Пайвандҳои дастрасӣ

Хабари нав

Хабарҳо

Дар Туркманистон аз ҳисоби "буҷавиҳо" масҷид месозанд

Мақомоти вилояти Балкани Туркманистон барои "сари вақт" ба поён расонидани сохтмони иншоотҳои нав дар ин минтақа аз кормандони муассисаҳои давлатӣ 500-манатӣ ҷамъ мекунанд.

Бар асоси қурби муайянкардаи Бонки марказии Туркманистон, 500 манат ҳудуди $142,8 мешавад. Ҳамчунин соҳибкорони маҳаллиро маҷбур мекунанд, ки ба сохтмони иншоотҳо кумак кунанд. Дар миёни иншоотҳои бунёдшаванда бинои масҷиди марказии Балкан низ ҳаст.

Ба иттилои хабарнигори бахши туркмании Радиои Озодӣ, сохтмони бинои масҷид ҳанӯз ним нашудааст ва сабаби ба кундӣ пеш рафтани сохтмон дар он аст, ки мақомот тамоми сол натавонистанд барои он аз буҷаи маҳаллӣ маблағ ҷудо кунанд.

Тавре хабарнигори радио муайян кард, мақомот ният доранд, масҷиди мазкурро ба номи яке аз наздикони президенти Туркманистон Қурбонгулӣ Бердимуҳаммадов гузоранд.

"Бо мақсади дар муҳлати муайяншуда ба истифода додани масҷид раҳбарони корхонаҳои буҷавӣ аз маоши кормандони худ 500-манатӣ меситонанд",-афзуд хабарнигор. Ба гуфтаи "буҷавиҳо", онҳоро таҳдид кардаанд, ки дар сурати надодани маблағ ҷои корро аз даст хоҳанд дод.

Ҳамаи хабарҳои имрӯзро дар инҷо бихонед

Боздошти беш аз 100 кас барои сӯзондани ҷасади марде дар Покистон

Покистон

Мақомоти Покистон дар пайванд ба латукӯб ва сӯзондани ҷасади як корманди корхонаи дӯзандагӣ дар он кишвар беш аз сад касро дастгир кардаанд. Ҷамъияти хашмгин рӯзи 3-юми декабр Приянта Кумараро бо гуноҳи "куфр" куштанд.

Сиёсатмадорону низомиён, чеҳраҳои динӣ ва намояндагони ҷомеаи шаҳрвандии Покистон ҳодисаро маҳкум карданд. Имрон Хон, сарвазири Покистон, онро дар Твиттер "ҳамлаи даҳшатноки мутаассибон" ва "як рӯзи шармовар барои Покистон" номид. Ӯ ваъда дод, ки гунаҳкорон ҷазо хоҳанд гирифт.

Масъалаи "куфр" ё "тавҳин ба муқаддасоти дини ислом" дар ин кишвари аксарияташ мусалмон мавзӯи ҳассос аст ва ҳатто иддаои исботнашуда дар ин робита метавонад, хушунат ва эътирозҳои бузургро ба вуҷуд орад.

Ҳасан Ҳавар, сухангӯи ҳукумати вилояти Панҷоб, рӯзи 4-уми декабр гуфт, дар амалиёт дар Сиалкот, ноҳияе дар 200-километрии Исломобод, 118 гумонбар боздошт шудаанд.

Ба гуфтаи пулис, коргарони як корхонаи дӯзандагӣ Приянта Кумара, мудири содиротро дастгир карда, ӯро бо шиканҷа ба қатл расонданд ва ҷасадро дар пеши чашми мардум сӯзонданд.

Як сокини маҳаллӣ ба Радиои Озодӣ гуфт, коргарони корхона иддао кардаанд, ки дар партовгоҳи кории Приятна Кумара саҳифаҳои Қуръонро ёфтаанд. Ӯ ҳамчун пайрави масеҳият муаррифӣ шудааст.

Русия хабарнигорони Озодиро "агенти хориҷӣ" номид, Флай маҳкум кард

Вазорати адлияи Русия 3-юми декабр чаҳор хабарнигори ҳозира ва пешини Радиои Озодиро "агентҳои хориҷӣ" номид. Мақомоти Русия ин истилоҳро нисбати созмонҳо ва шахсоне истифода мекунанд, ки ба бовари онҳо аз хориҷ маблағгузорӣ шуда, ба фаъолияти сиёсӣ машғуланд.

Вазорат гуфт, хабарнигорони бахши тоторӣ-бошқирдии Радиои Озодӣ ва тарҳи "Идел.Реалити" Алина Григорева, Андрей Григорев, Регина Ҳисамова ва ҳамкори пешинаи онҳо Регина Гималова ба рӯйхати "агентҳои хориҷӣ"-и Русия дохил карда шуданд. "Идел.Реалити" як тарҳи Радиои Озодӣ аст.

Қонуни баҳсбарангези "агенти хориҷӣ" дар Русия соли 2012 қабул шуда, бештар ба зидди мунтақидон ва расонаҳои озод истифода мешавад. Ин қонун аз созмонҳое, ки аз хориҷа ёрӣ мегиранд ва, ба бовари мақомот, ба фаъолияти сиёсӣ машғуланд, бояд худро ҳамчун “агентҳои хориҷӣ” номнавис кунанд.

Ҷейми Флай, президенти Радиои Озодӣ, ин иқдоми мақомоти Русияро маҳкум кард. Ӯ гуфт, бахши тоторӣ-бошқирдии Радиои Озодӣ ба гузориш додан ба мухотабони худ дар дохили Русия идома хоҳад дод ва рисолаташро "беш аз ҳарвақта муҳим" номид.

HRW аз Озарбойҷон хост, латукӯби "ваҳшатнок"-и мухолифинро санҷад

Тазоҳурот. Боку, 1-уми декабри 2021

Созмони Дидбони Ҳуқуқи Башар (Human Rights Watch) аз Озарбойҷон хостааст, қазияи бо хушунат пароканда кардани тазоҳуроти осоишта дар Боку ва латукӯби "ваҳшатнок"-и як сиёсатмадор ва овозхони мухолифи давлатро "беғаразона ва ҳамаҷониба" таҳқиқ кунад.

Иштирокдорони гирдиҳамоии 1-уми декабр дар пойтахти Озарбойҷон озодии як фаъоли мухолиф Солеҳ Рустамлиро талаб карданд. Ӯ бо гуноҳи “шустушӯи пул” ҳафт сол аз озодӣ маҳрум аст. Дидбони Ҳуқуқи Башар ҳукми Рустамлиро “сохта” номид. Худаш гуруснанишинӣ эълон кардааст.

