Пайвандҳои дастрасӣ

Хабари нав

Хабарҳо

Дар Узбекистон соҳибкоронро маҷбур доранд, барои ҳизби ҳоким лавҳаи таблиғотӣ созанд

Бархе аз соҳибкорони вилояти Фарғона мегӯянд, кормандони бахши вилоятии Ҳизби либерал-демократии Узбекистон, ки ахиран номзадии Шавкат Мирзиёевро ба мақоми президентӣ пешниҳод кард, онҳоро маҷбур мекунанд, то лавҳаҳои таблиғотии ҳизбро омода созанд.

"Ҳар як соҳибкор як лавҳа омода кард. Вале ҳоло боз маҷбур доранд, ки як лавҳаи дигар омода кунед. Арзонтарин лавҳа ҳудуди 40-50 доллари амрикоӣ арзиш дорад. Кормандони ҳизб омада мегӯянд, ки "шумо тавони сохтани лавҳаро доред, пас омода созед!", - гуфт яке аз соҳибкорон.

Вале намояндаи ҳизб дар Фарғона бо номи Ҳалимҷон иддаои соҳибкорон дар бораи иҷборан омода кардани лавҳаи таблиғотӣ бо акси Шавкат Мирзиёевро рад кард.

"Ҳамаи лавҳаҳоро ширкати "Тасвирий ойина" бо пули дастгоҳи марказии ҳизб омода мекунад. Мо аз ягон соҳибкор нахостаем, ки маводи таблиғотии ҳизбамонро сармоягузорӣ кунад", - афзуд ӯ.

Интихоботи президентии Узбекистон 24-уми октябри имсол баргузор мешавад. Дар он номзадҳои панҷ ҳизби ҳукуматгаро иштирок мекунанд. Ба ин интихоботи Узбекистон ҳам номзадҳои мухолифон роҳ наёфтанд.

Ҳамаи хабарҳои имрӯзро дар инҷо бихонед

Раиси пешини бонки марказии Эрон ба даҳ сол ҳабс маҳкум шуд

Валиуллоҳ Сайф дар замони ҳукумати Ҳасани Рӯҳонӣ панҷ сол раиси бонки марказии Эрон буд

Додгоҳе дар Эрон раиси собиқи бонки марказии ин кишварро ба даҳ сол зиндон маҳкум кард.

Забеҳуллоҳ Худоиён, сухангӯи низоми қазоӣ ё додгоҳии Эрон, ба телевизиони давлатии он кишвар гуфт, Валиуллоҳ Сайф ба нақзи низоми нақдӣ ва қочоқи асъори хориҷӣ гунаҳкор шуд.

Аҳмад Арақчӣ, муовини Сайф, ба ҳашт сол ҳабс маҳкум гардидааст. Ҳашт нафари дигарро ба муддатҳои гуногун ба зиндон андохтаанд.

Валиуллоҳ Сайф дар даврони раёсати ҷумҳурии Ҳасани Рӯҳонӣ муддати панҷ соли раиси бонки марказии Эрон буд.

Телевизиони давлатии Эрон гуфт, муттаҳамон 160 миллион доллар ва 20 миллион евроро ба таври ғайриқонунӣ ба бозор ворид карда буданд.

Талафоти рӯзона аз коронавирус дар Русия аз марзи 1000 кас гузашт

Кремлин сустии эмкуниро иллати афзоиши талафот медонад

Мақомоти Русия 16-уми октябр аз фавти 1002 нафар дар як рӯз аз коронавирус гузориш доданд.

Аз замони паҳншавии бемории ҳамагир ин омори баландтарини талафоти рӯзона дар Русия ба шумор меравад.

Ҳамчунин идораи мубориза бо коронавирус дар ин кишвар аз гирифтории зиёда аз 33 ҳазор кас дар шабонарӯзи гузашта ба бемории ҳамагир хабар дод.

Дар Русия дар умум 7.9 миллион нафар ба коронавирус мубтало шуда, беш аз 222 ҳазор нафар ҷон бохтаанд. Иддае шумораи воқеиро бештар аз ин медонанд.

Русия аз лиҳози талафот аз коронавирус дар қатори панҷум дар ҷаҳон қарор дорад.

Кремлин, ки сустии эмкуниро иллати афзоиши талафот медонад, аз мардум хостааст, ваксина бигиранд.

Толибон ба Тошканд рафтанд. Ҳукумати онҳоро ба расмият мешиносанд?

Абдусалом Ҳанафӣ, муовини раиси ҳукумати Толибон

Абдусалом Ҳанафӣ, муовини раиси ҳукумати Толибон бо як ҳайат рӯзи 16-уми октябр вориди Тошканд шуд.

Ин мақомдори Толибон, ки ҳоло дар Узбекистон қарор дорад, пештар ба Тоҷикистон ҳушдор дода буд, ки ба корҳои дохилии Афғонистон дахолат накунад, вагарна "ҳар кор пайомад дорад." Тоҷикистон шадидан аз ҳукумати Толибон танқид мекунад.

Забеҳуллоҳ Муҷоҳид, сухангӯи Толибон дар суҳбат бо Радиои Озодӣ гуфт, ки дар ин сафар ба Тошканд бо мақомоти Узбекистон масоили сиёсӣ, иқтисодӣ ва тиҷоратӣ баҳс хоҳад шуд. Ӯ дар ин бора шарҳи бештаре надод.

“Як ҳайати ҳамаҷониба, ки дар он фарҳангиён, теъдоде аз тоҷирони кишвар ва баъзе аз раҳбарони муҳим шомиланд ба Узбекистон рафтанд ва ин як сафари сиёсӣ, тиҷоратӣ ва иқтисодӣ хоҳад буд”,--гуфт ӯ.

Пас аз ба қудрат расидани Толибон ин сеюмин сафари онҳо ба хориҷ аз Афғонистон аст. Мақомоти баландпояи Толибон аз ин пеш аз Туркия ва Қатар боздид карда буданд. Қарор аст, рӯзҳои наздик ҳайати дигаре аз онҳо ба Русия сафар кунад.

Мақомоти Узбекистон ҳанӯз дар бораи ҷузъиёти сафари ҳайати Толибон ба Тошканд хабар надодаанд.

Пазироӣ аз Толибон дар Узбекистон дар ҳолест, ки Тоҷикистон, ҳамсояи ин кишвар бо ҳукумати ин гуруҳ дар Афғонистон мухолифат дорад. Мақомоти тоҷик борҳо эълон карданд, ки ҳукумати Толибонро дар чунин шакле, ки ташкил шудааст, қабул надоранд ва эътироф намекунанд. Баҳсҳои лафзӣ боис шуд, ки Толибон аз ирсоли “ҳазорон сарбоз” ба марзи Афғонистон бо Тоҷикистон хабар нашр кунанд. Тоҷикистон низ дар наздикии марз бо Афғонистон машқҳои низомӣ баргузор кард.

