Пайвандҳои дастрасӣ

Хабари нав

Хабарҳо

Ричард Баучер ба Тоҷикистон меояд

Ба иттилоъи сафорати Иёлоти муттаҳида дар Тоҷикистон, Ричард Баучер, ёвари Котиби Давлатии ИМА дар умури Осиёи Ҷанубӣ ва Марказӣ рӯзи ҷумъа вориди Душанбе хоҳад шуд. Гуфта мешавад, ки худи ҳамон рӯз дипломати воломақоми амрикоӣ бо раиси ҷумҳури Тоҷикистон Эмомалӣ Раҳмонов ва вазири умури хориҷа Талбак Назаров дидору гуфтугӯ хоҳад дошт. Интизор меравад, ки дар ин мулоқотҳо дурнамои ҳамкориҳои иқтисодӣ миёни Иёлоти Муттаҳида ва Тоҷикистон, ҳифзи марзи Тоҷикистону Афғонистон ва таъмини оромиву субот дар Осиёи Марказӣ баррасӣ шавад.
Ин дуввумин сафари ёвари Котиби Давлатии ИМА ба Тоҷикистон дар соли равон аст. Дар сафари пешинаш ҷаноби Баучер масоили марбут ба тавсеаи ҳамкориҳои ду кишвар дар бахши энерҷӣ ва аз ҷумла, имкони бунёди неругоҳи Даштиҷум дар рудхонаи Панҷро ба миён гузошта буд.

Ҳамаи хабарҳои имрӯзро дар инҷо бихонед

Расонаҳо: Муҳоҷирони бандмондаи Узбекистон дар Абхазистон дар кӯча мехобанд 

Муҳоҷирони узбекистонӣ дар Русия. Акс аз бойгонӣ.

Садҳо муҳоҷири узбекистонӣ, ки дар марзи Абхозистон бо Русия дар мондаанд, имкони ба Узбекистон баргаштанро надоранд ва дар кӯча мехобанд.

Вазорати корҳои хориҷии Узбекистон ва сафорати ин кишвар дар Русия муроҷиати шаҳрвандони дармондаро нодида мегиранд. Дар ин бора расонаҳои маҳаллии Узбекистон бо такя ба муҳоҷирони дармонда хабар доданд.

Ба гуфтаи Ренат Юсупов, сокини Сурхандарёи Узбекистон, айни ҳол дар Абхозистон наздики 2 ҳазор муҳоҷири узбек дармондааст. Онҳо ба Абхозистон барои кор омада буданд, аммо ба далели баста шудани марзҳо натавонистанд, ки дубора ба Узбекистон баргарданд.

Дар ибтидои моҳи ҷорӣ мақомоти Узбекистон ваъда карда буданд, ки наздики 400 тан аз муҳоҷиронро ба кишвар бармегардонанд. Аммо ҳанӯз ин ваъда иҷро нашудааст.

Муҳоҷирон гуфтанд, барои билети ҳавопаймо маблағ доранд. Дархости онҳо танҳо фиристодани ҳавопаймои чартерӣ аст, аммо ҳамоно ин дархост ба эътибор гирифта нашудааст.

Дар Туркманистон онҳоеро, ки ниқоб намепӯшанд, ҷарима мекунанд

Туркманистон дар даврони коронавирус.

Кормандони пулис дар Туркманистон вазифадор шудаанд, ки рӯзона ҳадди ақал як нафарро барои напӯшидани ниқоби тиббӣ ҷарима кунанд.

Ба иттилои бахши туркмании Радиои Озодӣ, дар ин бора дар як ҷаласаи Вазорати умури дохилии Туркманистон дастур дода шудааст.

"Ба ҳамаи ҳайати шахсии пулис дастур шудааст, ки рӯзона дасти кам як нафарро барои надоштани ниқоб ҷарима банданд. Муовини вазири умури дохилии Туркманистон гуфт, дар ин замина ба ҳеч кас, ҳатто занону пиронсолон низ "раҳм" карда нашавад. Ҳатто агар онҳо гӯянд, ки барои нон ҳам пул надорем, бояд маҷбур карда шаванд, то бо ҳар роҳе набошад ҷаримаро супоранд", - гуфт як мақоми баландпояи Вазорати умури дохилии Туркманистон.

Ба гуфтаи ҳамсуҳбати мо, кормандоне, ки дастурро иҷро намекунанд, маҷбур ҳастанд рӯзона ба номи шинос ё хешашон санад тартиб дода, пули як ҷаримаро аз ҳисоби худ пардозанд.

Чанд манбаъ дар шаҳру вилоятҳои Туркманистон гуфтанд, кормандони пулис баъди ҷаласаи мазкур тадбирҳо барои боздошт ва муҷозоти онҳоеро сахттар кардаанд, ки ниқоби тиббӣ надоранд.

Ин дар ҳолест, ки мақомоти Туркманистон иддао доранд, дар ин кишвар то ҳол ягон нафар ба коронавирус мубтало нашудааст.

Дар Қазоқистон модарони серфарзанд аз ҳукумат кумак мехоҳанд

Гурӯҳе аз модарон хостори кӯмаки давлат ҳастанд. Шаҳри Нурсултон, 20 октябр, 2020.

Чандин модари серфарзанд 20 октябр дар шаҳри Нурсултон, пойтахти Қазоқистон гирди ҳам омада, аз давлат кумак хостанд.

Ба гуфтаи занҳо, маҳдудиятҳое, ки дар робита ба пешгирӣ аз коронавирус ҷорӣ шудаанд, вазъи хонаводаҳои онҳоро боз ҳам мушкилтар сохтааст.

Занон талош карданд, ба бинои маъмурияти президенти Қазоқистон ворид шаванд, вале кормандони пулис пеши роҳи онҳоро гирифтанд.

Модари чаҳор фарзанд Акбаян Жалмирзоева мегӯяд, дар шаҳри Нурсултон дар хонаи якҳуҷрагие иҷоранишин асту моҳона 85 ҳазор танга (ҳудуди 200 доллар) медиҳад. Ба гуфтаи Жалмирзоева, дар давраи карантин хонаводаи ӯ бе даромад монда, натавонистанд пули иҷораро бидиҳанд.

"Шавҳарам моҳона 50-60 ҳазор кор мекард. Дар давраи карантин бекор аст. Худи ман шабҳо ба тарабхонаҳо рафта, гул мефурӯхтам. Вале ба далели маҳдудиятҳои марбут ба коронавирус аз ин даромад ҳам маҳрум шудем. Ҳоло аз пули иҷораи манзил 285 ҳазор танга қарздор ҳастем. Ба соҳиби хона ҳамчун замонат ҳамаи ҳуҷҷатҳои худ, аз ҷумла шаҳодатномаҳои таваллуди фарзандонамро додаам", - афзуд ӯ.

