Владимир Путин, раисҷумҳури Русия, қасд дорад, ки дар ояндаи наздик ваксинаи Sputnik V бигирад. Ин ваксинаро донишмандони Русия ба зидди коронавируси нав сохтаанд. Дмитрий Песков, сухангӯйи Кремлин, рӯзи 27-уми декабр гуфт, Путин ба зудӣ тасмимашро эълон мекунад. Вазорати тандурустии Русия як рӯз пеш истифода аз ваксинаи Sputnik V-ро барои шахсони аз 60-сола боло иҷозат дод. Вазорат гуфт, ин ваксина беш аз 90 дарсад барои намояндагони ин синну сол муассир аст. Путин 68-сола аст. Вай рӯзи 17-уми декабр дар нишасти матбуотии солонааш гуфт, "пас аз ҳалли масъалаҳои расмӣ" ваксина мегирад. Русия ин ваксинаро моҳи августи имсол тасдиқ кард. Ба иттилои расмӣ, бемории ҳамагир ба беш аз 3 миллион кас дар Русия сироят карда, боис ба марги зиёда аз 54 ҳазор нафар шудааст.
