Ҷо Байден, раиси ҷумҳури Амрико, аз қароре даст кашид, ки қабули паноҳҷӯён ба кишварро мисли аҳди раиси ҷумҳури собиқ Доналд Трамп дар поинтарин сатҳ нигаҳ медошт. Бар асоси амре, ки ӯ рӯзи 16-уми апрел имзо кард, бояд Амрико дар як сол фақат 15 ҳазор паноҳҷӯро ба қаламраваш роҳ медод, аммо баъди танқидҳо аз ӯ Кохи Сафед гуфт, ки дар ин масъала баъзе нофаҳмӣ шудааст.
Ҷен Псаки, сухангӯи Кохи Сафед бо нашри як баёния гуфт, дар изҳороти аввалия дар бораи қарор “баъзе нофаҳмиҳо будааст” ва интизор меравад, Ҷо Байден меъёри қабули паноҳҷӯёнро то рӯзи 15-уми май боло барад. Ӯ дар бораи ин меъёр чизе нагуфт. Айни замон дар баёния омадааст, ки ҳадафи Ҷо Байден “барои қабули 62500 муҳоҷир” то моҳи октябр ғолибан иҷро шуданӣ нест ва сабаби онро барномаи қабулкарда дар замони Доналд Трамп номидаанд.
Раиси ҷумҳури феълии Амрико зери фишори зиёди сиёсӣ қарор гирифтааст, чун муҳоҷирони зиёде аз марзи Мексика ба Амрико ворид мешаванд. Ҷумҳурихоҳон мегӯянд, сабаби мавҷи вуруди муҳоҷирон аз сиёсати сахтгиронаи Доналд Трамп даст кашидани Ҷо Байден аст.
