Пайвандҳои дастрасӣ

Хабари нав

Хабарҳо

Ҷонибдории Қирғизистон аз пешниҳоди Тоҷикистон

ақ

Вазири умури хориҷаи Қирғизистон баъд аз анҷоми мулоқоташ бо Раиси ҷумҳурии Тоҷикистон изҳор дошт, таъсиси Консорсиуми обу энержии кишварҳои Осиёи Марказӣ, ки аз сӯи Эмомалӣ Раҳмон пешниҳод шудааст, ба манфиати ҳамаи кишварҳои минтақа мебошад.


Аднон Қарабоев - вазири хориҷаи Қирғизистон, ки ҷузъиёти мулоқоташ бо Раиси ҷумҳурии Тоҷикистонро ба хабарнигорон тавзеҳ мекард, афзуд: «Ҳукумати Қирғизистон пурра пешниҳоди Президенти Тоҷикистон дар бораи ташкили Консориуми обу энержии Осиёи марказиро дастгирӣ мекунад. Ин пешниҳод бамаврид ва ояндадор аст».


Вазири хориҷаи Қирғизистон ҳамчунин гуфт, бобати истифода ва баҳрабардорӣ аз захоири об мавқеъи ин ду кишвар ба ҳайси кишварҳои соҳиби ин захоир мушобеҳи ҳам аст. Вале таъкид кард ӯ, таъсиси Консорсиуми обу энержии кишварҳои Осиёи Марказиро бояд омили ҳамоиши ин кишварҳо арзёбӣ кард, на мояи нифоқ ва низоъ.
Вай афзуд, дар тақвияти пешниҳоди Раиси ҷумҳурии Тоҷикистон дар ин робита ташкили Академияи байналмилаии обу энержӣ ва ҳамчунин баргузории саммити байналмилалии обу энержиро матраҳ кардааст.
Дар ҳамин ҳол, бархе аз коршиносони тоҷик мӯътақиданд, ки пуштибонӣ ёфтани пешниҳоди таъсиси Консорсиум аз сӯи Қирғизистон як амри табиист. Зеро ин ду кишвар дар ин замина мушкилоти муштарак доранд.


Абдуқаюми Қаюмзод

Ҳамаи хабарҳои имрӯзро дар инҷо бихонед

Ҳушдори мақоми рус аз хатари ДОИШ пас аз ҳамла ба дидбонгоҳи "Ишқобод"

Игор Моргулов, муовини вазири умури хориҷии Русия.

Мақомоти Русия бо ишора ба ҳамла ба дидбонгоҳи марзии "Ишқобод" дар наздикии марзи Тоҷикистон ва Узбекистон гуфтаанд, ки хатари гурӯҳи "Давлати исломӣ" барои минтақа воқеӣ мебошад. Ин матлабро Игор Моргулов, муовини вазири умури хориҷии Русия дар ҳамоиши Созмони Милали Муттаҳид ва Созмони Ҳамкориҳои Шанхай дар бахши амнияту пешгирии тундгароӣ, баён додааст.

Ба навиштаи хабаргузории русии РИА Новости, оқои Моргулов барқарории субот дар Афғонистонро омили асосии сулҳ дар қаламрави кишварҳои узви СҲШ гуфтааст. Муовини вазири умури хориҷии Русия ҳамлаи хунбор ба дидбонгоҳи "Ишқобод"-ро далели ҷой доштани таҳдиди террористӣ дар минтақа хондааст.

Дар ҳамлаи шаби 6-уми ноябр ба дидбонгоҳи "Ишқобод" дар ҳудуди ноҳияи Рӯдакӣ ва дар марзи Тоҷикистону Узбекистон 15 ҳамлавар ва чанд тан аз нерӯҳои марзбонӣ ва милиса кушта, панҷ ҳамлавар дастгир шудаанд. Мақомот гуфтанд, ки ҳамла кори ҷангҷӯёни гуруҳи тундрави "Давлати исломӣ" аст ва ба иттилои расмӣ "онҳо аз ноҳияи Қалъаи Золи Афғонистон омадаанд".

ДОИШ низ масъулияти ҳамларо ба дӯш гирифт, вале ҳамчунон фарзия ва гумонзаниҳои дигаре дар ҷомеа ва расонаҳо вуҷуд дорад. Мақомоти Афғонистон ва чандин манбаи боварбахш дар мақомоти Тоҷикистон убури ҳаросафканонро аз марз рад кардаанд.

Дар доираи парвандаи изҳори нобоварӣ ба Трамп 4 шоҳид баёнот доданд

Сардори умури аврупоии Шӯрои амнияти миллии ИМА ва мутахассис оид ба Украина подполковник Александр Виндман рӯзи сешанбе дар ҷаласаи бози Кумитаи иктишофии Палатаи намояндагони Конгресс баромад кард.

Виндман 25-уми июли соли равон дар суҳбати телефонии президенти ИМА Доналд Трамп бо ҳамтои украиниаш Владимир Зеленский ҳузур дошт.

Мухолифони Трамп, ки ба барканорияш аз қудрат талош доранд, мегӯянд, президенти Амрико дар он суҳбат аз ҳамтои украинии худ хостааст, то зидди Хантер Байден, писари рақиби сиёсияш аз Ҳизби демократ Ҷо Байден тафтишотро оғоз кунад.

Виндман аз ин суҳбати Трамп нигарон шуда, дар бораи он ба додситони кули ИМА хабар додааст. Ба гуфтаи вай, "президенти ИМА ҳақ надошт, аз раҳбари як кишвари хориҷӣ тафтишот зидди шаҳрванди Амрико ва рақиби сиёсии худро талаб кунад".

Ба гуфтаи Виндман, додситони кулли Украина Юрий Лутсенко, шаҳрдори пешини Ню-Йорк ва вакили дифои шахсии Трамп Рудӣ Ҷулиан "иттилои дуруғеро паҳн карданд, ки сиёсати ИМА нисбат ба Украинаро ба ҳам мезанад".

Ҳамроҳ бо Виндман дипломат Ҷенифер Уилямс ҳам баёнот дод. Ӯ дар тими муовини президент Майк Пенс мушовир буд ва дар суҳбати Трамп бо Зеленский ҳузур дошт. Уилямс гуфт, суҳбати ду президент "ғайриодӣ" буд, зеро дар он "сиёсати дохилии ИМА" баҳс шуд.

Трамп баёноти Виндман Уилямсро дар Твиттер танқид карда, рӯзи сешанбе дар Кохи Сафед ба рӯзноманигорон гуфт, Виндманро намешиносад.

Дар доираи тафтиши изҳори нобоварӣ ба Доналд Трамп шоми сешанбе ду шоҳиди дигар - фиристодаи махсуси ИМА дар Украина Курт Волкер ва корманди Кохи Сафед Тим Миррисон бозпурсӣ шуданд.

