Пайвандҳои дастрасӣ

Хабари нав

Хабарҳо

Анкара пешниҳодҳои Бағдодро напазируфт

Ҳукумати Туркия пешниҳодҳои Ироқро дар бобати роҳҳои пешгирӣ аз ҳамлаҳои фаромарзии шӯришиёни курд рад кард. Намояндаи Вазорати умри хориҷии Туркия мегӯяд, назар ба нақшаҳои пешниҳодкардаи ҳайъати баландпояи Ироқ, ки ба Анкара сафар кардааст, чораҳои фаврӣ заруртар мебошанд. Дар ҳамин ҳол фармондеҳи нирӯҳои Иёлоти Муттаҳида дар шимоли Ироқ, генерал-майор Бенҷамин Миксон гуфт, нирӯҳои таҳти фармони ӯ нақшаи пешгирӣ аз фаъолияти курдҳо дар ин минтақаро надоранд ва аз ҳамлаи нирӯҳои Туркия низ ҷилавгирӣ нахоҳанд кард.

Ҳамаи хабарҳои имрӯзро дар инҷо бихонед

Шумораи гирифторони вирус дар ҷаҳон аз 71 000 нафар гузашт

Пизишки чинӣ

Шумораи тасдиқшудаи гирифторон ба коронавирус дар саросари ҷаҳон аз 71 ҳазор нафар гузашт. Беш аз 70 ҳазор ҳолатро дар Чин ба қайд гирифтаанд.

Шумораи фавтидагон ба 1770 нафар расид.

Комиссияи миллии нигоҳдории тандурустии Чин рӯзи 17-уми феврал гузориш дод, ки боз 105 ҳодисаи фавти одамон бар асари коронавирус дар Чин ба қайд гирифта шудааст.

Дар ин миён мақомоти Ҷопон аз олуда шудани 70 нафари дигар дар киштии Diamond Princess хабар доданд, ки дар соҳили Ҷопон дар карантин аст. Ҳамин гуна шумораи беморон дар ин киштӣ ба 355 кас расидааст.

Сафорати Иёлоти Муттаҳида дар Токио гуфт, ду ҳавопаймои супоришии Амрико, ки дар он амрикоиҳои киштии Diamond Princess ҳастанд, Ҷопонро тарк карданд.

Вазорати корҳои хориҷии Амрико рӯзи 17-уми феврал гуфт, 14 амрикоӣ, ки санҷиши тиббиашон мусбат баромад ва дар миёни зиёда аз 300 шаҳрванди Иёллоти Муттаҳида ва аъзои оила буданд, аз киштӣ кӯчонида шуданд. Онҳо пас аз расидан боз 14 рӯз дар карантин хоҳанд буд. Ин киштӣ аз 3-юми феврал ба сабаби олуда шудани мусофиронаш ба коронавируси нав нигоҳ дошта мешавад.

Энтони Фаучӣ, роҳбари Пажӯҳишгоҳи миллии аллергия ва бемориҳои сироятии Амрико, ба телевизиони CBS гуфтааст, наздик ба 40 амрикоии дар ин киштӣ ба вирус олудашуда дар Ҷопон табобат карда хоҳанд шуд.

Дар Узбекистон сокинон ба ҳимоят аз манзилҳояшон бо табару бел бархостанд

Сокинони ноҳияи Олтинсойи Сурхондарё барои ҳимоят аз манзилҳояшон бо табару бел бархостанд. 16-уми феврали, 2020.

Дар вилояти Сурхандарёи Узбекистон сокинони ноҳияи Олтинсой зидди он кормандони пулис, ки барои тахриби хонаҳояшон рафта буданд, бо табару бел бархостанд, Дар натиҷаи занозанӣ як сокини осоишта ва ду корманди пулис захмӣ шуданд.

Ба гуфтаи шоҳидон, субҳи 14-уми феврал гуруҳи кормандони пулис, додситонӣ ва ҳукумати ноҳияи Олтинсой ба маҳаллаи "Халқобод" рафта, сокинонро огаҳ кардаанд, ки хонаҳояшон тахриб хоҳад шуд. Хабари тахриби манзилҳои зист боиси сар задани занозанӣ миёни ҷонибҳо шудааст.

Дар наворҳое, ки дар шабакаҳои иҷтимоӣ нашр шуд, сокинони маҳаллӣ мегӯянд, кормандони пулис зидди онҳо аз нерӯи ҷисмонӣ кор гирифтаанд. "Онҳо мардумро монанди саг мезаданд. Бинед, чи гуна кормандони ҳифзи ҳуқуқ одамони бегуноҳро латукӯб карда, дар рӯи замин кашола доранд. Бинед, чи хел онҳо мӯйсафеди бечораро мезананд",-мегӯяд, шахсе, ки наворро сабт дорад.

Вале Шуъбаи пулиси ноҳияи Олтинсой мегӯяд, сокинони "Халқобод" ба кормандони пулис, ки мехостанд, мардуми ҷамъшударо ором созанд, муқовимат нишон додаанд. Бархе сокинон бо чӯб, бел ва табар ба кормандони пулис ҳамла карданд.

Дар натиҷаи задухӯрд шаш сокини "Халқобод" боздошт, вале биноҳои бунёдшудаи "ғайриқонунӣ" тахриб нашудаанд.

Додситонии кулли Узбекистон 16-уми феврал бо нашри як изҳорот дар рух додани ҳодисаи "Халқобод" хонаводаҳоеро айбдор кард, ки зидди тахриби "хонаҳои бунёдшудаи ғайриқонунӣ" бархостанд.

Пулис нагузошт, сокинон шикояташонро ба Назарбоев расонанд

Эътирозгарон дар шаҳри Нурсултон. 17-уми феврал, 2020.

Пулиси шаҳри Нурсултон субҳи 17-уми феврал роҳи даҳҳо эътирозгареро баст, ки ба самти қароргоҳи президенти Қазоқистон равон буданд.

Эътирозгарон, ки шуморашон наздики 60 нафар буд, мулоқот бо президенти пешин ва раиси якумрии Шӯрои амнияти Қазоқистон Нурсултон Назарбоев, духтари ӯ - раиси сенати порлумон Дариға Назарбоева ва раиси дастгоҳи президент Ерлан Кошановро талаб доранд.

Ба қароргоҳи президент ҳамчунин соҳибони манзилҳои баҳсӣ, қарздорони ипотека ва гуруҳи сокиноне мехостанд, ворид шаванд, ки аз ҳукми додгоҳҳо нисбат ба наздикону пайвандонашон норозиянд. "Ҳарчанд талаби мо гуногун аст, вале ҳамаамон аз мақомот адолатро мехоҳем",-гуфтанд тазоҳургарон.

Дар миёни онҳое, ки аз ҳукми додгоҳҳо норозиянд, сокинони минтақаҳои гуногуни Қазоқистон низ ҳастанд. Онҳо мегӯянд, мушкилашон танҳо бо дахолати раҳбари Қазоқистон, аз ҷумла президенти ин кишвар Қосимҷомарт Тоқаев ҳал мешавад.

Мулоқоти Саида Мирзиёева бо Иванка Трамп дар Дубай

Саида Мирзиёва, духтари президенти Узбекистон бо Иванка Трамп, духтари президенти ИМА дар Дубай мулоқот кард. 16-уми феврали 2020.

