Пайвандҳои дастрасӣ

Хабари нав

Хабарҳо

Интихоботи мушкили Қибрис

Интихоботи рӯзи 17 феврали раёсатҷумҳурии Қибрис дар ҳоле мегузарад, ки наҷоти ин кишвари буҳронзадаи узви ИА аз варшикастагӣ дар рӯзнома истодааст. Агар Никос Анастасиадеси 66-сола аз ҳизби мухолифи Дисӣ дар даври аввал беш аз 50 фоизи ороро ба даст наорад, кор ба даври дувум хоҳад кашид, ки баъди ду ҳафта доир хоҳад шуд. Анастасиадес тарафдори созиш бо ИА ва Сандуқи байналмилалии пул барои дарёфти кумаки молист. Ин муомила, ки сармоягузорон низ онро мехоҳанд, метавонад асароти буҳрони молии ин ҷазираро барои боқӣ минтақаи евро коҳиш диҳад. Рақиби асосии ӯ ба мақоми раёсати юнониҳои Қибрис вазири собиқи ҳифзи сиҳҳат Ставрос Маласи 45-сола аст, ки аз сӯи ҳизби ҳокими коммунист ҳимоят мешавад.

Ҳамаи хабарҳои имрӯзро дар инҷо бихонед

Анн Линде дар мулоқот бо раиси ҷумҳур ва 5 намояндаи ҷомеаи шаҳрвандии Тоҷикистон аз чӣ хоҳад гуфт?

Анн Линде

Анн Линде, вазири корҳои хориҷии Шветсия ва раиси Созмони Амният ва Ҳамкорӣ дар Аврупо, ба Тоҷикистон омад ва қарор аст бо мақомоти баландпоя, аз ҷумла президент Эмомалӣ Раҳмон дидору гуфтугӯ кунад. Мулоқоти хонум Линде бо намояндагони ҷомеаи шаҳрвандӣ низ дар назар аст.

Субҳи 15-уми апрел дар доираи ин сафар раҳбари САҲА дар Душанбе бо вазири корҳои хориҷии Тоҷикистон Сироҷиддин Муҳриддин мулоқот кард. Дар ин мулоқот, ба иттилои ВКХ, ҳамкориҳои дуҷониба ва низ вазъ дар Афғонистон мавриди баррасӣ қарор гирифтааст.

Чолишҳои муосир, аз ҷумла таъсири бемории COVID-19 ба иқтисод, тағйирёбии иқлим, мубориза бо терроризму ифротгароӣ ва қочоқи маводи мухаддир ва ҷиноятҳои кибернетикӣ аз мавзуъҳои дигари суҳбати Сироҷиддин Муҳриддин бо раиси САҲА будааст.

Ҷузъиёти бештар дар бораи суҳбати Сироҷиддин Муҳриддин ва роҳбари САҲА дастрас нест ва маълум нест, дар ин дидор боз кадом масъалаҳо баррасӣ шуданд.

Як манбаи огоҳ аз сафар ба Радиои Озодӣ гуфт, Анн Линде баъд аз нисфирӯзӣ бо раиси ҷумҳур Эмомалӣ Раҳмон ва намояндагони ҷомеаи шаҳрвандӣ мулоқот мекунад. Ба мулоқоти роҳбари САҲА панҷ намояндаи ҷомеаи шаҳрвандии Тоҷикистон даъват шудаанд. Тибқи иттилои дарёфтӣ, вохӯрии Анн Линде бо намояндагони ҷомеаи шаҳрвандӣ дар дафтари ин созмон баргузор мешавад ва хабарнигоронро ба ин нишаст даъват накардаанд.

То ҳол дақиқ нест, роҳбари САҲА дар поёни сафараш нишасти хабарӣ баргузор мекунад ё не. Дар дафтари созмон дар Душанбе гуфтанд, дар барномаи сафари Анн Линде нишасти хабарӣ ишора нашудааст.

Тибқи иттилои дафтари марказии созмон, Анн Линде дар ҷараёни сафараш ба Тоҷикистон аз Коллеҷи марзбонии САҲА дар Душанбе низ дидан мекунад.

Дар остонаи сафари раиси Созмони Амнияту Ҳамкории Аврупо (САҲА) ба Тоҷикистон, Кумитаи шаҳрвандии наҷоти гаравгонон ва маҳсубони сиёсӣ аз ӯ даъват карда буд, ки дар мулоқот бо мақомоти тоҷик “раҳоии фаврии Иззат Амон”, ҳомии ҳуқуқи шинохтаро талаб кунад.

Ин созмони наздик ба мухолифин дар Аврупо ба Анна Линде муроҷиат карда гуфтааст, "Иззат Амон, ки дар замони пандемияи COVID-19 дар Русия саломатии худро дар хатар монда, ҳазорҳо муҳоҷирони тоҷикро наҷот дод, ғайриқонунӣ аз Русия ба Тоҷикистон оварда ва ба ҳабси пешакӣ гирифта шудааст".

Сафари раҳбари САҲА ба чаҳор кишвари Осиёи Марказӣ, аз ҷумла Тоҷикистон 11-уми апрел оғоз шуд ва 15-уми апрел ба поён мерасад. Рӯзи 13-уми апрел Анна Линде дар Бишкек буд ва бо президент ва дигар мақомоти Қирғизистон дидору гуфтугӯ дошт.

Созмони мазкур, аз ҳамкорони муҳими Тоҷикистон аст, ки фаъолияташро дар ин кишвар аз соли 1994, замони ҷанги дохилӣ шуруъ карда, то имрӯз миллионҳо долларро барои иҷрои барномаҳояш ҷудо кардааст.

Ҷасади як сокини 29-солаи Варзобро аз об берун овардаанд

Ноҳияи Варзоб

Шоми 13-уми апрел дар канали "Дереватсионӣ"-и шаҳри Душанбе ҷасади як зани ҷавонро пайдо кардаанд. Мақомоти Кумитаи ҳолатҳои фавқулода гуфтанд, маъмурони наҷот баъди дарёфти хабар ҷасадро аз об берун оварданд. Ба иттилои расмӣ, зан сокини 29-солаи ноҳияи Варзоб ва соҳиби ду фарзанд будааст. Расман сабаби ғарқ шудани ӯ гуфта намешавад.

Дар ҳамин ҳол, як корбари Радиои Озодӣ шоми 14-уми апрел дар паёме навишт, "ин зан аз хонаводаи камбизаот буда, ба зулму ситами шавҳар тоб наовардааст. Дар хонаи падар низ бо ду кӯдак азоб доштааст. Ба хонаи хоҳараш дар деҳаи Шафтимиҷгон омада, худро аз болои пул ба дарё мепартояд."

Мақомот ин фарзияро инкор ё тасдиқ накардаанд. Масъулони ниҳодҳои ҳифзи ҳуқуқ гуфтанд, ки ҳодисаро таҳқиқ доранд.

