Ояндаи Украина дар НАТО аст, аммо созмон ба Киев танҳо дар он сурат даъватнома ирсол мекунад, ки ҳамаи кишварҳои узв розӣ шаванд ва Украина ҳамаи шартҳоро иҷро кунад.
Дар ин бора дабири кулли НАТО Йенс Столтенберг дар нишасти хабарӣ дар Вилнюс изҳори назар кард. Дар Вилнюс рӯзҳои 11-12 июл саммити НАТО баргузор мешавад.
Рӯзи сешанбе, дар нахустин рӯзи саммити Вилнюс оқои Столтенберг гуфт, ки Украина ба узвияти НАТО наздик шудааст. Вай илова кард, ки ҳоло Украина таҷҳизоти ҳарбии зиёд ва низомиёни тамриндида дорад.
Ҳамзамон Столтенберг гуфт, муҳимтарин нукта ҳоло - таъмини пирӯзии Украина дар ҷанг аст, то замоне, ки пирӯз нашавад "дар бораи шомилшавии вай ба НАТО ҳарфе зада нахоҳад шуд".