Рӯзи 16-уми феврал дар шаҳри Дубай Анҷумани ҷаҳонии бонувон оғоз шуд. Дар рӯзи аввали анҷуман Саида Мирзиёева, духтари президенти Узбекистон Шавкат Мирзиёева ҳамчун узви Комиссияи баробарии гендерӣ дар ин кишвар баромад кардааст.

Мирзиёева пеш аз оғози анҷуман дар Telegram навиштааст, ки ӯ бо Иванка Трамп, духтари Доналд Трамп вохӯрдааст. "Пеш аз оғози Анҷумани ҷаҳонии бонувон президенти Бонки ҷаҳонӣ Дэвид Малпасс маро бо Иванка Трамп шинос намуд",-навиштааст вай.

Духтари Мирзиёев дар суханронияш Имороти Муттаҳидаи Арабиро барои лоиҳаҳои навоваронаи занона бештар муносиб дониста, гуфтааст, барои табодули таҷриба дар ин замина кишвари муҳим аст.

"Таърихи тӯлонии Узбекистон таърихи бонувони мо ҳам ҳаст. Ҳоло замоне расидааст, ки бояд ба онҳо имконият дод, то тавоноӣ ва қобилияти худро бидуни маҳдудият ва тарс нишон диҳанд",-изҳор доштааст Мирзиёева.

Дар мавриди баробарии гендерӣ дар Узбекистон Мирзиёева гуфт, ки имрӯз дар ин замина ба пешрафтҳои бесобиқае ноил шудаанд, вале "бо хатарҳои нав ҳам рӯбарӯ мешавем". Ба гуфтаи ӯ, бонувони узбек дар деҳот, ки бо кишоварзӣ машғул ҳастанд, ба дастгирӣ ниёз доранд.

Саида Мирзиёева то чанде пеш муовини раҳбари Оҷонси иттилоот ва робита бо ҷомеаи назди президенти Узбекистон буд. Ӯ 29-уми январ бо хоҳиши худ аз мақомаш истеъфо дода, гуфт, Бунёди ҷамъиятии пуштибонӣ ва рушди расонаҳои миллиро таъсис додааст.

Дар маросими муаррифии бунёд Саида Мирзиёева гуфт, бо тамоми имконот ва таҷрибааш талош хоҳад кард, ки аз озодии баён ҳимоят кунад, шаффофияти кори мақомотро таъмин ва ҳуқуқу манфиатҳои рӯзноманигорону блогнависонро ҳифз намояд.

Додситонӣ хабари додани пора ба раъйдиҳандагон дар Ӯшро шарҳ дод

Раъйдиҳӣ дар Қирғизистон. Акс аз бойгонӣ.

Раёсати шаҳрии корҳои дохилии Ӯши Қирғизистон тафтиши ибтидоии бо ришваву пора ҷалб кардани раъйдиҳандагонро шуруъ кард. Дар ин бора Додситонии кулли Қирғизистон хабар медиҳад.

Дар хабари додситонӣ омадааст, ки мақомоти назоратӣ иҷрои қонунҳои интихоботиро дар давраи маъракаи интихоботи маҳаллӣ назорат мекунанд. Мақомот ҳамчунин тағйири дастаҷамъии қайди ҷойи зисти сокинонеро месанҷанд, ки дар остонаи интихобот аз деҳот ба шаҳр "кӯчидаанд".

Ба иттилои додситонӣ, пулис тафтишот мебарад ва роҳбарони мизҳои шиносномадиҳии шаҳри Ӯш дар бораи роҳ надодан ба қонуншиканӣ огоҳонида шудааст.

Пештар аз ин Комисияи марказии интихоботӣ ва раъйпурсии Қирғизистон хабар дод, ки дар остонаи интихоботи маҷлисҳои маҳаллӣ дар чанде аз шаҳрҳо якбора боло рафтани шумори сокинон мушоҳида мешавад. Ин масъаларо дар порлумони Қирғизистон низ баррасӣ карданд.

Ба иттилои комисия, интихоби вакилони маҳаллӣ 12-уми апрели имсол дар 5 шаҳр - Ӯш, Майлуу-Суу, Қарақӯл, Балиқчӣ ва Токмак баргузор мешавад.

Қатъи интернет дар Қазоқистон ва талоши мақомот барои ислоҳи вазъ

Рӯзи якшанбеи 16-уми феврал дар Қазоқистон аз кор мондани чанде аз сомонаҳои интернетӣ, аз ҷумла сомонаи бахши қазоқии Радиои Озодӣ, шабакаҳои иҷтимоӣ, Youtube ва хизматрасонҳои Google мушоҳида шуд.

Корбарони аз суръати кунди Интернет шикоят доранд. Мушкили дастрасӣ ба паёмрасони Telegram чанд рӯз аст, ки давом дорад.

Берик Уалӣ, сухангӯи президенти Қазоқистон хабар дод, ки Қосимҷомарт Тоқаев дастур дод, "фаъолияти ҳамаи сомонаҳову шабакаҳо барқарор шавад". Тоқаев айни ҳол бо сафари корие дар Олмон қарор дорад.

Қатъи дастрасӣ ба сомонаҳои интернетӣ, ба вижа шабакаҳои иҷтимоӣ дар Қазоқистон давоми чанд соли охир асосан шабона рух медод. Мақомоти Қазоқистон қатъи дастрасиро ба "мушкилоти техникӣ" рабт медоданд. Фароҳамкунандагони Интернет мавҷудияти "мушкили техникӣ"-ро рад мекарданд.

Қатъи густардаи Интернет дар Қазоқистон 9-уми май ва 9-уми июни соли 2019 низ рух дода буд. Он замон сокинон бо нишони эътироз ба кӯча баромаданд ва мақомот қисме аз эътирозгаронро боздошт карданд.

Мақомоти қудратии Қазоқистон ҳаққи қатъи Интернет ва васоили иртибототиро дар ҳолатҳои фавқулодда доранд.

Зодгоҳи Бердимуҳаммадов беҳтарин ноҳия эълон шуд

Минтақаи Геокдепини вилояти Аҳал. Акс аз бойгонӣ.

Ноҳияи Геоктепини Туркманистон барандаи озмуни беҳтарин ноҳияҳои он кишвар дар соли 2019 эълом ва соҳиби 1 миллион доллари ИМА шуд.

Ба навиштаи расонаҳо, маросими ҷоизасупорӣ рӯзи 13-уми феврал дар деҳаи Изганти ноҳияи Геокдепин сурат гирифт. Дар ин маросим ноиби сарвазир, вакилони порлумон, роҳбарони вилоятҳову ноҳияҳо, намояндаи созмонҳои ҷамъиятӣ ва дигарон ширкат карданд.

Қурбонгулӣ Бердимуҳаммадов, президенти Туркманистон фармон дар бораи тақдими 1 млн долларро 7-уми феврал имзо карда буд.

Бердимуҳаммадов дар ноҳияи Геокдепин таваллуд шудааст. Ба ҷуз ин, ноҳияи мазкур дар ҳудуди вилояти Ахал ҷойгир аст, ки то чанде пеш ин вилоятро Сардор Бердимуҳаммадов, писари президент идора мекард. Сардор тобистони соли 2019 раиси вилояти Ахал таъйин шуда буд.

