Маркази намояндагии додгоҳии Девони вазирони Қирғизистон хабар дод, ки додгоҳи ҳакамӣ 8-уми октябр даъвои ширкати "Penwell Business Limited"-ро дар бораи пардохти ҷуброн ба маблағи 298 миллион доллар рад кард.
Додгоҳ қарор кардааст, ки "даъвогар ҳангоми сармоягузорӣ дар Қирғизистон борҳо ба воситаи шарикони маҳаллӣ ва бевосита даст ба лоиҳаҳои коррупсионӣ задааст".
Ба огаҳии марказ, ин бори нахуст аст, ки дар таърихи истиқлоли Қирғизистон даъвои сармоягузори хориҷӣ бар асоси таҷрибаҳои коррупсионӣ рад карда мешавад. Ҳукумати Қирғизистон ба ин пирӯзӣ баъди кирояи ширкати ҳуқуқии "Willkie Farr & Gallagher LLP" ноил шудааст.
Ширкати офшории "Penwell Business Ltd" моҳи июли соли 2017 ҳукумати Қирғизистонро ба мусодираи сармояҳои худ дар ширкати "MegaCom" айбдор карда, зиддаш ба додгоҳӣ ҳакамӣ шикоят бурд.
Ширкати "Мегаком" соли 2006 дар асоси ширкати "БиМоКом" таъсис ёфт, ки бо сармояҳои "Penwell" ташкил шуда буд. Писари президенти пешин ва фирории Қирғизистон Максим Боқиев соли 2008 саҳмияҳои "Penwell"-ро дар "БиМоКом" дар пайи як "ғасби рейдерӣ" ба номи худ гузаронд. Ҳукумати муваққати Қирғизистон баъди ҳодисаҳои моҳи апрели соли 2010 ва фирори падари Максим ширкатро давлатӣ гардонид.