Сокини дигари пойтахти Қазоқистон Жанар Бидайбекова гуфт, соли 2014 дар натиҷаи оташсӯзие се кӯдаки ноболиғаш ҷон бохтанд. Дертар шавҳараш низ бар асари сактаи қалбӣ даргузашт ва ҳоло бо ду кӯдаки дигараш дар манзиле иҷоранишин аст.

Занон дертар ба назди Вазорати меҳнат ва ҳифзи иҷтимоии аҳолии Қазоқистон рафтанд. Намояндагони вазорат гуфтанд, ному насаби занҳоро ба қайд гирифтаанд. Вале занон мегӯянд, то ба додашон расидагӣ нашавад, даст аз таҷаммуъ барнамедоранд.

Тоҷикистон барои ёфтани ҷасади ду сарбоз аз Афғонистон ёрӣ хост

Мақомот мегӯянд, Сироҷиддин Ятимов ва ҳамроҳаш Қандилҷон Воҳидов дар дарё ғарқ шудаанд

Мақомот барои ёфтани ҷасади ду сарбози нирӯҳои марзбонии Тоҷикистон аз маъмурони наҷоти Афғонистон ёрӣ хостаанд.

Ба иттилои расмӣ, марзбонон Сироҷиддин Ятимов ва Қандилҷон Воҳидов рӯзи 30-юми сентябри имсол бо мақсади наҷоти як наврас дар ноҳияи Рӯшони вилояти Мухтори Кӯҳистони Бадахшон худро ба дарё партофта, ғарқ шудаанд.

Умеда Юсуфова, сухангӯйи Кумитаи ҳолатҳои фавқулодаи Тоҷикистон, рӯзи 20-уми октябр ба Радиои Озодӣ гуфт, азбаски дар он сӯйи дарё Бадахшони Афғонистон қарор дорад, аз маъмурони наҷоти онҷо кумак хостаанд. Вай афзуд, ҳарчанд аз ирсоли нома беш аз як ҳафта мегузарад, ҳанӯз мунтазири посухи бахши умури изтирории вилояти Бадахшони ҳамсоя ҳастанд. "То замоне ки ҷасади сарбозон ёфт нашавад, амалиёти ҷустуҷӯ поён нахоҳад ёфт", -- гуфт Юсуфова.

Баръакси ин, Саидаҳмад Ятимов, падари Сироҷиддин Ятимов, яке аз сарбозон, рӯзи 20-уми октябр гуфт, дар масъалаи ҷустуҷӯи ҷасади писараш бо идораҳои дахлдор дар тамос мешавад, "вале ҳеч ҳаракате ба назар намерасад". "Чунин бепарвоӣ ва хомӯшӣ шубҳаи моро нисбат ба чӣ гуна ғарқ ва ё гум шудани фарзандон бештар мекунад. Аслан маълум нест, бо онҳо чӣ воқеа рух додааст", -- афзуд ӯ.

Қаблан низ пайвандони Сироҷиддин Ятимов айни нигарониҳоро баён карда буданд. Дертар дар саҳифаҳои шахсони наздик ба ҳукумат дар шабакаҳои иҷтимоӣ аз номи мақомоти ноҳияи Рӯшон ва пайвандони сарбози дигар, Қандилҷон Воҳидов, наворҳо паҳн шуданд. Онҳо ба ҷиддӣ будани амалиёти ҷустуҷӯ таъкид доштанд.

Сироҷиддин Ятимови 22-сола, ба гуфтаи наздикон, ду сол пеш ба хизмати ҳарбӣ рафта, баъди шаш моҳи хизмат ба вилояти Мухтори Кӯҳистони Бадахшон фиристода шудааст. Қарор буд, рӯзҳои наздик баъд аз адои хидмат ба хона баргардад.

Ба иттилои Кумитаи ҳолатҳои фавқулода, Сироҷиддин Ятимов ва ҳамроҳаш Қандилҷон Воҳидов дар дидбонгоҳи сарҳадии рақами 5-и ноҳияи Рӯшон мехостанд, хонандаи синфи 10-и мактаби Вомарро наҷот диҳанд, аммо худ ғарқ шуданд.

Ин наврас бо қасди худкушӣ худро ба об андохтааст. Ҷасади ӯро рӯзи 30-юми сентябр ёфтаанд.

Волидони сарбози дигар Қандилҷон Воҳидов мегӯянд, ки мунтазир ҳастанд, кай ҷасади фарзандашонро пайдо мекунанд.

Тоҷикистон барои ёфтани ҷасади ду сарбоз аз Афғонистон ёрӣ хост

Мақомот мегӯянд, Сироҷиддин Ятимов ва ҳамроҳаш Қандилҷон Воҳидов дар дарё ғарқ шудаанд

Мақомот барои ёфтани ҷасади ду сарбози нирӯҳои марзбонии Тоҷикистон аз маъмурони наҷоти Афғонистон ёрӣ хостаанд.

Ба иттилои расмӣ, Сироҷиддин Ятимов ва Қандилҷон Воҳидов рӯзи 30-юми сентябри имсол бо мақсади наҷоти як наврас дар ноҳияи Рӯшони вилояти Мухтори Кӯҳистони Бадахшон худро ба дарё партофта, ғарқ шудаанд.

Умеда Юсуфова, сухангӯйи Кумитаи ҳолатҳои фавқулодаи Тоҷикистон, рӯзи 20-уми октябр ба Радиои Озодӣ гуфт, азбаски дар он сӯйи дарё Бадахшони Афғонистон қарор дорад, аз маъмурони наҷоти онҷо кумак хостаанд.

Ӯ гуфт, ҳарчанд аз ирсоли нома беш аз як ҳафта мегузарад, ҳанӯз мунтазири посухи бахши умури изтирории вилояти Бадахшони ҳамсоя ҳастанд. "То замоне ки ҷасади сарбозон ёфт нашавад, амалиёти ҷустуҷӯ поён нахоҳад ёфт", -- афзуд Юсуфова.

Баръакси ин, Саидаҳмад Ятимов, падари Сироҷиддин Ятимов, яке аз сарбозон, рӯзи 20-уми октябр гуфт, дар масъалаи ҷустуҷӯи ҷасади писараш бо идораҳои дахлдор дар тамос мешавад, "вале ҳеч ҳаракате ба назар намерасад".

"Чунин бепарвоӣ ва хомӯшӣ шубҳаи моро нисбат ба чӣ гуна ғарқ ва ё гум шудани фарзандон бештар мекунад. Аслан маълум нест, бо онҳо чӣ воқеа рух додааст", -- афзуд ӯ.

