Пайвандҳои дастрасӣ

Хабари нав

1 МАЙ. Тоҷикистону Қирғизистон дар бораи оташбаси доимӣ ва пас бурдани нерӯҳо аз хатти марз созиш карданд


Сайидмӯъмин Ятимов ва Қамчибек Тошиев

Чакида

Қирғизистон ду рӯз мотами миллӣ эълон кард

Президенти Қирғизистон Содир Ҷабборов ба хотири қурбониёни муноқишаи ахир дар марз рӯзҳои 1-2 майро мотами миллӣ эълон кард. Дар муноқишаи рӯзҳои 28 ва 29-уми апрел дар марзи Тоҷикистону Қирғизистон аз ҳарду тараф даҳҳо нафар кушта ва захмӣ шуданд.

Бар асоси қарори Содир Ҷабборов дар рӯзҳои мотами миллӣ, дар Қирғизистон ва намояндагиҳои дипломатии он дар хориҷа парчами ин кишвар пойин оварда мешавад. Ҳамчунин ба телевизион ва радиоҳо пешниҳод шудааст, ки дар рӯзҳои 1-2 май барномаҳои тафреҳӣ намоиш надиҳанд.

Ба ҷуз аз эълони мотами миллӣ, кормандони чандин сохторҳои Қирғизистон маоши якрӯзаи худро барои кумак ба осебдидагони муноқиша доданд.

Вазорати тандурустии Қирғизистон мегӯяд, дар низои ахир дар марз бо Тоҷикистон, 31 шаҳрванди қирғиз кушта ва 154 нафар маҷруҳ шудаанд. Мақомоти тоҷик теъдоди маҷруҳон ва кушташудаҳоро расман эълон накарданд. Таҳқиқи Радиои Озодӣ то ин дам номи 12 қурбонии муноқишаи ахир аз Тоҷикистонро маълум кард. Хабаргузории "Азия-Плюс" теъдоди маҷруҳон аз Тоҷикистонро беш аз 90 нафар навишт

Низоъ дар марзи Тоҷикистону Қирғизистон рӯзи 28-уми апрел дар наздикии дарғот ё Маркази тақсими об шуруъ шуда, рӯзи 29-уми апрел идома кард. Ҳайатҳои ду кишвар бегоҳи 30-юми апрел эълон карданд, ки неруҳои иловагиро аз минтақаи марзӣ берун оварда, равуои сокинонро ба роҳ мемонанд. Дар назар аст, ки имрӯз 1-уми май гуфтугӯи мақомоти тоҷику қирғиз бар сари масъалаи марз идома кунад.

Муноқиша дар марзи Тоҷикистону Қирғизистон ба вокуниши кишварҳои минтақа рӯ ба рӯ шудааст. То ин дам Созмони Милали Муттаҳид, Иттиҳоди Аврупо, Узбекистон, Эрон, Қазоқистон ва Русия тарафҳоро ба хештандорӣ даъват кардаанд.

Хадамоти марзбонии Қирғизистон аз ҳаракати техникаҳои низомӣ дар марз хабар дод

Хадамоти марзбонии Кумитаи давлатии амнияти миллии Қирғизистон хабар додааст, ки вазъ дар марз миёни Тоҷикистон дар ҳолати маъмулӣ қарор надорад.

Ба гуфтаи ин ниҳод, соати 11.30 ба вақти маҳаллӣ ҳаракати техникаҳои низомӣ ба самти марзи Қирғизистон аз ҷониби Тоҷикистон мушоҳида шудааст.

Мақомоти Тоҷикистон ҳанӯз ба ин хабар вокуниш накардаанд ва маълум нест, то куҷо ин иддао ҳақиқат дорад.

Мақомоти қирғиз хабар додаанд, ки шаби гузашта ягон ҳолати тирпарронӣ ё нақзи оташбас дар марз сабт нашудааст.

Ба гуфтаи онҳо, роҳ ба самти Ош-Баткент-Исфана дар қитъаи роҳи Торт-Кочо аз ҷониби Тоҷикистон баста аст ва роҳи Исфара-Ворух боз аст.

