Вазири тандурустӣ, Ҷамолиддин Абдуллозода, баъди бештар аз як моҳ ба гузориши Радиои Озодӣ дар бораи латукӯб шуданаш аз тарафи хоҳарзодаҳои раиси ҷумҳурии Тоҷикистон вокуниш кард, аммо ба таври рӯшан онро тасдиқ ё инкор нанамуд.

Ӯ рӯзи 25-уми август дар суҳбат бо "Ҷумҳурият", нашрияи расмии ҳукумати Тоҷикистон, танҳо ишора кардааст, ки он замон дар сафари корӣ дар Маскав қарор дошт. Ин дар ҳолест, ки гузориши Радиои Озодӣ 26-уми июл нашр шуда, аммо ба иттилои манобеи мо, латукӯби вазир 20-уми июл иттифоқ уфтодааст.

Ҷамолиддин Абдуллозода хабари латукӯб шуданашро "овозаи ғайриинтизор" шахсан барои худаш номидааст.

"Аз овозаҳо... хабар ёфтам. Чи ҳам мегуфтам, дар ҳоле ки онҳо асоси воқеӣ надоранд ва гузашта аз ин лоиқи вокуниш ҳам нестанд. Ҳамонҳое, ки чунин овозаҳоро паҳн карданд, бояд мутаваҷҷеҳ мешуданд, ки ман замони дар сафари корӣ қарор доштанам, дар ҷаласаҳои ситоди вазорат тариқи онлайн иштирок мекардам", -- гуфтааст ӯ дар мусоҳиба бо "Ҷумҳурият".

Манобеи Радиои Озодӣ мегӯянд, пас аз як ҳафтаи латукӯб шудан вазири тандурустӣ дар ҷаласаҳои онлайн пайдо шуд, вале чеҳраашро нишон намедод.

Абдуллозода дар мусоҳибаи худ нагуфтааст, ки ӯ чанд муддат (аз кай то кай) дар Маскав буд ва бо киҳо суҳбат дошт. То ин дам ҳеч далел ё аксу наворе низ дар бораи сафари ӯ ба Русия ва мулоқоташ бо намояндагони соҳаи тандурустии он кишвар дар мавриди дарёфти ваксинаи “Спутник-V” нашру паҳн нашудааст.

Пештар низ дафтари матбуоти вазорат айни гапро ба матбуот гуфта буд, вале он замон даҳҳо нафар дар шабакаҳои иҷтимоӣ пурсиданд, ки агар хабари латукӯб шудани вазир нодуруст аст, пас, худи Абдуллозода дар куҷост ва чаро дар наворе худро нишон намедиҳад?

Дафтари матбуоти Вазорати тандурустӣ танҳо рӯзи 3-юми август бо нашри чанд акс хабар дод, ки Ҷамолиддин Абдуллозода бо шаҳрвандон ҳамсуҳбат шуда, арзи онҳоро шунидааст.

Ба иттилои дарёфтии Радиои Озодӣ, вазири тандурустӣ Ҷамолиддин Абдуллозода 20-уми июл аз сӯи се хоҳарзодаи раиси ҷумҳурии Тоҷикистон латукӯб шудааст.

Зиёда аз панҷ манбаи Радиои Озодӣ гуфтанд, ки Фахриддин, Фаррух ва Зиёдалӣ Сафаровҳо баъд аз фаҳмидани марги модарашон Қурбонбӣ Раҳмонова, хоҳари президент, ба пизишкон, аз ҷумла вазири тандурустӣ ҳамла кардаанд. Норозигии онҳо гуё замоне сар задааст, ки пизишкони хориҷӣ гуфтаанд, шеваи табобати хоҳари президент дар беморхонаи ҳукуматӣ нодуруст аст.

Аммо яке аз шоҳидони ҳодиса, ки пойфишорӣ дошт, пизишкон хоҳари президентро ташхиси нодуруст нагузоштаанд, ин занозаниро "беодобии хешони бемор" номид. Вай, инчунин, афзуд, дар табобати бемор на танҳо пизишкон аз Русия, Узбекистон ва Олмон, балки аз Чин низ саҳм доштанд ва онҳо шеваи табобатро нодуруст нашумурдаанд.

Ба иттилои манобеъ, дар он муноқиша ҷоғи Ҷамолиддин Абдуллозода осеб дида, Холмуҳаммад Раҳимзода, мудири Маркази тиббии назди Дастгоҳи иҷроияи президент аз сараш зарб хӯрда буд.