Додгоҳи Қазоқистон ҳукми "ҷонибдорон"-и Аблязовро содир кард

Додгоҳе дар шаҳри Алмато 19 ноябр чаҳор сокини маҳаллиро, ки ба иштирок дар фаъолияти ҳаракати мамнуи "Интихоби демократии Қазоқистон" (ИДҚ) айбдор мешуданд, яксолӣ шартан аз озодӣ маҳрум кард.

Ҳабси пешакии ҳамаи гумонбарон тағйир ёфта, Гулзода Ҷаукерова, Оксана Шевчук ва Ануар Аширалиев аз толори додгоҳ озод шуданд. Гумонбари чаҳорум Жазира Демеуова аз моҳи сентябр ба ин сӯ дар ҳабси хонагӣ қарор дошт. Додгоҳ се нафарро ба корҳои ислоҳӣ маҳкум карда, Шевчук ба иллати модари серфарзанд буданаш озод шуд.

Қаблан додситон Муҳит Рисбеков дар мурофиаи 18 ноябр барои чаҳор сокини маҳаллие, ки ба иштирок дар фаъолияти ҳаракати мамнуи "Интихоби демократии Қазоқистон" (ИДҚ) айбдор мешаванд, дусолӣ ҳукми зиндон талаб кард. Ба гуфтаи Рисбеков, баёноти шоҳидон ва маводи парванда гуноҳи гумонбаронро пурра исбот кард.

Гумонбарон айбҳои эъломшударо рад карда, аз додрас хоста буданд, ки ҳукми одилона содир кунад.

Се гумонбар — Оксана Шевчуки 30-сола, Гулзода Ҷаукероваи 51-сола ва Ануар Аширалиеви 36-сола аз 4 июли соли равон дар боздоштгоҳи шаҳри Алмато нигаҳдорӣ мешуданд.

“Ҳудуди ним миллион шаҳрванди то 30-солаи Тоҷикистон аз таҳсил дур мондаанд"

“Ҳудуди ним миллион шаҳрванди то сисолаи Тоҷикистон ба ҳар шакле аз таҳсил дур мондаанд.” Ин хабарро масъули дафтари Бунёди кӯдакони Созмони Милали Муттаҳид (ЮНИСЕФ) дар Душанбе 19-уми ноябр ва дар рӯзи 30-солагии қабули Қатъномаи ҳуқуқи кӯдакон баён дошт. Тоҷикистон соли 1993 ба ин қатънома пайвастааст.

Намояндагии ЮНИСЕФ дар Тоҷикистон бо баргузории нишасте бахшида ба ин рӯз аз мушкил ва дастовардҳои кишвар дар раванди таъмини ҳуқуқи кӯдакон натиҷагирӣ кард.

Азим Иброҳим, муовини нахуствазири Тоҷикистон гуфт, “барои кӯдакон ҳамаи шароит фароҳам карда шудааст. Албатта, камбудҳо низ вуҷуд доранд, аммо омода ҳастем якҷо бо шарикон дар пайи беҳбуди вазъ иқдомҳоеро рӯйи даст бигирем. Намунаи равшани чунин тасмим бозгардондани кӯдакони тоҷик аз Ироқ аст, ки бо кумаки ЮНИСЕФ сурат гирифт”.

Лучано Калестинӣ, роҳбари намояндагии ЮНИСЕФ дар Тоҷикистон гуфт, фарзандони муҳоҷирони тоҷик, ки низ аз таълиму тарбия дур мондаанд, мояи нигарони мақомот мебошанд. Вай афзуд, феълан ҳукумати Тоҷикистон 32 барномаро барои беҳбуди вазъи кӯдакон мавриди иҷро қарор додааст, аммо бештаре аз онҳо ба хотири камбуди маблағ пурра иҷро нашудаанд.

Нуриддини Саид, вазири маориф ва илми Тоҷикистон, дар посух ба ин нигарониҳо гуфт, камбуди маблағ наметавонад садди иҷрои барномаҳо шавад: “Роҳҳои дигари дарёфти маблағ вуҷуд доранд. Ҳукумат метавонад маблағҳои қарзиро барои иҷрои ин барномаҳо ҷалб кунад. Ҳамчунин метавонем аз маблағҳои соҳибкорони баномуси худамон истифода кунем. Аз ҳамаи сарчашмаҳое, ки қонунгузории Тоҷикистон онро манъ накардааст, метавонем маблағҳои заруриро барои иҷрои ин барномаҳо ҷалб кунем ва ба ҳадафҳои ин барномаҳо то соли 2030 даст ёбем.”

Намояндагии ЮНИСЕФ ҳисоб кардааст, ки барои иҷрои пурраи ин барномаҳо то соли 2030 маблағи баробар ба 16 миллиард доллар зарур аст. Маълум нест, мақомот ин пулро ба зудӣ пайдо хоҳанд кард ва ё аз таҳсил дур мондани кӯдакону наврасон ва мушкили дигари онҳо солҳо ҳалношуда мемонад.

Сенатори амрикоӣ: Барои озодии матбуот дар Тоҷикистон тамоми талошро мекунем

Сенатор Ҷим Рисч (Jim Risch), раиси Кумитаи равобити хориҷии Сенати Амрико дар мулоқот бо Ҷейми Флай, президенти Радиои Аврупои Озод/ Радиои Озодӣ таъкид кардааст, ки ҳама талошашонро барои озодии матбуот дар Тоҷикистон анҷом хоҳанд дод.

Дар ин мулоқот, ки рӯзи 13-уми ноябр сурат гирифтааст, раиси Кумитаи равобити хориҷии Сенати Амрико аз нақши Радиои Аврупои Озод/Радиои Озодӣ дар ироаи хабарҳои дуруст ва дақиқ таъкид карда, ба масъалаи мушкили иҷозатномаи фаъолияти кормандони Радиои Озодӣ дар Тоҷикистон ишора намудааст.

“Ниҳодҳое чун Радиои Аврупои Озод дар сафи аввал барои озодии матбуот дар саросари Аврупо ва Осиёи Миёна истодааст,” -- гуфтааст раиси Кумитаи равобити хориҷии Сенати Амрико.

Вай афзуд, ахиран бо чанд мақоми баландпояи сенат ба президент Эмомалӣ Раҳмон ба пуштибонӣ аз гузоришҳои Радиои Озодӣ дар дохили он кишвар нома фиристоода, аз ҳукумат хоста буданд, ки тибқи қонунҳои Тоҷикистон ба хабарнигорони ин радио иҷозатномаи фаъолият диҳанд.