Георги Гогия, ёвари мудири бахши Аврупо ва Осиёи Марказӣ дар созмони Дидбони Ҳуқуқи Башар, 3-юми декабр дар баёнияе гуфт, "мақомоти Озарбойҷон бори дигар ҳуқуқи мардумро барои баргузории тазоҳуроти осоишта бешармона таҳқир карданд. Онҳо барои пахши мухолифат аз зӯроварӣ истифода намуданд."

Сафорати Амрико дар Боку рӯзи 2-юми декабр дар Твиттер аз хушунат ба зидди тазоҳургарон изҳори нигаронии амиқ кард. Масъулони сафорат гуфтанд, аз "гирдиҳамоии осоишта ва озодии баён, ки дар Қонуни асосии Озарбойҷон зикр шудааст", пуштибонӣ мекунанд.

Дар миёни шахсоне, ки дар тазоҳуроти рӯзи 1-уми декабр дастгир шуданд, узви Ҳизби мухолифи "Мусовот", Тавфиқ Яъқублу, низ ҳаст. Ӯ захмҳои зиёде бардоштааст.

Яъқублуи 60-сола гуфтааст, пулис ҳангоми наворбардорӣ ӯро сахт зад ва хост, дар назди дурбин бигӯяд, ки танқиди раҳбарияти Озарбойҷонро бас мекунад.

"Бархурди ваҳшатнок бо Яъқублу ҳамла ба шахс ва ҳам ба ҳуқуқи гирдиҳамоии осоишта буд," -- гуфт Гогия ва илова кард: "Мақомот бояд тафтишоти беғаразонаро таъмин кунанд ва масъулонро ба ҷавобгарӣ кашанд."

Ҳукумати Озарбойҷон солҳо боз ба поймол кардани ҳуқуқи башар, аз ҷумла шиканҷа ва боздоштҳои худсарона, танқид мешавад.

WHO: Касе аз "Омикрон" нафавтидааст

Намояндагони Созмони Ҷаҳонии Тандурустӣ (WHO) рӯзи 3-юми декабр гуфтанд, ки то кунун дар бораи фавти одамон аз “Омикрон”, навъи ҷадиди коронавирус, гузориш нашудааст.

Ин навъи вирус бори аввал ҳафтаи гузашта дар Африқои Ҷанубӣ кашф шуда, дар чиҳил кишвари дунё паҳн гардидааст.

Далелҳои ибтидоӣ нишон медиҳанд, ки “Омикрон” зуд сироят мекунад, вале нишонаҳои беморӣ нисбат ба навъҳои қаблии коронавирус сабуктар аст. Бо ин вуҷуд, баъзе аз шахсони мубтало ба “Омикрон” дар шифохонаҳо бистарӣ карда шудаанд.

Ин навъи ҷадиди коронавирус дар ҳоле паҳн мешавад, ки шифохонаҳои баъзе аз кишварҳо бар асари “бедодгарӣ”-ҳои “Делта”, навъи қаблии коронавирус, зери фишор қарор доранд.

“Делта” сабаб шуд, ки ҳукуматҳо дар бисёре аз кишварҳо, аз ҷумла Аврупо, муқарраротеро чун истифода аз ниқоби тиббӣ, хонашинӣ ва риояи фосилаи ҷисмонӣ дигарбора ҳатмӣ кунанд. Талошҳои эмкунӣ ҳам афзудааст.

Байден гуфт, барои пешгирӣ аз нақшаи Русия тарҳеро дуруст мекунад

Ҷо Байден ва Владимир Путин. Акс аз моҳи июни 2021

Президенти Амрико гуфт, бар сари тарҳе кор мекунад, ки бино бар он ҳаракати низомии Русия алайҳи ҳамсояаш, Украина, бисёр душвор хоҳад шуд.

Ҷо Байден рӯзи 3-юми декабр ба хабарнигорон гуфт, ин тарҳ “ҳамаҷониба” аст. “Ба ҷаноби Путин бисёр мушкил хоҳад буд, ки ба корҳои худ, ки мардум аз анҷомаш тарс доранд, идома бидиҳад. Аммо ин нақша дар ҳоли таҳия шудан аст," – афзуд ӯ.

Байден дар ҳоле дар ин маврид суҳбат мекунад, ки бино бар хабарҳо Русия дар сарҳад бо Украина беш аз 90 ҳазор сарбоз ва ҳамчунон танкҳову силоҳҳои вазнинро ҷобаҷо кардааст. Киев аз ҳуҷуми эҳтимолии Маскав нигарон аст.

Раиси ҷумҳури Амрико гуфт, дар пайванд ба ин вазъият бо Украина ва муттафиқони аврупоияш мунтазам дар тамос аст. Юрий Ушаков, мушовири Кремлин, гуфтааст, Владимир Путин ва Ҷо Байден рӯзҳои наздик суҳбати онлайнӣ хоҳанд кард.

Пешниҳод шудааст, ки шумораи ҳарбиёнро дар марзи Тоҷикистону Қирғизистон кам кунанд

Мулоқоти намояндагони Тоҷикистону Қирғизистон дар гузаргоҳи "Кулунду". 3-юми декабри 2021

Бино ба хабари бахши қирғизии Радиои Озодӣ, мақомоти Тоҷикистон рӯзи 3-юми декабр дар мулоқот бо намояндагони Қирғизистон пешниҳод кардаанд, ки шумораи ҳарбиён дар сарҳади ду кишвар кам карда шавад.

Ҷониби Тоҷикистон ба таври расмӣ дар ин бора хабар надодааст.

Ба қавли муовини ваколатдори президенти Қирғизистон дар вилояти Бодканд, Маъруфхон Туллаев, ҷониби Тоҷикистон пешниҳод кардааст, тартибот дар минтақаҳои наздимарзӣ “тавассути нерӯҳои пулис таъмин карда шавад”.

“Ҳамчунин пешниҳод шуд, ки корҳои сохтмонӣ дар наздикии сарҳад танҳо бо розигии тарафҳо анҷом дода шавад,” – афзудааст ӯ.

Мулоқоти Раҷаббой Аҳмадзода, раиси вилояти Суғд ва Абдикарим Алимбоев, раиси вилояти Бодканд, рӯзи 3-юми декабр дар гузаргоҳи "Кулунду" баргузор шудааст.

Рӯзи якуми декабр сокинони деҳаи Сомониёни ҷамоати Чоркӯҳи Исфара дар бораи рабуда ва латукӯб шудани як омӯзгори 59-сола дар марз бо Қирғизистон хабар доданд. Раиси деҳаи Куктоши ноҳияи Бодканди Қирғизистон баръакс иддао кард, ки шаҳрвандони Тоҷикистон як сокини ин деҳаро ҳангоми ҷустуҷӯи чорво задаанд.

Хадамоти марзбонии Қирғизистон шаби 1-уми декабр аз тирпарронӣ дар сарҳад хабар дод. Мақомоти Тоҷикистон ҳанӯз дар мавриди ҳарду ҳодиса ва ҷузъиёти музокирот шарҳе надодаанд.

Марзи Тоҷикистону Қирғизистон солҳо боз ба далели номуайян будани бахше аз сарҳад доғ ва мояи ҷанҷолу задухӯрдҳост. Низои мусаллаҳонаи моҳи апрели имсол, ки аз ду ҷониб даҳҳо кушта ва захмӣ бар ҷой гузошт, робитаи ду кишвари болооби Осиёи Марказиро сарду печида кард. Ҳарду тараф ҳамвора якдигарро ба сар задани муноқиша ва кӯшиши ноором кардани вазъ гунаҳкор мекунанд.

Матбуоти Туркия: Як зани тоҷик ҳангоми офати табиӣ дар Истанбул ҷон бохтааст

Боди сахт дар Истанбул. 29-уми ноябри 2021

Расонаҳои Туркия гузориш доданд, ки як зан аз Тоҷикистон ҳангоми бодҳои сахти охири моҳи ноябр дар шаҳри Истанбул ҷони худро аз даст додааст.

Нашрияи “Ҳуррият” аз ӯ Малоҳат Раҳимоваи 31-сола ном бурд, вале маълумоти дигаре надод. Чанде аз корбарони тоҷики шабакаҳои иҷтимоӣ бо нашри акси зан аз пайвандонаш хостаанд, ҷасади ӯро бигиранд.

“Ҳуррият” мегӯяд, Раҳимова дар зери боми кандашудае дар маҳаллаи Эсенюрти Истанбул монда, ба бемористон бурда шуд, аммо наҷот наёфт. Лаҳзаи ба фалокат дучор шудани ӯро дурбинҳои назоратӣ сабт кардаанд. Ҳодиса дар маҳаллаи Қироч, кӯчаи Истиқлол, рӯй додааст.

Расонаҳои туркӣ менависанд, он ҳангом Малоҳат Раҳимова аз роҳ мегузашт ва зери боми сарозершуда монд.

Бодҳои сахт рӯзи 29-уми ноябри имсол дар шаҳри Истанбул ва атрофи он боис ба марг ва захмӣ шудани чанд кас гардид.

Мақомоти Истанбул гуфта буданд, суръати бод дар шаҳри соҳилӣ то 130 километр дар соат мерасид. Дар наворҳое, ки тавассути телевизиону шабакаҳои иҷтимоӣ паҳн шуданд, саҳнаҳои афтодани бурҷи баландошёнае дар соҳилҳои Истанбул ва канда шудани боми биноҳо дида мешавад.

Дар Узбекистон ҷазоро барои фасодкорӣ сахттар мекунанд

Оҷонси мубориза бо коррупсияи Узбекистон тарҳи қонунеро ба палатаи қонунгузори ин кишвар пешниҳод кардааст, ки сахттар кардани ҷазоро барои фасодкорӣ пешбинӣ мекунад.

Раиси оҷонс Акмал Бурҳонов 2-юми декабр дар ин бора хабар дода, гуфт, дар лоиҳаи қонун мафҳуми "ҷинояти коррупсионӣ" муайян карда шудааст. Ба гуфтаи ӯ, ба он 15 навъи ҷинояткорӣ шомил мешавад.

Дар лоиҳаи қонун пешниҳод шудааст, ки гумонбар барои дуздӣ тавассути азхудкунӣ ё исрофкорӣ ва қаллобӣ бо суистифода аз мақом ба муҳлати то 10 сол аз озодӣ маҳрум карда шавад. Қонуни амалкунанда барои ин навъи ҷиноятҳо то 5 соли зиндонро пешбинӣ кардааст.

Ҳамчунин барои гирифтан ё додани ришва, миёнаравӣ дар ришвахорӣ то 20 соли зиндон пешбинӣ гаштааст.

Тибқи лоиҳаи қонун, шахсоне, ки бо ҷиноятҳои марбут ба ришвахорӣ зиндонӣ шудаанд, пеш аз муҳлат шартан озод намешаванд ва ҷазои онҳо низ сабуктар карда нахоҳад шуд.

Президенти Қирғизистон латукӯби Текебоевро кори авбошон донист

Омурбек Текебоев ва Содир Ҷабборов (Жапаров)

Президенти Қирғизистон, Содир Ҷабборов (Жапаров) дар суҳбат бо расонаи "Aryba.kg" ҳамла ба раҳбари Ҳизби мухолифи "Ота-Макон"-и ин кишвар Омурбек Текебоевро баъди напазируфтани натиҷаҳои интихоботи порлумонӣ шарҳ додааст.

Ҷабборов дар посух ба суоли он ки оё дастури латукӯби сиёсатмадори мухолифро мақомот додаанд, изҳор доштааст, ки "вақте роҷеъ ба фаъолияти Кумисюни марказии интихобот ва раъйпурсӣ сарусадоҳои зиёд аст, барои худ эҷод кардани мушкили иловагӣ маъное надорад".

"Шахсе, ки Текебоевро латукӯб карда, телефонашро дуздидааст, маълум шуд, як ғоратгари одӣ мебошад. Як касро дастгир карданд ва телефони Текебоевро баргардондааст. Гумонбар баёнот медиҳад, ки аз тазоҳуроти Текебоев "хаста шудааст". Дар аввал мо фикр кардем, ин корро худи Текебоев ташкил кардааст. Худи ӯ иддао дошт, ки кори мақомот аст. Аммо ду ҷониб бегуноҳ буданд ва он кори дасти авбошон будааст", - афзудааст Ҷабборов.

Омурбек Текебоев гуфт, ҳамла рӯзи 1-уми декабр дар тарабхонаи "Парк Отел"-и Бишкек сурат гирифт. Ба гуфтаи ӯ, тақрибан 70 марди ниқобпӯш ба онҷо рафта, се нафарашон ӯро задаанд. Текебоев бовар дорад, ки ҳамла ба фаъолиятҳои сиёсии ӯ рабт мегирад.

Пулиси шаҳри Бишкек шоми 1-уми декабр хабар дод, ки мардеро бо гумони ҳамла ба Омурбек Текебоев, раҳбари Ҳизби мухолифи "Ота Макон"-и Қирғизистон боздошт кардааст.

Ба огаҳии пулис, гумонбар сокини 23-солаи вилояти Чӯйи Қирғизистон мебошад. Ӯ телефони мобилиеро, ки аз Текебоев дуздида буд, ихтиёрӣ баргардонида, дар ҳоли ҳозир дар боздоштгоҳ қарор дорад.

Резников Русияро ба омодагӣ барои ҳамлаи эҳтимолӣ ба Украина муттаҳам кард

Алексей Резников

Алексей Резников, вазири мудофиаи Украина, мақомоти Русияро муттаҳам кард, ки бо ҷо ба ҷо кардани беш аз 94 ҳазор сарбоз дар наздикии марзи ин кишвар ба амалиёти низомии густардаи эҳтимолӣ омода мешаванд.

Ӯ рӯзи 3-юми декабр дар порлумони Украина гуфт, Киев ба танишҳо дар минтақа доман нахоҳад зад, аммо агар лозим бошад, мубориза хоҳад кард.

Резников афзуд, истихбороти Украина сенарияҳои эҳтимолиро баррасӣ мекунад ва ҳамзамон гуфт, Киев алоқаманди ҳалли сиёсӣ ва дипломатии масъалаҳост.

Гузоришҳо дар мавриди тақвияти ҳузури низомии Русия дар марзи Украина дар ҳафтаҳои охир сабаб шудааст, то Иёлоти Муттаҳида ва чанд муттафиқаш дар НАТО ба пуштибонии худ аз истиқлолу тамомияти арзии Украина таъкид кунанд.

Маскав гуфтааст, қасди иқдоми низомие алайҳи Украина надорад. Ҳукумати Русия соли 2014 нимҷазираи Қрими Украинаро ишғол карда, ба бахше аз қаламрави худ табдил додааст.

Чоршанбе Чоршанбиев ба ҷавобгарӣ кашида шуд

Хабаргузориҳои русӣ гуфтанд, дар Маскав Чоршанбе Чоршанбиев - як блогер ва размкори якҳарбаи бидуни қоида ваё ММА боздошт шуд. Ӯро барои ҳаракати босуръат ва бидуни риояи қонун дар нақби Лефортовои шаҳри Маскав ба ҷавобгарии маъмурӣ ҷалб кардаанд. Дафтари матбуоти раёсати корҳои дохилии шаҳри Маскав мегӯяд, Чоршанбиев дар бозпурсӣ эътироф кардааст, ки гоҳо сари чанбари мошин нишаста қоидаҳоро вайрон мекард. Ба гуфтаи ӯ, эҳтимолан сабти навори ҳаракати босуръати ӯ аз нақби Лефортоворо яке аз бародаронаш дар интернет ҷой додааст ва ин ҳодиса тобистон сабт шудааст. Ӯ гуфтааст, ки сари чанбари мошин сабт намекард ва шахсан худаш ҳеҷ навоерро ба интернет ҷой надода буд. Полис мошини "Тойота Камри"-и Чоршанбиевро дар як таваққуфгоҳи ҷаримавӣ ҷой дода, худи ӯро ба ҷавобгарии маъмурӣ кашид. Чоршанбиев 26 сол дошта, дар Маскав бо муҳорибаҳои бидуни қоида машғул аст.

Раҳбари Толибон дар бораи "ҳуқуқи занон" фармон содир кард

Мулло Ҳайбатуллоҳ Охунзода, раҳбари Толибон, рӯзи 3-юми декабр дар фармоне ба риояи баъзе аз ҳуқуқи занон дар чаҳорчӯби шариати исломӣ таъкид кардааст. Аммо дар фармони иборат аз шаш банд дар бораи ҳуқуқи кор ва таҳсили духтарону занон ҳеч чиз гуфта нашудааст, дар ҳоле ки ин мавзуъҳо аз масоили мавриди нигаронии созмонҳои ҳомии ҳуқуқ дар Ғарб аст

Дар моддаи аввали фармон омадааст, ки ризояти духтарон ҳангоми никоҳ зарур аст, дар сурате ки ба гуфтаи раҳбари Толибон, хатари фитна ва фасод дар он набошад. Аммо дар бораи синни издивоҷ дар дастури раҳбари Толибон чизе гуфта нашудааст.

Дар моддаи дувуми фармон гуфта шудааст, ки зан мол нест, балки инсони озод ва асил аст ва ҳеч касе онро дар бадали сулҳ ё оштии хонаводаҳо дода наметавонад. Дар баъзе минтақаҳои қабиланишини Афғонистон аз гузашта одате роиҷ аст, ки духтарон дар ивази сулҳ миёни ду хонавода ё қабила дода мешаванд ва мавриди бадрафторӣ ва шиканҷа қарор мегиранд.

Дар моддаи севуми фармони Мулло Ҳайбатуллоҳ омадааст, ки баъд аз вафоти шавҳар, зани беваро на бародари шавҳар ба зӯр ба никоҳ гирифта метавонад ва на каси дигар ва зан бо ихтиёри худ метавонад шавҳар кунад.

Дар ин фармон дар бораи нигаронии асосии занони афғон, ки ҳаққи таҳсил ва кор аст, чизе гуфта нашудааст.

Баъди ба дасти Толибон гузаштани Кобул дар рӯзи 15-уми августи имсол, духтарони аз синфи шаш боло дар бисёре аз вилоятҳо ва аксари кормандони зан дар идораҳои давлатӣ аз ҳаққи кор ва омӯзиш маҳрум шуданд.

Кишварҳои ғарбӣ, Созмони Милал ва гуруҳҳои мудофеъ аз ҳуқуқи башар пас аз ба қудрат расидани Толибон аз нақзи ҳуқуқи инсон нигаронии амиқи худро баён карданд. Онҳо ба Толибон фишор меоранд, ки як ҳукумати ҳамашумул ё фарогир ташкил намуда, ҳуқуқи ҳамаи афғонҳо, аз ҷумла ақаллиятҳо ва занонро риоят кунанд.

Ҳуқуқи занон дар даврони ҳокимияти аввали Толибон бар Афғонистон дар солҳои 1996-2001 шадидан маҳдуд шуда буд. Ҳоло Толибон мегӯянд, ки онҳо назар ба гузашта тағйир кардаанд. Вале, бо ин вуҷуд, ҳукумати Толибон танҳо аз сӯи мардон идора мешавад ва занон аз ҳаққи кор ва таҳсил маҳрум ҳастанд.

Суръати Интернет дар Тоҷикистон сусттарин номбар шуд

Тоҷикистонро ба даҳгонаи кишварҳое дохил кардаанд, ки суръати Интернет дар онҷо суст аст. Сомонаи Cable.co.uk дар гузорише навишт, Тоҷикистон дар миёни кишварҳои ҷаҳон аз назари суръати Интернет дар ҷойи 211-ум қарор дорад.

Дар гузориш Туркманистон дар ҷойи охирин аст. Ин кишвар ҳамагӣ 0,50 мегабайт-сония интернет фароҳам мекардааст ва бо чунин суръат, масалан, боргириву тамошои филме имкон надорад. Барои боргирии филми иборат аз 5 гигабайт дар Туркманистон 22 соату 34 сония зарур будааст.

Муҳаққиқони байнулмилалии Интернет поин будани суръати онро бо вазъи сиёсии ин кишварҳо ва маҳдуд кардани озодии баён рабт медиҳанд.

Айни замон, аз миёни кишварҳои Шӯравии пешин, Русия, Украина ва Беларус ҳамчун давлатҳои дорои Интернети босуръат ёд шудаанд.

Раиси як идораи давлатӣ дар Тоҷикистон барои бе иҷоза даромадан ба хонаи зане ҷавобгар шудааст

Шаҳри Турсунзода

Раиси як идораи давлатиро дар шаҳри Турсунзода барои вайрон кардани қонуни "дахлнопазирии манзил" ба ҷавобгарӣ кашидаанд.

Додситонӣ Ҷаҳонгир Равшанов ва як зердасташро ба он муттаҳам медонад, ки ҳангоми "сарбозшикор" ба хонаи зане бе иҷоза ворид шудаанд. Зан мегӯяд, ҳодиса 18-уми ноябри имсол рӯй дод ва дар натиҷа фарзанди хурдсолаш тарсиду бемор шуд. Равшанов иддао дорад, ки даҳонӣ иҷоза гирифта буданд.

Як манбаъ дар Додситонӣ рӯзи 2-юми декабр бе зикри номаш гуфт, Ҷаҳонгир Равшанов, сардори Идораи хадамоти манзилию коммуналии шаҳри Турсунзода, дар хонаи зан писари ҳамсояро кофтукоб кардаанд, то ба артиш фиристанд. Ӯ гуфт, "дар пайи аризаи зан ва суҳбат бо шоҳидон, нисбати раиси идора парвандаи ҷиноӣ боз шуд."

Ин зан, ки хоҳиш кард, номаш зикр нашавад, гуфт, сардори Идораи хадамоти манзилию коммуналии шаҳр ва ҳамроҳонаш бе иҷозат дарро зада, хонаашро кофтанд. Вай гуфт, он ҳангом дар хона набуд ва аз ин амал духтари хурдсолаш тарсида, бемор шудааст.

Ҷаҳонгир Равшанов, сардори Идоари хадамоти манзилию коммуналии шаҳри Турсунзода, дар суҳбат бо Радиои Озодӣ гуфт, воқеан вориди хонаи ин зан шуда буданд, аммо аз фарзандаш иҷозат гирифтанд. "Ба мо хабар доданд, ки писари ҳамсоя дар он ҷо пинҳон шудааст ва барои ҳамин рафтем", -- гуфт ӯ.

Ин мақомдор афзуд, ӯ узви Кумисюни даъвати ҷавонон ба артиш аст ва ҷавонеро ҷустуҷӯ мекард, ки аз рафтан ба артиш сарпечӣ мекард. Дар ҳар сурат, додситонӣ ин амалро хилофи қонун донистааст.

Бе иҷозати соҳибхона ё додгоҳ ворид шудан ба хонаи мардум дар Тоҷикистон ҷиноят дониста мешавад, аммо маъмулан ин банди қонун хеле кам риоят мешавад.

Порлумони Тоҷикистон соли 2016 қонунеро қабул карда буд, ки ба ниҳодҳои амниятӣ ва ҳифзи ҳуқуқ дар ҳолатҳои истисноӣ ҳақ медод, ба хонаҳои шаҳрвандон бе иҷоза дароянд. Мақомот он замон гуфта буданд, дар баъзе маврид маҳз ҷараёни гирифтани иҷозатнома барои ворид шудан ба манзили гумонбар фурсати сари вақт боздошт шудани муттаҳамро аз байн мебарад. Порлумон пас аз як сол онро бекор кард.

Дар Тоҷикистон тирамоҳу баҳор ҷавононро ба сафи артиш ҷалб мекунанд. Мақомот мегӯянд, сафи ихтиёриён афзудааст, вале дар айни замон бо зӯр ҷавононро ба артиш мебаранд.

Сокинон борҳо аз ворид шудани намояндагони мақомот ба хонаҳояшон шикоят кардаанд, аммо ҳодисаи охир аз мавридҳои хеле кам будааст, ки таҳқиқ мешавад.

Соҳибкори тоҷик барои ҳимоят аз ҳаққи се муҳоҷир 230 ҳазор рубл додааст

Зиндоне дар Иркутск, акс аз бойгонӣ

Як соҳибкори тоҷик дар Иркутск ба ду адвокате, ки аз ҳуқуқи се муҳоҷири боздоштшуда ҳимоя мекунанд, 230 ҳазор рубл додааст.

Ба гуфтаи масъулони ҷамъияти тоҷикони Иркутск, соҳибкор Мирзоҳаёт Соҳибов ба муҳоҷироне, ки дар сӯхтор осеб диданд, сару либос дода, ба ду муҳоҷире, ки дар беморхона бистарианд, ба харидани дору низ ёрӣ кардааст.

Шаби 12-уми ноябр дар деҳаи Заларии Иркутск вагони зисти ҳафт муҳоҷири тоҷик оташ зада шуд, ки дар натиҷаи он ду нафар ҷон бохтанд. Мақомоти Русия дар аввал гуфтанд, ки ин кор аз ҷониби сокинони маҳаллӣ анҷом шудааст, вале се муҳоҷири тоҷикро, ки пайвандонашон ҷабрдида медонанд, бо иттиҳоми қасди куштор боздошт карданд. Аз ҷониби сокинони маҳаллӣ як нафар дастгир шудааст.

Алишер Ширинов, раиси ҷамъияти тоҷикони Иркутск, рӯзи 3-юми декабр гуфт, кумаки асосиро ба муҳоҷирон сафорати Тоҷикистон мерасонад, вале ҳамзамон Мирзоҳаёт Соҳибов аз ибтидо дар канори муҳоҷирон буд.

Мирзоҳаёт Соҳибов зодаи Тоҷикистон ва шаҳрванди Русия аст ва дар Иркутск тиҷорат дорад.

Мавзӯи марги муҳоҷирон ва боздошти онҳо вокуниши мақомоти тоҷикро ба бор овард. Сафорати Тоҷикистон барои пайгирии ҳодиса ҳайатеро ба ин вилоят фиристод. Сироҷиддини Муҳриддин, вазири корҳои хориҷии Тоҷикистон, бо ҳамтои русаш, Сергей Лавров, дар ин мавзуъ суҳбат кард ва хоҳиши таҳқиқи одилонаи ин ҳодисаро намуд.

Мақомоти тоҷик бар ин боваранд, ки се муҳоҷири боздоштшуда гуноҳ надоранд. Мақомоти Русия ҳанӯз ҳодисаро шарҳ надодаанд.

Падари Манора аз натиҷаи таҳқиқи марги ӯ норозӣ аст

Манораи Абдуфаттоҳ

Пайвандони зане, ки ҷасадаш моҳи июни имсол дар ноҳияи Файзобод бо 26 зарби корд пайдо шуд, мегӯянд, мақомот парвандаи духтарашонро дуруст таҳқиқ накарданд.

Додситонии ноҳияи Файзобод марги Манораи Абдуфаттоҳро худкушӣ номид ва бар асоси хулосаи ташхиси тиббиву додгоҳӣ гуфт, "худи ӯ 26 кордро ба баданаш задааст". Наздикони зан ба худкушии ӯ бовар надоранд ва мегӯянд, "бо эҳтимоли зиёд ӯро куштаанд".

Абдуфаттоҳ Мисоқов, падари Манора дар суҳбат бо Радиои Озодӣ гуфт, ҳарчанд додситонӣ сабаби марги духтарашро худкушӣ номидааст, касеро то кунун ба ҷавобгарӣ накашидааст. Ин мард шавҳар ва хушдомани духтарашро дар марги Манора гумонбар медонад ва аз рӯйи онҳо ба мақомот шикоят кардааст.

Ӯ гуфт, мақомот шикояти ӯро баррасӣ накард, вале аризаи домодашро фавран баррасӣ карда, се тифли аз Манора мондаро ба тарбияи ӯ супурданд. Ин хонавода аз болои ҳукми додгоҳ шикоят кардаанд, аммо ҳукм баррасӣ нашуда, мақомот ба хушдоман ва шавҳари духтари марҳумаш иҷозат додаанд, ки бо се кӯдак ба Русия бираванд.

Назари шавҳари Манора ва хушдоманаш ба даъво маълум нест. Радиои Озодӣ борҳо талош кард, то посухи онҳоро бигирад, аммо онҳо ҷавоб надоданд.

Маъмулан мақомот дар парвандаҳои дигари худкушӣ шахсонеро, ки боиси таҳрики ин амал шудаанд, ба ҷавобгарӣ мекашид, вале дар павандаи шубҳабарангези Манора бо гузашти беш аз ним сол касе ба ҷавобгарӣ кашида нашудааст.

Абдуфаттоҳ Мисоқов, падари Манора, мегӯяд, ҳайрон аст, ки чаро тафтиши парванда ба итмом нарасида, ба ду гумонбар иҷозат доданд, ки Тоҷикистонро тарк кунад.

Мақомот инро шарҳ надоданд.

Манора соли 2015 бо як сокини ноҳияи Файзобод оила барпо кард ва аз ӯ се фарзанд мондааст, ки ҳоло ба Русия бурда шудаанд.

Худкушӣ номидани марги ӯ, ки бо 26 зарби корд ҷасадаш пайдо шуда буд, вокунишҳои зиёде ба бор овард. Аксаран шубҳа доранд, ки як нафар тавонад бо 26 зарби корд худро бикушад.

Аз 8 то 16 сол. Ҳашт муҳоҷири тоҷикро дар Русия зиндонӣ карданд

Акс аз бойгонӣ

Ҳашт муҳоҷири тоҷикро бо гуноҳи ҳамлаи мусаллаҳона ба як тоҷир дар вилояти Маскав ба зиндон маҳкум кардаанд.

Хабаргузории русии ТАСС аз муҳоҷирон ва тоҷир ном набурда, аммо аз қавли мақомот навишт, "онҳо аз силоҳи оташфишон ва травматикӣ истифода намуданд." Назари вакили мудофеи онҳо маълум нест.

Додгоҳ гуфтааст, муҳоҷронро аз 8,6 то 16 сол аз озодӣ маҳрум кард. Ба қавли масъулони додгоҳ, муҳоҷрон ба тоҷир ба маблағи 11,5 миллион рубл зарар расонидаанд.

Хабарҳои боздошту зиндонӣ шудани муҳоҷирони тоҷик дар Русия зиёд расонаӣ мешавад. Дар аксар ҳолат пайвандонашон мегӯянд, ба онҳо туҳмат шудааст.

Дар Русия садҳо ҳазор шаҳрванди Тоҷикистон кору иқомат мекунанд.

Наздики ҳазор зиндонӣ дар Қазоқистон афв мешавад

Яке аз зиндонҳои Қазоқистон.

Палатаи болоии порлумони Қазоқистон рӯзи 2 декабр тарҳи қонун "Дар бораи афви марбут ба сисолагии истиқлол"-ро қабул кард.

Ерлан Тургумбоев, вазири корҳои дохилии Қазоқистон гуфт, бар асоси ин қонун наздики ҳазор зиндоние, ки ҷиноятҳои сабук ва миёна содир кардаанд, озод мешаванд. Ҳамзамон, бар асоси ин қонун, муҳлати ҳабси қисми дигаре аз маҳбусон кам мегардад.

Пештар аз ин вазир гуфта буд, 2236 кас шомили афв ва ҳамзамон наздики 5 ҳазор парвандаи ҷиноӣ пӯшида мешавад.

Бино ба иттилои расмӣ, дар Қазоқистон 34 ҳазор кас дар муассисаҳои ислоҳӣ адои ҷазо мекунанд.

Тарҳи қонуни афв барои имзо ба президенти Қазоқистон ирсол шудааст.

Ширкати дӯст ва хоҳарзодаи Путин VK-ро аз Алишер Усмонов харид

Владимир Путин ва Алишер Усмонов.

Алишер Усмонов, миллиардери узбектабори Русия саҳмияҳои ширкати VK (Mail.ru Group-и пешин)-ро ба ширкати "СОГАЗ" фурӯхт.

Соҳибони "СОГАЗ" - дӯсти Владимир Путин Юрий Ковалчук ва хонаводаи вай, хоҳарзодаи Путин Михаил Шеломов ҳастанд.

VK бузургтарин шабакаҳои иҷтимоии Русия "ВКонтакте", "Одноклассники", паёмрасони mail.ru ва чанд хидматрасонии дигарро дар ихтиёр дорад. Арзиши ширкат бештар аз 4,5 миллиард доллар тахмин зада мешавад. Аммо қимати ин хариду фурӯш ошкор нашудааст.

Дар соли 2020 VK, ки он замон Mail.ru group ном дошт, бино ба баҳогузории маҷаллаи Форбс, дар байни бузургтарин ширкатҳои Русия дар мақоми чаҳорум қарор гирифта буд.

Амрико аз Русия хост, нерӯҳояшро аз марзи Украина берун кашад

Энтони Блинкен, вазири корҳои хориҷии Амрико ба Сергей Лавров, вазири умури хориҷии Русия гуфтааст, ки Амрико мехоҳад Русия нерӯҳояшро аз наздикии марзи Украина берун кунад ва дар пайи ҳалли дипломатӣ барои коҳиши танишҳо бошад.

Энтони Блинкен ва Сергей Лавров рузи панҷшанбеи 2-юми декабр дар ҳошияи нишасти вазирони корҳои хориҷии кишварҳои узви Созмони Амният ва Ҳамкории Аврупо дар Стокҳолм мулоқот карданд.

Ин мулоқот дар пайи танишҳо бар сари афзоиши ҳузури низомии Русия дар наздикии марзи Украина сурат гирифтааст.

Блинкен дар нишасти хабарӣ ба Маскав ҳушдор дод, ки иқдоми низомии Русия алайҳи кишвари ҳамсояаш Украина "паёмадҳои вазнин" дар пай хоҳад дошт.

Ӯ афзуд, "дар мулоқот бо вазири хориҷии Русия бисёр рушан гуфтам, ки ҳамлаи Русия ба Украина паёмадҳои ҷиддӣ хоҳад дошт. Аз ҷумла, иқдомоти иқтисодӣ бо бо таъсиргузории бисёр сахт, ки мо дар гузашта аз анҷоми он худдорӣ карда будем".

Сергей Лавров ҳам ба Энтони Блинкен гуфтааст, ки Маскав ба "замонатҳои амниятии дарозмуддат" ниёз дорад, ки густариши доираи нуфузи НАТО ба тарафи шарқро мутаваққиф кунад.

Вазири хориҷии Русия дар нишасти хабарӣ пас аз мулоқоташ бо Блинкен гуфт, "мо мехоҳем мутмаин шавем, ки садои мо шунида шавад ва нуктаи аслӣ, амнияти мо аст".

Дар ҳоли ҳозир робитаи Маскав ва Вашингтон дар поинтарин сатҳ аз замони хатми Ҷанги Сард, қарор дорад. Ғасби нимҷазираи Қрим аз суи Русия дар соли 2014 ва ҳимояти Маскав аз ҷудоихоҳон дар шарқи Украина, дахолати гумоштагони Русия дар интихоботи Амрико ва заҳролуд ва сипас зиндонӣ кардани Алексей Навалний, яке аз мухолифони ҳукумати Путин, аз сабабҳои бад шудани муносибати ду кишвар аст.

Маълумот дар бораи дороиҳои хонаводаи Тоқаевро дар Русия махфӣ гардониданд

Қосимҷомарт Тоқаев, раиси ҷумҳури Қазоқистон.

Маълумот дар бораи иншооти гаронбаҳои хонаводаи президенти Қазоқистон Қосимҷомарт Тоқаевро аз пойгоҳи маълумотии Росреестри Русия пок карданд. Дар ин бора тими сиёсатмадори мухолифи ҳукумати Русия Алексей Навалний хабар дод.

Дар таҳқиқоти ин тим, ки рӯзи 2-юми декабр нашр шуд, омадааст, маълумот дар бораи манзили Тимур ва Надежда Тоқаева, писар ва ҳамсари пешини президенти Қазоқистон, ҳамроҳ бо иттилоъ дар бораи дороиҳои мансабдорону кормандони мақомоти махсус, дастнорас гардидааст.

Бино ба маълумоти мавҷуд, як манзили иборат аз 196 метри мураббаъ дар ноҳияи Хамовники Москва ба Тимур Тоқаев, писари Қосимҷомарт тааллуқ дорад. Ин манзил соли 2010 ба номи вай сабт шудааст. Тими Навалний манзили дигаре иборат аз 167 метри мураббаъро дар ноҳияи Мешани Москва пайдо кардаанд, ки соҳибаш Надежда Давидовна Тоқаева аст.

"Росреестр" кай ва ба чӣ далеле соҳибони ин манзилҳоро пинҳон кардааст, маълум нест.

Тоқаев дар соли 2019 ба сари қудрат омад. Он замон Нурсултон Назарбоев, президенти пешини Қазоқистон аз мақом истеъфо дод.

Созмони ҷаҳонии тандурустӣ аз набудани КОВИД-19 дар Туркманистон шубҳа кард

Маъмурияти Созмони ҷаҳонии тандурустӣ (СҶТ) фаъолияташро дар Туркманистон ба поён расонида, аз мақомоти он кишвар даъват кард, "талошҳо барои пайдо кардани коронавирусро бештар кунанд".

Ба ин тартиб, СҶТ бори дигар изҳороти мақомоти Туркманистон дар мавриди мавҷуд набудани ҳолатҳои гирифторӣ ба коронавирусро дар он кишвар зери шубҳа гузошт.

Бино ба иттилоияе, ки дар сомонаи намояндагии СММ дар Туркманистон нашр шудааст, гуруҳи коршиносони СҶТ маъмурияти якҳафтаинаашро дар Туркманистон ба поён расонидааст.

Маъмурияти СҶТ то ин замон изҳороти мақомоти Туркманистонро дар мавриди набуди ҳолатҳои гирифторӣ ба коронавирус дар ин кишвар зери шубҳа гузошта буданд.

"Коронавирус ду сол аст, ки дар дунё паҳн шудааст. Аз нуқтаи назари илмӣ, хеле эҳтимоли кам мавҷуд аст, ки он ба Туркманистон нарасида бошад", - гуфта буд пизишк Кетрин Смоллвуд, як мақомдори СҶТ дар мусоҳиба бо Бӣ-Бӣ-Сӣ.

Туркманистон аз оғози вабои коронавирус борҳо эълом доштааст, ки дар ин кишвар ҳеч ҳолати гирифторӣ ба коронавирус сабт нашудааст.

Аммо расонаҳо ба нақл аз кормандони соҳаи тибби он кишвар борҳо аз бедодии коронавирус хабар додаанд.

Озмуни Раёсати корҳои дохилии Душанбе барои ошкор кардани ҷинояткориҳо

Шаҳри Душанбе. Акс аз бойгонӣ.

Раёсати корҳои дохилии шаҳри Душанбе гуфт, бо мақсади тақвияти ҳамкории пулис бо аҳолӣ дар мавриди пешгирӣ ва мубориза алайҳи ҳама гуна кирдорҳои зиддиҳуқуқӣ, озмунеро эълом кардааст.

Иштирокдорони озмун метавонанд дилхоҳ кирдори зиддиҳуқуқӣ, ҳуқуқвайронкуниву ҳодисаҳои ҷиноӣ, аз қабили муноқиша, беназмӣ, озори лафзӣ ва паст задани шаъну шарафи инсон, вайрон кардани қоидаҳои ҳаракати роҳро расм ва ё ба навор гирифта, тавассути мессенҷерҳои Вотсап, Вайбер, Имо ва Телеграмми ин ниҳод фиристанд.