Бар илова, ду нафар дар суҳбат бо Радиои Озодӣ тасдиқ карда буданд, ки рӯзҳои 28 ва 29-уми июл аз вазир дар хонаи ӯ аёдат кардаанд. Ба гуфтаи яке аз онҳо, вазир дар хонааш табобат мегирифт ва нав гипсро аз манаҳаш гирифта буданд.

Ҷамолиддин Абдуллозодаи 54-сола дар авҷи пандемияи коронавирус дар моҳи майи соли гузашта вазири тандурустӣ таъйин шуд. Мунтақидонаш ӯро ба пинҳонкорӣ дар бораи теъдоди беморон ва қурбониёни коронавирус муттаҳам мекунанд. Вале худи ӯ ин ҳамаро борҳо рад карда, гуфтааст, роҳашон дар мубориза бо COVID-19 дуруст буд.

Як мақоми амрикоӣ дар гуфтугӯ бо Радиои Аврупои Озод/Радиои Озодӣ гузоришҳо дар бораи тавофуқи Амрико ва Эрон бар сари қатъи ҳамлаҳои дуҷониба ва вохӯрии ҳайатҳоро тасдиқ кард.

Ин мақоми амрикоӣ 29-уми июн гуфт, "гуфтугӯҳои фаннӣ қарор аст дар бораи ҳамаи бахшҳои тафоҳумнома идома пайдо кунад. Ду тараф феълан ақиб меистанд ва киштиҳо метавонанд озодона аз тангаи Ҳурмуз убур кунанд."

Пештар пойгоҳи Аксиос ва хабаргузории Фаронса низ ба нақл аз мақомҳои амрикоӣ дар ин бора гузориш дода буданд. Аксиос навишт, намояндагони Амрико ва Эрон ният доранд, ки рӯзи сешанбеи 30-юми июн дар Доҳа, пойтахти Қатар, дидор кунанд.

Хабаргузории Олмон низ ба нақл аз як мақоми аршади давлати Амрико гузориш дод, ки Вашингтон интизор дорад гуфтугӯҳои бештаре дар рӯзҳои оянда анҷом шавад. Маҳалли ин гуфтугӯҳо эълом нашудааст.

Ин мақом ба хабаргузории Олмон гуфт, "ҳеҷ чиз лағв нашудааст."

Мақомоти Эрон дар ин бора изҳори назаре накардаанд ва мавқеи Теҳрон дар бораи идомаи музокирот феълан рӯшан нест.

Наҷотбахшон ва марзбонони тоҷик ҳуҷҷатҳо ва дафтари ёддошту компютери Алишер Мизонабот, раиси Вилояти Мухтори Кӯҳистони Бадахшонро аз дарёи Панҷ пайдо кардаанд. Аммо бо гузашти қариб ду ҳафта, то ҳол ҷасад ё пайкари ӯ ва ҳамсару духтари дусолааш ёфт нашудаанд.

Дар аксҳое, ки рӯзи 28-уми июн ба дасти Радиои Озодӣ расид, дида мешавад, ки шиносномаи дохилӣ, хориҷӣ ва дипломатии Алишер Мирзонаботро аз об баровардаанд.

Ҳамчунин сумка, дафтари ёддошт ва ноутбуки раиси ВМКБ-ро низ пайдо кардаанд.

Рӯзи 28-уми июн дар Кумитаи ҳолатҳои фавқулода ба Радиои Озодӣ гуфтанд, ҷустуҷӯи пайкари Алишер Мирзонабот ва ҳамсару духтараш идома дорад. Рӯзҳои 25 ва 26-уми июн ҷасади Садоншо Ҷанобалишо, ёвари раиси вилоят ва Сино Муборакшоев, ронандаи ӯро пайдо карда буданд.

Мошини хидматии раиси вилояти Бадахшон рӯзи 17-уми июн дар ҳудуди ноҳияи Дарвоз ба дарёи Панҷ сарозер шуд. Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Кумитаи ҳолатҳои фавқулода мегӯяд, дар ҳоли ҳозир беш аз 200 маъмури наҷот дар рӯйи об ва зери он дар ҳудуди ноҳияҳои Дарвозу Шамсиддин Шоҳин ва мавзеъҳои дигар ҷасадҳоро ҷустуҷӯ доранд.

Қонуни нави афв нисбати Зайд Саидов, соҳибкор ва вазири пешини саноати Тоҷикистон татбиқ нашудааст.

