ маҳрум шуданд

Акс аз бойгонӣ.

Вазорати тандурустии Қазоқистон ба далели густариши коронавирус варзишкорони кишварро аз сафар ба хориҷ маҳрум кард.

"Дар робита ба болоравии омори беморӣ дар саросари дунё, бо ҳадафи назорати ҷиддии марзҳо ба варзишкорон иҷозат дода намешавад, ки дар мусобиқаҳо ширкат кунанд. Ҳамзамон парвозҳо бо Украина, Имороти Муттаҳидаи Арабӣ, Олмон ва Белорус кам карда шаванд",-омадааст дар хабари Вазорати тандурустии Қазоқистон.

Тими мунтахаби футболи Қазоқистон, бошгоҳи баскетболи "Остона" ва бошгоҳи хоккейи "Барис" тибқи ҷадвали аз қабл муайншуда мусобиқа доранд. Эҳтимол дорад, ки ба сафари ин тимҳо ба таври истисно иҷозат дода шавад.

Бино ба иттилои мақомоти он кишвар, рӯзи 18 октябр 102 ҳолати мубталошавӣ ба коронавирус сабт гардида, ба ин тартиб шумораи умумии мубталоён дар он кишвар ба 109 ҳазору 508 кас расидааст.

Муаллифи смайлики "Чашмони Назарбоев" дар Алмато кушта шуд

"Смайлик" бо акси Нурсултон Назарбоев.

Дар шаҳри Алмато Собит Сирахон (Bisen), тарроҳ ва муаллифи "смайлик" бо акси президенти нахустини Қазоқистон Нурсултон Назарбоев дар натиҷаи латтукӯби шадид ҷон бохт.

Дар ин бора дӯстони тарроҳ дар шабакаҳои иҷтимоӣ хабар доданд. "Ноодамон дӯсти маро зери мушту лагад қарор дода, ягон узвашро солим нагузоштаанд. Ӯро аз пойафзолҳояш шинохтем",-навиштааст рэпер Бекболат Кайдаров дар Инстаграм.

Департаменти пулиси Алмато рӯзи душанбе хабар дод, ки дар робита ба куштори тарроҳ бародари дӯстдухтари Сирахон дастгир шудааст. Гумонбар ҳангоми бозпурсӣ эътироф кардааст, ки "ҳарифашро ба хотири муносибатҳои номуносиб" латтукӯб кард.

Ба иттилои пулис, гумонбар боздошт ва ба ҳабси пешакӣ гирифта шудааст.

Яке аз корҳои маъруфи Сирахон логотипи "Чашмони Назарбоев", истинод ба Нурсултон Назарбоев мебошад. Сирахонро ҳамчунин тарроҳи бренди маъруфи "streetwear" меноманд.

Кумитаи амнияти Қирғизистон 40 "шарик"-и Матраимовро муайян кардааст

Райимбек Матраимов.

Кумитаи давлатии амнияти миллии Қирғизистон мегӯяд, тафтиши парвандаи фасодкорӣ дар Хадамоти гумруки ин кишвар аз сӯи муовини раиси пешини хадамот Райимбек Матраимов ва мансабдорони дигар идома дорад.

Ба огаҳии кумита, тафтишот шахсияти 40 нафареро муайян кардааст, ки бо Матраимов робита ва дар нақшаи фасодкории ӯ даст доштаанд.

"Дар ҳоли ҳозир маҳалли будубоши ин шахсон маълум аст. Корҳо дар самти муайянсозии даст доштанашон дар нақшаи мазкури фасодкорӣ фаъолона идома доранд",-афзудааст кумита.

Ҳамчунин гуфта мешавад, дар доираи парвандаи фасодкорӣ дар Хадамоти гумруки Қирғизистон ҳаҷми хисороти расида ба давлат низ муайян карда хоҳад шуд.

Кумитаи давлатии амнияти Қирғизистон аз оғози тафтиши фасодкорӣ дар Хадамоти гумруки ин кишвар 17 октябри соли равон хабар дода буд. Ба гуфтаи масъулони кумита, дар Хадамоти гумруки Қирғизистон аз соли 2016 то ба ҳол бо иштироки Райимбек Матраимов ва мансабдорони масъули гузаргоҳҳои марзӣ нақшаи фасодкорие амал мекунад.

Номи Райим Матраимов, ки бо лақаби "Раим миллион" низ маъруф аст, дар силсила таҳқиқотҳои рӯзноманигорӣ зикр шудааст. Ба навиштаи расонаҳо, хонаводаи Матраимовҳо дар чанд соли охир зиёда аз 700 миллион долларро "ғайриқонунӣ" аз Қирғизистон ба хориҷ бурдааст.

