Моҳи оянда Фаронса 200 низомиашро аз Афғонистон ба ватан бармегардонад. Сухангӯи низомиёни Фаронса Тиерӣ Бурхард дар пойтахти Фаронса гуфт, дар чорчӯби беруншавии тадриҷӣ, ки то соли 2014-ум идома мекунад,200 сарбози ёдшуда то охири моҳи октябр ба ватан меоянд. Дар сафи нерӯҳои байналмилалии кумаки амниятӣ ба Афғонистон (ISAF), ки таҳти назорати паймони НАТО қарор доранд, 4 ҳазор низомии Фаронса ифои вазифа мекунанд. Сар аз соли 2001-ум то имрӯз Фаронса 98 низомиашро дар Афғонистон аз даст додааст, ки 23 нафари онҳо имсол ба ҳалокат расидаанд.