Яке аз наздикони Зайд Саидов бо шарти фош нашудани номаш 28-уми июн ба Радиои Озодӣ гуфт, мақомот ба далели будани иттиҳоми таҷовуз ба номус дар парвандаи Саидов, ӯро шомили қонуни афв накарданд.

"Иттиҳоми таҷовуз аз аввал барои ҳамин ҳолатҳо барномарезӣ шуда буд. Мақсад ҳам беобрӯ кардан ва ба афвҳо шомил нашудани Зайд Саидов буд", - афзуд ин хешованди соҳибкори зиндонӣ.

Мақомот дар ин бора чизе нагуфтаанд.

ИНЧУНИН, БИХОНЕД:

Киро афв мекунанд, киро не? Шарҳи баъзе аз бандҳои қонуни нав

Зайд Саидов 68 сола аст ва аз соли 2013 дар ҳабсу зиндон ба сар мебарад. Қонуни нави афв, ки 16-уми июн тасдиқ шуд, озод кардани шахсони аз 55-сола болоро пешбинӣ мекунад. Вале қонун барои баъзе иттиҳомҳои вазнин маҳдудият ҷорӣ кардааст.

Зайд Саидов, соҳибкор ва вазири пешини саноати Тоҷикистон, моҳи майи соли 2013, ҳангоми бозгашт аз Фаронса дар фурудгоҳи Душанбе дастгир шуд.

Мақомот ӯро ба "суистифода аз мақом, бисёрзанӣ, ришвахорӣ, таҷовуз ба номус, сохтакории ҳуҷҷат, тасарруфи пули давлат ва саркашӣ аз пардохти андоз" гунаҳкор ва ба 29 сол зиндон маҳкум карданд.

Худаш ва тарафдоронаш иттиҳомҳоро беасос хонда, гуфтанд, ягона сабаби зиндонӣ шудани ӯ талош барои таъсиси ҳизби сиёсии "Тоҷикистони нав" буд.

Созмонҳои байнулмилалии мудофеи ҳуқуқи инсон Зайд Саидовро маҳбуси сиёсӣ дониста, борҳо бозбинии ҳукми ӯ ва раҳоияшро талаб карданд, аммо дар Тоҷикистон нодида гирифтанд.

Қонуни нави афв зиёда аз 18 ҳазор касро фаро мегирад. Аз ҷумла, 11 ҳазору 305 нафар аз зиндону боздоштгоҳ ва муассисаҳои сукунатӣ озод ва ё парвандаашон қатъ шуда, муҳлати ҷазои 6 ҳазору 733 тани дигар кам мегардад.

Мақомот мегӯянд, қонуни афв асосан нисбат ба занону ноболиғон ва занҳое, ки ҷинояти вазнин накардаанд, татбиқ хоҳад шуд.

Шумори қурбониёни заминларза дар Венесуэла ба 1430 нафар расид. Дар ин ҳодиса ҳамчунин 3238 кас маҷруҳ шудаанд.

Нашрияи The Guardian аз қавли наздикони гумшудагон навиштааст, қариб 69 ҳазор каси дигар то ҳоло бедарак ҳастанд.

Делси Родригес, иҷрокунандаи вазифаи президенти Венесуэла гуфт, то ҳоло 24 кишвар 2700 наҷотдиҳандаро барои кумак фиристодаанд.

Ба гузориши CNN, аз вақти рух додани ду заминларзаи сахт аллакай 72 соат гузашт ва баъди сипарӣ шудани ин муҳлат имкони зинда ёфтани сокинон аз зери харобаҳо хеле кам аст.

Пештар мудири Салиби Сурх дар қитъаи Амрико гуфта буд, зилзилаҳои такрорӣ кори наҷотдиҳандаҳоро мушкил кардааст.

Рӯзи 25-уми июн замин дар атрофи Каракас, пойтахти Венесуэла, ларзид ва маконҳои зиёдеро хароб кард.

Хадамоти заминшиносии Амрико гуфт, шояд ҳазорҳо нафар дар ин ҳодиса ҷон бохта бошанд.

Пештар мақомоти Венесуэла эълон карда буданд, ки 250 бино зиён дида ё пурра хароб шудааст ва садҳо нафар зери вайронаҳо мондаанд.

Созмони милал зарари расида аз ин ҳодисаро 6,7 миллиард доллар ҳисоб кардааст, ки ба 6 дарсади Маҷмӯи маҳсулоти дохилии Венесуэла баробар аст.

Сипоҳи посдорони инқилоби исломӣ бомдоди 28-уми июн эълон кард, ки дар посух ба зарбаҳои Амрико ба чанд нуқта дар Эрон, ба пойгоҳҳои ИМА дар Кувайт ва Баҳрайн ҳамла кардааст.