Солҳои охир баъзе аз занону духтарон ба сабаби, ба гуфтаи мақомот, ҷанҷол дар оила ва ё якдигарнофаҳмӣ худро ба дарё мепартоянд. Баъзе аз онҳоро сокинону имдодгарон наҷот додаанд, баъзеи дигар ба ҳалокат расидаанд.

Мубориза барои нуфуз дар Осиёи Марказӣ: Туркия дубора Туркманистонро ба Шӯрои туркӣ даъват кард

Шӯрои туркӣ, моҳи октябри соли 2019

Маҷаллаи ҷопонии "Nikkei Asia" гузоришеро дар бораи рақобатҳои Туркия ва Русия барои нуфуз дар Осиёи Марказӣ нашр кард. Дар ин гузориш талошҳои ду абарқудрат барои соҳиб шудани муносибатҳои наздик бо минтақаи Осиёи Марказӣ инъикос шудааст.

Муаллифи гузориш нақши Шӯрои туркиро дар минтақаи Осиёи Марказӣ ва талоши Русия барои ҳифзи муносибатҳо бо кишварҳои минтақаро баррасӣ кардааст.

Ба навиштаи муаллиф, Русия муқобили талошҳои Анкара аст, ки мехоҳад, Шӯрои туркиро ҳамчун василаи барқарории равобити наздик бо кишварҳои туркзабони минтақа истифода барад.

Рӯзи 31-уми марти имсол кишварҳои шомили Шӯрои туркӣ нишасти онлайн баргузор карданд. Бо даъвати шӯро роҳбари Туркманистон ҳам дар нишаст ширкат кард.

Шӯрои туркӣ, ки расман Шӯрои Ҳамкориҳои давлатҳои туркзабон унвон дорад, соли 2009 таъсис шудааст ва айни замон Озарбойҷон, Қазоқистон, Қирғизистон, Узбекистон ва Туркия шомили он ҳастанд.

Туркманистон бо даъвои ин ки кишвари бетараф аст, шомили Шӯрои туркӣ нашудааст. Аммо Раҷаб Таййиб Эрдуғон, президенти Туркия, дар нишасти ахири Шӯро аз Туркманистон бори дигар даъват кард, ки узви Шӯро шавад. Роҳбари Туркия бори аввал дар моҳи декабри соли 2020 аз Туркманистон ин даъватро карда буд.

Маҷаллаи ҷопонӣ менависад, дар ҳоле, ки Анкара аз Ишқобод даъвати узвият мекунад, Москва ҳамкориро бо Туркманистон тақвият мебахшад.

Русия, ба навиштаи муаллиф, нисбати Туркия, ки узви НАТО аст, назари неке надорад ва намехоҳад, ки дар Осиёи Марказӣ нуфуз дошта бошад. Муаллиф менависад, Русия Осиёи Марказиро "ҳавлии пушти хонаи худ" медонад.

Мувофиқати Иттиҳоди Аврупо ба ҷорӣ кардани шиносномаҳои COVID барои эҳёи гардишгарӣ

Акс аз бойгонӣ

Намояндагони доимии Иттиҳоди Аврупо дар музокира бо Порлумони Аврупо ба созиш расиданд, ки санади рақамии сабз роҳандозӣ шавад. Ин санад ба одамоне, ки ваксина гирифтаанд, ё натиҷаи ташхисашон манфӣ баромада ё аз коронавирус шифо ёфтаанд, имкон медиҳад, дар замони вабои COVID-19 дар Аврупо амну озод равуо кунанд. Дар ин бора сомонаи Шӯрои Иттиҳоди Аврупо хабар медиҳад. Ба навиштаи расонаҳо, ин тасмим ба хотири эҳёи гардишгарӣ дар тобистони соли ҷорӣ гирифта шудааст.

Раиси САҲА ба Душанбе омад. Мулоқоти Анн Линде бо Сироҷиддин Муҳриддин

Мулоқоти Анн Линде бо Сироҷиддин Муҳриддин.

Анн Линде, вазири умури хориҷии Шветсия ва раиси амалкунандаи Созмони Амният ва Ҳамкорӣ дар Аврупо, ба Тоҷикистон омад ва қарор аст бо мақомоти баландпоя, аз ҷумла президент Эмомалӣ Раҳмон дидору гуфтугӯ кунад. Мулоқоти хонум Линде бо намояндагони ҷомеаи шаҳрвандӣ низ дар назар аст.

Субҳи 15-уми апрел дар доираи ин сафар раҳбари САҲА дар Душанбе бо вазири корҳои хориҷии Тоҷикистон Сироҷиддин Муҳриддин мулоқот кард. Дар ин мулоқот, ба иттилои ВКХ, ҳамкориҳои дуҷониба ва низ вазъ дар Афғонистон мавриди баррасӣ қарор гирифтааст.

Чолишҳои муосир, аз ҷумла таъсири бемории КОВИД-19 ба иқтисодиёт, тағйирёбии иқлим, мубориза бо терроризму ифротгароӣ ва гардиши ғайриқонунии маводи мухаддир ва ҷиноятҳои кибернетикӣ аз мавзуъҳои дигари суҳбати Сироҷиддин Муҳриддин бо раиси САҲА будааст.

Дар остонаи сафари раиси Созмони Амнияту Ҳамкории Аврупо (САҲА) ба Тоҷикистон, Кумитаи шаҳрвандии наҷоти гаравгонон ва маҳсубони сиёсӣ аз ӯ даъват намуд, ки дар мулоқот бо мақомоти тоҷик “раҳоии фаврии Иззат Амон”, ҳомии ҳуқуқи шинохтаро талаб кунад.

Ин созмони наздик ба мухолифин дар Аврупо ба Анна Линде муроҷиат карда гуфтааст, "Иззат Амон, ки дар замони пандемияи COVID-19 дар Русия саломатии худро дар хатар монда ҳазорҳо муҳоҷирони тоҷикро наҷот дод, ғайриқонунӣ аз Русия ба Тоҷикистон оварда ва ба ҳабси пешакӣ гирифта шудааст".

Сафари раҳбари САҲА ба чаҳор кишвари Осиёи Марказӣ, аз ҷумла Тоҷикистон аз 11-уми апрел оғоз шуд ва то 15-уми апрел идома хоҳад дошт. Рӯзи 13-уми апрел Анна Линде дар Бишкек буд ва бо президент ва дигар мақомоти Қирғизистон дидору гуфтугӯ дошт.

Созмони мазкур, аз ҳамкорони муҳими Тоҷикистон аст, ки фаъолияташро дар ин кишвар аз соли 1994, замони ҷанги дохилӣ шуруъ карда, то имрӯз миллионҳо долларро барои иҷрои барномаҳояш ҷудо кардааст.

Даъвати ҷопониҳо барои бекор кардани Олимпиадаи тобистона дар Токио

Акс аз бойгонӣ.

