Пайвандҳои дастрасӣ

Хабари нав

Хабарҳо

Таҳвили назорати минтақаи марзии Маскав аз сар гирифта мешавад

Марҳалаи дуввуми таҳвили қитъаи марзии Маскав дар сарҳади Тоҷикистон бо Афғонистон аз марзбонони рус ба ҳамтоёни тоҷики онҳо, ки то чанд муддат мавқуф гузошта шуда буд, дубора оғоз мешавад. Тибқи иттиллоъи манобеъи марбут ба нирӯҳои марзбонии Русия, мустақар дар Тоҷикистон, қарор аст марҳалаи навбатии таҳвили марз ба сарҳадбонони тоҷик рӯзи 11 май шурӯъ шавад.

Масъулини Кумитаи ҳифзи сарҳадоти Тоҷикистон гуфтанд, дар ҳоли ҳозир аз 232 километр имтидоди қитъаи марзии Маскав, ки гуфта мешавад аз минтақаҳои мураккаб ва душвори марзи миёни Тоҷикистон бо Афғонистон аст, 136 километри он таҳти назорати марзбонони тоҷик гузаштааст. Нуралишо Назаров, фармондеҳи ситоди нирӯҳои марзбонии Тоҷикистон гуфт, ба ҳангоми таҳвили қитъаоти марзӣ марзбонони рус, бар асоси созишномаҳои қаблӣ, бархе аз муҳиммот ва лавозимоти ҷангии худро ба ихтиёри ҳамтоёни тоҷики худ гузоштанд.

Таҳвили қитъаи марзии Маскав дар сарҳади Тоҷикистон бо Афғонистон дар нимаи дуввуми моҳи апрел оғоз шуда ва бо шурӯъи маросими таҷлил аз 60-умин солгарди хатми ҷанги Шӯравӣ бо Олмони нозӣ мавқуф гузошта шуда буд. Аз ин қитъаи марзӣ пештар чаҳор дидбонгоҳи марбут ба дастаи марзии Шӯробод ва ду воҳиди марзӣ бо номҳои Боғ ва Бухорак аз ҳайати дастаи марзии Маскав ба ихтиёри Кумитаи сарҳадоти Тоҷикистон вогузор шудааст.

Қаблан саросари манотиқи марзии воқеъ дар вилояти Бадахшон ва як қисме аз қитъаҳо дар самти ноҳияи Шӯрободи вилояти Хатлони дар марзи Тоҷикистон бо Афғонистон аз ихтиёри сарҳадбонони рус ба Кумитаи марзбонии Тоҷикистон вогузор шуда ва дар ин замина асноди ҳуқуқӣ ба тасвиб расида буд.
Абдуқайюми Қайюмзод, Душанбе

Ҳамаи хабарҳои имрӯзро дар инҷо бихонед

Дар Суғд "тӯмори зидди коронавирус"-ро манъ кардаанд. ВИДЕО

Дар Хуҷанд “тумор”-и муҳофизат аз коронавирус мефурӯшанд
лутфан мунтазир бошед

Феълан кор намекунад

0:00 0:02:57 0:00

Мақомот дар вилояти Суғд аз тоҷирон хостаанд, ки гарданбандҳои машҳур бо номи "тӯмори зидди коронавирус" (Virus shut out)-ро нафурӯшанд.

Дар ҳоле ки сокинон роҳҳои халосӣ аз бемории ҳамагирро меҷӯянд, "тӯмори зидди коронавирус" чанд рӯз пеш дар дорухона ва бозорҳои шаҳри Хуҷанд пайдо шуда, якбора таваҷҷуҳи бисёриҳоро ба худ ҷалб кард. Бархе онро роҳи наҷот ва гуруҳе дигар суистифода аз бовари мардум дар замони пандемия пиндоштанд.

Султон Раҳмонзода, сардори шуъбаи раёсати хадамоти назорати тандурустӣ дар Суғд, рӯзи 31-уми октябр ба Радиои Озодӣ гуфт, баъзе аз ин гарданбандҳоро мусодира кардаанд. "То ҳол аз дорухонаҳои шаҳри Хуҷанд ҳудуди 200-300 "бейҷик"-ҳои ба ном муҳофизатӣ аз коронавирусро гирифтем ва фурӯши онро боздоштем", -- афзуд ӯ.

Вай илова кард, бино ба тахмини онҳо, "паҳнкунандаи асосии мол соҳибони дорухонаҳо нестанд ва шояд ягон савдогар дар дохили матоъ ё хӯрокворӣ аз сарҳад гузарондааст. Чунки ба ғайр аз дорухонаҳо дар нуқтаҳои дигари савдо низ мефурӯхтанд."

Ин фарзия расман тасдиқ нашудааст. Бар илова, бархе аз сокинон мепурсанд, агар "тӯмори зидди коронавирус"-ро аз хориҷа овардаанд, чӣ гуна дар гузаргоҳҳои сарҳадӣ надидаанд ва ё насанҷидаанд. Мутахассисон мегӯянд, дар рӯйи он бо хати ҷопонӣ навиштаанд.

Ба иттилои Раҳмонзода, маҳлулеро, ки дар дохили "бейҷик" буд, барои ташхис ба озмоишгоҳ фиристодаанд: "Дар сурати ба талаботи тиббӣ ҷавобгӯ набудан, гарданбандҳои ба ном муҳофизатиро пурра мусодира карда, дар ҳузури хабарнигорон оташ мезанем."

Рӯзи 31-уми октябр дар дорухонаҳои Хуҷанд "тӯмори зидди коронавирус” наёфтем. Чанде аз тоҷирон гуфтанд, ки фурӯши Virus shut out манъ шудааст.

Тоҷикистон охири моҳи апрели имсол мавҷудияти коронавирусро эътироф кард ва аз он замон то кунун 10977 кас бемор шудаанд. Вазорати тандурустии Тоҷикистон мегӯяд, то 30-юми октябр тақрибан 10200 нафар шифо ёфтанд. Мақомот талафот аз бемории ҳамагирро 81 нафар шумурдаанд.

Аммо мутахассисон ба омори расмӣ дар бораи бемории COVID-19 шубҳа доранд ва мегӯянд, теъдоди гирифторону талафот ба маротиб бештар аз он аст, ки Вазорати тандурустӣ мегӯяд.

Ҳоло барои пешгирӣ аз паҳншавии беморӣ ба сокинони Тоҷикистон бастани ниқоби тиббӣ, шустани дастон бо собун ва маҳлулҳои беҳдоштӣ ва риояи фосилаи ҷисмонӣ пешниҳод шудааст.

Қазоқистон ба ду фирории дигар аз Чин паноҳгоҳ додааст

Багашар Малиқулӣ

Иттиҳодияи сабтиномнашудаи "Нағиз Атажұрт" дар Қазоқистон хабар дод, ки қазоқҳои фирорӣ аз Чин Кайш Акан ва Багашар Малиқулӣ барои як сол ҳаққи паноҳандагиро дар ин кишвар дарёфт карданд. Вакилони дифои онҳо низ ин хабарро тасдиқ карданд.