Дар баёнияи Сипоҳ омадааст, ин амалиёт байни соатҳои ду то сеи бомдод анҷом шуда ва ҳашт зерсохтори муҳими низомии Амрико дар ин ду пойгоҳ "нобуд" шудаанд. Ин иддао то кунун аз сӯи манобеи мустақил ё мақомоти амрикоӣ тасдиқ нашудааст.

Фармондеҳии марказии Амрико дар Ховари Миёна ё СЕНТКОМ дар паёми тозае дар шабакаи X навишт, дар вокуниш ба ҳамлаи паҳподии Эрон ба нафткаши "Кико", ба 10 ҳадаф дар дохил ва атрофи тангаи Ҳурмуз зарба задааст.

Як мақоми амрикоӣ 28-уми июн бо шарти фош нашудани номаш ба хабаргузории Ройтерз гуфт, Эрон ба самти кишварҳои ҳамсоя, аз ҷумла Баҳрайн ва Кувайт чанд мушак ва паҳпод партоб кардааст.

Ба гуфтаи ин мақомдор, вазъият ҳамчунон дар ҳоли тағйир аст, аммо то кунун ҳеч гузорише аз талафоти нерӯҳои амрикоӣ ё хисороти қобили таваҷҷуҳ ба таъсисоти ИМА дар Ховари Миёна дарёфт нашудааст.

Бегоҳи 27-уми июн заминларза шаҳри Душанбе ва чанд минтақаи дигари Тоҷикистонро ларзонд.

Ба гуфтаи сокинон ва ҳам марказҳои сабти зилзила, ларзиши замин соати 18:35 сабт шудааст.

Дар пайи ларзиши замин, баъзе сокинон дар Душанбе аз хонаҳои худ берун баромаданд.

Кумитаи ҳолатҳои фавқулодаи Тоҷикистон дар хабарномае навишт, қувваи зилзила дар шаҳри Хоруғ 4-5, Душанбе 4, Хуҷанд 3 ва Кӯлоб 4 баллро ташкил дод.

Манбаъ мегӯяд, маркази заминларза дар ҳудуди Афғонистон буд.

Мақомоти Тоҷикистон мегӯянд, дар ин ҳодиса талафоти ҷонӣ ё хисорот сабт нашудааст.

Тоҷикистон аз ҷумлаи кишварҳое мебошад, ки дар баробари зилзила осебпазир мебошанд.

Аз редаксия: хабар субҳи 28-уми июн бо назари Кумитаи ҳолатҳои фавқулода барӯз шудааст.

Кумитаи ҳолатҳои фавқулодаи Тоҷикистонмегӯяд, "ҷасади мушовири раиси ВМКБ, Садоншо Ҷанобалишо" рӯзи 26-уми июн ёфт шудааст.

Ба иттилои ин ниҳод, ҷасади вай 20 километр пойинтар аз ҷойи садамаи мошини раиси Вилояти Мухтори Кӯҳистони Бадахшон пайдо шудааст.

Сухангӯи кумитаи мазкур Ориф Нозимиён дар шабакаи иҷтимоии Фейсбук навишт, ҷустуҷӯи ҷасади раиси вилоят ва дигар ҳамроҳонаш идома дорад.

Пештар аз ин, рӯзи 26 Нозимиён аз пайдо шудани ҷасади Сино Муборакшоев, ронандаи раиси ВМКБ хабар дода буд.

Мошини хидматии раиси вилояти Бадахшон рӯзи 17-уми июн дар ҳудуди ноҳияи Дарвоз ба дарёи Панҷ сарозер шуд ва 10 рӯз аст, ки ҷустуҷӯйи пайкари онҳо идома дорад.

Дар дохили мошин ба ҷуз Алишер Мирзонаботу ҳамсараш Амина Амонуллоева ва духтари дусолааш Орифа, ду марди дигар – ёвараш Садоншо Ҷанобалишо ва ронандааш Сино Муборакшоев – буданд. Онҳо аз Душанбе ба Хоруғ мерафтанд.

Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Кумитаи ҳолатҳои фавқулода мегӯяд, дар ҳоли ҳозир беш аз 200 маъмури наҷот дар рӯйи об ва зери он дар ҳудуди ноҳияҳои Дарвозу Шамсиддин Шоҳин ва мавзеъҳои дигар ҷасадҳоро ҷустуҷӯ доранд.

