Пайвандҳои дастрасӣ

Хабари нав

Хабарҳо

Вазири молияи Фаронса: Аврупо "навкар"-и Вашингтон нест

Прачами Иттиҳоди Аврупо

Фаронса ба зудӣ ба Комиссияи Аврупо пешниҳод мекунад, ки вокуниш ба хуруҷи Амрико аз созиши ҳастаӣ бо Эрон ва бозгашти таҳримҳои ИМА алайҳи Теҳрон чӣ гуна бошад. Дар ин бора вазири молияи Фаронса Бруно Ле Мэр изҳорот дод.

Ӯ рӯзи 11-уми май гуфт, Иттиҳоди Аврпуо бояд аз ширкатҳои аврупоӣ, ки бо Эрон тиҷорат мекунанд, ҳимоя кунад, то паёмади эҳтимолии таҳримҳои Амрико ба онҳо осеб нарасонад.

Ле Мэр хуруҷи ИМА аз созиши бисёрҷониба бо Эронро шадидан интиқод кард. Ӯ гуфт, кишварҳои узви Иттиҳоди Аврпуо набояд "навкар"-и Вашингтон бошанд ва бояд худашон тасмим бигиранд, ки бо Эрон тиҷорат кунанд, ё не.

Фаронса, Олмон, инчунин, Русияву Чин - бахши дигари созиши ҳастаӣ гуфтаанд, ки ин тааҳудро чун пештара риоя мекунанд. Садри аъзами Олмон Ангела Меркел бо танқиди қарори президенти Амрико Доналд Трамп гуфт, ин тасмим набояд барои даст кашидан аз шарикии фароуқёнусӣ сабаб шавад.

Трамп пештар гуфт, аз қарордоди нав, ки дар он нигарониҳои Вашингтонро аз дахолати Эрон ба умури кишварҳои дигари Ховари Миёна ба назар бигирад, пуштибонӣ хоҳад кард.

ВАО: "Мушовири Трамп гуфт, ба ҳарфи Маккейн набояд гӯш дод, ӯ мемирад"

Ҷон Маккейн

Матбуоти Амрико бо такя ба иштирокдорони ҷаласаи пӯшидаи Кохи Сафед навишт, ки Келли Садлер - мушовири президенти Амрико - дар бораи сенатори гирифтори саратон Ҷон Маккейн ҳарфи ноҷо гуфтааст.

Ба қавли ду манбаи хабаргузории Associated Press, Садлер дар ҷаласаи пӯшида гуфтааст, набояд эътирози Маккейнро дар робита ба таъйини Ҷина Ҳаспел ба мақоми раҳбари Идораи истихборот ба эътибор гирифт, "зеро ӯ дар роҳ ба сӯи гӯр аст".

Кохи Сафед дар изҳороташ оиди Маккейн вуҷуди ҳодисаро на тасдиқ кард, на такзиб. Дар изҳорот танҳо эҳтиром ба Ҷон Маккейн ва хидматҳои ӯ зикр шудааст. Худи Садлер то ҳол гузоришҳои матбуотиро шарҳ надодааст.

Ҳамсари Ҷон Маккейн Синдӣ ба Садлер, мушовири вежаи президент, дар Твиттер ёдовар шуд, ки Маккейн панҷ фарзанд ва ҳафт набера дорад.

Ҷон Маккейн аз мухолифони доимии президент Трамп дар Ҳизби Ҷумҳурихоҳ аст. Соли гузашта табибон дар мағзи ӯ саратонро ташхис доданд. Бинобар вазъи саломатиаш, Маккейн аз моҳи декабри соли гузашта ба ин тараф дар Сенат зоҳир нашуд.

Ахиран матбуот дар бораи бад шудани сиҳатии сенатор хабар дод ва гуфт, ки ӯ дар бораи макони охираташ васият карда, ҳамчунин гуфтааст, Трамп дар маросими дафни ӯ иштирок накунад.

Меркел: Берун шудан аз созиши ҳастаӣ дуруст нест

Садри аъзами Олмон Ангела Меркел рӯзи 11 май дар як тамоси телефонӣ бо президенти Русия Владимир Путин вазъи Ховари Миёнаро баъди берун шудани ИМА аз созиши ҳастаӣ бо Эрон баррасӣ карданд. Дар ин сӯҳбати телефонӣ инчунин ҳамлаҳои Исроил ба ҳадафҳо дар Сурия ва ҳам ҳамлаҳои нирӯҳои эронӣ аз қаламрави Сурия ба сохторҳои низомии Исроил баррасӣ шуд. Дар хабари дафтари матбуоти Меркел гуфта мешавад, ки ду раҳбар ба ин андеша мувофиқанд, ки бояд аз тавсеаи низоъҳо ҷилавгирӣ шавад. Илова ба ин ҳарду ҷониб гуфтаанд, ки ба созиши амалкунандаи ҳастаӣ бо Эрон пойбанд ҳастанд. Ангела Мелкел рӯзи 11 май дар як ҳамоиши католикҳо дар шаҳри Мюнстери Олмон ҳам ба ин мавзӯъ муроҷиат кард ва гуфт:

“Боздоштани созиши ҳастаӣ бо Эрон мояи нигаронии амиқ ва таассуф аст. Ин созиш ҳосили кори 12-сола аст. Ин як ҷараёни дипломатии тӯлонӣ аст ва шояд ҳам беайб нест. Ман розиям, ки вақте аз Эрон сӯҳбат мешавад, масоили зиёди ташвишовар вуҷуд дорад: ҷанг бо Эрон, барномаи мушакҳои баллистикӣ ва нақши Эрон дар Сурия. Ин ҳама дуруст аст. Бо ин вуҷуд, ба назари ман берун шудан аз созиши ҳосилшуда дуруст нест. Онро бо раъйи оро аъзои Шӯрои амнияти СММ ҳам қабул карданд. Ин ҳолат ба эътимоди як қарори байналмилалӣ осеб мерасонад”.