Дар даврони роҳбарии Сардор Бердимуҳаммадов ин вилоят нахустин шуда, нақшаи ҷамъоварии ҳосили пахтаро иҷро кард ва ҳамчунин барои сохтмони маркази нави маъмурӣ аз буҷаи давлат 1,5 миллиард доллар дарёфт кард.

Қурбонгулӣ Бердимуҳаммадов рӯзи 7-уми феврал писарашро вазири саноат ва сохтмони Туркманистон таъйин кард.

Узбекистон эътироф кард, ки дар ҳаводиси Андиҷон мардумро нерӯҳои ҳукуматӣ паронданд

Неруҳои қудратӣ дар яке аз хиёбонҳои Андиҷон. 17-уми майи соли 2005.

Муовини Додситони кулли Узбекистон Светлана Ортиқова эътироф кард, ки 13-уми майи соли 2005 дар Андиҷон ба самти сокинони осоишта на гуруҳҳои мусаллаҳ, балки нерӯҳои ҳукумати ин кишвар оташ кушода буданд.

Ортиқова дар суҳбат бо расонаи Qalampir.uz гуфт, бархе аз мансабдорони давлатӣ, ки дар оташкушоӣ ба сӯи сокинони осоишта даст доштанд, ба ҷавобгарӣ кашида шуданд. Вале ӯ ному насаби муҷозотшудаҳоро дақиқ нагуфт. "Бархе аз онҳо аллакай ба зиндагии муқаррарии худ баргаштаанд",-афзуд Ортиқова.

Тошканди расмӣ то ба имрӯз мегуфт, ки сокинони осоиштаро на нерӯҳои ҳукуматӣ, балки гуруҳҳои мусаллаҳ паронданд.

Ортиқов дар посух ба суоли ин ки чаро то ҳол дар бораи ҳаводиси Андиҷон озод ҳарф зада намешуд, гуфт, дар се соли ахир Узбекистон тағйир ёфтааст. "Он замон Узбекистон пушида буд. Он вақт ҳамкории мо бо расонаҳои хориҷӣ хеле сахт буд. Имрӯз Узбекистони нав ва сиёсати дигар дорем. Имрӯз озодии сиёсии нав дорем. Ҳатто мову шумо низ нав шудаем",-изҳор дошт муовини додситони кулли Узбекистон.

Ортиқова дар шарҳи ронда шудани намояндагони расонаҳои байналмилалӣ ва рӯзноманигорон илова кард, ки "он замон вазъ инро талаб мекард".

Бино ба иттилои ҳукумати Узбекистон, дар ҳаводиси Андиҷон 187 кас кушта шудаанд. Вале шоҳидони маҳаллӣ мегӯянд, шаби 13-уми майи соли 2005 дар Андиҷон садҳо, эҳтимол дорад, ҳазорҳо одам кушта шуданд.

"Facebook" рӯзона миллион саҳифаи дурӯғинро пок мекунад

Марк Сукерберг, бунёдгузори шабакаи иҷтимоии "Фейсбук".

Бунёдгузори шабакаи иҷтимоии "Фейсбук" Марк Сукерберг гуфт, маъмурияти шабака ҳамарӯза беш аз 1 миллион саҳифаи дурӯғинеро пок мекунад, ки барои пешбурди маъракаҳои сиёсии ҳукуматҳои гуногун боз шудаанд.

"Дар ҳоли ҳозир мо рӯзона беш аз 1 миллион саҳифаи дурӯғинро пок мекунем. Дурӯғин будани бештари ин саҳифаҳо ҳамагӣ баъд аз чанд соати боз шуданашон маълум мешавад. Аксари онҳо ба ниҳодҳои давлатие рабт надоранд, ки мехоҳанд ба интихобот таъсир расонанд. Вале бидуни шак, баъзе аз онҳо як қисми маъракаи ҳукуматҳоянд", - изҳор дошт Сукерберг дар як конфронси байналмилалӣ дар Мюнхен.

Ба гуфтаи ӯ, Фейсбук пас аз моҷарои марбут ба интихоботи президентии ИМА дар соли 2016 сиёсати пайгирии фаъолияти корбаронро тағйир дод. Он замон Русияро айбдор карданд, ки бо роҳандозии маъракаи иттилоотӣ, аз ҷумла дар "Фейсбук" ба президент Доналд Трамп мусоидат кард, баранда шавад.

Сукерберг ҳамчунин пештар гуфта буд, ки "Фейсбук" аз соли 2016 сиёсати ҷойгир кардани эълонҳоро тағйир додааст. Ҳар нафаре, ки мехоҳад, эълони сиёсӣ ҷойгир кунад, бояд нахуст иҷозат гирифта, маҳалли будубош ва маълумоти шахсии худро тасдиқ кунад. Дар натиҷа корбарон низ хоҳанд дид, ки эълонро кӣ фармоиш додааст.

Маъмурияти "Фейсбук" борҳо саҳифаҳоеро пок кардаанд, ки ба гуруҳи русии ба истилоҳ, "Оҷонси интернетии таҳқиқотӣ" рабт доранд. Ин гуруҳ бо номи "фабрикаи троллҳо" низ маълум аст. Маҳз фаъолияти он дар доираи парвандаи дахолат ба интихоботи президентии ИМА тафтиш мешуд.

Муҳаммад Ҷавод Зариф гуфт, Доналд Трамп "хато мекунад"

Муҳаммад Ҷавод Зариф дар нишасти амниятии Мюнхен дар Олмон. Акс аз рӯзи 15-уми феврали соли 2020.

Ҷавод Зариф, вазири умури хориҷии Эрон гуфт, агар Доналд Трамп, раиси ҷумҳури Амрико бовар дорад, ки ҳукумати Эрон зери фишори афзояндаи иқтисодӣ аз ҳам мепошад, пас тавсияҳои нодуруст мегирад. Ӯ рӯзи 15-уми феврал дар конфронси амниятии Мюнхен дар Олмон гуфт:

“Раиси ҷумҳур Трампро мутмаин кардаанд, ки мо ба зудӣ аз ҳам мепошем ва барои ҳамин ӯ бо режими дар ҳоли фурӯ рехтан гуфтугӯ намекунад. Фикр мекунам, нодуруст мегӯяд. Онҳо мегӯянд, ки дар пайи тағйири режим нестанд, вале дар асл ҳаминро мехоҳанд ва дар 41 соли гузашта хостаанд. Ва дар 41 соли гузашта ноком шудаанд. Онҳо бояд фақат воқеияти Эрон дар минтақаро эътироф кунанд.

Доналд Трамп баъди берун кардани Амрико аз созиши атомӣ бо Эрон дар соли 2018 таҳримоти фарогири иқтисодӣ ба зидди ин кишварро барқарор кард. Ба қавли ӯ созиш ба қадри кофӣ сахтгирона нест ва монеи дастёбии Эрон ба бомби атомӣ намешавад. Таҳримот дар як соли ахир ба иқтисодиёти Эрон осеби зиёд расонд ва пули кишварро беқурб кард.

Нӯҳ нашъаманди бехонаро дар шаҳри Кобул куштаанд

Маъмурони амниятӣ ҳангоми дастгир кардани мӯътодони маводи мухаддир дар Кобул. Акс аз 24-уми октябри соли 2017.