Қаблан низ пайвандони Сироҷиддин Ятимов айни нигарониҳоро баён карда буданд. Дертар дар саҳифаҳои шахсони наздик ба ҳукумат дар шабакаҳои иҷтимоӣ аз номи мақомоти ноҳияи Рӯшон ва пайвандони сарбози дигар, Қандилҷон Воҳидов, наворҳо паҳн шуданд. Онҳо ба ҷиддӣ будани амалиёти ҷустуҷӯ таъкид доштанд.

Сироҷиддин Ятимови 22-сола, ба гуфтаи наздикон, ду сол пеш ба хизмати ҳарбӣ рафта, баъди шаш моҳи хизмат ба вилояти Мухтори Кӯҳистони Бадахшон фиристода шудааст. Қарор буд, рӯзҳои наздик баъд аз адои хидмат ба хона баргардад.

Ба иттилои Кумитаи ҳолатҳои фавқулода, Сироҷиддин Ятимов ва ҳамроҳаш Қандилҷон Воҳидов дар дидбонгоҳи сарҳадии рақами 5-и ноҳияи Рӯшон мехостанд, хонандаи синфи 10-и мактаби Вамарро наҷот диҳанд, аммо худ ғарқ шуданд.

Ин наврас бо қасди худкушӣ худро ба об андохтааст. Ҷасади ӯро рӯзи 30-юми сентябр ёфтаанд.

Волидони сарбози дигар Қандилҷон Воҳидов мегӯянд, ки мунтазир ҳастанд, кай ҷасади фарзандашонро пайдо мекунанд.

COVID-19 маҳдудиятҳоро бештар ва кӯчаҳои Аврупоро сокит кард

СОVID-19 аҳволи ширкатҳои саёҳӣ ва меҳмонхонаҳои Тоҷикистонро бад кард
лутфан мунтазир бошед

Феълан кор намекунад

0:00 0:02:37 0:00

Бо зиёдтар шудани теъдоди мубталоёни COVID-19 дар Аврупо кишварҳои минтақа маҳдудиятҳои гаштугузор ва фаъолиятҳои иқтисодиро зиёдтар мекунанд. Аз ҷумла, дар Париж ва ҳашт шаҳри дигари Фаронса қуюди шабгардӣ эълон шуд. Тарабхонаву мағозаҳо бояд аз соати 9-и шаб то 6-и бомдод баста бошанд.

Раиси ҷумҳур Эммануэл Макрон бо эълони маҳдудиятҳои нав гуфт, рӯзҳои сахте дар пешанд. “Тамоми донишмандон возеҳ гуфтаанд, мо то тобистони соли 2021 бо ин вирус дастбагиребон хоҳем буд”, -- афзуд ӯ.

Дар Испония, дар Мадриду 8 шаҳри дигар, вазъи фавқулода эълон шудааст ва баромадан аз ин шаҳрҳо мумкин нест. Ресторану барҳоро барои 15 рӯз бастанд.

Испония кумаки молӣ ба соҳибкоронро идома медиҳад ва дар саросари Аврупо хисороти иқтисодӣ аз маҳдудиятҳо зиёдтар мешавад. Ҳукумати Ҳолланд ҳам ба бару ресторанҳо амр дод, то ду ҳафта дарҳояшонро банданд.

Баъзе аз донишмандон мегӯянд, ки бозгашти донишҷӯён ба дарс дар моҳи сентябр сабаби афзоиши беморӣ аст.

Бритониё ҳам дар баъзе аз шаҳрҳо маҳдудиятҳоро сахттар кард ва Ливерпул дар қатори онҳост. Табибон мегӯянд, 95 дар сади катҳои беморон дар шӯъбаҳои эҳёгарии шаҳр пур шудааст.

Ҳукумати Бритониё мегӯяд, намехоҳад, дигарбора карантини саросарӣ эълон кунад, зеро оқибаташ барои иқтисоду ҷомеа бисёр бад мешавад. Аммо бо пур шудани шифохонаҳову афзоиши маргу мир, дар саросари Аврупо фишор барои андешидани чораҳои сахттар зиёд мешавад.

Зеленский гуфт, онҳое, ки "Қримро беҷанг доданд", ҷавоб хоҳанд дод

Президенти Украина Владимир Зеленский

Президенти Украина Владимир Зеленский гуфт, онҳое, ки иҷоза доданд Русия Қримро дар соли 2014 ғайриқонунӣ ғасб бикунад, бояд барои ин ҷавоб диҳанд. Дар паёми солонааш ба парлумон рӯзи 20-уми октябр Зеленский аз касе мушаххасан ном набурд, вале зоҳиран ба он мақомдороне муроҷиат мекард, ки баъди эътирозҳои зиддиҳукуматии соли 2014, ки бо сарнагунии ҳукумати президент Виктор Янукович анҷомид, сари кор омаданд. Ӯ гуфт, “онҳое, ки Қримро бе як набард аз даст доданд, бояд масъул бошанд” ва афзуд, ки ҳукумати ӯ тамоми талошашро ба харҷ додааст, то Қрим таҳти назари Украина баргардад. Ӯ гуфт, “мо як артиши украиниро бунёд медиҳем, ки тавони ҳимояти Украина аз замин, аз баҳр, аз осмон, аз кайҳон ва аз ҳамлаҳои интернетӣ дошта бошад, то ки касе фикр накунад, ки метавонад ба истиқлолият ва тамомияти арзии мо даст дароз кунад ва қисми Украинаро бе як тири силоҳ кашида гирад”. Маскав Қримро соли 2014 ғасб кард ва аз ҷудоиталабон дар шарқи Украина дар минтақаи Донбас пуштибонӣ намуд. Дар ҷангҳое, ки шаш сол идома доранд, 13,200 нафар ҷон додаанд.

Русия гуфт, омода аст созиши силоҳҳо бо ИМА-ро як соли дигар тамдид кунад

Пойгоҳи ҳавоии Байконур. Мушаки навъи SS-18 баъди анҷоми озмоишҳо.

Русия гуфт, ки агар Вашингтон ҳам омода бошад, ин кишвар розӣ аст, ки созиши боздорандаи кулоҳакҳои ҳастаии мавсум ба New START-ро то як соли дигар тамдид кунад. Мӯҳлати ин созиш қарор буд моҳи феврали соли оянда ба анҷом бирасад. Ҳамакнун ҷонибҳо як соли дигар фурсат хоҳанд дошт, ки шарту шурути созиши навро баррасӣ кунанд. Тасмими рӯзи 20-уми октябри Маскав метавонад ихтилофҳои Кремлу Кохи Сафедро бар сари сарнавишти созиши муҳими силоҳҳо кам кунад. Вазорати хориҷаи Русия дар изҳороте гуфт, ки “Русия пешниҳод мекунад, ки New START то як соли дигар тамдид шавад ва омода аст, ки ҳамроҳ бо ИМА дар заминаи “масдуд кардани” шумори кулоҳакҳои ҳастаӣ ӯҳдадориҳои сиёсӣ қабул кунад”. Дар изҳорот омадааст, ки ин созиш ба шарте иҷро мешавад, ки ИМА ҳеҷ шарту шутуре пеш нагузорад. Созиши амалкунанда соли 2010 имзо шуд ва аз ҳарду кишвар тақозо мекунад, ки силоҳҳои стратегии ҳастаии худро дар шумори маҳдуд нигаҳ дорад. Созише, ки моҳи феврал ба итмом мерасад, метавонад ба мӯҳлати панҷ соли дигар тамдид шавад.