Сафари Доктор Абдулло ба Эрон

Теҳрон, 18-уми октябр. Мулоқот Абдулло Абдулло бо вазири хориҷаи Эрон Ҷавод Зариф

Абдулло Абдулло, раҳбари ҳайати музокиротии Афғонистон рӯзи 18-уми октябр ба Эрони ҳамсоя сафар кард, то давоми се рӯз бо мақомоти эронӣ дидору гуфтугӯ анҷом диҳад. Ин дар ҳолест, ки дар шаҳри Давҳаи Қатар музокироти сулҳи ҳукумати Афғонистон ва раҳбарияти гурӯҳи шӯришии Толибон идома дорад ва ҷонибҳо то ҳол дар масъалаи сохтори музокираҳое, ки ҳадафаш хатми ҷангҳои 19-солаи Афғонистон аст, ба мувофиқа даст наёфтаанд. Эрон бозигари муҳими минтақавӣ ба шумор меравад. Доктор Абдулло дар Твиттераш навишт, ки дар мулоқот бо мақомоти эронӣ роҷеъ ба сулҳи Афғонистон ва дигар масоили марбут ба ҳамкориҳои дарозмуддати дуҷониба сӯҳбат мекунад. Рӯзи 18-уми октябр расонаҳо аз мулоқоти ӯ бо вазири хориҷаи Эрон Ҷавод Зариф хабар доданд.

Қабл аз ин ӯ бо айни чунин барнома дар Покистон буд. Муносибатҳои Эрони ғолибан шиамазҳаб бо гурӯҳи шӯришии аксар аъзояш суннимазҳаби Толибон печида аст. Эрон расман бо Толибон дар ихтилоф аст, вале коршиносон мегӯянд, ки Теҳрон ба ҷангиён ва гурӯҳҳои ҷудоиталаби дохили ин гурӯҳ кӯмакҳои муайяни низомӣ мекунад.

Тадбирҳои бештари полиси Фаронса баъди қатли як омӯзгор

Мардум дар сӯги омӯзгори кушташуда дар пушти дари мактаб ҷамъ шудаанд

Мақомоти Фаронса гуфтанд, ки баъди қатли як омӯзгори маҳаллӣ бо дасти як тундрави исломӣ тадбирҳои бештари амниятиро рӯидаст гирифтааст. Омӯзгори таърих Самуэл Пати рӯзи 16-уми октябр дар беруни мактабе, ки кор мекард, сар бурида шуд. Ин корро ҷавони 18-солае анҷом дод, ки дар паи таъқиби полис ба қатл расид. Ҳамлагар як ҷавон чечентабори дар Русия таваллудшуда буд, ки дар шаҳри Эврёи шимолуғарби Париж зиндагӣ мекард. Исми ӯ аз ин пеш ба ходимони амният ошно набуд. Куштори омӯзгор мавриди эътирози бисёр сокинони Фаронса ва маҳкумияти президент Эммануэл Макрону раҳбарони ҳизбҳои сиёсӣ шуд. Вазири умури дохилӣ Жерал Дарманин рӯзи 19-уми октябр гуфт, ки ҳоло тахминан 80 тафтише ба роҳ монда шудааст, ки бадгӯӣ дар Фаронсаро таҳқиқ мекунад. Дарманин инчунин гуфт, ки мақомот ин масъаларо баррасӣ доранд, ки барои таблиғи хушунату бадбинӣ дар Фаронса шояд бархе гурӯҳҳои ҷомеаи мусалмонӣ баста шаванд. Дарманин гуфт, ки падари як хонандаи мактаб ва як ҷангҷӯи исломӣ қатли Патиро тақозо карда буданд. Куштори муаллим Фаронсаро такон дод ва ба ёди ҳамлаи панҷ сол пеш ба идораи маҷаллаи ҳаҷвии “Шарли Эбдо” бурд, ки карикатураҳои Муҳаммад Пайғамбарро нашр карда буд.

Занозании дипломатҳои чиниву тайванӣ дар Фиҷи

Харитаи Тайван

Вазорати хориҷаи Тайван бо нашри изҳороте рӯзи 19-уми октябр гуфт, ки дар маросими таҷлил аз Рӯзи миллии Тайван дар кишвари Фиҷи миёни дипломатҳои чинӣ ва кормандони ҳукумати Тайван як занозанӣ рух дод. Ҷоанн Оу, сухангӯи вазорати хориҷаи Тайван дар як изҳороти хаттиаш гуфт, “вазорати хориҷа кори кормандони сафорати Чин дар Фиҷиро ба шиддат маҳкум мекунад, чун рафтори онҳо бо қонун ва меъёрҳои рафтори маданӣ дар ихтилоф аст”. Пекин дар талоши ин аст, ки ҳукуматҳои дигар кишварҳоро водор бикунад, ки аз Тайван дурӣ биҷӯянд. Баъди як ҷанги шаҳрвандии соли 1949 ҷазираи Тайван аз Чин ҷудо шуд, вале Чин инро эътироф намекунад. Ахиран Чин ба наздикиҳои ҷазираи демократии Тайван ҳавопаймоҳои ҷангии худро фиристод. Вазорат гуфт, ки ҳодисаи заноназанӣ шоми 8-уми октябр дар маросими ташкилкардаи намояндагии расмии Тайван дар пойтахти Фиҷи – шаҳри Сува рӯй дод. Ду дипломати чинӣ талош карданд, ки аз меҳмонҳои ҷамъшуда аксу маълумот ҷамъоварӣ кунанд. Ба ин маърака инчунин бархе сиёсатмадорон ҳам даъват шуда буданд. Вале вақте дипломатҳои тайванӣ талош карданд онҳоро аз ворид шудан ба меҳмонгоҳ пешгирӣ кунанд, хушунат бархост. Дар натиҷа, як дипломати тайванӣ бо ҷароҳатҳои сар ба беморхона интиқол ёфт. Полиси Фиҷи дипломатҳои чиниро аз маърака берун кард.