Масъалаи аккредитатсия ё парвонаи кори журналистони Радиои Озодӣ аз моҳи апрели имсол доғ шуд ва имрӯз 11 хабарнигору корманди фаннии намояндагии он дар Душанбе аз ҳаққи кор маҳрум мондаанд. Рӯзи 31-уми октябр, пас аз баёнияҳои бешумори созмонҳои байнулмилалӣ ва ватанӣ Вазорати умури хориҷии Тоҷикистон ба 6 хабарнигор парвонаи нимсола ва ба як нафар семоҳа дод. "Ин барои мо қобили қабул нест ва ман ба фишори ҳукумати Тоҷикистон барои озодии матбуот идома хоҳам дод," -- гуфтааст Ҷим Рисч.

Дар оғози моҳи ноябри имсол президенти Радиои Аврупои Озод/Радиои Озодӣ Ҷейми Флай бо раиси ҷумҳури Тоҷикистон Эмомалӣ Раҳмон мулоқот кард. Ин дидор бо дархости Радиои Озодӣ дар ҷараёни сафари президенти Тоҷикистон ба Аврупо, дар Сюрихи Швейтсария сурат гирифт. Ду тараф вазъ ва шароити кори хабарнигорон ва кормандони Радиои Озодӣ дар Тоҷикистонро баррасӣ намуданд.

Амрико мавқеашро нисбат ба шаҳраксозии яҳудиҳо тағйир додааст

Майк Помпео

Майк Помпео, котиби давлатии Амрико рӯзи 18-уми ноябр гуфт, ки Иёлоти Муттаҳида мавқеашро нисбат ба шаҳраксозии яҳудиҳо дар Соҳили ғарбии дарёи Урдун тағйир додааст.

Вашингтон дигар ба ин назар нест, ки шаҳраксозӣ ҳуқуқи байналмилалиро поймол мекунад. Помпео гуфт, мавқеи Соҳили ғарбӣ бояд дар пайи гуфтугӯи Исроил бо фаластиниҳо таъйин гардад.

Ин тасмими Вашингтон аз мавқеи ҳукумати президенти пешини Амрико Барак Обама аз реша фарқ мекунад. Дар соли 2016 котиби давлатии вақти Амрико Ҷон Керрӣ расман тасдиқ карда буд, ки Иёлоти Муттаҳида шаҳраксозиро ғайриқонунӣ медонад.

Исроил аз мавқеи нави Амрико истиқбол кард. Дар ҳукумати Исроил гуфтанд, ҳамакнун "хатои таърихӣ" ислоҳ шуд.

Намояндагони Маҳмуд Аббос, роҳбари Фаластин тасмими Амрикоро "хилофи ҳуқуқи байналхалқӣ" унвон карданд. Масъулони Иттиҳоди Аврупо гуфт, мухолифат ба шаҳраксозиро давом хоҳад дод. "Иттиҳоди Аврупо аз Исроил даъват мекунад, ки шаҳраксозиро қатъ кунад", - гуфт Федерика Моғеринӣ, роҳбари сиёсати хориҷии Иттиҳоди Аврупо.

Исроил дар пайи Ҷанги шашрӯза дар соли 1967 Соҳили ғарбиро ишғол кард. Аз он замон то кунун дар ин минтақа 140 шаҳраки яҳудӣ сохта шудааст, ки дар ҳоли ҳозир онҷо наздики 600 ҳазор одам истиқомат мекунад. СММ, Русия, Иттиҳоди Аврупо ва аксари кишварҳои дунё амалкарди Исроилро ғайриқонунӣ унвон мекунанд.

Ҳуҷҷатҳои ронандагии сокинони Ишқободро тамдид намекунанд

Ронандагон дар шаҳри Ишқободи Туркманистон бо мушкили тамдиди ҳуҷҷатҳои ронандагӣ рӯ ба рӯ ҳастанд.

"Дар шаҳри Ишқобод ба заноне ҳуҷҷати ронандагии нав намедиҳанд, ки муҳлати 10-солаи ҳуҷҷатҳояшон ба поён расидааст. Дар идораи Бозрасии давлатии автомобилӣ ҳуҷҷатҳои онҳоро қабул намекунанд",-иттилоъ дод хабарнигори бахши туркмании Радиои Озодӣ аз шаҳри Ишқобод.

Ба гуфтаи хабарнигор, занҳо аз ибтидои соли ҷорӣ аст, ки ба ин мушкил рӯ ба рӯ ҳастанд. Номгӯи санадҳое, ки барои дарёфти ҳуҷҷати ронандагӣ муҳим ҳастанд, хеле тӯлонист. Аз ҷумла, нусхаи шиноснома, ҳуҷҷати пешини ронандагӣ, нусхаи санади имтиҳон, нусхаи шаҳодатномаи никоҳ, ҳамчунин се санади дигари тиббӣ.

"Дар посух ба ин талаб, ки чаро ҳуқуқи занҳоро поймол мекунед, бархе аз нозирон мегӯянд, дастури шифоҳие аз боло содир шудааст",-гуфт хабарнигор.

Ин дар ҳолест, ки барои ҳалли мушкил бархе аз занон ба мақомоти ҳифзи ҳуқуқ, аз ҷумла додситонӣ муроҷиат мекунанд. Аммо дар додситонӣ ба ҳамаи шикояткунандагон посухи қолабӣ медиҳанд: "Ҳамаи ҳуҷҷатҳои лозимиро ҷамъоварӣ карда, ба БДА муроҷиат намоед".

Рад шудани 90% даъвои сармоягузорони турк нисбати ҳукумати Узбекистон

Додгоҳи Маркази байналхалқии танзими даъвоҳои сармоягузорӣ (ICSID), ки даъвои ширкати туркии Güneş Tekstil Konfeksiyon Sanayi ve Ticaret Limited Şirketi ва шахсони дигарро нисбати Узбекистон баррасӣ мекард, дастур дод, 10 дарсади ҳаҷми умумии зарар ба ширкат пардохт шавад. "Талаб ва даъвоҳои дигарро додгоҳ рад кард", хабар дод вазорати адлияи Узбекистон.

Додгоҳи Маркази байналхалқии танзими даъвоҳои сармоягузорӣ (ICSID) даъвои 180 миллион долларии соҳибкорони туркро нисбати ҳукумати Узбекистон комилан рад кард. Додгоҳ гуфт, ҳаҷми зарари моддӣ ғайривоқеӣ нишон дода шудааст. Бо қарори додгоҳ, ширкати туркӣ ҳамагӣ 26 миллион доллар ҳамчун ҷуброни зарар дарёфт хоҳад кард.

