Имрӯз аз қатли Искандари Хатлонӣ, шоири маъруфи тоҷик ва хабарнигори бахши тоҷикии Радиои Озодӣ дар Маскав 11 сол сипарӣ мешавад. Искандари Хатлонӣ дар таърихи 21 сентябри соли 2000 дар манзилаш дар пойтахти Русия ба таври ваҳшиёна бо табар кушта шуд. Аммо бо вуҷуди гузашти инак 11 сол мақомоти Русия натавонистанд қотил ё қотилони ӯро пайдо кунанд. Аз Искандари Хатлонӣ як силсилаи бузурги гузоришҳои шуниданӣ ва ҳам чанд дафтари шеър ба ёдгор мондааст.
