Додгоҳе дар Маскав муҳлати ҳабси пешакии Владимир Кара-Мурзаро дароз кардааст. Ин фаъоли мухолифин ба паҳн кардани гуё маълумоти бардурӯғ дар бораи артиши Русия муттаҳам аст.
Додгоҳи ноҳияи Басманний рӯзи 8-уми июн гуфтааст, мунтақиди 40-солаи Кремлин дастикам то 12-уми августи имсол дар боздоштгоҳ хоҳад монд.
Кара-Мурза иттиҳомро рад карда, онро ангезаи сиёсӣ хондааст.
Ӯро рӯзи 11-уми апрели имсол дар назди хонааш дар Маскав дастгир карданд.
Владимир Кара-Мурза яке аз шарикони наздики пешвои кушташудаи мухолифин Борис Немтсов аст. Вай ду дафъа – солҳои 2015 ва 2017 – бо нишонаҳои заҳролудшавӣ бистарӣ шудааст.
Боздошти Кара-Мурза дар пасманзари саркӯби афзояндаи мақомоти Русия алайҳи чеҳраҳои мухолиф ва ҳар гуна эътироз ба ҷанг дар Украина сурат гирифт. Русия 24-уми феврали имсол бедалел ба Украина ҳамла кард.