"Махфӣ мондани шахсияти иштирокчиёни озмун кафолат дода шуда, барои ғолибони 3 ҷойи ифтихорӣ бо мукофотпулӣ - барои ҷои аввал 5 ҳазор сомонӣ, барои ҷои дувум 3 ҳазор сомонӣ, барои ҷои сеюм 2 ҳазор сомонӣ - муқаррар гардидааст", - омадааст дар иттилоияи раёсат.

Сокинони Душанбе ба ин озмуни Раёсати корҳои дохилии пойтахт назарҳои гуногун доранд. Сиёсатшинос Абдумалик Қодиров аз ин ташаббуси раёсат ҷонибдорӣ мекунад. "Вақте мақомоти ҳифзи ҳуқуқ мехоҳанд, мушкили ҷинояткориро дар ҳамкорӣ бо сокинон ҳал кунанд, хеле хуб ва барои ман ҳам хеле ҷолиб мебошад".

Маводи пешниҳодиро дар озмун комиссия таҳлилу баррасӣ ва баҳогузорӣ карда, ба навору расм бартарӣ дода мешаванд, агар хусусияти пешгирикунанда ва ошкорнамоии ҷиноятҳои вазнин ва махсусан вазнинро дошта бошанд.

Муҳлати ахири қабули аксу наворҳо 25 декабри соли 2021 гуфта шудааст.

Қамчибек Тошиев: Вазъ дар марз бо Тоҷикистон "зери назорат аст"

Қамчибек Тошиев

Қамчибек Тошиев, раиси Кумитаи давлатии амнияти миллии Қирғизистон, гуфт, вазъ дар сарҳад бо Тоҷикистон "зери назорат аст". Вай дар ин бора рӯзи 2-юми декабр дар мусоҳиба бо шабакаи NUR-ТВ изҳори назар кард.

"Дар 3-4 рӯзи охир вазъ печида шуда, нигарониҳоро ба бор оварда буд. Рӯзи 1-уми декабр, нисфи шаб, музокироти дуҷониба дар деҳаи Куктош ба поён расид. Вазъ зери назорат аст, сарҳадҳо мустаҳкам карда шудаанд ва мо дар хидмат ҳастем," – афзудааст Тошиев.

Рӯзи якуми декабр сокинони деҳаи Сомониёни ҷамоати Чоркӯҳи Исфара дар бораи рабуда ва латукӯб шудани як омӯзгори 59-сола дар марз бо Қирғизистон хабар доданд. Раиси деҳаи Куктоши ноҳияи Бодканди Қирғизистон баръакс иддао кард, ки шаҳрвандони Тоҷикистон як сокини ин деҳаро ҳангоми ҷустуҷӯи чорво задаанд.

Хадамоти марзбонии Қирғизистон шаби 1-уми декабр гуфт, дар сарҳад "аз самти Тоҷикистон аз туфанги шикорӣ 7-8 тир холӣ карда шудааст". Мақомоти Тоҷикистон ҳанӯз дар мавриди ҳарду ҳодиса ва ҷузъиёти музокирот шарҳе надодаанд.

Ҷониби Қирғизистон мегӯяд, дар музокирот ҳокимони ноҳияҳои наздимарзӣ ва намояндагони ниҳодҳои қудратӣ иштирок доштанд ва ба ин натиҷа расиданд, ки аз 2-юми декабр минтақаҳои марзиро муштарак ё якҷоя посбонӣ мекунанд. Феълан вазъ дар сарҳад муътадил гуфта шудааст.

Марзи Тоҷикистону Қирғизистон солҳо боз ба далели номуайян будани бахше аз сарҳад доғ ва мояи ҷанҷолу задухӯрдҳост. Низои мусаллаҳонаи моҳи апрели имсол, ки аз ду ҷониб даҳҳо кушта ва захмӣ бар ҷой гузошт, робитаи ду кишвари болооби Осиёи Марказиро сарду печида кард. Ҳарду тараф ҳамвора якдигарро ба сар задани муноқиша ва кӯшиши ноором кардани вазъ гунаҳкор мекунанд.

Сафири Афғонистон "не"-и СММ-ро "оғози поёни ҳукумати Толибон" донист. ВИДЕО

Сафир дар Душанбе: "Ин поёни ҳукумати Толибон аст"
лутфан мунтазир бошед

Феълан кор намекунад

0:00 0:01:31 0:00

Гурӯҳе аз паноҳандагон ва сафиру мансабдорони ҳукумати барканоршудаи Афғонистон дар Тоҷикистон аз тасмими надодани курсии Кобул ба Толибон дар Созмони Милали Муттаҳид ситоиш карданд. Нишаст рӯзи 2-юми декабр дар Душанбе баргузор шуд.

Муҳаммад Заҳир Ағбар, сафири Афғонистон дар Душанбе, тасмими Созмони Милалро таърихӣ номид: "Ба ин бовар ҳастем, ки оғози шикасти Толибон аз ҳамин рӯзи таърихӣ шуруъ шуда. Мо як бори дигар аз тамоми ҳамкорон дар намояндагиҳои сиёсии Афғонистон ташаккур мекунем. Агар садое ҳам накашиданд, ақаллан парчами серанги Афғонистонро дар намояндагиҳои худ боло нигоҳ доштанд."

Сафири ҳукумати пешини Афғонистон аз посух додан ба суоли он ки шуморе аз паноҳандаггони афғонро аз Тоҷикистон ба Афғонистон бозпас фиристодаанд, худдорӣ кард. Ӯ гуфт: "Масоили баъдӣ шуда метавонад, ки як рӯзи дигар суҳбат кунем, салому алайкум."

Ҷаноби Ағбар дар робита ба даъвати СММ аз кишварҳои ҳамсояи Афғонистон, аз ҷумла Тоҷикистон, ки марзҳои худро барои паноҳандагон боз ва аз ихроҷи онҳо бозпас ба Афғонистон худдорӣ кунанд, чунин посух дод: "Ин тасмимгирии кишварҳост ва дар он кадом тарҳи мушаххас ва назари мушаххасе надорам."

Комиссариати олии Созмони Милал дар умури паноҳандагон як рӯз пеш аз он ибрози нигаронӣ кард, ки бозпас фиристодани афғонҳо аз Покистону Эрон ва Тоҷикистон пас аз тасарруфи Толибон "афзоиш ёфтааст". Он аз мақомоти ҳамаи кишварҳо даъват кардааст, ки депорти паноҳҷӯёни афғонистониро бас кунанд.

Ёфтҳои бештар

XS
SM
MD
LG