Малиқулӣ изҳор дошт, ки ҳаққи муваққатии паноҳандагӣ дар Қазоқистонро дарёфт намудааст. "Ман 28-уми октябр ҳуҷҷати паноҳандагиро дар Талдиқурғон гирифтам. Барои як сол доданд. Гуфтанд, феълан бо ин ҳуҷҷат гардед, баъдан боз мебинем", - шарҳ дод ӯ.

Додгоҳи Қазоқистон пештар Кайш Аканро, ки аз Чин ба ин кишвар фирор карда буд, дар "убури ғайриқонунии марз" муттаҳам кард ва шартан шаш моҳ аз озодӣ маҳрум кард. Акани 43-сола гуфт, ба далели тарс аз таъқибҳои мақомоти Чин ва эҳтимоли фиристода шуданаш ба "урдугоҳҳои бозтарбияи сиёсӣ" марзи Қазоқистонро ғайриқонунӣ гузаштааст.

Пеш аз ин, 17-уми октябр ду қазоқи дигар аз Чин - Кастер Мусохонулӣ ва Мурагер Олимулӣ ҳам барои як сол дар Қазоқистон паноҳандагӣ пайдо карданд.

Мусохонулӣ ва Олимулӣ моҳи октябри соли 2019 аз Шинҷони Чин фирор ва тавассути убури марз вориди Қазоқистон шуданд. Ба маҳзи ворид шудан ба Қазоқистон, онҳо нишасти хабарӣ баргузор ва сабабҳои фирорашон аз Чинро нақл карданд. Ба гуфтаи Мусохонулӣ ва Олимулӣ, мақомоти Чин уйғурҳо, қазоқтаборон ва дигар мардуми бумии Шинҷонро, ки асосан пайрави ислом ҳастанд, таъқиб мекунанд.

Маҳдудиятҳо дар Туркманистон то оғози соли оянда боқӣ мемонанд

Роҳи оҳан дар Туркманистон

Дар Туркманистон гардиши қатор (поезд)-ҳои мусофирбар ва мусофирбар (автобус)-ҳо байни минтақаҳо ҳадди ақал то 1-уми январи соли 2021 барқарор нахоҳад шуд.

Дар ин бора расонаҳои маҳаллии он кишвар хабар доданд. Сомонаи ширкати "Роҳи оҳани Туркманистон" рӯзи 29-уми октябр аз манъ шудани гардиши қаторҳо расман хабар дод.

Аммо ба таври ғайрирасмӣ гардиши автобус ва қаторҳо байни минтақаҳои Туркманистон ҳанӯз чанд моҳи пеш маҳдуд шуда буд. Ба навиштаи расонаҳо, ин маҳдудиятҳо ба пешгирӣ аз паҳншавии коронавирус рабт доранд. Ин ҳам дар ҳолест, ки мақомоти он кишвар то ҳол расман мавҷудияти коронавирусро дар Туркманистон рад мекунанд.

Ба ҷуз аз манъи гардиши автобусу қаторҳо, ҳамчунин дар чанде аз ноҳияҳои Туркманистон роҳҳои мошингардро бастаанд. Расонаҳо менависанд, эҳтимол дорад, аз 1-уми ноябр парвозҳои дохилӣ низ маҳдуд шаванд.

Манобеи расонаҳо аз дохили ҳукумати Туркманистон гуфтаанд, ки эҳтимол мақомоти ин кишвар аз 1-уми ноябр карантини сартосарӣ эълом кунанд.

Дар Узбекистон мудири 11 оҷонси хусусии корро муҳокима мекунанд

Акс аз бойгонӣ

Дар Узбекистон ба зидди 51 мудир ва масъули 11 оҷонси хусусии кор парвандаи ҷиноӣ кушодаанд. Дар ин бора аз Вазорати меҳнат ва равобити кории Узбекистон хабар доданд.

Бино ба иттилои расмӣ, ин оҷонсҳо наздик ба 79,1 миллиард сӯм (7,6 миллион доллар)-и шаҳрвандонро аз худ кардаанд.

Дар ҳоли ҳозир дар Узбекистон 103 оҷонси хусусии шуғл ба қайд гирифта шудааст. Аз ин миён 25 оҷонс бар асоси иҷозатномаи мазкур фаъолият карда, солҳои 2019 ва 2020 барои 3214 нафар дар Русия, Туркия, Литва, Латвия, Лаҳистон, Булғористон, Имороти Муттаҳидаи Араб, Белорус, Ҷопон, Қазоқистон, Украина ва Қатар кор пайдо кардаанд.

Расонаҳо пештар дар бораи садҳо узбекистоние хабар дода буданд, ки дар натиҷаи қаллобии оҷонсҳои хусусии шуғл зарар дидаанд. Бархе аз онҳо ҳатто дар майдони марказии шаҳри Тошканд эътироз карданд.

Дар натиҷа, мақомоти Узбекистон маҷбур шуданд, дар ин замина қонунеро ба тасвиб расонанд, ки бар асоси он, "пардохти ҳаққи хизматрасонии дарёфти коргар аз ҳисоби корфармо ё фармоишгар ситонида мешавад".

Қирғизистон аз Қазоқистон дору ва васоили муҳофизатӣ хост

Руслан Казакбоев

Вазири корҳои хориҷии Қирғизистон Руслан Казакбоев аз Қазоқистон дархост кард, ки Вазорати тандурустии Қирғизистонро бо дору ва васоили муҳофизатӣ таъмин кунад.

Дар ин бора аз Вазорати корҳои хориҷии Қирғизистон хабар доданд.

Руслан Казакбоев рӯзи 29-уми октябр бо ҳамтои қазоқи худ Мухтор Тлеубердӣ дар шаҳри Нурсултон мулоқот кард. Ду вазир дар бораи ҳамкориҳои сиёсӣ, иқтисодиву тиҷорӣ, фарҳангиву башарӣ ва бахши муҳоҷират гуфтугӯ карданд. Вазирон ҳамчунин муборизаи муштарак ба зидди коронавирусро баррасӣ карданд.

"Бо назардошти вазъи иҷтимоиву иқтисодии кишвар Руслан Казакбоев аз ҷониби Қазоқистон хост, ки ба Қирғизистон кӯмаки моливу техникӣ расонад", - омадааст дар хабари Вазорати корҳои хориҷии Қирғизистон.

Донишманди узбек аз коронавирус даргузаштааст

Андрей Кубатин

Андрей Кубатин, олими шарқшиносу туркшиноси Узбекистон рӯзи 29-уми октябр аз бемории коронавирус даргузашт.

Кубатин рӯзи 15-уми октябр навишта буд, ки дар бемористон бистарӣ аст. Дертар хабар расид, ки вай аз коронавирус муолиҷа мешуд.

Кубатин дар Донишкадаи шарқшиносии Тошканд дарс мегуфт. Ӯро соли 2017 бо айби дар ихтиёри як ширкати сайёҳии Туркия гузоштани нусхаи китобҳои нодир боздошт карда буданд. Баъдтар ӯро дар "Хиёнат ба давлат" айбдор карданд ва 11 сол аз озодӣ маҳрум намуданд.