Интизор меравад, ки рӯзи 18 май дар Сочи Меркел бо Путин дидор ва дар баробари масъалаи Эрон, мавзӯи Украинаро ҳам баррасӣ хоҳад кард.

Тағйироти кадрӣ дар сохтори прокуратураи Тоҷикистон

Юсуф Раҳмон, додситони кулл ва зердастонаш дар мулоқот бо президент. Акс аз дафтари матбуоти раиси ҷумҳури Тоҷикистон

Раиси ҷумҳури Тоҷикистон рӯзи 11-уми май бо афроди тозатаъйин дар мақомоти додситонӣ, Палатаи ҳисоб ва ширкати "Барқи тоҷик" мулоқот кард.

Бино ба хабари вебсайти президент Эмомалӣ Раҳмон, рӯзи ҷумъа додситони шаҳри Бохтар, ноҳияҳои Темурмалик, Вахш, Шамсиддини Шоҳин ва муовини додситони вилояти Хатлон, додситони ноҳияҳои Шуғнон, Ишкошими Вилояти Мухтори Кӯҳистони Бадахшон ва додситони нав шуданд.

Дар дастгоҳи марказии Палатаи ҳисоб – сараудиторон ва дар дигар вазифаҳои сатҳи роҳбарии ин мақомот низ тағйироти кадрӣ сурат гирифт. Исми онҳо нашр намешавад.

Дар хабар инчунин омадааст, ки пешниҳоди президент дар робита ба вазифаи сараудитор таъйин намудани Собир Салимзода ба баррасии Маҷлиси намояндагон фиристода шуд.

Инчунин, рӯзи 11-уми май бо қарори ҳукумат Муҳаммад Ғуломзода муовини раиси ширкати “Барқи тоҷик” таъйин гардидааст.

Навалний барои эътирозҳои "Ӯ шоҳи мо нест" мурофиа мешавад

Навалний дар додгоҳи Маскав

Додгоҳи Маскав рӯзи ҷумъа парвандаи маъмурии сарпечӣ аз амри пулисро баррасӣ мекунад, ки алайҳи раҳбари мухолифини Русия Алексей Навалний баъди амалҳои эътирозии "Ӯ шоҳи мо нест" боз шуд. Да ин бора хабарнигори бахши Русии Радиои Озодӣ рӯзи 11 май аз толори додгоҳ гузориш дод.

Навалний ҳамчунин такроран ба нақзи тартиби баргузор кардани ҷамъомадҳои умумӣ муттаҳам мешавад. Баррасии ин иттиҳом ба 15 май гузошта шуд, зеро додгоҳ бо талаби вакилони Навалний бояд ду пулисро ба сифати шоҳид даъват кунад.

Алексей Навалний рӯзи 5 май дафъатан баъди зоҳир шуданаш дар майдони Пушкин боздошт шуд. Он замон дар байни мухолифони даври чаҳоруми президентии Владимир Путин ва нафароне, ки либоси "казакҳо"-ро ба бар карда буданд, задухурд ҷараён дошт. Ин нафарон намояндагони мухолифинро латту кӯб карданд.

Ҳангоми боздошт дасти Навалний харош хурд ва навори видеои нишон медиҳад, ки чӣ тавр ходимони пулис аз дасту пойи ӯ дошта, ба сӯи мошин мекашонанд. Ба гуфтаи сомонаи "ОВД-Инфо", дар пойтахти Русия, ки тазоҳурот бидуни иҷоза ҷараён гирифт, беш аз ҳафсад нафар ва дар тамоми кишвар якуним ҳазор нафар боздошт шуд.

Панҷ раҳбари ДИИШ дар Ироқ боздошт шуд

Тонки артиши Ироқ дар канораҳои Киркук

Дар Ироқ панҷ раҳбари гурӯҳи террористии "Давлати Исломӣ" боздошт шуд. Дар ин бора Reuters рӯзи 10 май хабар дод.

Дар амалиёти боздошти ин гурӯҳ нерӯҳои эътилофи байналмилалии таҳти назари ИМА, ки ҷангиёни ДИИШ-ро дар Сурия саркӯб мекунад, ширкат доштанд. Намояндаи эътилоф ин боздоштро "зарбаи ҳассос" ба ҷангиёни ДИИШ унвон кард. Раиси ҷумҳури ИМА Доналд Трамп дар твиттер навишт, ки сухан аз бораи "панҷ раҳбари шадидан мавриди ҷустуҷӯ"- и гурӯҳи тундгарои "Давлати Исломӣ" аст.

Ҳамчунин маълум шудааст, ки дар байни ин панҷ нафар Абубакр ал-Бағдодӣ, поягузори ДИИШ ҳузур надорад ва макони будубоши ӯ то ҳол маълум нест. Низомиёни Русия қаблан гуфта буданд, ки эҳтимолан Бағдодӣ кушда шудааст, аммо ҳеҷ исботе пешниҳод накарданд.

Соли гузашта тақрибан тамоми қаламрави Ироқ аз дасти гурӯҳи террористии ДИИШ озод шуд Онҳо дар Сурия низ бузургтарин минтақаҳои аҳолинишинро аз даст доданд. Аммо ҳоло ҳам минтақаҳоеро дар биёбонҳои наздик ба сарҳади Ироқ таҳти назорат доранд.

Русия бори аввал ба даври ниҳоии "Евровидение" роҳ наёфт

Юлия Самойлова

Намояндаи Русия дар озмуни таронаҳои "Евровидение" Юлия Самойлова ба даври ниҳоӣ роҳ наёфт. Аз соли 2004 ба ин тараф бори аввал аст, ки Русия аз иштирок дар даври ниҳоии озмун маҳрум мешавад.