Ҳоло зоҳиран Толибон бо анҷоми сафарҳои хориҷӣ талош мекунанд, ки кишварҳои хориҷиро барои ба расмият шинохтани ҳукуматашон моил кунанд.

Аҳмад Валӣ Масъуд, амаки Аҳмад Масъуд, фармондеҳи Ҷабҳаи муқовимат рӯзи 16-уми октябр дар суҳбат бо Радиои Озодӣ гуфт, ки талошҳои Толибон барои ба расмият шинохтани ин гурӯҳ ноком хоҳад буд, чун ҷаҳон чеҳраи аслии онҳоро шинохтааст.

“Толибон солҳо боз ҷангро касб карда буданд ва ба ҷуз ҷанг дигар коре аз дасташон нахоҳад омад. Онҳо алифбои ҳукуматдориро намедонанд ва ин кор аз дасташон низ нахоҳад омад. Танҳо дар сурати ташкили ҳукумати ҳамшумул аз роҳи музокирот ва ҷалби афроди босалоҳият имкони сохтани давлат дар Афғонистон вуҷуд дорад. Дар ғайри сурат, Толибон ноамниро ба кишварҳои ҳамсоя интиқол хоҳанд дод ва доманаи ҷангро васеътар мекунанд”,--гуфт ӯ.

Толибон рӯзи 15-уми август Кобулро гирифтанд ва ду ҳафта пас ба Панҷшер, ягона вилояте, ки ба онҳо таслим нашуда буд, ҳамла карданд. Дар Панҷшер Аҳмад Масъуд, писари Аҳмадшоҳ Масъуд Ҷабҳаи муқовимати миллӣ созмон додааст ва бо Толибон муқовимат мекунад.

Тоҷикистон аз Ҷабҳаи муқовимат эълони ҳимоят кардааст. Толибон мегӯянд, Панҷшерро дар ихтиёр доранд, вале масъулони Ҷабҳаи муқовимат ин хабарро рад мекунанд ва мегӯянд, аксари Панҷшер дар ихтиёри онҳост.

Бо гузашти ду моҳ аз тасарруфи Афғонистон ҳанӯз ҳеҷ кишвари дунё ҳукумати Толибонро ба расмият нашинохтааст.

ИМА ба қурбониёни ҳамлаи ҳавопаймои бесарнишин дар Кобул ҷуброн мепардозад

Мошине, ки ба он ҳамла сурат гирифта буд

Вазорати мудофиаи Иёлоти Муттаҳидаи Амрико эълон кард, ки ба наздикони 10 қурбонии ҳамлаи ҳавопаймои бесарнишини амрикоӣ дар Кобул ҷуброн пардохт мекунад.

Ҷон Кирбӣ, сухангӯи Вазорати мудофиаи Амрико гуфт, ки барои берун кардани наздикони қурбониёни ҳамла аз Афғонистон ба ИМА низ талош доранд.

Охири моҳи август мақомоти ИМА эълон карданд, ки дар Кобул ба як мошини аъзои созмони тундрави ДОИШ ҳамла карданд ва чанд увзи ин гуруҳро куштанд.

Баъдан, рӯзноманигорон маълум карданд, ки дар ин ҳамла на аъзои ДОИШ, балки 10 узви хонаводаи як корманди созмони хайрия, аз ҷумла ҳафт кӯдак кушта шудааст. Мақомоти Амрико дертар инро эътироф карданд.

Ҳамла замоне сурат гирифт, ки охири моҳи август дар фурудгоҳи Кобул таркиш рух дод ва 13 сарбози амрикоӣ ва даҳҳо афғонистонӣ, ки талоши берун шудан аз Афғонистонро доштанд, дар назди фурудгоҳ кушта шуданд.

ИМА гуфта буд, ки талоши безарар кардани ҳамлаи дуюми ДОИШ дар фурудгоҳи Кобулро кардааст.

Дар Русия дар як рӯз беш аз 1000 нафар аз КОВИД-19 фавтидааст

Як Маркази табобати беморони КОВИД-19 дар Русия

Мақомоти Русия рӯзи 16-уми октябр хабар доданд, ки дар як шабонарӯзи охир 1002 нафар аз КОВИД-19 фавтидаанд. Ин баландтарин омори фавти гирифторони КОВИД-19 дар Русия пас аз оғози пандемия аст.

Дар 24 соати гузашта низ беш аз 33 ҳазор нафар гирифторони КОВИД-19 сабт шудааст, ки ин ҳам баландтарин омор дар ин кишвар аст.

Аз оғози пандемия дар аввали соли 2020 то кунун дар Русия наздики 8 миллион нафар ба ин вирус сироят ёфтаанд ва беш аз 220 ҳазор нафар бар асари он фавтидаанд.

Apple барномаи "Қуръони Маҷид"-ро бо дархости Чин пок кард

Барномаи китоби "Қуръони Маҷид"

Ширкати "Apple" барномаи китоби "Қуръони Маҷид"-ро дар Чин дастнорас ва пок кард.

Ин барнома ба хотири хондан ва шунидани китоби Қуръон пешбинӣ шуда буд.

Пок шудани барномаи китоби Қуръонро сомонаи "Apple Censorship" мушоҳида кардааст, ки истифодаи барномаҳои ширкати "Apple"-ро дар кишварҳои гуногун пайгирӣ мекунад.

Дар ширкати мазкур ба Би-би-си гуфтаанд, ки барнома бо талаби мақомоти Пекин пок шудааст. Ба гуфтаи масъулони "Apple", мақомоти Чин дар ин борномаи мӯҳтавои хилофи қонун пайдо кардаанд, вале дақиқ нагуфтаанд, ки гап дар бораи чӣ ҳаст.

Пештар ин ширкат барномаи Инҷил, китоби муқаддаси масеҳиёнро низ пок карда буд.

Чин, кишварест, ки ба гуфтаи созмонҳои байналмилалӣ, дар он озодиҳои мазҳабӣ маҳдуд мешаванд.

Аз ҷумла дар вилояти Шинҷони Чин хондани китоби Қуръон ва ибодат дар масҷид маҳдуд шудааст.

Муҳоҷирони тоҷик дар Воронеж гуфтанд, аз шароити "ғуломӣ" раҳо ёфтанд. ВИДЕО

Рӯзи 13-уми октябр муҳоҷирони "фиребхӯрда" дар назди яке аз идораҳои пулиси маҳаллӣ эътироз карданд.

