Бозии даври дувуми мусобиқот дар гурӯҳи “I” миёни дастаҳои мунтахаби олимпии Тоҷикистону Лаос шаби шанбеи 9-уми сентябр дар Варзишгоҳи марказии Душанбе баргузор шуд.
Нимаи аввали дидор бидуни гол хотима ёфт. Дар нимаи дувуми бозӣ, дар дақиқаи 54-ум, меҳмонон ҳисобро кушоданд. Дамотх Тхонгкхамсаватх ба ҷаримагоҳи мизбонон дохил шуда, ҳимоятгарону дарвозабони мунтахаби Тоҷикистон Муҳриддин Ҳасановро фиреб дод ва тӯбро ба ҳадаф расонд.
Дар охири бозӣ, дар муддати чаҳор дақиқаи замони изофа, ба футболбозони ҷавони тоҷик муяссар шуд, ки ду гол зада, бозиро ба нафъи худ анҷом диҳанд. Содиқҷон Қурбонов дар дақиқаи 90+1 тӯбро бо зарбаи сар ба дарвоза зада, ҳисобро баробар кард. Руслан Хайлоев дар дақиқаи 90+4 аз масофаи наздик голи дувум ва ҳалкунандаро ба самар расонд.
Дар бозии даври аввали марҳалаи интихобии Ҷоми Осиё-2024 (U-23) дар гурӯҳи «I» 6-уми сентябр мунтахаби олимпии Австралия дастаи Лаосро бо ҳисоби бузурги 7:1 шикаст дода буд.
Ҳамин тариқ, дастаҳои Австралия ва Тоҷикистон сеимтиёзӣ гирифтаанд. Дар ҷадвали гурӯҳ Австралия бо назардошти таносуби хубтари тӯбҳо дар ҷойи аввал ва Тоҷикистон дар ҷойи дувум қарор доранд.
Дар даври севум ва ниҳоии мусобиқот, ки рӯзи сешанбеи 12-уми сентябр доир мегардад, футболбозони ҷавони Австралия ва Тоҷикистон барои ғолибият дар гурӯҳи “I” бо ҳам рақобат мекунанд. Бозӣ дар Варзишгоҳи марказии ҷумҳуриявӣ соати 20:30 шуруъ мешавад. Дар ин бозии ҳалкунанда футболбозони ҷавони австралиягиро барои гирифтани ҷойи аввал дар гурӯҳ натиҷаи мусовӣ қаноатманд мекунад.
Вале дастаи мунтахаби олимпии Лаос, ки дар ҳарду бозиаш шикаст хӯрд, аз ҳаққи идомаи мубориза барои роҳхат ба марҳалаи ниҳоии Ҷоми Осиё-2024 (U-23) маҳрум гашт.
Бояд тазаккур дод, аз рӯи натиҷагирии марҳалаи интихобии Ҷоми Осиё-2024 (U-23) ғолибони 11 гурӯҳ, инчунин чаҳор дастаи ҷойҳои дувуми гурӯҳҳо бо нишондодҳои хубтар ба қисми ниҳоии мусобиқот, ки аз 15-уми апрел то 3-юми майи соли оянда дар Қатар баргузор мешавад, роҳ меёбанд.
Марҳалаи интихобии Ҷоми Осиё-2024 (U-23)
Гурӯҳи «I»
Даври 1-ум
Лаос – Австралия – 1:7
6-уми сентябр. Душанбе. Варзишгоҳи марказии ҷумҳуриявӣ
Даври 2-юм
Тоҷикистон – Лаос – 2:1
Голҳо: Дамотх Тхонгкхамсаватх, 54 (0:1). Содиқҷон Қурбонов, 90+1 (1:1). Руслан Хайлоев, 90+4 (2:1).
Беҳтарин бозигари дидор: Руслан Хайлоев (Тоҷикистон).
9-уми сентябр. Душанбе. Варзишгоҳи марказии ҷумҳуриявӣ. 5200 тамошогар.
Даври 3-юм
12-уми сентябр (сешанбе)
Оғози бозӣ – соати 20:30
Тоҷикистон – Австралия
Душанбе. Варзишгоҳи марказии ҷумҳуриявӣ