Дар шаҳри Лиссабони Португалия рӯзи 10 май даври ниманиҳоии озмун баргузор шуд, ки Самойлова дар он бо суруди "Ман нахоҳам шикаст" иштирок кард.

Ин ҳунарманд бояд соли 2017 дар озмуни "Евровидение" иштирок мекард. Аммо озмун дар Украина доир шуд ва мақомоти он кишвар аз аз вуруди Самайлова ба Украина ҷилавгирӣ карданд. Зеро, Самойлова бар хилофи қонунгузории Украина, ба нимҷазираи Қрим на тавассути гузаргоҳи марзии Украина, балки мустақиман аз Русия рафт.

Баъди ин ҳодиса созмондиҳандагони "Евровидение" қонунҳои озмунро тағйир доданд. Ҳамакнун, онҳое, ки мумкин аст, бо қонунгузории кишвари мизбони озмун мушкил доранд, аз ҳаққи ширкат дар озмун маҳрум мешаванд.

Даври ниҳоии озмун фардо - 12 май баргузор мегардад. Бархеҳо аз ҳоло тахмин мекунанд, ки намояндаи Кипр Элена Фурейр бо суруди "Шуъла"-аш пирӯз хоҳад шуд.

Хабарнигори бахши Туркмании Радиои Озодӣ маврида ҳамла қарор гирифт

Султон Очилова

Хабарнигори бахши Туркмании Радиои Озодӣ -"Радио Азатлык" Султон Очилова боз мавриди ҳамла қарор гирифт.

Ҳамла ба ин хабарнигори 68-сола рӯзи 9 май дар ҳоле сурат гирифт, ки ӯ аз маросими гулгузорӣ бар пояи Оташи ҷовидон, ба хотири ёдбуди қурбониҳои Ҷанги дуюми ҷаҳонӣ, акс мебардошт. Ба гуфтаи хабарнигор, якчанд нафар, ки дар тан костюми сиёҳ доштанд, аз ӯ талаб карданд, ки аксҳоро пок кунад. Онҳо таҳдид карданд, ки агар хабарнигор ин корро накунад ба нигаҳдории маводи мухаддир муттаҳам хоҳад шуд. Бо шунидани посухи манфӣ, ин нафарон дурбини Султон Очиловаро гирифтанд, аксҳоро нест карданд ва талаб намуданд, ки ӯ дигар барои "Радио Азатлык" кор накунад.

Бори аввал нест, ки ба ин хабарнигор ҳамла сурат мегирад ва ӯ таҳдиди марг мегирад. Султон Очилова якчанд дафъа боздошт шудааст.

Ҳамлаи ахир ба хабарнигор баъди ду рӯзи гузоришдиҳии Туркманистон дар нишасти Шӯрои ҳуқуқи башари Созмони Милали Муттаҳид ҷараён гирифт. Муовини вазири корҳои хориҷии Туркманистон Вафо Ҳоҷиев дар нишаст гуфт "ин далел, ки хабарнигори "Радио Азатлык" дар Туркманистон фаъолият мекунад, ба маъноест, ки озодии баён дар Туркманистон маҳдуд намешавад.

Президенти Радиои Аврпуои Озод/Радиои Озодӣ Том Кент изҳори муовини вазири корҳои хориҷии Туркманистонро "нороҳаткунанда ва таҳқиромез" унвон кард. Кент ёдовар шуд, ки аз соли 2014 то 2016 шаш хабарнигор бинобар фишори ҳадафмандона ва тарсу ҳарос, ки ҳукумат аз он пуштибонӣ мекунад, аз кор рафт.

Аблязов худро тарҳрези эътирозҳои ахири Қазоқистонро эълон кард

Мухтор Аблязов

Мухтор Аблязов, бонкдори пешини Қазоқистон ва мухолифи ҳукумати ин кишвар гуфт, эътирозҳои рӯзи 10 майро ӯ ташкил кард.

Рӯзи панҷшанбе дар якчанд шаҳри Қазоқистон, аз ҷумла Остона, Алмато, Урал, Оқтеппа, Атирау ва Чимкент эътирозҳои мардумӣ баргузор шуд. Ширкатдорони тазоҳурот озодии "маҳбусони сиёсӣ", "қатъи шиканҷа" ва беҳбуди вазъи иҷтимоиву иқтисодиро талаб карданд. Дар ҷараёни эътирозҳо даҳҳо нафар боздошт шуд.

Бино ба арзёбии нозирон, шумори кормандони пулиси Остона ва Алмато баробар ба теъдоди ширкатдорони эътирозҳо будааст. Дар Алмато пулис 80 танро боздошт кард. Дар шаҳри Остона ҳудуди 100 нафар боздошт ба ба идораи пулис бурда шуд. Шумори дақиқи боздоштшудаҳо дар шаҳрҳои дигар маълум нест.

Мақомоти Қазоқистон Мухтор Аблязовро дар дуздии дороиҳои бонки БТА айбдор мекунанд. Аблязов замоне ин бонкро роҳбарӣ мекард. Ҳоло ин мухолифи ҳукумати Қазоқистон дар Аврупо паноҳанда аст.

Созиши Порошенко, Меркел ва Макрон барои мулоқот бо Путин

Макрон, Меркел ва Порошенко ҳангоми мулоқот дар Олмон. 10 май, 2018

Президенти Украина Петр Порошенко гуфт, барои омодагӣ ба мулоқоти "чаҳоргонаи нормандӣ", ки қарор аст, дар шаҳри Порис баргузор шавад, бо раҳбарони Олмон ва Фаронса ба созиш расиданд.

Порошенко дар ин бора рӯзи 10 май, баъд аз мулоқот бо раҳбарони Олмону Фаронса - Ангела Меркел ва Эммануэл Макрон хабар дод.