Мувофиқи хабаргузории оҷонсии Kyodo зиёда аз се ду ҳиссаи ҷопониҳо барои бекор кардан ё ба таъхир андохтани Олимпиадаи тобистонаи Токио овоз доданд.

39,2% посухдиҳандагон мехоҳанд Бозиҳоро комилан бекор кунанд. 32,8% иштироккунандагони пурсиш ба тарафдории боз як бори дигар мавқуф гузоштани Олимпиада овоз доданд. 24,5% ҷопониҳои пурсидашуда ҷонибдори онанд, ки мусобиқот тибқи нақша баргузор шавад.

Ба иллати пандемияи коронавирус Бозиҳои тобистонаи олимпӣ, ки бояд дар Токио аз 24-уми июл то 9-уми августи соли 2020 баргузор мешуданд, ба муҳлати аз 23-юми июл то 8-уми августи соли 2021 пешбинӣ шудаанд.

Бозиҳо префикси «2020»-ро барои мақсадҳои маркетинг нигоҳ медоранд. 20-уми марти соли 2021 маълум шуд, ки тамошобинони хориҷӣ ба Олимпиада ва Паралимпиада дар пойтахти Ҷопон роҳ дода намешаванд, пули билетҳои қаблан харидашуда баргардонида хоҳад шуд.

Ёдовар мешавем, то ҳоло аз Тоҷикистон ду варзишгар – Баҳодур Усмонов ва Шаббос Неъматуллоев (ҳарду дар риштаи бокс) - ба Олимпиадаи Токио-2020 роҳхат гирифтаанд.

Додгоҳ дастур дод, вазъи сиҳатии президенти пешини Қирғизистон озмоиш шавад

Алмосбек Отамбоев, президенти пешини Қирғизистон.

Додгоҳе дар Қирғизистон дастур дод, ки вазъи сиҳатии Алмосбек Отамбоев, президенти пешин ва зиндонии он кишвар ташхиси судиву тиббӣ шавад.

Дар ин бора Кундуз Жолдубоева, яке аз ҳамсафони Отамбоев хабар дод. Ба гуфтаи Жолдубоева, муҳокимаи додгоҳии Отамбоев дар доираи парвандаи маъруф ба ҳодисаҳои Кой-Тош то анҷоми ташхис манъ шудааст.

Отамбоев аз соли 2011 то 2017 президенти Қирғизистон буд. Баъди анҷоми муҳлати президентӣ ӯро дар содир кардани ҷиноятҳои вазнин айбдор карданд. Отамбоев гуфта буд, айбҳои нисбати вай эъломшуда ангезаи сиёсӣ доранд.

Рӯзҳои 7-8 августи соли 2019 дар деҳаи Кой-Тоши ноҳияи Аламудини Қирғизистон "амалиёти иҷборан ба бозпурсӣ овардани президенти пешин Алмосбек Отамбоев" сурат гирифт. Бо қарори додгоҳ, вай ба ҳабси пешакӣ гирифта шудааст.

Додситонии кулли Қирғизистон Отамбоевро дар чандин ҷинояти сангин, аз ҷумла дар робита ба ҳаводиси Кой-Тош, ғайриқонунӣ озод кардани соҳибнуфузи ҷиноӣ Азиз Батукаев, фасодкорӣ ва ғайра айбдор кард. Ба гуфтаи вакилони мудофеъ, дар маҷмуъ нисбати Отамбоев 14 айб эълом шудааст. Баъди боздошти Отамбоев чанде аз тарафдорони ӯро ҳам дастгир карданд.

Президенти Туркманистон курсии раисии порлумонро соҳиб шуд

Қурбонгулӣ Бердимуҳаммадов, президенти Туркманистон.

Қурбонқулӣ Бердимуҳаммадов, президенти Туркманистон, раисии порлумони он кишвар Халқ Маслаҳатиро соҳиб шуд. Маросими эъломи раиси нави порлумон рӯзи 14-уми апрел баргузор гардид. Бердимуҳаммадов дар ҷаласаи нахустини порлумон шахсан эълом кард, ки вай раиси Халқ Маслаҳатӣ таъйин шудааст.

Пештар аз ин расонаҳо ба узвияти порлумони Туркманистон интихоб шудани Бердимуҳаммадов хабар дода буданд.

Бердимуҳаммадови 63-сола аз вилояти Ахали кишвараш дар палатаи болоии порлумон намояндагӣ мекунад. Ба ин тартиб, Бердимуҳаммадов ҳамзамон ҳам раиси ҳокимияти қонунгузор ва ҳам раиси ҳокимияти иҷроияи Туркманистон шуд. Бердимуҳаммадов инчунин раиси ҳукумат, яъне сарвазири Туркманистон ба ҳисоб меравад.

Дар рӯйхати 111 даъвогари курсиҳои палатаи болоии порлумони он кишвар, ки рӯзи 1-уми март нашр шуд, номи Бердимуҳаммадов зикр наёфта буд. Аммо Комиcсияи марказии интихоботии он кишвар хабар дод, ки "барои узвият дар Халқ Маслиҳатӣ" 112 номзад сабти ном шуда буд. Зоҳиран, номи президенти Туркманистонро дар лаҳзаҳои охир шомил кардаанд.

Тағйироту иловаҳо ба Конститутсияи он кишварро, ки моҳи сентябри соли гузашта ворид карданд, коршиносон талоши интиқоли қудрат унвон мекунанд. Сардор Бердимуҳаммадов, писари Қурбонгулӣ Бердимуҳаммадов айни ҳол ноиб-сарвазири ва раиси Палатаи олии назоратии Туркманистон, ҳамчунин узви Шӯрои амниятии он кишвар аст. Коршиносон аз ӯ ба унвони ҷойнишини падар ёд мекунанд.

Дар Қирғизистон як сиёсатшиноси маъруф бо гумони "хиёнат" боздошт шуд

Марат Қазоқбоев, сиёсатшиноси шинохтаи Қирғизистон

Кумитаи давлатии амнияти миллии (КДАМ) Қирғизистон тасдиқ кард, ки дар миёни афроди боздоштшуда бо гумони “хиёнат ба давлат” сиёсатшиноси маъруфи маҳаллӣ Марат Қазоқбоев (Казакпаев) ҳам ҳаст. Исми нафари дуюм танҳо бо ҳарфҳои аввали номаш М.Т. ёд шудааст. Бахши қирғизии Радиои Озодӣ мегӯяд, рӯзи 13 апрел дар КДАМ хабар доданд, ки дар чаҳорчӯби таҳқиқоти пеш аз додгоҳӣ бар асоси моддаи 307-и КҶ Қирғизистон (“Хиёнат ба давлат”) ду нафар боздошт шудаанд. Матбуот маълум кард, ки яке аз онҳо сиёсатшиноси маъруф аст.