Пайкар ё ҷасади Сино Муборакшоев, ронандаи раиси Вилояти Мухтори Куҳистони Бадахшон аз дарёи Панҷ ёфт шудааст.

Рӯзи 25-уми июн дафтари матбуоти Кумитаи ҳолатҳои фавқулода хабар дод, ки дар ҷараёни ҷустуҷӯи мошини раиси ВМКБ ва ҳамроҳонаш аз дарёи Панҷ як ҷасад ёфтанд ва ташхис кӣ будани ӯро муайян мекунад.

Рӯзи 26-уми июн Ориф Нозимиён, сухангӯи дафтари матбуоти Кумитаи ҳолатҳои фавқулода ба Радиои Озодӣ гуфт, ташхис муайян кард, ки ҷасади ёфтшуда Сино Муборакшоев, ронандаи раиси ВМКБ аст.

Сухангӯи Кумита ҳамчунин гуфт, 26-уми июн боз як ҷасади дигар пайдо карданд ва "ташхис то ҳоло кӣ будани ӯро муайян накардааст".

Дар ҳамин ҳол як манбаи дигар дар ниҳодҳои интизомии минтақаи Кӯлоб гуфт, ҷасади ёфташударо ба шаҳри Кӯлоб бурдаанд. "Барои муайян кардани шахсияти ин ҷасад наздикони ҳамаи касонеро, ки бо Алишер Мирзонабот буданд, даъват кардаанд", - гуфт як манбаи огоҳ ба Радиои Озодӣ.

Мошини хидматии раиси вилояти Бадахшон рӯзи 17-уми июн дар ҳудуди ноҳияи Дарвоз ба дарёи Панҷ сарозер шуд ва беш аз як ҳафта боз ҷустуҷӯйи пайкари онҳо идома дорад.

Дар дохили мошин ба ҷуз Алишер Мирзонаботу ҳамсараш Амина Амонуллоева ва духтари дусолааш Орифа, ду марди дигар – ёвараш Садоншо Ҷанобалишо ва ронандааш Сино Муборакшоев – буданд. Онҳо аз Душанбе ба Хоруғ мерафтанд.

Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Кумитаи ҳолатҳои фавқулода мегӯяд, дар ҳоли ҳозир беш аз 200 маъмури наҷот дар рӯйи об ва зери он дар ҳудуди ноҳияҳои Дарвозу Шамсиддин Шоҳин ва мавзеъҳои дигар ҷасадҳоро ҷустуҷӯ доранд.

Содир Ҷабборов (Жапаров), раисҷумҳури Қирғизистон, аз мардуми кишвараш хостааст, пеш аз гирифтани қарзи бонкӣ барои тӯю маъракаҳо фикри бозгардондани онро бикунанд.

Хабаргузории “24.kg” рӯзи 26-уми июн навишт, Ҷабборов дар ин бора ҳангоми мулоқоташ бо сокинони ноҳияи Оқтолаи вилояти Норин гап задааст.

Як сокини Норин гуфтааст, баъзе аз одамон барои саривақт насупурдани қарз ба “феҳристи сиёҳ”-и бонкҳо ворид карда мешаванд.

Ҷабборов дар посух гуфтааст: “Қарзи бонкӣ кумаки бебозгашт нест. Баъзеҳо қарз гирифта тӯй мегузаронанд, вале баъди тӯй онро баргардонида наметавонанд.”

Расонаҳои Қирғизистон навиштанд, ки мавзӯи қарзҳои бонкӣ барои барпо кардани тӯй дар ин кишвар дар гузаштаҳо ҳам матраҳ шудаст.

Кумитаи омори миллии Қирғизистон гуфтааст, соли 2025 ташкилоти қарзӣ ба сокинон ба маблағи 86 миллиард сом пул додаанд. Бахши асосии маблағҳо барои барпо кардани тӯй истифода мешаванд.

Дар Қирғизистон низ ба мисли кишварҳои дигари Осиёи Марказӣ тӯю арӯсиҳо аз бахши бисёр серхароҷоти маъракаҳо ба ҳисоб мераванд.

Ширкати Apple замимаи ВКонтакте, шабакаи иҷтимоии русиро, ки шаҳрвандони Тоҷикистон ҳам аз он истифода мекунанд, аз App Store пок кардааст. Инчунин, барномаҳои дигари вобаста ба VK Group дар дастгоҳҳои Apple боргирӣ намешаванд.