Эътирози зидди маҳдудиятҳои марбут ба пандемия дар Прага

Майдони Шаҳри Кӯҳнаи Прага рӯзи 18-уми октябр ба макони бархӯрди эътирозгарон бо полис табдил шуд

Маҳдудиятҳои нав дар паи нигаронӣ аз паҳншавии бештари коронавирус боиси як задухӯрди ҳаводорони варзиш дар Прага ва полиси маҳаллӣ шуд. Рӯзи 18-уми октябр дар Прага 2 ҳазор ҳаводори футбол ва ҳоккей дар раҳпаймоии эътирозӣ алайҳи ҷоришавии маҳдудиятҳои нави дуҳафтаинаи марбут ба пандемия ҷамъ шуданд. Маҳдудиятҳо маъракаҳои варзишии байналмилалиро сарфи назар мекунад. Дар маркази шаҳри Прага эътирозгарон ба сӯи полис шишаву дигар мавод партофтанд ва дар ниҳоят полис барои пароканда кардани эътирозгарон аз маркази шаҳр аз бобмаҳои дудзо, оташафрӯз ва лӯлаҳои об истифода кард. Дар ин ҳодиса чанд нафар, аз ҷумла ходимони полис маҷрӯҳ шуданд. Полис гуфт, ки эътирози серҷамъият муқаррароти маҳдудкунандаи давраи пандемияро нақз мекунад, чун дар як ҷо дар хиёбон ҷамъ шудани беш аз 500 нафар манъ аст. Дар Ҷумҳурии Чех мисли дигар нуқоти Аврупо ҳодисаҳои олудашавии рӯзона ба коронавирус дар ҳоли афзоиш аст.

Дар Аврупо омори марги инсонҳо аз COVID-19 аз 250 ҳазор гузашт

Фаронса. Кӯдакон пеш аз ворид шудан ба синфхона дастонашонро мешӯянд

Рӯзи 18-уми октябр шумори афроди бар асари вируси нав даргузашта дар саросари Аврупо аз 250 ҳазор нафар гузашт. Дар ин қора дар ҳафтаҳои охир ҳодисаҳои ошкоршавии ҳодисаҳои нави гирифторӣ ба вирус якбора афзоиш ёфтааст. Айни замон, дар Исроилу Австралия мақомот аз сабуктар шудани маҳдудиятҳо ва коҳиши суръати гирифторшавиҳои нав ба коронавирус хабар медиҳанд. Дар Аврупо афзоиши ҳодисаҳои нави гирифторӣ дар як ҳафтаи охир 44 дарсадро ташкил дода, бархе кишварҳоро водор кардааст, ки маҳдудиятҳои нав ҷорӣ кунанд.

Дар Амрикои Шимоливу Ҷанубӣ ҳам мубориза бар зидди коронавирус шиддат гирифтааст. Дар ИМА рӯзи 17-уми октябр 52 ҳазор ҳодисаи нави олудагӣ ба қайд гирифта шуд ва ин дар қиёс бо 2 ҳафтаи аз ин пеш 28 дарсад бештар будааст. Ҳодисаҳои фавт 679 адад бештар шуда, ба 220 ҳазор нафар наздик мешавад. Дар Бразилия вазири беҳдошташ рӯзи 17-уми октябр гузориш дод, ки дар 24 соати гузашта беш аз 24 ҳазор ҳодисаи нави олудагӣ ва 461 ҳодисаи марг бар асари COVID-19 ба қайд гирифта шудааст. Дар Исроил дар паи маҳдудиятҳои бисёр сахту сангин, аз ҷумла манъи ҳақи сафар дар фосилаи беш аз 1 км аз хона тавонистанд дар ҷилавгирии бештар аз паҳншавии беморӣ муваффақ шаванд.