"Созиш ва тамоми корҳоеро ҳамоҳанг кардем, ки бояд барои баргузории ҷаласаи "формати нормандӣ" дар рӯзҳои наздик анҷом шаванд", - изҳор дошт президенти Украина.

Ба гуфтаи ӯ, ҷонибҳо ҳамчунин раҳоии асирон, ворид кардани посдорони сулҳ ва имкони эъломи таҳримҳои нав зидди Русияро барои баргузор кардани интихобот дар Қрим баррасӣ карданд.

Президенти Украина рӯзҳои 9 ва 10 май дар доираи як сафари расмӣ дар Олмон қарор дошт. Охирҳои моҳи май мулоқоти раҳбарони Олмону Фаронса бо президенти Русия Владимир Путин дар назар аст.

Даргузашти ҳунарманди маъруф Ислом Саломов

Ислом Саломов, ҳунарвари театр ва синамо, бунёдгузор ва саркоргардони Театри давлатии ҷавонон дар маркази вилояти Суғд дар синни 78-солагӣ бар асари бемории тӯлонии фишорбаландӣ даргузашт. Ба гуфтаи пайвандонаш, ӯ шоми рӯзи гузаштаи 10-уми май дар манзилаш, дар шаҳри Хуҷанд дар канори ҳамсараш ҳунарвари маъруф Сайрам Исоева ва писараш Баҳодур ҷон додааст.

Бароат Мақсудова, мудири Театри тамошобини ҷавон субҳи рӯзи 11 май гуфт: “Вафоти устод Ссаломов ба вақте рост омад, ки мо дар театр ба таҷлил Рӯзи кӯдакон, ки ҳамзамон зодрӯзи устод Саломов аст, барои рӯи саҳна гузоштани барномае барои кӯдакон омодагӣ медидем. Он кас бемор буданд ва ба толор бо ёрии писараш Баҳодур ҳозир мешуданд."

Бароат Мақсудова афзуд, вазъи сиҳатии Ислом Саломов пас аз марги нобаҳангоми духтари ягонааш Саодати 50-сола дар моҳи апрели соли гузаштаи 2017, хароб гашта, гирифтори фишорбаландӣ буд ва аз бемадории пойҳояш шикоят дошт.

Ӯ дар сӯҳбат бо Радиои Озодӣ гуфт, Ислом Саломов як мактаби хоси ҳунарии худро дар театр ба вуҷуд овард, ки бо саҳнагузориҳои табииву самимии худ фарқ мекунад ва даҳҳо шогирдро тарбият ва ба саҳнаи театр раҳнамоӣ кард. Аз вижагиҳои ҳунари Саломов ҷалби даҳҳо кӯдакону наврасон ба театр ба ҳайси ҳунарвар ва иҷрокунандаи нақшҳо аст.

Ислом Саломов 78 сол қабл дар деҳаи Камодони ноҳияи Кӯҳистони Мастчоҳ таваллуд шудааст. Хатмкардаи омӯзишгоҳи мусиқии Хуҷанд, Донишкадаи осиёимиёнагии театр ва кино дар Тошканд, давраи 2-солаи омӯзишӣ дар театри Маскав буд.

Ӯ 47 сол ба ҳайси саркоргардони театрҳои мазҳакаи мусиқии ба номи Камоли Хуҷандӣ ва Театри давлатии ҷавонон фаъолият кардааст. Ислом Саломов соли 1998 театри тамошобини ҷавонро дар шаҳри Хуҷанд таъсис дод ва то охири умр саркоргардони ин театр буд.

Ислом Саломов дар як мусоҳибааш бо Радиои Озодӣ ба истиқболи 75- умин солгарди умраш гуфта буд, ки беш аз 120 намоишномаро рӯи саҳна овардааст. Ҳамчунин ӯ дар чандин филмҳои бадеӣ нақш иҷро кардааст.

Соли 2015 спектакли "Занги охирин"-и Саломов дар озмуни тетрии “Парасту” дар Душанбе соҳиби ҷоизаи “Ҷасорат” гашта буд. Ба думбол ӯ дар филми ҳунарии “Коса”-и Суғдсинамо яке аз нақшҳои асосиро иҷро кард.

Ба гуфтаи пайвандонаш, Ислом Саломов баъд аз баргузории маҳфиле дар назди Театри ба номи камоли Хуҷандӣ дар соати 11, пас аз намози ҷумъа дар Хуҷанд дафн карда мешавад.

Вакили порлумони Қирғизистон хост, дахлнопазирии Отамбоев бекор карда шавад

Вакили порлумони Қирғизистон Исҳоқ Масалиев пешниҳод кард, ки дахлнопазирии президенти пешини ин кишвар Алмосбек Отамбоев дар доираи таҳқиқи харҷи навсозии Маркази гармидиҳии шаҳри Бишкек бекор карда шавад.

Ба гуфтаи ӯ, дар хулосаи комисcияи порлумонӣ, ки сабабҳои садама дар Маркази гармидиҳии Бишкек ва харҷи пулҳои қарзӣ ба навсозии онро таҳқиқ кард, номи як қатор мансабдорон ва вакилони порлумон оварда шудааст.

"Ман пешниҳод мекунам, ки дахлнопазирии Отамбоев бекор карда шавад. Вай борҳо гуфта буд, ки ҳама дар назди қонун баробаранд ва агар лозим шавад, омода аст, шахсан ҷавобгариро ба зимма бигирад. Мо бояд ба мақомоти ҳифзи ҳуқуқ имкон диҳем, ки ин мушкилро ҳал кунанд. Агар поканд, пок номида шаванд, агар не, пас ҷавоб диҳанд. Агар мо гунаҳкори асосиро пайдо кунем, сарвазирони пешин худашон мегӯянд, ки танҳо хомӯш истоданд", - изҳор дошт вакили қирғиз.