Афроди мусаллаҳ дар шаҳри Кобул 9 мӯътоди маводи мухаддири бехонаро бо зарби тири туфанг куштаанд. Мақомоти Афғонистон гуфтанд, ки ҳодиса шоми 15-уми феврал рух додааст. Фаромарзи Таманно сухангӯи пулис гуфт, яке аз мӯътодонро захмӣ пайдо карда ва ба шифохона бурдаанд. Сабабҳои қатли нашъамандон маълум нест. Пулис ба таҳқиқи ҳодиса шуруъ кардааст.

Истеъмоли маводи мухаддир дар Афғонистони ҷангзада, ки бузургтарин тавлидкунандаи ҳероин дар ҷаҳон ба ҳисоб меравад, рӯ ба афзоиш овардаст. Як таҳқиқи саросарӣ нишон додааст, ки дар кишвари 37 миллионнафарии Афғонистон тақрибан аз 3 то 3 миллиону 600 ҳазор нафар маводи мухаддир истифода мебаранд.

Бекории густурда, набуди хадамоти муносиби иҷтимоӣ ва ҳам дастрасии осон ба маводи мухаддир ба гуфтаи Шукур Ҳайдарӣ, муовини вазири мубориза бо маводи мухаддир сабаби ин “бӯҳрони иҷтимоӣ” дар Афғонистон шудааст.

Вазири амрикоӣ, созиш бо Толибонро "умедворкунанда" номид

Марк Эспер ҳангоми суханронӣ дар конфронси амниятии Мюнхен. 15-уми феврали соли 2020.

Марк Эспер, вазири дифои Амрико гуфт, созиши кишвараш ва Толибон барои коҳиши якҳафтаинаи хушунат дар Афғонистон “бисёр умедворкунанда” ба назар мерасад, аммо аз хатар орӣ нест.” Ӯ рӯзи 15-уми феврал дар конфронси амниятии Мюнхен дар Олмон гуфт, фурсати он расидааст, ки барои хотимаи ҷанги тақрибан 19-сола аз роҳи ҳалли сиёсӣ “ба сулҳ имкон бидиҳем.” Айни замон ӯ афзуд: “Яъне бояд хатарҳоеро ҳам пазируфт.”

Дастгоҳи раёсати ҷумҳурии Афғонистон рӯзи 15-уми феврал гуфт, созиш шарту шароит дорад ва зоҳиран ҳафтаҳои наздик ниҳоӣ мешавад. Дар баёния омадааст, як мақоми Амрико ба Ашраф Ғанӣ, раиси ҷумҳури Афғонистон гуфтааст, ки Толибон омодаи “даст кашидан аз хушунат ва пазируфтани як ҷомеаи гуногунандеш” ҳастанд.

Муҳоҷирон бо пулиси Босния ҷанҷолу кашмакаш карданд

Муҳоҷире дар урдӯгоҳи Мирал дар шаҳри Велика Кладуса. Акс аз 14-уми феврали соли 2020.

Садҳо муҳоҷир бо талош барои тарки як урдӯгоҳи паноҳандагон дар Босния ва Ҳерсеговина бо маъмурони пулис даст ба гиребон шудаанд. Онҳо айни замон аз шароити бади урдӯгоҳ ва бадрафтории посбонҳои марзи Хорватия эътироз доштаанд. Ҳоло маълум нест, касе маҷруҳ шудааст, ё на. Ҷанҷолу кашмакаш рӯзи 15-уми феврал дар урдӯгоҳи Мирал дар ғарби Босния ва дар 10 километрии марзи Хорватия рух дод. Дар урдӯгоҳ, ки барои 300 нафар ҷой дорад, 1000 муҳоҷирро нигаҳ медоштаанд.

Хабаргузории “Рейтерс” гузориш дод, ки баъзе аз муҳоҷирон, “Озодӣ”, “Пули моро баргардонед” ва “Дигар моро назанед” фарёд мекашиданд. Аксарияти ин муҳоҷирон аз рафтори посбонҳои марзи Хорватия шикоят кардаанд, ки ба гуфтаи онҳо, ҳангоми саъйи муҳоҷирон барои убур бо онҳо бадрафторӣ карда, пас гардондаанд.

Салам Бату, яке аз муҳоҷирон бо “Рейтерс” гуфтааст, ки дар гузаргоҳи марзӣ, маъмурони амниятии Хорватия либосҳои онҳоро кашидаанд ва “ҳама чизашонро гирифтаанд.” Мақомоти Хорватия ин иддаоҳоро рад кардаанд. Ба гуфтаи ҳукумати Босния аз соли 2019 то кунун тақрибан 50 ҳазор муҳоҷир аксаран аз Покистону Афғонистон, Ироқу Марокаш ва Сурия барои расидан ба кишварҳои ғарбии Иттиҳодияи Аврупо аз қаламрави Босния ва Ҳерсеговина убур кардаанд. Тақрибан 6 ҳазор нафари онҳо мондаанд ва дар урдӯгоҳу паногоҳҳои мувақаттӣ нигаҳ дошта мешаванд.

Cтолтенберг пешниҳоди Эммануел Макронро рад кард

Йенс Столтенберг ҳангоми суханронӣ дар як нишасти хабарӣ дар Брюссел дар рӯзи 13-умти феврали соли 2020.

Йенс Столтенберг, дабири кулли НАТО, пешниҳоди Эммануел Макрон, раиси ҷумҳури Фаронсаро рад кард, ки хост, аслиҳаи атомии Фаронса ба маҳаки стротегияи мудофиаи Аврупо табдил дода шавад. Ӯ гуфт, чатри муҳофизатии муассири Амрико Бритониё, ки барои Аврупо то ҳол буд, кофист.

Йенс Столтенберг рӯзи 15-уми феврал дар шаҳри Мюнхени Олмон ба хабарнигорон гуфт, чатри муҳофизатии ҳастаие, ки то ҳол 28 кишвари Иттиҳодияи Аврупо доранд, “Озмоишу имтиҳон карда шудааст ва кафолати ниҳоии амнияти Аврупо аст.” Айни замон ӯ Фаронсаро, як ҳампаймони соҳибэҳтироми НАТО номид, ки ба қавли ӯ тавоноии атомиаш дар таъмини амнияти умумии кишварҳои узв кӯмак кардааст.

Эманнуел Макрон, раиси ҷумҳури Фаронса бо назардошти хуруҷи Бритониё аз Иттиҳодияи Аврупо талош дорад, ки низоми мудофиавии Иттиҳодияи Аврупо бознигарӣ шавад. Фаронса ягона узви мусаллаҳ бо бомби атомӣ дар иттиҳодия мондааст ва Эманнуэл Макрон мехоҳад, Аврупо дигар ба замонатҳои амниятии Амрико ҳам такя накунад ва стротегияи мустақили мудофиавӣ дошта бошад. Фаронса агарчӣ узви НАТО аст, вале бомбҳои атомии худро барои муҳофизати аъзои дигари созмон пешниҳод намекунад.

