Пайвандҳои дастрасӣ

Хабари нав

Хабарҳо

Русия ҳам рафтуомади амрикоиҳоро маҳдуд мекунад

Вазири корҳои хориҷии Русия Сергей Лавров ва Ҳилларӣ Клинтон котиби давлатии ИМА (Дублин 6 декабри соли 2012)
Вазири корҳои хориҷии Русия Сергей Лавров мегӯяд, Русия ба он мансабдорони амрикоӣ, ки ба қавли ӯ дар поймол намудани ҳуқуқи башар саҳм доранд, раводиди сафар ба ин кишварро нахоҳад дод. Изҳороти Лавров баъди тасвиби таҳримҳо бар зидди мансабдорони рус, ки дар марги вакили мудофиа Сергей Магнитский ва поймолшавии ҳуқуқи башар нақш доштаанд, пахш шуд. Қонуни Магнитский бахше аз барномаи бузургтаре мебошад, ки маҳдудиятҳои тиҷорати даврони Ҷанги сардро аз байн мебарад. Русия аз бахши марбут бо поймолшавии ҳуқуқи башари ин қонун ба хашм омада, ҷавоби муносиб ҳваъда дода буд.Ба нақли расонаҳои Русия Лавров ин масъаларо рӯзи панҷшанбе дар Дублин ба котиби давлатии ИМА хонум Ҳилларӣ Клинтон ошкор кардааст. Вазорати корҳои хориҷии Русия овоздиҳии Сенатро “намоиши театри мазҳака” номидааст.

Ҳамаи хабарҳои имрӯзро дар инҷо бихонед

Қазоқистон дар Самарқанд консулгарӣ боз мекунад

Регистони Самарқанд. Акс аз бойгонӣ.

Президенти Қазоқистон Қосимҷомарт Тоқаев 23 сентябр фармони боз кардани консулгарии генералии ин кишвар дар шаҳри Самарқанди Узбекистонро имзо кард.

Дар фармон гуфта шудааст, ки барои боз кардани консулгарӣ тамоми чораҳо андешида шавад.

Санаи боз шудани консулгарии генералии Қазоқистон дар Самарқанд гуфта намешавад.

Пештар хабар дода шуд, ки то охири соли равон дар Самарқанд консулгарии генералии Туркия боз мешавад.

Макрон хост, як ҳайат зери сарпарастии СММ ба Шинҷон фиристода шавад

Эммануэл Макрон, раиси ҷумҳури Фаронса.

Президенти Фаронса Эммануэл Макрон дар пайи нигарониҳо аз поймол шудани ҳуқуқи ақалиятҳои миллӣ, аз ҷумла уйғурҳо дар Чин даъват кард, ки зери сарпарастии СММ як ҳайат ташкил ва ба минтақаи Шинҷон фиристода шавад.

Ин даъвати Макрон ҳангоми суханрониаш дар Маҷмаи умумии СММ рӯзи сешанбе сурат гирифт. "Нигарониҳое, ки ҳамаи мо дар робита ба вазъи ақалиятҳои мусулмони уйғур дар Чин дорем, бояд ба назар гирифта шаванд",-изҳор дошт ӯ.

Бино ба хабарҳо, зиёда аз 1 миллион уйғур ва намояндагони ақалиятҳои дигари миллӣ дар минтақаи Шинҷони Чин дар "марказҳои бозтарбияи сиёсӣ" иҷборан нигаҳдорӣ мешаванд. Вале Пекин ин иддаоро рад карда, мегӯяд, онҳо "марказҳои бозомӯзӣ" ҳастанд, ки барои мубориза бо ифротгароӣ ташкил шудаанд.

Вашингтон ахиран фишорҳо ба Чинро ба далели муносибаташ бо уйғурҳои мусулмон сахттар кард.

Дар Минск эътирозгаронро бо мошинҳои обпош пароканда карданд

Тазоҳуроти мухолифон. Минск, Белорус, 23 сентябри соли 2020.

Пулиси шаҳри Минск барои пароканда кардани эътирозгарони зидди маросими савгандёдкунии президенти Белорус Александр Лукашенко аз мошинҳои обпош истифода кард.

Дертар шоҳидон гуфтанд, ки дар маркази пойтахти Белорус садои тир низ шунида шуд. Боздошти бераҳмонаи иштирокчиёни эътирози бидуни иҷозат низ сурат гирифтааст. Баъди ҳозир шудани нерӯҳои иловагӣ ба маҳалли тазоҳурот чандин бор оташ кушода шудааст. Ба иттилои хабаргузории "Интерфакс", маъмурон ба осмон оташ кушодаанд.

Кормандони мақомоти қудратии Белорус шоми чоршанбе эътирозгаронро аз назди Осорхонаи Ҷанги бузурги ватанӣ дур мекарданд ва чандин нафарро ҳам дастгир намудаанд. Дар бораи осебдидаҳо низ хабар дода мешавад.

Дирӯз расонаҳои Белорус хабар доданд, ки дар шаҳри Минск маросими адои савганди Александр Лукашенко ба даври нави президентӣ махфиёна барпо шуд.

Ба ин маросим мақомдорони давлатӣ, аз ҷумла вакилони порлумон, роҳбарони мақомоти давлатӣ, роҳбарони расонаҳои давлатӣ, ходимони илм, фарҳанг ва варзиш даъват шуда буданд.

Лукашенко дар интихоботи президентии рӯзи 9 август баранда эълом шуд. Мухолифони Белорус аз натиҷаҳои интихобот розӣ нестанд ва аз як моҳ ба ин тараф эътироз доранд. Мухолифон мегӯянд, натиҷаҳои интихоботро тақаллуб карданд.

Додгоҳи Қирғизистон 300 ҳазор сом ҷуброни "Азия Нюс" ба як вазирро қонунӣ номид

Бинои Додгоҳи олии Қирғизистон.

Додгоҳи олии Қирғизистон 23 сентябр шикояти нашрияи "Азия Нюс"-ро аз болои ҳукми додгоҳи шаҳрии Бишкек баррасӣ карда, онро бетағйир гузошт.

Дар ин бора фаъоли маданӣ Одил Турдуқулов хабар дод. Ба гуфтаи ӯ, Додгоҳи олии Қирғизистон низ нашрияро вазифадор кард, ки ба вазири умури дохилии ин кишвар Кашкар Ҷунушалиев 300 ҳазор сом (беш аз 3780 доллар) ҷуброн пардозад.