Сарвазири пешини Қирғизистон Сафар Исҳоқов дар посух ба пешниҳоди вакил гуфт, Отамбоев дар доираи навсозии Маркази гармидиҳии Бишкек ҳеч дастуру супорише надодааст.

Порлумони Қирғизистон 10 май хулосаи комисияи вакилонро баррасӣ кард. Дар ин ҷаласа сарвазирони пешин Жанторо Сотиболдиев, Темир Сариев ва Сафар Исҳоқов ҳузур доштанд.

Дар хулосаи комисия пешниҳод шудааст, ба амали раҳбароне, ки зери санади дарёфти қарз аз Чин имзо гузоштанд, баҳои ҳуқуқӣ дода шавад. Ҳукумати Қирғизистон соли 2013 аз "Эксимбонк"-и Чин барои навсозии Маркази гармидиҳии Бишкек 386 миллион доллар қарз гирифт. Навсозии марказ соли 2017 ба поён расида, 26 январи соли 2018 дар он садама рух дод, ки дар натиҷа пойтахти Қирғизистон тақрибан як ҳафта бегармӣ монд.

Доналд Трамп таърих ва макони мулоқоташ бо Ким Чен Унро эълон кард

Доналд Трамп

Раиси ҷумҳури ИМА Доналд Трамп хабар дод, ки мулоқоти ӯ бо Ким Чен Ун - раҳбари Кореяи Шимолӣ, рӯзи 12 май дар Сингапур баргузор мешавад. Трамп рӯзи 10 май дар твиттер навишт, ки ҳарду раҳбар талош доранд ин дидору гуфтугӯ ба"таҳаввулоти махсус" барои сулҳ дар саросари ҷаҳон табдил шавад.

Президентҳои пешинаи ИМА ҳеҷ гоҳ бо раҳбарони Кореяи Шимолӣ мулоқот накарда буданд. Доналд Трамп барномаи дидор бо Ким Чен Унро моҳи март эълон кард. Сингапур яке аз маконҳои эҳтимолии музокирот арзёбӣ мешуд.

Президенти ИМА ҳамчунин гуфта буд, агар маълум шавад, ки талошҳои дипломатӣ муваффақ намешаванд,, мулоқотро лағв мекунад.

9 май Котиби давлатии Амрико Майк Помпео барои омода кардани дидору гуфтугӯи Доналд Трамп бо Ким Чен Ун ба Пхенян омад. Дар ҷараёни ин сафар раҳбарони Кореяи Шимолӣ се шаҳрванди боздоштшудаи Амрикоро озод карданд.

Биологи 104-сола дар Шветсария ихтиёран бо зиндагӣ падруд гуфт

Девид Гуделл

Биологи Австралия Девид Гуделл, ки 104 сол дошт, ихтиёран дар шаҳри Базели Шведсари бо зиндагӣ падруд гуфт. Дар ин бора намояндаи гурӯҳи тарафдорони эвтаназия - марги ихтиёрӣ рӯзи панҷшанбе хабар дод.

Марги Гуделл соати 12:30 дақиқаи рӯзи 10 май эълон шуд,- гуфт Филипп Нишке раҳбари созмони Exit International. Гуделл пештар ба Шведсария омад, то аз қонун дар бораи марги ихтиёрӣ истифода кунад. Олими биологро дар сонияҳои охири зиндагиаш поягузори ҷумбиши пуштибони ҳуқуқ баэвтаназия Филипп Никше ҳамроҳӣ кард.

Девид Гуделл, ки дар Британия таваллуд шудааст, гуфта буд, ки дастикам 20 сол дар бораи худкушӣ фикр мекард. Аммо пас аз бад шудани вазъи саломатиаш бештар ба эвтаназия меандешид. Ӯ аз ин ки пойҳояш хуб ҳаракат намекарданд ва қонунҳои Австралия, ки марги ихтиёриро мамнуъ кардаанд, шикоят дошт.

Ин олими 104-сола аз беморӣ ранҷ намебурд.

Боз як заминларза дар Тоҷикистон

Рӯзи даҳуми май боз як заминларза Тоҷикистонро такон дод. Маркази зилзиланигории Амрико гуфт, маркази заминларза дар ноҳияи Ҷурми вилояти Бадахшони Афғонистон буда, шиддаташ ба 4,8 дараҷаи Рихтер мерасид.

Бархе аз сокинон дар Душанбе ва минтақаҳои дигари Тоҷикистон гуфтанд, ки заминларзаро эҳсос карданд. Даҳҳо нафар дар шабакаҳои иҷтимоӣ низ аз заминҷунбии навбатӣ хабар додаанд. Аммо онҳо гуфтанд, ки шиддати ин заминларза он дар муқоиса ба зилзилаи рӯзи чаҳоршанбе камтар буд.

Баъд аз зуҳри 9-уми май дар Тоҷикистон заминларзаи қавие сабт шуд, ки Маркази зилзилашиносии Амрико гуфт, ки маркази ин заминларзаи 6.2 дараҷаӣ дар 36-километрии шимол-ғарби маркази ноҳияи Ишкошими Тоҷикистон будааст.

Шиддати ин зилзила дар Душанбе ва атрофи он ба ҳадде буд, ки сокинон аз манзилҳои худ берун шуданд. Шиддати ин зилзила дар вилояти Бадахшон аз ҳама бештар эҳсос шудааст.

Тоҷикистон дар яке аз минтақаҳои зилзилахези қораи Осиё ҷойгир аст. Ҳамасола дар кишвар садҳо заминларза сабт мешавад.

Чин гуфт, ки ба созиши ҳастаӣ бо Теҳрон содиқ мемонад ва нафти Эронро мехарад

Генг Шуанг - сухангӯи Вазорати хориҷии Чин

Чин гуфт, ки ба созиши ҳастаии Эрон бо қудратҳои ҷаҳонӣ - Барномаи ҷоемаи иқдоми муштарак содиқ мемонад ва сеяки нафти Эронро ҳамчунин харидорӣ мекунад.