Вокуниши як мақоми марзбонии Қирғизистон ба изҳороти генерали тоҷик

Абдукарим Олимбоев (дар байн аз тарафи рост) ҳамроҳи ҳамтоёнаш аз Тоҷикистон. Моҳи декабри соли 2019

Як мақоми баландпояи нирӯҳои марзбонии Қирғизистон ба суханони генерал Абдулло Навҷувонов, сардори Раёсати корҳои дохилии вилояти Суғд, дар бораи мақоми Бодканд вокуниш кард.

Абдукарим Олимбоев, сардори ситод ва муовини аввали раиси Хадамоти марзбонии Қирғизистон, рӯзи 15-уми феврал ба расонаҳои кишвараш гуфтааст, "Бодканд ҳеч гоҳ аз тоҷикон набуд ва нахоҳад шуд. Бодканд аз аввал замини қирғизҳо буд ва аз қадим боз мардуми қирғиз дар онҷо зиндагӣ мекунанд".

Вилояти Бодканд бо ноҳияи Исфара ҳаммарз аст ва аксар муноқишаҳои марзӣ байни сокинони ду минтақа рӯй медиҳад.

Бино ба гузориши расонаҳои Тоҷикистон, Абдулло Навҷувонов дар нишасти хабарии рӯзи 12-уми феврал дар Хуҷанд ба масъалаи муноқишаҳо дар марз бо Қирғизистон дахл карда ва гуфтааст: "Агар таърихро варақгардон кунем, дар гузашта Бодканд ҳеч гоҳ замини қирғизҳо набуд. Гузаштагони тоҷикон қирғизҳоро ба Бодканд оварданду замин доданд ва имрӯз ин барои ҷониби Тоҷикистон мушкилофар шуд".

Абудкарим Олимбоев дар вокуниш ба ин изҳорот гуфтааст, "ман ҳам метавонам изҳор дорам, ки ҳудуди Ворух ва Чоркӯҳ пурра ба Қирғизистон рабт дорад. Аммо бояд фаҳмем, ки масъалаи қаламрав – масъалаи бисёр нозуку ҳассос аст. Ҳалли ин масъала ба тақдири ҳазорон мардуме, ки дар минтақаҳои наздимарзӣ зиндагӣ мекунанд, рабт мегирад."

Вазорати умури хориҷии Қирғизистон бо норизоиятӣ аз суханони генерали тоҷик рӯзи 14-уми феврал сафири Тоҷикистон дар Бишкек Назирмад Ализодаро ба ин ниҳод даъват кард. Мақомоти Қирғизистон гуфтаанд, умевдоранд Душанбе ба ин масъала вокуниши муносиб мекунад ва дигар ин иттифоқ такрор намешавад.

Тоҷикистон ҳанӯз ба ин мавзуъ вокуниш накардааст.

Марзи Тоҷикистону Қирғизистон 976 километрро ташкил медиҳад, ки аз он танҳо 60 дарсадаш муайян ва аломатгузорӣ шудааст. Миёни ду кишвар тақрибан ҳафтод минтақаи баҳсӣ ва муайяннашудаи марзӣ мондааст.

Муайян набудани хатти марз борҳо боиси сар задани муноқиша миёни шаҳрвандони ду кишвар ва бахусус байни Исфараи Тоҷикистон ва Бодканди Қирғизистон шудааст.

"Гурӯҳи 24" пуштибониашро аз ҲСДТ ва номзадҳои он эълон кард

Дар акс: Раҳматилло Зоиров, раиси Ҳизби сотсиал-демократи Тоҷикистон ва Сӯҳроби Зафар, раиси ҷунбиши фаъолияташ дар Тоҷикистон мамнӯи "Гурӯҳи 24"

Як созмони мухолифи ҳукумати Тоҷикистон дар хориҷа пуштибонии худро аз Ҳизби сотсиал-демократ ва номзадҳои он дар интихоботи порлумонии моҳи март эълон кард.

"Гурӯҳи 24" рӯзи 10-уми феврал бо нашри баёнияе аз аъзову намояндаҳо ва ҳаводоронаш хост, ки нисбат ба интихобот ва номзадҳои ҲСДТ бетараф набошанд. "Ҳизби сотсиал-демократи Тоҷикистон ягона ҳизби мустақили сабтиномшуда дар Тоҷикистон ва шоистаи пуштибонӣ дар интихобот аст", -- гуфта шудааст дар баёния.

Фаъолияти "Гурӯҳи 24" шаш сол боз дар Тоҷикистон мамнуъст. Масъулони созмон фаъолиятҳои худро сиёсӣ медонанд, аммо мақомоти тоҷик экстремистӣ эътироф кардаанд.

Вокуниши раҳбарияти Ҳизби сотсиал-демократи Тоҷикистон ба эълони "Гурӯҳи 24" ҳанӯз маълум нест.

Интихоботи порлумонӣ дар Тоҷикистон рӯзи 1-уми марти имсол баргузор мешавад. Масъулони Кумисюни марказии интихобот гуфтанд, 241 номзад вориди сабқат шудаанд ва барои соҳибӣ ба 63 курсии вакили Маҷлиси Намояндагон талош доранд.

Ҳизби сотсиал-демократи Тоҷикистон ба ин сабқат бо панҷ номзад ворид шудааст, ки дар садри он Раҳматилло Зоиров, раиси ҳизб қарор дорад.

Ҳизби сотсиал-демократи Тоҷикистон то ин дам дар порлумон ҳеч курсӣ надошт. Дар интихоботҳои гузашта мақомот гуфта буданд, ки ҳизб овози заруриро ба даст наовардааст. Раҳбарияти ҲСДТ бовар дорад, ройи тарафдорони онҳо "дуздидаанд".

Фаъолияти "Гурӯҳи 24", ки ҳамакнун аз Ҳизби сотсиал-демократ дар ҷараёни интихоботи порлумонӣ ҳимоят кардааст, соли 2014 бо қарори Додгоҳи олӣ манъ шуд. Ин созмонро тоҷири норозӣ Умаралӣ Қувватов бунёд гузоштааст, ки соли 2015 дар шаҳри Истанбул кушта шуд.

То кунун даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми узвият ва тарафдорӣ аз ин ҷунбиш дастгиру зиндонӣ шудаанд.

Як гуруҳ аз аъзои пешини ин гуруҳ баъди бозгашт ба Тоҷикистон афв шудаанд ва соли гузашта дар номае аз Додгоҳи олӣ хостанд, ки фаъолияти созмонро иҷоза бидиҳад, аммо дархости онҳо рад шуд.

Солҳои охир раҳбарони “Гурӯҳи 24” бештар тавассути интернет ва шабакаҳои иҷтимоӣ ба фаъолияти худ идома медиҳанд. Онҳо асосан дар Туркияву Русия ва кишварҳои аврупоӣ ҳузур доранд.

Помпео гуфт, Амрико ба Аврупои Марказӣ ва Шарқӣ $1 млрд медиҳад

Майк Помпео ҳангоми суханронӣ дар нишасти амниятии Мюнхен

Майк Помпео, вазири корҳои хориҷии Амрико, гуфт, Вашингтон ба Аврупои Марказӣ ва Шарқӣ як миллиард доллар кумак мекунад, то аз вобастагии минтақа ба энержии Русия пешгирӣ шавад.

Помпео инро дар суханронии рӯзи 15-уми феврал дар нишасти амниятии Мюнхен баён кард.

Ӯ афзуд, кумаки молии Вашингтон тавассути барномаи "Ибтикори се баҳр" ҷудо карда мешавад.