Соҳи сентябри соли 2019 ӯро "сафед" ва аз зиндон озод карданд. Кубатин ҳамчунин ба омӯзиши таърихи халқҳои эронӣ - эроншиносӣ ва суғдшиносӣ машғул буд.

Зеленский хост, Додгоҳи конститутсионии Украина пароканда шавад

Владимир Зеленский, раиси ҷумҳури Украина

Президенти Украина Владимир Зеленский 30-юми октябр тарҳи қонунеро ба порлумон пешниҳод кард, ки қатъи ваколати Додгоҳи конститутсионии ин кишварро пешбинӣ мекунад. Ҳамчунин бекор шудани яке аз қарорҳои додгоҳ ва ваколати додрасҳое пешниҳод мешавад, ки онро содир кардаанд.

Лоиҳаи қонун "Дар бораи боварии ҷомеа ба истеҳсолоти судии конститутсионӣ" аз ду банд иборат аст. Як банди он бекор кардани қарори Додгоҳи конститутсионии Украина аз 27-уми октябрро пешбинӣ мекунад. Додгоҳ он рӯз як қатор ваколатҳои Оҷонси миллии мубориза бо коррупсияи Украинаро хилофи Конститутсия номид.

Банди дувум барканории додрасҳоеро пешбинӣ намудааст, ки дар содиршавии қарори мазкур даст доштанд. Ҳамчунин ин банд оғози раванди интихоби ҳайати Додгоҳи конститутсиониро пешбинӣ намудааст.

Конститутсияи Украина барканории додрасҳоро бо қарори президент ё порлумон пешбинӣ намекунад. Қарори барканории додрасҳоро худи додгоҳ бояд бо ҷонибдории аз се ду ҳисаи ҳайати конститутсионӣ қабул кунад. Ваколати додрасҳо танҳо дар сурати поёни муҳлат, ба синни 70 расидан, даст кашидан аз шаҳрвандии Украина ё поймол кардани қонунҳо қатъ мешавад.

Додгоҳи конститутсионии Украина 27-уми октябр ваколатҳои Оҷонси миллии мубориза бо коррупсияро дар бораи назорат ва санҷиши эъломияи дороии мансабдорону вакилон, дастрасии шабонарӯзии шаҳрвандон ба рӯйхати эъломияҳо, пайгирии шакли зиндагии мансабдоронро хилофи Қонуни асосии ин кишвар эътироф карда буд.

Президенти Украина баъд аз судури ин қарор ҷаласаи фавқулодаи Шӯрои амнияти миллӣ ва дифоиро баргузор кард.

Ҳалокати 26 кас дар заминларзаи Туркия ва Юнон. 800 нафар маҷруҳ шудаанд. АКС, ВИДЕО

Баъд аз заминларзаи 30-юми октябр. Измир, Туркия

Шумори ҷонбохтагон аз заминларза дар шаҳри Измири Туркия ва ҷазираи Самоси Юнон ба 26 нафар расид.

Харобиҳои баъд аз заминларза дар Измир. Туркия, 30-юми октябри 2020
Харобиҳои баъд аз заминларза дар Измир. Туркия, 30-юми октябри 2020

Ҳодиса 30-юми октябр рух дод ва бар асари он 800 кас захмӣ шудаанд.

Мақомоти Туркия гуфтанд, қудрати зилзила дар марказаш 6.6 дараҷаи Рихтер буд ва ғарби Туркия, шаҳри Истанбул ва Юнонро низ такон дод.

Ба иттилои расмӣ, дар Измир 24 нафар ҷон бохта, 700 каси дигар маҷруҳ шудаанд. Измир бо тақрибан 3 миллион аҳолӣ севумин шаҳри бузурги Туркия аст.

Ба гуфтаи мақомҳои Юнон, дар заминларзаи рӯзи ҷумъа ду навҷавон дар ҷазираи Самос ҷон бохтаанд.

Туркия сари чанд вақт шоҳиди заминларзаҳои маргбор мешавад. Дар зилзилаи моҳи январи имсол дар он кишвар 30 нафар ҷон бохта, 1600 кас маҷруҳ шуданд. Заминларзаи соли 1999 дар Измити Туркия (наздикии Истанбул) тақрибан 17 ҳазор касро кушта буд.

Харобиҳои баъд аз заминларза дар Измир. Туркия, 30-юми октябри 2020
Харобиҳои баъд аз заминларза дар Измир. Туркия, 30-юми октябри 2020

Нигаронии AI аз ҳабси абади як қазоқистонӣ дар Чин

Нагиз Муҳаммадулӣ



Созмони байналхалқии ҳомии ҳуқуқи Amnesty International аз ҷомеаи ҷаҳонӣ хост, зери номае унвонии мақомоти маҳбаси Шинҷони Чин имзо гузоранд ва аз қазоқтабори зиндонӣ Нагиз Муҳаммадулӣ ҳимоят кунанд.

Ба иттилои созмон, Нагиз Муҳаммадулӣ ҳамроҳ бо хонаводааш ҳашт сол пеш аз Чин ба Қазоқистон кӯчид ва баъди як сафари кутоҳ ба Чин дар моҳи марти соли 2018 боздошт ва дар "ҷудоиандозӣ" айбдор шуд. Amnesty International хабар медиҳад, ки ӯро моҳи сентябри соли ҷорӣ ба ҳабси якумрӣ маҳкум кардаанд.

Хешовандони Муҳаммадулӣ гуфтаанд, ки ӯро барои изҳори назарҳояш дар бораи кӯчидани қазоқтаборони Шинҷон ба Қазоқистон ва сиёсати "таҳсилоти дузабона" дар Шинҷон боздошту айбдор кардаанд.

Amnesty International мегӯяд, Муҳаммадулӣ аз ҳаққи дастрасӣ ба додгоҳи боадолат маҳрум буд, зеро ба вай ҳаққи интихоби вакили мудофеъ дода нашуд. Муҳаммадулӣ айби эъломшударо эътироф накард ва дар додгоҳ гуфт, ки ӯро шиканҷа кардаанд.

Чин ба хотири нигаҳдории иҷбории беш аз як миллион уйғур, қазоқтабор ва намояндаи ақалиятҳои дигари мусулмон дар "марказҳои бозтарбия"-и Шинҷон аз соли 2017 ба ин сӯ мавриди интиқоди ҷомеаи байналмилалӣ қарор дорад. Худи Пекин иттиҳомро рад карда, урдугоҳҳоро "марказҳои омӯзишӣ"-е меномад, ки гӯиё ба хотири мубориза бо терроризму экстремизм таъсис дода шудаанд.