Сухангӯи вазорати корҳои хориҷии Чин Генг Шуанг гуфт, ки кишвараш ҳуруҷи ИМА аз қарордоди ҳастаӣ бо Эронро таассуфовар мешуморад. Ӯ афзӯд, Чин мехоҳад якпорчагӣ ва арзиши ин санадро, ки аз нигоҳи Пекин барои ҷилавгирӣ аз паҳншавии силоҳи ҳастаӣ ва таъмини субот дар Ховари Миёна муҳим аст, ҳифз кунад.

Президент Доналд Трамп рӯзи 8 май Арикоро аз созиши ҳастаӣ бо Эрон, ки соли 2015 дар байни Теҳрон ва қудратҳои ҷаҳонӣ имзо шуда буд, хориҷ кард ва гуфт, ки алайҳи "режими оятуллоҳҳо" шадидтарин таҳримро ҷорӣ мекунад. Бар пояи созиши ҳастаӣ, Эрон муваззаф шудааст, ки дар ивази лағви таҳримҳо барномаҳои ҳастаияшро маҳдуд кунад.

Маҳатҳир Муҳаммади 92-сола омодааст Малайзияро идора кунад

Тарафдорони нахуствазири собиқ Маҳатҳир Муҳаммад. 10 май,2018

Ба думболи пирӯзии такондиҳанда бар эътилофи ҳоким, ки ин кишвари Осиёи Ҷанубиро баъди истиқлолият аз Британия шаш даҳсола идора кардааст, Маҳатҳир Муҳаммад гуфт, омода аст нахуствазири ояндаи Малайзия шавад.

"Зарурате ҳаст, ки мо оҷилан, ҳамин ҳоло, имрӯз ҳукумати навро таъсис диҳем",- гуфт Маҳатҳир дар нишастии матбуотӣ ва афзӯд, ки бегоҳи рӯзи 10 май ба сифати нахуствазир савганд ёд мекунад.

Маҳатҳир аз соли 1981 то соли 2003 Малайзияро бо мушти оҳанин идора кардааст ва ҳоло дар синни 92-солагӣ пиртарин раҳбари интихобшуда дар ҷаҳон хоҳд буд.

Ҳамоиши ӯ бо чаҳор ҳизб ба эътилофи нахуствазир Наҷиб Разоқ зарба зад, ки дар гузашта аз шаркони Маҳатҳир буд, аммо баъдан душманаш шуд.

Субҳи рӯзи 10 май, Разоқ мағлубияти худро эътироф кард ва гуфт "Ман ҳукми мардумро қабул дорам". Ӯ афзӯд, азбаски ҳеҷ ҳизб аксарияти овозҳоро ба даст наовард, шоҳи Малайзия бояд тасмим бигирад, ки кӣ нахуствазири оянда хоҳад буд.

Новосибирск: Донишҷӯи маҳаллӣ дӯсташро захмӣ кард ва худро кушт

Акси тасвирӣ

Дар шаҳри Барбински вилояти Новосибириск донишҷӯи Омӯзишгоҳи фанновариҳои нақлиёт ба сӯи ҳамсабақаш аз камони шикорӣ тир кушод ва сипас худкушӣ кард. Дар ин бора додситонии минтақавӣ рӯзи 10-уми май хабар дод.

Ба маълумоти Кумитаи тафтишот, донишҷӯе, ки аз камон тир кушод, 17 сол дошт. Ӯ камонро дар шакли тақсимшуда дар ҷувздонаш ба синф ворид кард ва қабл аз тир кушодан онро дар долони мактаб дубора ҷамъ овард.

Биноба иттилои пешакӣ, донишҷӯи курси аввал аз бадбинӣ ба сӯи ҳамсабақаш тир кушод ва ӯро маҷруҳ кард. Донишҷӯёни дигар дар шабакаҳои иҷитмоӣ навиштаанд, ки ин ду нафар дар гузашта ҳам муноқиша доштанд.

Тавре аз Вазорати тандурустии Русия дар Новосибирск хабар доданд, дар ин ҳодиса се нафари дигар осеб дида, ҳоло таҳти муроқибати табибон қарор доранд.

Ба гуфтаи канали Telegram Marsh донишомӯзе, ки аз камон тир кушод, Иля Иванченко ном дошт ва ҷавони "орому беозор буд".

Аз рӯи ин ҳодиса парвандаи ҷиноӣ боз шудааст.

Аз аввали сол дар мактабҳои Русия як чанд ҳамлаи мусаллаҳона бо истифодаи корду табар ва сӯзишворӣ сурат гирифт, ки дар пайи онҳо талабаҳо захм бардоштанд.

Ар Риёз: шоҳигарӣ дар бойкоти нафти Эрон пул кор намекунад

Вазири нафти Арабистони Саудӣ Холид ал-Фалиҳ

Арабистони Саудӣ назорат мебарад, ки хуруҷи ИМА аз созиши ҳастаӣ бо Теҳрон ба бозори нафт чӣ таъсир мерасонад ва омодааст холигоҳи нафти Эронро дар бозор пур кунад. Саудӣ ҳамзамон мегӯяд, ки аз ҳама гуна иқдоми якҷониба дар ин самт худдорӣ хоҳад кард. Дар ин бора Reuters рӯзи панҷшанбе бо такя ба манбаи наздик ба Созмони кишварҳои истеҳсолкунандаи нафт гузориш дод.

Намояндаи Қувайт дар ин созмон низ изҳороти монанд ба Саудиро пахш кард. Созиш дар заминаи коҳиш додани истеҳсоли нафт дар байни кишварҳои узви ОПЕК то охири соли равон амал мекунад. Мулоқоти навбатии Арабистони Саудӣ, Иморати Араб, Русия ва давлатҳои дигари истеҳсолкунандаи нафт ба 22-23 май барномарезӣ шудааст.