Даҳҳо муҳоҷири тоҷик дар деҳаи Шубини Воронежи Русия, ки мегуфтанд, корфармо бо онҳо мисли ғулом рафтор дорад, аз ҳали мушкилашон хабар доданд.

Онҳо гуфтанд, ки субҳи 16-уми октябр, пас аз дахолати сафорати Тоҷикистон дар Русия, шиноснома ва қисман маблағи ҳаққи корашон аз ҷониби корфармо дода шуд ва ҳоло онҳо деҳаи Шубинро тарк карданд. Сафорати Тоҷикистон дар саҳифаи фейсбукиаш хабар додааст, ки нофаҳмӣ миёни корфармо ва муҳоҷирон ҳал шуд.

"Тибқи шартномаи шаҳрвандони Тоҷикистон бо корфармо, яъне ширкати ҶСП “Острогожсксадпитомник”, маблағи патент барои кор, билети ҳавопаймо, ҷойи хоб ва ғизо аз ҷониби корфармо пардохт шуда, пас аз шурӯъ гардидани фаъолияти меҳнатии шаҳрвандони Тоҷикистон, корфармо маблағи сарф кардаашро аз музди меҳнати онҳо бозпас гардонидааст. Бинобар ин, корфармо 1 сентябри соли 2021 ба ҳар як нафари онҳо 10 000 рублӣ пешпардохт намудааст. Аз ин лиҳоз, миёни муҳоҷирони меҳнатӣ ва корфармо нофаҳмӣ ба вуҷуд омадааст.", --хабар додааст, сафорат.

110 муҳоҷири тоҷик, ки се моҳи пеш ба Воронеж барои ғундоштани ҳосили себ ҷалб шуда буданд, рӯзи 13-уми октябр дар назди яке аз идораҳои пулиси маҳаллӣ эътироз карданд. Онҳо иддао карданд, ки корфармо онҳоро фиреб дода, шиносномаҳояшонро гирифтааст ва онҳо имкони тарки ин маҳалро надоранд. Радиои Озодӣ дар бораи ин муҳоҷирон гузориш таҳия кард ва рӯзи 15-уми октябр сафорати Тоҷикистон дар Русия гуфт, ки кормандонашро барои ҳали ин мушкил ба Воронеж сафарбар кардааст.

Хуршед Қурбонов, як тан аз муҳоҷирон рӯзи 16-уми октябр дар суҳбат бо Радиои Озодӣ гуфт, ки шиносномаҳо ва қисме аз маблағи корашонро корфармо пас дод ва ҳоло онҳо савори автобус деҳаи Шубинро тарк карданд. “Пас аз гузориши Радиои Озодӣ кормандони сафорат омаданд ва бо корфармоён суҳбат карданд. Онҳо шиносномаҳои моро баргардонданд ва ба ҳар кас ба ҳисоби худашон ба қадри кор маблағ доданд. Ҳама ин деҳаро тарк карданд ва ҳар кас ба назди хешу табору шиносҳояш ба дигар шаҳрҳои Русия мераванд.”,--гуфт ӯ.

Сафорати Тоҷикистон дар саҳифаи фейсбукиаш рақамҳои худро нашр карда, аз муҳоҷирон хостааст,ки дар сурати зарурат ба онҳо муроҷиат кунанд.

Видео аз лаҳзаи эътирози муҳоҷирон дар рӯзи 13-уми октябр:

Як гуруҳ аз муҳоҷирони тоҷикро дар Русия сарсон кардаанд
лутфан мунтазир бошед

Феълан кор намекунад

0:00 0:02:14 0:00

Пештар муҳоҷирон шикоят карда буданд, ки мақомоти Тоҷикистон аз ҳаққи онҳо ҳимоят намекунад.

Дар миёни муҳоҷироне, ки гирифтори мушкил шуда буданд, 12 зан низ буд, ки ҳоло ба дигар шаҳрҳои Русия рафтаанд. Онҳо гуфтанд, ки тасмими бозгашт ба Тоҷикистонро надоранд ва мехоҳанд, дар шаҳрҳои дигари Русия ҷойи кори хубтаре пайдо кунанд.

Солона ҳудуди як миллион шаҳрванди Тоҷикистон барои дарёфти ризқу рӯзӣ ба Русия мераванд. Маблағи фиристодаи онҳо барои иқтисоди хонаводаҳо дар Тоҷикистон муҳим хонда мешавад, вале муҳоҷирони тоҷик борҳо аз беҳуқуқӣ дар Русия шикоят кардаанд.

Муҳоҷирон борҳо мақомоти тоҷикро барои ҳифз накардани ҳуқуқи онҳо дар Русия низ танқид кардаанд. Вале мақомот ҳамеша гуфтаанд, то ҳадди имкон ба муҳоҷирон кумак мерасонанд ва маҳз бо дахолати онҳо чанд дафъа пули муҳоҷирон аз корфармоён рӯёнда шуд.

ДОИШ масъулияти ҳамла ба масҷиди Қандаҳорро бар дӯш гирифт

Масҷиде, ки дар он ҳамла сурат гирфитааст

Шохаи хуросонии гурӯҳи тундрави ДОИШ масъулияти бомбгузории маргталабона дар масҷиди шиаён дар шаҳри Қандаҳори Афғонистонро бар дӯш гирифт.

Рӯзи 15-уми октябр ҳангоми адои намози ҷумъа дар масҷиди шиаёни Қандаҳор таркиш шуд, ки дар он даҳҳо нафар кушта ва захмӣ шуданд.

Дар эъломияи худ ДОИШ гуфтааст, ин корро ду узви ин созмон, ки дар бадани худ камарбанди магрталабона доштанд, анҷом додаанд.

Мақомот дар Қандаҳор гуфтанд, ки дар ин ҳамла 36 нафар кушта ва 70 нафар маҷрӯҳ шудаанд. Ҳафтаи гузашта ДОИШ чунин ҳамларо дар масҷиди шаҳри Кундуз анҷом дода буд.

Ин ҳамлаҳо иддаои Толибонро, ки пас аз солҳо ҷанг ба Афғонистон сулҳ овардаанд, ночиз мекунад.

Солеҳмуҳаммад Регистонӣ: “Ҳафтаҳои оянда шоҳиди натиҷаҳои муқовимат дар Панҷшер хоҳед шуд”

Солеҳмуҳаммад Регистонӣ, фармондеҳи Ҷабҳаи муқовимати миллӣ дар Афғонистон

Солеҳмуҳаммад Регистонӣ, фармондеҳи Ҷабҳаи муқовимати миллӣ дар Афғонистон мегӯяд, Панҷшер суқут накардааст ва Толибон аз 23 дара танҳо як дараи ин вилоятро дар ихтиёр доранд.