Халилзод гуфт, хушунатҳои идомаёбанда созиши сулҳро бо хатар рӯбарӯ мекунад

Залмай Халилзод, фиристодаи ИМА барои Афғонистон

Залмай Халилзод, фиристодаи хоси Амрико барои Афғонистон рӯзи 18-уми октябр гуфт, ки идомаи ҳамлаву хунрезӣ метавонад музокироти сулҳ дар кишварро аз роҳаш берун кунад. Ӯ дар ин бора баъд аз бомбгузории маргбор дар шаҳри Ғур суҳбат кард, ки дар натиҷаи он 14 нафар кушта шуданд. Айни замон намояндагони ҳукумати Афғонистон ва Толибон дар Қатар барои поён додан ба ҷанги 19-сола дар кишвар гуфтугӯ доранд. Залмай Халилзод дар Твиттер навишт, ки хушунат муддатҳои дароз афғонҳоро думболагирӣ кардааст ва фоҷиа дар Ғур, ки дар назди қароргоҳи пулис сурат гирифт, яке аз намунаҳои нави он аст. Ӯ ҳушдор додааст, ки боварӣ ба он ки бо зӯроварӣ касе метавонад тарафи дигарро ба гузашт водор кунад, “бисёр хатарнок” аст, зеро ба қавли Залмай Халилзод, раҳбарони Афғонистон дар гузашта бо ҳамин бовар хато кардаанд. Дипломати амрикоӣ хост, тамоми муқаррароти созише, ки қабл аз оғози музокироти сулҳ дар Қатар ба имзо расид, риоят шавад. Рӯзи 18-уми октябр дар натиҷаи таркиши бомб дар шаҳри Фирӯкуҳ, маркази вилояти Ғур 14 нафар кушта шуданд ва 119 тани дигар ҷароҳат бардоштанд. Раиси вилоят гуфт, ки бомбгузорӣ кори дасти Толибон аст.

Навалний гуфт, бо вуҷуди мухолифати мақомот, ба Русия бармегардад

Алексей Навалний. Акс аз шабакаҳои иҷтимоӣ

Алексей Навалний, пешвои мухолифони Русия мегӯяд, ҳукумат ҳаматарафа саъй дорад, монеи бозгашташ ба Маскав шавад, вале бо ин вуҷуд ӯ бархоҳад гашт. Алексей Навалний дар як суҳбате бо телевизиони Си Би Эс-и Амрико, ки рӯзи 18-уми октябр нашр шуд, гуфт, азм дорад, баъд аз чанд моҳ ба Русия баргардад ва кори нотамомашро идома бидиҳад. Ӯ дар шаҳри Берлин бо Си Би Эс суҳбат кардааст, ки онҷо баъди заҳролуд шуданаш аз моддаи кимиёвии кушанда аз гуруҳи "Новичок" муолиҷа мегирифт. Алексей Навалний, ки моҳи август дар дохили ҳавопаймо бемор шуд, иддао дорад, ки заҳролуд карданаш кори дасти мақомоти Маскав аст. Ӯ мегӯяд, ки ҳар рӯз барои дармон ба шифохона меравад ва ҳанӯз ҳам эҳсоси карахтӣ дорад. Алексей Навалнийро рӯзи 22-уми сентябр баъди 32 рӯзи муолиҷа аз шифохонае дар Берлин ҷавоб доданд. Ӯ дар мусоҳибааш мегӯяд, ки баъди даст расондан ба зарфи пластикии об заҳролуд шудааст. Ба қавли Навалний, заҳри қотил на дар дохили оби нӯшиданӣ, балки дар бадани худи зарфи он будааст.

Эътирозҳои Беларус бо вуҷуди таҳдид ба саркӯби хунин идома ёфт

18-уми октябр, Минск

Дар шаҳри Минск бо вуҷуди таҳдиди вазорати умури дохилӣ ба истифодаи нирӯи сангин алайҳи эътирозгарон даҳҳо ҳазор сокини Беларус бо талаби истеъфои Александр Лукашенко раҳпаймоӣ намуданд. Мақомот дар пойтахт мошинҳои низомиву обпошҳоро ҷойгир карданд, вале дар эътирозҳои 18-уми октябр боз ҳам полис аз истифодаи ин васоил барои пароканда кардани эътирозгарон худдорӣ намуд. Гурӯҳи ҳомии ҳуқуқи “Весна” гузориш дод, ки рӯзи якшанбе дар Минск дастикам 200 нафар ва дар шаҳрҳои дигар беш аз 30 нафар дастгир шудааст. Як рӯз пеш аз эътирозҳо муовини аввали вазири дохилӣ Геннадий Казакевич таҳдид кард, ки “агар зарур буд”, барои пароканда кардани эътирозгарон “аз силоҳҳои марговар” ҳам истифода хоҳад шуд. Мақомот эътирозҳоро ғайриқонунӣ меноманд. Ин аввалин бор аст, ки мақомот дар Беларус ба истифодаи силоҳ алайҳи эътирозгарон таҳдид мекунанд. Баъди дар интихоботи президентии 9-уми август пирӯз эълон шудани Александр Лукашенко, ки аз соли 1994 сари қудрат аст, мардум дар Беларус пайваста эътироз мекунанд.

Оҳангсози тоҷик Диловари Зуҳуриён дар садамаи нақлиётӣ ба ҳалокат расид

Диловари Зуҳуриён дар пайи як садамаи автомобилӣ даргузашт.