"Додгоҳ даъвои соҳибкоронро дар бораи муносибати бераҳмона баррасӣ накард. Аз ҳамин хотир ҳамаи даъвои Воҳид Гюнеш дар бораи муносибати бераҳмона якҷониба аст",-омадааст дар хабари вазорати адлияи Ӯзбекистон.

Ба иттилои расонаҳо, додгоҳ даъвои соҳибкори туркро 7 сол баррасӣ ва ниҳоят 4 октябри соли ҷорӣ қарор қабул кард.

Бо қарори додгоҳ, ҳукумати Узбекистон дар маҷмуъ вазифадор шудааст, ки ба ширкати туркӣ 40 миллион доллари ИМА ҷуброн пардозад. Ин ҳам дар ҳолест, ки ширкати туркӣ ҳаҷми зарари худро 180 миллион доллар баҳо дода буд.

Воҳид Гюнеш, соҳибкори турк баъди ҳафт соли фаъолият дар Узбекистон боздошт ва нуҳ моҳ ҳабс шуд. Додгоҳи Узбекистон ӯ ва ҳафт соҳибкори дигарро дар напардохтани андоз ва "густариши иқтисоди соягӣ" айбдор донист. Маркази тиҷории Turkuaz соли 2011 баста шуд. Баъди он ки соҳибкорони турк ба мақомоти Узбекистон 700 ҳазор доллар пардохт карданд, аз боздошт раҳо ва аз ин кишвар ихроҷ шуданд.

Нерӯҳои махсус роҳ ба бинои порлумони Гурҷистонро боз карданд

Нерӯҳои таъиноти махсуси Вазорати умури дохилии Гурҷистон тавонистанд, роҳро ба як қисми бинои порлумон боз кунанд, ки қаблан аз сӯи эътирозгарон бо талаби истеъфои ҳукумат ва баргузории интихоботи пеш аз муҳлат ғасб шуда буд.

Эътирозҳо дар Тифлис пас аз он оғоз шуданд, ки ҷиноҳи аксарияти ҳизби ҳокими "Орзуи Гурҷистон" зидди тағйиру иловаҳо барои гузариш ба интихобот аз рӯи феҳристи ҳизбӣ раъй дод.

Нерӯҳои махсуси Вазорати умури дохилии Гурҷистон пас аз муҳлати сидақиқаӣ ихроҷи мухолифон аз атрофи бинои порлумонро оғоз карданд.

Эътирозгарон бо даъвати раҳбарони худ ба нерӯҳои таъиноти махсус муқобилати ҷиддӣ нишон надоданд.

Раҳбарони мухолифони Гурҷистон гуфтанд, мақомот бо кушодани роҳ ба бинои порлумон тавассути нерӯ ба ҷое нахоҳанд расид ва сар аз рӯзи сешанбе эътирозҳо дар саросари ин кишвар оғоз хоҳанд шуд.

Русия киштиҳои низомии Украинаро баргардонд

Русия киштиҳои низомии "Бердянск" ва "Никопол"-ро, ки моҳи ноябри соли 2018 дар соҳилҳои нимҷазираи Қрим ғасб карда буд, ба Украина баргардонд. Дар ин бора хабаргузории ТАСС бо истинод ба Вазорати умури хориҷии Русия иттилоъ дод.

Дар Вазорати умури хориҷии Русия гуфтанд, ки киштиҳо дар парвандаи ғайриқонунӣ гузаштани марзи ин кишвар далелҳои шайъӣ буданд. Ба гуфтаи вазорат, киштиҳо пас аз ба поён расидани тафтишот баргардонида шуданд.

Пештар ёвари президенти Украина Андрей Ермак хабар дод, ки марҳалаи баргардонидани киштиҳо анҷом ёфт. Нашрияи "Коммерсант" иттилоъ дод, ки ҷониби Русия ва Украина ба созиш расиданд, ки то мулоқоти "шакли нормандӣ" масъаларо ҳал намоянд.

Низомиёни Украина 25 ноябри соли 2018 хабар доданд, ки киштиҳои кишварашон дар тангнои Керч бо истифода аз силоҳ ғасб ва шаш маллоҳ захмӣ шуданд. Ҳамроҳ бо киштиҳо 24 маллоҳ низ дастгир шуданд. Хадамоти амнияти Русия (ФСБ) гуфт, низомиёни ин кишвар ба самти киштиҳои зиреҳпӯши "Бердянск" ва "Никопол" оташ кушоданд.

Идораи амнияти Қрим афзуд, ки се киштии низомии Украина "ғайриқонунӣ" марзи Русияро убур карда, дар роҳ ба тангнои Керч амалҳои хатарноке анҷом доданд. Вале Киев ин иддаоро рад кард.

Маллоҳони украин моҳи сентябри соли равон дар доираи барномаи табодули асирон миёни Москва ва Киев ба ватан баргаштанд.

Қирғизистон тайи солҳои истиқлол $10 млрд кумак дарёфт кардааст

Қирғизистон тайи солҳои истиқлоли худ аз шариконаш дар ҳаҷми 10,5 миллиард доллар кумак дарёфт кардааст.

Ба гуфтаи Даниёр Имоналиев, сардори шуъбаи рушди стратегӣ, иқтисод ва молияи дастгоҳи президенти Қирғизистон, маблағи мазкур ба соҳаҳои иқтисодӣ аз қабили нақлиёт, энержӣ, обёрӣ, тандурустӣ, маориф, ҳолатҳои изтирорӣ ва муҳити зист ҷудо шудааст.

Қарор аст, 19-уми ноябр дар шаҳри Бишкек ҳамоиши сармоягузории "Тезонидани ислоҳот барои рушди боустувор" бо иштироки президенти Қирғизистон Сооронбой Ҷеенбеков ва намояндагони 25 созмони байналмилалӣ баргузор шавад.

Иштирокдорон масъалаҳои рушди минтақаҳо, фазои сармоягузорӣ, рушди сармояи инсонӣ, идораи манбаъҳои обӣ, муҳити зист ва ҳолатҳои изтирориро баррасӣ хоҳанд кард.

Додситони қазоқ хост, "ҷонибдорон"-и Аблязов дусолӣ зиндонӣ шаванд

Додситон Муҳит Рисбеков дар мурофиаи 18 ноябр барои чаҳор сокини маҳаллие, ки ба иштирок дар фаъолияти ҳаракати мамнуи "Интихоби демократии Қазоқистон" (ИДҚ) айбдор мешаванд, дусолӣ ҳукми зиндон талаб кард.

Ба гуфтаи Рисбеков, баёноти шоҳидон ва маводи парванда гуноҳи гумонбаронро пурра исбот кард. Вакили дифоъ Галим Нурпеисов хост, мухолифи қазоқ ва раҳбари ИДҚ Мухтор Аблязов, ки дар хориҷ ба сар мебарад, ба тариқи видеоӣ бозпурсӣ шавад. Додрас Куралай Дарханова дархости вакили дифоъро қабул кард, вале гуфт, Аблязов бояд ба додгоҳ эҳзор шавад.