КДАМ гуфтааст, ки «далелҳои қотеъ» ба даст омадааст ва «бо сабаби махфӣ будани парванда, дар поёни тафтишот ба ҷомеа тафсилоти он ироа мешавад». Парвандаи мазкур дар сурати гунаҳгор эътироф шудани шахс то 10 соли зиндонро пешбинӣ мекунад.

Маълум нест, ки вокуниши худи Қазоқбоев чӣ аст ва то куҷо худи ӯ бо иттиҳоми ворида розӣ аст ё на. Мақомот ҷузъиёти ҷинояти эҳтимолии содиршударо шарҳ намедиҳанд.

Олмон Русияро дар талоши ташкили тавтеа айбдор кард

Аннегрет Крамп-Карренбауэр, вазири дифои Олмон

Олмон иддаои Русияро дар заминаи таҳдиди НАТО рад карда гуфт, ки Маскав дар талоши ташкили тавтеа аз роҳи истиқрори нирӯ дар нимҷазираи Қрим ва дар хати сарҳад бо Украина мебошад. Аннегрет Крамп-Карренбауэр, вазири дифои Олмон дар сӯҳбат бо телевизиони ARD рӯзи 14-уми апрел гуфт, “тасаввури ман ин аст, ки ҷониби Русия тамоми талошашро ба харҷ медиҳад, ки як вокунишеро барангезад”. Ӯ гуфт, "мо ҳамроҳ бо Украина ба ин бозӣ дода намешавем” ва афзуд, маълум аст, ки Русия “интизори ҳаракате аст, то баъди он, ба унвони амал аз ҷониби НАТО, нақшаҳояшро идома диҳад”. Аксу навору хабарҳои ахир баёнгари он аст, ки дар Қрими соли 2014 ғасбшуда ва дар хати сарҳади Русия бо Украина шумори зиёди нирӯҳои русӣ таҷаммӯъ мекунанд ва ин чиз боиси нигаронӣ аз он шудааст, ки эҳтимолан Русия дар фикри ирсоли нирӯ ба Украина мебошад. Украина ва Ғарб инчунин ҷудоиталабони воқеъ дар шарқи Украинаро дар вилоятҳои Луҳанск ва Донетск гунаҳкор мекунанд, ки барои доман задани низоъҳои нав омодагӣ мебинанд, чизе, ки Маскав рад мекунад.

Блинкен гуфт, "фурсати хуруҷи нирӯҳо аз Афғонистон фаро расид"

14 апрел, Брюссел. Котиби давлатии ИМА Энтони Блинкен

Дар остонаи омодагии президенти ИМА Ҷо Байден ба эълони хуруҷи нирӯҳои амрикоӣ аз Афғонистон то таърихи 11 сентябр, ки 20-солагии ҳамлаи Ал-Қоида ба ИМА мебошад, Котиби давлатии ИМА Энтони Блинкен гуфт, фурсати он расидааст, ки Амрико ва муттафиқонаш дар НАТО аз Афғонистон берун шаванд. Блинкен, ки 14 апрел пеш аз ҷаласаи вазирони дифои НАТО аз қароргоҳи ин созмон дар Брюссел тавассути телевизион сӯҳбат мекард, гуфт, Вашингтон бо НАТО дар заминаи хуруҷи “ҳамоҳангшуда” ҳамкорӣ мекунад. Тахминан 7 ҳазор сарбози хориҷии ғайриамрикоӣ аз кишварҳои НАТО, инчунин Австралия, Зеландияи Нав ва Гурҷистон мебошанд, шумори нирӯҳои амрикоӣ 2500 нафар аст, вале ҳамаи онҳо аз ёриҳои ҳавоиву барномаҳои омӯзишии Амрико дар Афғонистон истифода мекунанд. Блинкен, ки ҳамроҳ бо вазири дифои ИМА Ллойд Остин дар Белгия қарор дорад, гуфт, “дар ҳамкорӣ мо ба ҳадафҳои худ расидем ва ҳоло фурсати он расидааст, ки нирӯҳоро ба хонаҳояшон баргардонем”. Изҳороти Блинкен ба он маъност, ки хуруҷи нирӯҳо, ки қарор буд то 1 май анҷом шавад, бо таъхири панҷмоҳа сурат мегирад. Зарбулаҷали хуруҷи нирӯҳо аз Афғонистон то оғози моҳи маи имсол бахше аз созиши маъмурияти ИМА бо Толибон аст, ки соли гузашта дар давраи раёсатҷумҳурии Доналд Трамп имзо шудааст.

Одобномаи нави хабарнигорони тоҷик қабул мешавад. Аз қаблӣ чӣ фарқ дорад?

Бинои "Шарқи Озод".

Як гурӯҳи корӣ баъд аз дувоздаҳ соли тасвиби одобномаи хабарнигорони тоҷик ба такмили муқаррароти он иқдом карда, интизор меравад то се ҳафтаи дигар матни он аз сӯи журналистони тоҷик қабул шавад. Ин дар ҳолест, ки бархе аз мунтақидони одобномаи журналистон дар соли 2009, бо гузашти муддате зарурати он барои ҷомеаи тоҷикро дарк карда, ҳамакнун аз дастандаркорони такмили муқаррароти он шудаанд.

Аз соли 2012 ба баъд ҳамасола мониторинги Шӯрои Васоити Ахбори Оммаи Тоҷикистон (Шӯрои ВАО) то 40 мавриди нақзи одобномаи хабарнигорони тоҷикро ошкор мекард. Аммо як ё ду соли пеш ин рақам ба 15-20 маврид коҳиш ёфтааст.

Қироншоҳ Шарифзода, узви раёсати Шӯрои ВАО мегӯяд, ки дар соли 2009 худ мухолифи тасвиби ин санади ғайриҳуқуқии машваратӣ буд, зеро бар ин назар буд, ки қонунҳои ҷорӣ фаъолияти хабарнигорони тоҷикро ба хубӣ танзим мекунад. Аммо, сипас нашрияи "Ҷомеа" ба раҳбарии Қироншоҳ Шарифзода ин санадро қабул ва худаш ба узвияти Шӯрои ВАО пазируфта шуд.

Оқои Шарифзода мегӯяд, он замон ӯ дар қатори Раҷаби Мирзо ва Хуршеди Атовулло мухолифи қабули ин одобнома буд, зеро ба андешаи ӯ, агар хабарнигор қонунҳои ҷории давлатро иҷро накунад, магар тавсияҳои як созмони ҷамъиятиро гӯш медиҳад? Аммо, дертар, ба унвони намояндаи созмони ҷамъиятии "Журналист" ин қоидаҳоро қабул кард.

Раҷаби Мирзо, хабарнигори тоҷик мегӯяд, ки низ аз мухолифони ин одобнома буд, аммо сафарҳои хориҷааш назари вай ба ин санадро тағйир додаанд. Ба гуфтаи Раҷаби Мирзо, вақте ба Олмон сафар дошт, огоҳӣ ёфт, ки дар ин кишвар қонуни матбуот аслан вуҷуд надорад ва фаъолияти хабарнигорон маҳз тавассути ҳамин одобнома танзим мешавад.