Азсаргирии музокироти Арманистону Озарбойҷон барои созиши нави сулҳ 

Гурӯҳи Мински САҲА ва вазири хориҷаи Арманистон Зоҳраб Мнатсаканян дар Женева

Дипломатҳои баландпояи Озарбойҷону Арманистон дар Женева бо ширкати миёнҷиҳои байналмилалӣ ба баррасии шарту шароити созиши нави сулҳ пардохтанд, дар ҳоле, ки даргириҳо дар минтақаи ҷудоиталаби Қаробоғи Кӯҳӣ идома дорад ва се созиши қаблии оташбас бенатиҷа анҷомид. Ҷаласаи рӯзи 30-юми октябрро дар чаҳорчӯби Гурӯҳи Мински САҲА вазири хориҷаи Арманистон Зоҳраб Мнатсаканян шурӯъ кард. Ба ин гурӯҳ ИМА, Фаронса ва Русия шомил ҳастанд. Қарор аст баъди ин Ҷейҳун Байрамов, вазири хориҷаи Озарбойҷон бо дипломатҳои хориҷӣ гуфтугӯҳои ҷудогонае барпо кунад. Маълум нест, ки вазирони хориҷаи ду кишваре, ки дар ҳоли низоъ ҳастанд, бо ҳам мулоқоти рӯбарӯ барпо мекунанд ё на.

Қарор буд ин ҷаласа рӯзе аз ин пеш баргузор шавад, вале даргириҳои сарзада дар Қаробоғи Кӯҳӣ - минтақае дар дохили қаламрави Озарбойҷон, вале таҳти назорати арманитаборҳо ва дар иҳотаи низомиёни Арманистон – монеи ин музокирот шуд.
Даргириҳои ахир дар Қаробоғи Кӯҳӣ рӯзи 27-уми сентябр оғоз шуд ва чанд созиши оташбаси ҳосилшуда дар фосилаи кӯтоҳи баъдаш боз ҳам барҳадар рафт. Озарбойҷон рӯзи 29-уми октябр гуфт, ки ба Арманистон ҷасади 29 низомиро таслим кард, ки дар ин ҷангҳо кушта шуданд. Дар ҷараёни даргириҳои идомаёбанда шумори қурбониҳо афзоиш меёбад. Ҳарду ҷониб якдигарро дар нақзи созиши оташбас, ки бори охир бо миёнҷигии ИМА ҳосил шудааст, гунаҳкор мекунанд.
Гурӯҳи Минск гуфт, ки мулоқоти Женева бо ҳадафи “баррасӣ, дастёбӣ ба созиш ва шурӯи иҷрои он мутобиқ ба зарбулаҷали ҳосилшудаи тарафҳо то замони истиқрори пурраи сулҳ дар Қаробоғи Кӯҳӣ” баргузор мешавад.

Танишҳои қавмӣ дар минтақаи ҷойгир миёни арманиҳои масеҳӣ ва ҳамсояҳои мусалмонашон давоми даҳсолаҳо идома дорад. Қаробоғи Кӯҳӣ қаламрави эътирофшуда дар ҳудудҳои Озарбойҷон мебошад, вале арманитаборҳо, ки аксарияти сокинони ин минтақаи ҷудоиталабро ташкил медиҳанд, қонунҳои Озарбойҷонро қабул надоранд. Аз оғози солҳои 1990-ум, замоне, ки дар ин қаламрав низоъ бархост, дар Қаробоғи Кӯҳӣ аз рӯи қонунҳои худ пеш мераванд ва аз Арманистон пуштибонӣ мебинанд.
Президенти Озарбойҷон Илҳом Алиев талаб кардааст, ки Қаробоғи Кӯҳӣ ва ҳам ҳафт ноҳияи тарофи он, ки зери назари низомиёни арманӣ мебошанд, ба Озарбойҷон баргардонида шаванд.


Арманистон гуфтааст, ки ин қаламравро тарк намекунад, чун ин ҳама макон таърихан моли арманиҳо будааст, аҳолиаш ба ҳимоят ниёз дорад.


Низоъҳои бархоста хатари фаротар аз Қафқози Ҷанубӣ доман паҳн кардани хушунатҳоро бо ширкати эҳтимолии Туркия – як узви НАТО ва муттафиқи Озарбойҷон ва аз сӯи дигар Русия, ки бо Арманистон созиши низомӣ дорад, ба миён овардааст.
Туркия тақозо кард, ки нақши Гурӯҳи Минск, ки ба қавли Анкараву Боку давоми даҳсолаҳо масъалаи Қаробоғи Кӯҳиро канор гузошта буд, фаротар аз салоҳиятҳои имрӯзааш бошад. Вале на танҳо Туркия ба ҳайси як бозигари минтақавӣ ба ин низоъ дида дӯхтааст.

Эрон ҳам ҳушдор додааст, ки ҷонибҳои даргир ба қаламравҳои наздик ба минтақа осеб нарасонанд. Эрон ҳафтаи ҷорӣ гуфт, ки умедвор аст, аз роҳи роҳандозии нақшае дар марзҳои шимолуғарбаш метавонад дар хатми хушунатҳои Қаробоғи Кӯҳӣ саҳмгузор шавад.

Айни замон, Иттиҳоди Аврупо бар ин аст, ки тавсеаи хушунатҳо “ғайри қобили қабул аст” ва ҷонибдори роҳандозии музокироти сулҳ мебошад.

Намоиши эътирозии Бангладеш бо интиқод аз Макрон

Дар намози ҷумъаи 30-юми октябр мусалмонон дар Бангладеш ба бойкоти маҳсулоти Фаронса даъват карданд

Дар Бангладеш даҳҳо ҳазор мусалмонон дар намоиши эътирозӣ иштирок карда, президенти Фаронса Эммануэл Макронро “террористи калонтарини ҷаҳон” номиданд. Ин дар ҳолест, ки ҳимояти ҳукумати Фаронса аз карикатураҳои Муҳаммад Пайғамбар мояи нигаронии дигар ҷомеаҳои мусалмонӣ дар ҷаҳон шудааст. Фаронса, ки макони зисти як ҷомеаи калони мусалмонон мебошад, рӯзи 30-юми октябр дар ҳолати омодабоши амниятӣ қарор гирифт. Ин тасмим баъди он гирифта шуд, ки марде дар шаҳри Ниси Фаронса ба як калисо ҳамла кард ва бо зарби корд се нафарро кушт. Макрон ин ҳодисаро “ҳамлаи террористи исломгаро” номид. Ин ҳодиса ду ҳафта баъди он рух дод, ки дар канораҳои Париж омӯзгори мактабе, ки дар мавзӯи озодии баён ба шогирдонаш сӯҳбат карда, карикатураҳои Муҳаммад Пайғамбарро намоиш додааст, аз ҷониби як ҷавони 18-сола кушта шуд. Рӯзи 30-юми октябр эътирозгарон аз кӯчаҳои шаҳри Дака, пойтахти кишвари аксаран мусалмоннишини Бангладеш гузашт карда, ба бойкоти маҳсулоти сохтаи Фаронса даъват карда президент Макронро “террористи калонтарини ҷаҳон” номиданд. Макрон гуфт, кишвар “барои арзишҳо, салиқаи мо ба озодӣ ва тавони мо барои таъмини озодии мазҳаб дар ин сарзамин” мавриди ҳамла қарор гирифт. Макрон, дар ҳоле, ки дар беруни калисои мавриди ҳамла қарор гирифтаи шаҳри Нис сӯҳбат мекард, гуфт, “мо ҳеҷ заминае намедиҳем” ва аз мардумаш хост, ки “ба андешаҳо дар бораи ихтилофҳо дода нашаванд”.

