Пайвандҳои дастрасӣ

Хабари нав

Дар чанд ҷумла

Узбекистон ба коркарди 8 кони нави уран омодагӣ мебинад

Тошканд, 19-уми майи 2022

Узбекистон тасмим дорад, дар солҳои 2022-2026 дар доираи барномаи махсуси ҷустуҷӯи геологӣ коркарди 8 кони нави уранро ба роҳ монад.

Дар ин бора президенти Узбекистон Шавкат Мирзиёев 19-уми май дар ҷараёни муаррифии лоиҳаҳое хабар додааст, ки ба рушди минбаъдаи бахши геологӣ ва афзоиши захираи канданиҳои фоиданок дар он кишвар равона шудаанд.

Хадамоти матбуотии президенти Узбекистон иттилоъ додааст, ки давоми солҳои ахир дар он кишвар 27 кони нав ошкор гашта, заминаи устувори ашёи хом фароҳам оварда шудааст.

Мансабдорони узбек дар ҷараёни муаррифии лоиҳаҳо гуфтаанд, мехоҳанд, истихроҷи канданиҳои фоиданок, аз ҷумла металлҳои нодирро афзоиш диҳанд.

Ҳамаи хабарҳои имрӯзро дар инҷо бихонед

Байден тарҳи ҷанҷолиро дар мавриди силоҳ қабул кард

Ҷо Байден

Ҷо Байден, раисиҷумҳури Амрико, рӯзи 25-уми июн ба тарҳи ҷанҷолии манъи истифода аз аслиҳа дар хушунатҳо имзо гузошт.

Ин лоиҳа солҳо боз мавриди баҳс қарор дошт, вале дар мавриди он тавофуқи ҳамаҷониба ҳосил нашуда буд.

Созиши Ҳизби Демократ ва Ҳизби Ҷумҳурихоҳ дар бораи лоиҳа пеш аз тирандозиҳои ахир, аз ҷумла қатли 19 хонанда ва ду муаллим дар як мактаби Техас, низ ғайри қобили тасаввур ба назар мерасид.

Байден бо ишора ба мулоқот бо оилаи қурбониёни ин тирандозиҳо гуфт, "паёми онҳо ин буд, ки як кореро анҷом диҳед ва мо имрӯз ин корро кардем."

Маҷлиси Намояндагони Амрико лоиҳаро рӯзи 24-уми июн қабул кард.

Ҳодисаи Ослоро ҳамлаи эҳтимолии "террористони исломӣ" меноманд

Осло

Дар Норвегия маросими ёдбуди қурбониёни тирпаронии 25-уми июн дар Осло баргузор хоҳад шуд.

Бар асари ҳамла ба се маҳал, аз ҷумла як клуби ҳамҷинсгароён, 2 нафар кушта ва 21 кас маҷруҳ шуданд.

Мақомоти Норвегия ин рӯйдодро ҳамлаи эҳтимолии "террористони исломӣ" меноманд.

Ба гузориши расонаҳои давлатии Норвегия, намояндаи калисои Осло, Кристин Гунлейксруд Раум, гуфтааст, "ин ҳодиса ҷомеаи моро ба ларза овард."

Тирпарронӣ сабаб шуд, ки пулис ҳамоиши ҳамҷинсгароёнро, ки қарор буд, дар Осло баргузор шавад, бекор кард.

Гумонбарро пас аз чанд лаҳзаи ҳодиса дастгир кардаанд. Аз ӯ як марди 42-солаи норвежии эрониасл ном бурда мешавад.

Ҳамлаи мушакии Русия ба пойтахти Украина

Киев, 26-уми июни 2022

Бар асари ҳамлаҳои мушакии Русия ба маҳалли аҳолинишин дар пойтахти Украина ба камияш ду бино вайрон шуда, баъзе аз сокинон дар зери харобаҳо мондаанд. Дар як бинои нӯҳошёна сӯхтор сар зад. Ҳодиса субҳи 26-уми июн рӯй дод.

Виталий Кличко, шаҳрдори Киев, ба маҳалли ҳодиса рафт. Он дар яке аз минтақаҳои таърихии пойтахти Украина ҷойгир аст.

Кличко гуфт, баъзе аз сокинон дар бемористон ҳастанд, иддае дигар дар зери харобаҳо мондаанд. Вай амалкарди Русияро кӯшиши "тарсондан"-и украиниҳо дар остонаи нишасти сарони НАТО донист. Онҳо 28-30-юми июн ҷаласа доранд. Яке аз мавзуъҳои мавриди баҳс идомаи ёрӣ ба Украина хоҳад буд.

Як рӯз пеш, нерӯҳои Украина гуфтанд, аз шаҳри Северодонетск берун рафтаанд ва онро "тактикае" номиданд, ки ҷараёни муборизаро дар шарқи Украина тағйир медиҳад.