Дар миёни баҳрҳои Сиёҳ, Адреатикӣ ва Балтика, 12 кишвари узви Иттиҳодияи Аврупо ҷойгир ҳастанд.

Ин ибтикор барои ончи бархе аз мақомҳои ғарбӣ муқобила бо хатари вобастагии беш аз ҳад ба энержии Русия хондаанд, рӯйи даст гирифта шудааст.

Русия бузургтарин таъминкунандаи гази табиӣ ва нафт ба Аврупо ба шумор меравад.

Зариф: Эрон барои иҷрои пурраи созишномаи ҳастаӣ шарт дорад

Муҳаммадҷавод Зариф

Муҳамадҷавод Зариф, вазири умури хориҷии Эрон, рӯзи 14-уми феврал дар ҳошияи нишасти амниятии Мюнхен гуфт, дар сурате ки Аврупо кумакҳои иқтисодии муҳимро барои Эрон фароҳам созад, кишвараш моил хоҳад буд, созишномаи ҳастаии соли 2015-ро пурра иҷро кунад.

Теҳрон пеш аз ин гуфта буд, ки худро ба амалӣ кардани масъулиятҳояш дар ин тавофуқнома вазифадор намедонад. Зариф мегӯяд, Теҳрон ба далели таҳримҳои Иёлоти Муттаҳида зарари ҷуброннопазир дидааст. Бо вуҷуди он, ба гуфтаи ӯ, агар Аврупо иқдомоти ҷиддие бигирад, Эрон ҳам қадамҳоеро барои амалӣ кардани ин созишнома мегузорад.

Вазири коорҳои хориҷии Эрон дар идома афзуд, мавзӯи баҳрагирии иқтисодии Эрон аз имтиёзҳои тавофуқномаи ҳастаии соли 2015 ба маънои дарёфти кумакҳои хайрия нест, балки масаълаи марбут ба ҳаққи мардуми Эрон аст.

Эрон ва шаш қудрати ҷаҳон дар соли 2015 созишнмоаи ҳастаиро имзо карда буданд.

Бритониё, Фаронса ва Олмон аз имзокунандаҳои ин созишнома дар талош ҳастанд, то онро ҳифз кунанд.

Доналд Трамп, раиси ҷумҳури Амрико, пас аз инки кишварашро дар соли 2018 аз ин тавофуқнома беррун кашид, ба зидди Теҳрон таҳримҳои сахте ҷорӣ кард.

Дар Руминия як гурӯҳ наврасонро ба ҳайси ғулом истифода кардаанд

Парчами Руминия

Додситони кулли Руминия 12 нафар, аз ҷумла як зан ва шавҳари олмониашро муттаҳам кард, ки аз наврасон ба ҳайси барда ё ғулом истифода кардаанд.

Ба гуфтаи додситон, ин афрод дар солҳои 2014-2019 як гуруҳ аз наврасони аз 12 то 18-соларо ба таври қочоқӣ ба як маркази тарбиявӣ бурда, дар онҷо шиканҷа кардаанд.

Ин маркази таълиму тарбияи кӯдакон дар шимоли Руминия бо кумаки ҳукумати Олмон сохта шудааст.

Мақомот баъд аз ҳашти моҳи таҳқиқот кормандони ин марказро ба дуздии кӯдакон ва маҳрум кардани онҳо аз озодӣ ва пулшӯйӣ муттаҳам карда, парвандаашонро барои муҳокима ба додгоҳ фиристодаанд.

Барканорӣ ва мансаби нави Зайнулло Шарифзода (Соҳибов)

Зайнулло Шарифзода (Соҳибов)

Зайнулло Шарифзода (Соҳибов), бародари Шамсулло Соҳибов, домоди раиси ҷумҳури Тоҷикистон, раиси Оҷонси хариди давлатии мол, кор ва хизматрасонии назди ҳукумат таъин шуд. Қарор дар ин бора рӯзи 14-уми феврал содир гардид.

Зайнулло Шарифзода аз моҳи декабри соли 2013 то ин дам ба ҳайси раиси корхонаи "Сементи Тоҷик" кор мекард. Айни замон номзад аз Ҳизби ҳокими халқии демократии Тоҷикистон ба мақоми вакили Маҷлиси шаҳри Душанбе аст.

Ӯ 37 сол дорад ва шуъбаи иқтисоди Донишгоҳи давлатии ба номи Носири Хусрави шаҳри Бохтарро хатм кардааст. Пештар дар вазифаи ноиби мудири кулли "Тоҷикхимпром"-и ноҳияи Ёвон ва мақомоти корҳои дохилии Тоҷикистон фаъолият дошт.

Мухолифон ҳузури зиёди хешутабори раиси ҷумҳур Эмомалӣ Раҳмонро дар мақомҳои давлатӣ танқид мекунанд. Онҳо мегӯянд, дар мансабгирии наздикони президент робитаи хешутаборӣ нақши муҳим дорад, чизе, ки мақомот ҳамеша рад кардаанд.

Ҳоли ҳозир Рустами Эмомалӣ, писари президенти Тоҷикистон, дар мансаби раиси шаҳри Душанбе ва духтараш Озода Раҳмон дар мақоми раиси Дастгоҳи иҷроияи президент, ҳастанд.

Домодаш Ҷамолиддин Нуралиев муовини аввали раиси Бонки Миллӣ ва додарарӯсаш Ҳасан Асадуллозода раиси "Ориёнбонк" мебошанд.

Зарина Раҳмон, яке аз духтарони Эмомалӣ Раҳмон, муовини раиси “Ориёнбонк” ​ва духтари дигараш Рухшона Раҳмонова муовини сардори Раёсати созмонҳои байналмилалии Вазорати умури хориҷии Тоҷикистон аст.

Шамсулло Соҳибов, домоди раиси ҷумҳур, муовини президенти Кумитаи миллии олимпии Тоҷикистон аст. Дар феҳрасти ягонаи давлатии шахсони ҳуқуқии Кумитаи андоз номи ӯ ба ҳайси муассиси Ҷамъияти саҳомии пӯшидаи "Фароз" сабт шудааст.

Бег Сабур, қудои президент, раиси Хадамоти алоқаи Тоҷикистон аст.

Эмомалӣ Раҳмон аз соли 1992 ба ин тараф ҷилави қудратро дар Тоҷикистон дар даст дорад. Мухолифон ва созмону кишварҳои ғарбӣ ӯро барои саркӯби дигарандешон ва маҳдудиятҳои озодии баёну эътиқод танқид мекунанд. Ҷонибдоронаш хатми ҷанги дохилӣ, сохтмони роҳҳо ва нирӯгоҳҳоро аз комёбиҳои раиси ҷумҳур медонанд.

Дар Хатлон аз қарздории ширкати наздикони Муродалӣ Алимардон гуфтанд

Ёқуб Саидзода, раиси ноҳияи Абдураҳмони Ҷомӣ

Раиси яке аз ноҳияҳо дар ҷануби Тоҷикистон ширкати мутааллиқ ба афроди Муродалӣ Алимардон, раиси "Агроинвестбонк" ва муовини пешини нахуствазири Тоҷикистонро ба напардохтани беш аз якуним миллион сомонӣ, баробар ба тақрибан 150 ҳазор доллар муттаҳам кард.

