Дар миёни 776 муҳоҷири дармондаи тоҷик, ки аз марзи Қазоқистон оварда шуданд, 70 нафарашон гирифтори бемории COVID-19 будаанд. Дар ин бора хабаргузории Азия-Плюс бо такя ба манобеаш дар бахши тандурустии вилояти Суғд хабар додааст.
Ба қавли расона, ҳамаи онҳое, ки дар танашон коронавируси нав ошкор шуд, дар беморхонаҳои вилояти Суғд бистарӣ шуданд. Манбаъ гуфтааст, муҳоҷирони гирифтор ба коронавируси нав асосан сокинони вилояти Хатлон мебошанд.
Садҳо шаҳрванди Тоҷикистонро, ки ба далели баста будани марзҳо дар Қазоқистону Узбекистон дармонда буданд, рӯзи 4-юми июл ба кишвар оварда шуданд. Шаҳрвандони бандмондаи Тоҷикистонро дар Қазоқистон Созмони Ҷаҳонии Муҳоҷират дар ҳамкорӣ бо ЮНИСЕФ ва бо ёрии Норвегия овард.
Созмони Ҷаҳонии Муҳоҷират дар изҳороте рӯзи 3-юми июл гуфт, "кӯдакон ва модаронашон дар марз дар шароити сабрзудо бо дастрасии маҳдуд ба об, ғизо ва маводи беҳдоштӣ ва зери хатари гирифтор шудан ба COVID-19 муддате ба сар бурданд. Ба сабаби набудани паноҳгоҳ, муҳоҷирон дар зери ҳавои кушод ва гарм ба сар бурданд."
