Академияи миллии улуми Тоҷикистон саъба яке аз паррандаҳои хушхони кишварро паррандаи сол эълон кардааст.
Хабаргузории давлатии "Ховар" рӯзи 25-уми декабр бо такя ба гуфтаҳои Абдусаттор Саидов, доктори илмҳои биология навиштааст, ки имсол 50 нафар аз дӯстдорони табиат ва донишмандон аз байни 8 навъи паррандагон, аз ҷумла дурроҷи сиёҳ, бедона ва чарғи думдароз саъбаро “паррандаи сол” баргузиданд. Соли 2021 шоҳуқоб паррандаи сол буд.
Саъба бо бадани 12 сантиметрӣ, болу думи сиёҳ дорад ва яке аз паррандаҳои хушхон аст, ки мардум дар хонаҳо дар қафас нигаҳ медоранд. Абдусаттор Саидов гуфтааст, ҳарчанд саъба ба «Китоби Сурхи Тоҷикистон» дохил нашудааст, вале шикори зиёди он барои дар хона нигаҳ доштан, метавонад, теъдоди онҳоро дар Тоҷикистон кам кунад. Дар Тоҷикистон саъба дар дарахту буттазорҳои доманакуҳҳо сукунат дорад.
