Дар ИМА дар паи барфу тундбодҳои шадид рӯзи 23-юми декабр 5700 парвози ҳавопаймо қатъ шуд ва даҳҳо ҳазор мусофир дар нимароҳ монданд. Пеш аз ин рӯзи панҷшанбе ҳам бо ҳамин сабаб парвози 2700 ҳавопаймо бекор шуд. Рӯзи шанбе, 24-уми декабр шумори парвозҳои бекоршуда ба беш аз як ҳазор адад расид. Дар ин бора вебсайти FlightAware хабар додааст.
Баробар бо парвозҳо, ҳаракати даҳҳо қатор тавассути ширкати роҳи оҳани Amtrak ҳам бекор шуд ва ба барномаҳои таҷлили иди Милоди Масеҳи сокинон халал ворид кард. Дар Индиана, Мичиган, Ню Йорк ва Оҳайо бо сабаби бориши зиёди барф шоҳроҳҳои зиёд масдуд шудаанд.