Гумонбарон айбҳои эъломшударо зидди худ рад карда, аз додрас хостанд, ки ҳукми одилона содир кунад. Қарор аст, 19 ноябр ҳукм эълом шавад. Се гумонбар — Оксана Шевчуки 30-сола, Гулзода Ҷаукероваи 51-сола ва Ануар Аширалиеви 36-сола аз 4 июли соли равон дар боздоштгоҳи шаҳри Алмато нигаҳдорӣ мешаванд. Гумонбари чаҳорумӣ Жазира Демеуоваи 48-сола дар ҳабси хонагӣ аст.

Дар ҳамла ба як маркази низомӣ дар Кобул 5 нафар захмӣ шуд

Намояндагони расмии ҳукумати Афғонистон гуфтанд, ки на кам аз чаҳор сарбози Артиши миллии Афғонистон ва як мулкӣ дар ҳамла ба маркази омӯзишии ҳарбӣ дар Кобул маҷрӯҳ карда шуданд.

Сухангӯи Вазорати дифоъ Фуад Амон ба Радиои Озодӣ гуфт, 18-уми ноябр ҳамлагарони ношинос ба сӯи дарвозаи бинои низомӣ дар канори ғарби Кобул ду норинҷак партофтанд. Сухангӯи Вазорати корҳои дохилӣ гуфт, ин ду таркиш аз тарафи маргталабон анҷом шудаааст.

Касе масъулияти ин ҳамларо ба дӯш нагирифт.

Ин ҳамла пас аз панҷ рӯзи таркиши мошини як маргталаб рӯй дод, ки корвони мошинҳои ширкати хусусии амниятро дар Кобул нишон гирифта буд. Дар он ҳодиса 12 нафар кушта шуд. Ҳам Толибон ва ҳам гурӯҳи "Давлати исломӣ" бисёр вақт нерӯҳои амниятӣ ва мансабдорони ҳукуматии Афғонистонро дар Кобул ва дигар ҷойҳои кишвар нишон мегиранд.

Ҳафтаи гузашта президенти Афғонистон Ашраф Ғанӣ эълон кард, ки се зиндонии баландпояи Толибонро озод карданд, аммо сипас онҳоро ба зиндон баргардонд. Ду устоди Донишгоҳи Амрикоии Афғонистон дар Кобул – Кевин Кинг аз ИМА ва Тимоти Векси аз Австралия – бояд бо онҳо доду гирифт мешуданд. Толибон онҳоро соли 2016 рабудаанд.

Додгоҳи Душанбе як "прапоршик"-ро барои латту кӯби сарбоз ҷазо дод

Додгоҳи ҳарбии гарнизони шаҳри Душанбе як "прапоршик"-и Вазорати дифои Тоҷикистонро бо гуноҳи латту кӯби сарбозе ҷазо додааст. Мақомоти додгоҳ гуфтанд, латту кӯби сарбоз Ҷумъахон Кенҷаев аз сӯи прапоршик Талабшоҳ Қамаров 13-уми августи имсол рух додааст. Қарори додгоҳ 31-уми сентябр содир шуда, хулосаи он 15-уми ноябр дар сомонаи расмии додгоҳи шаҳри Душанбе нашр шуд.

Назари Қамаров ва вакили мудофеи ӯ дар ин бора маълум нест.

Аз Додгоҳи ҳарбии гарнизони Душанбе рӯзи 18-уми ноябр гуфтанд, Талабшоҳ Қамаров, ки чаҳор сол боз дар мақоми сардори хадамоти истифодабарии манзилии қисми ҳарбии 16772-и Вазорати дифоъ кор мекард, ба "ҷинояти мансабӣ" даст задааст.

Манбаъ дар шарҳи ҳодиса гуфт, Талабшоҳ Қамаров рӯзи вуқӯи ҳодиса ба хобгоҳи сарбозони ротаи тирандозии савораи М-3-80-и қисми низомӣ ворид шуда, ба навбатдор Ҷумъахон Кенҷаев "супориши ғайриоинномавӣ" додааст ва сарбоз аз амри ӯ сарпечӣ кардааст.

Дар натиҷа прапоршик бо бастаи калидҳо ба сари ӯ зада, латту кӯб намудааст. Манбаъ мегӯяд, бар асоси натиҷаи ташхиси тиббиву додгоҳӣ, Кенҷаев аз сараш ҷароҳат бардошта, зарари ӯ "сабук" мебошад. Бо қарори додгоҳ, Талабшоҳ Қамаров ба андозаи 100 нишондиҳандаи ҳисобҳо (5500 сомонӣ) ҷарима шудааст. Бо ин вуҷуд, ӯ ҳуқуқи ишғоли мансабҳои муайянро дорад.

Шикоят аз латту кӯби сарбозони тоҷик ҳодисаи нав набуда, борҳо тавассути расонаҳо садо додааст. Коршиносон мегӯянд, бадрафторӣ сабаб шудааст, ки баъзе ҷавонон аз хидмат дар артиш сарпечӣ мекунанд.

Эътилофи зидди шиканҷа дар як гузориши худ дар охири соли 2016 навишта буд, ки дар солҳои 2014-2016 дар қисмҳои ҳарбии Тоҷикистон 59 сарбоз мавриди шиканҷаву бадрафторӣ қарор гирифта, 11 нафар ба ҳалокат расидааст.

Даргузашти модари Ҳоҷӣ Ҳалим дар 78-солагӣ

Абдуҳалим Назарзода

Гулбибӣ Сулаймонова – модари Абдуҳалим Назарзода (Ҳоҷӣ Ҳалим) – муовини пешини вазири дифои Тоҷикистон, ки мақомот ӯро ба ташкил ва роҳбарии ошӯби моҳи сентябри 2015 айбдор карданд, дар 78-солагӣ даргузаштааст. Назарзода ҳамроҳ бо се бародараш дар амалиёти чаҳор сол пеш дар дараи Ромит кушта шуданд.

Фирӯз Назаров, набераи Гулбибӣ Сулаймонова, рӯзи 18-уми ноябр ба Радиои Озодӣ гуфт, модарбузургаш то як сол пеш аз марги Ҳоҷӣ Ҳалим хабар надошт. Ин зан соҳиби ҳафт писар ва се духтар будааст. Ҳоло ду писараш дар зиндон ҳастанд. Писари дигараш дар озодӣ ва дар Русия аст.

Абдуҳалим Назарзода бо истифода аз квотаи 30-дарсадӣ аз тарафи мухолифин ба кор дар Вазорати мудофиа пазируфта шуда буд ва солҳои ахир ба ҳайси муовини вазир кор мекард.