Адахон Мадумаров мехоҳад номзад ба интихоботи президентии Қирғизистон шавад

Адахон Мадумаров, раиси ҳизби оппозитсионии “Бутун Қирғизистон”

Адахон Мадумаров, раиси ҳизби оппозитсионии “Бутун Қирғизистон” гуфт, ки номзадиашро ба интихоботи президентии кишвар пешбарӣ хоҳад кард. Дар як нишасти матбуотии рӯзи 30-юми октябр Мадумаров таъкид кард, ки номзадии ӯро на ҳизбаш, балки худаш пешбарӣ мекунад. “Ман аз роҳи худпешбарӣ иштирок хоҳам кард. Президенти Қирғизистон бояд номзадии ҳама қишрҳои аҳолӣ, гурӯҳҳои сиёсӣ ва иҷтимоии ҷомеаро намояндагӣ кунад. Ин чиз барои ҳифзи мустақилият аз гурӯҳҳои дигари сиёсӣ мусоидат мекунад”, гуфт Мадумаров. Ӯ гуфт, ки аризаашро дар ҳамин рӯз ба Комиссиюни марказии интихоботҳо медиҳад.

Рӯзи 24-уми октябр ин коммиссиюн қарор кард, ки интихоботи президентии Қирғизистон рӯзи 10-уми январи соли 2021 баргузор мешавад. Аввал шуда нияти ширкат дар интихоботро Содир Ҷабборов, нахуствазир ва иҷрокунандаи вазифаи президенти Қирғизистон баён кард.

Қонуни амалкунанда ба иҷрокунандаи муваққатии вазифаи президент ҳақ намедиҳад, ки дар интихобот номзад шавад, вале Ҷабборов гуфт, ки омода аст як моҳ пеш аз интихобот аз мақомаш канор биравад.

Дар Қирғизистон баъди интихоботи баҳсбарангези 4-уми октябр эътирозу беназмиҳо сар зад ва натиҷаҳои интихоботи парлумонӣ бекор шуд. Ҷабборов, ки бо кӯмаки тарафдорон аз зиндон озод гардид, дар овоздиҳии парлумон нахуствазир интихоб шуд ва президент Сооронбой Ҷеенбеков аз мақомаш канор рафт. Ҳамакнун дар Қирғизистон бояд ду интихоботи нав баргузор шавад, вале дар масъалаи таърихи баргузории интихоботи парлумонӣ ҳанӯз баҳсу баррасиҳо идома дорад.

Тафовути омори фавтидаҳо аз COVID-19 дар таҳқиқоти журналистони рус

Акс аз крематорий. Ҳинд, Деҳлии Нав. Корманди идораи сӯзондани ҷаноза дар назди як ҷасади қурбонии СOVID-19 истодааст

Вебсайти "Фонтанка" бо такя ба санадҳои як крематорий – идораи масъули сӯзондани ҷаноза дар шаҳри Санкт-Петербург менависад, ки аз 14-уми апрел то 27-уми октябр дар ин ҷо 5868 ҷасади афроди даргузашта аз СOVID-19-ро оташ задаанд. Бар асоси омори расмии ситоди фавқулодда, то ин рӯз дар шаҳри Санкт-Петербург шумори фавтидаҳо бар асари коронавирус 3674 нафар ҳисоб шудааст ва тафовут дар омор 2194 нафарро ташкил медиҳад.

Вебсайти хабарӣ бо такя ба дафтари қайди нобудкунии ҷасадҳо мегӯяд, ки омори сӯзондани ҷасадҳои фавтидаҳо аз СOVID-19 ба таври ҷудогона сабт шудааст.

Вебсайти "Медиазона" бо такя ба иттилои расмӣ мегӯяд, ки дар фосилаи аз 14-уми апрел то 27-уми октябр дар шаҳри Санкт-Петербург аз коронавирус 5885 нафар ҷон додаанд.

Дар Русия маркази федеролии мубориза бо коронавирус мегӯяд, ки то ҳол беш аз 27 ҳазор нафар аз ин беморӣ ҷон додаанд. Ба ин омор танҳо онҳое ворид шудаанд, ки сирояти коронавирусӣ ҳамчун манбаи аслии марги инсон то колбадшикофии ҷасадҳо сабт шудааст. Вале омори бар асари COVID-19 даргузаштани инсон баъди колбадшикофӣ болотар аст. Санҷидани сабаби марги инсон аз роҳи колбадшикофӣ як қоидаи ҳатмӣ дар беморхонаҳои Русия мебошад ва Росстат ё идораи омори Русия ин оморро хеле болотар – 45,662 нафар арзёбӣ кардааст.

ВКД Тотористон дар бораи кушта шудани ҳамлагари 16-солаи полис хабар дод

Идораи полисе дар шаҳри Кукмори Тотористон

Вазорати умури дохилии Тотористон як навраси 16-соларо, ки ба қавли ин сохтор, ба як идораи полиси шаҳри ивоқеъ дар марзи Тотористону вилояти Киров ҳамла кард, тир холӣ намуд. Вазорат дар изҳороте гуфт, ки ҳодиса соати 00:30-и шаби 30-юми октябр рух дод. Наврас гӯё ба сӯи таваққуфгоҳи мошинҳои идораи полиси ВКД-и Тотористон дар ноҳияи Кукмор ду шишаи дорои “эҳтимолан маҳлули тарканда” партофт. “Вақте ходимони полис ба хомӯш кардани оташ шурӯъ карданд, ба самти онҳо як шишаи дигар партофта шуд”. Ходимони полис наврасро таъқиб карданд ва гӯё ӯ яке аз онҳоро бо корд захмӣ кардааст. Дар паи ин полис ба сӯи ӯ тир холӣ кард.

Дар ҳамин ҳол, телеграм-канали Mash хабар медиҳад, ки гӯё ҷавони кушташуда пеш аз маргаш паёме гузошта ҳангоми ҳамла суханҳои “Аллоҳу Акбар!”-ро ба забон овардааст. Радио Свобода мегӯяд, ки парвандаи ҷиноии бозшуда дар Кумитаи тафтишоти Русия ин қазияро ҳамчун “сӯиқасд ба амали террористӣ” арзёбӣ мекунад.