Ин қарорро моҳи феврали соли равон додгоҳи шаҳрии Бишкек содир карда буд, вале масъулони нашрия ба он изҳори норозигӣ карда, ба Додгоҳи олии Қирғизистон, ки охирин зинаи шикояти додгоҳӣ аст, муроҷиат карданд.

Кашкар Ҷунушалиев нашрияи "Азия-Нюс"-ро барои матлабҳое, ки аз 25 апрел то 16 майи соли 2019 нашр шуда буданд, ба додгоҳ кашида буд. Ба гуфтаи вазир, "нашри иттилои носаҳеҳ ва коллаж (акси дасткоришуда)" шаъну шарафи ӯро паст задаанд.

Дар акси яке аз матлабҳо сари вазир ба бадани муш часпонида ва дар сарлавҳа навишта шуда буд, ки "Оё Кашкар каламуш аст?".

Додгоҳи ноҳияи Октябри пойтахти Қирғизистон моҳи декабри соли гузашта даъвои Ҷунушалиевро қисман қонеъ ва нашрияро ба пардохти 1 миллион сом вазифадор кард. Вале расона аз он ба додгоҳи шаҳрӣ шикоят бурд.

Шумораи расмии қурбониёни COVID-19 дар Тоҷикистон ба 74 нафар расид

Масъулони Вазорати тандурустии Тоҷикистон омори нави талафот аз COVID-19 ва, инчунин, шумори беморону қурбониёнро аз коронавируси нав эълон карданд.

Вазорат рӯзи 23-юми сентябр гуфт, дар шабонарӯзи ахир марги як нафар аз бемории ҳамагир тасдиқ шудааст. Бо ин, шумори умумии ҷонбохтагон аз коронавируси нав ба 74 нафар расид.

Ба иттилои расмӣ, дар шабонарӯзи гузашта 43 мавриди нави гирифторӣ ба коронавирус тасдиқ шудааст. Аз охири моҳи апрел то ин дам 9475 нафар бемор шуда, 8244 кас шифо ёфтаанд. Айни замон 108 нафар зери назорати пизишкон будаанд.

Бисёре аз мутахассисон мегӯянд, омори расмии мақомот миқёси воқеии сирояти беморӣ ва талафот дар Тоҷикистонро нишон намедиҳад ва теъдоди беморону фавтидагон бештар аз он аст, ки вазорати тандурустӣ мегӯяд.

Муассисаҳои байналмилалӣ мегӯянд, заъфи мақомоти тандурустӣ дар озмоиши васеъ аз беморӣ метавонад, як сабаби кам будани омори гирифторону талафот бошад.

Аз қатли Искандари Хатлонӣ 20 сол гузашт. ВИДЕО, АКС

Искандари Хатлонӣ

Аз замони қатли Искандари Хатлонӣ, шоир ва рӯзноманигори шинохтаи тоҷик, бист сол гузашт.

Ӯро 21-уми сентябри соли 2000 дар хонааш дар шаҳри Маскав ба қатл расонданд, вале то кунун касе барои куштани шоири тозагӯ ва хабарнигоре хушқалам, ки барои бахши тоҷикии Радиои Озодӣ ва пеш аз он барои бахши форсии Би-би-сӣ гузориш медод, муҷозот нашудааст.

Искандари Хатлонӣ (Искандар Идиев) зодаи шаҳри Кӯлоби вилояти Хатлон аст. Ӯ 12-уми октябри соли 1954 дар хонаводаи муаллим ба дунё омада, баъд аз хатми мактаби миёна таҳсилро дар Техникуми сохтмонии шаҳри Душанбе давом дод.

Аммо меҳру муҳаббат ба фарҳангу адаб ва шеъру шоирӣ, ӯро ба Донишкадаи адабии ба номи Максим Горкийи шаҳри Маскав бурд ва ин амр таҳаввулоте дар ҳаёти минбаъдаи ӯ ворид кард. Шеърҳои нахустини вай ҳанӯз дар айёми мактабхонӣ дар охири даҳаи 1960 ва аввалҳои даҳаи 1970 дар матбуоти шаҳрӣ, вилоятӣ ва ҷумҳуриявии Тоҷикистон чоп шудааст.

Бо он ки саҳми Искандари Хатлонӣ дар таҳия ва тарҷумаи осори шоирону нависандагони тоҷик дар Маскав муҳим дониста мешавад, ҳамзамон баргузории маҳфилҳо ва шабнишиниҳои адибони тоҷик бо ташаббусси вай сурат гирифтааст. Бахусус, маҳфили ёдбуди шодравон Лоиқ Шералӣ - шоири саршиноси тоҷик дар Маскав дар 11-уми августи соли 2000 охирин иқдоми Искандари Хатлонӣ қабл аз маргаш буд.

Аз Искандари Хатлонӣ чанд маҷмӯаи шеърӣ, назири «Парвоз» (1981), «Шукуфа» (1986), «Садои пои вожаҳо» (1988) ва «Кушоиш» рӯи чоп омадааст. Аммо Искандар шеърҳои дигаре низ гуфтааст, ки то ба ҳол дар як маҷмӯа гирдоварӣ нашудаанд. Алишер Идизода, бародари Искандар, ду сол пеш маҷмӯаи нав, ки ашъори ӯро аз овони мактабхонӣ то лаҳзаи маргаш дар бар мегирад, таҳия карда ва дар нашриёти «Адиб» чоп намуд.

Модари Искандари Хатлонӣ: "Хуршеди ховар ояд"
лутфан мунтазир бошед

Феълан кор намекунад

0:00 0:05:22 0:00

Аксҳои бештар аз Искандари Хатлонӣ:

Ҷузъиёти фирори ду шаҳрванди Тоҷикистон аз зиндоне дар Доғистони Русия

Мақомоти Доғистон гуфтанд, ки Шамил Бойматов аз Тоҷикистон ҳамроҳи панҷ нафари дигар аз зиндон гурехтааст

Вазорати корҳои дохилии Доғистон хабар дод, ки ду нафар аз зиндониёни фирорӣ аз маҳбаси мавзеи Шамхали шаҳри Махачқалъа шаҳрвандони Тоҷикистон будаанд. Аз онҳо Шамил Бойматов ва Маҳмадрасул Машрабов ном бурда мешавад.