ВКонтакте, ки пойгоҳи иҷтимоии маъруф дар Русия ба шумор меравад, аз соли 2006 фаъол аст. Ин ширкати русӣ рӯзи 25-уми июн дар изҳороте гуфт, Apple бидуни шарҳ ё огаҳӣ замимаи онро ҳазф кард.

Ин пойгоҳ гуфт, дастрасии даҳҳо миллион корбараш ба шабакаҳои иҷтимоӣ, паёмрасонҳо, пойгоҳҳои видеоӣ, имейл ва маҳсулоти омӯзишии онҳо низ номумкин гардид.

Дар Кремл қарори Apple-ро барои ҳазфи ВКонтакте "аҷиб" номиданд. Сухангӯи Кремлин гуфт, аз ширкати амрикоӣ тақозо хоҳанд кард, ки қарорашро шарҳ диҳад.

Ширкати Apple дар оғози моҳи июн нисбат ба шабакаи иҷтимоии русии Max, ки дар пушти он ҳукумати Русия истодааст, тасмими ҳамсон гирифта буд.

Мақомоти Русия давоми моҳҳои зиёд аз ҳама шаҳрвандон талаб мекарданд, ки ба пойгоҳи Max бипайванданд ва дар ин байн фаъолияти WhatsApp ва Telegram-ро ҳам ба шиддат маҳдуд карданд.

Ким Кон Ҳи, ҳамсари Юн Сок Ёл, раисҷумҳури пешини Кореяи Ҷанубӣ, бо гуноҳи ришвагирӣ ба 7 сол зиндон маҳкум шуд.

Додрас рӯзи 26-уми июн гуфт, "ӯ барои иҷрои хоҳишҳои сиёсии дигарон ҷавоҳироти гаронбаҳо гирифт." Худи зан гуфтааст, аз рӯйи ҳукм шикоят хоҳад кард.

Додраси додгоҳи ноҳияи марказии Сеул, пойтахти Кореяи Ҷанубӣ, гуфт, "Ким Кон Ҳи бо истифода аз қудраташ ба ҳайси ҳамсари президент дар дарёфти вазифаву мақомҳо дар порлумон мусоидат карда, дар иваз подоши гаронбаҳо гирифтааст".

"Ӯ беибо ришваҳои зиёде қабул мекард, дар ҳоле ки барои одамони одӣ барои харидани чунин чизҳо як умр вақт зарур аст," -- гуфт додрас рӯзи 26-уми июн.

Дар миёни ҷавоҳироти гаронбаҳое, ки ӯ гирифтааст, аз ҷумла гарданбанди маъруфи Van Cleef & Arpels, дастпонаи ‌Tiffany, гӯшвори Graff ёд шудааст. Инчунин ӯ як сангпушти тилоӣ, сумкаи ширкати Dior ва соати ширкати Vacheron Constantin-ро бо арзиши беш аз 25 ҳазор доллар ва як наққошӣ гирифтааст.

Додрас гуфт, рафтори ҳамсари собиқ президент боварро ба шаффофияти таъйини мансабдорон ба вазифаҳои давлатӣ аз байн мебарад.

Дар миёни онҳое, ки "пора" додаанд, раиси як ширкати бинокорӣ будааст, ки хоҳони мансаб барои домодаш шудааст. Ё як рӯҳоние, ки хостааст шабакаи нуфузи худро дар миёни мақомдорони Кореяи Ҷанубӣ тавсеа бидиҳад.

Додгоҳ қарор кард, ки ин зан ба иловаи 7 сол зиндон ҷарима пардохт кардаву тамоми тӯҳфаҳои гирифтаашро баргардонад.

Худи зан дар додгоҳ иттиҳомҳоро рад карда, гуфтааст, бо ҳукм розӣ нест ва бозбинияшро талаб хоҳад кард.

Мурофиаи мазкур дар ҳоле барпо шуд, ки Ким Кон Ҳи барои муомилаҳои ғайриқонунӣ дар бозори саҳом ва гирифтани ришва аз Калисои муттаҳидаи Кореяи Ҷанубӣ моҳи апрели имсол ба чор сол ҳабс маҳкум шуда, дар зиндон қарор дошт.

Ҳамсари ӯ, президенти собиқи Кореяи Ҷанубӣ, моҳи феврал барои ташкили ошӯби кӯтоҳмуддат ва бедалел ҷорӣ кардани қуюди ҳарбӣ дар соли 2024 ба ҳабси абад маҳкум шудааст.

Маъмурони наҷот дар Венесуэла садҳо шахси бенишоншударо дар зери вайронаҳо ҷустуҷӯ мекунанд. Рӯзи 25-уми июн замин дар атрофи Каракас, пойтахти Венесуэла, ларзид ва маконҳои зиёдеро хароб кард.

