Намояндагони Вазорати тандурустии Тоҷикистон гуфтанд, ки дар шабонарӯзи гузашта 39 мавриди дигари гирифторӣ ба коронавирусро сабт карданд. Дар умум, ба иттилои расмӣ, аз охири моҳи апрел то 30-юми ноябр 12 ҳазору 194 кас бемор шудаанд. Вазорат талафот аз бемории ҳамагирро 86 нафар шумурд ва иддао кард, ки тақрибан 12 ҳазор кас ё беш аз 95 дарсад шифо ёфтанд. Мақомот аз ин бештар ҷузъиёт намедиҳанд. Мунтақидон ба омори расмӣ бо шубҳа менигаранд. Ба бовари онҳо, омори воқеии беморон ва талафот аз коронавирус бамаротиб бештар аст. Радиои Озодӣ рӯзи 25-уми ноябр рӯйхати 225 нафарро нашр кард, ки бино бар тасдиқи пайвандон, пизишкон ва навиштаи расонаҳо аз коронавируси нав ва илтиҳоби шуш фавтидаанд.
