Вазорати дифои Беларус аз вуруди зархаридори гуруҳи «Вагнер» ба вилояти Могилёв хабар додааст. Вазорат рӯзи 14-уми июл дар канали худ дар Телеграм гуфт, ки онҳо ба сарбозони кишвар муҳофизати қаламрав, ҳаракат дар майдони ҷанг, тирандозӣ ва муолиҷа дар саҳнаи набардро ёд медиҳанд.
Ҳоло маълум нест, чанд нафар аз зархаридони «Вагнер» дар вилояти Могилёв қарор доранд, вале як созмони мустақили нозир гуфтааст, ки дар умум 200 зархариди гуруҳи Вагнер ба Ҷумҳурии Беларус омадаанд. Бахши беларусии Радиои Озодӣ бо таҳлили аксҳои моҳвораӣ гуфтааст, ки дар шаҳри Осиповичи вилояти Могилёв дар маҳалли як қисми низомии раҳошуда 300 хаймае ҳисоб карданд, ки дар ҳар кадоме аз 20 то 50 нафар ҷой мегиранд.
Зархаридони «Вагнер» баъди ошӯби нофарҷом дар Русия таҳти раҳбарии Евгений Пригожин дар рӯзи 24-уми июн ба Беларус рафтанд. Онҳо баъди ишғоли шаҳри Ростови лаби Дон, ба самти Маскав ҳаракат карданд, вале бо миёнҷигарии Александр Лукашенко, раиси ҷумҳури Беларус аз роҳашон баргаштанд ва ба Беларус рафтанд.
