Дар маросиме дар Душанбе намояндагони ИМА ба Кумитаи ҳолатҳои фавқулоддаи Тоҷикистон дар ҳаҷми 50 ҳазор доллар васоили ҳифозати шахсӣ тақдим карданд. Ба навиштаи сафорати ИМА дар Душанбе, рӯзи 22 июл дар чаҳорчӯби мубориза бо пандемияи COVID-19, ба кормандони соҳаи ҳолатҳои изтирорӣ “50 либоси муҳофизатӣ, 100 ниқоби нафаскашӣ, 100 маҷмӯаи айнак, се тонна хокаи хлор, 10 дорупошаки сайёр ва дигар маводи безараргардонӣ” тақдим шуд.
Дар хабар омадааст, ки ин кӯмакҳоро Гурӯҳи ҳарбӣ оид ба масъалаҳои шаҳрвандӣ тақдим кардааст. Дар изҳороти сафорат аз қавли раҳбари намояндагии дипломатии ИМА дар Тоҷикистон Ҷон Марк Поммершайм омадааст, ки “ин кӯмак ба коргарони сафи пеш дар амри ҳимояти худ ва аҳолӣ аз олудашвӣ ва COVID-19 мусоидат мекунад ва ин як намунаи он аст, ки чӣ тавр мардуми Амрико ва Тоҷикистон дар мубориза бар зидди таҳдиди ҷаҳонӣ ҳамроҳ кор мекунанд”.
То имрӯз ҳукумат ва мардуми Амрико ба Тоҷикистон дар самти дастгирии мубориза бо COVID-19 беш аз 5 миллион доллар кӯмак пешниҳод кардаанд.