Тихановская аз кормандони ҳифзи қонун хост, ба тарафи мардум гузаранд

Брюссел, 21 сентябр. Светлана Тихановская зимни суханронӣ дар Парлумони Аврупо акси эътирозгари шиканҷашударо намоиш медиҳад

Собиқ номзади интихоботи президентии Беларус Светлана Тихановская аз кормандони ҳифзи қонун даъват кард, ки то 25-уми октябр ба ҷониби мардум гузаранд. Ин мӯҳлати ултиматум ё зарбулаҷалест, ки мардум дар пеши Александр Лукашенко гузоштааст.

Ӯ гуфт, «агар шумо амрҳои ҷинояткоронаро иҷро кардан нахоҳед, накунед. Режим медонад, ки дар ҳоли мурдан аст ва талош мекунад сарнавишти худро бо шумо тақсим кунад. Дар Беларуси нав кори шумо лозим мешавад, як системаи сохторҳои қудратӣ лозим мешавад». Тихановская аз кормандони ҳифзи қонун хост, ки ошкоро мавқеи худро иброз доранду ба созмонҳои ҷамъиятӣ дар тамос шаванд. Ӯ инчунин ваъда дод, ки масъулият бо онҳое аст, ки «шахсан даст ба ҷиноят задаанд» ва кормандони ҳифзи қонун мавриди санҷиши люстратсия ваё шаффофияти корашон қарор намегиранд.

Қаблан Тихановская аз Лукашенко тақозо кард, ки ба истеъфо равад, даст аз хушунати эътирозгарон бардорад ва ҳама зиндониҳои сиёсиро озод бикунад. Ӯ гуфт, агар ин талабот иҷро нашавад, шурӯъ аз 26-уми октябр «дар корхонаҳо корпартоии миллӣ ва роҳҳо масдуд мешаванд".

Дар Беларус 9-уми август интихоботи президентӣ баргузор ва Александр Лукашенко барандаи он эълон шуд. Мухолифон гуфтанд, ки натиҷаҳо тақаллуб шудааст ва аз он замон то кунун дар Беларус пайваста намоишҳои эътирозӣ бо ширкати даҳҳо ҳазор нафар баргузор мешавад. Мақомот даст ба саркӯби эътирозгарон зада, ҳама раҳбарони мухолифонро боздошт ваё маҷбур ба тарки кишвар карданд.

Додгоҳи Қирғизистон Содир Ҷабборовро дар доираи парвандаи талоши ғасби ҳукумат "сафед" кард

Дар акс: Қамчибек Тошиев, Содир Ҷабборов ва Талант Мамитов. Додгоҳи шаҳри Бишкек, соли 2012

Додгоҳи олии Қирғизистон Содир Ҷабборов, сарвазир ва иҷрокунандаи вазифаҳои президенти он кишвар, Қамбичек Тошиев, раиси кумитаи давлатии амнияти миллӣ ва Талант Мамитов, вакили порлумони Қирғизистонро дар доираи парвандаи ғасби худсаронаи ҳукумат сафед кард.

"Додгоҳи олӣ бо назардошти ҳолатҳои ахиран ошкоршуда оид ба ғасби худсаронаи ҳукумат дар соли 2012 парвандаро дубора баррасӣ кард", - хабар дод маркази матбуотии додгоҳи олии Қирғизистон.

Додгоҳ ин парвандаро рӯзи 16 октябр баррасӣ ва ҳукми додгоҳи шаҳри Бишкекро аз 17 июни соли 2013 бе тағйир боқӣ гузоштааст. Ба ин тартиб, ҳукми додгоҳи олӣ дар робита ба ин парванда аз 6 августи соли 2013 бекор шудааст.

"Содир Ҷабборов ба далели мавҷуд набудани таркиби ҷиноят сафед карда шуд. Ҳамроҳ бо вай вакили порлумон Талант Мамитов ва раиси КДАМ Қамчибек Тошиев ҳам сафед шуданд", - омадааст дар хабари додгоҳи олӣ.

Ҷабборов, Мамитов ва Тошиев рӯзи 3 октябри соли 2012 бо талаби миллӣ гардонидани кони тилои "Кумтор" гирдиҳамоӣ ташкил карданд. Гуруҳи гирдиҳамомадагон аз болои симхорҳо дохили Кохи сафед шуданд, аммо ҳангоми талоши ворид шудан ба бино аз сӯи пулис пароканда карда шуданд. Се сиёсатмадор бозошт ва дар ғасби худсаронаи ҳукумат айбдор шуданд. Додгоҳ онҳоро аз ним то як сол зиндонӣ кард.

Моҳи октябри соли 2013 дар Қаракули он кишвар бетартибии оммавӣ рух дод. Ширкатдорони бетартибиҳо раиси вилояти Иссиқкӯл Эмилбек Каптагаевро ба асорат гирифтанд. Содир Ҷабборов, он замон вакили порлумон дар ташкили бетартибиҳо айбдор шуд. Вай аз кишвар фирор кард. Дар соли 2017 ӯ ба Қирғизистон баргашт ва боздошт шуд. Додгоҳ ӯро дар ғасби раиси вилояти Иссиқкӯл айбдор ва 11,5 сол зиндонӣ кард.

Дар натиҷаи эътирозҳои шаби 6 октябр Содир Ҷабборов аз зиндон озод шуд. Порлумон ӯро дар мақоми сарвазирӣ таъйин кард. Ҳамзамон салоҳиятҳои президент ба вай дода шуд.

Омӯзгори кушташудаи фаронсавӣ баъди маргаш бо ҷоизаи мӯътабари давлатӣ қадрдонӣ мешавад

Зане бо акси Самюэл Пати истодааст

Бо қарори ҳукумати Фаронса омӯзгори таърих Самюэл Пати, ки ҳафтаи гузашта дар канораҳои Париж сар бурида шуд, баъди маргаш бо мукофоти олии кишвар – ордени Легиони фахрӣ - ҷоизаи мӯътабартарини давлатӣ, қадрдонӣ мешавад. Дар ин бора дар телевизиони BFM TV вазири маориф Жан-Мишел Бланке хабар дод. Ин як ҳодисаи нодир аст, ки як шахсро дар Фаронса баъди маргаш бо чунин як ҷоизаи фахрӣ қадрдонӣ бикунанд. Вазир гуфт, “азиятҳои ӯ сазовори чунин ҷоиза мебошад”. Қарор аст маросими тақдими ҷоиза 20-уми октябр дар маркази шаҳри Париж – Сорбонн баргузор шавад.