Пешниҳод барои такмили ин одобнома ҳамакнун идома дорад ва интизор меравад то 3-уми май ин тағйирот расман қабул шаванд. Аз ҷумла, дастандаркорони ислоҳи одобнома мехоҳанд ба ин қоидаҳо дасткашии хабарнигорон аз гирифтани тӯҳфаҳои молӣ барои пахш ё, баръакс пахш накардани маводро ҷой диҳанд.

Қаблан, дар ин қоидаҳо 17 нукта вуҷуд дошт ва дар лоиҳаи ислоҳшуда ин нуктаҳо ба беш аз 70 адад афзоиш ёфтааст. Абдумалик Қодиров, коршиноси тоҷик мегӯяд, ин одобнома то андозае ба беҳбуди кори хабарнигорон мусоидат кардааст.

"Муқаррароти ин одобномаро асосан ҳамон хабарнигороне муроот мекунанд, ки худ пойбанди қонунгузории Тоҷикистон ҳастанд. Чанд мавриде буданд, ки мониторинги Шӯрои ВАО ба камбудиҳои журналистон ишораҳое карда буд ва ин норасоиҳо сипас ислоҳ шуданд. Аммо, дар умум машваратҳои тавсиявӣ ҳаргиз муқарроти қонунгузориро наметавонад иваз кунад".

Ин дар ҳолест, ки соҳибназарон аз танг шудани фазои озодии сухан дар Тоҷикистон ва афзоиши пахши маводҳои таблиғоти пинҳонии давлативу тиҷоратӣ ва таҳқиромез дар расонаҳои кишвар изҳори нигаронӣ мекунанд.

Ҳамзамон, мавқеи озодии сухан дар Тоҷикистон дар раддабандии "Хабарнигорони бидуни марз" дар соли гузашта ба ҷойи 161-ум фаромадааст. Дувоздаҳ сол қабл Тоҷикистон дар ин раддабандӣ мавқеи 113-ро соҳибӣ мекард.

Эрон таҳдид кард, ки баъди ҳамла ба Натанз ғанисозии ураниумро 60 % боло мебарад

ТВ-и давлатии Эрон ин аксро ҳамчун сентрифугаҳои таъсисоти Натанз муаррифӣ кард. Акс аз соли 2012

Ду рӯз баъди як харобкории эҳтимолӣ дар таъсисоти ҳастаии Натанзи Эрон, ки мақомоти ин кишвар масъулиятро бори Исроил карданд, Теҳрон таҳдид намуд, ки ғанисозии ураниумро то 60 дарсад афзоиш медиҳад. Рӯзи сешанбе дипломати аршади эронӣ ҳамлаи эҳтимолиро “як қимори бисёр бад” номид, ки баръакс, боиси тақвияти мавқеи Теҳрон дар муколамаҳои барқарор кардани созиши соли 2015-и ҳастаии қудратҳо ва Эрон мешавад. Рӯзи 13-уми апрел Эрон Оҷонсии нирӯи ҳастаии СММ-ро огоҳ кард, ки ғанисозии ураниумро “то 60 дарсад боло мебарад”. Дабири кулли Оҷонсии нирӯи ҳастаии СММ Рафаэл Мариано Гросси каме дертар ин хабарро тасдиқ кард.

Телевизиони давлатии англисизабони эронӣ Press TV хабар дод, ки ғанисозӣ 14-уми апрел шурӯъ мешавад. 60 дарсад баландтарин нуқтаи ғанисозии ураниум дар Эрон мебошад, ҳарчанд ин ҳаҷм барои расидан ба 90 дарсади зарурӣ барои истифода бо ҳадафҳои низомӣ камтар аст. Бар асоси созиши ҳастаӣ, ғанисозӣ набояд аз сатҳи 3,67 дарсад болотар бошад. Ахиран ин ҳаҷм бо 20 дарсад афзоиш дода шудааст.

Ошкоршавии ҷасади ду хоҳар дар Хатлон

Дирӯз дар кӯҳҳои Зағертии шаҳри Левакант бо истифода аз саги буйгир ҷасади зани дуввуме ёфт шуд, ки беш аз як моҳ бенишон будааст. Як рӯз пештар аз он сокинони маҳаллӣ бо кӯмаки наҷотбахшон аз ҳамин мавзеъ ҷасади духтари 15-солаи сокини ноҳияи Абдураҳмон Ҷомиро пайдо карданд. Сокинони маҳҳалӣ бо ирсоли навор аз макони ҳодиса ба Радиои Озодӣ гуфтанд, ҷасадҳои ёфтшуда апаву хоҳар мебошанд. Мақомоти шаҳри Левакант ҳам гуфтанд, ки Парвина ва Саодат Ҳаитоваҳо апаву хоҳар аз деҳаи Роҳи Ленини ҷамоати Истиқлол мебошанд. Сабаби марги онҳоро мақомоти тафтишотӣ таҳқиқ мекунанд.

Парвоз аз Русия ба Туркия маҳдуд шуд

Туркия як макони маъруфи истироҳатҳои тобистона барои шаҳрвандони Русия ба ҳисоб меравад

Русия рафтуомади ҳавоӣ бо Туркияро аз фардо маҳдуд мекунад. Мақомоти Русия ин тасмимро ба хотири хуруҷи COVID-19 ва бад шудани вазъи эпидемиологӣ дар Туркия гирифта, маҳдудияти парвоз то 1-уми июн муқарар шудааст. Ситоди фаврии Русия қарор кард, ки миёни ду кишвар танҳо ду парвоз дар як ҳафта боқӣ хоҳад монд. Бинобар лағви ногаҳонии парвозҳо, тақрибан ним миллион сокини Русия, ки барои истироҳат ба Туркия роҳхат гирифта буданд, аз сафар маҳрум мешаванд. Туркия аз зумраи аввалин кишварҳое буд, ки Русия аз моҳи августи соли гузашта ҳарими ҳавоиашро боз кард. Зимнан Тоҷикистон ҳам аз моҳи октябр бо Туркия парвозҳои доимиашро барқарор намуд.

Матбуот: Вазорати дифоъ аз иҷрои 70-дарсадии нақшаи даъват ба артиш хабар медиҳад

Барои ҷалб ба артиш даъватнома фиристода мешавад ва дар сурати ҳозир нашудани ҷавон, гоҳо ӯро аз хонааш омада мебаранд

Вазорати дифои Тоҷикистон гуфтааст, дар ду ҳафтаи аввал “70 дарсади нақшаи даъват ба сафи Қувваҳои мусаллаҳ иҷро шудааст”. Матбуоти тоҷик дар ҳоле ин хабарро аз қавли сухангӯи вазорат нашр кардааст, ки хабару видео ва аксҳо аз ҷалби маҷбурии ҷавонон ба артиш ваё сарбозшикор шабакаҳои интернетиро пур кардааст. Даъвати баҳорӣ инчунин дар ҳоле мегузарад, ки баъди нав шудани қонуни ҷалб ба хидмат, то ҳол шарту шурути озод шудан аз хидмат бар ивази пардохти маблағ нашр намешавад.