Диловари Зуҳуриён, оҳангсози тоҷик шаби гузашта дар пай як садамаи нақлиётӣ ҷон бохт. Аз Дафтари матбуоти Вазорати умури дохилии Тоҷикистон ба Радиои Озодӣ гуфтанд, ки садама соати 24:30 дақиқа дар шоҳроҳи Данғара-Ваҳдат дар деҳаи Чиртак рух додааст.

Ба иттилои манбаъ, оҳангсози тоҷик бо автомашинаи тамғаи "Мерседрс"-и худ муқобили самти ҳаракат баромада, ба як боркаши "Чакман" бархӯрдааст. Манбаъ мегӯяд, ӯ ва як мусофираш дар ҷои ҳодиса ба ҳалокат расидаанд. "Аз автомашинаи боркаш касе зарар надидааст",-афзуд манбаъ.

Ба гуфтаи Шоираи Раҳимҷон, шоира ва таронанависи тоҷик, маросими видоъ бо ин оҳангсоз дар зодгоҳаш ноҳияи Данғара баргузор шуд. Як манбаи дигар гуфт, Диловари Зуҳуриён як рӯз пеш аз ин ҳодиса, барои бори дуввум издивоҷ кардааст.

Дар шабакаҳои иҷтимоӣ аз Диловари Зуҳуриён як оҳангсозӣ касбӣ ном бурдаанд. Баъзе аз дӯстонаш марги ӯро талафоти бузург барои санъати эстрадаи кишвар арзёбӣ намуданд.

Чанде аз оҳангҳои бо тозагӣ эҷоднамудаи ин ҳунарманд то ҳанӯз пешкаши мухлисонаш нашудааст. Сафаргул Юсуфова, сарояндаи тоҷик дар сӯҳбат ба Радиои Озодӣ гуфт, Диловар барои ӯ чаҳор оҳанг навишта буд, ки ҳанӯз дастрасӣ мардум нашудааст. Ба қавли ӯ, яке аз ин оҳангҳо дар мавриди аз ғаму ғуссаи таъсири пандемияи коронавирус берун овардани мардум аст.

"Ду оҳанги дигараш дар мавзӯи баҳор ва яке дигар оҳанги ошиқона мебошад. Ташвиши хонадоршавияш имкон надод, ки ин оҳангҳо ба пуррагӣ ба анҷом расанд. Танзим шудаанд, вале сабти овоз мондааст, умедворем ба наздикӣ пурра омода шуда, пешкаши мардум мегарданд".

Баъзе огоҳони санъати тоҷик бар ин назаранд, ки Диловари Зуҳуриён бо фарқ аз оҳангсозони дигар вижагиҳои худро дошт ва ҳунари ӯ барои ҳамеша дар қалби мухлисонаш мемонад.

Қурбоналӣ Абдуллоев, сарояндаи дигари тоҷик дар сӯҳбат ба Радиои Озодӣ гуфт, Диловари Зуҳуриён бисёр ҷавони эҳсосотӣ ва ҳунарманди хуб буд. Абдуллоев афзуд, соли 2000-ум вақте ки Диловар ба саҳнаи калони санъати тоҷик қадам гузошт, як навоварию тозагие ба ҳамроҳаш овард.

"Қариб бо ҳамаи ҳунармандон ҳамкорӣ дошт, аз ҷумла бо ман низ. Ӯ бисёр мутриби олӣ буд ва ҳангоми фаҳмонидани ҳунарманд, овозхон бисёр серталаб буд, то дараҷаи комил нозукиҳои корашро медонист. Ӯ худ дар баробари оҳангсоз будан, хонандаи хуб ҳам буд. Фикр мекунам марги ӯ як зарбаи қавӣ ба санъати имрӯзи мо аст”.

Исми Диловари Зуҳуриёни 46-сола ҳанӯз аз солҳои 2000-ум бо оҳангҳои маъруфе, ки барои Манижа Давлатова, Садриддин Наҷмиддин ва дигар овозхонони номдори тоҷик навиштааст, шинохта шуд.

Вай муаллифи оҳангҳои маъруфи "Дили дардманд", "То ҳастаму ту ҳастӣ"-и Манижаи Давлат, таронаи "Модар" ва "Гӯшаи бом"-и Сироҷиддини Фозил аст. Худаш дар як мусоҳибаи имсолаш гуфта буд, ки тақрибан 500 оҳанг эҷод кардааст. Диловари Зуҳуриён чанд моҳи ахир ба ҳайси оҳангсози дастаҳои ҳунарии Кумитаи телевизион ва радио фаъолият мекард.

Ду "фирорӣ аз Чин" дар Қазоқистон паноҳандагӣ дарёфт карданд

Кастер Мусохонулӣ ва Мурагер Олимулӣ, ду қазоқтабор аз Чин.

Ду қазоқтабори чинӣ - Кастер Мусохонулӣ ва Мурагер Олимулӣ барои як сол дар Қазоқистон паноҳандагӣ пайдо карданд. Дар ин бора вакили мудофеи онҳо Абдулло Бакберген хабар дод. Ин ду қазоқтабор нахустин фирориёни чинӣ ҳастанд, ки дар Қазоқистон расман паноҳандагӣ дарёфт кардаанд.