Бойматов зодаи ноҳияи Ёвон ба 12 соли зиндон ва Машрабов ба 8 соли зиндон маҳкум шудаанд. Бино ба маълумотномаи нашкардаи мақомоти милисаи Доғистон, Бойматов ба кочоқи маводи мухаддир ва Машрабов ба омодагӣ ба ҷиноят ё қасди содир кардани ҷиноят гунаҳкор шудаанд. Ҳамроҳи онҳо чаҳор шаҳрванди Доғистон низ аз маҳбас гурехтаанд.

Дар сомонаи расмии Сарраёсати иҷрои ҷазои ҷиноӣ дар Доғистон омадааст: "Соати 23:40-и шаби 22-юми сентябр ҳангоми тафтиши пайраҳаи назаротии зиндон дар он заминкан (нақби дастисохт) ошкор шуд. Дар натиҷаи шумориши зидониён маълум шуд, ки 6 нафар нестанд."

Айни замон мақомоти Русия амалиёти ҷустуҷӯи зиндониёни фирориро шуруъ кардаанд.

Сарраёсати иҷрои ҷазои ҷиноӣ дар Доғиистон рӯзи 23-юми сентябр бо нашри изҳорот гуфт, Бойматов Шамил Раҷабалиевич 30-сола аст ва моҳи декабри соли 2016 боздошт шудааст.

Тибқи омори Сарраёсати иҷрои ҷазои ҷиноии Русия ё ФСИН дар ин кишвар то оғози соли 2020 беш аз 7 ҳазор шаҳрванди Тоҷикистон адои ҷазо мекарданд. Аз миёни шаҳрвандони хориҷӣ, ки дар Русия дар зиндон афтодаанд, шумораи тоҷикон аз ҳама зиёд аст.

HRW беамалии ҳукумати Туркманистонро дар давраи пандемия интиқод кард

15-уми сентябр, дар як бонки Туркманистон

Созмонҳои Human Rights Watch ва гурӯҳи “Ташаббуси Туркманистон барои ҳуқуқи башар” гуфтанд, ки беамалии ҳукумати Туркманистон дар шароити поинравии иқтисод дар замони пандемияи COVID-19 бӯҳрони аз он пеш вуҷуддоштаи дастрасӣ ба ғизоро боз ҳам сангинтар кардааст. Дар ин ҷумҳурӣ болоравии якбораи қимати ғизову коҳиши захираҳо мушоҳида мешавад ва вазъ дар қиёс бо соли 2016 вазнинтар мебошад. То ҳол ҳукумати саркӯбгари Туркманистон вуҷуди коронавирусро дар кишвар рад карда аз таъмини гурӯҳҳои ниёзманд бо кӯмаку захираҳо худдорӣ мекунад. Ба навиштаи ин ду гурӯҳи ҳомии ҳуқуқ, дар давраи пандемия мизони бекорӣ ҳам шадидан боло рафтааст. Дар гузориши вижаи ин ду созмон дар таърихи 23-юми сентябр омадааст, ки набуди стратегияи ёрии иқтисодиву иҷтимоӣ ба мардум дар давраи пандемия ба маънои аз ҷониби ҳукумат иҷро нашудани ӯҳдадориҳои ҳукумат барои таъмини мардум бо зиндагии шоиставу ҳуқуқ ба ғизо мебошад. Дар ин гузориш аз забони мардуми оддӣ навишта шудааст, ки дар пасманзари камбуди ғизо нархҳо боло рафта қашшоқӣ ҳам афзоиш ёфтааст.

Саудӣ сафар барои Ҳаҷҷи умраро иҷоза медиҳад

Ҳукумати Арабистони Саудӣ аз ҳафтаи аввали моҳи октябр марҳила ба марҳила сафар барои ҳаҷҷи умра ва зиёрати масҷиди паёмбарро иҷоза медиҳад. Вазорати ҳаҷ ва умраи Арабистони Саудӣ дар моҳи марти соли равон ба хотири мубориза бо коронавирус сафари зоирони дохилӣ ва хориҷӣ ба ҷойҳои муқаддасро маҳдуд карда буд.

Хабаргузории расмии Саудӣ рӯзи 22 сентябр аз қавли як манбаъ дар Вазорати умури дохилии он кишвар эълон кард, ки бино ба пешниҳоди мақомоти зидахли мубориза бо пандемияи фарогир ва дар посух ба дархости бисёре аз мусалмонон барои адои ҳаҷҷи умра, ин маросим бо риояи тадбирҳои беҳдоштӣ иҷоза дода мешавад.

Ба гуфтаи манбаъ, иҷозаи адои ҳаҷҷи умра ва ворид шудан ба Масҷид Ал-Ҳаром ва зиёрати Масҷиди навабӣ дар чаҳор марҳила сурат мегирад.

Дар марҳилаи аввал ба шаҳрвандони худи Саудӣ ва афроди муқим дар дохили ин кишвар барои адои умра аз 4-уми октябр ва он ҳам 6 ҳазор нафар дар як рӯз дар Масҷид Ал-Ҳаром иҷоза дода мешаванд. Дар марҳилаи дувум иҷозаи умра, зиёрат ва намоз хондан ба шаҳрвандон ва афроди муқими дохили Саудӣ (15 ҳазор умракунанда ва 40 ҳазор намозгузор дар як рӯз) аз 18 октябр иҷоза дода хоҳад шуд.

Дар марҳилаи савум ба шаҳрвандони Саудӣ ва хориҷӣ (20 ҳазор умракунанда ва 60 ҳазор намозгузор дар як рӯз) аз 1-уми ноябр бо риояти чораҳои беҳдоштӣ иҷоза дода мешавад.

Дар марҳилаи ахир иҷозаи адои Ҳаҷҷи умра ва намозгузорӣ барои шаҳрвандон ва афроди муқими ин кишвар ва хориҷ ба мизони 100 дарсад ҳар вақте, ки мутахассисон поён ёфтани хатари поён ёфтани пандемияро эълом кунанд, иҷоза дода мешавад

Ҳукумат аз онҳое, ки барои адои ҳаҷҷи умра сафар мекунанд, хостааст, ки ниқоби муҳофизатӣ ба бар кунанд ва фосилаи иҷтимоиро риоя намоянд.

Аз сӯе мақомоти Вазорати ҳаҷҷ ва умраи Арабистони Саудӣ гуфтаанд, ки вуруди зоирон ва намозгузорон аз тариқи сабтином дар нармафзори "Иътамарно" сурат мегирад. Ин тарҳ аллакай аз рӯзи 27-ум сентябр дастрас хоҳад буд.