Мақомот дар ташкили ба гуфтаи онҳо ошӯб ё қасди табаддулот раҳбарияти ҳизби дар Тоҷикистон мамнӯи наҳзати исломиро гунаҳкор карданд. Раҳбарияти ҳизб дар хориҷа ҳамвора ин иттиҳомотро рад карда, гуфтаанд, тамоми кӯшиши мақомот барои аз саҳнаи сиёсат дур кардани онҳо буд.

Вазъият пас аз се рӯзи эътирозҳо дар Эрон

Пас аз се рӯзи якбора баланд шудани нархи сӯзишворӣ, ки сабаби эътирозҳои марговар дар даҳҳо шаҳру ноҳияҳои Эрон шуд, вазъ ҳанӯз дар ин кишвар шиддатнок мемонад.

Рӯзи 18-уми ноябр ҳолат дар кӯчаҳо номуайян буд. Баста шудани Интернет аз тарафи мақомоти давлатӣ ҷараёни паҳн кардани видео ва иртибототро дар шабакаҳои иҷтимоӣ нигоҳ дошт.

Мақомоти расмӣ гуфтанд, дар задухӯрдҳо шаш нафар кушта шуданд, аз ҷумла се эътирозгар, ду узви нерӯҳои амниятии Эрон ва як посбони амниятӣ, аммо гузоришҳо аз он гувоҳӣ медиҳанд, ки шумораи кушташудагон метавонад зиёдтар бошад. Бархе аз манобеъ онро зиёда аз 40 нафар меноманд.

"Франс-Пресс" аз қавли сухангӯи ҳукумати Эрон Алӣ Рабеӣ гуфта, ки вазъ "ором" аст, гарчанде ки "баъзе масъалаҳои ночиз ҳастанд". Бархе аз видеоҳое, ки дар шабакаҳои иҷтимоӣ пайдо шудаанд, нишон медиҳанд, қувваҳои ҳукуматӣ ба эътирозгарон тир мепарронанд.

Ба гузориши расонаҳои эронӣ, камаш 5 донишгоҳ дар шаҳрҳои Теҳрон, Исфаҳон, Шероз ва ҷойҳои дигар баста шуданд, дар ҳоле ки дар зиёда аз 17 шаҳри 5 вилоят мактабҳо бастаанд. Мақомот ҳушдор додаанд, ки ба идома намоишҳо вокуниши сахт нишон хоҳанд дод.

Эътирозҳо 15-уми ноябр, пас аз он сар зад, ки ҳукумат эълом дошт таҳримҳои Амрико сабаби бо ҳисса фурӯхтани сӯзишворӣ ва кам кардани ёрдампулиҳо шудааст. Амрико истифодаи нирӯро дар баробари эътирозгарон ва бастани дастрасиро ба шабакаҳои иҷтимоӣ дар Эрон маҳкум кард.

Оятуллоҳ Алии Хоманаӣ, раҳбари олии Эрон рӯзи якшанбе гуфт, "оташ задани биноҳо кори мардум нест, балки кори душманон аст." Хоманаӣ аз тасмими ҳукумат дар заминаи афзоиши қимати бензин дар Эрон пуштибонӣ кард.

Дар Белорус номзадҳои мухолиф аз порлумон берун монданд

Комиссияи марказии интихоботии Белорус натиҷаҳои пешакии интихоботи порлумониро эълом кард.

Аз 110 довталаби нав, ки соҳиби мандати вакилӣ шуданд, ҳеч кадомашон номзади ҳизбҳои мухолиф нестанд. Дар порлумони гузашта ду тан аз вакилони порлумон номзади мухолифон буданд. Ҳамакнун дар порлумони нав Ҳизби коммунистии Белорус 11 вакил, Ҳизби либерал-демократии Белорус 1 вакил, ҳизбҳои ҳукуматгаро 9 вакил хоҳанд дошт.

Дар интихоботи рӯзи 17 ноябр 7 ҳизб ва ҳаракати мухолиф ширкат дошт, аммо ҳеч кадоми онҳо раъйи кофӣ барои ворид шудан ба порлумонро соҳиб нагардиданд. 30 тан аз вакилони порлумони пешин дубора номзад ва пирӯз шуданд.

Нозирони мустақил мегӯянд, шумори интихобкунандагон дар раъйдиҳӣ кофӣ набуд ва интихоботи кунинӣ пеш аз муҳлат баргузор шудааст.

ИМА истифодаи нирӯ ба зидди норозиён дар Эронро маҳкум кард

Иёлоти Муттаҳидаи Амрико истифодаи нирӯ дар баробари эътирозгарон ва маҳдудияти шадиди иртиботи маҷозиро дар Эрон маҳкум кард. Дар изҳороти Кохи Сафед, ки рӯзи 17-уми ноябр нашр шуд, аз “мардуми Эрон ва тазоҳуроти сулҳомезашон” ҳимоят шудааст.

Тазоҳурот дар Эрон пас аз он роҳандозӣ шуд ва ба сад шаҳру минтақаи ин кишвар густариш ёфт, ки ҳукумат фурӯши бензинро маҳдуд кард ва нархи онро боло бурд. Мақомот дар Эрон аз иқдоми шадид дар баробари эътирозҳои густарда ҳушдор доданд.

Ба гузориши расонаҳои давлатии Эрон, дар ҷараёни тазоҳурот чанд бино вайрону оташ зада шудаанд. Оятуллоҳ Алии Хоманаӣ, раҳбари олии Эрон, рӯзи якшанбе гуфт, “оташ задани биноҳо кори мардум нест, балки кори душманон аст.”

Хоманаӣ аз тасмими ҳукумат дар заминаи афзоиши қимати бензин дар Эрон пуштибонӣ кардааст. Хабаргузории “Форс” гузориш дод, ки то ҳоли ҳудуди ҳазор нафар дастгир шудаанд.

Ба гузориши хабаргузории ИСНО, як пулис дар ҷараёни бархӯрд бо эътирозгарон дар шаҳри Кирмоншоҳ кушта шудааст.

Пеш аз ин мақомҳои маҳаллӣ дар шаҳри Сирҷон гуфта буданд, ки як нафар дар тазоҳурот дар ин шаҳр кушта шуда, чандин нафар ҷароҳат бардоштаанд.

Додгоҳ гумонбарони ҳамла ба муҳоҷири узбекро 2 моҳ ҳабс кард

Додгоҳи Петербурги Русия се ҷавони маҳаллиеро, ки дар ҳамла ба муҳоҷири 38-солаи Узбекистонӣ гумонбаранд, то 12 январи соли оянда ба ҳабс гирифт.