Мусохонулӣ ва Олимулӣ моҳи октябри соли 2019 аз Шинҷони Чин фирор ва бо убури марз вориди Қазоқистон шуданд. Ба маҳзи ворид шудан ба Қазоқистон, онҳо нишасти хабарӣ баргузор ва сабабҳои фирорашон аз Чинро нақл карданд. Ба гуфтаи Мусохонулӣ ва Олимулӣ, мақомоти Чин уйғурҳо, қазоқтаборон ва дигар мардуми бумии Шинҷонро, ки асосан пайрави ислом ҳастанд, таъқиб мекунанд.

Мақомоти Қазоқистон ин ду фирориро боздошт ва барои убури ғайриқонунии марз яксолӣ зиндон кард. Додгоҳ онҳоро ба Чин истирдод накард. Охири моҳи июн баъди бештар аз ҳашт моҳи ҳабс ду қазоқтабори фирорӣ аз зиндон озод шуданд.

Чин ба хотири нигаҳдории иҷбории беш аз як миллион уйғур, қазоқтабор ва намояндаи ақалиятҳои дигари мусулмон дар "марказҳои бозтарбия"-и Шинҷон аз соли 2017 ба ин сӯ мавриди интиқоди ҷомеаи байналмилалӣ қарор дорад. Худи Пекин иттиҳомро рад карда, урдугоҳҳоро "марказҳои омӯзишӣ"-е меномад, ки гӯё ба хотири мубориза бо терроризму экстремизм таъсис дода шудаанд.

Фавти маҳбусон дар зиндони занонаи Туркманистон

Яке аз зиндонҳо дар ғарби Туркманистон. Акс аз бойгонӣ.

Дар зиндони занонаи Туркманистон давоми рӯзҳои ахир чанд маҳбус фавтидааст. Як манбаъ 16 октябр гуфт, маҳбусон бар асари коронавирус фавтидаанд.

Наздикони се маҳбуси зиндони занонаи вилояти Дашоғуз, ки бо Узбекистон ҳаммарз аст, фавти пайвандони худро дар суҳбат бо бахши туркмании Радиои Озодӣ тасдиқ карданд.

Ба гуфтаи ҳамсуҳбатони мо, мақомот ҷасади маҳбусонро ба наздиконашон надодаанд.

Як манбаи огаҳ аз қазия гуфт, шумораи мубталоён дар зиндон "хеле зиёд" буд. Ба гуфтаи ӯ, дар ҳудуди зиндон макони махсус барои карантин ташкил шуда, дар он беш аз 200 маҳбус нигаҳдорӣ мешуд ва баъзе аз онҳо дар ҳолати вазнин буданд.

"Ин вазъ аввалҳои моҳи сентябр рух дод. Вале раҳбарияти зиндон зоҳиран мехост, онро пинҳон кунад. Вале вақте вазъ мушкилтару мақомоти болоӣ аз он огаҳ шуданд, ба зиндон дастгоҳҳои озмоишиву ташхисӣ оварданд. Дар натиҷа маълум шуд, ки вирус ба шуши садҳо маҳбус сироят кардааст",-изҳор дошт як манбаъ ба шарти ифшо нашудани номаш.

Ин дар ҳолест, ки мақомоти Туркманистон ҳанӯз ҳам ба мавҷуд набудани коронавирус дар ин кишвар исрор мекунанд.

Дар Қирғизистон шумораи мубталоён ба COVID-19 якбора афзоиш ёфт

Қирғизистон. Акс аз бойгонӣ.

Дар Қирғизистон давоми як рӯзи ахир 554 ҳолати нави мубталошавӣ ба коронавирус ё COVID-19 ба қайд гирифта шудааст. Шумораи умумии мубталоён дар ин кишвар ба 52 044 расид.

Ба огаҳии Ситоди ҷумҳуриявии мубориза бо коронавирус дар Қирғизистон, давоми рӯзҳои ахир шумораи нави мубталоён ду баробар зиёд шудааст. Рӯзи 12 октябр 298 ҳолат ошкор карда шуда буд.

Ба ҳисоби ситод, 12 октябр 298 ҳолат, 13 октябр 343 ҳолат, 14 октябр 330 ҳолат, 15 октябр 388 ҳолат, 16 октябр 431 ҳолат, 17 октябр 470 ҳолат ва 18 октябр 554 ҳолати нави мубталошавӣ ба вирус ошкор шудааст.

Дар давоми як рӯзи ахир се ҳолати фавт бар асари вирус дар вилоятҳои Ӯшу Норин ва шаҳри Бишкек қайд гаштааст. Дар маҷмӯъ дар ин кишвар 1 111 кас аз коронавирус фавтидааст.

Собянин: Шумораи муҳоҷирон дар Москва 40 дарсад кам шудааст

Сергей Собянин, шаҳрдори Маскав.