Омори давлатӣ нишон медиҳад, ки даромади солонаи Арабистони Саудӣ аз маросими ҳаҷҷи фарзӣ ва ҳаҷҷи умра 12 миллиард доллар аст.

Ҳар сол ҳудуди 2,5 миллион мусалмон аз беш аз 180 кишвари ҷаҳон барои адои ҳаҷ ба Арабистони Саудӣ сафар мекунанд.

Аз Тоҷикистон ҳам солона ҳазорон нафар барои адои Ҳаҷҷи умра сафар мекунанд.

Рӯҳонӣ: «Амрико на метавонад музокираро бар мо таҳмил кунад ва на ҷангро”

22-юми сентябр. Президенти Эрон Ҳасани Рӯҳонӣ дар Маҷмаи кулли СММ тавассути видео-паём суханронӣ мекунад

Президенти Эрон Ҳасани Рӯҳонӣ дар Маҷмааи кулли СММ рӯзи 22-юми сентябр гуфт, ки Эрон “абзори чоназании дохилӣ ва интихоботии Амрико нест”. Ӯ гуфт, «Амрико на метавонад музокираро бар мо таҳмил кунад ва на ҷангро”. Рӯзи 21-уми сентябр ИМА гуфт, ки алайҳи вазорати дифоъ ва дигар сохторҳои дастдошта дар барномаи силоҳҳои ҳастаии Эрон таҳримҳои нав ҷорӣ мекунад. Рӯҳонӣ гуфт, “зиндагӣ бо таҳрим сахт аст, аммо сахттар аз он зиндагӣ бидуни истиқлол аст”. Ҳафтае пеш дар посух ба изҳороти Трамп дар бораи он ки ҳама гуна ҳамлаи Эрон бо посухи аз он сангинтар рӯбарӯ мешавад, Теҳрон Вашингтонро аз роҳ додан ба “хатои стратегӣ” ҳушдор дод. Ин раддубадалҳо баъди он буд, ки бар асоси бархе хабарҳои нашршуда, Эрон гӯё дар андешаи посух додан ба қатли генерал Қосим Сулаймонӣ, раҳбари нирӯҳои Қудси Сипоҳи посдорони инқилоби исломӣ мебошад. Рӯҳонӣ рӯзи 22-юми сентябр гуфт, ки ҳама гуна маъмурияти ИМА роҳи дигаре ба ҷуз “тан додан ба истодагарии миллати Эрон” нахоҳад дошт. Трамп соли 2018 аз созиши ҳастаӣ бо Эрон, ки се сол пеш аз он аз ҷониби маъмурияти Барак Обама имзо шуда буд, хориҷ шуд ва нисбати Эрон таҳримҳои нав ҷорӣ кард.

Пеш аз интихоботи ИМА вакилон буҷаи муваққатии ҳукуматро қабул карданд

Ненси Пелосӣ, раиси Маҷлиси намояндагони ИМА

Маҷлиси намояндагони ИМА рӯзи 22-юми сентябр буҷаи муваққатии ҳукуматро тасдиқ кард, то ки шаш ҳафта пеш аз интихоботи президентии кишвар ҳукумат дар ҳолати масдудшуда боқӣ намонад. Баъди мувофиқаи демократҳо бо Кохи Сафед ва вакилони ҷумҳурихоҳ овоздиҳӣ барпо шуд ва буҷа бо раъйи орои 359 овоз ва мухолифати 57 нафар қабул шуд. Раиси маҷлис Ненси Пелосӣ дар як изҳороте гуфт, ки тибқи мувофиқа бо вазири молия Стивен Мнучин, ҳамакнун аз масдуд шудани ҳукумат дар остонаи интихобот ва дар марҳилаи хатми соли молӣ пешгирӣ мешавад. Акнун бояд бо матни ин санад Сенат мувофиқат карда президент Доналд Трамп ҳам имзои худро гузорад. Буҷаи нав иловатан 8 миллиард долларо пешбинӣ мекунад ва ин маблағҳо барои таъмини кӯдакон бо ғизое бо қимати паст ва имтиёз ба кишоварзон равона хоҳанд шуд.

Маросими пинҳонии савгандёдкунии президент Лукашенко дар Минск

Президент Александр Лукашенко

Дар шаҳри Минск ғайримунтазира маросими шашуми савгандёдкунии президент Александр Лукашенко баргузор шуд, дар ҳоле, ки дар Беларус эътирозҳо аз тақаллуб шудани натиҷаҳои интихобот хотима наёфтаанд. Хабаргузории давлатии БелТА гузориш дод, ки дар маросими савгандёдкунӣ “чандсад мақомдори баландпоя” даъват шуданд. Омори воқеӣ маълум нест. БелТА навишт, ки Лукашенко дасти росташро болои конститутсияи Беларус гузошта қасам ёд карду зераш имзо гузошт. Дар идомаи хабар омадааст, ки баъди ин раиси комиссиюни интихоботии Беларус ба дасти ӯ шаҳодатномаи президенти кишварро тақдим кард.

Ин дар ҳолест, ки Лукашенко баъди 26 соли раҳбариаш дар муқобили як эътирози бесобиқаи мардумӣ қарор дорад. Ин нафарон ва ҳам мухолифин баъди интихоботи 9-уми август намоишҳои эътирозӣ барпо мекунанд ва аз Лукашенко тақозо доранд, ки аз мақом истеъфо бидиҳад ва дар кишвар интихоботи озоду одилонаи нав барпо шавад. Президенти 66-сола ба эътирозгарон бо боздошту ҳабс ва хушунат посух дод, бисёр эътирозгарон шиканҷа шуданд. Раҳбари мухолифон Светлана Тихановская ҳушдор дод, ки ҳама гуна талоши барпо кардани маросими савгандёдкунӣ “ғайриқонунӣ” хоҳад буд.

Абдулло: Бархе Толибони озодшуда аз зиндон дубора даст ба хушунат мезананд

12 сентябр, пойтахти Қатар шаҳри Давҳа. Д-р Абдулло дар рӯзи аввали музокироти сулҳ бо Толибон.