Панҷшер танҳо вилояте дар Афғонистон буд, ки пас аз суқути Кобул ба Толибон таслим нашуд ва дар ин вилоят зери раҳбарии Аҳмад Масъуд Ҷабҳаи муқовимат созмон ёфт. Толибон бо нашри аксу видео иддао доранд, ки вилояти Панҷшерро тасарруф кардаанд.

Солеҳмуҳаммад Регистонӣ, фармондеҳи Ҷабҳаи муқовимати миллӣ дар Афғонистон рӯзи 14-уми октябр дар як суҳбат бо шабакаи “Афғонистон Интернейшнал” тасарруфи Панҷшерро таблиғи дуруғини Толибон хонд.

Ӯ гуфт: “Феълан, дар дараи аслӣ Толибон сохтмони чанд сангро дар даст доранд, ки мардум ҳамроҳашон ҳамкор нест. Дараҳои ҷонибии Панҷшер, ки 23 дара дорад, ҳамааш дар ихтиёри муқовиматгарон ҳастанд. Муқовимат идома дорад ва идома хоҳад кард”,--гуфт ӯ.

Ӯ гуфт, ки “ҳафтаҳои оянда асароти муқовиматро хоҳед дид”.

Толибон рӯзи 6-уми сентябр иддао карданд, ки Панҷшерро тасарруф карданд. Аз он замон бори аввал аст, ки фармондеҳи Ҷабҳаи муқовимат бо як расона суҳбат мекунад. Дар гузашта видеоҳои зиёде аз ӯ ва чанд тан аз ҳамроҳонаш дар шабакаҳои иҷтимоӣ нашр мешуд, ки зоҳиран дар баландкӯҳҳои Панҷшер қарор доштанд.

Солемуҳаммади Регистонӣ дар ин суҳбат гуфт, ки муқовимат густарда хоҳад шуд ва Толибон бо зур ҳукумат карда наметавонанд.

Тоҷикистон аз кишварҳоест, ки ҳимояти худро аз Ҷабҳаи муқовимат эълон кардааст. Бархе аз чеҳраҳои шинохтаи ин Ҷабҳа феълан дар Тоҷикистон қарор доранд ва манобеи Радиои Озодӣ низ гуфта буданд, ки Аҳмад Масъуд низ ба ин кишвар сафар кардааст.

Солеҳмуҳаммад Регистонӣ сафари Аҳмад Масъудро ба Тоҷикистон рад накард. Ӯ гуфт: “Онҳо ба хориҷ аз кишвар рафтуомад доранд. Аввалин сафаре, ки Аҳмад Масъуд кард, бо далели даъвате буд, ки аз ӯ сурат гирифта буд.”

Қаблан манобеи Радиои Озодӣ гуфта буданд, ки охири моҳи сентябр Аҳмад Масъуд, раҳбари Ҷабҳаи муқовимат бо даъвати мақомоти Тоҷикистон барои музокирот бо Толибон ба Душанбе сафар доштааст.

Толибон рӯзи 15-уми сентябр Кобулро тасарруф карданд ва Афғонистонро “Иморати исломӣ” эълон карданд. Ҷабҳаи муқовимат бо раҳбарии Аҳмад Масъуд, ягона нерӯе дар Афғонистон буд, ки бар зидди Толибон эъломи мубориза кард.

Бо гузашти ду моҳ ҳеҷ кишвари дунё ҳукумати Толибонро ба расмият нашинохтааст.

Қирғизистон: боздоштҳо дар доираи парвандаи "мафияи фармасевтӣ" идома доранд

Кумитаи давлатии амнияти миллии Қирғизистон рӯзи 15-уми октябр хабар дод, ки дар доираи парвандаи "мафияи фармасевтӣ" фасодкории як қатор мансабдорони дигари Вазорати тандурустӣ ва ширкатҳои доруфурӯширо ошкор кардааст.

Ба огаҳии кумита, С.Ж.К., хеши вазири пешини тандурустии Қирғизистон манфиати ширкатҳои доруфурӯширо ҳимоят карда, бо "харидан"-и мансабдорони давлатӣ раванди бақайдгирии доруҳоро дар Департаменти таъминоти доруи он кишвар "суръат мебахшидааст".

С.Ж.К. бо қарори Додгоҳи ноҳияи Якуми майи шаҳри Бишкек ба ҳабси пешакӣ гирифта шудааст.

Номи гумонбар ва вазири пешини тандурустии Қирғизистон ошкор намешавад. Аммо раиси Кумитаи амнияти миллии Қирғизистон Қамчибек Тошиев 13-уми октябр гуфт, дар "мафияи фармасевтӣ" хоҳари Космосбек Чолпонбоев, собиқ вазири тандурустии ин кишвар даст дорад.

Кумита охирҳои моҳи сентябр хабар дода буд, ки "як гуруҳи ширкатҳо маводи дорувориро аз хориҷ ба Қирғизистон ворид карда, бо нархи ниҳоят гарон ба сокинон мефурӯхтаанд".

Тафтишҳо дар коргоҳу анборҳои ширкатҳои доруфурӯшӣ вуҷуд доштани "муҳосиботи дугона"-ро тасдиқ карда, ин ширкатҳоро гӯиё мансабдорони давлатӣ ҷонибдорӣ ва ҳимоят мекардаанд.

Раҳбари яке аз ширкатҳои мазкур боздошт ва бо гумони фасодкорӣ ба ҳабси пешакӣ гирифта шуда буд.

Қазоқистон бо вуҷуди танқидҳо узви Шӯрои ҳуқуқи инсони СММ шуд

Маҷмаи умумии СММ рӯзи 14-уми октябр 18 узви Шӯрои ҳуқуқи инсони ин созмонро интихоб кард. Дар миёни аъзои нав Қазоқистон, Сомалӣ ва Қатар низ, ки барои нақзи ҳуқуқи инсон пайваста танқид мешаванд, ҳастанд.

Барои ба узвияти ин шӯро шомил шудан 97 овоз даркор аст. Ба ҷонибдорӣ аз Қазоқистон 184 ҳайати Маҷмаи умумии СММ раъй додаанд.

Дар иттилоияи Вазорати умури хориҷии Қазоқистон аз 15 октябр омадааст, "ба узвияти ин ниҳоди ҷаҳонии ҳуқуқи инсон шомил шудани кишвари мо маънои онро дорад, ки нақши он ба ҳайси иштирокчии фаъоли раванди пешбурди меъёрҳои байналмилалӣ дар бахши ҳимояти ҳуқуқ ва озодиҳои инсон эътироф шудаанд".

