Ҳомиёни ҳуқуқи муҳоҷирон мегӯянд, бо вуҷуди фармони нави Владимир Путин раисҷумҳури Русия оиди дароз кардани муҳлати имтиёз ва манъи боздошту ихроҷи муҳоҷирон, рӯзҳои охир дар Маскаву Санкт -Петербург даҳҳо зодагони Тоҷикистон, Узбекистон ва Қирғизистонро кормандони пулис боздошт кардаанд.
Муҳаммадҷон Собиров, ҳуқуқшиноси маркази “Тонг ҷаҳонӣ” ба Радиои Озодӣ гуфт, аз 15- ум то 20 -уми июн аз сӯи додгоҳҳои Маскав нисбати 42 нафар муҳоҷирон аз Осиёи Марказӣ барои надоштани патент ва ё дигар сандаҳои буду бош қарори ихроҷ ё худ депортатасия содир шудааст. Созмони “Тонг ҷаҳонӣ”, барои бекор кардани ин қарорҳо ба додгоҳи шаҳрии Маскав муроҷиат кардааст. Ҳамчунин ҳуқушиносони марказ рӯзи 19-уми июн барои аз шӯъбаи пулиси Санкт Петребург раҳо намудани 20 муҳоҷир мусоидат кардаанд. Кормандони пулис бо роҳи таҳдиди ихроҷ намудан, аз муҳоҷирон 5 ҳазору 300 рубли русӣ пора талаб кардаанд. Ба гуфтаи ҳуқуқшиносон, мақомоти интизомӣ фармони нави Путинро, ки охири ҳафтаи гузашта ба ҳукми иҷро даромад нодида мегиранд ва ё мегӯянд хабар надоранд. Дар ҳоле ки тибқи ин фармон, то 30-юми сентябри 2021 мақомот ҳақ надоранд, муҳоҷиронро аз қаламрави Русия ихроҷ кунанд ва ё дар бораи манъи вуруди муҳоҷирон ба ҳудуди ин кишвар қарор қабул намоянд.