Хадамоти заминшиносии Амрико гуфт, шояд ҳазорҳо нафар дар ин ҳодиса ҷон бохта бошанд. Вазорати беҳдошти Венесуэла хабар дод, ки то кунун ҷасад ё пайкари беш аз дусад нафарро пайдо карданд.

Пештар мақомоти ин кишвар эълон карда буданд, ки 250 бино зиён дида ё пурра хароб шудааст ва садҳо нафар зери вайронаҳо мондаанд.

Венесуэла иқтисоди заиф дорад ва ниҳодҳои ин кишвар тавони кумаки фаврӣ ба зиёндидагонро надоранд. Пасларзаҳо низ кори наҷотдиҳандагонро сахттар кардааст.

Як сокини Венесуэла, ки аз зери харобаҳо солим берун овардаанд, гуфт: "Чор соат зери вайрона будам. Намедонам кормандони Кумитаи ҳолатҳои фавқулода ё идораи дигар наҷотам доданд. Онҳо дастгоҳи зиёд надоштанд. Онҳо натавонистанд бо таҷҳизот бетонҳоро шикананд, ҳамаро бо даст карданд. Ман ҳам талош кардам, ки роҳ боз кунам. Дар хонаам ҷиҳози зиёд доштам, ки онҳо маро аз девори чаппашуда муҳофизат карданд."

Embed ба дигарон фиристед

"Чор соат зери вайрона будам, базӯр наҷот доданд"

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:08 0:00

Линки мустақим

• 240p | 6.1MB
• 360p | 10.4MB
• 480p | 17.0MB
• 720p | 29.1MB
• 1080p | 51.4MB

Делси Родригес, раисҷумҳури муваққати Венесуэла, ба Ла-Гуаяра рафт, ки бештар зиён дидааст: "Мо аз ҷомеаи ҷаҳонӣ кумак хостем. Нахустин наҷотдиҳандагон аз ҷумҳурии Доминикин ҳоло мерасанд ва кумакҳои кишварҳои дигар дар роҳ аст. Беҳтарин орзуву дуои мо ин аст, ки мардону занони Венесуэла саломат бошанд.”

Эл Салвадор ва Мексика рӯзи 25-уми июн гурӯҳи наҷотдиҳандагонро ба Венесуэла фиристоданд. Иёлоти Муттаҳида таҳримҳоро нисбат ба Венесуэла сабук кард ва интиқоли пулу молу маҳсулотро дар ҳолатҳои изтирорӣ ба ин кишвар, ки то кунун мамнуъ буд, иҷозат дод.

Тоҷикистон барои бунёди даҳ мактаби нав, аз Бунёди Кувайт барои рушд 19,2 миллион доллар вом ё қарз мегирад.

Ба гузориши Сафорати Тоҷикистон дар Кувайт, "муддати қарзи мазкур 26 сол буда, 5 соли он давраи имтиёзнок ё давраи танаффус мебошад".

Қарз бо баҳраи 1 дарсади солона дода мешавад.

Манбаъ мегӯяд, қарор аст бо ин маблағ дар вилоятҳои Суғду Хатлон ва ноҳияҳои тобеи ҷумҳурӣ даҳ мактаби нав сохта шавад.

Камбуди мактаб аз мушкилиҳои асосии низоми маорифи Тоҷикистон гуфта мешавад.

Мақомот мегӯянд, бо вуҷуди ҳамасола сохта шудани мактабҳои нав, нарасидани ҷойи нишаст ё аз меъёр зиёд будани муҳассилин дар синхфона дида мешавад.

Вазорати корҳои хориҷии Ҷумҳурии исломии Эрон изҳороти дабири кулли НАТО дар бораи истифодаи Амрико аз бархе пойгоҳҳои ин паймони низомӣ дар Аврупо дар ҷанги ахир бо Эронро "эътироф ба ҳамдастии фаъолонаи ин созмон дар иртикоби таҷовузи низомӣ алайҳи як кишвари мустақил" хонд ва хостори посухгӯии аъзои ин паймони низомӣ шуд.

Марк Рутте, дабири кулли НАТО, дар посух ба интиқодҳои Доналд Трамп ба ҳамкорӣ накардани ин паймони низомӣ бо Амрико дар ҷараёни ҷанги ахир бо Эрон гуфта буд, дар вақти ин ҷанг, кишварҳои аврупоии аъзои НАТО ҳамкории бисёр зиёде бо Амрико доштанд ва чаҳор то панҷ ҳазор парвози амалиётии артиши Амрико аз пойгоҳҳои аврупоӣ, ва аз ҷумла, Италия анҷом шуда буд.