Ёқуб Саидзода, раиси ноҳияи Абдураҳмони Ҷомӣ рӯзи 14-уми феврал гуфт, ширкати "Баракати Ҷомӣ" пули обу барқ ва молиётро надодааст.

Назари масъулони ширкат феълан маълум нест.

Раиси ҳукумати ноҳияи Абдураҳмони Ҷомии вилояти Хатлон ҳангоми нишасти хабарӣ гуфт, қарздории ширкат сабаб шудааст, ки нақшаи андозро иҷро карда натавонанд.

"Тибқи қарори ҳукумат хоҷагии тухмипарвар доранд ва бояд тухмии хушсифат тавлид кунанд. Дар дохил боз ширкати зотпарварӣ ҳам доранд", -- гуфт Ёқуб Саидзода.

Дар як ҳафтаи ахир бори дувум аст, ки раисони ҳукуматҳои ноҳияҳои вилояти Хатлон аз ду мақомдори тоҷик барои қарздориашон аз андоз шикоят мекунанд.

Ҳафтаи гузашта раиси шаҳри Кӯлоб хабарнигорон гуфт, ширкати хонасозии мутааллиқ ба писари Бег Сабур, раиси Хадамоти алоқа ва қудои президенти Тоҷикистон беш аз чорсад ҳазор доллар андозро напардохтааст. Баҳром Иноятзода таҳдид кард, ки агар ин пулро ба зудӣ напардозанд, "аз роҳҳои дигар истифода хоҳанд кард". Намояндагони ширкат қарздории худро эътироф карданд ва онро ҳалшаванда хонданд.

Даъвати сафири Тоҷикистон ба ВКХ-и Қирғизистон барои гуфтаҳои генерал Навҷувонов

Абдулло Навҷувонов дар байн

Вазорати корҳои хориҷии Қирғизистон нисбат ба гуфтаҳои генерал Абдулло Навҷувонов, сардори Раёсати умури дохилии вилояти Суғд, дар бораи мақоми Бодканд ибрози нигаронӣ кардааст.

Расонаҳои Тоҷикистон рӯзи 12-уми феврал гузориш доданд, ки Навҷувонов дар нишасти матбуотӣ Бодкандро сарзамини қирғизҳо эътироф накардааст.

Мақомоти Вазорати корҳои хориҷии Қирғизистон рӯзи 14-уми феврал Назирмад Ализода, сафири Тоҷикистон дар ин кишварро даъват кардаанд. Дафтари матбуотии вазорат гуфт, дар ин суҳбат ҷониби Бишкек нигаронии худро дар робита ба суханони мақоми баландпояи тоҷик баён дошт.

Бино ба ин иттилоия, Навҷувонов дар нишасти хабарии ду рӯз пеш гуфтааст, "агар таърихро варақ занем, дар гузашта Бодканд ҳеч гоҳ замини қирғизҳо набуд". Ӯ инчунин гуфтааст, "гузаштагони тоҷикон қирғизҳоро ба Бодканд оварданду ба онҳо замин доданд ва имрӯз ин барои ҷониби Тоҷикистон мушкилофар шуд".

Хабаргузории "Азия-Плюс" рӯзи 12-уми феврал гузориш дод, ки генерал Абдулло Навҷувонов дар нишасти хабарии Раёсати умури дохилии вилояти Суғд ба муноқишаҳо дар марз бо Қирғизистон дахл кардааст. Ӯ дар бораи инки ин мушкилот аз куҷо пайдо шуд, гуфтааст, "инро барои мо гузаштагон ба мерос монданд".

Назирмад Ализода, сафири Тоҷикистон дар Бишкек бо президенти Қирғизистон Сооронбой Ҷеенбеков
Назирмад Ализода, сафири Тоҷикистон дар Бишкек бо президенти Қирғизистон Сооронбой Ҷеенбеков

Дар изҳороти ҷониби Қирғизистон омадааст, "раҳбари мақомоти қудратии вилояти Суғди Тоҷикистон ба таҳрифи таърих ва тақаллуби фактҳо машғул аст". Вазорат мегӯяд, дар ин суҳбат ба сафири Тоҷикистон таъкид шудааст, ки чунин гуфтаҳои мақоми баландпоя ва бахусус намояндаи ниҳоди қудратӣ ҷоиз нест.

Вазорат афзудааст, баръакс ҷонибҳо бо супориши раиси ҷумҳурони ду кишвар барои пешгирӣ аз иғвоҳо ва изҳороти моҷаробарангез бояд кор баранд.

Ҷониби Қирғизистон гуфтааст, умед дорад, Душанбе ба ин масъала вокуниши муносиб мекунад ва дар оянда ин иттифоқ дигар такрор намешавад.

Тоҷикистон ҳанӯз ба ин мавзуъ вокуниш накардааст.

Абдулло Навҷувонов моҳи январи имсол ба мақоми сардори Раёсати умури дохилии вилояти Суғд таъин шуд. Вай қаблан дар мансаби муовини вазири корҳои дохилӣ фаъолият дошт.

Марзи Тоҷикистону Қирғизистон 976 километрро ташкил медиҳад, ки аз он танҳо 60 дарсадаш муайян ва аломатгузорӣ шудааст. Миёни ду кишвар тақрибан ҳафтод минтақаи баҳсӣ ва муайяннашудаи марзӣ мондааст.

Муайян набудани хатти марз борҳо боиси сар задани муноқиша миёни шаҳрвандони ду кишвар ва бахусус байни Исфараи Тоҷикистон ва Бодканди Қирғизистон шудааст.

Моҳи январи имсол ҳайатҳои Тоҷикистону Қирғизистон дар шаҳри Исфара ба мувофиқа расиданд, ки баъзе аз минтақаҳоро табодул мекунанд.

Баҳси вазъи печидаи ҷаҳон дар нишасти амниятии Мюнхен

Қарор аст, Майк Помпео – вазири корҳои хориҷӣ ва Марк Эспер – вазири дифои Амрико дар Мюнхен бо президенти Афғонистон суҳбат кунанд

Рӯзи 14-уми феврал наздик ба 35 роҳбари давлат ва ҳукумат, роҳбарони амниятӣ ва дипломатҳо барои иштирок дар Конфронси Амниятии Мюнхен гирди ҳам омаданд.

Ин конфронс замоне баргузор мешавад, ки кашмакашҳо миёни ҳампаймонон шиддат гирифта, зудухӯрдҳои хунин дар ҷойҳои дигар идома доранд.

Интизор меравад, президенти Фаронса Эммануэл Макрон, сарвазири Канада Ҷастин Трюдо ва дабири кулли НАТО Йенс Столтенберг ба ин рӯйдод, ки то 16-уми феврал давом мекунад, ҳамроҳ шаванд.

Дар рӯйхати дипломатҳои беҳтарин вазири корҳои хориҷии Амрико Майк Помпео, вазири корҳои хориҷии Чин Ван Йи ва вазири корҳои хориҷии Эрон Муҳаммад Ҷавод Зариф ҳастанд.

Конфронси солона чандест, ки гирдиҳамоии роҳбарони олии амниятии ҷаҳон аст ва гоҳе дар вақтҳои шиддат ёфтани муносибатҳои Амрико ва Аврупо, монанди баҳс дар бораи ҷанги Ироқ дар аввали соли 2003 баргузор шудааст. Аммо сатҳи кунунии кашмакашҳо фаротар аз солҳои гузашта аст ва доираи густардаи мавзуъҳоро дар бар мегирад.