Президент Владимир Зеленский дар паёме ваъда дод, Украина дар ниҳоят шаҳрҳоеро, ки аз оғози ҳамлаи Русия дар рӯзи 24-уми феврали имсол аз даст додааст, бозпас хоҳад гирифт.

Дар ҳамин ҳол, нигарониҳо аз густариши ҷанг дар Украина бештар шудааст. Мақомоти Украина аз сар додани мушакҳое аз қаламрави Беларус хабар доданд. Маскав ҳам гуфтааст, Беларусро бо системаи пешрафтаи мушакӣ таъмин хоҳад кард.

Низомиёни Украина дар ҷанг дар як шаҳри муҳим "ақибнишинӣ" кардаанд

Низомиёни Украина дар шаҳри Северодонетск. Акс аз 20-уми июни 2022

Низомиёни украинӣ шаҳри Северодонетскро дар вилояти Луҳанск, ки ҳафтаҳо боз майдони даргирии сахт буд, пурра тарк кардаанд. Дар ин бора Александр Стрюк, шаҳрдори Северодонетск, хабар дод.

Вазорати мудофиаи Украина хабарро расман тасдиқ ё рад накардааст. Вазорати мудофиаи Русия низ ҳанӯз аз тасарруфи шаҳр хабар надод, вале Рамазон Қодиров, раҳбари Чеченистон, эълон кард, ки "шаҳр зери назорати низомиёни рус аст".

Қисми зиёди вилояти Луҳанскро солҳо боз ҷудоиталабони рӯ ба Русия ба даст доштанд. Северодонетск дар ихтиёри Украина буд.

Пештар Сергей Ҳайдай, волии низомии Луҳанск, гуфта буд, ки низомиён барои он берун шудаанд, ки дар ҷои беҳтаре муқобили низомиёни рус сангар бигиранд.

Рӯзи шанбе дар бораи задухӯрд дар Лисичанск хабар нашр шуд, ки охирин шаҳри зери назорати Украина дар вилояти Луҳанск аст.

Вазорати мудофиаи Русия хабар дод, ки ин шаҳр аз ҷануб баста шудааст. Ҷониби Украина гуфт, ҳамлаи низомиёни русро пас гардондаанд ва шаҳр дар муҳосира нест.

Дар задухӯрдҳо дар Северодонетск ва Лисичанск хонаҳои зиёде вайрон шудааст. Теъдоди ҳалокшудагон дар миёни сокинони маҳаллӣ маълум нест.

Русия рӯзи 24-уми феврал бебаҳона ба Украина ҳамла кард ва то кунун ҷанг дар ин кишвар давом дорад. Ҳазорон нафар дар ин ҷанг кушта ва миллионҳо нафар беҷову овора шудаанд.

Чор рӯз пеш аз ҷанг Путин ва Макрон чӣ гуфтанд?

Путин ва Макрон

Рӯзноманигорони фаронсавӣ мӯҳтавои суҳбати президенти Русия ва Фаронсаро дар рӯзи 20-уми феврал, чор рӯз пеш аз ҳамла ба Украина, ошкор карданд.

Дар филми ҳуҷҷатии "Президент, Аврупо ва ҷанг", ки канали телевизионии France 2 намоиш дод, нӯҳ дақиқа суҳбати Владимир Путин ва Эммануел Макрон пахш шуд.

Суҳбати Макрон бо Путин субҳи 20-уми феврал дар пасманзари якбора бад шудани вазъ дар марзи Украина сурат гирифт. Он вақт теъдоди нерӯҳои русӣ якбора дар Донбас афзоиш ёфта буданд.

"Ман мехоҳам, ки шумо аввал ба ман назари худро дар бораи вазъият бигӯед ва шояд рӯирост, вақте ки мо як ба як суҳбат мекунем, бигӯед, ки ниятҳои шумо чист.",--бо ин суханон Макрон суҳбатро оғоз кард.

"Ман чӣ гуфта метавонам? Худатон бубинед, ки чӣ рӯй дода истодааст", - ҷавоб дод Путин ва баъд аз он раисиҷумҳури Украина Владимир Зеленскийро дар дурӯғгӯӣ ва худи Макронро дар он муттаҳам кард, ки мехоҳад созишномаҳои Минскро дар бораи Донбасс бознигарӣ кунад. Макрон бо ин шарҳ розӣ набуд, ки боиси баҳс гардид. Ба шикояти Путин, ки пешниҳодҳои ҷудоихоҳон "шунида намешаванд" Макрон мегӯяд, ки "мо пешниҳоди ҷудоихонро ҷиддӣ намегирем, чун онҳо бахше аз созишномаи Минск нестанд."

Дар ин суҳбат Путин ба пешниҳоди Макрон барои суҳбат бо Ҷо Байден, президенти ИМА розӣ мешавад, вале мегӯяд, ки ҳоло набояд рӯзи вохуриро эълон кард.