Раҳбари гурӯҳи музокиротии ҳукумати Афғонистон гуфт, шуморе аз Толибон, ки дар чаҳорчӯби музокироти сулҳ аз зиндонҳо озод шуданд, дубора ба майдони ҷанг баргаштанд. Абдуллоҳ Абдуллоҳ, раиси Шӯрои олии мусолеҳаи миллии Афғонистон гуфт, ки ҷараёни музокира бо Толибон дар Қатар аз замони оғозаш дар таърихи 12-уми сентябр хуб мегузарад, ҳарчанд, тибқи гузоришҳо, ҳарду ҷониб аз дастёбӣ ба созиш ҳанӯз дур ҳастанд. Вале, ба гуфтаи Абдулло, аз миёни 5 ҳазор Толибони зиндонӣ, ки дар чаҳорчӯби музокироти сулҳ озод шуданд, бархе дубора ба майдони ҷанг баргашта зидди ҳукумат меҷанганданд. Абдулло дар ҷараёни конфронси онлайнии Шӯрои равобити хориҷии ИМА рӯзи 22-юми сентябр гуфт, ки бархе аз Толибони озодшуда ба майдони ҷанг баргаштанд ва ин бо қарордоди сулҳ дар ихтилоф аст.

Бо вуҷуди идомаи музокироти сулҳ, мизони хушунат дар Афғонистон кам намешавад ва Абдулло аз ИМА ба унвони ҷонибе, ки ташаббуси сулҳ бо Толибонро рӯи даст дорад ва Покистон, ба унвони кишваре, ки эҳтимолан бо ин ҷангҷӯён дар иртибот аст, хост, ки онҳоро ба оташбас водор бикунанд. Абдулло гуфт, ки барои аввалин бор аз соли 2008 ният дорад базудӣ ба Покистон сафар кунад.

Дар ИМА шумори фавтидаҳо бар асари COVID-19 аз 200 ҳазор нафар гузашт

Қаламҳои тозаву истифодашудаи ситоди Байден

Дар ИМА шумори фавтидаҳо бар асари коронавирус аз хатти рекордии нави 200 ҳазор нафар гузашт. Дар миёни кишварҳои дигари шадидан осебдида аз вируси нав Мексика ва Бразилия ҳам ёд мешаванд. Ҷенифер Нуззо, як муҳаққиқи донишгоҳи Ҷон Ҳопкинс ин оморро “ғайриқобили дарк” номид, дар ҳоле, ки сироятшиноси аршади ҳукуматӣ Энтони Фаучи гуфт, ки ин омор “ҳушёркунанда” аст. Ба ҳисоби миёна ҳар рӯз дар ИМА тахминан 800 нафар бар асари коронавирус ҷон медиҳанд. Ин омор назар ба миёнаҳои апрел, ки рӯзона тахминан 2800 нафар буд, камтар аст, вале боз ҳам вазъ нигаронкунанда мемонад. Мавзӯи коронавирус ба масъалаи аслии пешазинтихоботии амрикоиҳо табдил шудааст. Президент Доналд Трамп гуфт, ки то ба ин ҳад расидани омори марги инсонҳо бар асари вируси нав “шармандагӣ” ва “даҳшат” аст. Айни замон ӯ тахмин кард, ки мизони марг метавонист аз ин ҳам бадтар шаад. Ҷо Байден, рақиби демократи Трамп дар интихобот гуфт, ки ин омор “такондиҳанда” аст “чунин талафот ҳеҷ гоҳ фаромӯш нахоҳад шуд”.

Навалний аз беморхона рухсат шуд

19 сентябр, беморхонаи "Шарите"

Мунаққиди Кремл Алексей Навалний аз беморхонаи Олмон рухсат шуд. Ӯ баъди як заҳролудшавӣ дар парвози ҳавопаймое дар Сибир моҳи август ба Олмон барои муолиҷа бурда шуд ва давоми 32 рӯз таҳти муроқибати тиббии табибон қарор дошт. Мақомоти Олмон гуфтанд, ки натиҷаҳои санҷиши тестҳо дар Олмон, Фаронса ва Шведсия муайян кард, ки Навалний аз заҳри навъи “Новичок” заҳролуд шудааст.

Ғарб аз Русия шарҳи ин қазияро тақозо кард, вале Маскав гуфт, ки бино ба нокофӣ будани далелҳо ин ҳодиса тафтиш намешавад. Кремлин ҳама гуна дахолаташ ба ин қазияро ҳам рад кардааст. Дар изҳороти расмии беморхонаи “Шарите”-и Берлин рӯзи 23-юми сентябр гуфта шуд, ки “саломатии бемор ба таври қобили мулоҳиза беҳтар шудааст ва ӯ метавонад аз беморхона озод шавад”. Табибони олмонӣ навиштанд, ки имкони барқарории пурраи саломатии ӯ вуҷуд дорад, вале ҳанӯз барвақт аст, ки дар бораи оқибатҳои дарозмуддати ин заҳролудшавӣ сӯҳбат шавад. Навалний 32 рӯз дар беморхонаи Берлин буд ва аз ин мӯҳлат 24 рӯзашро дар утоқи муроқибати вижа пуштисар кард.

Узбекистон мехоҳад, ваксинаи русии зидди коронавирусро озмояд

Мақомоти Узбекистон мехоҳанд, ваксинаи русии зидди COVID-19 озмоянд. Дар ин бора мақомоти беҳдоштии Русия рӯзи 21 сентябр хабар доданд.

Ба иттилои "Роспотребнадзор", як ниҳоди беҳдоштии Русия, ахиран мақомоти тандурустии Узбекистон бо ҳамтоёни руси худ масъалаи пешгирӣ аз паҳншавии коронавирус ва сохтани ваксинаи зидди ин вирусро баррасӣ кардаанд.

Ҷониби Узбекистон барои озмоиши ваксинаи истеҳсолии Русия изҳори омодагӣ кардааст.

Русия 11 август эълом дошт, ки нахустин шуда дар ҷаҳон ваксинаи зидди коронавирусро сохтааст. Кишварҳои ғарбӣ ба ин иддаои Русия шубҳа доранд.

Трамп дар СММ хост, Чинро барои коронавирус ба ҷавобгарӣ бикашанд

Доналд Трамп, раиси ҷумҳури Амрико.

Президенти ИМА Доналд Трамп ҳангоми суханронӣ дар 75-умин Маҷмаи умумии СММ Чинро ба паҳн кардани коронавирус ва риоя накардани созишномаҳои байналмилалӣ айбдор кард. Ӯ ҳамчунин гуфт, Амрико терроризми байналмилалиро шикаст медиҳад.

Трамп бори дигар коронавирусро "вируси чинӣ" номид. Вай аз ҷомеаи ҷаҳонӣ даъват кард, ки Чинро барои паҳн кардани ин вабо ба ҷавобгарӣ бикашанд. Ба гуфтаи ӯ, Чин дар рӯзҳои аввали паҳн шудани беморӣ аз бастани марзҳои худ даст кашида, иҷозат дод, ки он паҳн шавад.