Озариҳо ҷасадҳои низомиёни арманиро таслим карданд

Степанакерт, 28-уми октябр

Озарбойҷон ба ҷониби Арманистон ҷасади 29 низомии куштшуда дар ҷангҳои Қаробоғи Кӯҳиро таслим кард. Дар паи мавҷи нави задухӯрдҳо дар ин минтақаи ҷудоиталаб талафоти инсонӣ афзоиш меёбад. Интиқоли ҷасадҳоро ҳам Боку ва ҳам Ереван тасдиқ карда баробар бо ин бори дигар ҳамдигарро дар нақзи оташбаси бо миёнҷигии ИМА ҳосилшуда гунаҳгор карданд. Шушан Степанян, сухангӯи вазорати дифои Арманистон гуфт, ки интиқоли ҷасадҳо бо миёнҷигии Федератсияи Русия ва бо кӯмаки кормандони САҲА ва Кумитаи байналмилалии Салиби Сурх имконпазир шуд. Степанян гуфт, ки Арманистон омодагиашро барои таслими ҷасади низомиёни озарбойҷонӣ дар қаламрави Артсах (исми армании Қаробоғи Кӯҳӣ) баён мекунад.

Ҳикмат Ҳоҷиев, як ёвари президенти Озарбойҷон Илҳом Алиев ба журналистони хориҷӣ гуфт, ки таслими ҷасадҳо бо ташаббуси Боку ва ёрии Русия имконпазир шуд.

Беларус марзашро бо ҳама ҳамсояҳо, ҷуз Русия, баст.

28-уми октябр, гузаргоҳи марзии Новая Хута бо Литва баста аст

Александр Лукашенко, ки баъди дуюним моҳ эътирозҳои мардумӣ алайҳи натиҷаҳои баҳсбарангези интихоботи президентӣ дар фикри хатми ин ҳама намоишҳову раҳпаймоиҳо аст, ахиран ба ҷуз Русия, марзҳои Беларусро бо дигар ҳамсояҳояш баст. Кумитаи марзбонии Беларус рӯзи 29-уми октябр гуфт, ки бастани марзҳо бо Латвия, Литва, Полша ва Украина ба “вазъи эпидемиологӣ” ва паҳншавии пандемияи коронавирус бастагӣ дорад. Ин изҳорот дар ҳоле нашр мешавад, ки мақомоти Беларус давоми моҳҳои зиёд хатари пандемияро кам нишон дода иддао кардаанд, ки кишварҳои ҳамсоя дар фикри бесубот кардани ин кишвар мебошанд. Таҳаввулоти ахир, аз ҷумла, ба мақомҳои калидӣ дар сохторҳои амниятӣ таъйин кардани афроди дигари наздик ба Лукашенко, бахусус дар шаҳри Минск, ки макони баргузории аксар эътирозҳои серҷамъияти мухолифон мебошад, дар бораи тақвияти тадбирҳои амниятӣ гувоҳӣ медиҳад. Кумитаи марзбонӣ гуфт, ки танҳо шаҳрвандони Беларус ва мошинҳои борбар иҷозаи ворид шудан ба хоки Беларусро доранд. Рустамас Лиубайевас, раҳбари идораи марзбонии Литва гуфт, ки мошинҳои ба самти Беларус ҳаракаткунанда аз ҳақи вуруд маҳрум шуданд ва ба қавли ӯ, тағйирот дар марз бидуни огаҳии пешакӣ сурат гирифт.

Беларус марзашро бо ҳама ҳамсояҳо, ҷуз Русия, баст.

28-уми октябр, гузаргоҳи марзии Новая Хута бо Литва баста аст

Александр Лукашенко, ки баъди дуюним моҳ эътирозҳои мардумӣ алайҳи натиҷаҳои баҳсбарангези интихоботи президентӣ дар фикри хатми ин ҳама намоишҳову раҳпаймоиҳо аст, ахиран ба ҷуз Русия, марзҳои Беларусро бо дигар ҳамсояҳояш баст. Кумитаи марзбонии Беларус рӯзи 29-уми октябр гуфт, ки бастани марзҳо бо Латвия, Литва, Полша ва Украина ба “вазъи эпидемиологӣ” ва паҳншавии пандемияи коронавирус бастагӣ дорад. Ин изҳорот дар ҳоле нашр мешавад, ки мақомоти Беларус давоми моҳҳои зиёд хатари пандемияро кам нишон дода иддао кардаанд, ки кишварҳои ҳамсоя дар фикри бесубот кардани ин кишвар мебошанд. Таҳаввулоти ахир, аз ҷумла, ба мақомҳои калидӣ дар сохторҳои амниятӣ таъйин кардани афроди дигари наздик ба Лукашенко, бахусус дар шаҳри Минск, ки макони баргузории аксар эътирозҳои серҷамъияти мухолифон мебошад, дар бораи тақвияти тадбирҳои амниятӣ гувоҳӣ медиҳад. Кумитаи марзбонӣ гуфт, ки танҳо шаҳрвандони Беларус ва мошинҳои борбар иҷозаи ворид шудан ба хоки Беларусро доранд. Рустамас Лиубайевас, раҳбари идораи марзбонии Литва гуфт, ки мошинҳои ба самти Беларус ҳаракаткунанда аз ҳақи вуруд маҳрум шуданд ва ба қавли ӯ, тағйирот дар марз бидуни огаҳии пешакӣ сурат гирифт.

Рекорди нави олудашавиҳо дар ИМА

Дар ИМА дар остонаи интихоботи президентии 3-юми ноябр бо сабаби пандемияи коронавирус овоздиҳӣ чанд рӯз пеш шурӯъ шудааст. Мардум дар навбати овоздиҳӣ

Дар ИМА рекорди нави олудашавӣ ба коронавирус дар як рӯз ба қайд гирифта шудааст. Гурӯҳи муқобила бо COVID-19 дар Кохи Сафед баъди эълони ин ки дар 24 соати гузашта дар ИМА беш аз 91 ҳазор ҳодисаи нави олудашавӣ ба қайд гирифта шуд, гуфт, кишвар дар баробари хатари “эҳёи муҷаддади" вируси нав қарор дорад. Рекорди қаблии якрӯза, ки 23-юми октябр сабт шуда буд, 84,169 ҳодисаро ташкил дод. Аз замони шурӯи пандемия дар ИМА то ҳол 8,9 миллион сокини кишвар ба вируси нав олуда шуда, 228 ҳазор нафар ҷон додаанд. CNN бо такя ба гузоришҳое, ки ба ҳукумат мерасанд, гуфт, мақомоти муқобилакунанда бо COVID-19 ба раҳбарияти ИМА машварат доданд, ки бояд муқаррароти сахту сангини маҳдудкунанда ҷорӣ ва аз паҳншавии вирус ҷилавгирӣ шавад. Дар сӯҳбат бо Reuters як мақоми беҳдошт гуфтааст, ки “дар ИМА вазъият хеле ва хеле бад аст”.

Дар Аврупо, аз ҷумла Фаронса мақомот маҳдудиятҳоро сахттар карданд ва Олмон гуфт, ки аз 2-юми ноябр карантин ҷорӣ мекунад.