Мавсими баҳории даъват ба хизмат ҳамагӣ ду ҳафта пеш шурӯъ шуда, шаҳри Душанбе қабл аз мӯҳлат аз иҷрои пурраи нақша хабар дод. Дар ин байн зоҳиран ҳатто бо қабули қонуни нав дар бораи хидмат, интизороти ҷомеаи Тоҷикистн аз кам шудани сарбозшикор амалӣ нагашт. Бо вуҷуди нашри ҳамарӯзаи наворҳо аз ҳолатҳои облава мақомоти давлатӣ ин далелҳоро рад мекунанд ва баръакс аз афзоиши шумораи довталабони хизмат ҳарф мезананд. Расман мавсими баҳории даъват то 31-уми май идома мекунад.

"Авеста": Соли ҷорӣ Тоҷикистон бар ивази ним миллард доллар сӯзишворӣ мехарад

Тоҷикистон нақша дорад соли ҷорӣ бар ивази 546 миллион доллар маводи сӯхт ворид кунад. Хабаргузории “Авеста” рӯзи 13-уми апрел навишт, аз ин миён 344 миллион доллар ба харидани 531 ҳазор тонна бензину солярка ва 202 миллион доллар барои овардани 442 ҳазор тонна гази моеъ пешбинӣ шудааст. Дар ду моҳ ба кишвар ҳудуди 82 ҳазор тонна маводи сӯзишворӣ ворид карда шудааст. Тоҷикистон маҳсулоти нафтиро асосан аз Русия ва Қазоқистон мехарад. Моҳи гузашта нархи бензин дар Тоҷикистон башиддат боло рафта ҳатто боиси камчин гаштани он шуд. Феълан арзиши бензин аз 8 сомониву 80 дирам то 9 сомонист. Нархи гази моеъ низ аз аввали сол 13 фоийз бештар шудааст. Тиҷорати сӯзишворӣ ба уҳдаи чанд ширкат, аз ҷумла "Газпронефт Тоҷикистон" аст, ки аз онҳо монополисти соҳа ном мебаранд. Афзоиши нархи сӯзишворӣ ба болоравии нархи ғизо сабаб мешавад.

Дар остонаи сафари раҳбари САҲА ба Душанбе ба раҳоии Иззат Амон даъват карданд

Анна Линде, раҳбари САҲА ва вазири хориҷаи Шведсия рӯзи 13-уми апрел дар шаҳри Бишкек бо мақомоти баландпояи Қирғизистон дидору гуфтугӯ кард

Дар остонаи сафари раиси Созмони Амнияту Ҳамкории Аврупо (САҲА) ба Тоҷикистон, Кумитаи шаҳрвандии наҷоти гаравгонон ва маҳсубони сиёсӣ аз ӯ даъват намуд, ки дар мулоқот бо мақомоти тоҷик “раҳоии фаврии Иззат Амон”, ҳомии ҳуқуқи шинохтаро талаб кунад. Ин созмони наздик ба мухолифин дар Аврупо ба Анна Линде муроҷиат карда гуфтааст, “Иззат Амон, ки дар замони пандемияи COVID-19 дар Русия саломатии худро дар хатар монда ҳазорҳо муҳоҷирони тоҷикро наҷот дод, ғайриқонунӣ аз Русия ба Тоҷикистон оварда ва ба ҳабси пешакӣ гирифта шудааст”. Сафари раҳбари САҲА ба чаҳор кишвари Осиёи Марказӣ, аз ҷумла Тоҷикистон аз 11-уми апрел оғоз шуд ва то 15-уми апрел идома хоҳад дошт. Рӯзи 13-уми апрел Анна Линде дар Бишкек буд ва бо президент ва дигар мақомоти Қирғизистон дидору гуфтугӯ дошт.

Созмони мазкур, аз ҳамкорони муҳими Тоҷикистон аст, ки фаъолияташро дар ин кишвар аз соли 1994, замони ҷанги дохилӣ шуруъ карда, то имрӯз миллионҳо долларро барои иҷрои барномаҳояш ҷудо кардааст.

Наздикони Меҳроншоҳ Ҷумъаев аз ҷараёни таҳқиқи марги ӯ норозиянд

Меҳроншоҳ Ҷумъаев 25-сола буд

Наздикони Меҳроншоҳ Ҷумъаев, афсари милисае, ки ба гуфтаи мақомот аз тири ҳамкораш дар бинои ШКД-и ноҳияи Панҷ ҷон бохт, тафтиши қазияро ноодилона хондаанд.

Холиқназар Ҷумъаев, амаки Меҳроншо Ҷумъаев, дар суҳбат бо хабаргузории “Азия-Плюс” гуфтааст, аз раиси ҷумҳурӣ ва додситони кул хостанд, таҳқиқи қазияро аз ихтиёри Додситонии ноҳияи Панҷ гирифта, ба додситонии дигар бидиҳанд. Чун, ба гуфтаи ӯ, дар ноҳияи Панҷ “имкони ба таври холисона, беғаразона ва пурра пеш бурдани тафтишоти қазияи рухдода вуҷуд надорад.”

Пайвандони афсари кушташуда ҳамчунин талаб доранд, ки ба ҷуз аз гумонбари асосӣ, роҳбарияти ШКД-и ноҳияи Панҷ ва масъули қисми назорати яроқу ивази навбатдорон низ барои хунукназарӣ дар назди қонун ҷавоб гӯянд.

Шуъбаи корҳои дохилӣ дар ноҳияи Панҷ
Шуъбаи корҳои дохилӣ дар ноҳияи Панҷ

Холиқназар Ҷумъаев афзуд, талаби дигари онҳо ин аст, ки қазия бояд аз рӯйи иттиҳоми куштор баррасӣ шавад. Мақомот нисбат ба гумонбари асосӣ, бо моддаи “куштор аз беэҳтиётӣ” парванда кушодаанд. Мақомот ҳанӯз ба ин шикоят посух надодаанд.

Меҳроншои 25-сола рӯзи 7-уми феврали имсол дар Шуъбаи умури дохилии ноҳияи Панҷ ҷон бохт ва рӯзи душанбе дар зодгоҳаш, шаҳри Панҷакент, дафн карда шуд. Баъд аз чанд соати ҳодиса як намояндаи Вазорати корҳои дохилии Тоҷикистон ба Радиои Озодӣ гуфт, "Ҷумъаев ҳангоми супурдани аслиҳаи хидматӣ дар Шуъбаи умури дохилии ноҳия ҷон дод."