Намояндаи Чин, ки пас аз президенти ИМА суханронӣ кард, тамоми ин айбҳоро "комилан беасос" номид.

Президент Трамп ҳамчунин Созмони ҷаҳонии тандурустиро (СҶТ) дар бесалоҳиятӣ айбдор карда, гуфт, он ба нафъи Чин кор мекунад. СҶТ гӯё аз аввал аҳамияти коронавирусро кам нишон дода, дар бораи он маълумоти нодуруст пешниҳод кардааст. ИМА баҳори соли 2020 аз созмон хориҷ шуда, гуфт, сармоягузории онро қатъ мекунад.

Трамп хабар дод, ки се ваксинаи амрикоӣ аллакай дар марҳалаи озмоиши клиникӣ қарор доранд ва рӯзҳои наздик ба фурӯш мебароянд. Вале санаи дақиқеро ном нагирифт.

Ӯ Чинро ба нодида гирифтани созишномаи байналмилалии иқлими Порис низ айбдор карда, гуфт, ҳаҷми партовҳои ин кишвар ба обу ҳаво афзоиш ёфтааст.

Дар марзи Русия бо Қазоқистон 3200 муҳоҷири қирғиз дармондааст

Муҳоҷирон аз Осиёи Миёна дар марзи Русия бо Қазоқистон.

Ҳудуди 3200 муҳоҷири корӣ аз Қирғизистон ҳамоно дар марзи Русия бо Қазоқистон дармонда, наметавонанд ба ватан баргарданд.

Ба огаҳии сафорати Қирғизистон дар Русия, гуфтугӯҳо барои ташкили убур тавассути Қазоқистон идома доранд.

Бо мақомоти вилояти Оренбург ва ҷумҳурии Бошқирдистон низ барои кӯмак ба қирғизистониҳо гуфтугӯҳо анҷом мешаванд. Дар ҳоли ҳозир онҳо дар хаймаҳое зиндагӣ доранд, ки ҷониби Русия ташкил кардааст.

Дар сафорати Қирғизистон гуфтанд, ҷониби Қазоқистон феълан барои кушодани марз розӣ нашудааст ва бинобар ин, аз муҳоҷирон даъват мешавад, ки ба марзи Русия бо он кишвар нараванд.

Раҳмон дар СММ гуфт, эҳтимол дорад иқтисодиёти Тоҷикистон имсол $2 млрд зарар бинад

Эмомалӣ Раҳмон, раиси ҷумҳури Тоҷикистон.

Раиси ҷумҳури Тоҷикистон дар 75-умин нишасти солонаи Маҷмаи Умумии Созмони Милали Муттаҳид гуфтааст, ки соли равон зарари умумӣ ба иқтисодиёти Тоҷикистон метавонад зиёда аз 2 миллиард долларро ташкил диҳад ва дар оянда ҳам афзоиш ёбад.

Нишасти Маҷмаи Умумии СММ бинобар пандемияи фарогири КОВИД-19 имсол ба таври маҷозӣ ё онлайнӣ баргузор мешавад ва сарони кишварҳо ба таври видеоӣ дар ин ҳамоиш суханронӣ мекунанд.

Дар матни суханронии Эмомалӣ Раҳмон, ки расонаҳои давлатӣ онро нашр карданд, раиси ҷумҳури Тоҷикистон бештар сари пайомадҳои пандемияи фарогири COVID-19, мубориза бо терроризм ва экстремизм ва вазъи амниятӣ дар минтақа ва ҷаҳон суҳбат карда, аз таҳдидҳое ном бурдааст, ки барои муқобила бо онҳо кишварҳои дунё ба таҳким бахшидани муносибатҳои бисёрҷониба ё мултилатерализм ниёз доранд. Ин дар ҳолест, ки расонаҳои ҷаҳонӣ Тоҷикистонро аз лиҳози сиёсӣ пойбанди Русия ва иқтисодӣ вобастаи Чин меноманд. Ахиран Душанбе аз Пекин дархост кардааст, шароити қарзҳояшро ба Тоҷикистон дар шароити ҳамагири COVID-19 сабуктар кунад.

Ба гуфтаи оқои Раҳмон, пандемия ба сармоягузории хориҷӣ, тиҷорат, сайёҳӣ ва ба вижа фаъолиятҳои нақлиётӣ таъсир расонда, боиси паст рафтани тамоми соҳаҳои иқтисод шудааст. Президент Раҳмон гуфтааст, ки чунин ҳолат дар баробари рушди Тоҷикистон душвориҳои зиёди бесобиқаро ба бор меорад. Дар ин замина коҳиши 40 дарсадии пули муҳоҷирони тоҷик аз Русия ҷудогона зикр наёфт. Мақомоти Тоҷикистон одатан саҳми маблағҳои мефиристодаи муҳоҷирони кориро дар чархиши иқтисоди ин кишвар қоил нестанд.

Оқои Раҳмон дар бахше дигар аз суханрониаш ба ҳамкорӣ бо ниҳодҳои СММ таъкид карда ва гуфтааст, ки ният доранд номзадии Тоҷикистонро ба узвияти ғайридоимӣ дар Шӯрои Амнияти Созмон барои солҳои 2028-2029 пешбарӣ намоянд.

Нигаронии раиси ҷумҳури Тоҷикистон аз пайомадҳои пандемияи фарогир ба иқтисодиёти кишвараш дар ҳоле аст, ки аз моҳи март ба ин тараф парвозҳои мунтазам ба Тоҷикистон қатъ шуда, арсаи сайёҳӣ ва меҳмондорӣ, ки як бахши пурдаромади иқтисод ба шумор мераванд, тақрибан аз даромад бозмондааст.

Помпео: Амрико ба заҳролудсозии Навалний посухи "ҳамвазн" медиҳад

Майк Помпео

Майк Помпео, вазири корҳои хориҷии Амрико, мавқеи Вашингтонро дар баробари заҳролудсозии мухолифи ҳукумати Русия Александр Навалний дар мусоҳиба бо расонаҳои олмонӣ шарҳ дод.

Ба гуфтаи Помпео, танқиди Амрико барои вокуниш нишон надодан ба қазияи Навалний беасос аст. Зеро Вашингтон ба ин назар аст, ки истифодаи силоҳи кимиёӣ ғайримумкин аст. Дар ин робита Помпео аз вокуниши Иёлоти Муттаҳида ба заҳролудсозии Сергей Скрипал ва духатарш Юлия дар моҳи марти соли 2018 дар Бритониё ёдовар шуд.