Дар Фаронса полис ба ҳолати омодабош оварда шудааст

29-уми октябр баъди ҳамла ба калисои "Нотрдам"-и шаҳри Нис, президент Эммануэл Макрон аз маҳалли ҳодиса дидан кард

Баъди куштори се нафар дар як калисои шаҳри Нис рӯзи 30-юми октябр ходимони амниятӣ дар Фаронса ба ҳолати омодабош оварда шудаанд. Президент Эммануэл Макрон ҳодисаи рӯзи 29-уми октябрро “як ҳамлаи террористи исломгаро” номид. Нахуствазири Фаронса Жан Кастекс ҳолати омодабош дар кишварро боло бурд ва ходимони полис атрофи калисои Нисро, ки рӯзе пеш мавриди ҳамла қарор гирифт, иҳота карданд. Вазорати хориҷаи Бразилия гуфт, ки яке аз қурбониҳо – модари 44-солаи се кӯдак буд ва дар Фаронса зиндагӣ мекард. Маълум нест, ки оё ӯ инчунин шаҳрвандии Фаронсаро дошт ё на. Ин зан, ки чанд зарбаи корд хӯрд, бо ҷароҳатҳои сангин тавонист ба наздиктарин бар фирор кунад, вале баъдан ҷон дод. Дар фоҷеае, ки тахминан ним соат давом кард, ҳамлагар ба зани бразилиягӣ чанд дафъа корд зада, як зани 60-солаи дигарро гардан бурид - ба қавли мақомоти Фаронса -"дар асл ӯро бесар кард". Қурбонии сеюм як корманди 55-солаи калисо буд, ки зоҳиран дар паи ҳамла бо корд ба ноҳияи гарданаш ҷон дод. Мақомоти Фаронса гуфтанд, ҳамлагар, ки аз ҷониби полис бо зарби тири туфанг кушта шуд, пеш аз маргаш “Аллоҳу Акбар” гуфтааст.

Паёмҳои мутафовити Доналд Трамп ва Ҷо Байден ба овоздиҳандагон

Пурсишҳои афкори умум маҳбубияти Байденро назар ба Трамп як каме болотар нишон медиҳанд

Президенти ИМА Доналд Трамп ва номзад аз ҳизби демократ Ҷо Байден дар маъракаҳои интихоботӣ, ки рӯзи 29-уми октябр дар Флорида доир шуд дар бораи пандемияи короновирус паёмҳои комилан мухолифи ҳам доданд. Ҳазорон нафар аз ҷонибдорони Доналд Трамп дар шаҳри Тампаи Флорида дар маъракаи тарғиботӣ, ки дар фазои бозе ташкил шуда буд, ҷамъ омаданд ва аксари онҳо ниқоб надоштанд. Чанд соат баъд Байден ҳам дар ин шаҳр маъракаи пешазинтихоботии худро доир кард, ки дар он одамон аз дохил ва ё назди дари мошинҳои худ истода ширкат карданд ва бастани ниқоб аз онҳо тақозо мешуд. Маъракаҳои ду номзад дар Флорида 5 рӯз қабл аз интихоботи президентӣ на танҳо ду усули мутавофити маъракаҳои тарғиботиро аён кард, балки муҳим будани аёлати Флоридаро низ ба намоиш гузошт, ки ҳарду номзад онро барои соҳиб шудан ба курсӣ дар Қасри сафед фавқулодда муҳим медонанд.

ВКД: "Як сокини Ваҳдат ду мошини борбарро дар ҳолати мастӣ оташ задааст"

Акс аз бойгонӣ.

Як сокини шаҳри Ваҳдат ба иттиҳоми ба оташ кашидани ду автомашинаи борбар боздошт шудааст. Дафтари матбуоти Вазорати умури дохилии Тоҷикистон рӯзи 30-юми октябр хабар дод, ки ҳодиса шаби гузашта дар ҷамоати деҳоти Раҷаб Исмоилов рух додааст.

Ба иттилои манбаъ, Ҳамроҳиддин Раҷабови 50-сола дар ҳолати мастӣ бинобар 9 моҳ напардохтани маблағи таваққуфгоҳи "Пахта", ду мошини борбари тамғаи "Дулан" ва "Мерседес"-и Илҳом Зеваровро ба оташ кашидааст. Манбаъ мегӯяд, ки ба ин ду мошини борбар зарари техникӣ расидааст.

Ҳамроҳиддин Раҷабов аз сӯи маъмурони пулис боздошт шуда ва ҳамакнун тафтишот идома дорад.

Назари Ҳамроҳиддин Раҷабов ва наздиконаш дар робита ба ин ҳодиса то ба ҳол маълум нест.

Қирғизистон аз Қазоқистон хост, кӯмаки моливу техникӣ расонад

Парчамҳои Қазоқистон ва Қирғизистон.

Вазири корҳои хориҷии Қирғизистон Руслан Казакбоев аз Қазоқистон дархост кард, ки вазорати тандурустии Қирғизистонро бо дору ва васоили муҳофизатӣ таъмин кунад.

Дар ин бора аз вазорати корҳои хориҷии Қирғизистон хабар доданд.

Руслан Казакбоев рӯзи 29 октябр бо ҳамтои қазоқи худ Мухтор Тлеубердӣ дар шаҳри Нурсултони Қазоқистон мулоқот кард. Ду вазир дар бораи ҳамкориҳои сиёсӣ, иқтисодиву тиҷорӣ, фарҳангиву башарӣ ва бахши муҳоҷират гуфтугӯ карданд. Вазирон ҳамчунин муборизаи муштарак зидди вабои коронавирусро баррасӣ карданд.

"Бо назардошти вазъи иҷтимоиву иқтисодии кишвар Руслан Казакбоев аз ҷониби Қазоқистон хост, ки ба Қирғизистон кӯмаки моливу техникӣ расонад", - омадааст дар хабари вазорати корҳои хориҷии Қирғизистон.

Дар Намангон парчами Фаронсаро аз назди як меҳмонхона канданд

Меҳмонхонаи "Grand Sherdor" дар Намангон.

Дар назди меҳмонсарои "Grand Sherdor"-и шаҳри Намангони Узбекистон дар эътироз ба изҳороти президент Эммануэл Макрон парчами Фаронсаро даронданд.

Фаъоли ҷамъиятии Намангон, ки дар ин бора дар шабакаи иҷтимоии Фейсбук хабар дод, навишт, "парчами Фаронса ба нишони эътироз канда шуд ва барои парчами ин кишвар дар шаҳри мо ҷой нест".

Ахиран дар шабакаҳои иҷтимоӣ видеое паҳн шуд, ки дар он марде бо номи Муҳаммад Икром аз шаҳри Намангон дар болои расми президенти Фаронса ва ҳамсараш рост истодааст.

Намояндагони вазоратҳои умури дохиливу хориҷии Узбекистон ва маъмурияти Намангон ин қазияро шарҳ надоданд.

Ин амалҳо дар ҳоле сурат мегирад, ки ҳудуди 10 рӯз қабл Самуэл Пати, устоди 47-солаи фанни таърих ва ҷуғрофия дар Фаронса, баъд аз намоиши карикатура ё тасвирҳои танзомези пайғомбар Муҳаммад ба шогирдонаш, дар канори шаҳри Порис кушта шуд. Мақомоти Фаронса рӯзи 17-уми октябр гуфтанд, ки ҳамлавар ҷавони 18-солаи чечен аз шаҳри Маскав аст ва ҳангоми амалиёт ба ҳалокат расид.