"Самти афзалиятноки фаъолияти Қазоқистон дар Шӯрои ҳуқуқи инсон пешбурди баробарии ҷинсӣ, тавсеаи ҳуқуқу имкониятҳои занон, пурра бекор кардани ҳукми қатл, мубориза бо ҳама гуна таҳаммулнопазирӣ, озодии динӣ ва эҳтиром ба ҳуқуқи инсон дар давраи пандемияи коронавирус аст", - қайд шудааст дар иттилоия.

Қазоқистон дар ҳоле ба узвияти шӯрои мазкури СММ шомил шуд, ки созмонҳои ҳомии ҳуқуқи башари маҳаллӣ ва байналмилалӣ онро пайваста барои нақзи ҳуқуқи инсон танқид мекунанд.

"Politico": Имиҷи Тошканд дар назди Вашингтон боло рафтааст

Шавкат Мирзиёев бо конгрессменҳои Амрико

Нашрияи маъруфи "Politico" менависад, Узбекистон ба хотири тақвияти робитаҳои Тошканду Вашингтон маъракаи хашини иттилоотиеро роҳандозӣ кардааст.

Ба навиштаи "Politico", ба ҳайатҳое, ки аз Узбекистон боздид мекунанд, намояндагони Пентагон низ ҳастанд. Онҳо дар Тошканд тавсеаи ҳамкориҳоро дар бахши таъмини амният ва субот баъди сари қудрат омадани гуруҳи Толибон дар Афғонистонро баррасӣ мекунанд.

Манбаъҳои нашрия дар Конгресс ва Пентагон гуфтаанд, ба мавзуъҳои баррасишаванда дар ин гуфтугӯҳо масъалаи ҷойгиркунии нерӯҳои зиддитеррористии ИМА дар минтақа низ шомил аст.

Маъмурияти президент Ҷо Байден ҳам давоми чанд моҳи ахир дар ин замина бо мақомоти Узбекистон ва ҳамсоякишварҳои дигари Афғонистон гуфтугӯҳоеро анҷом медиҳад, вале ҷузъиёти онҳо ошкор намешавад.

Чанд конгрессмени ҷумҳурихоҳи Амрико ҳафтаи гузашта сафареро ба Узбекистон анҷом доданд ва бо мақомҳои расмии ин кишвар, аз ҷумла президент Шавкат Мирзиёев дидору гуфтугӯ карданд. Яке аз конгрессменҳо Дон Бэйкон баъди ин вохӯрӣ, сарфи назар аз далелҳои боварбахш дар бораи бо тақаллуб баргузор шудани интихоботи навбатии президентии Узбекистон гуфт, "ин кишвар метавонад ба яке аз давлатҳои демократӣ ва ҳомии ҳуқуқи инсон табдил ёбад".

Муҳоҷирони дармондаи узбекро бо қатораҳои махсус аз Русия меоранд

Ширкати "Роҳи оҳани Узбекистон" барои баргардонидани муҳоҷирони дармонда аз Русия ба ватан ҳаракати махсуси 4 қатораро ба роҳ мемонад.

Ба огаҳии хадамоти матбуотии ширкат, ин қатораҳо тавассути масири "Волжский-Ташкент" рӯзҳои 22, 25, 29-уми октябр ва 1-уми ноябри соли равон аз Русия ба Узбекистон ҳаракат хоҳанд кард. Билети қатораҳо ба як самт - ба Узбекистон дар шакли электронӣ фурӯхта мешаванд.

Мақомоти Узбекистон барои баргардонидани муҳоҷирони дармондаи худ аз Русия ба ватан соли 2020 низ қатораҳои махсусро ташкил карда буданд. Ҳаракати қатораҳои мусофирбар миёни ду кишвар ба далели карантин ва маҳдудиятҳои марбут ба пандемияи коронавирус қатъ гаштааст.

Намози ҷумъа дар Қандаҳор ба хун олуда шуд

Дар таркиш дар масҷиди шиаён дар Қундуз 46 нафар кушта шуданд.

Дар натиҷаи як таркиш дар як масҷиди шиаён дар шаҳри Қандаҳор теъдоди зиёде аз намозгузорон кушта шудаанд. Таркиш имрӯз ҳангоми намози ҷумъа рух додааст ва ба гуфтаи Билол Каримӣ, сухангӯи Толибон дар натиҷаи он мардуми зиёде ҷон додаанд.

Баъзе хабаргузориҳо куштаву маҷруҳ шудани 20 нафар хабар додаанд. Ҳеч касе масъулияти бомбгузориро бар уҳда нагирифтааст. Аммо чанде пештар аз ин дар натиҷаи як таркиш дар шаҳри Кундуз 46 намозгузор кушта шуданд ва масъулияти онро гуруҳи ба ном Давлати исломӣ бар дӯш гирифт.

Интиқоди Жириновский аз боз кардани роҳи 300 ҳазор муҳоҷир

Владимир Жириновский

Авфи 300 ҳазор муҳоҷири тоҷику узбек аз ҷониби Вазорати корҳои дохилии Русия ба Владимир Жириновский раҳбари Ҳизби либерал-деморкати ин кишвар хуш наомадааст. Ин сиёсатмадори пархошгар ҳангоми суханронӣ дар Шӯрои Думаи давлатӣ аз Кумитаи ИДМ талаб кардааст, ки зарурати ин тасмим баррасӣ шавад.

Жириновский гуфтааст, онҳое, ки дар ин ҷо авбошӣ ва таҷовуз мекарданд ихроҷу омаданашон манъ шуда буд. Ҳоло онҳо авф шуданду бармегарданд.

Дар пайи танқиди Жириновский раиси Думаи давлатӣ Вячеслав Володин ба Кумитаи оид ба корҳои ИДМ- санҷиши ин масъаларо супориш дода, ҳамазмон ёдоварӣ намудааст, авфи нав муҳоҷиронеро фаро мегирад ки ҳуқуқувайронкунии маъмурии марбут ба сабти буду бошро содир кардаанд, на ҷиноятҳои дигар.

Ҳафтаи гузашта Вадим Коженов, раҳбари Федератсияи муҳоҷирони Русия эълон кард, ки Вазорати корҳои дохилӣ 150 ҳазор муҳоҷирони тоҷикеро, ки ҳаққи вуруд ба Русияро надоштанд, афв намуд.

То кунун беш аз 270 ҳазор шаҳрвандони Тоҷикистон аз ҳаққи вуруд ба Русия маҳрум мебошанд. Ба гуфтаи ҳомиёни ҳуқуқ, муҳоҷирони тоҷик бештар ба сабаби мушкил дар ҳуҷҷатгузорӣ ва нақзи қоидаҳои будубош дар Русия ихроҷ мешаванд. Дар ин миён зиёданд муҳоҷироне, ки мегӯянд, бегуноҳ ва дастҷамъӣ аз Русия ронда шудаанд.