Меҳроншо Ҷумъаев 7 моҳ пештар аз Шуъбаи корҳои дохилии ноҳияи Ҷайҳун ба ноҳияи Панҷ ба кор гузашт ва унвони лейтенанти калони милисаро дошт.

Дар ИМА қазияҳои ғафсшавии хун ва таъсири эҳтимолии воксинаи Johnson & Johnson-ро месанҷанд

Воксинаи ширкати дорусозии Johnson&Johnson ба фарқ аз дигар воксинаҳо аз як воя ё доза иборат аст

Маркази назорат ва пешгирӣ аз бемориҳо дар ИМА дар як ҷаласае рӯзи 14-уми апрел қазияҳои лахта ваё ғафсшавии хун дар нафаронеро мавриди муҳокима қарор медиҳад, ки барои пешгирӣ аз олудашавӣ ба COVID-19 воксинаи ширкати Johnson & Johnson-ро қабул кардаанд. Ин муҳокима дар ҳоле барпо мешавад, ки Маъмурияти ғизо ва дорувори ИМА рӯзи 13-уми апрел машварат дод, ки истифодаи воксинаи мазкур муваққатан боздошта шавад. Дар муҳокимаҳо қарор аст шаш қазияи марбут ба занони 18 то 48-сола баррасӣ шавад, ки баъди гирифтани воксина дар ҷисмашон муддати шаш то 13 рӯз ғафсшавии хун мушоҳида шуд. Дар тақиқи коршиносон дида мешавад, ки то куҷо маҳз воксинаи Johnson & Johnson сабабгори ин ҳолат шудааст ё на. Як зан даргузашт ва дигаре ҳоло дар ҳолати сангин қарор дорад, мегӯянд мақомот. Онҳо изҳори умедворӣ карданд, ки дар чанд рӯз ба ин масъала рӯшанӣ меандозанд. Боздошта шудани истифодаи воксинаи Johnson & Johnson, ки ба фарқ аз дигар воксинаҳо танҳо аз як воя ё доза иборат аст, ба суръати эмкунии мардум дар ИМА таъсиррасон шуд.

CPJ аз Қирғизистон хост, ки ҳамлаву озори журналистон таҳқиқ шавад

Овоздиҳӣ дар Ӯш

Кумитаи дифоъ аз журналистон (CPJ) аз мақомоти Қирғизистон тақозо кард, ки ҳодисаҳои озори журналистонро ба ҳангоми пӯшиши референдуми конститутсияи ин кишвар дар таърихи 11-уми апрел таҳқиқ кунанд. Созмони воқеъ дар Ню-Йорк дар як изҳороти рӯзи 13-уми апрел навишт, дар шаҳри ҷанубии Ӯш ва ҳам пойтахт шаҳри Бишкек мақомот чор журналистро боздошт карда, ба дастикам як журналист дар шаҳри Ӯш нозирони интихоботӣ ҳамла намуданд.

Гулноза Саид, ҳамоҳангсози барномаҳои Кумитаи дифоъ аз журналистон дар умури Аврупо ва Осиёи Марказӣ мегӯяд, мақомоти полис бояд боздоштҳоро таҳқиқ ва ҳам фаъолияти озод ва амни журналистонро ба ҳангоми пӯшиши таҳаввулоти аҳамияти миллидошта таъмин кунанд. Ӯ мегӯяд, агар қарор аст интихоботи Қирғизистон як маъракаи «озод, одилона ва қонунӣ эътироф шавад, пас журналистон бояд тавони онро дошта бошанд, ки ин маъракаро озодона ва бидуни тарс аз боздошту азияту озор пӯшиш диҳанд».

Дар Ӯш гурӯҳи нафарон монеи мусоҳибаҳои ду журналисти вебсайти Kloop бо овоздиҳандагон дар беруни нуқтаи овоздиҳӣ шуданд. Ин гурӯҳ журналистонро “хоин” номида, як зан яке аз журналистонро тела дода, телефонашро аз даст гирифт. Ходими полис ба ин қазия танҳо баъди он мудохила кард, ки зан бозгардони телефонро рад кард. Дар ниҳоят, ин зан аз болои журналистон барои “авбошӣ” шикоят намуд. Полис дар Ӯш инчунин хабарнигори вебсайти Eldik.media-ро барои наворгирӣ дар як нуқтаи овоздиҳӣ боздошт кард. Инчунин дар Бишкек як журналисти Kloop ҳангоми наворгирӣ дар нуқтаи овоздиҳӣ боздошт шуд. Полис дар ҳарду ҳолат иддао кард, ки гӯё журналистон ҳақи наворгирӣ дар дохили нуқтаи овоздиҳиро надоштанд, вале ба навиштаи Кумитаи дифоъ аз журналистон, баръакс, қонунҳои матбуоти Қирғизистон наворгириро дар нуқтаҳои раъйгирӣ иҷоза додаанд.

Намояндагони ҳизбҳои норозӣ аз интихоботи маҳаллии Қирғизистон гуруснашинӣ мекунанд

Эътирозҳои пас аз интихоботӣ дар Қирғизистон.

Намояндагони ҳизбҳои норозӣ аз натиҷаҳои интихоботи маҳаллӣ дар Қирғизистон тасмим доранд, имрӯз, 14-уми апрел гуруснашинӣ эълом кунанд.

Дар ин бора рӯзи 13-уми апрел раиси Ҳизби коммунистии Қирғизистон Рисбек Тойбеков дар наздик бинои комисияи интихоботӣ хабар дод.

"Шуруъ аз 14 апрел намояндагони ҳизби мо инҷо хайма мезананд, мо гуруснашинӣ эълом мекунем. Иқдом 3 рӯз давом мекунад. Моро ки намехоҳанд шунаванд, маҷбур шудем, ин иқдомро рӯи даст гирем", - гуфт Тойбеков.

Вай ба ҳизбҳои дигар пешниҳод кард, ки ба иқдоми онҳо ҳамроҳ шаванд.

Барои 45 курсии маҷлиси шаҳрии Бишкек дар интихоботи рӯзи 11 апрел 25 ҳизби сиёсӣ мубориза бурд. Ба иттилои пешакӣ, танҳо 6 ҳизби сиёсӣ садди 7 дарсадиро убур ва вориди порлумон шудаанд.

Ҳизбҳои сиёсие, ки ба маҷлисҳои маҳаллӣ роҳ наёфтаанд, талаби бекорсозии натиҷаҳои интихоботро доранд.

Ҷо Байден бо Владимир Путин тариқи телефон гуфтугӯ кард

Президенти ИМА Ҷо Байден рӯзи 13-уми апрел бо президенти Русия Владимир Путин гуфтугӯ кард. Ду президент масоили минтақавиву байналхалқӣ, аз ҷумла муносибатҳои ИМА бо Русияро баррасӣ карданд.

