Лоиҳаи нави Конститутсияи Узбекистон соли 2022 дар арафаи 30-умин солгарди ин санад таҳия ва қабул карда мешавад.
Дар ин бора президенти Узбекистон Шавкат Мирзиёев дар паёми табрикотии худ бахшида ба 29-умин солгарди қабули Конститутсияи ин кишвар хабар дод.
Ба гуфтаи Мирзиёев, замоне расидааст, ки бояд ба Конститутсияи Узбекистон тағйиротҳои зерин ворид карда шавад:
- усули пешин "давлат - ҷомеа - одам" бояд ба "одам - ҷомеа - давлат" тағйир дода шавад;
- манфиати мардум дар ислоҳоти иқтисодӣ бояд дар мадди авал бошад;
- тақвияти нақш ва мақоми ниҳодҳои ҷомеаи шаҳрвандӣ;
- рушди оила, тақвияти минбаъдаи ваҳдати миллӣ;
- ҳифзи комили ҳуқуқ ва манфиатҳои ҷавонон;
- ҳамчун меъёри конститутсионӣ қайд кардани "Узбекистони нав - давлати иҷтимоӣ";
- пешгирии меҳнати кудакон, ҳимояти боварибахши ҳуқуқи маъюбон ва пиронсолон;
- рушди боғчаҳо, мактабҳо ва донишгоҳу илм.
Шавкат Мирзиёев дар бораи тағйири Конститутсияи Узбекистон бори нахуст моҳи гузашта, баъди дубора президенти ин кишвар эълом шуданаш суҳбат карда буд. Ӯ 6 ноябр дар маросими савгандёдкунияш гуфт, "Конститутсияи Узбекистон бояд беҳтар карда шавад".