Суҳбати Путин бо чунин гап тамом мешавад: "Аз шумо пинҳон намекунам, ки ҳоло мехоҳам ҳоккей бозӣ кунам. Ҳоло бо шумо аз толори варзишӣ суҳбат дорам."

Дар хабарномаҳои Кремл дар бораи эҳтимоли суҳбат бо Ҷо Байден чизе гуфта нашудааст.

Як рӯз пас аз ин суҳбат Русия Луҳанск ва Донбас, ду минтақаи ҷудоиталабро ба расмият шинохт.

Макрон пас аз оғози ҷанг низ борҳо бо Путин суҳбати телефонӣ дошт. Ӯ гуфта буд, ки аз суҳбат бо Путин хушҳол намешавад, вале барои сулҳ бояд роҳ биҷӯяд.

Мақомоти Русия мегуфтанд, ки нияти ҳамла ба Украинаро надоранд, вале рӯзи 24-уми феврал низомиёни рус вориди ин кишвар шуданд.

Дар ҳамла ба клуби ҳамҷинсгароён дар Осло ду нафар кшута шудааст

Чандин нафар низ дар ин ҳамла захмӣ гардидааст.

Дар Осло, пойтахти Норвегия, дар ҳамлае ба клуби ҳамҷинсгароён шаби 25-уми июн ду нафар кушта ва даҳ нафар захмӣ гаштааст.

Пулис ин ҳодисаро ҳамчун ҳамлаи террористӣ таҳқиқ мекунад. Ҳамлагар чанд дақиқа пас аз ҳодиса боздошт шуд. Пулис номи боздоштшударо ошкор накардааст, вале гуфтааст, ӯ аз қабл дар рӯйхати афроди шубҳанок ҷой дошт.

Ҳадафи ҳамла ҳанӯз мушаххас нест. Ба гуфтаи мақомот, ҳамлагар танҳо амал кардааст ва касе ҳамроҳи ӯ набуд.

Пас аз ин ҳамла пулис ҳамоиши ҳамҷинсгароён, ки қарор буд, дар Осло баргузор шавад, манъ кард.

Писари сарвазири собиқи Доғистон барои қатли як донишҷӯ 13 сол равонаи зиндон шуд

Томирис Бойсофӣ донишҷӯ буд.

Як додгоҳ дар Маскав Муртузалӣ Маҷидов, писари сарвазири собиқи Доғистонро барои қатли Томирис Бойсофӣ, як донишҷӯи Донишгоҳи Маскав ба 13 соли зиндон маҳкум кард.

Ба навиштаи хабаргузории "Москва", Томирис Бойсофӣ моҳи апрели соли 2018 дар зери хобгоҳи донишҷӯён беҳуш пайдо шуд. Баъдан, аз зарбҳое, ки ба ӯ расида буд, дар беморхона ҷон дод. Тафтишот маълум кард, ки ӯро Маҷидов латтукӯб кардааст.

Дар оғоз нисбат ба Маҷидов барои "ба худкушӣ овардан" парванда боз карданд, вале баъдан ӯро бо ҷурми куштор ба ҷавобгарӣ кашиданд.

Падари муттаҳам дар қатли донишҷӯ Мухтор Маҷидов моҳҳои январ-июли соли 2013 раҳбари ҳукумати Доғистон буд. То он замон ӯ дар вазифаҳои сарвазир ва вакили маҷлиси Доғистон кор мекард. Худи ӯро соли 2020 барои аз худ кардани моликияти Вазорати мудофиаи Русия боздошт карданд ва ҳоло нисбаташ тафтиш давом дорад.

Номи беш аз 4000 низомии кушташудаи Русия дар Украина ошкор шуд

Танкҳои харобшудаи Русия дар Украина.

Хабарнигорони Би-би-си мегӯянд, исми 4010 низомии Русияро ошкор кардаанд, ки дар ҷанги Украина кушта шудаанд.

Дар ин рӯйхат исми шаҳрвандоне низ ҳаст, ки ихтиёран барои ҷанг ба Украина рафтанд.

Ба гуфтаи журналистон, шаҳрвандоне, ки то замони ҷанг низомӣ набуданд, вале ихтиёран пас аз оғози ҷанг ба Украина рафтаанд, бештар кушта шудаанд.

Ҳар ҳафта аз кушта шудани 30 то 40 нафар аз чунин ихтиёриён хабар мерасад, ки 20 дарсадашон аз 50 сола боло ҳастанд.

17 дар сад дар миёни кушташудаҳо афсарон будаанд. Дар ин рӯйхати Би-би-си исми 42 халабони низомии кушташудаи русро низ овардааст.

Мақомоти рус охирон бор моҳи март гуфта буданд, ки 1351 низомиашон дар ҷанги Украина кушта шудааст. То кунун расман дар бораи талафот чизе намегӯянд.

Русия охири моҳи феврал ба Украина ҳуҷум кард ва ҷанг то кунун идома дорад.

Профессор Аҳмад Абдуллоев даргузашт

Аҳмад Абдуллоев дар овони ҷанги дохилии Тоҷикистон ба зодгоҳаш дар Узбекистон кӯчид

Профессор Аҳмад Абдуллоев, муҳаққиқи адабиёти форсу тоҷик, дар 86-солагӣ дар Узбекистон даргузашт. Дар ин бора рӯзноманигор Мирасрори Фарғонӣ рӯзи 24-уми июн дар саҳифааш дар "Фейсбук" хабар дод.

Абдуллоев солҳои 1980 бо мақолаҳои ҷасуронааш дар нашрияи "Маориф ва маданият"-и зери раҳбарии Бӯринисо Бердиева дар Тоҷикистон шуҳрат дошт. Ҳадаф аз онҳо бедории миллӣ, арҷгузорӣ ба таърих, забон ва фарҳанги миллии тоҷикон буд.

Ӯ бо сар задани ҷанги шаҳрвандии 1992-97 аз Тоҷикистон ба зодгоҳаш дар вилояти Сурхондарёи Узбекистон рафт ва солҳои охири умрашро дар онҷо гузаронд.

Бахши суханшиносӣ ё филологияи тоҷикро дар Донишгоҳи давлатии Тирмиз асос гузоштааст. Асари "Абуабдуллоҳи Рӯдакӣ"-ро соли 2013, дар авҷи сардии равобити Тоҷикистону Узбекистон, бо забони тоҷикӣ дар Тошканд нашр кард.

Донишкадаи омӯзгории Душанберо хатм карда, дар Академияи илмҳо ва Пажӯҳишгоҳи забон ва адабиёти ба номи Рӯдакӣ кор кардааст.

Бино ба маълумоти "Википедияи тоҷикӣ", асосан ба адабиёти қарнҳои 11-12 ва намояндагони он – Адиб Собири Тирмизӣ, Заҳири Форёбӣ, Унсурӣ, Фаррухӣ, Манучеҳрӣ ва дигарон – таваҷҷуҳ дошт. "Девони Адиб Собири Тирмизиро соли 2001 омода ва нашр кард," – омадааст дар "Википедия".

Фарзанди ӯ, доктори илм Масрури Абдуллоҳ, солҳои охир дар дастгоҳи раёсатҷумҳурии Тоҷикистон адои вазифа мекунад. Пештар дар созмони "Интернюс" ва Донишгоҳи славянии Тоҷикстону Русия фаъолият дошт.

Президенти пешини Туркманистонро ба додгоҳ кашиданд

Қурбонгулӣ Бердимуҳаммадов, президенти пешини Туркманистон.

Шаҳрвандони Туркманистон, ки дар Туркия паноҳанда ҳастанд, президенти пешини худ Қурбонгулӣ Бердимуҳаммадов ва як қатор мансабдоронро ба додгоҳ кашидаанд.

Онҳо президенти пешини Туркманистон ва мансабдрони кишвари худро ба нақзи ошкорои ҳуқуқи инсон айбдор кардаанд.

Вакили дифои паноҳандаҳои туркман Гюлден Сонмез бо нашри як видео дар Интернет хабар дод, ки зидди Бердимуҳаммадов, вазири умури хориҷии Туркманистон Рашид Мередов ва вазири умури дохилии он кишвар Муҳаммад Хидиров 21 июн ба додгоҳи шаҳри Истамбули Туркия расман шикоят карда шудааст.

Ба гуфтаи вакили дифоъ, президенти пешин ва мансабдорони баландпояи Туркманистон ба нақзи ҳуқуқи инсон, аз ҷумла “боздоштҳои ғайриқонунӣ, муҷозоти бидуни додгоҳ ва шиканҷаи дастгиршудаҳо” айбдор мешаванд.

Вазири савдои Қазоқистон гуфт, гароншавии шакар ногузир аст

Вазири савдои Қазоқистон Бахт Султонов гуфт, гароншавии нархи шакар дар он кишвар ногузир аст.

"Бештари маҳсулотҳое, ки аз воридот вобаста ҳастанд, ба монанди шакар, хоҳед ё нахоҳед, нархи он гарон мешавад. Нархи шакар дар ҷаҳон гарон шудааст ва яке аз кишварҳои содиркунандаи шакар - Русия содироти онро маҳдуд кардааст ва ин бетаъсир нахоҳад монд", - изҳор доштааст Султонов.

Ба гуфтаи ӯ, Қазоқистон аз кишварҳои хориҷ 100 ҳазор тонна шакар дархост кардааст ва дар ҳоли ҳозир 350 ҳазор тонна шакар захира намудааст.

Қазоқистон дар пасманзари камчин шудани шакар аз 23 май содироти онро ба муҳлати шаш моҳ манъ кардааст.

Дар Узбекистон "Стелс-омикрон" ошкор шудааст

Мақомоти Узбекистон яке аз намудҳои коронавирусро бо номи "Stealth-Omicron BA.2" ошкор кардаанд, ки хеле зуд паҳн мешавад.

Дар ин бора сардори Хадамоти санитарӣ-эпидемиологии Узбекистон Баҳодур Юсупалиев рӯзи 23 июн дар суҳбат бо хабаргузории УзА иттилоъ додааст.

Ба гуфтаи ӯ, давоми як ҳафтаи ахир шумори мубталоён ба навъи мазкури коронавирус афзоиш ёфтааст. Аз ҷумла 20 июн 87 кас, 21 июн 82 кас ва 22 июн 98 кас ба он мубтало шудааст.

Намуди "Stealth-Omicron BA.2" бо номи "стелс-омикрон" маъруф аст ва ҳоло дар аксари кишварҳои ҷаҳон ошкор гаштааст.

Ҳайатҳои порлумонии кишварҳои туркзабон вориди Бишкек шуданд

Ҳайатҳои порлумонӣ ба роҳбарии раиси Маҷлиси Қазоқистон Ерлан Кошанов ва раиси Маҷлиси миллии Озарбойҷон Соҳиба Ғафарова 23-юми июн вориди шаҳри Бишкек шуданд.

Муовини раиси порлумони Қирғизистон Улан Примов худи ҳамон рӯз ҳайатҳои дигарро таҳти роҳбарии раиси Маҷлиси олии Туркия Мустафо Шентоп ва раиси Маҷлиси олии Узбекистон Танзила Норбоева ба ҳузур пазируфт.

Бино ба иттилои хадамоти матбуотии порлумони Қирғизистон, ин ҳайатҳо дар ҷаласаи Шӯрои Ассамблеяи порлумонии кишварҳои туркзабон иштирок хоҳанд кард.

Ҷаласаи Шӯрои Ассамблеяи порлумонии кишварҳои туркзабон 24 июн дар Иссиқкӯли Қирғизистон оғоз хоҳад шуд.

Номи сафири нави эҳтимолии Амрико дар Душанбе маълум шуд

Мануэл Миколлер дар гузашта дар сафорати Амрико дар Душанбе ҳам кор кардааст.

Ҷо Байден, раиси ҷумҳури Амрико яке аз дипломатҳои собиқадорро номзад ба мақоми сафири кишвараш дар Тоҷикистон пешбарӣ кардааст.

Дар баёнияе, ки Кохи Сафед рӯзи 22-уми июн нашр кард, омадааст, ки раиси ҷумҳур Байден қасд дорад, Мануел Миколлер, ки ҳоло ба ҳайси муовини сафири Амрико дар Непал кор мекунад, ҳамчун намояндаи кишвар ба Тоҷикистон бифристад.

Мануел Микколер, дар гузашта дар сафоратҳои Амрико дар Муғулистон, Марокаш ва ҳамчунин Тоҷикистон кор кардааст ва яке аз мақомҳои баланд дар вазорати умури хориҷии Амрикоро ҳам доштааст.

Дар сурати тасвиби номзадиаш дар Конгресси Амрико Мануэл Макколер, ки забони форсиро медонистааст, ҷойгузини Ҷон Марк Поммершайм мешавад, ки аз моҳи январи соли 2019 то кунун сафири Амрико дар Тоҷикистон аст.

Генерали қазоқро бо иттиҳоми ришвахорӣ дастгир кардаанд

Акс аз бойгонист.

Дар Қазоқистон сардори собиқи Хадамоти марзбонӣ генерал Дархон Дилманов ва чанде аз зердастони собиқашро бо иттиҳоми фасоду ришвахорӣ дастгир кардаанд.

Кумитаи Амнияти Миллӣ рӯзи 22-уми июн гуфт, боздошт бар асоси парвандаи сӯистифода аз мақом ҳангоми назорати воридоти молу коло аз марзи Қазоқистону Чин сурат гирифтааст. Дархон Дилмановро, ки муовини раиси Кумитаи Амнияти Миллӣ буд, моҳи апрели имсол аз мақомаш барканор карданд.

Чанд рӯз пештар аз ин Додситонии кулли Қазоқистон гуфт, як ширкати боркашӣ, ки хоҳари раиси ҷумҳури пешин Нурсултон Назарбоев яке аз муассисонаш аст, ҳангоми интиқоли мол аз марзи Қазоқистону Чин “чандин ҷиноят” содир кардааст. Кумитаи Мубориза Бо Фасодкорӣ ҳам дар он замон гуфт, ки Эрбол Назарбоев, яке аз ҷиянҳои раиси ҷумҳури собиқро ҳам аз мақомаш барканор кардаанд.

Баъди тазоҳуроти маргбор дар моҳи январи имсол дар Қазоқистон, раиси ҷумҳур Қосимҷомарт Тоқаев аз президенти пешин Назарбоев ва атрофиёни ӯ фосила гирифт. Назарбоев соли 2019 аз мақомаш канор рафт ва Тоқаевро ҷойгузини хеш баргузид.

Дар Брюссел сарнавишти Украинаву Молдоваро баррасӣ мекунанд

Нишасти сарони кишварҳои узви Иттиҳоди Аврупо ду рӯз идома мекунад.

Қарор аст, раҳбарони Иттиҳоди Аврупо имрӯз дар шаҳри Брюссел ба нишасте оғоз кунанд, ки тасдиқи мақоми номзадии Украина ва Молдова дар ин иттиҳод аз масоили аслии он аст.

Нишаст рӯзҳои 23 ва 24-уми июн сурат мегирад ва ба назар мерасад, ки ҳеч яке аз 27 кишвари Иттиҳоди Аврупо мухолифи қарори мазкур нест. Интизор меравад, ки ба Гурҷистон, яке дигар аз муштоқони узвият дар Иттиҳоди Аврупо бигуянд, ки бояд барои гирифтани мақоми номзад чанд шарту шароити дигареро иҷро кунад. Дар тарҳи эъломияи ниҳоии эъломия омадааст, ояндаи Украина ва Молдова ва шаҳрвандони онҳо дар Иттиҳоди Аврупо нуҳуфта аст.” Тарҳи эъломияро Радиои Озодӣ дид.

Қарори бесобиқаи Иттиҳоди Аврупо дар замоне қабул мешавад, ки Украина зери ҳамлаҳои сахти Русия мондааст, ки рӯзи 24-уми феврал ҷанги бедалелеро ба зидди ҳамсояааш оғоз кард ва сабаби ҳалокати ҳазорон нафару вайрониҳои зиёд шуд.

Ҳукумати Тоҷикистон аз талафот дар Афғонистон андӯҳгин шудааст

Дар натиҷаи заминларза на камтар аз 1000 нафар ҳалок шудаанд.

Ҳукумати Тоҷикистон ба хонавода ва наздикони қурбониёни зилзилаи Афғонистон ҳамдардӣ кардааст.

Вазорати корҳои хориҷии Тоҷикистон рӯзи 23-юми июн дар вебсайти худ навишт, "ба намояндагӣ аз Ҳукумати Ҷумҳурии Тоҷикистон Вазорати корҳои хориҷӣ хабар медиҳад, ки ҳодисаи заминларза дар вилоятҳои Пактико ва Хусти Афғонистон, ки бар асари он теъдоди зиёди сокинони ин минтақаҳо фавтида ва хисороти зиёди моддиро ба бор овардааст, моро сахт андӯҳгин кард".

"Тасаллияти амиқи Ҳукумат ва мардуми Тоҷикистонро ба аҳли хонавода ва наздикону пайвандони фавтидагони ин заминларза баён менамоем",-омадааст дар идомаи ин нома.

Дар ин номаи тасаллияти ҳукумати Тоҷикистон номе аз Толибон, ки айни ҳол қудратро дар даст доранд, бурда нашудааст. Дар ҳоли ҳозир ҳеч яке аз кишварҳои дунё, аз ҷумла Тоҷикистон ҳукумати Толибонро ба расмият намешиносанд.

Дар урфи дипломатӣ ҳам номаҳо ба ҳукуматҳои эътирофшуда аз сӯи СММ фиристода мешаванд ва зоҳиран ба ҳамин далел, Вазорати корҳои хориҷии Тоҷикистон мустақиман ба пайвандони қурбониёни зилзила тасаллият гуфтааст.

Бар асари зилзилаи ду рӯзи пеш дар Афғонистон беш аз 1000 нафар ба ҳалокат расида, ҳудуди 1500 захмӣ шудаанд. Бархе аз созмонҳои байналмилалӣ ва кишварҳо хостори кӯмак ба зилзилазадагони Афғонистон шуданд.

Сардори пешини Хадамоти марзбонии Қазоқистон боздошт шуд

Акс аз бойгонӣ.

Кумитаи амнияти миллии Қазоқистон хабар додааст, ки сардори пешини Хадамоти марзбонии он кишвар Дархон Дилманов ҳамроҳи шуморе аз мансабдорони собиқи ин ниҳод боздошт шудааст.

"Дар доираи тафтишоти пешакии ҳолатҳои сӯиистифода аз мансаб дар гузаргоҳҳои марзии Қазоқистону Чин собиқ муовини раиси Кумитаи амнияти миллӣ – сардори хадамоти марзбонӣ, генерал-лейтенант Дилманов Д.А., майор Н.Арисбоев ва мансабдорони пешини дигари шуъбаҳои хадамоти мазкур 22 июн дастгир гаштанд", - омадааст дар иттилоияи расмии Кумитаи амнияти Қазоқистон.

Дархан Дилманов моҳи апрели соли равон аз мақоми муовинии раиси Кумитаи амнияти миллӣ - сардори Хадамоти марзбонии Қазоқистон барканор шуда буд.

Ӯ дар ин мақом аз моҳи июли соли 2015 ифои вазифа мекард. Вай соли 2020 бо фармони президенти Қазоқистон рутбаи генерал-лейтенантро соҳиб шуда буд.

Бонки миллии Қирғизистон норасоии доллари нақдинаро шарҳ дод

Бонки миллии Қирғизистон эътироф кардааст, ки дар бозори асъори ин кишвар ҳолатҳои норасоии доллари нақдина мавҷуд аст ва бинобар ин, наметавонанд талаботи мардум ба онро пурра таъмин кунанд.

Ин изҳороти бонк дар посух ба муроҷиатҳои сокинон барои гирифтани маблағ аз низомҳои байналмилалии интиқоли пул нашр шудааст.

Ба гуфтаи масъулони бонк, норасоии доллари нақдина ба далели "амалиётҳои шахсони алоҳидаи ҳуқуқӣ ва воқеие пеш омада, ки доллари ғайринақдиро ба Қирғизистон ворид карда, дар бонкҳои дохилии кишвар нақдина мекунанд ва дубора ба берун интиқол медиҳанд".

Амалиётҳои мазкур гӯиё бо мақсади ба даст овардани даромади ҳаннотӣ аз ҳисоби фарқияти қурби байни рублу доллар мебошад. Бинобар ин, баъзе аз бонкҳои Қирғизистон маҷбур шудаанд, аз хидматрасонӣ ба муштариён дар робита ба дарёфти маблағ аз низомҳои интиқоли байналмилалӣ даст кашанд.

Дар Туркманистон зидди бонувони ронанда "рейд" шуруъ шудааст

Пулиси шаҳри Туркманбошии вилояти Балкани Туркманистон назорати ронандагии занҳоро пурзӯр кардааст.

Нозирони роҳи ин шаҳр бонувони ронандаро боз дошта, бо баҳонаҳои гуногун ҳуҷҷати ронандагии онҳоро мегиранд ва мошинҳояшонро ба таваққуфгоҳи ҷаримавӣ мебаранд.

Чандин зани ронанда аз Балкан, ки нахостан номашон зикр шавад, дар суҳбат бо бахши туркмании Радиои Озодӣ гуфтанд, як ҳафта мешавад, алайҳи занони ронанда дар ин минтақа "рейд" ҷараён дорад.

"Нозирони роҳ баҳона пеш меоранд, ки дар мошин дастгоҳи иловагӣ насб шудааст, вале ҳеч гуна қарор ё қонунеро нишон намедиҳанд, ки онро манъ кунад. Бо чунин баҳонаҳо ҳуҷҷатҳои даҳҳо занро гирифтаанд", - гуфт як бонуи ронанда.

Порлумони Қирғизистон аз бозшавии қиморхонаҳо ҷонибдорӣ кард

Порлумони Қирғизистон.

Порлумони Қирғизистон 22 июн баъди чаҳор бори раъйгирӣ қонуни баҳсбарангези додани иҷозат ба фаъолияти қиморхонаҳоро дар он кишвар қабул кард.

Бархе аз вакилони порлумони Қирғизистон, аз ҷумла аъзои ҷиноҳи "Бутун Кыргызстан" дар раъйгирӣ барои қабули лоиҳаи қонуни мазкур ба нишони эътироз иштирок накарданд.

Раъйгирии порлумонӣ дар робита ба қабули ин қонун чаҳор бор ба ҳам зад ва раиси порлумони Қирғизистон Талант Мамитов баъди раъйгирии чаҳорум, ки 5 вакил аз иштирок дар он низ даст кашиданд, лоиҳаро қабулшуда номид.

Мухолифони боз шудани дари қиморхонаҳо дар Қирғизистон субҳи 22 июн дар назди бинои порлумони он кишвар ба нишони эътироз ҷамъ шуда, аз вакилони порлумон хостанд, қонун дар бораи додани иҷозат ба фаъолияти қиморхонаҳоро қабул накунанд.

Дар Қирғизистон аз 1 январи соли 2012 қонуне мавриди амал қарор дорад, ки ташкили қиморбозиро манъ мекунад.

Узбекистон рахнашавии садди обанбори Тупалангро рад кард

Ҳаҷми обе, ки аз обанбори Тупаланг дар вилояти Сурхандарёи Узбекистон берун мешавад, субҳи 22 июн якбора афзоиш ёфтааст.

Вазорати ҳолатҳои фавқулодаи Узбекистон дар ин бора хабар дод. Аммо ин ниҳод афзуда, ки сабаби афзоиши якбораи об дар ҳоли ҳозир номаълум аст.