Шаҳрдори Москва Сергей Собянин гуфт, шумораи муҳоҷирони корӣ дар пойтахти Русия 40 дарсад коҳиш ёфтааст. Бинобар ин, мақомоти Москва одамонро барои кор аз дигар минтақаҳои Русия ҷалб мекунанд.

Ба гуфтаи Собянин, "на ҳама москвагиҳо омодаанд, ки дар даст белу ҷорӯб" гиранд.

Шаҳрдори Москва пештар гуфта буд, ки коҳиши шумораи муҳоҷирон ба пандемияи коронавирус ва баста шудани марзҳо рабт дорад. Ӯ ҳушдор дода буд, ки "мушкилиҳо пеш хоҳад омад".

"Москва дар фасли сармо гуруҳҳои иловагиро барои корҳои дастӣ муваққатан ҷалб мекард",-изҳор дошт.

Шаҳрдории Москва аз норасоии кормандон дар сохтмонҳои шаҳр низ хабар дод. "Марзҳо бо кишварҳое баста шудаанд, ки сохтмонҳои Москваро бо нерӯи кории кофӣ таъмин мекарданд. Мутаассифона бинокорони рус наметавонанд ҷойи онҳоро пур кунанд. Дар ҳоли ҳозир дар сохтмонҳои шаҳр даҳҳо ҳазор коргар намерасад", - афзуд ӯ.

Мухолифони Покистон ваъдаи сарнагунии Имрон Хонро додаанд

Эътирози мухолифин дар Покистон

Раҳбарони мухолифин дар Покистон ваъда додаанд, ки ҳукумати сарвазир Имрон Хонро сарнагун мекунанд.

Ин ваъда дар як тазоҳуроте садо дод, ки аз ҷониби Ҷунбиши демократии Покистон ташкил шудааст ва ба он нӯҳ ҳизби сиёсӣ низ шомил шудаанд.

Навоз Шариф, сарвазири собиқ ва раҳбари ҳизби Лигаи мусалмонони Покистон, ки дар Бритониё қарор дорад, онлайнӣ дар ин тазоҳурот суханронӣ кард.

Нисбати ӯ дар Покистон парвандаи ҷиноӣ боз кардаанд. Ӯ дар моҳи август гуфта буд, ки тавассути эътирозҳо Хонро барканор мекунад.

Мухолифин Имрон Хонро ба он айбдор мекунанд, ки дар интихоботи соли 2018 аз кӯмаки низомиён барои пирӯзии худ истифода кардааст ва мухолифонро таъқиб мекунад.

Ӯ ин иттиҳомро рад кардааст.

Дар Беларус ба эътирози нави зидди Лукашенко омода мешаванд

Акс аз эътирози занон дар Беларус

Дар Беларус бегоҳи 18-уми октябр қарор аст, эътирози наве алайҳи Александр Лукашенко, президенти ин кишвар баргузор шавад.

Эътирозҳо алайҳи Лукашенко пас аз интихоботи президентии 9-уми августи соли равон то кунун давом дорад.

Лукашенко, ки аз соли 1994 раҳбарии Беларусро бар душ дорад, ғолиби интихоботи рӯзи 9-уми август эълон шуд. Мухолифонаш интихоботро ношаффоф медонанд ва мегӯянд, Светлана Тихановская, рақиби Лукашенко барандаи интихобот аст.

Иттиҳоди Аврупо ва ИМА Лукашенкоро президенти қонунии Беларус эътироф накардаанд.

Эътирози имрӯз давоми эътирозест, ки беш аз ду моҳ боз ҳар рӯзи якшанбе дар Минск баргузор мешавад.

Рӯзи 17-уми октябр низ даҳҳо зан дар Минск эътирз карданд.

Маркази дифоъ аз ҳуқуқ бо номи "Весна" хабар дод, ки беш аз 30 нафар рӯзи гузашта боздошт шудааст.

Таблиғоти пеш аз интихоботии Трамп ба поён мерасад

Доналд Трамп, президенти ИМА

Сухангӯи Доналд Трамп, президенти Иёлоти Муттаҳидаи Амрико гуфт, ки ӯ чор маъракаи интихоботии дигари худро сари вақт анҷом хоҳад дод.

То интихоботи президентии 3-уми нобяр дар Амрико дуюним ҳафтаи дигар боқӣ мондааст.

Трамп рӯзи 17-уми октябр дар гирдиҳамоии Мичиган ва Висконсин суханронӣ кард. Маъракаи навбатии худро дар Невада рӯзи 18-уми октябр баргузор мекунад ва ду маъраки дигарро рӯзи 19-уми октябр дар Аризона ба нақша гирифтааст.

Бо далели гирифтори ба коронавирус Трамп чанд маъракаи худро саривақт натавонист баргузор кунад.

Дар ин чор аёлат дар соли 2016 ӯ пирӯз шуда буд, вале назарпурсиҳои ғайрирасмӣ нишон медиҳанд, ки ҳоло бештар аз рақиби ӯ-Ҷо Байден, рақиби демократи ӯро пуштибонӣ мекунанд.

