"Мо зиндагӣ намекунем, балки ҷон меканем" ВИДЕО

январ 11, 2024

Тоҳири Сафар

Рӯзи 9-уми январ раиси ҷумҳур Эмомалӣ Раҳмон фармонеро имзо кард, ки бар асоси он музди кормандони идораҳои давлатӣ, аз ҷумла муаллимону милисаҳо дар давоми сол аз 30 то 40 дар сад зиёд карда мешавад.

Ҳамин масъала ва як пурсиши сарироҳии Радиои Озодӣ дар бораи музди кор дар ҳафтаи гузашта баҳси зиёде барангехт. Суол ҳам ин буд, ки дар Тоҷикистон чанд сомонӣ барои зиндагии шоиста кофист?

Маҳз дар ҳамин бора дар саҳифаҳои Радиои Озодӣ дар Ютубу Инстаграму Фейсбук бештар аз 1000 посухи дигар меёбед ва баъзе аз шарҳҳои ҷолибро ҳамроҳ мехонему мебинем. Аз Фейсбук аз шарҳи корбаре бо номи Парвина шуруъ мекунем, ки ба фарзандони мардум дарс медиҳад:

"Ман муаллима. Танҳоям. Иҷоранишин ҳастам. Дар умум 2800 сомонӣ маош мегирам. Намерасад. Иҷорапулӣ - 1500 сомонӣ. Ба ғайр аз ин, пули партов, об, барқ. Дар охири моҳ бепул мемонам. Либос, ягон лавозимоти дигар як тараф истад, ба хӯрданам намерасад. Ба гуфти русҳо, мо зиндагӣ намекунем, балки ҷон меканем. Ҷон канда меҳнат мекунем, пул барои зиндагӣ кофӣ нест."

Як корбари дигаре, ки худро дар Фейсбук Абдуфаттоҳ Шарипов муаррифӣ кардааст, зоҳиран бо киноя аз ҳукумати Тоҷикистон хостааст, музди корро боло набарад, зеро бар зиёни мардум мешавад. Шарҳаш чунин аст:

"Илтимос, ягон дирам зиёд накунед. Хоҳиш мекунам. Ҷаноби олӣ нав дар бораи зиёд кардани маош аз моҳи июл эълон кард, аллакай аз якуми январ нархҳо боло рафтанд. Як кило картошка аз 4,5 сомонӣ то ба 5,5 сомонӣ расид. Агар маошро 5000 сомонӣ кунанд, пас, 10 000 сомонӣ барои зиндагӣ камӣ мекунад. Илтимос, зиёд накунед."

Фарангис Фаттоева ном корбаре дар саҳифаи Радиои Озодӣ дар Инстаграм навиштааст, агар музди кори мардум дар Тоҷикистон басанда мебуд, магар ҳама муҳоҷир мешуданд. Дар тақвияти ин гуфта корбаре бо номи Моҳира чунин шарҳеро дар саҳифаи мо гузоштааст:

"Дар театр кор мекардам, ба ҳайси ҳунарпеша бо дипломи дараҷаи олӣ, маош 1300 сомонӣ буд. 400 сомонӣ пули барқ месупурдам, 700 сомонӣ пули иҷора. Як моҳи дароз қарздор, шиками кӯдакам гурусна. Тарки ватан кардам, ба муҳоҷирӣ омадам."

Баъзе аз корбарон ҳисоб кардаанд, ки дар Тоҷикистон чӣ қадар маош бигирӣ ё даромади моҳона дошта бошӣ, ки зиндагӣ дуруст гузарад. Яке аз онҳо Беҳрӯз Саидзода аст, ки дар саҳифаи Радиои Озодӣ дар Фейсбук чунин навиштааст:

"Агар танҳо бошӣ ва дар хонаи худат, шояд 1000 сомонӣ расонад. Барои як оилаи иборат аз 4 нафар кам андар кам 3000 сомонӣ лозим аст, агар иҷоранишин набошӣ. Дар умум, агар маоши миёна 5000 сомонӣ танҳо даромади марди як оила бошад, ин аллакай дигаргунӣ ва зиндагӣ серупур мешавад. Дар шароити ҳозира бори зиндагиро бардоштан бисёр душвор аст."

Корбари дигаре дар Инстаграм гуфтааст, ду кӯдак дорад ва шавҳараш 4000 сомонӣ мегирад, вале то охири моҳ бепул мемонанд. Дилнозахон гуфтааст, шабу рӯз зарф мешӯяд ва рӯзона аз 50 то 60 сомонӣ мегирад, ки ба ҳеч чиз намерасад. Шарҳи Таҳмина Орифова дар Фейсбук ҳам ҷолиб аст:

"Одамонеро, ки мегӯянд 1000 сомонӣ ё 2000 сомонӣ ба зиндагӣ мерасад, ягон хел намефаҳмам. Бовар кунед, дар Русия кор мекунам, 45 ҳазор - 50 ҳазор рубли русӣ мефиристам, лекин то ҳол қарздорам, на мошин харида метавонам, не хона сохта метавонам. Оиладор, соҳиби 4 фарзанд, бо падару модар."

Дар ин миён як корбаре, бо номи Абубакр музди камро дар Тоҷикистон сабаби авҷ гирифтани ришвахорӣ ва нарасидани пул барои зиндагӣ номида ва дар саҳифаи Радиои Озодӣ дар Инстаграм чунин навиштааст:

"Ба Худо, тамоман намерасад, 1000-2000 сомонӣ чӣ мешавад? Ба сабаби кам будани музд милиса ҳам ришвахор аст. Дар шифохона ё ҳар куҷое меравед, фақат сум мегӯянд. Сум надорӣ, одам нестӣ. Барои ҳамин, одамон бо фанду фиреб рӯз мебаранд. Дигар чӣ кор мекунӣ?"

Ва Толиб Хуросонӣ ном корбаре дар ҷумлаи бештар аз 600 шарҳи корбарони саҳифаи Радиои Озодӣ дар Инстаграм навиштааст, то вақте ки дар Тоҷикистон фасод аз байн наравад, агар 10 ҳазор сомонӣ маош ҳам бигиред, ба зиндагӣ намерасад.

Толиб дуруст мегӯяд, ё не? Чӣ қадар маош барои зиндагии шоиста дар Тоҷикистон кофист? Посух ва ё шарҳатонро нависед, то дигарон ҳам бидонанд.

Барномаро дар инҷо бинед: