Пайвандҳои дастрасӣ

Хабари нав

Хабарҳо

Вазири адлияи Тоҷикистон номзади ҲХДТ ба вакилии порлумон шуд

Рустам Шоҳмурод, вазири Вазорати адлия

Ҳизби халқии демократӣ дар ноҳияи Синои шаҳри Душанбе Рустам Шоҳмурод, вазири Вазорати адлияи кишварро ҳамчун номзад ба вакили Маҷлиси намояндагони Маҷлисии олии Тоҷикистон пешниҳод кард.

Рустам Шоҳмурод, ки аз моҳи январи соли 2012 Вазири адлияи Тоҷикистон аст, ба гуфтаи коршиносон, бо эҳтимоли зиёд аз мақомаш канор меравад.

Мусо Асозода, раиси Комиссияи ҳавзаи интихоботии рақами 4-и ноҳияи Сино рӯзи 4-уми январ ба Радиои Озодӣ гуфт, ки аз ҷониби ҲХДТ танҳо номзадии Рустам Шоҳмурод пешниҳод шуд ва аксари аъзоёни ҳизб дар овоздиҳии пушида ба тарафдории ӯ райъ доданд.

Маъмулан, мансабдороне, ки аз ҷониби ҳизби ҳоким дар Тоҷикистон номзад ба вакилии порлумон пешбарӣ мешаванд, аз мақомашон истеъфо медиҳанд.

Мусо Асозода мегӯяд, бар асоси қонун Рустам Шоҳмурод ҳақ дорад, ки барои машғул шудан дар маъракаи таблиғи пешазинтихоботӣ аризаи аз кор рафтанашро нависад.

“Ӯ метавонад ариза нависад, вале боз ҳам метавонад то анҷоми интихобот муваққатан аз кор равад. Агар дар интихобот ғолиб шуд, пурра аз кор меравад, ғолиб нашуд боз ба ҷойи кораш бармегардад”, --гуфт Мусо Асозода.

Рустами Шоҳмурод, зодаи шаҳри Конибодоми вилояти Суғд буда, дақиқан 8 сол пеш 5-уми январ вазири Вазорати адлия таъин шуда буд.

1-уми марти соли 2020 дар Тоҷикистон барои 63 курсии Маҷлиси намояндагони Маҷлисии олии Тоҷикистон шаҳрвандон вакил интихоб мекунанд.

ҲХДТ, ки аъзоёнаш идораи ҳукуматро дар Тоҷикистон дар даст доранд, аз аввалин ҳизбест, ки номзадҳояшро барои ширкат дар интихоботи имсол маълум мекунад.

Мунтақидон мегӯянд, ин ҳизб бо истифода аз фишангҳои давлатӣ номзадҳояшро ба таври сунъӣ пирӯз эълон мекунад. Аксари курсиҳои порлумони Тоҷикистонро феълан аъзоёни ин ҳизб соҳибӣ доранд.

Ҳамаи хабарҳои имрӯзро дар инҷо бихонед

UNHCR аз Тоҷикистону ҳамсояҳои дигари Афғонистон хост, марзҳои худро бикушоянд

Паноҳҷӯёни афғон дар Эрон

Комиссариати олии Созмони Милали Муттаҳид дар умури паноҳандагон (UNHCR) аз кишварҳои ҳамсояи Афғонистон хостааст, ки марзҳои худро ба рӯйи афғонҳои паноҳҷӯ, ҳатто агар ҳуҷҷат ҳам надошта бошанд, бикушоянд.

Созмон рӯзи 1-уми декабр гуфт, сарҳади Покистону Эрон дар ҳоли ҳозир танҳо барои афғонҳое, ки шиноснома ва виза доранд, кушода буда, сарҳади Тоҷикистону Узбекистон “пурра бастааст”.

Идораи СММ гуфт, аз афзоиши хатарҳо ба афғонҳои дар ҳоли фирор ба кишварҳои ҳамсоя “амиқан нигарон аст”. Дар ҳоле ки, ба қавли масъулонаш, вазъ дар Афғонистон баъди ишғоли Толибон дар моҳи августи имсол ҳамчунон дар ҳоли бадшавӣ аст.

Созмон маҳдудияти таҳсили духтарон, аз кор маҳрум шудани занон, фишор ба ақаллиятҳои мазҳабиву миллӣ, ҳамчунин, тарсондану куштани ҳомиёни ҳуқуқро монеа барои зиндагии одӣ дар Афғонистон арзёбӣ кардааст.

Идораи умури паноҳандагони СММ ҳамзамон аз тон ибрози нигаронӣ кардааст, ки бозпас фиристодани афғонҳо аз Покистону Эрон ва Тоҷикистон пас аз тасарруфи Толибон “афзоиш ёфтааст”.

UNHCR аз мақомоти ҳамаи кишварҳо даъват кардааст, ки бозпас фиристодани маҷбурии афғонҳоро бас кунанд.

Ҳамла ба Омурбек Текебоев, раҳбари ҳизби мухолиф дар Қирғизистон

Омурбек Текебоев

Як гуруҳи ношинос ба раҳбари ҳизби мухолиф дар Қирғизистон, ки натиҷаҳои интихоботи порлумонии охири ҳафтаи гузаштаро напазируфт, ҳамла кардаанд.

Омурбек Текебоев, раҳбари Ҳизби "Ота Макон", гуфт, ҳамла рӯзи 1-уми декабр дар тарабхонаи "Парк Отел"-и Бишкек сурат гирифт. Вай гуфт, тақрибан 70 марди ниқобпӯш ба онҷо рафта, се нафарашон ӯро задаанд.

Текебоев бовар дорад, ки ҳамла ба фаъолиятҳои сиёсии ӯ рабт мегирад. Ҷонибдоронаш аз Кумитаи давлатии амнияти миллии Қирғизистон хостаанд, ҳодисаро фавран таҳқиқ карда, ҳамлаваронро ҷазо диҳад.

Президенти Қирғизистон, Содир Ҷабборов (Содир Жапаров), ба Вазорати корҳои дохилии ин кишвар дастур додааст, ки ҳодисаро ҳамаҷониба санҷанд. Муовини сарвазири Қирғизистон, Эдил Байсалов, дар Твиттер навишт, "дар Қирғизистон ба хушунати сиёсӣ ҷой нест".

Ҳамла дар замоне сурат гирифт, ки ҳудуди 300 ҷонибдори Ҳизби "Ота Макон" ва чанд ҳизби дигари мухолиф дар назди Кумисюни марказии интихобот дар Бишкек ҷамъ шуда, ин ниҳодро ба тақаллуб гунаҳкор карданд. Онҳо хостанд, интихоботи нав баргузор карда шавад.

Нурҷон Шайлдабекова, раиси Кумисюни марказии интихоботи Қирғизистон, рӯзи 1-уми декабр гуфт, ба дурустии натиҷаҳои интихобот шубҳае вуҷуд надорад. Шайлдабекова афзуд, ҳоло шумориши пурраи баргаҳои рой ба охир расидааст ва натиҷаҳои ниҳоӣ пас аз ворид шудани маълумот ба системаи электронӣ эълон хоҳад шуд.

Интихоботи порлумонии Қирғизистон рӯзи 28-уми ноябр баргузор шуд.

Пули нав бо расми Назарбоев ба муомилот бароварда шуд

Бонки миллии Қазоқистон эълон кард, ки дар ин кишвар пули нав бо расми президенти пешин Нурсултон Назарбоев ба муомилот бароварда шуд.

Пули 20-ҳазортангаӣ, ки дар ҳар ду тарафаш расми Назарбоев омадааст, бахшида ба 30-солагии истиқлоли давлатии Қазоқистон нашр гашт.

Ба иттилои бонк, ин пул аз 1-уми декабри соли 2021 - Рӯзи президент дар Қазоқистон ба муомилот бароварда шудааст.

Расми Назарбоев дар пули қазоқӣ бори аввал соли 2016 нашр шуда буд. Бонки миллии ин кишвар он замон низ 10-ҳазортангаии қазоқиро бо расми Назарбоев бахшида ба рӯзи президент нашр карда буд.

​Назарбоев 19-уми марти соли 2019, баъди 30 соли раҳбарии Қазоқистон аз мақомаш истеъфо дод. Вақтҳои охир ӯ дар маҳзари ом ҳозир намешавад. Ӯ дар ҳоли ҳозир раиси Шӯрои амнияти Қазоқистон буда, ҳамчунин аз унвони "Элбаси" ё "Пешвои миллат" бархурдор мебошад, ки ӯро аз ҳама гуна таъқибҳо эмин нигаҳ медорад.

Дар Қазоқистон номи пойтахт, фурудгоҳи байналмилалии он, кӯчаҳои марказии вилоятҳоро ба номи Назарбоев гузоштаанд. Яке аз хиёбонҳои марказии шаҳри Алмато низ номи ӯро гирифта, то ба ҳол дар ин кишвар чанд муҷассамаи Назарбоев қомат афрохтааст.

НАТО: Русия барои ҳама гуна ҳамла ба Украина "посух" хоҳад дод

Йенс Столтенберг, дабири кулли НАТО

НАТО дар пасманзари нигарониҳо аз афзоиши тавонмандии низомии Русия дар марз бо Украина ба Маскав ҳушдор додааст, ки барои ҳама гуна таҷовузи низомӣ зидди ин ҳамсоякишвари худ "баҳои баланд" хоҳад пардохт.

Ин ҳушдори Ғарб ба Кремл 30-юми ноябр дар мулоқоти вазирони корҳои хориҷии кишварҳои узви НАТО дар Рига садо дод. Дар мулоқот таҳдидҳои бархоста аз Русия баррасӣ шудаанд.

Украина мегӯяд, Маскав даҳҳо ҳазор низомӣ ва техникаҳои вазнини ҳарбиро баъди як размоиш дар ғарби Русия ва дар наздикиҳои марзи ин кишвар ҷойгир кардааст. Дар Киев нигаронанд, ки эҳтимол дорад, Русия ба ин кишвар ҳамла кунад.

Русия, ки соли 2014 нимҷазираи Қрими Украинаро ишғол карда, ҷудоиталабонро дар шарқи ин кишвар дастгирӣ мекунад, иддаои Киевро рад кардааст. Русия Украина ва шарикони ғарбияшро ба ангехтани ташаннуҷ гунаҳкор мекунад.

Дар Қазоқистон аз эҳтимоли сирояти “омикрон” нигаронанд. ВИДЕО

Дар Қазоқистон аз сирояти омикрон нигаронанд
лутфан мунтазир бошед

Феълан кор намекунад

0:00 0:01:30 0:00

Табибон дар Қазоқистон аз он нигаронанд, ки навъи ҷадиди коронавирус ё омикрон ба ин кишвар ҳам сироят хоҳад кард. То ҳол мавҷудияти омикрон дар Қазоқистон расман тасдиқ нашудааст.

Президенти он кишвар, Қосимҷомарт Тоқаев, баъди мулоқоташ бо масъулони Созмони Ҷаҳонии Тандурустӣ рӯзи 29-уми ноябр гуфт, дар муқобила бо сирояти коронавирус аҳли олам бояд аз як гиребон сар бароранд.

Дар ҷараёни боздид аз Швейтсария, президенти Қазоқистон бо раҳбарони Созмони Ҷаҳонии Тандурустӣ мулоқот кард ва дар бораи иқдомҳои кишвараш дар муқобили пандемияи коронавирус ва ҷонибдории ин кишвар ба дастрасии умум ба ваксина маълумот дод.

Раҳбари Қазоқистон ҳамчунон дар бораи тавлиди ваксинаи ватании зидди коронавирус маъруф бо номи “Қазковак” тафсилот дода, аз аҳли олам даъват кард, ки дар ҳамоҳангӣ ба ин вабои аср муқовимат кунанд.

Тибқи итилои табибони қазоқ, дар ин кишвар суръати сирояти коронавирус сусттар шудааст, вале дар муқобили сирояти шакли нави он, яъне омикрон имкони зиёди ҳимоят надорад. Онҳо ишора ба он мекунанд, ки Қазоқистон ба монанди Исроил ё кишварҳои дигар марзҳояшро набастааст.

Дар ҳамин ҳол, мақомдорони бонки миллии Қазоқистон иброз доштанд, ки низоми молии ин кишвар аллакай зарбаи нақши нави коронавирусро эҳсос кард. Хавфи сирояти омикрон бозорҳои ҷаҳонӣ ва нархи нафти хомро поин бурд. Дар натиҷа, 29-уми ноябр қурби пулии милли Қазоқистон, ки кишвари содиркунандаи нафт аст, то 433,5 танга дар муқобили як доллари Амрико коҳиш ёфт.

Амрико аз расонидани ёриҳои башарӣ ба Афғонистон пуштибонӣ мекунад

Беҷошудагон дар Афғонистон. Кобул, октябри 2021

Намояндагони Амрико ваъда додаанд, ки ба пуштибонии худ аз раванди кумакрасонии Созмони Милали Муттаҳид ва ниҳодҳои башарӣ ба мардуми Афғонистон дар зимистони дар пешистода идома медиҳанд. Онҳо ҳамзамон дар мулоқоти худ бо Толибон дар Қатар, ба ин гурӯҳи ҳоким бар Афғонистон ҳушдор додаанд, ки аз ҳуқуқи башар ҳимоят кунанд.

Рӯзҳои 29-30-юми ноябр ду ҷониб барои аввалин бор пас аз ба қудрати расидани Толибон гуфтугӯ карданд. Таҳримҳои молии Амрико ва лағви ногаҳонии аксар кумакҳои хориҷӣ, иқтисоди ин кишвари ҷангзадаро ба варшикастагӣ рӯбарӯ кардааст. Дар ҳамин ҳол захираҳои Бонки марказии Афғонистон дар хориҷ аз кишвар масдуд шудаанд.

Дар натиҷа Созмони Милали Муттаҳид гуфт, Афғонистон дар остонаи як фоҷеаи башарӣ қарор дорад ва беш аз нисфи мардуми ин кишварро дар зимистон хатари гуруснагӣ таҳдид мекунад.

Ҳайатҳои ду кишварро дар музокироти Қатар намояндаи вижаи Амрико барои Афғонистон Томас Вест ва сарпарасти Вазорати корҳои хориҷии Толибон Амирхон Муттақӣ раҳбарӣ карданд.

Абдулқаҳҳор Балхӣ, сухангӯи Вазорати корҳои хориҷии ҳукумати Толибон, рӯзи 30-юми ноябр дар "Твиттер" навишт, дар ин мулоқот роҷеъ ба масоили сиёсӣ, тандурустӣ, маориф ва амният гуфтугӯҳо сурат гирифт. Ӯ афзуд, Толибон аз намояндагони Амрико хостаанд, дороиҳои бандмондаи Афғонистонро озод кунад ва масоили сиёсиро бо масоили башарӣ омехта насозад.

Аммо дар эъломияи Вазорати корҳои хориҷии Амрико дар пайванд ба озодсозии пулҳои бандмондаи Афғонистон дар бонкҳои ғарбӣ чизе гуфта нашудааст.

Муҳлати ҳабси хабарнигори зиндонӣ Муҳаммадюсуф Исмоиловро 3 моҳ кам карданд

Муҳаммадюсуф Исмоилов. Акс аз соли 2011

Бар асоси қонуни нави афв дар Тоҷикистон муҳлати ҳабси хабарнигори зиндонӣ Муҳаммадюсуф Исмоиловро 3 моҳу 18 рӯз кам кардаанд.

Дар ин бора Раёсати зиндонҳои вилояти Суғд дар посух ба дархости Анҷумани миллии расонаҳои мустақили Тоҷикистон хабар додааст. Интизор меравад, ӯро моҳи апрели соли 2022 аз зиндон раҳо кунанд.

Муҳаммадюсуф Исмоилов беш аз ҳашт сол боз дар маҳбаси низомаш сангин аст. Ӯро бо гуноҳи "тамаъҷӯӣ" ва "қаллобӣ" даҳуним сол аз озодӣ маҳрум карда, соли 2019, бар асоси қонуни афв, 1 солу 4 моҳи онро "буриданд".

Исмоилов аз оғоз ҳабсашро ниқоргирии мансабдорон барои нашри мақолаҳои танқидӣ ва фош кардани камбудиҳои онҳо дар ноҳияи Ашти вилояти Суғд медонад. Ӯро соли 2011 низ барои нашри мақолаи танқидӣ бо номи "Ашт валангор мегардад" бо парвандаи "туҳмат, таҳқир, тамаъҷӯӣ ва маҳалгароӣ” 11 моҳ дар маҳбас нигоҳ доштанд.

Вакили мудофеъ Муҳаббат Ҷӯраева рӯзи 1-уми декбар гуфт, "аз нисф гузаштани муҳлати ҳабс, бемориву корношоямӣ, пардохти зарари молӣ аз рӯи қонун ба Исмоилов имтиёзҳое медиҳад, ки метавонистанд пештар ҷазои ҳабси ӯро ҳадди ақал ба режими сукунат иваз кунанд, аммо ин корро накарданд."

Моҳи феврали соли гузашта Мирзои Салимпур, муассис ва сардабири сомонаи "Бомдод", қароргоҳаш дар Прага, барои ба маҳбаси низомаш сукунатӣ гузаронидани Исмоилов 5 ҳазор сомонӣ пардохта буд, аммо шароити нигаҳдории ӯ бетағйир монд. Мақомот далели чунин рафтори худро шарҳ надодаанд.

Муҳаммадюсуф Исмоиловро дар маҳбаси рақами сеи шаҳри Хуҷанд нигоҳ медоранд. Вай 63-сола, маъюби гурӯҳи дуюм ва падари ду фарзанд аст.

Мақомоти Русия гуфтаанд, боздошти се муҳоҷирро дар Иркутск таҳқиқ мекунанд

Гӯшае аз Иркутск

Мақомоти вилояти Иркутски Русия ҳайати сафорати Тоҷикистонро қабул карда, таҳқиқи қазияи боздошти се муҳоҷирро ваъда додаанд. Ба гуфтаи манобеи Радиои Озодӣ, ин ҳайат як ҳафта пеш ба Иркутск рафта буд, вале дар ду рӯзи аввал мақомоти ин шаҳр бо онҳо суҳбат накарданд.

Рӯзи 25-уми ноябр Сироҷиддин Муҳриддин, вазири корҳои хориҷии Тоҷикистон, бо ҳамтои русаш Сергей Лавров дар бораи ин қазия суҳбат кард. Манбаъҳои Радиои Озодӣ гуфтанд, пас аз ин суҳбат мақомоти тафтишотӣ бо ҳайати сафорат суҳбат карда, онҳоро бо парванда шинос кардаанд.

Мақомоти Русия дар пайи оташ зада шудани вагони зисти муҳоҷирон дар деҳаи Заларии вилояти Иркутск, ки шаби 12-уми ноябр боис ба марги ду нафар шуд, се шаҳрванди Тоҷикистонро дастгир карданд. Наздикони онҳо ва мақомоти тоҷик мегӯянд, муҳоҷирон ҷабрдидаанд ва ба ҷойи ҷазо додани онҳое, ки вагонро оташ задаанд, онҳоро боздошт намудаанд.

Мақомоти Русия дар ин бора шарҳ надодаанд ва танҳо гуфтанд, ки ҳодисаро таҳқиқ мекунанд.

Ҳамсуҳбатони Радиои Озодӣ гуфтанд, ки мақомоти Иркутск ҳеч далели қонеъкунанда барои гунаҳкор донистани се муҳоҷир пешниҳод карда натавонистанд. Онҳо умед доранд, ки муҳоҷрони боздоштшуда ба зудӣ озод мешаванд.

Дар ҳодисаи шаби 12-уми ноябр Насимҷон Сайдалии 21-сола ва Сироҷиддин Гулзодаи 19-сола, сокинони ноҳияи Файзободи Тоҷикистон ҳалок шуданд. Мақомоти Русия се муҳоҷир – Қурбонмад Содиқов ва Далер Ҳасановро ба гумони "қасди куштор" ва Ҷумъабой Искандаровро ба гумони "авбошӣ" боздошт карданд. Аз ҷониби сокинони маҳаллӣ танҳо як нафар боздошт шудааст.

Ҷанҷол миёни муҳоҷирон ва сокинони маҳаллӣ рӯзи 12-уми ноябр дар назди мағоза оғоз шудааст. Сипас, як гурӯҳ шабона вагони зисти ҳафт муҳоҷири тоҷикро оташ задаанд. Аз ин рӯ, аксарият боздошти муҳоҷиронро баръакси воқеият дониста, аз мақомоти тоҷик хостаанд, ба муҳоҷирон кумак кунанд.

Модари Гулбиддин Зиёбеков хоҳони суҳбат бо президенти Тоҷикистон шуд

Певистамо Абдулмуминова мегӯяд, арзашро дар ҳукумати Бадахшон нашуниданд

Модари Гулбиддин Зиёбеков, ҷавони 29-сола, ки ҳангоми амалиёти мақомоти интизомӣ дар ноҳияи Роштқалъаи вилояти Бадахшон кушта шуд ва марги ӯ боиси эътирози чоррӯза дар Хоруғ гардид, хоҳони суҳбат бо раиси ҷумҳурии Тоҷикистон аст.

Певистамо Абдулмуминова, модари Гулбиддин, рӯзи 1-уми декабр дар суҳбат бо Радиои Озодӣ гуфт, мақомоти Бадахшон арзашро нашунидаанд ва мехоҳад, додашро ба президент расонад.

Гулбиддин Зиёбеков рӯзи 25-уми ноябри имсол дар деҳаи Тавдеми Роштқалъа кушта шуд. Мақомот гуфтанд, ӯ тақрибан як сол пеш ёвари додситони ноҳияро гаравгон гирифта буд ва бо гумони гаравгонгирӣ ва барангехтани маҳалгароӣ ҷустуҷӯ мешуд, вале дар амалиёти боздошт бо силоҳ муқобилият нишон дод ва захмӣ карда шуд. Дар хабарномаҳои расмӣ дар бораи кушта шудани ӯ чизе нагуфтанд.

Певистамо Абдулмуминова, модари Гулбуддин Зиёбеков дар суҳбат бо Радиои Озодӣ гуфт: "Қасам ба номи Худо, қасам ба арвоҳи писари навгузаштаам, ки ӯ силоҳ надошт. Вай хидмат ҳам накарда буд, таппончаро намедонист. Бачаи ман ҳатто сигарет накашида буд. Вай ба ягон кас ягон зарар нарасонида буд.”

Баъзе аз шоҳидон мегӯянд, он рӯз дар дасти Гулбуддин Зиёбеков силоҳ надида буданд. Дар телевизиони давлатии "Бадахшон" ҳамчун далел як таппончаро бо тиру тирдонаш намоиш дода, гуфтанд, ки ӯ ба Гулбиддин Зиёбеков тааллуқ дорад.

Певистамоҳ Абдулмуминова пойфишорӣ дорад, ки писараш ҳеч гоҳ дар даст силоҳ надошт. Вай гуфт, давоми даҳ моҳи охир, баъди онки гаравгонгирии додситон рӯй дод, касе писарашро суроғ накарда ва "ҳатто барои бозпурсӣ ба ӯ даъватнома нафиристода буд".

Ба бовари ӯ, дар ҳар сурат, имкони зинда дастгир кардани писараш вуҷуд дошт, аммо барояш муаммо мондааст, ки чаро ӯ кушта шуд. Абдулмуминова мегӯяд, бо гузашти рӯзҳо ба ин ва суолҳои дигар посух наёфтааст. Мақомот ҳамвора таъкид доранд, ки Зиёбеков ҳангоми амалиёти боздошт муқобилият нишон дод ва бо тири ҷавобӣ маҷруҳ карда шуд.

Хабарнигорони Радиои Озодӣ бо шоҳидон, мақомот ва таҳлилгарон дар бораи ин ҳодиса суҳбат карданд.

Амалиёти боздошти Гулбиддин чӣ гуна сурат гирифт?

Чӣ тавр мардум дар майдони марказии Хоруғ ҷамъ шуданд?

Посух ба ин суолҳоро давоми рӯз дар сомонаи Радиои Озодӣ хоҳед хонд. Бозгашт ба саҳифаро фаромӯш накунед.

Марги 2 миллиону 400 ҳазор кас дар як сол дар Русия

Дар ду моҳи охир ҳамарӯза дар Русия беш аз ҳазор нафар аз коронавирус мефавтанд

Дар як соли охир дар Русия 2 миллиону 400 ҳазор нафар фавтидаанд, ки ба гуфтаи мақомоти ин кишвар чунин омор танҳо дар замони Ҷанги дувуми ҷаҳонии солҳои 1941-1945 сабт шуда буд. Ҳамчунин аҳолии Русия имсол наздик ба як миллион кам шудааст, ки дар 20 соли охир чунин набудааст. Сабаби марги аксари фавтидагон гирифторӣ ба коронавирус, бемориҳои сироятӣ ва майзадагӣ гуфта мешавад. Дар ду моҳи охир ҳамарӯза дар Русия беш аз ҳазор нафар аз коронавирус мефавтанд.

Як узви ДОИШ-ро дар Олмон ба ҳабси абад маҳкум карданд

Бино ба гузоришҳо, аъзои гуруҳи “Давлати исломӣ” беш аз 3 ҳазор язидиро куштаанд

Додгоҳи Олмон як марди 29-солаи ироқиро, ки ба узвияти гуруҳи даҳшатафкани “Давлати исломӣ” ё ДОИШ пайваста буд, бо табъизи ақаллияти язидӣ гунаҳкор дониста, ба ҳабси абад маҳкум кард.

Тоҳо Ал-Ҷумайлӣ бо табъизи инсон, ҷиноят бар зидди башарият, ки боиси марги инсон шудааст ва ҷиноятҳои ҳарбӣ гунаҳкор дониста шуд.

Ӯ дар соли 2013 ба гуруҳи ДОИШ ҳамроҳ шудааст. Ин аввалин ҳукми абад нисбат ба як узви ДОИШ аст, ки бо иттиҳоми наслкушӣ муттаҳам аст. Ин гуруҳ соли 2014 як бахши бузурги Сурия ва Ироқро зери назорат дошт.

Тибқи гузоришҳои расида, аъзои гуруҳи “Давлати исломӣ” беш аз 3 ҳазор пайрави дини язидиро кушта, наздик ба ҳафт ҳазор зану духтари язидиро дар солҳои 2014 ва 2015 ба ғулом табдил дода буданд.

Додситонӣ гуфт, Ал-Ҷумайлӣ ва ҳамсари собиқаш, ки шаҳрванди Олмон аст, як зани язидӣ ва фарзанди ӯро ҳамчун ғулом хариданд.

Ал-Ҷумайлӣ духтари панҷсолаи ин занро занҷирбанд карда, дар гармои панҷоҳ дараҷа дар берун нигаҳ дошт. Дар натиҷа духтар аз ташнагӣ вафот кард.

Қавми язидӣ ба забони курдӣ суҳбат карда, аксаран дар шимоли Ироқ ба сар мебаранд. Дини язидӣ, тақрибан чаҳор ҳазор сол пеш дар Эрони имрӯза пайдо шуда ва решаҳояш ба дини зардуштӣ мебарад, вале язидиҳо баъзе унсурҳои дини ислом ва дини насрониро пазируфтаанд.

Иштироки паҳлавонони ҷавони тоҷик дар мусобиқаи қаҳрамонии ҷудои Осиё-Уқёнус

Варзишгарони тоҷик дар мусобиқаи қаҳрамонии ҷудои Осиё-Уқёнус миёни навҷавонон, ки рӯзҳои 4-5-уми декабр дар пойтахти Лубнон - шаҳри Бейрут - баргузор мешавад, ширкат меварзанд. Чунонки сомонаи расмии Федератсияи байналмилалии ҷудо (IJF) хабар додааст, дар ин мусобиқа 127 варзишгар (84 писар ва 43 духтар) аз 17 кишвар иштирок хоҳанд кард.

Ба ҳайати дастаи мунтахаби Тоҷикистон 9 варзишгар шомиланд, ки дар сабқати мардон ширкат меварзанд: Хурсандқул Куганов, Абубакр Шеров (ҳарду дар вазни -66 кг), Муҳаммадиқбол Тошов, Масъуди Аҳмадзод (ҳарду дар вазни -73 кг), Муҳаммадҷон Абдуҷалилов, Шодмон Ризоев (ҳарду дар вазни -81 кг), Раҳматулло Мирзоев (-90 кг), Мансур Раҳмон (-100 кг), Давлатҷон Назриев (+100 кг).

Ҳамчунин дар Бейрут рӯзҳои 2-3-юми декабр мусобиқаи қаҳрамонии ҷудои Осиё-Уқёнус миёни наврасон баргузор мешавад. Тоҷикистонро 7 нафар (6 писар ва як духтар) намояндагӣ мекунанд: -50 кг - Ҷасур Лутфишоев, -60 кг - Сируш Эркаев, -66 кг - Муҳаммад Юсуфзода, -73 кг - Суннатулло Мӯсоев, -90 кг - Сомонӣ Кишваров, +9 0 кг - Парвиз Абдураҳмонов ва дар рақобатҳо миёни духтарон Меҳрона Маҳмадзода дар вазни -52 кг.

Ёдовар мешавем, дар мусобиқаи қаҳрамонии ҷудои Осиё-Уқёнус миёни бузургсолон, ки моҳи апрели имсол дар шаҳри Бишкеки Қирғизистон доир гардид, паҳлавонони тоҷик се медал ба даст оварданд. Сомон Маҳмадбеков дар вазни то 73 кило медали нуқра гирифт. Комроншоҳи Устопириён дар вазни то 90 кило ва Темур Раҳимов дар вазни беш аз 100 кило бо медалҳои биринҷӣ мукофотонида шуданд.

Боздошти як зан дар Душанбе барои рабудани кӯдаки 2-моҳа

Нигора Ахмедова.

Пулис дар Душанбе аз боздошти як зани 29-сола хабар дод, ки ба кӯдакдуздӣ муттаҳам мешавад. Дафтари матбуоти Раёсати корҳои дохилӣ дар шаҳри Душанбе иттилоъ дод, ки амалиёти ҷустуҷӯи ин кӯдак ва боздошти ин зан рӯзи 30-юми ноябр сурат гирифт.

Ба иттилои манбаъ, Нигора Ахмедова, сокини деҳаи Қампирқаълаи ҷамоати Чортеппаи ноҳияи Рӯдакӣ баъд аз нисфирузии сешанбе дар Дармонгоҳи тиббии шаҳрии рақами 13-и пойтахт як кӯдаки навзоди 2-моҳаро аз модараш барои нигоҳубини яклаҳзаина қабул ва сипас аз набудани модари кӯдак истифода карда, бо кӯдак фирор кардааст.

Пулис дар шарҳи боздошти ин зан гуфт, ки дар пайи амалиёти фаврӣ-ҷустуҷӯӣ, гумонбаршуда соати 4:20-и субҳ берун аз ҳудуди шаҳри Душанбе боздошт шуд.

Мақомот мегӯяд, ки дар ҳоли ҳозир нисбати Нигора Ахмедова бар асоси моддаи 130-и (одамрабоӣ) Кодекси ҷинояти Тоҷикистон парвандаи ҷиноятӣ боз шуда, тафтишот идома дорад.

Даҳҳо сокини Алмато афви қарзҳои бонкиро талаб карданд

Наздики 60 тан аз сокинони шаҳри Алматои Қазоқистон рӯзи 30 ноябр пушти дари Оҷонси танзим ва рушди бозори молӣ ҷамъ шуда, талаб карданд, ки қарзҳои бонкии онҳо афв шаванд. Ин сокинон бо чунин талабе рӯзи 15 ноябр низ ҷамъ шуда буданд.

Онҳо гуфтанд, қарзҳоеро баргардонанд, ки барои ниёзҳои аввалияи гирифта буданд. Зеро, ба гуфтаи онҳо, даромадашон кам шудааст. Бархе аз занҳо гуфтанд, ба болои ин фарзанди зиёд доранд ва ба танҳоӣ онҳоро тарбият мекунанд.

Мақомоти Оҷонси танзим ва рушди бозори молӣ рӯзи 15 ноябр ваъда дода буданд, ки барои баррасии шикояти сокинон ба онҳо ду ҳафта вақт дода шавад.

"Дирӯз ки мо ҷамъ шудем, ба мо гуфтанд, фурсат надоштаанд, ки бо бонкҳо дархости моро баррасӣ кунанд", - гуфт яке аз занҳо, ки афви қарзашро талаб дорад.

Мақомоти Қазоқистон дар гузашта гуфтанд, ки ҷаримаи қарзии 1,1 миллион сокинро дар ҳаҷми бештар аз 33 миллиарду 620 миллион танга бахшидаанд.

Ҳукумати низомии Мянмар нисбати Аун Сан Суҷи айбҳои нав эълом кард

Ҳукумати низомии Мянмар роҳбари мухолифон ва барандаи ҷоизаи Нобел Аун Сан Суҷиро дар фасодкорӣ айбдор кард.

Айбномаи нав ба кирояи чархбол рабт дорад, ки шомили қонуни мубориза зидди фасод мешавад. Аз рӯи ин айб Аун Сан Суҷиро то 15 соли зиндон таҳдид мекунад.

Шуруъ аз миёнаҳои моҳи марти соли 2021, аз замони оғози муҳокимаи парвандаи Суҷии 76-сола, нисбати вай наздики 10 айб эълом шудааст. Вай ҳамаи айбҳои эълоншударо рад мекунад.

Ҳукумати низомии Мянмар аз посух додан ба суолҳои расонаҳо дар мавриди парвандаҳои Аун Сан Суҷи худдорӣ мекунад. Вакилони мудофеи Аун Сан Суҷи низ нахостаанд, ки парвандаҳоро шарҳ диҳанд.

Путин гуфт, тасмим нагирифтааст, ки баъди 2024 президент монад ё не

Владимир Путин

Владимир Путин, раиси ҷумҳурии Русия, гуфт, ҳанӯз тасмим нагирифтааст, ки баъди ба охир расидани давраи ҳозираи раҳбарияш дар соли 2024 дубора номзадии худро пешбарӣ кунад ё на.

"Мувофиқи Конститутсия ҳақ дорам, ки ба муҳлати нав интихоб шавам. Вале оё ин корро мекунам ё не, ҳанӯз тасмим нагирифтаам," – гуфт Путин рӯзи 30-юми ноябр дар як нишасти сармоягузорӣ дар Маскав.

Ислоҳоти баҳсбарангезе, ки соли гузашта ба Конститутсияи Русия дохил карда шуд, заминаро барои дар қудрат мондани Путин то соли 2036 фароҳам меоварад.

Мухолифин онро танқид мекунанд.

Путини 69-сола аз соли 1999 боз ҷилави қудратро дар Русия ба даст дорад. Дар ин миён як муддат сарвазир будааст.

Ҳазораҳо мегӯянд, Толибон онҳоро аз хонаҳояшон меронанд. ВИДЕО

Ҳазораҳо мегӯянд, Толибон онҳоро аз хонаҳояшон меронанд
лутфан мунтазир бошед

Феълан кор намекунад

0:00 0:03:11 0:00

Ҳазораҳои Афғонистон мегӯянд, Толибон хонаҳояшонро ишғол намуданд ва онҳо маҷбур шуданд, аз макони доимии зисташон фирор кунанд.

Як гурӯҳи ҳазораҳои вилоятҳои Дайкундӣ ва Урузгон дар Кобул паноҳгоҳ ёфтаанд.

Қавми ҳазора тахминан 9 дар сади аҳолии Афғонистонро ташкил медиҳад. Дар давраи ҳукмронии қаблии Толибон ҳазораҳо, ки аксаран шиамазҳаб мебошанд, мавриди таъқиб қарор доштанд.

Аз моҳи августи имсол, замони сари қудрат омадани Толибон дар Афғонистон, гузоришҳо дар бораи таъқиби ҳазораҳо боз ба чашм мехӯранд.

Созмони Афви Байнулмилал (Amnesty International) навиштааст, ки моҳи октябр дар минтақаи Дайкундӣ Толибон 13 ҳазора, собиқ сарбозони ҳукуматиро ба қатл расонданд. Ҳамон вақт Толибон таъқибу азияти ҳазораҳоро рад карданд.

Ҳавопаймои Русия шаҳрвандони кишварҳои узви СПАД-ро аз Кобул берун меорад

18 ноябри соли 2021, Кобул. Ҳавопаймои русӣ ба Афғонистон ёрии башарӣ овард

Сафорати Русия дар Кобул хабар дод, ки ҳавопаймои ин кишвар рӯзи 1-уми декабр шаҳрвандони кишварҳои узви Созмони Паймони Амнияти Дастҷамъӣ ё ОДКБ-ро аз Кобул берун меорад. Маълум нест, ки оё дар миёни мусофирон шаҳрвандони Тоҷикистон ҳам хоҳанд буд ё на.

Ба узвияти созмон Арманистон, Беларус, Қазоқистон, Русия ва Тоҷикистон шомиланд.

Моҳи август, баъди сари қудрат омадани “Толибон” дар Афғонистон, Русия бисёре аз шаҳрвандони кишварҳои узви СПАД-ро аз Афғонистон берун бурда буд.

Ба навиштаи хабаргузории ТАСС, дар ҳавопаймо инчунин донишҷӯёни афғонистонии муҳассили мактабҳои олии Русия ва шаҳрвандони Русия ҷой дода мешаванд.

Бори охир ҳавопаймои русӣ рӯзи 18-уми ноябри имсол аз Афғонистон беш аз 200 шаҳрванди Русия, Арманистон, Беларус, Украина ва Афғонистонро берун овардааст.

Дар хабар гуфта шудааст, ки ҳавопаймо ба Кобул 36 тонна ёрии башардӯстона низ хоҳад бурд.

Соҳибкорони қазоқ аз мақомот ҳимояти манфиатҳояшонро талаб доранд

Яке аз шоҳроҳҳои Қазоқистон.

Гуруҳи соҳибкорони Қазоқистон, ки мехоҳанд аз ширкати озарии "СПИК Аккорд" 168 миллион танга (ҳудуди 385 ҳазор доллар) қарзи худро рӯёнанд, 29-уми ноябр дар назди ҳукумати вилояти Оқтеппа ҷамъ шуданд.

Соҳибкорон аз мақомоти Оқтеппа даъват карданд, ки манфиатҳои онҳоро ҳимоят ва мулоқот бо раиси ноҳияи Бойғанини вилоят Ундасин Оразалинро баргузор намоянд.

Ба гуфтаи соҳибкорон, сокинони ноҳия соли 2019 ба ширкати озарӣ, ки шоҳроҳи Оқтеппа-Астраханро бозсозӣ мекард, техникаҳои гуногунро ба иҷора доданд, вале ширкат пули иҷораи онҳоро напардохтааст.

Ин ширкат барои таъмири роҳ аз ҳукумати Қазоқистон ҳудуди 9 миллиард доллар маблағ дарёфт карда буд, вале намояндагони ширкат соли гузашта корро ба поён нарасонида, Қазоқистонро тарк карданд.

Соҳибкорони қазоқ мегӯянд, ширкати "СПИК Аккорд"-ро ба додгоҳ кашиданд, вале ду сол мешавад, наметавонанд қарзи худро рӯёнанд.

Талошҳои барои тамос бо намояндагони "СПИК Аккорд" бенатиҷа буданд.

Президенти Узбекистон дастур дод, ки "ток-шоу"-ҳоро назорат кунанд

Президенти Узбекистон, Шавкат Мирзиёев, рӯзи 23-юми ноябри имсол дар ҷараёни сафари корияш ба ноҳияи Шайхонтоҳури вилояти Тошканд ба муовини сарвазири ин кишвар дастур додааст, ки барномаҳои ток-шоуи баъзе аз телевизионҳоро таҳти назорат гирад.

Раҳбари бунёди "Нуронӣ" Рустам Калонов дар ҷараёни мулоқоти Мирзиёев бо фаъолони Шайхонтоҳур аз сифати баъзе аз барномаҳои телевизионҳои Узбекистон шикоят кардааст.