Ба иттилои расонаҳои русӣ, пулиси Петербург дар робита ба ҳамлаи мазкур, ки дар истгоҳи роҳи оҳани "Пост Ковалево" рух дод, ҷавонони 15, 16, 17 ва 19-соларо дастгир карда буд. Гумонбари 15-сола ба иллати поин будани синаш ба ҳабс гирифта нашудааст.

Муфаттишон бар инанд, ки ҷавонони мазкур бо ангезаҳои бадбинии миллӣ ба шаҳрванди Узбекистон ҳамла кардаанд.

Ҳамлагарон бо абзори бурандаи номаълум ба муҳоҷири узбек 5 зарба зада, ҳамчунин ӯро зери мушту лагад қарор додаанд. Сипас 7 ҳазору 850 рубли муҳоҷири кориро дуздидаанд.

Ба гуфтаи Кумитаи тафтишотии Петербург, ҳамла ба шаҳрванди Узбекистон хусусияти экстремистӣ дорад.

Ташкили комиссияи давлатӣ барои таҳқиқи марги ангишткани қазоқ

Дар кони "Қазоқистонӣ"-и вилояти Қарағанда, ки бо коркарди он ширкати "АрселорМиттал Темиртау" машғул аст, як ангишткан ба ҳалокат расидааст.

Ба огаҳии хадамоти матбуотии ширкат, ангишткан 15 ноябр ҷон додааст. Сабабҳои марги ӯ гуфта намешавад. Масъулони ширкат мегӯянд, барои таҳқиқи сабабҳои марги кормандашон комиссияи давлатӣ ташкил шудааст.

6 ноябри соли равон дар кони ангишти "Саранскӣ"-и "АрселорМиттал Темиртау" як корманд ҷон бохта буд. Ширкат марги ангиштканро ҳодисаи нохуш номид. Он замон низ дар бораи ташкили комиссияи давлатӣ барои таҳқиқи марги ангишткан хабар дода буданд.

Додситонии Узбекистон таҳқиқи "таҳдидҳои шаҳрдори Тошканд"-ро оғоз кард

Додситонии кулли Узбекистон навори садоии баҳсбарангезеро шарҳ дод, ки дар он гӯиё шаҳрдори Тошканд Ҷаҳонгир Ортиқхоҷаев рӯзноманигоронро таҳқир ва таҳдид ба қатл мекунад.

Зоҳиран навор ҳангоми суҳбат бо рӯзноманигорон сабт шудааст. "Як ҳафта пеш дар бораи корхонаҳои ман навиштанд ва онҳоро инҳисор номиданд. Агар ҳозир барояшон 10 ҳазор доллар бидиҳӣ, ситоишро оғоз хоҳанд кард. Онҳо кӣ ҳастанд? Палидҳои пастанд! Онҳо фарзанди инсон ё саг бошанд? Тавре мекунам, ки шуморо ба маҳаллаатон роҳ намедиҳанд ва волидонатонро масхара хоҳанд кард. Ҳамсояҳоятон шарм медоранд, ки бо шумо салом кунанд. Ман ин корро карда метавонам. Барои ман ҳамҷинсгаро эълом кардани шумо мушкил аст? Осон аст! Дар 6 сония шуморо дар як таксӣ бо ҳамҷинсгаро шинонда, акс мегирам. Тамом! Шумо ҳамҷинсгаро!", - гуфта мешавад дар навор.

Сомонаи Kun.uz 17 ноябр матлаберо зери унвони "Озодии баён бо шеваи Ортиқхоҷаев" нашр кард. Дар матлаб омадааст, ки шаҳрдори Тошканд дар он навор рӯзноманигорони сомонаи Kun.uz Раҳматилло Исроилов, Шерзод Эгамбердиев ва Баҳодур Аҳмадовро пас аз қазияи таъқиби хабарнигорони сомона аз сӯи муовини раиси ноҳияи Олмазор А. Ваҳобов дар утоқи корияш таҳдид кардааст.

"Он рӯз шаҳрдори Тошканд ҳар ду ҷониби баҳсро барои созиш ба утоқи корияш даъват карда буд. Вале норозигии ҷонибҳо барои созиш вохӯриро ба "ҷаласаи тарбиявӣ" барои рӯзноманигорон табдил дод", - навиштааст Kun.uz.

"Додситонии кул омӯзиши навореро оғоз кард, ки 16 ноябр дар Интернет нашр шуда, ба шаҳрдори Тошканд рабт дода мешавад. Ҳамчунин воқеӣ будани навор, кай ва дар кадом шароит сабт шудани он низ санҷида хоҳад шуд. Натиҷаи санҷиш пас аз поёни таҳқиқ эълом мешавад", - омадааст дар изҳороти Додситонии кулли Узбекистон.

Хадамоти матбуотии шаҳрдории Тошканд низ бо нашрия як иттилоия гуфт, омӯзиши навори мазкурро оғоз кардааст. "Барои омӯзиши ҳамаҷонибаи навори мазкур гуруҳи корӣ аз ҳисоби намояндагони мақомоти дахлдор ташкил карда шуд", - афзудааст хадамот.

Оҷонси иттилоот ва робита бо ҷомеаи назди президенти Узбекистон низ гуфт, навори баҳсбарангезро хоҳад омӯхт.

Ҳокими Фарғона ба деҳқони ришдор қарзи боимтиёз надод

Дар вилояти Фарғонаи Узбекистон рӯзи 12 ноябр чорабиние баргузор гардид, ки дар рафти он ҳокими вилоят Шуҳрат Ғаниев тақсими қарзҳои боимтиёзро барои соҳибкорон ва деҳқонон баррасӣ кард.

"Дар ин чорабинӣ соҳибкорон аз ноҳияҳои Қуқанду Марғилон дар доираи барномаи президентӣ қарзи боимтиёз дарёфт карданд. Дар ин чорабинӣ соҳибкорон ва намояндагони бонкҳо низ ширкат доштанд", - гуфт ҳамсуҳбати мо.

Ба гуфтаи ҳамсуҳбати мо, Шуҳрат Ғаниев соҳибкорон ва деҳқонони ришдорро таҳқир кард.

"Ҳоким деҳқони ришдореро аз чорабинӣ пеш кард. "Дархости ту лағв шудааст", гуфт Ғаниев. Вай ҳамчунин ҷавони ришдори дигареро ҳам аз толор пеш кард. Ин дар ҳоле буд, ки як рӯз пеш Ғаниев бо муроҷиат ба соҳибкорону деҳқонон гуфта буд, ҳамаи монеаҳо ва мушкилиҳоро рафъ хоҳад кард. Акнун барои доштани риш ба онҳо қарз намедиҳанд", - гуфт як соҳибкори фарғонагӣ.