Аз ҷумла, ихтилофҳо дар бораи сиёсатҳои вобаста ба Эрон ва хоҳишҳои президенти Амрико Доналд Трамп дар бораи он ки иттифоқчиёни аврупоӣ хароҷоти дифоъро барои сабук кардани бори андозсупорандагони амрикоӣ афзоиш диҳанд.

Тағйироти кадрӣ дар ҳукумат ва Додситонии кулли Тоҷикистон

Акс аз хадамоти матбуоти президенти Тоҷикистон

Рӯзи 14-уми феврали имсол дар ҳайати ҳукумати Тоҷикистон ва Додситонии кулли кишвар тағйироти кадрӣ ваё, ба гуфтаи мунтақидон, "ҷойивазкунии кадрҳои куҳна" сурат гирифт.

Бино ба фармони раиси ҷумҳури Тоҷикистон, Давлатшоҳ Гулмаҳмадзода ва Ширин Исматуллозода муовинони нави сарвазир таъин шуданд.

Гулмаҳмадзода пештар дар мансаби раиси вилояти Хатлон кор кардааст. Як соли ахир раиси Кумитаи ҳифзи муҳити зисти назди ҳукумати Тоҷикистон буд.

Ширин Исматуллозода мудири Коллеҷи омӯзгории ба номи Хосият Махсумоваи шаҳри Душанбе буд.

Ҳамчунин дар ин рӯз президенти Тоҷикистон барои аз мансаби муовини аввали додситони кул озод кардани Ҳотам Назарзода ризоят додааст. Сабаби ин тасмимро "ба кори дигар гузаштан" гуфтанд.

Муҳаммадиброҳим Осимзода ва Валӣ Ваҳҳобов низ бо далели "ба кори дигар гузаштан" аз мансаби муовинони додситони кул озод шудаанд.

Ҳоло номзадии Абдуғаффор Ҳикматуллозода ба мақоми муовини аввал ва Дилшод Талбакзода ва Абдураҳим Раҳимзода ба мақоми муовинони додситони кул ба Маҷлиси Миллӣ пешниҳод шудааст. Палатаи болоии порлумон бояд номзадии онҳоро тасдиқ кунад.

Рӯзи ҷумъа додситонҳои шаҳри Душанбе, ноҳияҳои Исмоили Сомонӣ ва Сино низ иваз шуда, дар прокуратураи чанд ноҳияи дигар тағйирот сурат гирифтааст.

Соли 2020 барои ҳукумати Тоҷикистон бо ҷобаҷогузории кадрӣ оғоз шуд. Аммо дар баробари навсозии ҳайати ҳукумат ҳамчунин ҷойивазкунии кадрҳо сурат гирифт, ки дар натиҷа аксари таъиншудаҳо ҷойи пешини худро тағйир доданд.

Бархе коршиносон инро як таҷрибаи маъмулии мудирияти давлат медонанд, баъзеи дигар инро як нишонаи рӯшани қудратгаройӣ ва набуди имкони ҷалб шудани чеҳраҳои нав ба низом медонанд.

Афви Байналмилал аз Э.Раҳмон раҳоии фаврии Далер Шарифовро хост

Далер Шарифов, рӯзноманигори тоҷик.

Созмони Афви Байналмилал (Amnesty International) бо фиристодани номае ба унвонии Эмомалӣ Раҳмон, раиси ҷумҳури Тоҷикистон, хостори озодии фаврӣ ва бе қайду шарти рӯзноманигор Далер Шарифов шудааст.

Мақомоти интизомии Тоҷикистон Далер Шарифовро рӯзи 28-уми январ дастгир карданд. Ӯ ба "барангехтани кинаву адовати динӣ" муттаҳам аст ва ҳоло барои ду моҳ ба ҳабс гирифта шудааст.

Вакили дифоъ ва наздикони Далер Шарифов ҳама иттиҳомотро нисбат ба ӯ рад мекунанд.

Дар номаи созмони Афви Байналмилал ба Эмомалӣ Раҳмон, ки рӯзи 13-уми феврал нашр шуд, гуфта мешавад, "Далер Шарифов ҳеч ҷинояте содир накардааст ва танҳо тавассути навиштаҳои интиқодиаш, аз ҳаққи озодии баён истифода кардааст".

Дар нома гуфта шудааст, ки иттиҳоми "барангехтани кинаву адовати динӣ" нисбат ба Далер Шарифов бекор ва ӯ бояд фавран ва бидуни ҳеч шарт раҳо карда шавад.

Созмони Афви Байналмилал айни замон аз он нигаронӣ кардааст, ки ин рӯзноманигор метавонад дар боздоштгоҳ зери шиканҷа қарор гирад. Ин созмон аз президенти Тоҷикистон хостааст, ҷиҳати дастрасии вакили муддофеъ ба Далер Шарифов чора биандешад.

Аз ин қабл шуморе аз созмонҳои мудофеи ҳуқуқи башар ва ҳомии рӯзноманигорон аз Тоҷикистон хоста буданд, ки рӯзноманигорро раҳо кунад. Аз ҷумла, Созмони Авфи Байналмилал, Ҳамкории Байналмилалӣ Барои Ҳуқуқи Инсон ва Кумитаи Норвегии Ҳелсинки рӯзи 11-уми феврал бо нашри баёнияи муштарак аз мақомот хостанд, кафолат бидиҳанд, ки бо Далер Шарифов бадрафторӣ сурат намегирад.

Кумитаи дифоъ аз хабарнигорон (CPJ), қароргоҳаш дар Ню-Йорк низ рӯзи 6-уми феврал бо нашри изҳорот аз мақомоти Тоҷикистон хост, рӯзноманигор Далер Шарифовро бе таъхир раҳо карда, иттиҳомоти ба зидди ӯро бекор намоянд. Созмон ҳамчунин аз мақомоти Тоҷикистон хост, ба Далер Шарифов иҷоза диҳанд, ки бидуни ҳеч гуна мамониат ба фаъолияти худ идома диҳад.

Дар аввали моҳи ҷорӣ ҳашт созмони хабарнигорӣ ва ҳомии ҳуқуқи инсон дар Тоҷикистон, даҳҳо журналист ва низ масъули бахши озодии матбуотии САҲА озодии Далер Шарифовро талаб карда буданд.

Далер Шарифов 32-сола аст ва қаблан дар телевизиони "Сафина" ва ҳафтаномаи "Озодагон" кор кардааст.

Ёфтҳои бештар

Дубай Хӯҷа Каримовро ба Тоҷикистон таслим кард
лутфан мунтазир бошед

Феълан кор намекунад

0:00 0:03:08 0:00
Гузоришҳои радиоӣ
ПОДКАСТ
Дубай Хӯҷа Каримовро ба Тоҷикистон таслим кард
Гузоришҳои радиоӣ

Гузоришҳои видеоӣ

Қарори манъи истифодаи таксиҳои куҳна бозбинӣ мешавад
лутфан мунтазир бошед

Феълан кор намекунад

0:00 0:03:06 0:00
XS
SM
MD
LG