Ба иттилои вазорат, обанбор тавони нигаҳдории 400 миллион метри мукааб обро дорад ва дар ҳоли ҳозир ҳаҷми оби он ба 378 миллиону 870 ҳазор метри мукааб мерасад.

"Корҳо барои кам кардани ҳаҷми обе, ки ба тамомияти обанбор осеб нарасондааст, идома дорад", - омадааст дар хабари вазорат.

Пештар дар шабакаҳои иҷтимоӣ хабари рахнашавии садди обанбори мазкур ва зери об мондани минтақаҳои наздик ба он нашр шуда буд.

Финландия омодааст, дар сурати ҳамла бо Русия биҷангад

Сарбозони финландӣ. Акс аз бойгонӣ.

Сарфармондеҳи неруҳои мусаллаҳи Финландия генерал Тимо Кивинен гуфт, артиши ин кишвар омодааст, дар сурати ҳамла бо Русия биҷангад.

Ба гуфтаи ӯ, Финландия тӯли даҳсолаҳо омодагии худро ба ҷанге, ки ҳоло дар Украина рух медиҳад, нигаҳ доштааст. Кивинен ҳамчунин таъкид карда, ки ҳатто пас аз пайвастан ба НАТО низ масъулияти аслии дифои кишвар ҳамоно бар души худи финландиягиҳо хоҳад буд.

Кивинен афзудааст, Финландия лавозимоти муҳими ҳарбиро дорад, аммо омили асосие, ки зарбаи таҷовузгарро пас мегардонад, ангезаи баланди низомиёни кишвараш аст. "Украина барои Русия як қитъаи хеле сахт шуд ва Финландия низ чунин хоҳад буд", - изҳор доштааст генерал.

Финландия дар солҳои 1940-ум ду бор бо Иттиҳоди Шӯравӣ ҷанг карда, дар натиҷа панҷяки қаламрави худро аз даст додааст, вале тавонист истиқлолияти худро ҳифз кунад. Дар ин ду ҷанг ҳудуди 100 ҳазор сокини Финландия кушта шудааст.

Тазоҳуроти мухолифони бозшавии дари қиморхонаҳо дар Қирғизистон

Мухолифони боз шудани дари қиморхонаҳо дар Қирғизистон субҳи 22 июн дар назди бинои порлумони он кишвар ба нишони эътироз ҷамъ шуданд.

Тазоҳургарон, ки ҳудуди 20 нафар ҳастанд, аз вакилони порлумони Қирғизистон талаб доранд, то қонуни баҳсбарангез дар бораи додани иҷозат ба фаъолияти қиморхонаҳоро қабул накунанд.

Порлумони Қирғизистон 11 майи соли равон баррасии лоиҳаи қонунеро оғоз кардааст, ки фаъолияти қиморхонаҳоро дар он кишвар иҷозат медиҳад. Лоиҳа ҳамчунин иҷозати қиморбозии онлайниро низ дар он кишвар пешбинӣ кардааст.

Дар Қирғизистон аз 1 январи соли 2012 қонуне мавриди амал қарор дорад, ки ташкили қиморбозиро манъ мекунад.

Украинаву Молдоваро ба Иттиҳоди Аврупо "роҳ медиҳанд"

Тарҳи ниҳоии эъломияе, ки мумкин аст, сарони кишварҳои Иттиҳоди Аврупо қабул кунанд, нишон медиҳад, ки ба Украина ва Молдова мақоми номзад ба узвият дар ин хонаводаи аврупоӣ дода мешавад.

Дар тарҳи эъломия аз рӯзи 21-уми июн, ки Радиои Озодӣ ҳам онро дид омадааст: ”Шӯрои Аврупо қарор кард, ки ба Украина ва Молдова мақоми номзад дода шавад”. Аммо ба Гурҷистон гуфтаанд, ки барои гирифтани мақоми узвият дар Иттиҳодияи Аврупо бояд чанд меъёру муқаррароти дигарро иҷро кунад.

Дар эъломия ҳамчунин омадааст: “Ояндаи ин кишварҳо ва шаҳрвандони онҳо дар Иттиҳоди Аврупо нуҳуфта аст.” Тамоми 27 кишвари узв бояд ин қарорро дастгирӣ кунанд ва зоҳиран ба он мухолифате нахоҳад шуд. Жан Асселборн, вазири умури хориҷии Люксембург қабл аз нишасти вазирони кишварҳои узв дар Брюссел гуфт, “ягон кишвари узв бо қарори мазкур мушкилӣ надорад.”

Қарори бесобиқаи Иттиҳоди Аврупо дар замоне қабул мешавад, ки Украина зери ҳамлаҳои сахти Русия мондааст, ки рӯзи 24-уми феврал ҷанги бедалелеро ба зидди ҳамсояааш оғоз кард ва сабаби ҳалокати ҳазорон нафару вайрониҳои зиёд шуд.

Ёфтҳои бештар

XS
SM
MD
LG