Тоҷикистон хабари забт шудани дидбонгоҳи "Хоҷаи Аъло"-ро рад кард

Неруҳои марзбонии Тоҷикистон хабари мақомоти Қирғизистон дар бораи забти дидбонгоҳи сарҳадии “Хоҷаи Аъло”-ро бардуруғ хонд. Мақомоти Қирғизистон пештар гуфтанд, дар ҷараёни муноқишаи рӯзи 29-уми апрел неруҳои вижаи “Бору” дидбонгоҳи “Хоҷаи Аъло”-ро ба даст овардаанд.

Дафтари матбуоти Неруҳои марзбонӣ нимашаби 30-юми апрел бо нашри баёнияе гуфт, хабари забти посбонгоҳи сарҳадии “Хоҷаи Аъло” “маълумоти бардурӯғ (фейк) аст, ки характери иғвоангезона дорад.”

Ҷониби Қирғизистон ба ин хабар ҳанӯз вокуниш накардааст. Аммо рӯзи 29-уми апрел Хадамоти марзбонии Қирғизистон гуфт, неруҳои мусаллаҳи Тоҷикистон ба тарафи постгоҳҳои сарҳадии “Капчигай”, “Мин-Булак”, “Достук” оташ кушоданд. Ба навиштаи расонаҳои Қирғизистон, дар натиҷа бинои постгоҳи “Достук” оташ гирифт. Хадамоти марзбонии Қирғизистон он вақт хабар дода буд, ки неруҳои вижаи марзбонии ин кишвар “Бору” дар посух ба амалкарди неруҳои мусаллаҳи Тоҷикистон, дидбонгоҳи “Хоҷаи Аъло”-ро забт карданд.

Феълан дақиқ нест, ки ду рӯз қабл дар дидбонгоҳи “Хоҷаи Аъло” чӣ гузашта буд. Идораи марзбонии Қирғизистон, ки аз забти дидбонгоҳ хабар дод, ҳеч аксу наворе нашр накардааст. Ҳамчунин маълум нест, ки мақомоти Тоҷикистон чаро бо гузашти ду рӯз ин хабарро рад мекунанд.

Мақомоти қирғиз аз тирпарронии нав дар марз гуфтанд. Тоҷикистон рад кард

Хадамоти марзбонии Қирғизистон хабар додааст, ки соати 12:45-и рӯзи якуми май низомиёни тоҷик ба сӯйи манзилҳои зисти сокинон дар ноҳияи Арка Лайлак тир паррондаанд.

Ҷониби Тоҷикистон ин хабарро дурӯғ хонд.

Мақомоти Қирғизистон гуфтаанд, ки сокинони деҳоти назди марзиро аз маҳали зисташон берун кардаанд ва касе зиён надидааст.

Арка Лайлак дар наздикии марзи ноҳияи Бобоҷон Ғафурови Тоҷикистон ҷойгир аст.

Акбар Юсуфӣ, раиси дастгоҳи ноҳияи Бобоҷон Ғафуров дар сӯҳбат ба Радиои Озодӣ гуфт, ки ин хабар асос надорад.

“Ман худам дар ҳамин мавзеъ ҳастам. Ин гапҳо дурӯғ аст ва ягон садои тир шунида ҳам нашудааст. Роҳҳо ҳам боз ҳастанд ва ҳеҷ монеа барои рафтуомад нест.”,--гуфт ӯ.

Ӯ ҳамзамон хабари мақомоти қирғиз дар робита ба баста будани роҳи Ош-Исфана дар қитъаи роҳи Торт-Кочоро низ рад кард. Ба гуфати ӯ, роҳ боз аст ва барои ҳаракат ҳеҷ мушкил дида намешавад.

Зиманан, хабарнигори Радиои Озодӣ мегӯяд, ки дар ҳоли ҳозир дар деҳаи Сомониёни ҷамоати Чоркуҳи Исфара садои тир шунида мешавад. Ин тирпарронӣ соати 12:55 шуруъ шудааст. Дақиқ нест, ки ин тирпарронӣ аз кадом тараф аст.

Ёфтҳои бештар

Шарҳҳоро бинед (7)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!

Шарҳҳо

Шарҳи нав расид
Идома
XS
SM
MD
LG