Эътирозгарон дар Янгон, шаҳри калонтарини Мянмар, ба қуюди шабгардӣ нигоҳ накарда, шоми 8-уми март бо нишони ҳамраъйӣ ба назди 200 донишҷӯйи бандмонда дар иҳотаи нирӯҳои амниятӣ рафтанд.
Ин донишҷӯён дар эътироз ба ҳабси раҳбари мадании Мянмар Аун Сан Суҷӣ ва ғасби қудрат аз ҷониби низомиҳо ба хиёбон баромада буданд.
Пас аз ғасби қудрат аз ҷониби раҳбарони низомии Мянмар дар рӯзи 1-уми феврали имсол, ин кишвар бо эътирозҳои азими мардумӣ рӯ ба рӯ шудааст.
Дар посух мақомот даст ба саркӯбу ҳабси эътирозгарон мезананд ва то ба ҳол беш аз 50 нафар кушта шуданд. Дафтари Созмони Милали Муттаҳид оид ба ҳуқуқи башар гуфт, дастикам 18 нафари онҳо дар саркӯбҳои бераҳмонаи 28-уми феврал ва 38 нафар дар ҳодисаҳои 3-юми март кушта шуданд.
Ба иттилои матбуоти маҳаллӣ, рӯзи 8-уми март ду нафари дигар дар шимоли Мянмар аз тири туфанги низомиҳо кушта шуданд. Мақомоти низомӣ ба кори матбуоти маҳаллӣ ҳам маҳдудиятҳо ҷорӣ кардаанд.