Президент Доналд Трамп рӯзи 8 май Арикоро аз созиши ҳастаӣ бо Эрон - Барномаи ҷомеи иқдоми муштарак, ки соли 2015 имзо шуда буд, хориҷ кард ва гуфт, ки алайҳи "режими оятуллоҳҳо" шадидтарин таҳримро ҷорӣ мекунад. Бар пояи созиши ҳастаӣ, Эрон муваззаф шудааст, ки дар ивази лағви таҳримҳо барномаҳои ҳастаияшро маҳдуд кунад.

Ирон дар раддаи кишварҳои узви ОПЕК баъди Саудӣ ва Ироқ ҷойи сеюмро дорад. Баъди лағви таҳримҳои байналмилалӣ истеҳсоли нафти Эрон аз 1 миллион бушка ба 2,5 миллион расид, ки бахши умдаи он барои содирот ба кишварҳои Осиё аст. Пешгӯӣ мешавад, ки бо бозгашти таҳримҳои ИМА истеҳсоли рӯзонаи нафт дар Эрон аз 200 ҳазор то 1 миллион бушка коҳиш меёбад.

Кореяи Шимолӣ се шаҳрванди Амрикоро озод кард

Майк Pompeo ва Ким Чен Ун

Ҳавопаймои Котиби давлатии ИМА Майк Помпео бо се шаҳрванди Амрико, ки ахиран дар Кореяи Шимолӣ озод шуданд, рӯзи панҷшанбе дар пойгоҳи ҳавоии Эндрюси аёлати Мэриленд, канораҳои Вашингтон, фурӯд омад.

Рӯзи чоршанбе Кохи сафед хабар дод, ки бо дастури президент Трамп, 9 май Котиби давлатӣ Майк Помпео ва намояндагони дигари ҳукумати ИМА ба Пхенян рафтанд, то мулоқоти президент Трамп бо раҳбари Кореяи Шимолӣ Ким Чен Унро омода кунанд.

Шабакаи телевизионии CNN хабар дод, ки мулоқоти Трамп бо Ким Чен Ун дар Сингапур баргузор мешавад.

Дар ҷараёни сафари Котиби давлатӣ раҳбарияти Кореяи Шимолӣ се шаҳрванди боздоштшудаи Амрикоро озод кард, ки ба ҷосусӣ ва амалҳои хасмона муттаҳам буданд.

Хабаргузории Yonhap-и Кореяи шимолӣ гуфт, ки се шаҳванди ИМА аввали моҳи апрел аз лагер ба меҳмонхонаи атрофи Пхенян интиқол ёфтанд.

Сухангӯи Кохи сафед гуфт, ки амрикоиҳои озодшуда ба Маркази миллии тиббиву низомии аёлати Мэрленд интиқол меёбанд.

Президенти Узбекистон бо сафари расмӣ ба Амрико меравад

Шавкат Мирзиёев ва Доналд Трамп

Шавкат Мирзиёев, раиси ҷумҳури Узбекистон, бо даъвати президенти Амрико Доналд Трамп рӯзҳои 15-17-уми май бо нахустин сафари расмӣ ба Иёлоти Муттаҳида меравад.

"Дар ин сафар ҳамкориҳои дутарафа ва масоили ҷаҳониву минтақаӣ баррасӣ хоҳад шуд", - хабар медиҳад маркази матбуотии президенти Узбекистон.

Раиси ҷумҳури Узбекистон дар Вашингтон, инчунин, аз Конгресс, Вазорати дифоъ, Департаменти давлатии ИМА ва Бонки ҷаҳонӣ дидан мекунад.

Дар поёни мулоқот изҳороти муштараки "Узбекистон ва ИМА: оғози марҳилаи нави ҳамкориҳои роҳбурдӣ" қабул мешавад ва чанд санад ба имзо мерасад.

Сафари раиси КДАМ-и Тоҷикистон ба Кобул

Ҳайати Кумитаи давлатии амнияти миллии Тоҷикистон дар раъси раҳбари ин ниҳод Саидмумин Ятимов рӯзҳои 7-9 май аз Кобул дидан кардааст. Ба иттилои хабаргузории давлатии "Ховар", ҳайати КДАМ-и Тоҷикистон дар ин сафар бо сарони ниҳодҳои амниятии Афғонистон, аз ҷумла Маъсум Станакзай, раиси Раёсати умумии амнияти миллии он кишвар, Баҳром Ториқшоҳ, вазири дифоъ, Аҳмад Вайс Бармак, вазири умури дохилӣ ва Ҳаниф Атмар, мушовири амнияти миллии Афғонистон, мулоқоту гуфтугӯ намуд.

Манбаъ мегӯяд, ки таъмини амният дар марзҳо, мубориза бо терроризм, ҷилавгирӣ аз қочоқи маводи мухаддир ва аслиҳа, аз мавзӯъҳои меҳварии ҳайати амниятии Тоҷикистон бо масъулони ниҳодҳои зидахли Афғонистон будааст. Ҳайати КДАМ-и Тоҷикистон ҳамчунин аз сӯи раиси ҷумҳури Афғонистон Ашраф Ғанӣ пазируфта шудааст ва ҷонибҳо ба таҳкими муносибатҳо миёни ду кишвар таъкид кардаанд.

Ин дувумин сафари раиси Кумитаи давлатии амнияти миллии Тоҷикистон ба кишварҳои минтақа давоми камтар аз як моҳи ахир аст. Раиси Кумитаи давлатии амнияти миллии Тоҷикистон рӯзи 16-уми апрел ба Тошканд -- пойтахти Узбекистон сафар карда буд.

