Пайвандҳои дастрасӣ

Хабари нав

Баҳси обанбори наздимарзӣ. Дар Бишкек эътироз карданд, дар Душанбе шарҳе надоданд. ВИДЕО


Маркази тақсими об, марзи Тоҷикистону Қирғизистон

Рӯзи 8-уми феврал дар назди бинои ҳукумати Қирғизистон дар шаҳри Бишкек тазоҳурот сурат гирифт. Эътирозгаронро суханони нахуствазири нав ба хашм овардааст.

Сухан дар бораи обанбори Торткӯл, дар наздикии марзи Тоҷикистон ва як наҳри он меравад. Улуғбек Марипов ҳафтаи гузашта, пеш аз он ки раиси ҳукумати Қирғизистон шавад, гуфт, "афсӯс, мо саргаҳи наҳрро додем. Ман инро аниқ кардам. Инҷо масоили стратегӣ аст."

Улуғбек Марипов
Улуғбек Марипов

Баёнияи Марипов дар ҷомеаи Қирғизистон баҳс барангехт. Норозиён дар назди бинои ҳукумати вилояти Бодканд низ тазоҳурот карданд. Вакили мардумӣ, Тозабек Икромов, хостори нишасти фаврӣ шуд, то масъалаи стратегӣ мавриди баррасӣ қарор бигирад.

Сокинони вилояти Бодканд нигарон шуданд, чунки иншоот бисёр муҳим аст.

Раҳимбердӣ Абдухалил-улу, сокини деҳаи Куктоши Бодканд, гуфт: "Шояд дар бораи он чизе намедонад, ки чунин гуфт. Агар баёнияаш бародарони тоҷикро асабонӣ кунад ва агар ба мисли соли 2014 низои мусаллаҳона сурат гирад, ҷавобашро кӣ медиҳад? Бояд ин масъаларо ба инобат гирифта, андеша кунанд ва суханашонро санҷида гӯянд."

Дар моҳи январи соли 2014 дар маркази тақсими об байни Тоҷикистону Қирғизистон даргирӣ сурат гирифт ва дар он ҳодиса аз ду тараф нӯҳ кас маҷруҳ шуд. Маркази тақсими обро солҳои 60-ум бо дархости Қирғизистон сохтаанд.

Баъд аз сару садо дар матбуот Улуғбек Марипов муроҷиати видеоӣ нашр кард ва гуфт, суханонашро тағйир додаанд, вале манзураш дигар буд.

Эътирози норозиён аз изҳороти сарвазири Қирғизистон. Бишкек, 8-уми феврал
Эътирози норозиён аз изҳороти сарвазири Қирғизистон. Бишкек, 8-уми феврал

Вай гуфт: "Сухан дар бораи наҳри Қайирма дар деҳаи Оқсой буд. Аниқтараш дар ҳамсоягии Оқсой. Ин наҳр дар 500-600-метрии обанбор ҷойгир аст. Ба ғайр аз ин, сухан дар бораи рӯди Оқсу меравад. Манзури ман ҳамин буд, вале афсӯс, ки баъзе нерӯҳо дигаргуна таъбир карданд ва ман инро мефаҳмам."

Гулҷигит Исҳоқов, узви "Чек ара", мегӯяд, ин сухан метавонад барои низоъ дар оянда замина гузорад. Ба қавли ӯ, "сарвазир шарҳ дод, ки сухан дар бораи обанбори асосӣ намеравад. Ва гап дар бораи Қайирма аст. Қайирма низ ба Қирғизистон тааллуқ дорад."

Дар Тоҷикистон расман масъаларо шарҳ надодаанд. Раҷаббой Аҳмадзода, раиси вилояти Суғд, дар суҳбати кӯтоҳи телефонӣ бо Радиои Озодӣ танҳо ҳаминро гуфт, ки "ҳамаи ин даъвоҳо беасос ҳастанд. Мо танҳо дар доираи Комиссияи байнидавлатии ду кишвар оид ба делимитатсия ва демаркатсия, ки имрӯзҳо кори худро пеш мебарад, ҳамкорӣ дорем."

Эътироз дар назди бинои ҳукумати Бодканд. Рӯзи 5-уми феврали 2021
Эътироз дар назди бинои ҳукумати Бодканд. Рӯзи 5-уми феврали 2021

Хатти марзи байни Тоҷикистону Қирғизистон 976 километр аст. То кунун 504 километри он муайян ва аломатгузорӣ шудааст. Ду тараф бо вуҷуди гузашти солҳо натавонистанд, сари минтақаҳои баҳсбарангез ба мувофиқа бирасанд ва хатти марзро бикашанд.

Баъзан дар ҳамин минтақаҳо ва барои тақсими обу замин ва чарогоҳ ҷанҷолу тирандозӣ сурат мегирад ва то кунун чандин нафар аз ду тараф куштаву захмӣ шудаанд.

Бо Торткӯл, дар наздикии марзи Тоҷикистон, чӣ шуд?
лутфан мунтазир бошед

Феълан кор намекунад

0:00 0:02:17 0:00

Шарҳҳоро бинед (5)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!

Шарҳҳо

Шарҳи нав расид
Идома
XS
SM
MD
LG