"Ҷаноби президент, мехоҳам, таваҷҷуҳи шуморо ба барномаи "Mahallada duv-duv gap" дар телевизиони "Sevimli" ҷалб кунам. Он мухолифи расму ойини мост. Ман ҳайронам, ки чӣ гуна онро бо аъзои хонавода тамошо мекунанд. Агар онҳо мушкили маҳалларо ҳал карданӣ ҳастанд, бигузор дар ҷояш рафта, ҳал кунанд. Як барномаи дигар бо номи "Yor-yor" аст, ки дар он зан шавҳар ва мард ҳамсар мекобанд," - изҳор дошт ӯ.

Ба иттилои сомонаи Kun.uz, Мирзиёев баъди муроҷиати Калонов ба муовини сарвазири ин кишвар дастур додааст, ки ин гуна барномаҳоро таҳти назорат қарор диҳад.

Дар пайи бодҳои сахт дар Туркия чор нафар ҷон дод

Боди сахт дар Истанбул, ки макони зисти 15 миллион нафар аст, бебандубории зиёд эҷод кард

Дар пайи бодҳои сахти рӯзи 29-уми ноябр дар шаҳри Истанбул ва атрофи он, чор нафар, аз ҷумла як шаҳрванди хориҷӣ ҷон дода, 19 нафари дигар осеб дидаанд.

Мақомоти Истанбул рӯзи 30-юми ноябр гуфтанд, ки суръати бод дар шаҳри соҳилӣ то 130 километр дар соат мерасид. Раёсати обу ҳавосанҷии Туркия гуфт, рӯзи сешанбе эҳтимоли ба шаҳрҳои дигари Туркия, ба монанди Измир, рафтани бодҳои сахт вуҷуд дорад.

Ба иттилои расмӣ, аз миёни осебдидаҳо се нафар дар ҳолати вазнин ҳастанд.

Дар наворҳое, ки тавассути телевизиону шабакаҳои иҷтимоӣ паҳн шуданд, саҳнаҳои афтодани бурҷи баландошёнае дар соҳилҳои Истанбул ва канда шудани боми биноҳо дида мешавад.

Ширкати ҳавопаймоии Туркия гузориш дод, ки нақшаҳои парвоз тағйир ёфта, роҳ ба соҳили баҳр баста шудааст.

Маскав гуфт, ба сохтмони 5 мактаби русӣ дар Тоҷикистон $150 миллион медиҳад

Алексей Оверчук, муовини нахуствазири Русия. Арманистон, сентябри соли 2021

Як мансабдори баландпояи Русия гуфт, ин кишвар барои бунёди панҷ мактаби русизабон дар Тоҷикистон 150 миллион доллар ҷудо кардааст. Ба иттилои расмӣ, дар ҳар яке аз ин мактабҳо тахминан 1200 нафар таҳсил хоҳанд кард.

Хабаргузории русии ТАСС навишт, Алексей Оверчук, муовини нахуствазири Русия, ки 30-юми ноябр ба шаҳри Душанбе омад, аз яке аз маҳалҳои сохтмони мактаби нав дидан кардааст.

Ӯ гуфт, дар ин мактабҳо омӯзгорон аз Русия омада, дарс медиҳанд ва барномаи таълимиро мутобиқ бо барномаи таълимии Тоҷикистон таҳия хоҳанд кард. Моҳи апрели соли 2019 миёни Тоҷикистон ва Русия созишномаи сохтмон ва таъмини моддиву фаннии панҷ мактаби русӣ дар шаҳрҳои Душанбе, Хуҷанд, Бохтар, Кӯлоб ва Турсунзода имзо шуд.

Александр Бугаев, муовини вазири маорифи Русия дар сафараш ба Душанбе, рӯзи 30-юми ноябр гуфтааст, дар доираи барномаи “Омӯзгори рус дар хориҷа” донишгоҳи омӯзгории Алтай мутахассисонашро барои кор аз рӯи ин тарҳ омода мекунад, то ба Тоҷикистон омада кор кунанд.

Қарори ба Тоҷикистон фиристодани омӯзгорони Русия дар музокироти президентони ду кишвар – Эмомалӣ Раҳмон ва Владимир Путин дар Душанбе моҳи феврали соли 2017 гирифта шуд ва августи ҳамон сол нахустин гурӯҳи 29-нафарии омӯзгорон ба Душанбе омаданд.

Соли 2018-2019 шумори омӯзгорони Русия 55 нафарро ташкил дод. Ин омӯзгорон асосан мутахассисони забон ва адабиёти рус ҳастанд, вале дар миёни онҳо омӯзгорони фаннҳои дигар, аз ҷумла, математика, физика, кимиё низ мебошанд.

Дар Душанбе ҳамкориҳои ОМ ва Корея баррасӣ мешавад

Мулоқоти Вазири корҳои хориҷии Кореяи Ҷануби Чон Ий Ён бо ҳамтои тоҷикаш Сироҷиддин Муҳриддин

Рузи 30-юми ноябр дар шаҳри Душанбе Форуми 14-уми ҳамкории Осиёи Марказӣ ва Кореяи Ҷанубӣ оғоз шуд, ки дар он вазирони корҳои хориҷии ин кишварҳо иштирок доранд. Ин ҳамоиш бо ҳадафи густариши ҳамкориҳои оянда ва рушди муштараки Кореяи Ҷанубӣ ва Осиёи Марказӣ баргузор мешавад. Дар чаҳорчуби ин форум ва сафараш ба Душанбе рӯзи 29-уми ноябр Вазири корҳои хориҷии Кореяи Ҷануби Чон Ий Ён бо Эмомалӣ Раҳмон, раиси ҷумҳури Тоҷикистон мулоқот кард. Сайти президенти Тоҷикистон менависад, ки Эмомалӣ Раҳмон дипломати кореягиро барои кӯмаки ин кишвар ба Тоҷикистон дар давраи пандемияи коронавирус ташаккур кардааст.

Дар ҷараёни сафари расмии вазири корҳои хориҷии Кореяи Ҷанубӣ Чон Ий Ён ба Тоҷикистон, Протокол оид ба ворид намудани тағйирот ба Эъломияи байни Тоҷикистон ва Корея “Оид ба канорагирӣ аз андозбандии дукарата” ба имзо расид. Вазорати корҳои хориҷии Тоҷикистон рӯзи 29-уми ноябр навишт, ки дипломати калони кореягӣ дар садри як ҳайат бо ҳадафи анҷоми як сафари расмӣ дар Тоҷикистон ва ҳам ширкат ҳамоиши “Осиёи Марказӣ - Ҷумҳурии Корея” ба Душанбе сафар кардааст.

Дар ҷараёни дидору гуфтугӯҳои президенти Тоҷикистон Эмомалӣ Раҳмон бо вазири корҳои хориҷии Корея Чон Ий Ён, дар баробари масоили дигар, вазъ дар Афғонистон ва дигар масоили байналмилалӣ баррасӣ шудааст.

