Бино ба гузоришҳо, дар таркиши маргталабона дар масҷиди шиаҳо дар вилояти Кундуз, шимоли Афғонистон, ки масъулияташро ДОИШ ба уҳда гирифт, ба камияш 100 нафар куштаву захмӣ шудаанд. Ҳодиса 8-уми октябр рӯй дод.
Ин таркиши пурқурбонӣ аз замони ба қудрат расидани "Толибон" дар Афғонистон аст. Гуруҳи тундрав моҳи августи имсол назорат ба Афғонистонро ба даст гирифт.
UNAMA, ҳайати Созмони Милали Муттаҳид барои кумак ба Афғонистон, аз ҳамлаи 8-уми октябр дар ноҳияи Хонобод изҳори нигаронии амиқ кард ва бо такя ба маълумоти пешакӣ гуфт, "беш аз 100 нафар кушта ва захмӣ шудаанд".
Матиуллоҳ Рӯҳонӣ, узви маъмурияти таҳти раҳбарии "Толибон" дар вилояти Кундуз тасдиқ кард, ки таркиш ҳамлаи интиҳорӣ ё маргталабона буд.
Таркиш ҳангоми намози ҷумъа дар масҷиди Гузари Саидобод рӯй дод. Масъули онро шохаи "Хуросон"-и гуруҳи тундрави "Давлати исломӣ" ё ДОИШ ба уҳда гирифт.