Патии 47-сола рӯзи ҷумъаи 16-уми октябр кушта шуд. Чанде пеш аз қатлаш ӯ ба шогирдон дар мактаб карикатураҳои маҷаллаи ҳаҷвии Charlie Hebdo дар бораи пайғамбар Муҳаммадро нишон дода, дар бораи баҳси озодии баён сӯҳбат кардааст. Баъди ин омӯзгор чандин бор таҳдид шунид.

Гумонбари содир кардани ин куштор – як ҷавони 18-солаи зодаи Маскав Абдулло Анзоров буд, ки соли 2008 оилааш аз мақомоти Фаронса дархости паноҳандагӣ кардааст. Дар амалиёти боздошти Анзоров ӯ кушта шуд. Ин қазия, ки боиси эътирозу раҳпаймоиҳои серҷамъият дар Фаронса шуд, ҳамчун амали террористӣ мавриди таҳқиқ қарор дода шудааст.

Амрико 45 дастгоҳи нафасдиҳии сунъии истеҳсоли Русияро нобуд кардааст

Акс аз бойгонӣ

ИМА 45 дастгоҳи нафасдиҳии сунъии "Авента-М", истеҳсоли Русияро маҳв кардааст. Ин дастгоҳҳоро Русия ибтидои моҳи апрел ба ИМА фиристода буд.

Дар ин бора расонаҳои амрикоӣ бо такя ба Оҷонси федеролии ИМА дар умури танзими ҳолатҳои фавқулода хабар додаанд.

Дақиқан ин дастгоҳҳо кай нобуд карда шудаанд, хабар дода намешавад. Моҳи майи имсол оҷонси танзими ҳолатҳои фавқулодаи ИМА гуфт, ки дастгоҳҳои русиро умуман истифода накардаанд. Айни ҳамин дастгоҳҳо дар шаҳри Москва Петербурги Русия боиси сухтор ва фавти шаш одам шуданд.

Дастгоҳҳои нафасдиҳии сунъии русӣ ҳамроҳ бо дигар дастгоҳҳои тиббӣ ба ИМА ирсол шуданд. Дар Кремл хабар доданд, ки дастгоҳҳо кӯмаки башардӯстона ҳастанд. Аммо баъдтар хабар расид, ки ИМА аксари дастгоҳҳоро харидааст.

Аз сӯи дигар ирсоли дастгоҳҳо ба ИМА баҳсҳои зиёдеро ба бор оварда буд. Зеро ширкати истеҳсолгари дастгоҳҳо дар рӯйхати таҳримҳои ИМА шомил аст.

Кормандони "Аэрофлот" дар қочоқи маҳсулоти Apple аз ИМА ба Русия гунаҳгор мешаванд

Ҳавопаймои ширкати "Аэрофлот" - Airbus A350-900

Додситонии ҳавзаи шарқии Ню-Йорк ба 10 нафар, эҳтимолан шаҳрвандони Русия аз рӯи иттиҳоми қочоқи маҳсулоти электронӣ айб эълон кард. Тафтишот мегӯяд, ки онҳо бо истифода аз кормандони ширкати ҳавоии “Аэрофлот” дастгоҳҳои дуздии Apple-ро интиқол медоданд. Департаменти давлатии ИМА виза ё раводиди сафари 113 корманди “Аэрофлот”-ро бозхондааст. Аз миёни даҳ нафари гумонбар ҳашт нафар боздошт шуда ду нафари дигарашон дар ҷустуҷӯи байналмилалӣ ҳастанд. Тафтишот гуфтааст, ки ин нафарон нақшаи аз хоки ИМА ба Русия интиқол додани маҳсулоти электронӣ дар ҳаҷми 50 миллион долларро амалӣ кардаанд. Дар миёни маҳсулоти қочоқшуда асосан компютерҳои планшет, телефон ва соатҳои сохтаи ширкати Apple мебошад. Ин ҳама маҳсулотро дар бағоҷи кормандони собиқ ва амалкунандаи ширкати ҳавоии русӣ интиқол медоданд.

Ин қазияро дар ширкати "Аэрофлот" шарҳ надоданд. Консулгарии генералии Русия дар Ню-Йорк иттилоъ дар бораи парвандаи ҷиноиро мавриди санҷиш қарор додааст. Як дипломати рус гуфтааст, ки парвози ҳавопаймои ширкати «Аэрофлот» аз Ню-Йорк ба Маскав, ки дирӯз бояд анҷом мешуд, бо сабаби тафтиши Бюрои федеролии тафтишот як соат таъхир кард.

Домоди Навоз Шариф боздошт шуд

Марям Шариф бо ҳамсараш Муҳаммад Сафдар

Дар Покистон рӯзи 19-уми октябр баъди он ки домоди нахуствазири табъйидӣ Навоз Шариф дар сари қабри муассиси кишвар алайҳи низомиҳо шиор партофт, боздошт шуд. Муҳаммад Сафдар дар ҳоле боздошт шуд, ки дар Покистон эътирозҳои сартосарӣ алайҳи ҳукумати нахуствазир Имрон Хон идома дорад ва ҳизби “Лигаи мусалмонон”-и Шариф як ширкатдори он мебошад. Эътирозгарон гуфтанд, ки давоми ду соли раҳбарии Имрон Хон дар кишвар озодиҳои сиёсӣ маҳдуд шуда, сензура ва саркӯби дигарандешон авҷ гирифтааст. Боздошти Сафдар маҳкумияти мухолифонро ба бор овард. Онҳо мегӯянд, ки мақомот оилаи Навоз Шарифро ҳадаф қарор додаанд. Сафдар дар як меҳмонхонаи Карочӣ боздошт шуд. Аз он ҷо истода ӯ ҳамроҳ бо ҳамсараш Марям Навоз рӯзи 18-уми октябр ба эътирозгарон муроҷиат кард. Ҳамон рӯз ӯ аз мақбараи Муҳаммад Алӣ Ҷиннаро, ки раҳбари ҳаракати истиқлолхоҳии соли 1947 ба шумор мерафт, зиёрат кард. Дар ҷараёни маросими зиёрат Сафдар нидо мекард, ки “ба интихобот эҳтиром гузоред!” Дар Покистон ин шиор ҳамчун интиқод аз низомиёни кишвар қабул мешавад, ки аз замони таъсиси Покистон раҳбарии воқеии ин кишвари иборат аз 220 миллион ҷамъиятро ба ӯҳда доштаанд.