Манбаъ: Дар Туркманистон 25 ҳазор кас аз коронавирус фавтидааст

Яке аз қабристонҳои Ишқобод

Мақомоти Туркманистон ҳанӯз ҳам исрор меварзанд, ки дар ин кишвар ягон ҳолати мубталошавӣ ба коронавируси нав ба қайд гирифта нашудааст.

Як манбаи боварбахш дар низоми тандурустии Туркманистон ба бахши туркмании Радиои Озодӣ гуфт, мақомоти ин кишвар бо вуҷуди радди ҳолатҳои гирифторӣ ба коронавирус омори рӯзонаи фавт бар асари ин бемориро пинҳонӣ таҳия мекунанд.

Тибқи иттилои манбаъ, аз аввали пандемияи коронавирус дар соли 2020 то ҳол дар Туркманистон беш аз 25 ҳазор одам аз ин вирус ҷон додааст.

"Ҳарчанд омори маргу мир бар асари коронавирус расонаӣ намешавад, вале вилоятҳо ҳар рӯз ба Вазорати тандурустӣ ва ниҳодҳои дахлдори Туркманистон дар ин бора гузориш медиҳанд", - изҳор дошт манбаъ.

Ба гуфтаи ҳамсуҳбати мо, бештари ҳолатҳои фавт бар асари коронавирус дар вилоятҳои Лебап ва Марии Туркманистон сабт шудаанд. Бахши туркмании Радиои Озодӣ дар гузашта дар бораи афзоиши ҳолатҳои гирифторӣ ба коронавирус дар ин ду вилоят хабар дода буд.

СҶТ: Коронавирус мизони маргу мир аз силро ба сатҳи рекордӣ расондааст

Созмони ҷаҳонии тандурустӣ (СҶТ) мегӯяд, соли 2020 мизони маргу мир бар асари бемории сил назар ба соли 2019 бештар шуда, харҷҳои умумӣ барои мубориза бо ин навъи беморӣ коҳиш ёфтааст.

"Пандемияи коронавирус пешрафти чандинсолаи ҷаҳонӣ дар мубориза бо бемории силро баръакс гардонда ва мизони маргу мир бар асари онро бори нахуст дар давоми чандин сол афзоиш додааст", - омадааст дар гузориши СҶТ.

Ба назари таҳлилгарони СҶТ, сабаби асосии афзоиши фавтҳо аз сил коҳиши харҷҳоест, ки ба мубориза бо беморӣ равона мешаванд. Дар бештари кишварҳо нерӯи инсонӣ ва пулҳое, ки барои мубориза бо бемории сил ҷудо мешуд, ба мубориза зидди коронавирус равона шудаанд.

"Таҳқиқот нишон медиҳад, ки нақзи хидматрасониҳои тиббӣ зидди бемории сил ба далели пандемияи коронавирус пешрафти чандинсолаи ҷомеаи ҷаҳонӣ дар мубориза бо бемории мазкурро ба ҳам хоҳад зад", - изҳор дошт мудири кулли созмон Тедрос Гебрейесус.

Бар асоси омори СҶТ, соли 2020 ҳудуди 1,5 миллион одам аз бемории сил ҷон дода, тибқи пешбиниҳои созмон, мизони маргу мир бар асари ин беморӣ дар соли 2021 назар ба соли гузашта бештар хоҳад буд.

Эмомалӣ Раҳмон буҳрони Афғонистонро "таҳдиди ҷиддӣ ба амнияти ИДМ" унвон кард

Раиси ҷумҳури Тоҷикистон дар нишасти сарони кишварҳои узви Иттиҳоди Давлатҳои Мустақил (ИДМ), ки ба таври маҷозӣ таҳти раҳбарии Белорус баргузор шуд, ширкат кард. Вай дар ин ҳамоиш гуфт, ба сари қудрат омадани Толибон дар Афғонисттон вазъро дар кишвари ҳаммарз бо ИДМ печидатар кард ва барои амнияти ҳамсоягонаш "таҳдиди ҷиддӣ" ба шумор меравад. Дар ин замина раҳбари Тоҷикистон ба зарурати "ҳамоҳангсозии зичтари сохторҳои қудратии кишварҳои мо дар мубориза бо чолишҳо ва таҳдидҳое, ки аз Афғонистон ба вуҷуд меоянд", таъкид намуд.

Дар кори ҷаласа президентҳои Русия, Беларус, Озарбойҷон, Қазоқистон, Туркманистон, Узбекистон ва сарвазирони Арманистону Молдова иштирок ва суханронӣ карданд.

Иттиҳоди Давлатҳои Мустақил зери роҳбарии Белорус баргузор мешавад. Ин созмони зери нуфузи Русия 30 сол пеш дар пайи фурӯпошии Иттиҳоди Шӯравӣ ба миён омад ва феълан 11 узв дорад. Ҳарчанд намояндагони Украина чанд сол аст дар ҷаласаҳои ин созмон ширкат намекунанд.

Аз Идора. Ин хабар ислоҳ карда шуд, чун қаблан дар он гуфта мешуд, ки сабаби ба Минск сафар накардани президенти Тоҷикистон Эмомалӣ Раҳмон маълум нест. Замони нашри хабар маълум набуд, ки ҳамоиш ба гунаи маҷозӣ ҷараён хоҳад гирифт.

Баъди шикоят аз шиканҷа, Ваколатдор ба назди роҳбарони зиндонии ҲНИТ рафт

Яке аз зиндонҳои Тоҷикистон. Акс аз бойгонӣ

Ваколатдори ҳуқуқи инсон дар Тоҷикистон мегӯяд, намояндагони ӯ бо Раҳматулло Раҷаб, Абдуқаҳҳор Давлатов ва Ҳикматуллоҳ Сайфуллозода дар зиндон вохӯрда, дар бораи шиканҷа шуданашон аз онҳо пурсидаанд. Дар шароите, ки наздикони ин нафарон аз муносибати бераҳмона шикоят карданд, мақомот мегӯянд, касе ба онҳо бадрафторӣ накардааст.

Ваколатдори ҳуқуқи инсон рӯзи 15-уми октябр дар хабарномае гуфт, ду рӯз пеш масъулини ин ниҳод ба маҳбаси 3/1 рафта, аз вазъи зиндониён ва шароити зисти онҳо дидан карданд. Аз ҷумла ба гуфтаи ин ниҳод, ваколатдор Умед Бобозода дар алоҳидагӣ бо Раҳматуллои Раҷаб, Абдуқаҳҳор Давлатов ва Ҳикматуллоҳ Сайфуллозода суҳбат кардааст.