Мақомҳои Италия бо радди ин изҳорот гуфтаанд, ки танҳо бар асоси ӯҳдадориҳои дутарафа бо Вашингтон, иҷозаи парвозҳои боркашонӣ ва пуштибониро дода буданд ва ҳеч амалиётӣ низомӣ аз пойгоҳҳо ва фурудгоҳҳои ин кишвар анҷом нашудааст.

Дар замони ҷанги Эрон, чандин муттаҳиди аврупоии Амрико, аз ҷумла, Италия ва Испания бо ин ҷанг мухолифат карда буданд ва бархе дигар чун Британия, Олмон ва Фаронса ҳам бо мавзеъгирии эҳтиёткорона, худро аз ворид шудан ба ин ҷанг дур нигаҳ доштанд. Мавзуе, ки боиси ранҷиш ва гилаи сахти Доналд Трамп шуд.

Кумисюни Аврупо дар ҳамкорӣ бо кишварҳои Осиёи Марказӣ ва Қафқози Ҷанубӣ аз эҷоди як пойгоҳи табодули маълумот ва мувофиқа барои ҷалби 2 миллиард евро сармояи ниҳодҳои молии байнулмилалӣ хабар дод. Ин талошҳо барои фаъол кардани роҳҳо ва додугирифтҳои байни ин кишварҳо равона мешаванд.

Дар ин бора рӯзи 23-юми июн дар ҷаласае бо иштироки Марта Кос, комиссар оид ба ҳамкорҳои байнулмилалӣ ва Йозеф Сиклеа, комиссар оид ба нақлиёти босубот ва мақомоту намояндагон аз кишварҳои Осиёи Марказӣ ва Қафқози Ҷанубӣ хабар доданд.

Дар иттилоияи расмӣ гуфта шуд, ки дар доираи тарҳи стратегии Иттиҳоди Аврупо бо номи “Дарвозаҳои ҷаҳонӣ” бо ширкати вазирони нақлиёт ва мақомоти дигари Қазоқистон, Қирғизистон, Молдова, Тоҷикистон, Туркманистон, Туркия, Украина ва Узбекистон, намояндагони кишварҳои Гурӯҳи ҳафт кишвари пешрафтаи саноатӣ ва созмонҳои молии байнулмилалӣ ҷаласа барпо шуд. Аз Тоҷикистон дар ҷаласа Беҳзод Икромов, муовини раиси ҳайати намояндагии Иттиҳоди Аврупо дар ин кишвар суханронӣ кардааст.

Дар ин пойгоҳи ягона, қарор аст, ҷараёни ворид шудани сармояҳо, фаъолиятҳои сиёсӣ дар соҳаи нақлиёт, энержӣ, мухобироти рақамӣ ва тиҷорати байни кишварҳои ширкатдори ин тарҳ ҳамоҳанг шавад.

Кумисюни Аврупо гуфтааст, барои беҳбуди зербунёдҳои нақлиётии пайвандгари минтақаи ҷойгир дар соҳилҳои Баҳри Сиёҳ ва Қафқози Ҷанубӣ 2 миллиард евро сармояро ҷалб мекунад.

Марта Кос гуфтааст, дар пасманзари ҷанги идомадори Русия дар хоки Украина, “ба мо долонҳои боэътимоди нақлиётӣ заруранд. Дар давоми понздаҳ соли оянда тиҷорат дар ин самт метавонад панҷ баробар афзояд”.

Йозеф Сикела таъкид кардааст, ки “долони нақлиётӣ тавассути Баҳри Хазар ба як пули ҳаётан муҳим байни Аврупову Осиё табдил мешавад”.

Як намояндаи Кумисюни Аврупо дар посухи хатӣ ба муроҷиати Радиои Озодӣ гуфт, стратегияи “Дарвозаҳои ҷаҳонӣ” барои беҳтар кардани иртибот ва содатар кардани тиҷорати миёни Иттиҳоди Аврупо ва Осиёи Марказӣ тавассути Туркия ва Қафқози Ҷанубӣ эҷод шудааст.

"Дар ниҳоят, ин ҳамкориҳо ба тақвияти суботи минтақаӣ ва эҷоди шабакаҳои боэътимоди нақлиётию тиҷоратӣ равона шудаанд," -- гуфт мусоҳиби Радиои Озодӣ.