Имрон Хон дар гузашта ин иттиҳомро рад кардааст, ки барои дастёбӣ ба пирӯзӣ дар қудрат барояш низомиҳо ёрӣ кардаанд. Марям Навоз гуфт, ки то замони аз қудрат барканор шудани Имрон Хон эътирозҳои онҳо идома меёбад.

Чанд ҳазор эътирозгари беларусӣ истеъфои Лукашенкоро талаб карданд

Раҳпаймоии эътирозии мухолифон ва сокинони Беларус. 19-уми октябр

Чандсад сокини Беларус аз кӯчаҳои Минск гузашта аз раҳбари худкома Александр Лукашенко талаб карданд, ки ба истеъфо равад. Ширкатдорони ба истилоҳ “Раҳмпайомии хирад” рӯзи 19-уми октябр нидоҳои “Лукашенко, бирав!”-ро ба забон меоварданд. Ин намоиш яке аз охирин эътирозҳои мардум ва мухолифон аст, ки бовар доранд интихоботи президентии 9-уми август ба фоидаи Лукашенко тақаллуб шуд. Баробар бо ин, ҷонибдорони Лукашенко – асосан қишри пиронсол, дар як раҳпаймоии ҷудогона дар Минск дида шуданд. Аксари онҳо либоси низомӣ ва амниятӣ доштанд ва шиорҳое, ки дар дасташон буд, навиштаҷоте мисли “Ба хотири сулҳ, шукуфоӣ ва арзишҳои суннатӣ” дошт. Рӯзи аз ин пеш даҳҳо ҳазор сокини Беларус бо вуҷуди таҳдиди вазорати дохилӣ барои истифодаи нирӯ, аз кӯчаҳои Минск ва дигар шаҳрҳо гузар карданд. Рӯзи 19-уми октябр ба иттилои вазорати дохилӣ, 280 нафар, аз ҷумла 215 нафар бо иттиҳоми нақзи қоидаи маъракаҳои ҷамъиятӣ боздошт шуданд.

ИМА шаш афсари ГРУ-ро дар рахнагариҳои сиёсии интернетӣ гунаҳгор кард

Акс аз бойгонӣ

ИМА шаш афсари низомии Русияро дар фаъолиятҳои “харобкорона” аз роҳи ташкили маъракаҳи сартосарии рахнагарӣ ва паҳн кардани паразитҳои интернетӣ, аз ҷумла талошҳои ба ҳам задани ҷумҳуриҳои собиқи шӯравии Украина ва Гурҷистон айбдор кард. Айбнома рӯзи 19-уми октябр аз ҷониби вазорати адлияи ИМА эълон шуд. Дар матни он инчунин омадааст, ки ин нафарон интихоботи Фаронса, бозиҳои Олимпии Сеул ва як созмони байналмиларо, ки бо таҳқиқи нақши Русия дар истифодаи заҳри асаб машғул буд, рахна кардаанд. Айбномаи мазкур яке дигар аз силсилаи ҷиноятҳои интернетист, ки аз ҷониби бозигарони ғайридавлатии Русия дар ИМА анҷом мешавад. Шаш афсари гумонбаршуда узви як воҳиди низомии марбут ба раёсати ҷосусӣ ваё ГРУ мебошанд. Соли 2018 ин созмонро дар рахна кадани компютерҳои ситоди демократҳо дар интихоботи ду сол аз он пеш гунаҳгор карданд. Додситони амрикоӣ Скотт Бреди гуфт, ҳамлаҳои интернетие, ки ин муттаҳамон анҷом додаанд, назар ба дигарҳо “аз ҳама зиёд харобкоронаву гаронтарин дар таърихи ҳамлаҳои ҳакерӣ” будааст.

Маҷмаи рӯҳониёни мусалмон дар 18 минтақаи Русия маркази ҳифзи ҳуқуқ мекушояд

Акс аз бойгонӣ

Маҷмаи рӯҳониёни мусалмон, як созмони динӣ дар Русия, тасмим гирифтааст, ки дар 18 минтақаи ин кишвар барои кумак ба муҳоҷирон марказҳои ҳифзи ҳуқуқ боз кунад. Ёрии ҳуқуқӣ ба муҳоҷирон, пешгирӣ аз ифротгароӣ ва ҷинояткорӣ дар миёни шаҳрвандони хориҷӣ яке аз ҳадафҳои ташкили марказҳои имдодӣ гуфта мешавад. Албир Крганов, раиси Маҷмаи рӯҳониёни мусалмон дар Русия, мегӯяд, дар бештари маврид муҳоҷиронро корфармоён истифода мебаранд ва шаҳрвандони хориҷӣ наметавонанд аз ҳуқуқи худ ҳимоят кунанд. Бинобар ин, ба марказҳои кумакрасон шаҳрвандон новобаста ба дину миллатшон метавонанд муроҷиат намоянд. Маҷмаи рӯҳониёни мусалмон дар Русия барои муҳоҷирон телефонҳои бовариро фаъол кардааст.

Шаҳрдори Маскав гуфт, ба зудӣ ба ваксинзании оммавӣ оғоз мекунанд

Сергей Собянин

Раиси шаҳри Маскав гуфтааст, ки ваксинзании оммавӣ ба зидди коронавируси нав дар моҳҳои “декабр ва январ” дар ин шаҳр оғоз мешавад.

Сергей Собянин дар ин бора рӯзи 19-уми октябр дар вебсайти расмии пойтахти Русия хабар дода, вале нагуфтааст, ки кадом ваксинаи тасдиқшударо ба мардум мегузаронанд.

Моҳи август Русия ваксинаи Спутник-Ви-ро барои истифодаи умумӣ дар қаламрави кишвар иҷоза дод ва нахустин кишваре шуд, ки ваксина ба зидди COVID-19-ро мавриди баҳрабардорӣ қарор медиҳад.

Аммо донишмандон ва доираҳои байналмилалии илмӣ гуфтанд, ки ваксинаи мазкур дуруст ва ба таври зарурӣ озмоиш нашудааст.

Русия баъд аз ин ваксинаи дувумро ҳам барои истифодаи умум иҷоза дод ва рӯзи 19-уми октябр ба озмоиши ваксинаи саввум оғоз кард. Дар Русия бештар аз 1 миллион 400 ҳазор нафар ба бемории COVID-19 гирифтор шудаанд ва кишвар аз назари сироят дар ҷаҳон дар мақоми 4-ум аст. Айни замон сирояти вирус дар Русия мисли дигар кишварҳои ҷаҳон суръат гирифтааст.

Доналд Трамп сироятшиноси калони кишварро "аҳмақ" номид

Кохи Сафед. Доктор Энтони Фаучи, сироятшиноси аршади ҳукумати ИМА ва президент Доналд Трамп

Доналд Трамп, раиси ҷумҳури Амрико, ба мутахассиси баландмақоми ҳукуматаш Энтонӣ Фаучӣ дарафтода, ӯро «аҳмақ» номид. Ӯ рузи 19-уми октябр гуфт, раиси Маркази мубориза бо бемориҳои сироятӣ дар Амрико тавсияҳои нодурусте барои муқобила бо пандемияи коронавирус додааст.