Помпео афзуд, ба маҳзи ба даст овардани ҳамаи далелҳо ИМА вокуниши ҳамвазн нишон хоҳад дод.

Вай гуфт, Вашингтон дар қазияи Навалний мунтазири хулосаи ташхиси Созмони силоҳҳои мамнӯи кимиёӣ аст. "Амрико ҳамзамон аз Русия интизори тафтиши заҳролудсозии Навалнийро дорад", -- гуфт Помпео.

Вай бори дигар аз сохтмони лӯлаи "Ҷараёни шимол-2" интиқод кард. "Мо умедворем, ки ин сохтмон ба охир намерасад", - афзуд Помпео. Ба гуфтаи вай, Амрико дар садад аст, ки барои пешгирӣ аз сохтмони лӯла эътилофе ташкил диҳад. "Мо умедворем, ки ҳукумати Олмон ҳам ба ин мавқеъ мегарояд. Фарқе надорад, ки ин гароиш ба заҳролудсозии Навалний рабт хоҳад дошт ва ё ба оқибатҳои вобастагӣ аз гази Русия", - гуфт котиби давлатии ИМА.

Навалний рӯзи 20-уми август ногаҳон худро бад ҳис кард ва баъди ду рӯз бо дархости ҳамсараш барои муолиҷа ба Олмон интиқол дода шуд. Мутахассисони олмонӣ гуфтанд, ки сиёсатмадори 44-сола ва як муборизи зидди фасод бо “Новичок”, ки ба гурӯҳи заҳрҳои низомӣ шомил мешавад, заҳролуд шудааст. Баъди ин ҳодиса бисёр кишварҳо аз Русия тақозо карданд, ки таҳқиқи мустақилонаи ин қазияро ба роҳ монад.

Русия гуфт, ки бо сабаби набуди далели қотеи заҳролудшавии Навалний парвандаи ҷиноӣ боз намешавад.

Русия масъалаи таъмини Қирғизистонро бо ваксина дар авлавият қарор медиҳад

Муовини раиси ҳукумати Русия Алексей Оверчук дар вохӯрӣ бо президенти Қирғизистон Сооронбой Ҷеенбеков гуфт, Маскав масъалаи таъмини Бишкекро бо ваксинаи зидди коронавирус дар авлавият қарор медиҳад.

Хадамоти матбуотии президенти Қирғизистон нагуфтааст, ки Ҷеенбеков дар ин мулоқот аз ҷониби Русия ваксинаи коронавирусро дархост карда буд, ё не.

Вале ӯ 12-уми сентябр дар суҳбат бо "Биринчӣ радио" гуфта буд, ки "интиқоли воксини русии "Спутник V ба кишвари мо хеле зарур аст, зеро коронавирус ҳамоно ба инсоният хатар эҷод мекунад. Русия якумин кишваре шуд, ки зидди коронавирус воксин сохт. Хабар доданд, ки он аллакай аз санҷиши клиникӣ гузаштааст ва истифодааш ҳам оғоз шудааст."

Русия аз ҳама пеш эълон кард, ки воксини нав ба зидди COVID-19-ро барои истифода расман сабт кард. Онро дар Озмоишгоҳи ба номи Гамалей офариданд.

Президенти Русия дар ҷаласаи ҳукумати кишвараш рӯзи 11-уми август хабар дод, ки дар кишвараш нахустин воксини зидди коронавируси нав сабт шудааст. Ба гуфтаи вай, воксин дар ҷараёни санҷиш коромадии худро нишон дода ва қодир аст, ки масунияти устувореро зидди коронавирус шакл диҳад.

Аммо на ҳама ба коромад будани воксин бовар доранд ва мегӯянд, воксин дуруст озмоиш нашудааст ва Русия шитоб мекунад.

Шикояти табибон аз навбатдории маҷбурӣ дар маркази тозатаъсиси зидди коронавирус

Бемористони ноҳияи Қува

Табибони ноҳияи Қуваи вилояти Фарғонаи Узбекистон шикоят доранд, ки онҳоро маҷбур мекунанд, дар маркази навташкили COVID дар деҳаи "Бегат" навбатдор истанд.

Ба қавли табибон, сардухтури ноҳияи Қува таҳдид кардааст, ки ҳар табибе навбатдор намеистад, аз ҷойи кораш маҳрум хоҳад шуд. Табибон мегӯянд, ба хотири набудани шароит ва норасоии лавозимоти муҳофизатии тиббӣ намехоҳанд дар марказ навбатдор истанд.

Бемористони рақами 2-и деҳаи "Бегат"-и Қуваро як ҳафта пеш ба маркази қабули мубталоёни коронавирус табдил доданд. Дар ҳоли ҳозир ба навбатдорӣ дар бемористони мазкур табибон аз минтақаҳои гуногуни Қува ҷалб карда мешаванд.

"Сардухтури ноҳия маҷбур мекунад, ки ҳар як табиб моҳе чаҳор рӯз дар он бемористон навбатдор биистад. Моро огаҳ карданд, ки дар сурати саркашӣ аз кор ронда хоҳед шуд. Бинобар ин, ҳамаи табибон ба хотири кори худро аз даст надодан ба навбатдорӣ дар беморхона розӣ мешаванд", - изҳор дошт яке аз табибон.

Бино ба гуфтаи кормандони беморхонаи "Бегат, дар ҳоли ҳозир дар онҷо 37 нафари мубтало ба коронавирус табобат мегиранд, ки 4 касашон дар шуъбаи эҳёгарӣ қарор доранд. 20-уми сентябр як бемор бар асари "илтиҳоби шуши дутарафа" ҷон додааст.

Бонки Миллии Тоҷикистон гуфт, ки ба кӣ ва ё чӣ бештар шубҳа кунанд

Бинои Бонки Миллии Тоҷикистон

Дар Тоҷикистон феҳристи амалиёти шубҳаовари молиявӣ ва ё доду гирифти амвол таҳия шуд. Ин санад “Феҳристи аломатҳои аҳд ва амалиёти шубҳанок” ном дорад, ки бо қарори Бонки Миллии Тоҷикистон тасдиқ шудааст ва рӯзи 22-юми сентябр дастраси Радиои Озодӣ шуд.