Моҳи сентябри соли ҷорӣ Шуҳрат Ғаниев ҳамчунин ба зердастонаш дастур дода буд, ки маъракаи зидди ҳиҷоб ва ришро роҳандозӣ кунанд.

4,5 ҳазор қазоқтабор аз шаҳрвандии Чин даст кашидаанд

Аз моҳи январ то сентябри соли ҷорӣ 4,5 ҳазор қазоқтабори Чин аризаи даст кашидан аз шаҳрвандии ин кишварро навиштаанд. Дар ин бора вазорати корҳои хориҷии Қазоқистон хабар медиҳад.

Ба иттилои ин вазорат, 9 моҳи соли ҷорӣ сафорати Қазоқистон дар Чин ба 35 ҳазор қазоқтабор визаи вуруд ба Қазоқистонро додааст. "Нуҳ ҳазору чаҳорсад қазоқтабор барои мулоқот бо пайвандонашон дар Қазоқистон иҷозат дарёфт кардаанд",-омадааст дар хабари вазорат.

Ба иттилои ин ниҳод, аз моҳи январ то августи соли ҷорӣ 10 ҳазору 790 қазоқтабор аз кишварҳои хориҷ шаҳрвандии Қазоқистонро дарёфт кардаанд. Ин ҳам дар ҳолест, ки дар соли гузашта ба 18 ҳазор қазоқтабор шаҳрвандии Қазоқистон дода шуда буд.

Вазорати меҳнат ва ҳифзи иҷтимоии аҳолии Қазоқистон мегӯяд, нисфе аз қазоқтабор аз Узбекистон ба Қазоқистон кӯчидаанд ва 36 дарсади дигар аз Чин, 6,2 дарсад аз Муғулистон ва 5,4 дарсади дигар аз Туркманистон.

Таҳдиди шаҳрдори Тошканд ба рӯзноманигорон

Дар шабакаҳои иҷтимоӣ 16 ноябр наворе нашр шуд, ки дар он марди садояш монанд ба шаҳрдори Тошканд Ҷаҳонгир Ортиқхоҷаев рӯзноманигоронро ба қатлу зиндон таҳдид карда, мегӯянд, онҳоро дар шаш сония ҳамҷинсгаро хоҳад кард.

Зоҳиран навор ҳангоми суҳбат бо рӯзноманигорон сабт шудааст. "Як ҳафта пеш дар бораи корхонаҳои ман навиштанд ва онҳоро инҳисор номиданд. Агар ҳозир барояшон 10 ҳазор доллар бидиҳӣ, ситоишро оғоз хоҳанд кард. Онҳо кӣ ҳастанд? Палидҳои пастанд! Онҳо фарзанди инсон ё саг бошанд?",-мегӯяд марде, ки дар навор суҳбат дорад.

Ӯ дар идома рӯзноманигоронро ба қатл таҳдид карда, мегӯяд, онҳоро ҳамҷинсгаро хоҳад кард. "Тавре мекунам, ки шуморо ба маҳаллаатон роҳ намедиҳанд ва волидонатонро масхара хоҳанд кард. Ҳамсояҳоятон шарм медоранд, ки бо шумо салом кунанд. Ман ин корро карда метавонам. Барои ман ҳамҷинсгаро эълом кардани шумо мушкил аст? Осон аст! Дар 6 сония шуморо дар як таксӣ бо ҳамҷинсгаро шинонда, акс мегирам. Тамом! Шумо ҳамҷинсгаро!",-гуфта мешавад дар навор.

"Ба раҳбариятамон писанд ҳам набошад, ман хулқу феъли худамро дорам. Ман инро дар шаш сония метавонам. Ташкил карда метавонам. Ё шак дорӣ? Фаҳмонда тавонистам? Бе сабаб аз хона танҳо баромада се рӯз бедарак хоҳед шуд. Инро мехоҳед? Ҳама хомуш хоҳад шуд. Касе ҳам дар бораи шумо намепурсад. Онҷо хоҳанд навишт, инҷо дар як ҳафта ҳама фаромуш мекунанд. Тамом! Мегӯянд, ҳангоми оббозӣ дар куҷое ғарқ шуд! Ҳаёт ҳамин аст! Бинобар ин, бо мо ҳамкорӣ кунед. Агар шумо мушкиле доред, ба мо кумак кунед, то онро ҳал кунем",-афзудааст ӯ.

Навори мазкур дар миёни корбарони узбек, аз ҷумла рӯзноманигорон ва блогерҳо баҳсҳои тундеро ба бор овардааст.

То ҳол на худи Ортиқхоҷаев ва на хадамоти матбуотии шаҳрдории Тошканд наворро шарҳ надодаанд.

Рӯзноманигорони узбекистон мегӯянд, ин бори аввал нест, ки шаҳрдори Тошканд суханҳои қабеҳ ва таҳқиркунанда мегӯяд. Бархе аз корбарони шабакаҳои иҷтимоӣ истеъфои Ортиқхоҷаевро талаб кардаанд.

Қирғизистон барои рафъи хатари партовгоҳҳои уран 5,7 млн евро дарёфт мекунад

Ин тасмим дар IV ҷаласаи Ассамблеяи сармоягузорони барқарорсозии муҳити зист барои кишварҳои Осиёи Марказӣ дар шаҳри Лондон гирифта шуд, ки дар он муовини аввали сарвазири Қирғизистон Қубодбек Боронов иштирок дошт.

"Масъалаи безараргардонии партовгоҳҳои уран дар Осиёи Марказӣ яке аз самтҳои муҳими кори ҳукумат аст. Мехоҳам, ба Бонки аврупоии рушд ва бозсозӣ барои ҷудо кардани грант ба ду тарҳи безараргардонии партовҳои уран дар деҳаи Минқуш ва шаҳри Майлуу-Сууи Қирғизистон ба маблағи 5,7 млн евро миннатдорӣ баён кунам. Корҳо дар ин самт дар семоҳаи аввали соли 2020 оғоз хоҳанд шуд", - афзуд Боронов.

Бино бар омори мақомоти ҳолатҳои изтирории Қирғизистон, дар ин кишвар 92 партовгоҳи маводи радиоактивӣ мавҷуд аст, ки 36-тои онҳо дар Майлуу-Суу ҷойгиранд. Ҳаҷми умумии маводи заҳрогину хатарнок дар ин кишвар 2,9 миллион метри мукаабро ташкил медиҳад.

Ёфтҳои бештар

Гузоришҳои видеоӣ

Қоидаҳои имлои забони тоҷикиро тағйир медиҳанд
лутфан мунтазир бошед

Феълан кор намекунад

0:00 0:02:46 0:00
XS
SM
MD
LG