Ӯ гуфт: “Амрикоиҳо аз шунидани Фаучӣ ва ҳамаи ин аҳмақҳо ва аҳмақҳое, ки нодуруст мефаҳманд, хаста шудаанд.”

Доналд Трамп дар ин бора ҳангоми суҳбати телефонӣ бо аъзои ситоди интихоботиаш сухан гуфта ва Энтонӣ Фаучиро “як мусибат” номидааст.

Раиси ҷумҳури Амрико дар ин бора баъд аз он суҳбат кард, ки Энтонӣ Фаучӣ дар як мусоҳибаи телевизионӣ гуфт, аз онки коронавирус ба Доналд Трамп сироят кард, ҳайрон нашудааст, чун ӯ як маросими бузурге баргузор карда буд ва дар он одамони зиёде ниқоби тиббӣ надоштанд ва фосилаи иҷтимоиро риоят намекарданд.

Дар айни суҳбати телефонӣ бо аъзои ситодаш, Доналд Трамп изҳори боварӣ кардааст, ки дар интихоботи рӯзи 3-уми ноябр пирӯз мешавад. Ӯ гуфтааст, маъракаи таблиғотиаш фавқуллода хуб мегузарад, бо вуҷуди онки назарсанҷиҳо нишон додаанд, Доналд Трамп аз назари маҳбубият дар байни мардум дар бисёре аз иёлатҳои муҳими Амрико аз рақиби демократаш Ҷо Байден ақиб мемонад.

Микрофонҳо хомӯш мешаванд. Навоварӣ дар дебати ояндаи президентии ИМА  

Огайо, дебати аввали Доналд Трамп ва Ҷо Байден

Дебат ё музоҳираи баъдии миёни президенти ИМА Доналд Трамп ва рақиби демократи ӯ Ҷо Байден дар баҳс ё мунозираи баъдии интихоботиашон аз рӯи қоидаи нав амал хоҳанд кард: ба ҳангоми изҳориназарҳои як нафарашон микрофони дигарашон хомӯш мешавад. Президенти комиссиюни дебатҳо рӯзи 19-уми октябр гуфт, ки ба хотири такрор нашудани ҳарфбуриҳои баҳси гузашта ва ҳам мушкилоти фанние, ки дар натиҷа боиси нофаҳмиву ҳамлаҳои лафзӣ мешаванд, қарор шуд дар ҷараёни баҳс бояд микрофон хомӯш шавад. Баҳси навбатии номзадҳои 22-юми октябр баргузор мешавад. Комиссиюн дар як изҳорот гуфт, ки умедвор аст номзадҳо “ба вақти ҳамдигар эҳтиром қоил мешаванд ва ин баҳс барои эҷоди як дебати маданӣ мусоидат мекунад”. Тими Трамп ба ин тағйирот мухолифат кард, вале гуфт, ки бо ин вуҷуд Трамп иштирок хоҳад кард. Микрофонҳои бастаи рақибон иҷоза медиҳад, ки ҳар номзад дар оғози баҳс 2 дақиқа вақтро барои изҳориназарҳои бемонеаи назарҳояш хоҳад дошт. Баъди ин ҳарду микрофон барои баҳси озод боз хоҳанд монд. Дебати навбатӣ охирин дар остонаи интихоботи 3-юми ноябр хоҳад буд.

Раҳимбек Матраимовро бо шарти берун нарафтан аз маҳалли зист озод карданд

Раҳимбек Матраимов дар назди бинои додгоҳ. 20-уми октябри 2020

Додгоҳе дар шаҳри Бишкек шоми 20-уми октябр Раҳимбек (Райимбек) Матраимов, машҳур бо номи «Раим миллион»-ро, ки дар доираи тақҳиқи фасод дар Хадамоти гумруки Қирғизистон дастгир шуда буд, бо шарти берун нарафтан аз ҷойи зист озод кард.

Додситон хостааст, ӯ то замони анҷоми таҳқиқ дар озодӣ бимонад, вале вазифадор кардааст, «маҳалли зистро бе иҷозаи муфаттиш, додситон ва додрас тарк накунад ва ба ҷараёни таҳқиқ халал нарасонад».

Раҳимбек (Райимбек) Матраимов, муовини пешини раиси Хадамоти давлатии гумруки Қирғизистон, рӯзи 20-уми октябр дастгир шуд. Масъулони Кумитаи давлатии амнияти миллии Қирғизистон гуфтанд, ӯро дар доираи тафтиши фасодкорӣ дар соҳаи гумрук боздошт карданд.

Кумитаи давлатии амнияти миллии Қирғизистон 17-уми октябри имсол аз оғози тафтиши фасодкорӣ дар Хадамоти гумруки ин кишвар хабар дода буд.

Ба гуфтаи масъулони кумита, дар Хадамоти гумруки Қирғизистон аз соли 2016 то ба ҳол бо иштироки Райимбек Матраимов ва мансабдорони масъули гузаргоҳҳои марзӣ нақшаи фасодкорие амал мекунад.

Номи Райимбек Матраимов, ки бо лақаби "Раим миллион" низ маъруф аст, дар силсилаи таҳқиқоти рӯзноманигории бахши қирғизии Радиои Озодӣ, OCCRP ва Kloop низ зикр шудааст.

Бино бар он, хонаводаи Матраимовҳо дар чанд соли охир зиёда аз 700 миллион долларро "ғайриқонунӣ" аз Қирғизистон ба хориҷ бурдаанд.

Баъд аз нашри силсилаи таҳқиқоти рӯзноманигорӣ, Райимбек Матраимов, бародараш, вакили порулмон Искандар Матраимов ва бунёди хайрияи “Исмоил Ата” ба зидди Радиои Озодӣ, хабарнигор Алӣ Токтакунов ва сомонаи Kloop ба додгоҳ шикоят карданд. Искандар Матраимов гуфта буд, ки таҳқиқот бо ҳадафи беобрӯ кардани онҳо нашр шудааст.

Узбекистон дар соли оянда барои мубориза бо коронавирус $290 млн ҷудо мекунад

Шавкат Мирзиёев, раиси ҷумҳури Узбекистон.

Дар соли 2021 Узбекистон барои бахши тандурустӣ бештар аз 1,9 млрд доллар ҷудо мекунад. Аз ҷумла наздики 290 млн доллар барои мубориза бо коронавирус ва қариб 174 млн доллар барои хариди дору ҷудо хоҳа шуд.