Номзадҳо ба мақоми президенти ИМА маъракаҳои пешазинтихоботии худро баргузор мекунанд.

Ҷо Байден, аз ҳизби Демократ ва Доналд Трамп, президенти амалкунанда аз ҳизби Ҷумҳурихоҳон миёни ҳам рақобат мекунанд.

Арманистон Озарбойҷонро ба нақзи оташбас айбдор кард

Шаҳри Ганҷаи Озарбойҷон

Арманистон Озарбойҷонро ба нақзи оташбас айбдор кард, ки ҳадафи он қатъи ҷангҳо дар минтақаи Қарабоғи Кӯҳӣ сар аз рӯзи 18-уми октябр буд.

Миёни ду кишвар аз 27-уми сентябр дар ин минтақа задухӯрд идома дорад.

Шушан Степаниан, сухангӯи вазорати дифои Арманистон рӯзи 18-уми октябр дар саҳифаи Твиттераш навишт, ки Озарбойҷон аз соати 1-и шаб то 2:45 мушак партоб кард.

Ҷониби Озарбойҷон ҳанӯз вокуниш накардааст.

Бегоҳи рӯзи 17-уми октябр ду ҷониб эълон карда буданд, ки аз рӯзи 18-уми октябр оташбасро риоя мекунанд. Изҳороти ду ҷониб дар вебсайтҳои вазорати корҳои хориҷии ду кишвар нашр шудааст.

Дар ин изҳорот гуфта мешавад, ки тасмими оташбас пас аз сӯҳбат бо кишварҳои “Гурӯҳи Мински Созмони Амният ва Ҳамкории Аврупо" гирифта шудааст.

Дар ин гурӯҳ, ки барои ҳали ихтилофи баҳс миёни ду кишвар таъсис ёфтааст, кишварҳое мисли Фаронса, Русия ва ИМА шомиланд.

Дар ҷанги тоза миёни ду кишвар, ки охири моҳи сентябр оғоз шуд, ҳудуди 600 низомӣ ва ғайринизомӣ кушта шудааст.

Ин ҷанг пурқурбонитарин ҷанг аз соли 1994 миёни ду кишвар бар сари Қарабоғи Кӯҳӣ дониста мешавад.

Порлумони Қирғизистон вазъи фавқулодаро дар Бишкек бекор кард

Дар Бишкек, пойтахти Қирғизистон

Вакилони порлумони Қирғизистон 16 октябр дар ҷаласаи ғайринавбатии худ дар қароргоҳи давлатии "Ала-Арча" бо судури қароре вазъи фақулодаеро бекор карданд, ки пештар дар шаҳри Бишкек, пойтахти он кишвар эълом шуда буд.

Фармони эъломи вазъи изтирорӣ дар Бишкекро президенти ҳамакнун пешини Қирғизистон Сооронбой Ҷеенбеков имзо карда буд.

Дар қарори Ҷеенбеков омада буд, ки дар робита ба идома кардани вазъи ноустувор ва хатар ба ҳаёту саломатии одамон, ки баъди бетартибиҳои оммавӣ ба миён омад, дар Бишкек аз соати 20:00 рӯзи 12 октябр то соати 07:00 рӯзи 19 октябр ҳолати фавқулода эълом карда мешавад.

Ҷеенбеков 15 октябр аз мақоми президентии Қирғизистон истеъфо дод. Раиси порлумони Қирғизистон Канатбек Исоев аз иҷрои вазифаҳои президент, ки бар асоси қонун ӯ бояд бар уҳда мегирифт, худдорӣ варзид. Ҳамин тариқ салоҳиятҳои президенти Қирғизистон муваққатан ба сарвазири тозатаъйин Содир Жапаров дода шуд.

Дар Узбекистон бениқобҳоро бо дурбин муайян ва ҷарима мекунанд

Бозори марказии шаҳри Фарғона

Дар вилояти Фарғонаи Узбекистон минбаъд сокинонеро, ки дар ҷойҳои ҷамъиятӣ ниқоби тиббӣ намепӯшанд, бо дурбинҳои назоратӣ муайян хоҳанд кард. Хадамоти матбуотии пулиси Фарғона гуфт, тартиботи нав аз 17 октябри соли равон ҷорӣ карда мешавад.

Ба иттилои манбаъ, барои муайян кардани сокинони бениқоб дар маконҳои ҷамъиятии вилояти Фарғона мақомот аз технологияҳои инноватсионии замонавӣ таҷриба хоҳанд кард.

Шахсияти сокинонро тавассути пойгоҳи ягона маълум мекунанд. Санади маъмуриеро, ки маъмурони ҳифзи ҳуқуқ ва кормандони маркази санитарӣ-эпидемиологӣ барои ниқоб напӯшидан тартиб медиҳанд, бо почта ба нишонии маҳалли зисти шаҳрванд фиристода мешавад.

Ёфтҳои бештар

XS
SM
MD
LG