Мақомоти Арабистони Саудӣ 3 узви хонаводаи салтанатии ин кишварро дастгир кардаанд.
Ба бовари бархеҳо, ин нишонае аз тақвияти бештари қудрати Муҳаммад бин Салмон, валиаҳди Саудист.
Бино ба гузориши расонаҳои амрикоӣ, дар миёни боздоштшудаҳо Аҳмад бин Абдулазиз, бародари Шоҳ Салмон низ ҳаст. Ӯ аз валиаҳд шудани Муҳаммад бин Салмон дар соли 2017 эътироз карда буд.
Нашрияи The Wall Street Journal ба нақл аз манобеи номаълум навиштааст, Аҳмад бин Абдулазиз ва Муҳаммад бин Ноиф пас аз муттаҳам шудан ба хиёнат рӯзи шанбе дар хонаҳояшон боздошт шуданд.
Рӯзномаи The New York Times низ гузориш додааст, ки бародари ҷавонтари Ноиф, Наваф бин Ноиф, низ дастгир шудааст.
Мақомҳои Арабистони Саудӣ дар ин бора шарҳе надодаанд.