Дар ин бора рӯзи 19 октябр президенти он кишвар Шавкат Мирзиёев дар як ҷаласаи бахшида ба буҷаи соли ояндаи кишвараш иттилоъ дод.

Мирзиёев дар ҷаласа гуфтааст, ки ҳангоми банақшагирии буҷаи соли оянда бояд идомаи коронавирус ва уфти иқтисоди ҷаҳонӣ ба эътибор гирифта шавад.

Ба иттилои маркази матбуотии президенти Узбекистон, Мирзиёев гуфтааст, ки дар шароити вабо дар соли 2021 харҷи соҳаи иҷтимоӣ нисбати соли ҷорӣ бояд 15 дарсад афзоиш дода шавад.

Пашинян ва Алиев барои "гуфтугӯ омодаанд", вале шартҳои худро доранд

Раиси ҷумҳури Озарбойҷон Илҳом Алиев (аз рост) бо сарвазири Арманистон Никол Пашинян. Акс аз бойгонӣ

Сарвазири Арманистон Никол Пашинян гуфт, омодааст бо президенти Озарбойҷон Илҳом Алиев барои ҳалли низои Қарабоғи Куҳӣ дар шаҳри Москваи Русия гуфтугӯ кунад.

Арманистон ҳамзамон ҳалли мақоми Қарабоғи Куҳиро шарт гузоштааст. Пашинян дар ин бора дар суҳбат бо хабаргузории русии ТАСС изҳори назар кард. Дар Ереван исрор мекунанд, ки ба мардуми Қарабоғи Куҳӣ ҳаққи худмуайянкунӣ дода шавад.

Илҳом Алиев низ дар суҳбат бо ТАСС аз омодагии худ барои гуфтугӯи ҳалли низои Қарабоғи Куҳӣ хабар дод. "Мо ҳам сулҳро мехоҳем. Вале бар хилофи Арманистон, минтақаҳоеро низ мехоҳем, ки ба мо тааллуқ доранд", - изҳор дошт президенти Озарбойҷон.

Ба навиштаи "Новая газета", артиши Ҷумҳурии эътирофнашудаи Қарабоғи Куҳӣ хабар додааст, ки дар натиҷаи даргириҳо 729 сарбози арманӣ кушта шудааст. Озарбойҷон талафоти худро ошкор намекунад. Алиев гуфт, маълумот дар бораи талафотро баъди хатми задухурдҳо эълом мекунанд.

Дар Қазоқистон тафтиш дар фурудгоҳҳо сахттар ва дари синамоҳо боз шуд

Акс аз бойгонӣ.

Дар Қазоқистон сар аз 26 октябр иҷозат доданд, ки синамоҳо дари худро боз кунанд. Аммо аз онҳо талаб шудааст, ки толорро на бештар аз 30 дарсад пур кунанд ва аз муштариҳо риояи фосила ва пӯшидани ниқобро талаб кунанд.

Ин қарорро Комисияи байниидоравии пешгирӣ аз паҳншавии вабои коронавируси Қазоқистон қабул кардааст.

Ҳамзамон гуфта шудааст, ки ин қарор дар айни ҳол ба шаҳру вилоятҳои Нурсултон, Алмато, Мангистау, Қазоқистони Ғарбӣ, Қазоқистони Шарқӣ ва Атирау дахл дорад. Ин ҳам дар ҳолест, ки сар аз 19 октябр чораҳои карантинӣ дар Нурсултону Алмато ва Қарағандаву Атирау сахттар шудааст.

Синамо ба бахши иншооти тиҷорӣ шомил мешавад, ки фаъолияти онҳо аз оғози воридшавии вабои коронавирус ба Қазоқистон аз нимаҳои моҳи марти соли ҷорӣ манъ шудааст. Ба иттилои мақомоти он кишвар, зиёни иқтисодии синамоҳои Қазоқистон дар ин давра ба 20 миллиард танга расидааст.

Ба ҷуз ин, мақомоти Қазоқистон тасмим гирифтанд, ки чораҳои беҳдоштиву эпидемиологӣ дар гузаргоҳҳои марзии кишварро сахттар кунанд. Ба ин тартиб, шуруъ аз 26 октябр парвозҳои байналхалқӣ кам карда хоҳад шуд ва ҳамаи касоне, ки вориди Қазоқистон мешаванд, ба таври ҳатмӣ аз ташхиси коронавирус хоҳанд гузашт.

Ин дар ҳолест, ки дар Қазоқистон фаъолияти муассисаҳои томактабӣ, саққобозӣ ва толори бозиҳои компютерӣ, муассисаҳои тафреҳӣ, толори тую маъракаҳо ва клубҳои шабона ҳанӯз манъ аст.

Дар як рӯзи охир дар Қазоқистон 102 ҳолати нави гирифторӣ ба вабои коронавирус сабт шудааст. Дар маҷмуъ дар он кишвар аз 13 март ба ин тараф 109 ҳазору 508 сокин ба ин вабо мубтало шудааст.

Дар Минск ҳазорон нафар бо талаби истеъфои Лукашенко дигарбора ба хиёбонҳо рехтанд

Даҳҳо ҳазор нафар аз мардуми Белорус дигарбора ба хиёбонҳои шаҳри Минск рехтанд ва истеъфои Александр Лукашенкоро талаб карданд. Таҳдиди мақомот барои истифодаи аслиҳаи оташфишон ҳам монеи онҳо нашуд.

Рӯзи панҷшанбе сардори Раёсати мубориза бо ҷиноятҳои муташаккилона ва ришвахорӣ дар Белорус, тазоҳургаронро бандитҳо номид ва гуфт, ки "албатта мо ба зидди онҳо аз аслиҳа, аз ҷумла аслиҳаи оташфишон истифода мебарем ва ба шакли инсонӣ".

Хабаргузории "Интерфакс" навишт, ки дар тазоҳурот 30 ҳазор нафар ширкат кардаанд. Ба гуфтаи созмони ҳомии ҳуқуқи "Весна", бештар аз 100 нафар дастгир шудаанд.

Тазоҳуроти оммавӣ дар Белорус ҳафтаҳост, ки идома дорад, баъди аз интихоботи президентии рӯзи 9-уми август шуруъ шуд. Мақомот гуфтанд, Александр Лукашенко, ки аз соли 1994 Белорусро раҳбарӣ мекунад, 80 дарсади раъйи мардумро ба даст овардааст.

Мақомоти интизомӣ то кунун бештар аз 13 ҳазор нафар, аз ҷумла чанд фаъоли мухолифонро, ки дар кишвар монданд, дастгир кардаанд. Светлана Тихановская, пешвои мухолифон, ки ба Литва гурехт, аз Лукашенко хостааст, ки то 25-уми октябр истеъфо бидиҳад, дар акси ҳол мардум ба коршикании оммавӣ оғоз мекунанд.

Ёфтҳои бештар

XS
SM
MD
LG