Байден гуфтааст, ки ИМА дар ҳифзи истиқлол ва тамомияти арзии Украина мавқеи устувор дорад. Вай ҳамчунин аз афзоиши ҳузури низомиёни рус дар марз бо Украина изҳори нигаронӣ карда, аз Русия даъват кард, ки шиддатро коҳиш диҳад.

Хабари гуфтугӯи телефонии Путин бо Байднеро сомонаи Кремл низ нашр кард. Дар сомона гуфта шудааст, ки ин гуфтугӯ бо ташаббуси ҷониби Амрико сурат гирифтааст. Ба иттилои Кремл, Байден ба президенти Русия пешниҳод кардааст, ки дар фурсатҳои наздик мулоқот кунанд.

Ҳунарманд ва ҳаҷвнигори шинохта Қиёмиддин Чақалов даргузашт

Қиёмиддин Чақалов дар саҳнаи театр. Акс аз бойгонӣ.

Қиёмиддин Чақалов, ҳунарманд ва ҳаҷвнигори шинохтаи тоҷик, даргузашт. Дар ин бора ҳамкорони ӯ субҳи 14-уми апрел хабар доданд.

Ҳунарманди шинохта 76 сол дошт ва солҳои дароз дар Театри ба номи Абулқосим Лоҳутӣ кор мекард. Сабаби марги ӯ дақиқ нест.

Қиёмиддин Чақалов соли 1945 дар деҳаи Ҳуванди ноҳияи Файзобод ба дунё омада, факултаи актёрии Донишкадаи санъати Тоҷикистонро хатм кардааст.

Ҳунарманди шинохта чанд сол пеш дар суҳбат ба Радиои Озодӣ гуфта буд, дар театр тақрибан 50 нақш офаридааст ва қариб ҳамаашон мазҳакавӣ буданд.

Ҳунарманди шинохта дар он суҳбат гуфта буд, "дар ҷомеаи Тоҷикистон баъзан байни обу оташ мемонӣ, намедонӣ, ки кадом гапро бизанӣ ва аз кадомаш худдорӣ кунӣ."

"Оби дарёҳо 30% кам аст." Маҳдудияти интиқоли барқро камтар карда, аммо аз байн набурдаанд

Мушкили барқ дар Тоҷикистон солҳо боз вуҷуд дорад

Ширкати "Барқи тоҷик" маҳдудияти интиқоли нерӯи барқро ба хонаҳои мардум "камтар" карда, аммо пурра аз байн набурдааст.

Баъзе аз сокинон гуфтанд, дар рӯзи аввали моҳи Рамазон аз соати ёздаҳи шаб то сеи субҳ барқ надоштанд. Иддае аз корбарон мегӯянд, бо эълони сабукӣ дар маҳдудияти интиқоли барқ тағйиреро надиданд. Гузашта аз ин, дар баъзе минтақаҳо шабонарӯзи охир интиқоли оби ошомиданӣ низ маҳдуд шудааст.

Нозирҷон Ёдгорӣ, сухангӯйи ширкати "Барқи тоҷик", рӯзи 13-уми апрел ба Радиои Озодӣ гуфт: "Маҳдудият сабук карда шуд. Ҳамакнун дар вақти ифтор ва оғози рӯзадорӣ интиқоли нерӯи барқ қатъ карда намешавад. Ҳамзамон “Барқи тоҷик” мавзӯи пурра бекор кардани маҳдудияти интиқоли нерӯи барқро баррасӣ дорад.”

Вай афзуд, ба сабаби камии об водор шудаанд, фаъолияти Маркази барқиву гармидиҳии Душанбе-2-ро ҳатто бо фарорасии ҳавои гарм идома диҳанд, “то сокинони кишвар бо нерӯи барқ бештар дастрасӣ дошта бошанд". Гуфта мешавад, ин марказ бо истифода аз ангишт кор карда, то 80 дарсади талаботи сокинони пойтахти Тоҷикистонро бо нерӯи барқ ва гармӣ таъмин мекунад.

Нозирҷон Ёдгорӣ гуфт, оби рӯдхонаҳои бузурги кишвар дар муқоиса бо ҳамин давраи соли гузашта 30 дарсад кам аст ва лағви “лимит”-ро мушкил кардааст, ҳарчанд кишвар дар ҳафтаҳои охир шоҳиди боронгариҳост.

Қаблан масъулони Маркази обу ҳавошиносӣ ва Маркази пиряхшиносии Академияи миллии илмҳои Тоҷикистон ба Радиои Озодӣ гуфта буданд, ки захираи барф дар кӯҳҳои кишвар дар муқоиса бо соли гузашта ду маротиба камтар аст.

Аз сӯйи дигар, хабаргузории “Авесто” бо такя ба маълумоти Оҷонси омори Тоҷикистон хабар дод, ки бо вуҷуди ҷорӣ шудани маҳдудият дар истифодаи нерӯи барқ дар рустоҳои кишвар, Душанбе интиқоли барқро ба хориҷа қатъ накардааст.

Тибқи иттилои ин манбаъ, Тоҷикистон дар ду моҳи аввали имсол аз ҳисоби содироти нерӯи барқ ба хориҷ беш аз 7 миллион доллар даромад гирифтааст.

Мақомоти ширкати “Барқи тоҷик” низ дар нишасти хабарӣ идомаи содироти нерӯи барқро ба Афғонистон зикр карда, изҳор доштанд, ки барои дар ҳолати корӣ нигоҳ доштани хатҳои интиқоли нерӯи барқ содироти он ба миқдори андак ҳатмӣ аст.

Зариф Наим, иқтисоддон ва роҳбари дафтари Ҳизби сотсиалистии Тоҷикистон дар Душанбе, гуфт: “Ҳифзи хатҳои интиқоли нерӯи барқ як паҳлӯи масъала аст. Тарафи дигари он ба мавзӯи рақобатҳои тиҷоратӣ рабт дорад. Агар Тоҷикистон ба ин кишвари ҳамсоя дар ин шароит барқ надиҳад, Афғонистон барқро аз кишварҳои дигар, аз ҷумла, Узбекистон метавонад бигирад. Дар ин сурат, мо метавонем як харидори бузурги барқи худро аз даст диҳему дар шароити доштани барқи изофӣ бехаридор монем."

Пештар ширкати “Барқи тоҷик” бо ширкатҳои барқрасони Афғонистону Узбекистон барои интиқоли нерӯи барқ дар соли ҷорӣ созишнома имзо карда буд. Интизор меравад, то поёни соли 2021 аз Тоҷикистон ба хориҷа беш аз 3 миллирад киловатт-соат нерӯи барқ содирот шавад.

Аммо корбарони шабакаҳои Радиои Озодӣ изҳор медоранд, ки давлат дар навбати аввал бояд эҳтиёҷоти мардуми кишварро бароварда созад ва танҳо он гоҳ аз ҳисоби барқ ё оби зиёдатӣ бо кишварҳои ҳамсоя вориди тиҷорат шавад.

Ёфтҳои бештар

XS
SM
MD
LG