Ин масъала вокунишҳои ҷаҳониро дар пай дошт. Раиси ҷумҳури Фаронса дар Твиттер рӯзи 25-уми октябр навишт, "мо ҳаргиз таслим нахоҳем шуд. Мо суханони тавҳиномезро қабул надорем ва аз баҳси мантиқӣ дифоъ мекунем".

Изҳороти раиси ҷумҳури Фаронса дар шуморе аз кишварҳои исломӣ бо вокунишҳои тунд рӯбарӯ шуд. Покистон рӯзи 26-уми октябр аз "маъракаи исломситезӣ" дар Аврупо эътироз кард, Эрон Порисро ба рӯған андохтан ба оташи "экстремизм" муттаҳам намуд ва раиси ҷумҳури Туркия ба таҳрими маҳсулоти фаронсавӣ даъват кард.

Белорус марзҳояшро бо Латвия, Литва, Лаҳистон ва Украина баст

Марзи Белорус бо Литва.

Белорус бидуни огоҳии қаблӣ марзашро бо Латвия, Литва, Лаҳистон ва Украина баст.

Дар Кумитаи давлатии марзбонии Белорус баста шудани марзҳоро ба вабои коронавирус рабт доданд. Як рӯз пеш аз баста шудани марзҳо Александр Лукашенко гуфт, артиши Белорус омода аст, дар сурати ҳамла аз ин кишварҳо онро пас гардонад.

Расонаҳо менависанд, дар гузаргоҳҳо бо марзҳои кишварҳои зикршуда ҷамъшавии мошинҳо мушоҳида мешавад. Белорусиҳо шикоят доранд, ки наметавонанд, ба кишварашрон баргарданд. Айни замон танҳо ба мошинҳои дипломатӣ ва борбар иҷозаи вуруд дода мешавад. Ин ҳам дар ҳолест, ки фурудгоҳи шаҳри Минск бидуни маҳдудият фаъолият дорад.

Рӯзи панҷшанбе Александр Лукашенко аз суҳбаташ бо котиби давлатии ИМА Майк Помпео хабар дод. "Ман ӯро огоҳ кардам: агар аз ҷониби Лаҳистон, Литва ё Украина ҳамлае сурат гирад, мо посух хоҳем дод". Ҳамон рӯз Лукашенко дастур дод, ки ҳифзи марз бо ин се кишвар пурзур карда шавад.

Муҳиддин Кабирӣ карикатураҳо ва ҳамлаҳо дар Фаронсаро маҳкум кард

Муҳиддин Кабирӣ, раиси Паймони миллии Тоҷикистон дар Аврупо

Муҳиддин Кабирӣ, раиси Паймони миллии Тоҷикистон, як эътилофи созмонҳои мухолиф, ки фаъолияташ дар Тоҷикистон мамнуъст, рӯзи 29-уми октябр дар як паёми видеоӣ куштори омӯзгори фаронсавиро барои нишон додани карикатураҳои масхараомези зидди паёмбари ислом ҳангоми дарс дар мактаб, ҳамлаи рӯзи панҷшанбе ба калисои Нотр-Дами шаҳри Ниси Фаронса ва қатли се нафари дигарро дар ин ҷо маҳкум кард ва таҳқиру тавҳини арзишҳои диниро як амали ғайри қобили қабули номид. Вай густариши ҳамлаҳои лафзӣ ва хушунатҳои ахирро нишонаи ба ду даста тақсим шудани ҷаҳон дар робита ба карикатураҳо донист ва гуфт, “вақти он расидааст, ки марзҳои озодии баён ва таҳқири арзишҳои муқаддаси инсонҳо муайян карда шаванд.”

Кабирӣ афзуд, ки ӯ ва пайравонаш дар ҳизби ҳоло дар Тоҷикистон мамнуи наҳзати исломӣ ҳанӯз дар соли 2014 мунташир шудани карикатураҳои паёмбари исломро маҳкум карда буд. Вай гуфт, таҳқири муқаддасоти мазҳабӣ набояд озодии баён дониста шавад.

Рӯзи ҷумъаи 16-уми октябр Самюэл Патӣ, устоди 47-солаи таърих ва ҷуғрофия дар Фаронса, баъд аз намоиш додани карикатура ё тасвирҳои танзомези пайёмбар Муҳаммад ба шогирдонаш, дар канори шаҳри Порис кушта шуд. Мақомоти Фаронса рӯзи 17-уми октябр гуфтанд, ки ҳамлавар ҷавони 18-солаи чечен аз шаҳри Маскав аст ва ҳангоми амалиёти боздошт ба ҳалокат расидааст.

Президенти Фаронса Эммануэл Макрон омӯзгор Патиро "қаҳрамони сокит" ва куштори ӯро "ҳамлаи террористии исломӣ" номид. Вай сокинони кишварашро ба ҳифзи арзишҳои дунявӣ ва ҳимояти Фаронса аз "исломи ифротӣ" даъват кард. Ин изҳорот дар як қатор кишварҳои мусулмон вокунишҳоеро ба миён овард ва сабаби ҳамлаи лафзии президенти Туркия ба Макрон шуд.

23-юми октябр карикатураҳои чанд сол пеш нашркардаи маҷаллаи “Шарли Ҳебдо” дар бинои ҳукумати Фаронса намоиш дода шуданд ва ин ҳодиса мояи хашми ҷаҳони ислом шуд. Дар посух ба пуштибонии Макрон аз карикатураҳо, молу маҳсулоти сохти Фаронса дар бархе аз кишварҳои мусалмоннишини ҷаҳони Араб таҳрим шуданд. Макрон посух дод, ки “Фаронса ҳеҷ гоҳ аз ин карикатураҳо даст намекашад”.

Сайидмукаррам Абдулқодирзода, раиси Шӯрои уламои Тоҷикистон низ гуфт, ки куштори омӯзгори фаронсавӣ аз ҷониби як ҷавони 18-солаи мусулмон қобили қабул нест, вале ҳамзамон рафтори омӯзгор, ки ба шогирдон аксҳои тавҳиномези паёмбари исломро нишон дод, маҳкум мекунад.

Вай афзуд: “Як инсон ҳам ҳақ надорад, ки пешвои тақрибан ду миллиард инсонро, ки паёмбарашонро аз падару модар, ҳатто аз ҷонашон зиёдтар дӯст медоранд, дашному тавҳину таҳқир ва масхара кунад. Ин кор оқибати баде дорад, чӣ ҳоло ва чӣ дар ояндаи наздик, чӣ дар гузаштаҳо”.

Бо гузашти ду ҳафта аз қатли омӯзгори фаронсавӣ баҳси ин мавзӯъ кам нашудааст. Дар пайи ҳамлаҳои лафзӣ, муносибати Туркия ва Фаронса, ду ҳампаймони созмони низомии НАТО ба сардӣ гароид.

Ёфтҳои бештар

XS
SM
MD
LG