Иттиҳоди Аврупо таҳримҳои алайҳи Эронро дар СҶТ ба баҳс мекашад

Сухангӯи ҳукумати Фаронса Берҷамен Гриво

Иттиҳоди Аврпуо омодааст ҳамагуна чораҳои якҷонибаро, ки ба ширкатҳои аврупоӣ зарба мезанад, дар Созмони Ҷаҳонии Тиҷорат ба баҳс бикашад,- гуфт Бенҷамен Гриво, намояндаи ҳукумати Фаронса дар вокуниш ба хуруҷи якҷонибаи Амрико аз Барномаи ҷомеи иқдоми муштарак (БАРҶОМ) - созиши ҳастаӣ бо Эрон. Ба гуфтаи Гриво Иттиҳоди Аврупо посухи мутаносибро бар пояи қоидаҳои Созмони Ҷаҳонии Тиҷорат ироа мекунад.

Рӯзи 8 май президент Доналд Трамп Иолоти Муттаҳидаро аз созиши ҳастаӣ бо Эрон хориҷ кард. Трамп гуфт, ки Эрон тааҳудашро иҷро намекунад ва барномаҳои ҳастаияшро дар ивази коҳиши таҳримҳои байналмилалӣ маҳдуд накардааст.

Тарафи дигари созиш - Олмон, Фаронса, Британия, Русия ва Чин гуфтанд, ки чун пештара шартҳои қарордоди ҳастаӣ бо Эронро иҷро мекунанд.

Оҷонсии назорат бар энержии ҳастаӣ (МАГАТЭ) рӯзи чоршанбе гуфт, ки Эрон масъулияташро дар робита ба қарордод иҷро мекунад. Ин изҳорот дар сомонаи оҷонсӣ нашр шуд.

Созишномаи бисёрҷониба, ки Британия, Олмон, Чин, Русия, Фаронса ва ИМА аз як тараф ва Эрон аз тарафи дигар соли 2015 имзо карданд, коҳиши таҳримҳои байналмилалӣ дар ивази маҳдуд шудани барномаҳои ҳастаии Эронро дар назар дорад.

Горди миллии Русия олигархи қазоқ Жомарт Ертаевро боздошт кард

Гузоришҳои матбуотӣ ҳокӣ аз он аст, ки Жомарт Ертаев, як олигархи қазоқро, ки дар ватанаш ҷустуҷӯ мешуд, вале дар Русия зиндагӣ мекард, аз тарафи мақомоти Русия боздошт шудааст.

Биноба гузоришҳо, дар амалиёти боздошти Ертаев, рӯзи 8 март, дар маҷмаи тиҷоратии Москва-Ситӣ, афсарони Горди миллии Русия иштирок карданд.

Ба гуфтаи яке аз шоҳидон, қабл аз боздошт якчанд мошини пулис пеши роҳи Mercedes SUV-и Ертаевро гирифтанд ва сипас ӯро дастгир карданд. Гуфта мешавад, олигархи қазоқ барои ҷинояти қаллобӣ, ки замони раҳбарияш ба Alyans Bank- и Қазоқиситон содир кардааст, боздошт шуд.

Мақомоти Қазоқиситон мегӯянд, ки Ертаевро соли 2015 бо ҷурми дуздии моликияти хусусӣ дар ҷустуҷӯ қарор доданд, вале дар бораи макони будубоши ӯ маълумот надоштанд.

Жомарт Ертаев соли 2009 бо иттиҳоми сирқати моликияти давлат нуҳ моҳ дар боздоштгоҳи пешакии Қазоқиситон буд. Аммо додгоҳ натавонист ҷурми ӯро собит кунад ва ӯ бо ҷурмҳои сабуктар - истифодаи нодурусти маблағҳои бонк ва нақзи қоидаҳои ҳисобдорӣ ба озодӣ баромад.

Охири соли 2014 Жомарт Ертаев раҳбари телевизиони кабелии Alma-TV шуд.

Моҳи гузашта ӯ дар сӯҳбат бо хабаргузории Тенгринюс гуфт, ки се сол боз дар Русия зиндагӣ мекунад.

Матбуоти Русия мегӯяд, ки Жомарт Етаев раҳбари Troyka-D Bonk-и Маскав ва президенти фахрии ширкати сармоягузории Alma Group-и пойтахти Русия аст.

То ҳол мақомоти Қазоқистон ва Русия дар бораи боздошти Жомарт Етаев расман изҳорот надодаанд.

Варзишгарони туркман тӯҳфаҳои президентиро бозпас доданд

Варзишгарони туркман дар Asian Games

Туҳфаҳои президентии бархе аз ғолибони Бозиҳои панҷуми осиёиро, ки моҳи сентябри соли 2017 дар шаҳри Ишқободи Туркманистон баргузор шуд, пас гирифтанд.

Ҳукумати Туркманистон соли гузашта миллиардҳо долларро сарфи Бозиҳои осиёӣ карда буд. Расонаҳои маҳаллӣ соли гузашта навишта буданд, ки ба бархе аз варзишгарони туркман аз номи президент туҳфаҳои гаронбаҳо, аз ҷумла мошинҳои навъи «Toyota Camry GL Executive»-ро дарёфт карданд.

Гуфта мешавад, мақомот ин тӯҳфаҳоро бозпас гирифтанд. Сабаби ин тасмим шарҳ дода нашудааст.

"Баъди тақдими мошинҳо аз варзишгарон хоҳиш шуда буд, ки мошинҳоро як муддат истифода накунанд. Бо гузашти як муддат аз Бозиҳои осиёӣ мақомот мошинҳоро аз онҳо пас гирифтанд", - хабар медиҳад рӯзноманигори бахши туркмании Радиои Озодӣ аз Туркманистон.

Ёфтҳои бештар

Гузоришҳои видеоӣ

XS
SM
MD
LG