Ваколатдор навиштааст, Раҳматуллои Раҷаб ва Абдуқаҳҳор Давлатов шиканҷа шуданашонро рад кардаанд. Тасдиқи дурусти ин иттилоъ ғайриимкон аст, чун хабарнигорон ба дохили зиндонҳо ва суҳбат бо зиндониён дастрасӣ надоранд.

Ҳикматуллоҳ Сайфуллозода
Ҳикматуллоҳ Сайфуллозода

Ваколатдор ё омбудсмен аз Ҳикматуллоҳ Сайфуллозода навиштааст, “ӯ аз ҷониби кормандон мавриди лату кӯб қарор нагирифтааст, балки байни ӯ ва дигар маҳкумшуда муноқиша сар задааст, ки ин қазия хусусияти сиёсӣ надорад.”

Пештар мақомоти идораи зиндонҳо низ айни ин чизро гуфта буданд, вале наздикон ва ҳам роҳбарони Ҳизби дар Тоҷикистон мамнуи наҳзати исломӣ гуфтанд, аҳволи Сайфуллозодаи 70-сола дар зиндон бисёр бад аст.

Пайвандони Ҳикматулло Сайфуллозода дар охири моҳи сентябр хабар дода буданд, ки ӯ дар қисми тиббии маҳбаси шаҳри Ваҳдат "захмӣ шудааст". Онҳо гуфтанд, як маҳбус нимашаб ба сари ӯ бо чойник задааст. Ба иддаои Фароғат Сангинова, ҳамсари Сайфуллозода, "маҳбуси ҳамлавар бемор набудааст", вале рӯшан нест, чӣ гуна дар нимашаб ба қисми тиббии маҳбас роҳ ёфтааст.

Созмони Хабарнигорони Бидуни Марз (RSF) дар оғози моҳи сентябр аз ҳукумати Тоҷикистон хоста буд, Ҳикматулло Сайфуллозодаро афв кунад, чун "ҷонаш дар хатар аст". Сайфуллозода соли 2015 ҳамроҳ бо дигар роҳбарони ҲНИТ боздошт ва ба 16 соли зиндон маҳкум шуд. Вале наздиконаш ҳукми ӯро ноодилона хонда, ӯро бегуноҳ медонанд.

Умед Бобозода, ваколатдор оид ба ҳуқуқи инсон
Умед Бобозода, ваколатдор оид ба ҳуқуқи инсон

Ваколатдор оид ба ҳуқуқи инсон ҳам рӯзи 15-уми октябр навиштааст, Сайфуллозода аз ҳукми додгоҳ норозигӣ кардааст.

Роҳбарони Ҳизби дар Тоҷикистон мамнуи наҳзати исломӣ борҳо талаб кардаанд, ки қазияи онҳо ошкоро баррасӣ шавад. Додгоҳи олии Тоҷикистон соли 2016 қазияи роҳбарони ҳизбро паси дарҳои баста баррасӣ ва онҳоро ба солҳои тӯлонии зиндон маҳкум кард. Аз ҷумла Саидумар Ҳусайнӣ ва Маҳмадалӣ Ҳайит, ду муовини пешини раиси ҳизб ба ҳабси абад маҳкум шуданд.

Мақомот онҳоро дар ҳамдастӣ бо Абдуҳалим Назарзода, собиқ муовини вазири дифоъ муттаҳам карда, ҳизбро мамнуъ ва террористӣ эълон карданд. Вале масъулини ҲНИТ даст доштан дар ин ҳодисаро рад карда гуфтанд, “ошӯб”-и Ҳоҷӣ Ҳалим танҳо баҳонае барои манъи фаъолияти ҳизб буд.

Нигарониҳо дар бораи вазъи мухолифон дар зиндон дар ҳоле зиёд мешавад, ки хабарнигорон солҳост, ки ба дохили зиндонҳо дастрасӣ надоранд. Мақомот танҳо ба Ваколатдор оид ба ҳуқуқи инсон ва чанд намояндаи ҷомеаи шаҳрвандӣ иҷозаи вуруд ба зиндонҳоро медиҳад. Вале дақиқ нест, ки маҳбусон дар суҳбат бо намояндагони Омбудсмен то куҷо озодона суҳбат мекунанд.

Мақомоти Қазоқистон гуфтанд, дар Ҷамбил муҳимоти ҷангӣ метаркад

Вазорати мудофиаи Қазоқистон хабар дод, ки ба маҳвсозии боқимондаи муҳимоти ҷангӣ дар анбори аслиҳа дар вилояти Ҷамбил шуруъ кардааст.

Бино ба нақшаи вазорат, таркондани муҳимот то 13-уми ноябр идома мекунад.

"Барои ин амал майдони 12 километр дуртар аз қисми низомӣ ва маҳалли аҳолинишин ҷудо шудааст", - хабар доданд дар вазорат.

Рӯзи 26-уми август дар ноҳияи Байзаки вилояти Ҷамбил анбори аслиҳа таркид. Дар натиҷа 17 кас кушта ва наздики 100 каси дигар ҷароҳат бардошт.

Ҳамчунин 106 манзили зист, 12 иншооти тиҷорӣ ва 3 мактаб хисорот дид.

Сомонаи иттилоотии HOLA News дар Қазоқистон дубора дастрас шуд

Дар Қазоқистон дастрасӣ ба сомонаи иттилоотии HOLA News дубора ба роҳ монда шуд. Кормандони сомонаи мазкур ҳафтаи гузашта хабар доданд, ки дастрасӣ ба HOLA News маҳдуд шудааст.

"Бо гузашти 10 рӯз сомонаи HOLA News дубора дастрас шуд. Масъулияти ташкили маҳдудият нисбат ба сомонаи HOLA News-ро касе ба зимма нагирифт. Ташаккур ба ҳама. Сомона дубора дастрас шуд", - омадааст дар хабари идораи сомона.

Идораи сомона хабар дода буд, ки ширкатҳои бузурги таъминкунандаи интернет, амсоли "Қазоқтелеком", Kcell, Beeline ва Tele2 дастрасӣ ба онро номумкин карда буданд.

Корбарон дар хориҷ аз кишвар низ наметавонистанд, сомонаро боз кунанд. Сабабҳои баста шудани сомона то кунун рушан нест.

Ҷабборов гуфт, ширкати "Сентерра"-и Канада омода аст, Қумторро тарк кунад

Ширкати канадагии Centerra Gold Inc. омода аст, кони тиллои Қумторро дар ихтиёри Қирғизистон гузорад, аммо аз Бишкек хостааст, ки аз саҳмаш дар ширкат даст кашад.