Минбаъд бонкҳо, ташкилоти қарздиҳӣ, ширкатҳои суғурта, лото, тотализаторҳо (ширкатҳои шартгузорӣ) ва нотариусҳо ҳангоми анҷом додани амалиёти молиявӣ, хариду фурӯши амволи ғайриманқул, сангу металҳои гаронбаҳо рафтори муштариёнро бояд аз рӯйи ин феҳрист назорат кунанд.

Агар дар рафтори муштарӣ яке аз ҳолатҳое, ки дар феҳрист зикр шудааст, зоҳир шавад, ширкат ва ё соҳибкор уҳдадор мешавад аз фаъолияти шубҳаовар ба мақомот хабар диҳад.

Дар муқаддимаи феҳрист гуфта мешавад, ҳадаф аз таҳияи санад пешгирӣ аз расмикунонии маблағҳои аз роҳи ҷиноят ба дастомада, маблағгузории терроризм ва паҳншавии силоҳи қатли ом аст.

Дар феҳрист як зумра ҳолатҳое ном бурда шудаанд, ки дар сурати зоҳир шудани он амалиёт шубҳаовар эътироф мешавад. Аз ҷумла:

“нигаронӣ ва безобитагии ғайриоддии аз ҳад зиёди муштарӣ ҳангоми аз ӯ талаб кардани маълумоти махфӣ;

муштарӣ аҳдҳои бисёр анҷом медиҳад, аммо фаҳмост, ки соҳиби чунин маблағи калон будани вай имконнопазир аст;

муштарӣ пешниҳод мекунад, ки аҳд бо қурби асъори хориҷӣ, ки аз қурби муқарраршуда фоидаи камтар дорад, анҷом дода шавад;

қабул ва барои инкасса фиристодани асъори нақди хориҷӣ, ки ифлосии шубҳанок дорад…”

Дар ин феҳрист аломати амалиёти шубҳаовар барои бонкҳо, ширкатҳои суғурта, лото, тотализаторҳо ва нотариусҳо дарҷ шудааст ва дар маҷмуъ беш аз 700 номгӯ аст.

Дар 75-солагии СММ Гутерреш аз ҳамраъйии бештари кишварҳо сӯҳбат кард

21-уми сентябр, маҷлисгоҳи аслии Маҷмаи кулли СММ. Дабири кулли СММ Антонио Гутерреш 75-солагии таъсисёбии СММ-ро табрик мегӯяд. Имсол бо сабаби пандемияи коронавирус сафари раҳбарони кишварҳои узв ба Ню-Йорк машварат нашуд ва ҳар раҳбар паёми худро видеоӣ ирсол намуд

Дар пасманзари пандемияи коронавирус СММ 75-умин солгарди таъсиси худро бо як маъракаи сартосарии онлайнӣ таҷлил мекунад. Ба ин муносибат дар Ню-Йорк ҳам маҷмаи кулли СММ бо ширкати раҳбарони давлатҳои узви ин созмон ба кор шурӯъ кард ва ҳар раҳбар бо ирсоли паёми видеоӣ ширкати худро дар ин ҷаласа таъмин намуд. Дабири кулли СММ Антонио Гутерреш, ки аз маҷлисгоҳи калони Маҷмаи кулл паём медод, ба ҳамраъйии бештар даъват кард. Ӯ гуфт, ки пандемия эҳтиёҷ ба ҳамкориву муттаҳидӣ ба хотири муқобила бо мушкилоти ҳамагониро таъкид намуд. Дар паёми видеоии худ президенти Тоҷикистон Эмомалӣ Раҳмон фаъолияти СММ-ро дар амри муқобила бо чолишҳои замони нав муҳим арзёбӣ кардааст. Вебсайти президенти Тоҷикистон матни суханронии раҳбари Тоҷикистонро нашр кардааст, ки дар он Эмомалӣ Раҳмон терроризму ифротгароӣ, тағйирёбии иқлим ва ҳамагирии коронавируси нав COVID–19-ро аз таҳдидҳое ном мебарад, ки барои муқобила бо онҳо кишварҳои дунё ба таҳким бахшидани муносибатҳои бисёрҷониба ё мултилатерализм ниёз доранд.

Ин ҳама сӯҳбатҳо дар ҳолест, ки солҳои охир бархе мунаққидон ба “кӯҳна шудани идеяи СММ” ва заъифтар шудани тавонмандиҳои он дар амри ҳалли бӯҳронҳои ҷиддии сиёсии ҷаҳонӣ ишора мекунанд.

Боздошти раҳбарияти фирқаи миссионерӣ дар Русия

Саҳнаи боздошти Сергей Тороп – маъруф ба Виссарион. 22-юми сентябри соли 2020

ФСБ ё Хадамоти амнияти федеролии Русия дар минтақаи Красноярск дар як рейди калоне раҳбарияти як фирқаи миссионерии диниро боздошт кард. Дар ин амалиёт даҳҳо мошинҳои низомӣ, автобусҳо, мошинҳои ёрии таъҷилӣ ва чархболҳо истифода шудааст. Дар миёни боздоштшудаҳо – раҳбари ин фирқаи динӣ Сергей Тороп – маъруф ба Виссарион, Вадим Редкин ва Владимир Ведерников мебошанд. Тороп худро муассиси “Калисои аҳди охир” меномид. Дар маконе бо номи “Шаҳраки Офтоб”, ки аз ҷониби Тороп ва дигар аъзои гурӯҳи динии таъсисдодаи ӯ дар ҳудуди вилояти Красноярск амал мекард, тахминан 200 нафар зиндагӣ мекунад ва ин яке аз 40 чунин ҷомеаҳое мебошад, ки дар қаламрави Красноярск вуҷуд дорад. Ба иттилои бархе манбаъҳо, худи Тороп дар як калисои Петропавловка боздошт шуд. Мақомоти ҳифзи қонун гуфтанд, ки “Калисои аҳди охир” бо ҳадафи дарёфти даромади молӣ ба мардум фишори равониро раво медид ва дар натиҷа ба саломатии бархе аъзои ин созмон осеби дарозмуддат расонида шудааст”. Интерфакс мегӯяд, онҳоро дар он гунаҳгор мекунанд, ки “иттиҳоди диние ташкил кардаанд, ки фаъолияташ пурхушунат буд ва ба саломатии ду ва зиёда нафарон осеби сангин доштааст”. Назари худи Тороп ва дигар аъзои созмони динӣ маълум нест.

Ёфтҳои бештар

XS
SM
MD
LG