Матбуоти давлатии Сурия гуфт, ки дар натиҷаи таркиши бомба дар шаҳри Димишқ, 13 нафар куштаву се нафар маҷрӯҳ шуданд. Хабаргузории давлатии SANA гуфт, ки рӯзи 20-уми октябр лаҳзаҳое, ки як автобус бо низомиёни артиши Сурия аз рӯи пуле убур мекард, ду бомбаи сарироҳӣ таркид. Ҳодиса дар соатҳои субҳи барвақт, замоне, ки мардум ба кору таҳсил шитоб доштанд, рух дод. Ҳанӯз ҳеҷ нафар ё гурӯҳе масъулияти ин ҳамларо ба дӯш нагирифтааст. Дар Сурия чандин гурӯҳи шӯришии мухолифи режими президент Башор Асад ва ҳам боқимондаҳои гурӯҳи “Давлати исломӣ” ҳамоно фаъол мебошанд. Нирӯҳои Асад баъди ёрии низомии Русия ва Эрон ҳоло аксари қисматҳои Сурияро назорат мекунанд. Дар Сурия моҳи марти соли 2011 эътирозҳои зиддиҳукуматӣ сар зад ва кишвар вориди ҷанги 10-солаи шаҳрвандӣ шуд. Аз он замон то кунун 350 ҳазор кас кушта ва нисфи кишвар беҷо шудааст.
Таркиши пурқудрате дар Сурия ҷони 13 нафарро гирифт