Дар ин бора Оқилбек Ҷабборов, раиси нави девони вазирони Қирғизистон рӯзи 12-уми октябр хабар дод.

Рӯзҳои 28 то 30-юми сентябри соли ҷорӣ дар шаҳри Женеваи Швейтсария даври аввали гуфтугӯҳои байни ҳайати Қирғизистон ва ширкати Сентерра дар робита ба кони тилои Қумтор баргузор шуд. Ҷониби Қирғизистон ҷузъиёти ин гуфтугӯҳоро ошкор накард.

Оқилбек Ҷабборов рӯзи 12-уми октябр гуфт, кишвараш тасмим дорад, кони тилоро мустақилона коркард кунад.

Қумтор бузургтарин кони тиллои Қирғизистон аст, ки солона аз он 15-17 тона тило истихроҷ мешавад. Ширкати Сентерра ба коркарди кони мазкур машғул буд ва Қирғизистон дар ширкат 26 дарсад саҳм дошт. Сиёсатмадорони мухолиф дар гузашта борҳо талаб карда буданд, ки кони тилло миллӣ карда шавад.

Баҳори соли 2021 вазъ атрофи кони тиллои Қумтор якбора тағйир кард. Мақомоти Қирғизистон моҳи майи соли ҷорӣ дар кон мудирияти берунӣ таъйин карданд. Комисияи давлатии Қирғизистон аз ширкати Сентерра талаб кард, ки бояд 4 миллиарду 252 миллион доллар андоз ва ҷуброни зарари муҳитзистӣ пардозад.

Ширкати Сентерра даъвои ҷониби Қирғизистонро дар бораи расонидани зарар ба муҳити зист рад мекунад. Ин ширкат ҷониби Қирғизистонро ба додгоҳи байналхалқии ҳакамӣ кашидааст.

Эътирози ҳазорон нафар ба тарафдорӣ аз Михаил Саакашвилӣ

Дар шаҳри Тифлиси Гурҷистон ҳазорон сокин ба ҷонибдорӣ аз президенти пешини ин кишвар Михаил Саакашвилӣ ба кӯча баромаданд.

Дар ибтидои моҳи октябр Саакашвилиро дар Тифлис боздошт ва ҳабс карданд.

Ба иттилои расонаҳо, дар ин гирдиҳамоӣ наздики 50 ҳазор кас ширкат кард. Бархе аз сокинон дар даст шиорҳои "Озодӣ ба Миша!", "Нест бод таъқиби сиёсӣ" доштанд.

Ника Мелия, ҳамсафи Саакашвилӣ паёми ӯро қироат кард. Саакашвилӣ дар паёмаш мухолифонро ба иттиҳод даъват карда, хостааст, рӯзи 30-уми октябр дар интихоботи такрорӣ ба номзадҳои ҳизби "Ҳаракати воҳиди миллӣ" раъй диҳанд.

Ҷамъомадагон аз мақомоти Гурҷистон озодии Саакашвилиро талаб карданд.

Саакашвилӣ рӯзи 1-уми октябр аз Украина ба Гурҷистон омад ва ҳамон рӯз боздошт шуд. Як рӯз баъди боздошти Саакашвилӣ дар Гурҷистон интихоботи порлумон доир гардид. Нисбати Саакашвилӣ бо айби убури ғайриқонунии марзи давлатӣ парванда боз кардаанд.

Узбекистон: Ду занро бо гумони кӯдакфурӯшӣ боздошт карданд

Сокини Қашқадарёи Узбекистон ҳангоми талоши фурӯши кӯдаки 5-рӯзааш дар ивази 5 ҳазор доллар боздошт шуд.

Пештар аз ин як сокини Андиҷон ҳангоми фурӯши фарзандаш дар ивази 18 ҳазор доллар боздошт шуда буд.

Мақомоти қудратии Узбекистон занонро ҳангоми гирифтани маблағ боздошт кардаанд. Тафтиш нисбати ин ду ҳодиса шуруъ шудааст.

Баъди қариб 1,5 сол рӯзноманигорон дубора ба порлумони Қазоқистон роҳ ёфтанд

Рӯзи 14-уми октябр дар пойтахти Қазоқистон нахустин ҷаласаи сенати он кишвар дар шакли офлайн баргузор шуд, ки дар он рӯзноманигорон ҳам ҳузур доштанд. Ин бори аввал буд, ки дар як солу 7 моҳи охир намояндагони расонаҳо дубора ба бинои сенат роҳ дода шуданд.

Вуруд ба палатаи болоии порлумони Қазоқистон, ба далели пешгирӣ аз паҳншавии вабои коронавирус, барои расонаҳо маҳдуд шуда буд.

Бо ин вуҷуд, ба сенати Қазоқистон аз миёни намояндагони расонаҳо танҳо афродеро иҷозаи вуруд доданд, ки воксини зидди коронавирус гирифтаанд.

Охири моҳи сентябри соли ҷорӣ ҷомеаи рӯзноманигории Қазоқистон аз президенти он кишвар Қосимҷомарт Тоқаев даъват кард, ки дастрасии дубораи рӯзноманигоронро ба бинои ҳукумату порлумон барқарор кунад.

Муаллифони номаи дастаҷамъӣ навишта буданд, ки шуруъ аз 27-уми сентябр дар Қазоқистон баргузории ҷамъомадҳо бо ҳузури одамони зиёд иҷозат шудааст. Аммо барои рӯзноманигорон ва кормандони расонаҳо тағйироте нест. Муаллифон навиштанд, ки порлумон ва ҳукумат мисли пешин баста ҳастанд ва дар ҷаласаҳои онлайнӣ рӯзноманигорон на ҳамеша имкони суолу ҷавоб доранд. Ин ҳам дар ҳоле, ки дархостҳои рӯзноманигорӣ бештари вақт бе посух мемонанд.

"Вазъи баамаломада ҳуқуқҳои касбии мо ва дастрасии ҷомеа ба иттилоъро маҳдуд мекунад", - навишта шуда буд дар нома.

Зери ин нома рӯзноманигорон, кормандони дигари расонаҳо ва созмонҳои ҳомии ҳуқуқ имзо гузоштаанд.

Алексей Тсой, вазири ҳифзи тандурустии Қазоқистон рӯзи 27-уми сентябр гуфта буд, ки ба зудӣ дархости рӯзноманигорон дар бораи дастрасӣ ба биноҳои ҳукумат ва порлумон баррасӣ хоҳад шуд.

Ёфтҳои бештар

XS
SM
MD
LG