Кореяи Ҷанубӣ – кишваре дар Осиёи Шарқӣ ва мустақар дар нимҷазираи Корея яке аз давлатҳои босуръат пешраванда ба ҳисоб меравад ва дар даҳсолаҳои охир ба макони кору муҳоҷирати хориҷиҳои зиёд, аз ҷумла тоҷикистониҳо табдил шудааст. Садҳо тоҷикистонии муқими Корея бештар ҷавонону донишҷӯён ваё муҳоҷирони кориро ташкил медиҳанд. Тоҷикистон бо ин ки соли 1992 бо Кореяи Ҷанубӣ ҳамкориҳои дипломатӣ барпо кардааст, ҳамкориҳои наздиктари миёни ду кишвар тано дар чанд соли охир эҳсос мешавад. Умеди Тоҷикистон аз ин ҳамкориҳо пеш аз ҳама сармоягузорӣ ба иқтисоди кишвар ва фаъол шудани созишномаи муҳоҷирати корӣ аст. Созишномаи фароҳамкунандаи шароити кор барои шаҳрвандони Тоҷикистон дар Кореяи Ҷанубӣ, ки сӯҳбаташро мақомот чанд соли пеш шурӯъ карданд, то ҳанӯз ниҳоӣ нашудааст ва шаҳрвандони Тоҷикистон ҳамоно вобастаи бозори кори Русия мемонад.

Иқтисодшиносон мегӯянд, мизони додугирифти молу коло ҳам миёни ду кишвар дар сатҳи поин аст – 25,5 миллион доллар, ки бештар аз ҳисоби маҳсулоти аз Корея ба Тоҷикистон воридшаванда ҳисоб шудааст. Тобистони соли гузашта раҳбари Кумитаи сармоягузорӣ ва амволи давлатии Тоҷикистон гуфт, ки бо сабаби пандемияи коронавирус мувофиқаҳои қаблан ҳосилшуда миёни Тоҷикистону Кореяи Ҷанубӣ барои сармоягузорӣ дар ҳафт тарҳ бо маблағи умумии 320 миллион доллар муаллақ мемонад. Яке аз ин тарҳҳо бунёди корхонаи истеҳсоли мошинҳои барқиро дар назар мегирад.

КМИР Қирғизистон гуфт, ҳангоми нашри натиҷаҳои интихобот "иштибоҳ" шудааст

Назди Комиссияи марказии интихобот ва раъйпурсии Қирғизистон.

Комиссияи марказии интихобот ва раъйпурсии Қирғизистон (КМИР) 30 ноябр иштибоҳе, ки 28 ноябр дар сомонаи ин ниҳод ҳангоми шумориши овози иштирокдорони интихоботи порлумонӣ рух дода буд, шарҳ додааст.

Бино ба иттилои комиссия, "ҳеч кас имкони дастрасӣ ба сервер ва низоми раъйдиҳиро надорад" ва ҳамчунин дахолати инсонӣ дар низоми худкори иттилоотии марбут ба раъйдиҳӣ номумкин аст.

Ба гуфтаи масъулони комиссия, мутахассиси КМИР он рӯз ҳангоми нашри натиҷаҳои пешакӣ дар сомона иштибоҳан рақамҳоро дучанд нишон додааст ва каме дертар ин иштибоҳ ислоҳ шудааст.

КМИР Қирғизистон аз аҳзоби сиёсии ин кишвар даъват кардааст, ки ба якдигар "шубҳа" накунанд.

Дар Қирғизистон 28 ноябр интихоботи порлумонӣ баргузор шуд. Ҳизбҳои мухолифи Қирғизистон натиҷаҳои пешакии интихоботи парлумонии ин кишварро, ки рӯзи якшанбе барпо шуд, рад карда Комиссиюни марказии интихоботро дар тақаллуб айбдор намуданд.

Шоми 28-уми ноябр дар як нишасти хабарӣ дар Бишкек раҳбарони чор ҳизби сиёсӣ – “Отамакон”, ҳизби “Озодӣ”, сотсиал-демократҳо ва ҳизби “Ваҳдати қавмҳо” аз мақомот талаб карданд, ки натиҷаҳои интихоботро бекор ва интихоботи навро барпо кунанд.

Мухолифон комиссиюни интихоботро дар он муттаҳам карданд, ки дар 40 дақиқае, ки монитори ҳисобу китоби овозҳо аз кор монд, овозҳо “дуздидаву” “тақаллуб шудаанд”. Мақомоти интихоботӣ гуфтанд, ки 122 ҳазор ё наздики 10 фоизи бюллетенҳо беэътибор дониста мешаванд.

"Омикрон": зуд сироят мекунад, вале ҳанӯз далели ба марг овардани вирус вуҷуд надорад

Созмони ҷаҳонии тандурустӣ ҳушдор дод, ки навъи “Омикрон”-и коронавирус аз назари сирояткунӣ бисёр босуръат буда, дар ҳолати олуда шудан ба он паёмадҳои бисёр сангине ҳам доштааст. Дар як изҳороташ рӯзи 29-уми ноябр ин ташкилоти вобаста ба СММ дар бораи хусусиятҳои “Омикрон”, ки онро коронавируси дар Африқои Ҷанубӣ ошкоршуда меноманд, хулосаҳои худро дар ин бора пешкаш намуд. Мутахассисони тиб мегӯянд, ки ин навъи вирус дар натиҷаи омезиши чандин навъи коронавирус пайдо шуда, тавони зӯр омадан бар масунияти одамро дорад ва хеле осон аз як кас ба каси дигар сироят мекунад.

Айни замон, ба иттилои мутахассисон, бо ин ки ин вирус бо суръати зуд дар кишварҳои гуногун паҳн мешавад, ҳодисаҳои марг бар асари он ба қайд гирифта нашудааст. Ҳоло ин вирус дар чандин кишвари аврупоӣ ошкор шудааст ва дар аксари ҳолатҳо аввалин манбаи сироят шахсоне будаанд, ки аз сафари Африқои Ҷанубӣ ё дигар кишварҳо омадаанд. Баъди Исроил Ҷопон гуфт, ки дарашро ба рӯи хориҷиҳо мебандад. Дар ИМА ва Аврупо гуфтанд, ки барои онҳое, ки аз Африқои Ҷанубӣ меоянд, иҷозаи ворид шудан ба кишвар дода намешавад.

Президенти ИМА Ҷо Байден, ки дишаб дар бораи шакли нави "Омикрон"-и коронавирус сӯҳбат мекард, гуфт, ки зимистони имсола дар кишвар маҳдудиятҳои иҷтимоӣ ҷорӣ намекунад, вале аз мардум тақозо кард, ки ҳатман зидди ковид эм карда шаванд. Ӯ гуфт, "ин навъи коронавирус боиси ташвиши мо аст, вале мо набояд воҳима кунем. Мо бояд бо он мубориза барем", гуфт Байден.

Ёфтҳои бештар

XS
SM
MD
LG